༥. ཙ་ཀྐ་ཝ་ཏྟི་ཝ་གྒོ

༡. ཝི་དྷཱ་སུ་ཏྟཾ

༢༢༢. སཱ་ཝ་ཏྠི་ནི་དཱ་ནཾ. ‘‘ཡེ ཧི ཀེ་ཙི, བྷི་ཀྑ་ཝེ, ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཏི་སྶོ ཝི་དྷཱ པ་ཛ་ཧིཾ་སུ, ས་བྦེ ཏེ ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ. ཡེ ཧི ཀེ་ཙི, བྷི་ཀྑ་ཝེ, ཨ་ནཱ་ག་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཏི་སྶོ ཝི་དྷཱ པ་ཛ་ཧི་སྶ་ནྟི, ས་བྦེ ཏེ ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ. ཡེ ཧི ཀེ་ཙི, བྷི་ཀྑ་ཝེ, ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཏི་སྶོ ཝི་དྷཱ པ་ཛ་ཧ་ནྟི, ས་བྦེ ཏེ ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ. ཀ་ཏ་མེ་སཾ ས་ཏྟ་ནྣཾ བོ་ཛ྄ཛྷ་ངྒཱ་ནཾ? ས་ཏི་ས་མྦོ་ཛ྄ཛྷ་ངྒ་སྶ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ. ཡེ ཧི ཀེ་ཙི, བྷི་ཀྑ་ཝེ, ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཏི་སྶོ ཝི་དྷཱ པ་ཛ་ཧིཾ་སུ…པེ… པ་ཛ་ཧི་སྶ་ནྟི…པེ… པ་ཛ་ཧ་ནྟི, ས་བྦེ ཏེ ཨི་མེ་སཾ་ཡེ་ཝ ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ’’ཏི. པ་ཋ་མཾ.

༢. ཙ་ཀྐ་ཝ་ཏྟི་སུ་ཏྟཾ

༢༢༣. ‘‘ར་ཉྙོ, བྷི་ཀྑ་ཝེ, ཙ་ཀྐ་ཝ་ཏྟི་སྶ པཱ་ཏུ་བྷཱ་ཝཱ ས་ཏྟ་ནྣཾ ར་ཏ་ནཱ་ནཾ པཱ་ཏུ་བྷཱ་ཝོ ཧོ་ཏི. ཀ་ཏ་མེ་སཾ ས་ཏྟ་ནྣཾ? ཙ་ཀྐ་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, ཧ་ཏྠི་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, ཨ་སྶ་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, མ་ཎི་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, ཨི་ཏྠི་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, ག་ཧ་པ་ཏི་ར་ཏ་ན་སྶ པཱ་ཏུ་བྷཱ་ཝོ ཧོ་ཏི, པ་རི་ཎཱ་ཡ་ཀ་ར་ཏ་ན་སྶ པཱ་ཏུ་བྷཱ་ཝོ ཧོ་ཏི. ར་ཉྙོ, བྷི་ཀྑ་ཝེ, ཙ་ཀྐ་ཝ་ཏྟི་སྶ པཱ་ཏུ་བྷཱ་ཝཱ ཨི་མེ་སཾ ས་ཏྟ་ནྣཾ ར་ཏ་ནཱ་ནཾ པཱ་ཏུ་བྷཱ་ཝོ ཧོ་ཏི.

