༦. པ་ཏི་ཊྛི་ཏ་སུ་ཏྟཾ

༥༢༦. ‘‘ཨེ་ཀ་དྷ་མྨེ པ་ཏི་ཊྛི་ཏ་སྶ, བྷི་ཀྑ་ཝེ, བྷི་ཀྑུ་ནོ པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི ཧོ་ནྟི སུ་བྷཱ་ཝི་ཏཱ་ནི. ཀ་ཏ་མ་སྨིཾ ཨེ་ཀ་དྷ་མྨེ? ཨ་པྤ་མཱ་དེ. ཀ་ཏ་མོ ཙ བྷི་ཀྑ་ཝེ, ཨ་པྤ་མཱ་དོ? ཨི་དྷ, བྷི་ཀྑ་ཝེ, བྷི་ཀྑུ ཙི་ཏྟཾ ར་ཀྑ་ཏི ཨཱ་ས་ཝེ་སུ ཙ སཱ་ས་ཝེ་སུ ཙ དྷ་མྨེ་སུ. ཏ་སྶ ཙི་ཏྟཾ ར་ཀྑ་ཏོ ཨཱ་ས་ཝེ་སུ ཙ སཱ་ས་ཝེ་སུ ཙ དྷ་མྨེ་སུ ས་དྡྷི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ཝཱི་རི་ཡི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ས་ཏི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ས་མཱ་དྷི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. པ་ཉྙི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ཨེ་ཝ་མྤི ཁོ, བྷི་ཀྑ་ཝེ, ཨེ་ཀ་དྷ་མྨེ པ་ཏི་ཊྛི་ཏ་སྶ བྷི་ཀྑུ་ནོ པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི ཧོ་ནྟི སུ་བྷཱ་ཝི་ཏཱ་ནཱི’’ཏི. ཚ་ཊྛཾ.