༦. སཱུ་ཀ་ར་ཁ་ཏ་ཝ་གྒོ
༡. སཱ་ལ་སུ་ཏྟཾ
༥༢༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་ལེ་སུ ཝི་ཧ་ར་ཏི སཱ་ལཱ་ཡ བྲཱ་ཧྨ་ཎ་གཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘སེ་ཡྻ་ཐཱ་པི, བྷི་ཀྑ་ཝེ, ཡེ ཀེ་ཙི ཏི་ར་ཙྪཱ་ན་ག་ཏཱ པཱ་ཎཱ, སཱི་ཧོ མི་ག་རཱ་ཛཱ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – ཐཱ་མེ་ན ཛ་ཝེ་ན སཱུ་རེ་ན [སཱུ་རི་ཡེ་ན (སཱི. སྱཱ. ཀཾ.)]; ཨེ་ཝ་མེ་ཝ ཁོ, བྷི་ཀྑ་ཝེ, ཡེ ཀེ་ཙི བོ་དྷི་པ་ཀྑི་ཡཱ དྷ་མྨཱ, པ་ཉྙི་ནྡྲི་ཡཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡ’’.
‘‘ཀ་ཏ་མེ ཙ, བྷི་ཀྑ་ཝེ, བོ་དྷི་པ་ཀྑི་ཡཱ དྷ་མྨཱ? ས་དྡྷི་ནྡྲི་ཡཾ, བྷི་ཀྑ་ཝེ, བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི; ཝཱི་རི་ཡི་ནྡྲི་ཡཾ བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི; ས་ཏི་ནྡྲི་ཡཾ བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི; ས་མཱ་དྷི་ནྡྲི་ཡཾ བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི; པ་ཉྙི་ནྡྲི་ཡཾ བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི. སེ་ཡྻ་ཐཱ་པི, བྷི་ཀྑ་ཝེ, ཡེ ཀེ་ཙི ཏི་ར་ཙྪཱ་ན་ག་ཏཱ པཱ་ཎཱ, སཱི་ཧོ མི་ག་རཱ་ཛཱ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – ཐཱ་མེ་ན ཛ་ཝེ་ན སཱུ་རེ་ན; ཨེ་ཝ་མེ་ཝ ཁོ, བྷི་ཀྑ་ཝེ, ཡེ ཀེ་ཙི བོ་དྷི་པ་ཀྑི་ཡཱ དྷ་མྨཱ, པ་ཉྙི་ནྡྲི་ཡཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡཱ’’ཏི. པ་ཋ་མཾ.
༢. མ་ལླི་ཀ་སུ་ཏྟཾ
༥༢༢. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ མ་ལླེ་སུ [མ་ལླ་ཀེ་སུ (སཱི. སྱཱ. ཀཾ.), མ་ལླི་ཀེ་སུ (ཀ.)] ཝི་ཧ་ར་ཏི ཨུ་རུ་ཝེ་ལ་ཀ་པྤཾ ནཱ་མ མ་ལླཱ་ནཾ ནི་ག་མོ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ན ཨུ་པྤ་ནྣཾ ཧོ་ཏི ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ཨུ་པྤ་ནྣཾ ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི’’.
‘‘སེ་ཡྻ་ཐཱ་པི, བྷི་ཀྑ་ཝེ, ཡཱ་ཝ་ཀཱི་ཝ་ཉྩ ཀཱུ་ཊཱ་གཱ་ར་སྶ ཀཱུ་ཊཾ ན ཨུ་སྶི་ཏཾ ཧོ་ཏི, ནེ་ཝ ཏཱ་ཝ གོ་པཱ་ན་སཱི་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ གོ་པཱ་ན་སཱི་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཀཱུ་ཊཱ་གཱ་ར་སྶ ཀཱུ་ཊཾ ཨུ་སྶི་ཏཾ ཧོ་ཏི, ཨ་ཐ གོ་པཱ་ན་སཱི་ནཾ ས་ཎྛི་ཏི ཧོ་ཏི, ཨ་ཐ གོ་པཱ་ན་སཱི་ནཾ ཨ་ཝ་ཊྛི་ཏི ཧོ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཡཱ་ཝ་ཀཱི་ཝ་ཉྩ ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ན ཨུ་པྤ་ནྣཾ ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ཨུ་པྤ་ནྣཾ ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ…པེ… ཨ་ཝ་ཊྛི་ཏི ཧོ་ཏི.
