༥. ཛ་རཱ་ཝ་གྒོ

༡. ཛ་རཱ་དྷ་མྨ་སུ་ཏྟཾ

༥༡༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཏེ་ན ཁོ པ་ན ས་མ་ཡེ་ན བྷ་ག་ཝཱ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ པ་ཙྪཱ་ཏ་པེ ནི་སི་ནྣོ ཧོ་ཏི པི་ཊྛིཾ ཨོ་ཏཱ་པ་ཡ་མཱ་ནོ.

ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ བྷ་ག་ཝ་ཏོ ག་ཏྟཱ་ནི པཱ་ཎི་ནཱ ཨ་ནོ་མ་ཛྫ་ནྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཙྪ་རི་ཡཾ, བྷ་ནྟེ, ཨ་བྦྷུ་ཏཾ, བྷ་ནྟེ! ན ཙེ་ཝཾ དཱ་ནི, བྷ་ནྟེ, བྷ་ག་ཝ་ཏོ ཏཱ་ཝ པ་རི་སུ་དྡྷོ ཚ་ཝི་ཝ་ཎྞོ པ་རི་ཡོ་དཱ་ཏོ, སི་ཐི་ལཱ་ནི ཙ ག་ཏྟཱ་ནི ས་བྦཱ་ནི ཝ་ལི་ཡ་ཛཱ་ཏཱ་ནི, པུ་ར་ཏོ པ་བྦྷཱ་རོ ཙ ཀཱ་ཡོ, དི་སྶ་ཏི ཙ ཨི་ནྡྲི་ཡཱ་ནཾ ཨ་ཉྙ་ཐ་ཏྟཾ – ཙ་ཀྑུ་ནྡྲི་ཡ་སྶ སོ་ཏི་ནྡྲི་ཡ་སྶ གྷཱ་ནི་ནྡྲི་ཡ་སྶ ཛི་ཝ྄ཧི་ནྡྲི་ཡ་སྶ ཀཱ་ཡི་ནྡྲི་ཡ་སྶཱ’’ཏི.

‘‘ཨེ་ཝ་ཉྷེ་ཏཾ, ཨཱ་ན་ནྡ, ཧོ་ཏི – ཛ་རཱ་དྷ་མྨོ ཡོ་བྦ་ཉྙེ, བྱཱ་དྷི་དྷ་མྨོ ཨཱ་རོ་གྱེ, མ་ར་ཎ་དྷ་མྨོ ཛཱི་ཝི་ཏེ. ན ཙེ་ཝ ཏཱ་ཝ པ་རི་སུ་དྡྷོ ཧོ་ཏི ཚ་ཝི་ཝ་ཎྞོ པ་རི་ཡོ་དཱ་ཏོ, སི་ཐི་ལཱ་ནི ཙ ཧོ་ནྟི ག་ཏྟཱ་ནི ས་བྦཱ་ནི ཝ་ལི་ཡ་ཛཱ་ཏཱ་ནི, པུ་ར་ཏོ པ་བྦྷཱ་རོ ཙ ཀཱ་ཡོ, དི་སྶ་ཏི ཙ ཨི་ནྡྲི་ཡཱ་ནཾ ཨ་ཉྙ་ཐ་ཏྟཾ – ཙ་ཀྑུ་ནྡྲི་ཡ་སྶ སོ་ཏི་ནྡྲི་ཡ་སྶ གྷཱ་ནི་ནྡྲི་ཡ་སྶ ཛི་ཝ྄ཧི་ནྡྲི་ཡ་སྶ ཀཱ་ཡི་ནྡྲི་ཡ་སྶཱ’’ཏི.

‘‘ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ ཙ སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –

‘‘དྷཱི ཏཾ ཛ་མྨི ཛ་རེ ཨ་ཏྠུ, དུ་བྦ་ཎྞ་ཀ་ར་ཎཱི ཛ་རེ;

ཏཱ་ཝ མ་ནོ་ར་མཾ བི་མྦཾ, ཛ་རཱ་ཡ ཨ་བྷི་མ་དྡི་ཏཾ.

‘‘ཡོ་པི ཝ་སྶ་ས་ཏཾ ཛཱི་ཝེ, སོ་པི མ་ཙྩུ་པ་རཱ་ཡ་ཎོ [ས་བྦེ མ་ཙྩུ་པ་རཱ་ཡ་ནཱ (སྱཱ. ཀཾ. ཀ.)];

ན ཀི་ཉྩི པ་རི་ཝ་ཛྫེ་ཏི, ས་བྦ་མེ་ཝཱ་བྷི་མ་དྡ་ཏཱི’’ཏི. པ་ཋ་མཾ;

༢. ཨུ་ཎྞཱ་བྷ་བྲཱ་ཧྨ་ཎ་སུ་ཏྟཾ

༥༡༢. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨུ་ཎྞཱ་བྷོ བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨུ་ཎྞཱ་བྷོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘པ་ཉྩི་མཱ་ནི, བྷོ གོ་ཏ་མ, ཨི་ནྡྲི་ཡཱ་ནི ནཱ་ནཱ་ཝི་ས་ཡཱ་ནི ནཱ་ནཱ་གོ་ཙ་རཱ་ནི, ན ཨ་ཉྙ་མ་ཉྙ་སྶ གོ་ཙ་ར་ཝི་ས་ཡཾ པ་ཙྩ་ནུ་བྷོ་ནྟི. ཀ་ཏ་མཱ་ནི པ་ཉྩ? ཙ་ཀྑུ་ནྡྲི་ཡཾ, སོ་ཏི་ནྡྲི་ཡཾ, གྷཱ་ནི་ནྡྲི་ཡཾ, ཛི་ཝ྄ཧི་ནྡྲི་ཡཾ, ཀཱ་ཡི་ནྡྲི་ཡཾ. ཨི་མེ་སཾ ནུ ཁོ, བྷོ གོ་ཏ་མ, པ་ཉྩ་ནྣཾ ཨི་ནྡྲི་ཡཱ་ནཾ ནཱ་ནཱ་ཝི་ས་ཡཱ་ནཾ ནཱ་ནཱ་གོ་ཙ་རཱ་ནཾ ན ཨ་ཉྙ་མ་ཉྙ་སྶ གོ་ཙ་ར་ཝི་ས་ཡཾ པ་ཙྩ་ནུ་བྷོ་ནྟཱ་ནཾ ཀིཾ པ་ཊི་ས་ར་ཎཾ, ཀོ ཙ ནེ་སཾ གོ་ཙ་ར་ཝི་ས་ཡཾ པ་ཙྩ་ནུ་བྷོ་ཏཱི’’ཏི?