‘‘ཏ་ཐཱ་ག་ཏ་སྶ, བྷི་ཀྑ་ཝེ, པཱ་ཏུ་བྷཱ་ཝཱ ཨ་ར་ཧ་ཏོ ས་མྨཱ་ས་མྦུ་དྡྷ་སྶ ས་ཏྟ་ནྣཾ བོ་ཛ྄ཛྷ་ངྒ་ར་ཏ་ནཱ་ནཾ པཱ་ཏུ་བྷཱ་ཝོ ཧོ་ཏི. ཀ་ཏ་མེ་སཾ ས་ཏྟ་ནྣཾ? ས་ཏི་ས་མྦོ་ཛ྄ཛྷ་ངྒ་སྶ ར་ཏ་ན་སྶ པཱ་ཏུ་བྷཱ་ཝོ ཧོ་ཏི…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ ར་ཏ་ན་སྶ པཱ་ཏུ་བྷཱ་ཝོ ཧོ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, པཱ་ཏུ་བྷཱ་ཝཱ ཨ་ར་ཧ་ཏོ ས་མྨཱ་ས་མྦུ་དྡྷ་སྶ ཨི་མེ་སཾ ས་ཏྟ་ནྣཾ བོ་ཛ྄ཛྷ་ངྒ་ར་ཏ་ནཱ་ནཾ པཱ་ཏུ་བྷཱ་ཝོ ཧོ་ཏཱི’’ཏི. དུ་ཏི་ཡཾ.

༣. མཱ་ར་སུ་ཏྟཾ

༢༢༤. ‘‘མཱ་ར་སེ་ན་པྤ་མ་དྡ་ནཾ ཝོ, བྷི་ཀྑ་ཝེ, མ་གྒཾ དེ་སེ་སྶཱ་མི; ཏཾ སུ་ཎཱ་ཐ. ཀ་ཏ་མོ ཙ, བྷི་ཀྑ་ཝེ, མཱ་ར་སེ་ན་པྤ་མ་དྡ་ནོ མ་གྒོ? ཡ་དི་དཾ – ས་ཏྟ བོ་ཛ྄ཛྷ་ངྒཱ. ཀ་ཏ་མེ ས་ཏྟ? ས་ཏི་ས་མྦོ་ཛ྄ཛྷ་ངྒོ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒོ – ཨ་ཡཾ ཁོ, བྷི་ཀྑ་ཝེ, མཱ་ར་སེ་ན་པྤ་མ་དྡ་ནོ མ་གྒོ’’ཏི. ཏ་ཏི་ཡཾ.

༤. དུ་པྤ་ཉྙ་སུ་ཏྟཾ

༢༢༥. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི…པེ… ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘‘དུ་པྤ་ཉྙོ ཨེ་ལ༹་མཱུ་གོ, དུ་པྤ་ཉྙོ ཨེ་ལ༹་མཱུ་གོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ‘དུ་པྤ་ཉྙོ ཨེ་ལ༹་མཱུ་གོ’ཏི ཝུ་ཙྩ་ཏཱི’’ཏི? ‘‘ས་ཏྟ་ནྣཾ ཁོ, བྷི་ཀྑུ, བོ་ཛ྄ཛྷ་ངྒཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ‘དུ་པྤ་ཉྙོ ཨེ་ལ༹་མཱུ་གོ’ཏི ཝུ་ཙྩ་ཏི. ཀ་ཏ་མེ་སཾ ས་ཏྟ་ནྣཾ? ས་ཏི་ས་མྦོ་ཛ྄ཛྷ་ངྒ་སྶ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ – ཨི་མེ་སཾ ཁོ, བྷི་ཀྑུ, ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ‘དུ་པྤ་ཉྙོ ཨེ་ལ༹་མཱུ་གོ’ཏི ཝུ་ཙྩ་ཏཱི’’ཏི. ཙ་ཏུ་ཏྠཾ.

༥. པ་ཉྙ་ཝ་ནྟ་སུ་ཏྟཾ

༢༢༦. ‘‘‘པ་ཉྙ་ཝཱ ཨ་ནེ་ལ༹་མཱུ་གོ, པ་ཉྙ་ཝཱ ཨ་ནེ་ལ༹་མཱུ་གོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ‘པ་ཉྙ་ཝཱ ཨ་ནེ་ལ༹་མཱུ་གོ’ཏི ཝུ་ཙྩ་ཏཱི’’ཏི? ‘‘ས་ཏྟ་ནྣཾ ཁོ, བྷི་ཀྑུ, བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ‘པ་ཉྙ་ཝཱ ཨ་ནེ་ལ༹་མཱུ་གོ’ཏི ཝུ་ཙྩ་ཏི. ཀ་ཏ་མེ་སཾ ས་ཏྟ་ནྣཾ? ས་ཏི་ས་མྦོ་ཛ྄ཛྷ་ངྒ་སྶ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ – ཨི་མེ་སཾ ཁོ, བྷི་ཀྑུ, ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ‘པ་ཉྙ་ཝཱ ཨ་ནེ་ལ༹་མཱུ་གོ’ཏི ཝུ་ཙྩ་ཏཱི’’ཏི. པ་ཉྩ་མཾ.

