༢. མ་ལླི་ཀ་སུ་ཏྟཾ

༥༢༢. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ མ་ལླེ་སུ [མ་ལླ་ཀེ་སུ (སཱི. སྱཱ. ཀཾ.), མ་ལླི་ཀེ་སུ (ཀ.)] ཝི་ཧ་ར་ཏི ཨུ་རུ་ཝེ་ལ་ཀ་པྤཾ ནཱ་མ མ་ལླཱ་ནཾ ནི་ག་མོ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ན ཨུ་པྤ་ནྣཾ ཧོ་ཏི ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ཨུ་པྤ་ནྣཾ ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི’’.

‘‘སེ་ཡྻ་ཐཱ་པི, བྷི་ཀྑ་ཝེ, ཡཱ་ཝ་ཀཱི་ཝ་ཉྩ ཀཱུ་ཊཱ་གཱ་ར་སྶ ཀཱུ་ཊཾ ན ཨུ་སྶི་ཏཾ ཧོ་ཏི, ནེ་ཝ ཏཱ་ཝ གོ་པཱ་ན་སཱི་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ གོ་པཱ་ན་སཱི་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཀཱུ་ཊཱ་གཱ་ར་སྶ ཀཱུ་ཊཾ ཨུ་སྶི་ཏཾ ཧོ་ཏི, ཨ་ཐ གོ་པཱ་ན་སཱི་ནཾ ས་ཎྛི་ཏི ཧོ་ཏི, ཨ་ཐ གོ་པཱ་ན་སཱི་ནཾ ཨ་ཝ་ཊྛི་ཏི ཧོ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཡཱ་ཝ་ཀཱི་ཝ་ཉྩ ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ན ཨུ་པྤ་ནྣཾ ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ས་ཎྛི་ཏི ཧོ་ཏི, ནེ་ཝ ཏཱ་ཝ ཙ་ཏུ་ནྣཾ ཨི་ནྡྲི་ཡཱ་ནཾ ཨ་ཝ་ཊྛི་ཏི ཧོ་ཏི. ཡ་ཏོ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཨ་རི་ཡ་ཉཱ་ཎཾ ཨུ་པྤ་ནྣཾ ཧོ་ཏི, ཨ་ཐ ཙ་ཏུ་ནྣཾ ཨི་ནྡྲི་ཡཱ་ནཾ…པེ… ཨ་ཝ་ཊྛི་ཏི ཧོ་ཏི.

‘‘ཀ་ཏ་མེ་སཾ ཙ་ཏུ་ནྣཾ? ས་དྡྷི་ནྡྲི་ཡ་སྶ, ཝཱི་རི་ཡི་ནྡྲི་ཡ་སྶ, ས་ཏི་ནྡྲི་ཡ་སྶ, ས་མཱ་དྷི་ནྡྲི་ཡ་སྶ. པ་ཉྙ་ཝ་ཏོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཏ་ད་ནྭ་ཡཱ ས་དྡྷཱ ས་ཎྛཱ་ཏི, ཏ་ད་ནྭ་ཡཾ ཝཱི་རི་ཡཾ ས་ཎྛཱ་ཏི, ཏ་ད་ནྭ་ཡཱ ས་ཏི ས་ཎྛཱ་ཏི, ཏ་ད་ནྭ་ཡོ ས་མཱ་དྷི ས་ཎྛཱ་ཏཱི’’ཏི. དུ་ཏི་ཡཾ.