‘‘པ་ཉྩི་མཱ་ནི, བྲཱ་ཧྨ་ཎ, ཨི་ནྡྲི་ཡཱ་ནི ནཱ་ནཱ་ཝི་ས་ཡཱ་ནི ནཱ་ནཱ་གོ་ཙ་རཱ་ནི ན ཨ་ཉྙ་མ་ཉྙ་སྶ གོ་ཙ་ར་ཝི་ས་ཡཾ པ་ཙྩ་ནུ་བྷོ་ནྟི. ཀ་ཏ་མཱ་ནི པ་ཉྩ? ཙ་ཀྑུ་ནྡྲི་ཡཾ, སོ་ཏི་ནྡྲི་ཡཾ, གྷཱ་ནི་ནྡྲི་ཡཾ, ཛི་ཝ྄ཧི་ནྡྲི་ཡཾ, ཀཱ་ཡི་ནྡྲི་ཡཾ. ཨི་མེ་སཾ ཁོ, བྲཱ་ཧྨ་ཎ, པ་ཉྩ་ནྣཾ ཨི་ནྡྲི་ཡཱ་ནཾ ནཱ་ནཱ་ཝི་ས་ཡཱ་ནཾ ནཱ་ནཱ་གོ་ཙ་རཱ་ནཾ ན ཨ་ཉྙ་མ་ཉྙ་སྶ གོ་ཙ་ར་ཝི་ས་ཡཾ པ་ཙྩ་ནུ་བྷོ་ནྟཱ་ནཾ མ་ནོ པ་ཊི་ས་ར་ཎཾ, མ་ནོ་ཝ ནེ་སཾ གོ་ཙ་ར་ཝི་ས་ཡཾ པ་ཙྩ་ནུ་བྷོ་ཏཱི’’ཏི.

‘‘མ་ན་སྶ པ་ན, བྷོ གོ་ཏ་མ, ཀིཾ པ་ཊི་ས་ར་ཎ’’ནྟི? ‘‘མ་ན་སྶ ཁོ, བྲཱ་ཧྨ་ཎ, ས་ཏི པ་ཊི་ས་ར་ཎ’’ནྟི. ‘‘ས་ཏི་ཡཱ པ་ན, བྷོ གོ་ཏ་མ, ཀིཾ པ་ཊི་ས་ར་ཎ’’ནྟི? ‘‘ས་ཏི་ཡཱ ཁོ, བྲཱ་ཧྨ་ཎ, ཝི་མུ་ཏྟི པ་ཊི་ས་ར་ཎ’’ནྟི. ‘‘ཝི་མུ་ཏྟི་ཡཱ པ་ན, བྷོ གོ་ཏ་མ, ཀིཾ པ་ཊི་ས་ར་ཎ’’ནྟི? ‘‘ཝི་མུ་ཏྟི་ཡཱ ཁོ, བྲཱ་ཧྨ་ཎ, ནི་བྦཱ་ནཾ པ་ཊི་ས་ར་ཎ’’ནྟི. ‘‘ནི་བྦཱ་ན་སྶ པ་ན, བྷོ གོ་ཏ་མ, ཀིཾ པ་ཊི་ས་ར་ཎ’’ནྟི? ‘‘ཨ་ཙྩ་ཡཱ་སི [ཨ་ཙྩ་ས་རཱ (སཱི. སྱཱ. ཀཾ.), ཨ་ཛ྄ཛྷ་པ་རཾ (པཱི. ཀ.)], བྲཱ་ཧྨ་ཎ, པ་ཉྷཾ, ནཱ་ས་ཀྑི པ་ཉྷ་སྶ པ་རི་ཡ་ནྟཾ ག་ཧེ་ཏུཾ. ནི་བྦཱ་ནོ་ག་དྷ་ཉྷི, བྲཱ་ཧྨ་ཎ, བྲ་ཧྨ་ཙ་རི་ཡཾ ཝུ་སྶ་ཏི ནི་བྦཱ་ན་པ་རཱ་ཡ་ཎཾ ནི་བྦཱ་ན་པ་རི་ཡོ་སཱ་ན’’ནྟི.

ཨ་ཐ ཁོ ཨུ་ཎྞཱ་བྷོ བྲཱ་ཧྨ་ཎོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི.

ཨ་ཐ ཁོ བྷ་ག་ཝཱ ཨ་ཙི་ར་པ་ཀྐ་ནྟེ ཨུ་ཎྞཱ་བྷེ བྲཱ་ཧྨ་ཎེ བྷི་ཀྑཱུ ཨཱ་མ་ནྟེ་སི – ‘‘སེ་ཡྻ་ཐཱ་པི, བྷི་ཀྑ་ཝེ, ཀཱུ་ཊཱ་གཱ་རེ ཝཱ ཀཱུ་ཊཱ་གཱ་ར་སཱ་ལཱ་ཡཾ ཝཱ [ར་སྨི་ཡོ (སྱཱ. ཀ.)] པཱ་ཙཱི་ན་ཝཱ་ཏ་པཱ་ནཱ སཱུ་རི་ཡེ ཨུ་གྒ་ཙྪ་ནྟེ ཝཱ་ཏ་པཱ་ནེ་ན ར་སྨི [ཀཱུ་ཊཱ་གཱ་རཾ ཝཱ ཀཱུ་ཊཱ་གཱ་ར་སཱ་ལཾ ཝཱ ཨུ་ཏྟ་རཱ་ཡ (ཀ. སཱི.)] པ་ཝི་སི་ཏྭཱ ཀྭཱ་སྶ [ཀཱ་ཡ (སྱཱ. ཀ.)] པ་ཏི་ཊྛི་ཏཱ’’ཏི? ‘‘པ་ཙྪི་མཱ་ཡཾ, བྷ་ནྟེ, བྷི་ཏྟི་ཡ’’ནྟི. ‘‘ཨེ་ཝ་མེ་ཝ ཁོ, བྷི་ཀྑ་ཝེ, ཨུ་ཎྞཱ་བྷ་སྶ བྲཱ་ཧྨ་ཎ་སྶ ཏ་ཐཱ་ག་ཏེ ས་དྡྷཱ ནི་ཝི་ཊྛཱ མཱུ་ལ་ཛཱ་ཏཱ པ་ཏི་ཊྛི་ཏཱ ད་ལ༹ྷཱ ཨ་སཾ་ཧཱ་རི་ཡཱ ས་མ་ཎེ་ན ཝཱ བྲཱ་ཧྨ་ཎེ་ན ཝཱ དེ་ཝེ་ན ཝཱ མཱ་རེ་ན ཝཱ བྲ་ཧྨུ་ནཱ ཝཱ ཀེ་ན་ཙི ཝཱ ལོ་ཀ་སྨིཾ. ཨི་མ་མྷི ཙེ, བྷི་ཀྑ་ཝེ, ས་མ་ཡེ ཨུ་ཎྞཱ་བྷོ བྲཱ་ཧྨ་ཎོ ཀཱ་ལ་ངྐ་རེ་ཡྻ, ན་ཏྠི སཾ་ཡོ་ཛ་ནཾ ཡེ་ན སཾ་ཡོ་ཛ་ནེ་ན སཾ་ཡུ་ཏྟོ ཨུ་ཎྞཱ་བྷོ བྲཱ་ཧྨ་ཎོ པུ་ན ཨི་མཾ ལོ་ཀཾ ཨཱ་ག་ཙྪེ་ཡྻཱ’’ཏི. དུ་ཏི་ཡཾ.