༦. ད་ལི་དྡ་སུ་ཏྟཾ

༢༢༧. ‘‘‘ད་ལི་དྡོ, ད་ལི་དྡོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ‘ད་ལི་དྡོ’ཏི ཝུ་ཙྩ་ཏཱི’’ཏི? ‘‘ས་ཏྟ་ནྣཾ ཁོ, བྷི་ཀྑུ, བོ་ཛ྄ཛྷ་ངྒཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ‘ད་ལི་དྡོ’ཏི ཝུ་ཙྩ་ཏི. ཀ་ཏ་མེ་སཾ ས་ཏྟ་ནྣཾ? ས་ཏི་ས་མྦོ་ཛ྄ཛྷ་ངྒ་སྶ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ – ཨི་མེ་སཾ ཁོ, བྷི་ཀྑུ, ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨ་བྷཱ་ཝི་ཏ་ཏྟཱ ཨ་བ་ཧུ་ལཱི་ཀ་ཏ་ཏྟཱ ‘ད་ལི་དྡོ’ཏི ཝུ་ཙྩ་ཏཱི’’ཏི. ཚ་ཊྛཾ.

༧. ཨ་ད་ལི་དྡ་སུ་ཏྟཾ

༢༢༨. ‘‘‘ཨ་ད་ལི་དྡོ, ཨ་ད་ལི་དྡོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ‘ཨ་ད་ལི་དྡོ’ཏི ཝུ་ཙྩ་ཏཱི’’ཏི? ‘‘ས་ཏྟ་ནྣཾ ཁོ, བྷི་ཀྑུ, བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ‘ཨ་ད་ལི་དྡོ’ཏི ཝུ་ཙྩ་ཏི. ཀ་ཏ་མེ་སཾ ས་ཏྟ་ནྣཾ? ས་ཏི་ས་མྦོ་ཛ྄ཛྷ་ངྒ་སྶ …པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ – ཨི་མེ་སཾ ཁོ, བྷི་ཀྑུ, ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ‘ཨ་ད་ལི་དྡོ’ཏི ཝུ་ཙྩ་ཏཱི’’ཏི. ས་ཏྟ་མཾ.

༨. ཨཱ་དི་ཙྩ་སུ་ཏྟཾ

༢༢༩. ‘‘ཨཱ་དི་ཙྩ་སྶ, བྷི་ཀྑ་ཝེ, ཨུ་ད་ཡ་ཏོ ཨེ་ཏཾ པུ་བྦ་ངྒ་མཾ ཨེ་ཏཾ པུ་བྦ་ནི་མི་ཏྟཾ, ཡ་དི་དཾ – ཨ་རུ་ཎུ་གྒཾ. ཨེ་ཝ་མེ་ཝ ཁོ, བྷི་ཀྑ་ཝེ, བྷི་ཀྑུ་ནོ ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨུ་པྤཱ་དཱ་ཡ ཨེ་ཏཾ པུ་བྦ་ངྒ་མཾ ཨེ་ཏཾ པུ་བྦ་ནི་མི་ཏྟཾ, ཡ་དི་དཾ – ཀ་ལྱཱ་ཎ་མི་ཏྟ་ཏཱ. ཀ་ལྱཱ་ཎ་མི་ཏྟ་སྶེ་ཏཾ, བྷི་ཀྑ་ཝེ, བྷི་ཀྑུ་ནོ པཱ་ཊི་ཀ་ངྑཾ – ས་ཏྟ བོ་ཛ྄ཛྷ་ངྒེ བྷཱ་ཝེ་སྶ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རི་སྶ་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ ཀ་ལྱཱ་ཎ་མི་ཏྟོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏི? ཨི་དྷ, བྷི་ཀྑ་ཝེ, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཀ་ལྱཱ་ཎ་མི་ཏྟོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏཱི’’ཏི. ཨ་ཊྛ་མཾ.