‘‘ཀ་ཏ་མེ་སཾ ཙ་ཏུ་ནྣཾ? ས་དྡྷི་ནྡྲི་ཡ་སྶ, ཝཱི་རི་ཡི་ནྡྲི་ཡ་སྶ, ས་ཏི་ནྡྲི་ཡ་སྶ, ས་མཱ་དྷི་ནྡྲི་ཡ་སྶ. པ་ཉྙ་ཝ་ཏོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཏ་ད་ནྭ་ཡཱ ས་དྡྷཱ ས་ཎྛཱ་ཏི, ཏ་ད་ནྭ་ཡཾ ཝཱི་རི་ཡཾ ས་ཎྛཱ་ཏི, ཏ་ད་ནྭ་ཡཱ ས་ཏི ས་ཎྛཱ་ཏི, ཏ་ད་ནྭ་ཡོ ས་མཱ་དྷི ས་ཎྛཱ་ཏཱི’’ཏི. དུ་ཏི་ཡཾ.
༣. སེ་ཁ་སུ་ཏྟཾ
༥༢༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཨ་ཏྠི ནུ ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནེ་ཡྻ, ཨ་སེ་ཁོ བྷི་ཀྑུ ཨ་སེ་ཁ་བྷཱུ་མི་ཡཾ ཋི་ཏོ ‘ཨ་སེ་ཁོ་སྨཱི’ཏི པ་ཛཱ་ནེ་ཡྻཱ’’ཏི?
བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘ཨ་ཏྠི, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནེ་ཡྻ, ཨ་སེ་ཁོ བྷི་ཀྑུ ཨ་སེ་ཁ་བྷཱུ་མི་ཡཾ ཋི་ཏོ ‘ཨ་སེ་ཁོ་སྨཱི’ཏི པ་ཛཱ་ནེ་ཡྻ’’.
‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནཱ་ཏི? ཨི་དྷ, བྷི་ཀྑ་ཝེ, སེ་ཁོ བྷི་ཀྑུ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ པ་ཛཱ་ནཱ་ཏི, ‘ཨ་ཡཾ དུ་ཀྑ་ས་མུ་ད་ཡོ’ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ‘ཨ་ཡཾ དུ་ཀྑ་ནི་རོ་དྷོ’ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི – ཨ་ཡ་མྤི ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནཱ་ཏི’’.
‘‘པུ་ན ཙ་པ་རཾ, བྷི་ཀྑ་ཝེ, སེ་ཁོ བྷི་ཀྑུ ཨི་ཏི པ་ཊི་ས་ཉྩི་ཀྑ་ཏི – ‘ཨ་ཏྠི ནུ ཁོ ཨི་ཏོ བ་ཧི་དྡྷཱ ཨ་ཉྙོ ས་མ་ཎོ ཝཱ བྲཱ་ཧྨ་ཎོ ཝཱ ཡོ ཨེ་ཝཾ བྷཱུ་ཏཾ ཏ་ཙྪཾ ཏ་ཐཾ དྷ་མྨཾ དེ་སེ་ཏི ཡ་ཐཱ བྷ་ག་ཝཱ’ཏི? སོ ཨེ་ཝཾ པ་ཛཱ་ནཱ་ཏི – ‘ན་ཏྠི ཁོ ཨི་ཏོ བ་ཧི་དྡྷཱ ཨ་ཉྙོ ས་མ་ཎོ ཝཱ བྲཱ་ཧྨ་ཎོ ཝཱ ཡོ ཨེ་ཝཾ བྷཱུ་ཏཾ ཏ་ཙྪཾ ཏ་ཐཾ དྷ་མྨཾ དེ་སེ་ཏི ཡ་ཐཱ བྷ་ག་ཝཱ’ཏི. ཨ་ཡ་མྤི ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནཱ་ཏི’’.