༣. སཱ་ཀེ་ཏ་སུ་ཏྟཾ

༥༡༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཀེ་ཏེ ཝི་ཧ་ར་ཏི ཨ་ཉྫ་ན་ཝ་ནེ མི་ག་དཱ་ཡེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཨ་ཏྠི ནུ ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཡཱ་ནི པ་ཉྩི་ནྡྲི་ཡཱ་ནི ཏཱ་ནི པ་ཉྩ བ་ལཱ་ནི ཧོ་ནྟི, ཡཱ་ནི པ་ཉྩ བ་ལཱ་ནི ཏཱ་ནི པ་ཉྩི་ནྡྲི་ཡཱ་ནི ཧོ་ནྟཱི’’ཏི?

‘‘བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ བྷ་ག་ཝཾ་ནེ་ཏྟི་ཀཱ བྷ་ག་ཝཾ་པ་ཊི་ས་ར་ཎཱ. སཱ་དྷུ ཝ་ཏ, བྷ་ནྟེ, བྷ་ག་ཝ་ནྟཾ་ཡེ་ཝ པ་ཊི་བྷཱ་ཏུ ཨེ་ཏ་སྶ བྷཱ་སི་ཏ་སྶ ཨ་ཏྠོ. བྷ་ག་ཝ་ཏོ སུ་ཏྭཱ བྷི་ཀྑཱུ དྷཱ་རེ་སྶ་ནྟཱི’’ཏི. ‘‘ཨ་ཏྠི, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཡཱ་ནི པ་ཉྩི་ནྡྲི་ཡཱ་ནི ཏཱ་ནི པ་ཉྩ བ་ལཱ་ནི ཧོ་ནྟི, ཡཱ་ནི པ་ཉྩ བ་ལཱ་ནི ཏཱ་ནི པ་ཉྩི་ནྡྲི་ཡཱ་ནི ཧོ་ནྟི’’.

‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཡཱ་ནི པ་ཉྩི་ནྡྲི་ཡཱ་ནི ཏཱ་ནི པ་ཉྩ བ་ལཱ་ནི ཧོ་ནྟི, ཡཱ་ནི པ་ཉྩ བ་ལཱ་ནི ཏཱ་ནི པ་ཉྩི་ནྡྲི་ཡཱ་ནི ཧོ་ནྟི? ཡཾ, བྷི་ཀྑ་ཝེ, ས་དྡྷི་ནྡྲི་ཡཾ ཏཾ ས་དྡྷཱ་བ་ལཾ, ཡཾ ས་དྡྷཱ་བ་ལཾ ཏཾ ས་དྡྷི་ནྡྲི་ཡཾ; ཡཾ ཝཱི་རི་ཡི་ནྡྲི་ཡཾ ཏཾ ཝཱི་རི་ཡ་བ་ལཾ, ཡཾ ཝཱི་རི་ཡ་བ་ལཾ ཏཾ ཝཱི་རི་ཡི་ནྡྲི་ཡཾ; ཡཾ ས་ཏི་ནྡྲི་ཡཾ ཏཾ ས་ཏི་བ་ལཾ, ཡཾ ས་ཏི་བ་ལཾ ཏཾ ས་ཏི་ནྡྲི་ཡཾ; ཡཾ ས་མཱ་དྷི་ནྡྲི་ཡཾ ཏཾ ས་མཱ་དྷི་བ་ལཾ, ཡཾ ས་མཱ་དྷི་བ་ལཾ ཏཾ ས་མཱ་དྷི་ནྡྲི་ཡཾ; ཡཾ པ་ཉྙི་ནྡྲི་ཡཾ ཏཾ པ་ཉྙཱ་བ་ལཾ, ཡཾ པ་ཉྙཱ་བ་ལཾ ཏཾ པ་ཉྙི་ནྡྲི་ཡཾ. སེ་ཡྻ་ཐཱ་པི, བྷི་ཀྑ་ཝེ, ན་དཱི པཱ་ཙཱི་ན་ནི་ནྣཱ པཱ་ཙཱི་ན་པོ་ཎཱ པཱ་ཙཱི་ན་པ་བྦྷཱ་རཱ, ཏ་སྶ མ་ཛ྄ཛྷེ དཱི་པོ. ཨ་ཏྠི, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ ཨེ་ཀོ སོ་ཏོ ཏྭེ་ཝ ས་ངྑྱཾ ག་ཙྪ་ཏི [ས་ངྑཾ (སཱི. སྱཱ. ཀཾ.)]. ཨ་ཏྠི པ་ན, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ དྭེ སོ་ཏཱ་ནི ཏྭེ་ཝ ས་ངྑྱཾ ག་ཙྪ་ནྟི.

‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ ཨེ་ཀོ སོ་ཏོ ཏྭེ་ཝ ས་ངྑྱཾ ག་ཙྪ་ཏི? ཡ་ཉྩ, བྷི་ཀྑ་ཝེ, ཏ་སྶ དཱི་པ་སྶ པུ་རི་མ་ནྟེ [པུ་ར་ཏྠི་མ་ནྟེ (སཱི. སྱཱ. ཀཾ. པཱི.)] ཨུ་ད་ཀཾ, ཡ་ཉྩ པ་ཙྪི་མ་ནྟེ ཨུ་ད་ཀཾ – ཨ་ཡཾ ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ ཨེ་ཀོ སོ་ཏོ ཏྭེ་ཝ ས་ངྑྱཾ ག་ཙྪ་ཏི.

‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ དྭེ སོ་ཏཱ་ནི ཏྭེ་ཝ ས་ངྑྱཾ ག་ཙྪ་ནྟི? ཡ་ཉྩ, བྷི་ཀྑ་ཝེ, ཏ་སྶ དཱི་པ་སྶ ཨུ་ཏྟ་ར་ནྟེ ཨུ་ད་ཀཾ, ཡ་ཉྩ ད་ཀྑི་ཎ་ནྟེ ཨུ་ད་ཀཾ – ཨ་ཡཾ ཁོ, བྷི་ཀྑ་ཝེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཏ་སྶཱ ན་དི་ཡཱ དྭེ སོ་ཏཱ་ནི ཏྭེ་ཝ ས་ངྑྱཾ ག་ཙྪ་ནྟི. ཨེ་ཝ་མེ་ཝ ཁོ, བྷི་ཀྑ་ཝེ, ཡཾ ས་དྡྷི་ནྡྲི་ཡཾ ཏཾ ས་དྡྷཱ་བ་ལཾ, ཡཾ ས་དྡྷཱ་བ་ལཾ ཏཾ ས་དྡྷི་ནྡྲི་ཡཾ; ཡཾ ཝཱི་རི་ཡི་ནྡྲི་ཡཾ ཏཾ ཝཱི་རི་ཡ་བ་ལཾ, ཡཾ ཝཱི་རི་ཡ་བ་ལཾ ཏཾ ཝཱི་རི་ཡི་ནྡྲི་ཡཾ; ཡཾ ས་ཏི་ནྡྲི་ཡཾ ཏཾ ས་ཏི་བ་ལཾ, ཡཾ ས་ཏི་བ་ལཾ ཏཾ ས་ཏི་ནྡྲི་ཡཾ; ཡཾ ས་མཱ་དྷི་ནྡྲི་ཡཾ ཏཾ ས་མཱ་དྷི་བ་ལཾ, ཡཾ ས་མཱ་དྷི་བ་ལཾ ཏཾ ས་མཱ་དྷི་ནྡྲི་ཡཾ; ཡཾ པ་ཉྙི་ནྡྲི་ཡཾ ཏཾ པ་ཉྙཱ་བ་ལཾ, ཡཾ པ་ཉྙཱ་བ་ལཾ ཏཾ པ་ཉྙི་ནྡྲི་ཡཾ. པ་ཉྩ་ནྣཾ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ བྷི་ཀྑུ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. ཏ་ཏི་ཡཾ.

༤. པུ་བྦ་ཀོ་ཊྛ་ཀ་སུ་ཏྟཾ

༥༡༤. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦ་ཀོ་ཊྛ་ཀེ. ཏ་ཏྲ ཁོ བྷ་ག་ཝཱ ཨཱ་ཡ་སྨ་ནྟཾ སཱ་རི་པུ་ཏྟཾ ཨཱ་མ་ནྟེ་སི – ‘‘ས་དྡ་ཧ་སི [ས་དྡ་ཧཱ་སི (སཱི. པཱི.)] ཏྭཾ, སཱ་རི་པུ་ཏྟ – ས་དྡྷི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ན’’ནྟི?

‘‘ན ཁྭཱ་ཧཾ ཨེ་ཏྠ, བྷ་ནྟེ, བྷ་ག་ཝ་ཏོ ས་དྡྷཱ་ཡ ག་ཙྪཱ་མི – ས་དྡྷི་ནྡྲི་ཡཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཡེ་ས་ཉྷེ་ཏཾ, བྷ་ནྟེ, ཨ་ཉྙཱ་ཏཾ ཨ་སྶ ཨ་དི་ཊྛཾ ཨ་ཝི་དི་ཏཾ ཨ་ས་ཙྪི་ཀ་ཏཾ ཨ་ཕ་སྶི་ཏཾ [ཨ་པ་སྶི་ཏཾ (སཱི. སྱཱ. ཀཾ. ཀ.), ཨ་ཕུ་སི་ཏཾ (པཱི.)] པ་ཉྙཱ་ཡ, ཏེ ཏ་ཏྠ པ་རེ་སཾ ས་དྡྷཱ་ཡ ག་ཙྪེ་ཡྻུཾ – ས་དྡྷི་ནྡྲི་ཡཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཡེ་ས་ཉྩ ཁོ ཨེ་ཏཾ, བྷ་ནྟེ, ཉཱ་ཏཾ དི་ཊྛཾ ཝི་དི་ཏཾ ས་ཙྪི་ཀ་ཏཾ ཕ་སྶི་ཏཾ པ་ཉྙཱ་ཡ, ནི་ཀྐ་ངྑཱ ཏེ ཏ་ཏྠ ནི་བྦི་ཙི་ཀི་ཙྪཱ – ས་དྡྷི་ནྡྲི་ཡཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. མ་ཡ྄ཧ་ཉྩ ཁོ ཨེ་ཏཾ, བྷ་ནྟེ, ཉཱ་ཏཾ དི་ཊྛཾ ཝི་དི་ཏཾ ས་ཙྪི་ཀ་ཏཾ ཕ་སྶི་ཏཾ པ་ཉྙཱ་ཡ. ནི་ཀྐ་ངྑ་ཝཱ་ཧཾ ཏ་ཏྠ ནི་བྦི་ཙི་ཀི་ཙྪོ ས་དྡྷི་ནྡྲི་ཡཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ན’’ནྟི.

