༣. པ་རི་ཧཱ་ན་སུ་ཏྟཾ

༣༨༩. ཨེ་ཀཾ ས་མ་ཡཾ ཨཱ་ཡ་སྨཱ ཙ ཨཱ་ན་ནྡོ ཨཱ་ཡ་སྨཱ ཙ བྷ་དྡོ པཱ་ཊ་ལི་པུ་ཏྟེ ཝི་ཧ་ར་ནྟི ཀུ་ཀྐུ་ཊཱ་རཱ་མེ. ཨ་ཐ ཁོ ཨཱ་ཡ་སྨཱ བྷ་དྡོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ བྷ་དྡོ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཀོ ནུ ཁོ, ཨཱ་ཝུ་སོ ཨཱ་ན་ནྡ, ཧེ་ཏུ, ཀོ པ་ཙྩ་ཡོ ཡེ་ན ས་དྡྷ་མྨ་པ་རི་ཧཱ་ནཾ ཧོ་ཏི? ཀོ ནུ ཁོ, ཨཱ་ཝུ་སོ ཨཱ་ན་ནྡ, ཧེ་ཏུ, ཀོ པ་ཙྩ་ཡོ ཡེ་ན ས་དྡྷ་མྨ་ཨ་པ་རི་ཧཱ་ནཾ ཧོ་ཏཱི’’ཏི?

‘‘སཱ་དྷུ སཱ་དྷུ, ཨཱ་ཝུ་སོ བྷ་དྡ! བྷ་དྡ་ཀོ ཁོ ཏེ, ཨཱ་ཝུ་སོ བྷ་དྡ, ཨུ་མྨ་ངྒོ, བྷ་དྡ་ཀཾ པ་ཊི་བྷཱ་ནཾ, ཀ་ལྱཱ་ཎཱི པ་རི་པུ་ཙྪཱ. ཨེ་ཝ་ཉྷི ཏྭཾ, ཨཱ་ཝུ་སོ བྷ་དྡ, པུ་ཙྪ་སི – ‘ཀོ ནུ ཁོ, ཨཱ་ཝུ་སོ ཨཱ་ན་ནྡ, ཧེ་ཏུ, ཀོ པ་ཙྩ་ཡོ ཡེ་ན ས་དྡྷ་མྨ་པ་རི་ཧཱ་ནཾ ཧོ་ཏི? ཀོ པ་ནཱ་ཝུ་སོ ཨཱ་ན་ནྡ, ཧེ་ཏུ, ཀོ པ་ཙྩ་ཡོ ཡེ་ན ས་དྡྷ་མྨ་ཨ་པ་རི་ཧཱ་ནཾ ཧོ་ཏཱི’’’ཏི? ‘‘ཨེ་ཝ་མཱ་ཝུ་སོ’’ཏི. ‘‘ཙ་ཏུ་ནྣཾ ཁོ, ཨཱ་ཝུ་སོ, ས་ཏི་པ་ཊྛཱ་ནཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ས་དྡྷ་མྨ་པ་རི་ཧཱ་ནཾ ཧོ་ཏི. ཙ་ཏུ་ནྣ་ཉྩ ཁོ, ཨཱ་ཝུ་སོ, ས་ཏི་པ་ཊྛཱ་ནཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ས་དྡྷ་མྨ་ཨ་པ་རི་ཧཱ་ནཾ ཧོ་ཏི’’.

‘‘ཀ་ཏ་མེ་སཾ ཙ་ཏུ་ནྣཾ? ཨི་དྷཱ་ཝུ་སོ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨི་མེ་སཾ ཁོ, ཨཱ་ཝུ་སོ, ཙ་ཏུ་ནྣཾ ས་ཏི་པ་ཊྛཱ་ནཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ས་དྡྷ་མྨ་པ་རི་ཧཱ་ནཾ ཧོ་ཏི. ཨི་མེ་ས་ཉྩ ཁོ, ཨཱ་ཝུ་སོ, ཙ་ཏུ་ནྣཾ ས་ཏི་པ་ཊྛཱ་ནཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ས་དྡྷ་མྨ་ཨ་པ་རི་ཧཱ་ནཾ ཧོ་ཏཱི’’ཏི. ཏ་ཏི་ཡཾ.