‘‘པུ་ན ཙ་པ་རཾ, བྷི་ཀྑ་ཝེ, སེ་ཁོ བྷི་ཀྑུ པ་ཉྩི་ནྡྲི་ཡཱ་ནི པ་ཛཱ་ནཱ་ཏི – ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ, ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ – ཡཾ་ག་ཏི་ཀཱ་ནི ཡཾ་པ་ར་མཱ་ནི ཡཾ་ཕ་ལཱ་ནི ཡཾ་པ་རི་ཡོ་སཱ་ནཱ་ནི. ན ཧེ་ཝ ཁོ ཀཱ་ཡེ་ན ཕུ་སི་ཏྭཱ ཝི་ཧ་ར་ཏི; པ་ཉྙཱ་ཡ ཙ ཨ་ཏི་ཝི་ཛ྄ཛྷ པ་སྶ་ཏི. ཨ་ཡ་མྤི ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ སེ་ཁོ བྷི་ཀྑུ སེ་ཁ་བྷཱུ་མི་ཡཾ ཋི་ཏོ ‘སེ་ཁོ་སྨཱི’ཏི པ་ཛཱ་ནཱ་ཏི’’.
‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨ་སེ་ཁོ བྷི་ཀྑུ ཨ་སེ་ཁ་བྷཱུ་མི་ཡཾ ཋི་ཏོ ‘ཨ་སེ་ཁོ་སྨཱི’ཏི པ་ཛཱ་ནཱ་ཏི? ཨི་དྷ, བྷི་ཀྑ་ཝེ, ཨ་སེ་ཁོ བྷི་ཀྑུ པ་ཉྩི་ནྡྲི་ཡཱ་ནི པ་ཛཱ་ནཱ་ཏི – ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ, ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ – ཡཾ་ག་ཏི་ཀཱ་ནི ཡཾ་པ་ར་མཱ་ནི ཡཾ་ཕ་ལཱ་ནི ཡཾ་པ་རི་ཡོ་སཱ་ནཱ་ནི. ཀཱ་ཡེ་ན ཙ ཕུ་སི་ཏྭཱ ཝི་ཧ་ར་ཏི; པ་ཉྙཱ་ཡ ཙ ཨ་ཏི་ཝི་ཛ྄ཛྷ པ་སྶ་ཏི. ཨ་ཡ་མྤི ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨ་སེ་ཁོ བྷི་ཀྑུ ཨ་སེ་ཁ་བྷཱུ་མི་ཡཾ ཋི་ཏོ ‘ཨ་སེ་ཁོ་སྨཱི’ཏི པ་ཛཱ་ནཱ་ཏི’’.
‘‘པུ་ན ཙ་པ་རཾ, བྷི་ཀྑ་ཝེ, ཨ་སེ་ཁོ བྷི་ཀྑུ ཚ ཨི་ནྡྲི་ཡཱ་ནི པ་ཛཱ་ནཱ་ཏི. ‘ཙ་ཀྑུ་ནྡྲི་ཡཾ, སོ་ཏི་ནྡྲི་ཡཾ, གྷཱ་ནི་ནྡྲི་ཡཾ, ཛི་ཝ྄ཧི་ནྡྲི་ཡཾ, ཀཱ་ཡི་ནྡྲི་ཡཾ, མ་ནི་ནྡྲི་ཡཾ – ཨི་མཱ་ནི ཁོ ཚ ཨི་ནྡྲི་ཡཱ་ནི ས་བྦེ་ན ས་བྦཾ ས་བྦ་ཐཱ ས་བྦཾ ཨ་པ་རི་སེ་སཾ ནི་རུ་ཛ྄ཛྷི་སྶ་ནྟི, ཨ་ཉྙཱ་ནི ཙ ཚ ཨི་ནྡྲི་ཡཱ་ནི ན ཀུ་ཧི་ཉྩི ཀི་སྨི་ཉྩི ཨུ་པྤ་ཛྫི་སྶ་ནྟཱི’ཏི པ་ཛཱ་ནཱ་ཏི. ཨ་ཡ་མྤི ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨ་སེ་ཁོ བྷི་ཀྑུ ཨ་སེ་ཁ་བྷཱུ་མི་ཡཾ ཋི་ཏོ ‘ཨ་སེ་ཁོ་སྨཱི’ཏི པ་ཛཱ་ནཱ་ཏཱི’’ཏི. ཏ་ཏི་ཡཾ.