‘‘སཱ་དྷུ སཱ་དྷུ, སཱ་རི་པུ་ཏྟ! ཡེ་ས་ཉྷེ་ཏཾ, སཱ་རི་པུ་ཏྟ, ཨ་ཉྙཱ་ཏཾ ཨ་སྶ ཨ་དི་ཊྛཾ ཨ་ཝི་དི་ཏཾ ཨ་ས་ཙྪི་ཀ་ཏཾ ཨ་ཕ་སྶི་ཏཾ པ་ཉྙཱ་ཡ, ཏེ ཏ་ཏྠ པ་རེ་སཾ ས་དྡྷཱ་ཡ ག་ཙྪེ་ཡྻུཾ – ས་དྡྷི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ. ཡེ་ས་ཉྩ ཁོ ཨེ་ཏཾ, སཱ་རི་པུ་ཏྟ, ཉཱ་ཏཾ དི་ཊྛཾ ཝི་དི་ཏཾ ས་ཙྪི་ཀ་ཏཾ ཕ་སྶི་ཏཾ པ་ཉྙཱ་ཡ, ནི་ཀྐ་ངྑཱ ཏེ ཏ་ཏྠ ནི་བྦི་ཙི་ཀི་ཙྪཱ – ས་དྡྷི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ནཾ…པེ… པ་ཉྙི་ནྡྲི་ཡཾ བྷཱ་ཝི་ཏཾ བ་ཧུ་ལཱི་ཀ་ཏཾ ཨ་མ་ཏོ་ག་དྷཾ ཧོ་ཏི ཨ་མ་ཏ་པ་རཱ་ཡ་ཎཾ ཨ་མ་ཏ་པ་རི་ཡོ་སཱ་ན’’ནྟི. ཙ་ཏུ་ཏྠཾ.

༥. པ་ཋ་མ་པུ་བྦཱ་རཱ་མ་སུ་ཏྟཾ

༥༡༥. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཀ་ཏི་ནཾ ནུ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི?

བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘ཨེ་ཀ་སྶ ཁོ, བྷི་ཀྑ་ཝེ, ཨི་ནྡྲི་ཡ་སྶ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀ་ཏ་མ་སྶ ཨེ་ཀ་སྶ པ་ཉྙི་ནྡྲི་ཡ་སྶ པ་ཉྙ་ཝ་ཏོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཏ་ད་ནྭ་ཡཱ ས་དྡྷཱ ས་ཎྛཱ་ཏི, ཏ་ད་ནྭ་ཡཾ ཝཱི་རི་ཡཾ ས་ཎྛཱ་ཏི, ཏ་ད་ནྭ་ཡཱ ས་ཏི ས་ཎྛཱ་ཏི, ཏ་ད་ནྭ་ཡོ ས་མཱ་དྷི ས་ཎྛཱ་ཏི. ཨི་མ་སྶ ཁོ, བྷི་ཀྑ་ཝེ, ཨེ་ཀ་སྶ ཨི་ནྡྲི་ཡ་སྶ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི. པ་ཉྩ་མཾ.

༦. དུ་ཏི་ཡ་པུ་བྦཱ་རཱ་མ་སུ་ཏྟཾ

༥༡༦. ཏཾ་ཡེ་ཝ ནི་དཱ་ནཾ. ‘‘ཀ་ཏི་ནཾ ནུ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘དྭི་ནྣཾ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀ་ཏ་མེ་སཾ དྭི་ནྣཾ? ཨ་རི་ཡཱ་ཡ ཙ པ་ཉྙཱ་ཡ, ཨ་རི་ཡཱ་ཡ ཙ ཝི་མུ་ཏྟི་ཡཱ. ཡཱ ཧི་སྶ, བྷི་ཀྑ་ཝེ, ཨ་རི་ཡཱ པ་ཉྙཱ ཏ་ད་སྶ པ་ཉྙི་ནྡྲི་ཡཾ. ཡཱ ཧི་སྶ, བྷི་ཀྑ་ཝེ, ཨ་རི་ཡཱ ཝི་མུ་ཏྟི ཏ་ད་སྶ ས་མཱ་དྷི་ནྡྲི་ཡཾ. ཨི་མེ་སཾ ཁོ, བྷི་ཀྑ་ཝེ, དྭི་ནྣཾ ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི. ཚ་ཊྛཾ.

༧. ཏ་ཏི་ཡ་པུ་བྦཱ་རཱ་མ་སུ་ཏྟཾ

༥༡༧. ཏཾ་ཡེ་ཝ ནི་དཱ་ནཾ. ‘‘ཀ་ཏི་ནཾ ནུ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘ཙ་ཏུ་ནྣཾ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀ་ཏ་མེ་སཾ ཙ་ཏུ་ནྣཾ? ཝཱི་རི་ཡི་ནྡྲི་ཡ་སྶ, ས་ཏི་ནྡྲི་ཡ་སྶ, ས་མཱ་དྷི་ནྡྲི་ཡ་སྶ, པ་ཉྙི་ནྡྲི་ཡ་སྶ – ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི. ས་ཏྟ་མཾ.

༨. ཙ་ཏུ་ཏྠ་པུ་བྦཱ་རཱ་མ་སུ་ཏྟཾ

༥༡༨. ཏཾ་ཡེ་ཝ ནི་དཱ་ནཾ. ‘‘ཀ་ཏི་ནཾ ནུ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘པ་ཉྩ་ནྣཾ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀ་ཏ་མེ་སཾ པ་ཉྩ་ནྣཾ? ས་དྡྷི་ནྡྲི་ཡ་སྶ, ཝཱི་རི་ཡི་ནྡྲི་ཡ་སྶ, ས་ཏི་ནྡྲི་ཡ་སྶ, ས་མཱ་དྷི་ནྡྲི་ཡ་སྶ, པ་ཉྙི་ནྡྲི་ཡ་སྶ – ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཁཱི་ཎཱ་ས་ཝོ བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི. ཨ་ཊྛ་མཾ.