༩. ཨ་ཛ྄ཛྷ་ཏྟི་ཀ་ངྒ་སུ་ཏྟཾ

༢༣༠. ‘‘ཨ་ཛ྄ཛྷ་ཏྟི་ཀཾ, བྷི་ཀྑ་ཝེ, ཨ་ངྒ་ནྟི ཀ་རི་ཏྭཱ ནཱ་ཉྙཾ ཨེ་ཀ་ངྒ་མྤི ས་མ་ནུ་པ་སྶཱ་མི ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨུ་པྤཱ་དཱ་ཡ, ཡ་ཐ་ཡི་དཾ – བྷི་ཀྑ་ཝེ, ཡོ་ནི་སོ་མ་ན་སི་ཀཱ་རོ. ཡོ་ནི་སོ་མ་ན་སི་ཀཱ་ར་ས་མྤ་ནྣ་སྶེ་ཏཾ, བྷི་ཀྑ་ཝེ, བྷི་ཀྑུ་ནོ པཱ་ཊི་ཀ་ངྑཾ – ས་ཏྟ བོ་ཛ྄ཛྷ་ངྒེ བྷཱ་ཝེ་སྶ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རི་སྶ་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ ཡོ་ནི་སོ་མ་ན་སི་ཀཱ་ར་ས་མྤ་ནྣོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏི? ཨི་དྷ, བྷི་ཀྑ་ཝེ, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཡོ་ནི་སོ་མ་ན་སི་ཀཱ་ར་ས་མྤ་ནྣོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏཱི’’ཏི. ན་ཝ་མཾ.

༡༠. བཱ་ཧི་ར་ངྒ་སུ་ཏྟཾ

༢༣༡. ‘‘བཱ་ཧི་རཾ, བྷི་ཀྑ་ཝེ, ཨ་ངྒ་ནྟི ཀ་རི་ཏྭཱ ནཱ་ཉྙཾ ཨེ་ཀ་ངྒ་མྤི ས་མ་ནུ་པ་སྶཱ་མི ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨུ་པྤཱ་དཱ་ཡ, ཡ་ཐ་ཡི་དཾ – བྷི་ཀྑ་ཝེ, ཀ་ལྱཱ་ཎ་མི་ཏྟ་ཏཱ. ཀ་ལྱཱ་ཎ་མི་ཏྟ་སྶེ་ཏཾ, བྷི་ཀྑ་ཝེ, བྷི་ཀྑུ་ནོ པཱ་ཊི་ཀ་ངྑཾ – ས་ཏྟ བོ་ཛ྄ཛྷ་ངྒེ བྷཱ་ཝེ་སྶ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རི་སྶ་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ ཀ་ལྱཱ་ཎ་མི་ཏྟོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏི? ཨི་དྷ, བྷི་ཀྑ་ཝེ, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཀ་ལྱཱ་ཎ་མི་ཏྟོ ས་ཏྟ བོ་ཛ྄ཛྷ་ངྒེ བྷཱ་ཝེ་ཏི, ས་ཏྟ བོ་ཛ྄ཛྷ་ངྒེ བ་ཧུ་ལཱི་ཀ་རོ་ཏཱི’’ཏི. ད་ས་མཾ.

ཙ་ཀྐ་ཝ་ཏྟི་ཝ་གྒོ པ་ཉྩ་མོ.

ཏ་སྶུ་དྡཱ་ནཾ –

ཝི་དྷཱ ཙ་ཀྐ་ཝ་ཏྟི མཱ་རོ, དུ་པྤ་ཉྙོ པ་ཉྙ་ཝེ་ན ཙ;

ད་ལི་དྡོ ཨ་ད་ལི་དྡོ ཙ, ཨཱ་དི་ཙྩ་ངྒེ་ན ཏེ ད་སཱ་ཏི.