༤. པ་ད་སུ་ཏྟཾ
༥༢༤. ‘‘སེ་ཡྻ་ཐཱ་པི, བྷི་ཀྑ་ཝེ, ཡཱ་ནི ཀཱ་ནི་ཙི ཛ་ངྒ་ལཱ་ནཾ [ཛ་ངྒ་མཱ་ནཾ (སཱི. པཱི.)] པཱ་ཎཱ་ནཾ པ་ད་ཛཱ་ཏཱ་ནི ས་བྦཱ་ནི ཏཱ་ནི ཧ་ཏྠི་པ་དེ ས་མོ་དྷཱ་ནཾ ག་ཙྪ་ནྟི, ཧ་ཏྠི་པ་དཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – མ་ཧ་ནྟ་ཏྟེ་ན; ཨེ་ཝ་མེ་ཝ ཁོ, བྷི་ཀྑ་ཝེ, ཡཱ་ནི ཀཱ་ནི་ཙི པ་དཱ་ནི བོ་དྷཱ་ཡ སཾ་ཝ་ཏྟ་ནྟི, པ་ཉྙི་ནྡྲི་ཡཾ པ་དཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡ. ཀ་ཏ་མཱ་ནི ཙ, བྷི་ཀྑ་ཝེ, པ་དཱ་ནི བོ་དྷཱ་ཡ སཾ་ཝ་ཏྟ་ནྟི? ས་དྡྷི་ནྡྲི་ཡཾ, བྷི་ཀྑ་ཝེ, པ་དཾ, ཏཾ བོ་དྷཱ་ཡ སཾ་ཝ་ཏྟ་ཏི; ཝཱི་རི་ཡི་ནྡྲི་ཡཾ པ་དཾ, ཏཾ བོ་དྷཱ་ཡ སཾ་ཝ་ཏྟ་ཏི; ས་ཏི་ནྡྲི་ཡཾ པ་དཾ, ཏཾ བོ་དྷཱ་ཡ སཾ་ཝ་ཏྟ་ཏི; ས་མཱ་དྷི་ནྡྲི་ཡཾ པ་དཾ, ཏཾ བོ་དྷཱ་ཡ སཾ་ཝ་ཏྟ་ཏི; པ་ཉྙི་ནྡྲི་ཡཾ པ་དཾ, ཏཾ བོ་དྷཱ་ཡ སཾ་ཝ་ཏྟ་ཏི. སེ་ཡྻ་ཐཱ་པི, བྷི་ཀྑ་ཝེ, ཡཱ་ནི ཀཱ་ནི་ཙི ཛ་ངྒ་ལཱ་ནཾ པཱ་ཎཱ་ནཾ པ་ད་ཛཱ་ཏཱ་ནི ས་བྦཱ་ནི ཏཱ་ནི ཧ་ཏྠི་པ་དེ ས་མོ་དྷཱ་ནཾ ག་ཙྪ་ནྟི, ཧ་ཏྠི་པ་དཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – མ་ཧ་ནྟ་ཏྟེ་ན; ཨེ་ཝ་མེ་ཝ ཁོ, བྷི་ཀྑ་ཝེ, ཡཱ་ནི ཀཱ་ནི་ཙི པ་དཱ་ནི བོ་དྷཱ་ཡ སཾ་ཝ་ཏྟ་ནྟི, པ་ཉྙི་ནྡྲི་ཡཾ པ་དཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡཱ’’ཏི. ཙ་ཏུ་ཏྠཾ.