༩. པི་ཎྜོ་ལ་བྷཱ་ར་དྭཱ་ཛ་སུ་ཏྟཾ

༥༡༩. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏཱ པི་ཎྜོ་ལ་བྷཱ་ར་དྭཱ་ཛེ་ན ཨ་ཉྙཱ བྱཱ་ཀ་ཏཱ ཧོ་ཏི – ‘‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’’ཏི. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ –

‘‘ཨཱ་ཡ་སྨ་ཏཱ, བྷ་ནྟེ, པི་ཎྜོ་ལ་བྷཱ་ར་དྭཱ་ཛེ་ན ཨ་ཉྙཱ བྱཱ་ཀ་ཏཱ – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀིཾ ནུ ཁོ, བྷ་ནྟེ, ཨ་ཏྠ་ཝ་སཾ ས་མྤ་སྶ་མཱ་ནེ་ན ཨཱ་ཡ་སྨ་ཏཱ པི་ཎྜོ་ལ་བྷཱ་ར་དྭཱ་ཛེ་ན ཨ་ཉྙཱ བྱཱ་ཀ་ཏཱ – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི?

‘‘ཏི་ཎྞ་ནྣཾ ཁོ, བྷི་ཀྑ་ཝེ, ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ པི་ཎྜོ་ལ་བྷཱ་ར་དྭཱ་ཛེ་ན བྷི་ཀྑུ་ནཱ ཨ་ཉྙཱ བྱཱ་ཀ་ཏཱ – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཀ་ཏ་མེ་སཾ ཏི་ཎྞ་ནྣཾ? ས་ཏི་ནྡྲི་ཡ་སྶ, ས་མཱ་དྷི་ནྡྲི་ཡ་སྶ, པ་ཉྙི་ནྡྲི་ཡ་སྶ – ཨི་མེ་སཾ ཁོ, བྷི་ཀྑ་ཝེ, ཏི་ཎྞ་ནྣཾ ཨི་ནྡྲི་ཡཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ པི་ཎྜོ་ལ་བྷཱ་ར་དྭཱ་ཛེ་ན བྷི་ཀྑུ་ནཱ ཨ་ཉྙཱ བྱཱ་ཀ་ཏཱ – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི་ཏི. ཨི་མཱ་ནི ཙ, བྷི་ཀྑ་ཝེ, ཏཱི་ཎི་ནྡྲི་ཡཱ་ནི ཀི་མ་ནྟཱ་ནི? ཁ་ཡ་ནྟཱ་ནི. ཀི་སྶ ཁ་ཡ་ནྟཱ་ནི? ཛཱ་ཏི་ཛ་རཱ་མ་ར་ཎ་སྶ. ‘ཛཱ་ཏི་ཛ་རཱ་མ་ར་ཎཾ ཁ་ཡ’ནྟི ཁོ, བྷི་ཀྑ་ཝེ, ས་མྤ་སྶ་མཱ་ནེ་ན པི་ཎྜོ་ལ་བྷཱ་ར་དྭཱ་ཛེ་ན བྷི་ཀྑུ་ནཱ ཨ་ཉྙཱ བྱཱ་ཀ་ཏཱ – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་མཱི’’ཏི. ན་ཝ་མཾ.

༡༠. ཨཱ་པ་ཎ་སུ་ཏྟཾ

༥༢༠. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཨ་ངྒེ་སུ ཝི་ཧ་ར་ཏི ཨཱ་པ་ཎཾ ནཱ་མ ཨ་ངྒཱ་ནཾ ནི་ག་མོ. ཏ་ཏྲ ཁོ བྷ་ག་ཝཱ ཨཱ་ཡ་སྨ་ནྟཾ སཱ་རི་པུ་ཏྟཾ ཨཱ་མ་ནྟེ་སི – ‘‘ཡོ སོ, སཱ་རི་པུ་ཏྟ, ཨ་རི་ཡ་སཱ་ཝ་ཀོ ཏ་ཐཱ་ག་ཏེ ཨེ་ཀ་ནྟ་ག་ཏོ [ཨེ་ཀ་ནྟི་ག་ཏོ (སཱི.)] ཨ་བྷི་པྤ་ས་ནྣོ, ན སོ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ ཀ་ངྑེ་ཡྻ ཝཱ ཝི་ཙི་ཀི་ཙྪེ་ཡྻ ཝཱ’’ཏི?

‘‘ཡོ སོ, བྷ་ནྟེ, ཨ་རི་ཡ་སཱ་ཝ་ཀོ ཏ་ཐཱ་ག་ཏེ ཨེ་ཀ་ནྟ་ག་ཏོ ཨ་བྷི་པྤ་ས་ནྣོ, ན སོ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ ཀ་ངྑེ་ཡྻ ཝཱ ཝི་ཙི་ཀི་ཙྪེ་ཡྻ ཝཱ. ས་དྡྷ་སྶ ཧི, བྷ་ནྟེ, ཨ་རི་ཡ་སཱ་ཝ་ཀ་སྶ ཨེ་ཝཾ པཱ་ཊི་ཀ་ངྑཾ ཡཾ ཨཱ་ར་དྡྷ་ཝཱི་རི་ཡོ ཝི་ཧ་རི་སྶ་ཏི – ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ, ཀུ་ས་ལཱ་ནཾ དྷ་མྨཱ་ནཾ ཨུ་པ་ས་མྤ་དཱ་ཡ, ཐཱ་མ་ཝཱ ད་ལ༹ྷ་པ་ར་ཀྐ་མོ ཨ་ནི་ཀྑི་ཏྟ་དྷུ་རོ ཀུ་ས་ལེ་སུ དྷ་མྨེ་སུ. ཡཾ ཧི་སྶ, བྷ་ནྟེ, ཝཱི་རི་ཡཾ ཏ་ད་སྶ ཝཱི་རི་ཡི་ནྡྲི་ཡཾ.

‘‘ས་དྡྷ་སྶ ཧི, བྷ་ནྟེ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨེ་ཏཾ པཱ་ཊི་ཀ་ངྑཾ ཡཾ ས་ཏི་མཱ བྷ་ཝི་སྶ་ཏི, པ་ར་མེ་ན ས་ཏི་ནེ་པ་ཀྐེ་ན ས་མ་ནྣཱ་ག་ཏོ, ཙི་ར་ཀ་ཏ་མྤི ཙི་ར་བྷཱ་སི་ཏ་མྤི ས་རི་ཏཱ ཨ་ནུ་སྶ་རི་ཏཱ. ཡཱ ཧི་སྶ, བྷ་ནྟེ, ས་ཏི ཏ་ད་སྶ ས་ཏི་ནྡྲི་ཡཾ.

‘‘ས་དྡྷ་སྶ ཧི, བྷ་ནྟེ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨུ་པ་ཊྛི་ཏ་སྶ་ཏི་ནོ ཨེ་ཏཾ པཱ་ཊི་ཀ་ངྑཾ ཡཾ ཝོ་སྶ་གྒཱ་ར་མྨ་ཎཾ ཀ་རི་ཏྭཱ ལ་བྷི་སྶ་ཏི ས་མཱ་དྷིཾ, ལ་བྷི་སྶ་ཏི ཙི་ཏྟ་སྶ ཨེ་ཀ་གྒ་ཏཾ. ཡོ ཧི་སྶ, བྷ་ནྟེ, ས་མཱ་དྷི ཏ་ད་སྶ ས་མཱ་དྷི་ནྡྲི་ཡཾ.

‘‘ས་དྡྷ་སྶ ཧི, བྷ་ནྟེ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨུ་པ་ཊྛི་ཏ་སྶ་ཏི་ནོ ས་མཱ་ཧི་ཏ་ཙི་ཏྟ་སྶ ཨེ་ཏཾ པཱ་ཊི་ཀ་ངྑཾ ཡཾ ཨེ་ཝཾ པ་ཛཱ་ནི་སྶ་ཏི – ཨ་ན་མ་ཏ་གྒོ ཁོ སཾ་སཱ་རོ. པུ་བྦཱ ཀོ་ཊི ན པ་ཉྙཱ་ཡ་ཏི ཨ་ཝི་ཛྫཱ་ནཱི་ཝ་ར་ཎཱ་ནཾ ས་ཏྟཱ་ནཾ ཏ་ཎྷཱ་སཾ་ཡོ་ཛ་ནཱ་ནཾ ས་ནྡྷཱ་ཝ་ཏཾ སཾ་ས་ར་ཏཾ. ཨ་ཝི་ཛྫཱ་ཡ ཏྭེ་ཝ ཏ་མོ་ཀཱ་ཡ་སྶ ཨ་སེ་ས་ཝི་རཱ་ག་ནི་རོ་དྷོ ས་ནྟ་མེ་ཏཾ པ་དཾ པ་ཎཱི་ཏ་མེ་ཏཾ པ་དཾ, ཡ་དི་དཾ – ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷཱ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ [ནི་བྦཱ་ན་ནྟི (?)]. ཡཱ ཧི་སྶ, བྷ་ནྟེ, པ་ཉྙཱ ཏ་ད་སྶ པ་ཉྙི་ནྡྲི་ཡཾ.

‘‘ས་དྡྷོ སོ [ས ཁོ སོ (སཱི. སྱཱ. ཀཾ.)], བྷ་ནྟེ, ཨ་རི་ཡ་སཱ་ཝ་ཀོ ཨེ་ཝཾ པ་ད་ཧི་ཏྭཱ པ་ད་ཧི་ཏྭཱ ཨེ་ཝཾ ས་རི་ཏྭཱ ས་རི་ཏྭཱ ཨེ་ཝཾ ས་མཱ་ད་ཧི་ཏྭཱ ས་མཱ་ད་ཧི་ཏྭཱ ཨེ་ཝཾ པ་ཛཱ་ནི་ཏྭཱ པ་ཛཱ་ནི་ཏྭཱ ཨེ་ཝཾ ཨ་བྷི་ས་དྡ་ཧ་ཏི – ‘ཨི་མེ ཁོ ཏེ དྷ་མྨཱ ཡེ མེ པུ་བྦེ སུ་ཏ་ཝཱ ཨ་ཧེ་སུཾ. ཏེ་ནཱ་ཧཾ ཨེ་ཏ་ར་ཧི ཀཱ་ཡེ་ན ཙ ཕུ་སི་ཏྭཱ ཝི་ཧ་རཱ་མི, པ་ཉྙཱ་ཡ ཙ ཨ་ཏི་ཝི་ཛ྄ཛྷ [པ་ཊི་ཝི་ཛ྄ཛྷ (སཱི. ཀ.) ཏ་ད་ཊྛ་ཀ་ཐཱ་སུ པ་ན ཨ་ཏི་ཝི་ཛ྄ཛྷི་ཏྭཱ་ཏི ཝ་ཎྞི་ཏཾ] པ་སྶཱ་མཱི’ཏི. ཡཱ ཧི་སྶ, བྷ་ནྟེ, ས་དྡྷཱ ཏ་ད་སྶ ས་དྡྷི་ནྡྲི་ཡ’’ནྟི.

‘‘སཱ་དྷུ སཱ་དྷུ, སཱ་རི་པུ་ཏྟ! ཡོ སོ, སཱ་རི་པུ་ཏྟ, ཨ་རི་ཡ་སཱ་ཝ་ཀོ ཏ་ཐཱ་ག་ཏེ ཨེ་ཀ་ནྟ་ག་ཏོ ཨ་བྷི་པྤ་ས་ནྣོ, ན སོ ཏ་ཐཱ་ག་ཏེ ཝཱ ཏ་ཐཱ་ག་ཏ་སཱ་ས་ནེ ཝཱ ཀ་ངྑེ་ཡྻ ཝཱ ཝི་ཙི་ཀི་ཙྪེ་ཡྻ ཝཱ. ས་དྡྷ་སྶ ཧི, སཱ་རི་པུ་ཏྟ, ཨ་རི་ཡ་སཱ་ཝ་ཀ་སྶ ཨེ་ཏཾ པཱ་ཊི་ཀ་ངྑཾ ཡཾ ཨཱ་ར་དྡྷ་ཝཱི་རི་ཡོ ཝི་ཧ་རི་སྶ་ཏི – ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ, ཀུ་ས་ལཱ་ནཾ དྷ་མྨཱ་ནཾ ཨུ་པ་ས་མྤ་དཱ་ཡ, ཐཱ་མ་ཝཱ ད་ལ༹ྷ་པ་ར་ཀྐ་མོ ཨ་ནི་ཀྑི་ཏྟ་དྷུ་རོ ཀུ་ས་ལེ་སུ དྷ་མྨེ་སུ. ཡཾ ཧི་སྶ, སཱ་རི་པུ་ཏྟ, ཝཱི་རི་ཡཾ ཏ་ད་སྶ ཝཱི་རི་ཡི་ནྡྲི་ཡཾ.