༥. སཱ་ར་སུ་ཏྟཾ
༥༢༥. ‘‘སེ་ཡྻ་ཐཱ་པི, བྷི་ཀྑ་ཝེ, ཡེ ཀེ་ཙི སཱ་ར་ག་ནྡྷཱ, ལོ་ཧི་ཏ་ཙ་ནྡ་ནཾ ཏེ་སཾ ཨ་གྒ་མ་ཀྑཱ་ཡ་ཏི; ཨེ་ཝ་མེ་ཝ ཁོ བྷི་ཀྑ་ཝེ, ཡེ ཀེ་ཙི བོ་དྷི་པ་ཀྑི་ཡཱ དྷ་མྨཱ, པ་ཉྙི་ནྡྲི་ཡཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡ. ཀ་ཏ་མེ ཙ, བྷི་ཀྑ་ཝེ, བོ་དྷི་པ་ཀྑི་ཡཱ དྷ་མྨཱ? ས་དྡྷི་ནྡྲི་ཡཾ, བྷི་ཀྑ་ཝེ, བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི. ཝཱི་རི་ཡི་ནྡྲི་ཡཾ…པེ… ས་ཏི་ནྡྲི་ཡཾ …པེ… ས་མཱ་དྷི་ནྡྲི་ཡཾ…པེ… པ་ཉྙི་ནྡྲི་ཡཾ བོ་དྷི་པ་ཀྑི་ཡོ དྷ་མྨོ, ཏཾ བོ་དྷཱ་ཡ སཾ་ཝ་ཏྟ་ཏི. སེ་ཡྻ་ཐཱ་པི, བྷི་ཀྑ་ཝེ, ཡེ ཀེ་ཙི སཱ་ར་ག་ནྡྷཱ, ལོ་ཧི་ཏ་ཙ་ནྡ་ནཾ ཏེ་སཾ ཨ་གྒ་མ་ཀྑཱ་ཡ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡེ ཀེ་ཙི བོ་དྷི་པ་ཀྑི་ཡཱ དྷ་མྨཱ, པ་ཉྙི་ནྡྲི་ཡཾ ཏེ་སཾ ཨ་གྒ་མ་ཀྑཱ་ཡ་ཏི, ཡ་དི་དཾ – བོ་དྷཱ་ཡཱ’’ཏི. པ་ཉྩ་མཾ.
༦. པ་ཏི་ཊྛི་ཏ་སུ་ཏྟཾ
༥༢༦. ‘‘ཨེ་ཀ་དྷ་མྨེ པ་ཏི་ཊྛི་ཏ་སྶ, བྷི་ཀྑ་ཝེ, བྷི་ཀྑུ་ནོ པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི ཧོ་ནྟི སུ་བྷཱ་ཝི་ཏཱ་ནི. ཀ་ཏ་མ་སྨིཾ ཨེ་ཀ་དྷ་མྨེ? ཨ་པྤ་མཱ་དེ. ཀ་ཏ་མོ ཙ བྷི་ཀྑ་ཝེ, ཨ་པྤ་མཱ་དོ? ཨི་དྷ, བྷི་ཀྑ་ཝེ, བྷི་ཀྑུ ཙི་ཏྟཾ ར་ཀྑ་ཏི ཨཱ་ས་ཝེ་སུ ཙ སཱ་ས་ཝེ་སུ ཙ དྷ་མྨེ་སུ. ཏ་སྶ ཙི་ཏྟཾ ར་ཀྑ་ཏོ ཨཱ་ས་ཝེ་སུ ཙ སཱ་ས་ཝེ་སུ ཙ དྷ་མྨེ་སུ ས་དྡྷི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ཝཱི་རི་ཡི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ས་ཏི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ས་མཱ་དྷི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. པ་ཉྙི་ནྡྲི་ཡ་མྤི བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི. ཨེ་ཝ་མྤི ཁོ, བྷི་ཀྑ་ཝེ, ཨེ་ཀ་དྷ་མྨེ པ་ཏི་ཊྛི་ཏ་སྶ བྷི་ཀྑུ་ནོ པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི ཧོ་ནྟི སུ་བྷཱ་ཝི་ཏཱ་ནཱི’’ཏི. ཚ་ཊྛཾ.
༧. ས་ཧ་མྤ་ཏི་བྲ་ཧྨ་སུ་ཏྟཾ
༥༢༧. ཨེ་ཀཾ ས་མ་ཡཾ བྷ་ག་ཝཱ ཨུ་རུ་ཝེ་ལཱ་ཡཾ ཝི་ཧ་ར་ཏི ན་ཛྫཱ ནེ་ར་ཉྫ་རཱ་ཡ ཏཱི་རེ ཨ་ཛ་པཱ་ལ་ནི་གྲོ་དྷེ པ་ཋ་མཱ་བྷི་ས་མྦུ་དྡྷོ. ཨ་ཐ ཁོ བྷ་ག་ཝ་ཏོ ར་ཧོ་ག་ཏ་སྶ པ་ཊི་ས་ལླཱི་ན་སྶ ཨེ་ཝཾ ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི – ‘‘པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་མ་ཏོ་ག་དྷཱ་ནི ཧོ་ནྟི ཨ་མ་ཏ་པ་རཱ་ཡ་ཎཱ་ནི ཨ་མ་ཏ་པ་རི་ཡོ་སཱ་ནཱ་ནི. ཀ་ཏ་མཱ་ནི པ་ཉྩ? ས་དྡྷི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཝཱི་རི་ཡི་ནྡྲི་ཡཾ…པེ… ས་ཏི་ནྡྲི་ཡཾ…པེ… ས་མཱ་དྷི་ནྡྲི་ཡཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཨི་མཱ་ནི པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་མ་ཏོ་ག་དྷཱ་ནི ཧོ་ནྟི ཨ་མ་ཏ་པ་རཱ་ཡ་ཎཱ་ནི ཨ་མ་ཏ་པ་རི་ཡོ་སཱ་ནཱ་ནཱི’’ཏི.
ཨ་ཐ ཁོ བྲ་ཧྨཱ ས་ཧ་མྤ་ཏི བྷ་ག་ཝ་ཏོ ཙེ་ཏ་སཱ ཙེ་ཏོ་པ་རི་ཝི་ཏ་ཀྐ་མ་ཉྙཱ་ཡ – སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ; ཨེ་ཝ་མེ་ཝ བྲ་ཧྨ་ལོ་ཀེ ཨ་ནྟ་ར་ཧི་ཏོ བྷ་ག་ཝ་ཏོ པུ་ར་ཏོ པཱ་ཏུ་ར་ཧོ་སི. ཨ་ཐ ཁོ བྲ་ཧྨཱ ས་ཧ་མྤ་ཏི ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨེ་ཝ་མེ་ཏཾ, བྷ་ག་ཝཱ, ཨེ་ཝ་མེ་ཏཾ སུ་ག་ཏ! པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་མ་ཏོ་ག་དྷཱ་ནི ཧོ་ནྟི ཨ་མ་ཏ་པ་རཱ་ཡ་ཎཱ་ནི ཨ་མ་ཏ་པ་རི་ཡོ་སཱ་ནཱ་ནི. ཀ་ཏ་མཱ་ནི པ་ཉྩ? ས་དྡྷི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཨི་མཱ་ནི པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་མ་ཏོ་ག་དྷཱ་ནི ཧོ་ནྟི ཨ་མ་ཏ་པ་རཱ་ཡ་ཎཱ་ནི ཨ་མ་ཏ་པ་རི་ཡོ་སཱ་ནཱ་ནི’’.
‘‘བྷཱུ་ཏ་པུ་བྦཱ་ཧཾ, བྷ་ནྟེ, ཀ་སྶ་པེ ས་མྨཱ་ས་མྦུ་དྡྷེ བྲ་ཧྨ་ཙ་རི་ཡཾ ཨ་ཙ་རིཾ. ཏ་ཏྲ་པི མཾ ཨེ་ཝཾ ཛཱ་ན་ནྟི – ‘ས་ཧ་ཀོ བྷི་ཀྑུ, ས་ཧ་ཀོ བྷི་ཀྑཱུ’ཏི. སོ ཁྭཱ་ཧཾ, བྷ་ནྟེ, ཨི་མེ་སཾ་ཡེ་ཝ པ་ཉྩ་ནྣཾ ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཀཱ་མེ་སུ ཀཱ་མ་ཙྪ་ནྡཾ ཝི་རཱ་ཛེ་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ བྲ་ཧྨ་ལོ་ཀཾ ཨུ་པ་པ་ནྣོ. ཏ་ཏྲ་པི མཾ ཨེ་ཝཾ ཛཱ་ན་ནྟི – ‘བྲ་ཧྨཱ ས་ཧ་མྤ་ཏི, བྲ་ཧྨཱ ས་ཧ་མྤ་ཏཱི’’’ཏི. ‘‘ཨེ་ཝ་མེ་ཏཾ, བྷ་ག་ཝཱ, ཨེ་ཝ་མེ་ཏཾ སུ་ག་ཏ! ཨ་ཧ་མེ་ཏཾ ཛཱ་ནཱ་མི, ཨ་ཧ་མེ་ཏཾ པ་སྶཱ་མི ཡ་ཐཱ ཨི་མཱ་ནི པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་མ་ཏོ་ག་དྷཱ་ནི ཧོ་ནྟི ཨ་མ་ཏ་པ་རཱ་ཡ་ཎཱ་ནི ཨ་མ་ཏ་པ་རི་ཡོ་སཱ་ནཱ་ནཱི’’ཏི. ས་ཏྟ་མཾ.