‘‘ས་དྡྷ་སྶ ཧི, སཱ་རི་པུ་ཏྟ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨེ་ཏཾ པཱ་ཊི་ཀ་ངྑཾ ཡཾ ས་ཏི་མཱ བྷ་ཝི་སྶ་ཏི, པ་ར་མེ་ན ས་ཏི་ནེ་པ་ཀྐེ་ན ས་མ་ནྣཱ་ག་ཏོ, ཙི་ར་ཀ་ཏ་མྤི ཙི་ར་བྷཱ་སི་ཏ་མྤི ས་རི་ཏཱ ཨ་ནུ་སྶ་རི་ཏཱ. ཡཱ ཧི་སྶ, སཱ་རི་པུ་ཏྟ, ས་ཏི ཏ་ད་སྶ ས་ཏི་ནྡྲི་ཡཾ.

‘‘ས་དྡྷ་སྶ ཧི, སཱ་རི་པུ་ཏྟ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨུ་པ་ཊྛི་ཏ་སྶ་ཏི་ནོ ཨེ་ཏཾ པཱ་ཊི་ཀ་ངྑཾ ཡཾ ཝོ་སྶ་གྒཱ་ར་མྨ་ཎཾ ཀ་རི་ཏྭཱ ལ་བྷི་སྶ་ཏི ས་མཱ་དྷིཾ, ལ་བྷི་སྶ་ཏི ཙི་ཏྟ་སྶ ཨེ་ཀ་གྒ་ཏཾ. ཡོ ཧི་སྶ, སཱ་རི་པུ་ཏྟ, ས་མཱ་དྷི ཏ་ད་སྶ ས་མཱ་དྷི་ནྡྲི་ཡཾ.

‘‘ས་དྡྷ་སྶ ཧི, སཱ་རི་པུ་ཏྟ, ཨ་རི་ཡ་སཱ་ཝ་ཀ་སྶ ཨཱ་ར་དྡྷ་ཝཱི་རི་ཡ་སྶ ཨུ་པ་ཊྛི་ཏ་སྶ་ཏི་ནོ ས་མཱ་ཧི་ཏ་ཙི་ཏྟ་སྶ ཨེ་ཏཾ པཱ་ཊི་ཀ་ངྑཾ ཡཾ ཨེ་ཝཾ པ་ཛཱ་ནི་སྶ་ཏི – ཨ་ན་མ་ཏ་གྒོ ཁོ སཾ་སཱ་རོ. པུ་བྦཱ ཀོ་ཊི ན པ་ཉྙཱ་ཡ་ཏི ཨ་ཝི་ཛྫཱ་ནཱི་ཝ་ར་ཎཱ་ནཾ ས་ཏྟཱ་ནཾ ཏ་ཎྷཱ་སཾ་ཡོ་ཛ་ནཱ་ནཾ ས་ནྡྷཱ་ཝ་ཏཾ སཾ་ས་ར་ཏཾ. ཨ་ཝི་ཛྫཱ་ཡ ཏྭེ་ཝ ཏ་མོ་ཀཱ་ཡ་སྶ ཨ་སེ་ས་ཝི་རཱ་ག་ནི་རོ་དྷོ ས་ནྟ་མེ་ཏཾ པ་དཾ པ་ཎཱི་ཏ་མེ་ཏཾ པ་དཾ, ཡ་དི་དཾ – ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷཱ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཡཱ ཧི་སྶ, སཱ་རི་པུ་ཏྟ, པ་ཉྙཱ ཏ་ད་སྶ པ་ཉྙི་ནྡྲི་ཡཾ.

‘‘ས་དྡྷོ སོ [ས ཁོ སོ (སཱི. སྱཱ. ཀཾ. པཱི.)], སཱ་རི་པུ་ཏྟ, ཨ་རི་ཡ་སཱ་ཝ་ཀོ ཨེ་ཝཾ པ་ད་ཧི་ཏྭཱ པ་ད་ཧི་ཏྭཱ ཨེ་ཝཾ ས་རི་ཏྭཱ ས་རི་ཏྭཱ ཨེ་ཝཾ ས་མཱ་ད་ཧི་ཏྭཱ ས་མཱ་ད་ཧི་ཏྭཱ ཨེ་ཝཾ པ་ཛཱ་ནི་ཏྭཱ པ་ཛཱ་ནི་ཏྭཱ ཨེ་ཝཾ ཨ་བྷི་ས་དྡ་ཧ་ཏི – ‘ཨི་མེ ཁོ ཏེ དྷ་མྨཱ ཡེ མེ པུ་བྦེ སུ་ཏ་ཝཱ ཨ་ཧེ་སུཾ. ཏེ་ནཱ་ཧཾ ཨེ་ཏ་ར་ཧི ཀཱ་ཡེ་ན ཙ ཕུ་སི་ཏྭཱ ཝི་ཧ་རཱ་མི, པ་ཉྙཱ་ཡ ཙ ཨ་ཏི་ཝི་ཛ྄ཛྷ [པ་ཊི་ཝི་ཛ྄ཛྷ (ཀ. སཱི. ཀ.)] པ་སྶཱ་མཱི’ཏི. ཡཱ ཧི་སྶ, སཱ་རི་པུ་ཏྟ, ས་དྡྷཱ ཏ་ད་སྶ ས་དྡྷི་ནྡྲི་ཡ’’ནྟི. ད་ས་མཾ.

ཛ་རཱ་ཝ་གྒོ པ་ཉྩ་མོ.

ཏ་སྶུ་དྡཱ་ནཾ –

ཛ་རཱ ཨུ་ཎྞཱ་བྷོ བྲཱ་ཧྨ་ཎོ, སཱ་ཀེ་ཏོ པུ་བྦ་ཀོ་ཊྛ་ཀོ;

པུ་བྦཱ་རཱ་མེ ཙ ཙ་ཏྟཱ་རི, པི་ཎྜོ་ལོ ཨཱ་པ་ཎེ་ན ཙཱ་ཏི [ས་དྡྷེ་ན ཏེ ད་སཱ་ཏི (སྱཱ. ཀཾ. ཀ.)].