༨. སཱུ་ཀ་ར་ཁ་ཏ་སུ་ཏྟཾ
༥༢༨. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ སཱུ་ཀ་ར་ཁ་ཏཱ་ཡཾ. ཏ་ཏྲ ཁོ བྷ་ག་ཝཱ ཨཱ་ཡ་སྨ་ནྟཾ སཱ་རི་པུ་ཏྟཾ ཨཱ་མ་ནྟེ་སི – ‘‘ཀིཾ ནུ ཁོ, སཱ་རི་པུ་ཏྟ, ཨ་ཏྠ་ཝ་སཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི [པ་ཝ་ཏྟེ་ཏཱི་ཏི (སཱི.)]? ‘‘ཨ་ནུ་ཏྟ་ར་ཉྷི, བྷ་ནྟེ, ཡོ་ག་ཀྑེ་མཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི. ‘‘སཱ་དྷུ སཱ་དྷུ, སཱ་རི་པུ་ཏྟ! ཨ་ནུ་ཏྟ་ར་ཉྷི, སཱ་རི་པུ་ཏྟ, ཡོ་ག་ཀྑེ་མཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི.
‘‘ཀ་ཏ་མོ ཙ, སཱ་རི་པུ་ཏྟ, ཨ་ནུ་ཏྟ་རོ ཡོ་ག་ཀྑེ་མོ ཡཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི? ‘‘ཨི་དྷ, བྷ་ནྟེ, ཁཱི་ཎཱ་ས་ཝོ བྷི་ཀྑུ ས་དྡྷི་ནྡྲི་ཡཾ བྷཱ་ཝེ་ཏི ཨུ་པ་ས་མ་གཱ་མིཾ ས་མྦོ་དྷ་གཱ་མིཾ, ཝཱི་རི་ཡི་ནྡྲི་ཡཾ བྷཱ་ཝེ་ཏི…པེ… ས་ཏི་ནྡྲི་ཡཾ བྷཱ་ཝེ་ཏི…པེ… ས་མཱ་དྷི་ནྡྲི་ཡཾ བྷཱ་ཝེ་ཏི…པེ… པ་ཉྙི་ནྡྲི་ཡཾ བྷཱ་ཝེ་ཏི ཨུ་པ་ས་མ་གཱ་མིཾ ས་མྦོ་དྷ་གཱ་མིཾ. ཨ་ཡཾ ཁོ, བྷ་ནྟེ, ཨ་ནུ་ཏྟ་རོ ཡོ་ག་ཀྑེ་མོ ཡཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི. ‘‘སཱ་དྷུ སཱ་དྷུ, སཱ་རི་པུ་ཏྟ! ཨེ་སོ ཧི, སཱ་རི་པུ་ཏྟ, ཨ་ནུ་ཏྟ་རོ ཡོ་ག་ཀྑེ་མོ ཡཾ ས་མྤ་སྶ་མཱ་ནོ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི.
‘‘ཀ་ཏ་མོ ཙ, སཱ་རི་པུ་ཏྟ, པ་ར་མ་ནི་པ་ཙྩ་ཀཱ་རོ ཡཾ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི? ‘‘ཨི་དྷ, བྷ་ནྟེ, ཁཱི་ཎཱ་ས་ཝོ བྷི་ཀྑུ ས་ཏྠ་རི ས་གཱ་ར་ཝོ ཝི་ཧ་ར་ཏི ས་པྤ་ཏི་སྶོ [ས་པྤ་ཊི་སྶོ (སྱཱ. ཀཾ. ཀ.)], དྷ་མྨེ ས་གཱ་ར་ཝོ ཝི་ཧ་ར་ཏི ས་པྤ་ཏི་སྶོ, ས་ངྒྷེ ས་གཱ་ར་ཝོ ཝི་ཧ་ར་ཏི ས་པྤ་ཏི་སྶོ, སི་ཀྑཱ་ཡ ས་གཱ་ར་ཝོ ཝི་ཧ་ར་ཏི ས་པྤ་ཏི་སྶོ, ས་མཱ་དྷི་སྨིཾ ས་གཱ་ར་ཝོ ཝི་ཧ་ར་ཏི ས་པྤ་ཏི་སྶོ. ཨ་ཡཾ ཁོ, བྷ་ནྟེ, པ་ར་མ་ནི་པ་ཙྩ་ཀཱ་རོ ཡཾ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི. ‘‘སཱ་དྷུ སཱ་དྷུ, སཱ་རི་པུ་ཏྟ! ཨེ་སོ ཧི, སཱ་རི་པུ་ཏྟ, པ་ར་མ་ནི་པ་ཙྩ་ཀཱ་རོ ཡཾ ཁཱི་ཎཱ་ས་ཝོ བྷི་ཀྑུ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ པ་ར་མ་ནི་པ་ཙྩ་ཀཱ་རཾ པ་ཝ་ཏྟ་མཱ་ནོ པ་ཝ་ཏྟ་ཏཱི’’ཏི. ཨ་ཊྛ་མཾ.
༩. པ་ཋ་མ་ཨུ་པྤཱ་ད་སུ་ཏྟཾ
༥༢༩. སཱ་ཝ་ཏྠི་ནི་དཱ་ནཾ. ‘‘པ་ཉྩི་མཱ་ནི, བྷི་ཀྑ་ཝེ, ཨི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་ནུ་པྤ་ནྣཱ་ནི ཨུ་པྤ་ཛྫ་ནྟི, ནཱ་ཉྙ་ཏྲ ཏ་ཐཱ་ག་ཏ་སྶ པཱ་ཏུ་བྷཱ་ཝཱ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཀ་ཏ་མཱ་ནི པ་ཉྩ? ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ, ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ – ཨི་མཱ་ནི ཁོ, བྷི་ཀྑ་ཝེ, པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་ནུ་པྤ་ནྣཱ་ནི ཨུ་པྤ་ཛྫ་ནྟི, ནཱ་ཉྙ་ཏྲ ཏ་ཐཱ་ག་ཏ་སྶ པཱ་ཏུ་བྷཱ་ཝཱ ཨ་ར་ཧ་ཏོ ས་མྨཱ་ས་མྦུ་དྡྷ་སྶཱ’’ཏི. ན་ཝ་མཾ.
༡༠. དུ་ཏི་ཡ་ཨུ་པྤཱ་ད་སུ་ཏྟཾ
༥༣༠. ‘‘པ་ཉྩི་མཱ་ནི, བྷི་ཀྑ་ཝེ, ཨི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་ནུ་པྤ་ནྣཱ་ནི ཨུ་པྤ་ཛྫ་ནྟི, ནཱ་ཉྙ་ཏྲ སུ་ག་ཏ་ཝི་ན་ཡཱ. ཀ་ཏ་མཱ་ནི པ་ཉྩ? ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ, ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ – ཨི་མཱ་ནི ཁོ, བྷི་ཀྑ་ཝེ, པ་ཉྩི་ནྡྲི་ཡཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨ་ནུ་པྤ་ནྣཱ་ནི ཨུ་པྤ་ཛྫ་ནྟི, ནཱ་ཉྙ་ཏྲ སུ་ག་ཏ་ཝི་ན་ཡཱ’’ཏི. ད་ས་མཾ.
སཱུ་ཀ་ར་ཁ་ཏ་ཝ་གྒོ ཚ་ཊྛོ.
ཏ་སྶུ་དྡཱ་ནཾ –
སཱ་ལཾ མ་ལླི་ཀཾ སེ་ཁོ ཙ, པ་དཾ སཱ་རཾ པ་ཏི་ཊྛི་ཏཾ;
བྲ་ཧྨ་སཱུ་ཀ་ར་ཁ་ཏཱ་ཡོ, ཨུ་པྤཱ་དཱ ཨ་པ་རེ དུ་ཝེ་ཏི.