༦. སཱ་ཀ་ཙྪ་ཝ་གྒོ
༡. ཨཱ་ཧཱ་ར་སུ་ཏྟཾ
༢༣༢. སཱ་ཝ་ཏྠི་ནི་དཱ་ནཾ. ‘‘པ་ཉྩ་ནྣ་ཉྩ, བྷི་ཀྑ་ཝེ, ནཱི་ཝ་ར་ཎཱ་ནཾ ས་ཏྟ་ནྣ་ཉྩ བོ་ཛ྄ཛྷ་ངྒཱ་ནཾ ཨཱ་ཧཱ་ར་ཉྩ ཨ་ནཱ་ཧཱ་ར་ཉྩ དེ་སེ་སྶཱ་མི; ཏཾ སུ་ཎཱ་ཐ. ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, སུ་བྷ་ནི་མི་ཏྟཾ. ཏ་ཏྠ ཨ་ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ བྱཱ་པཱ་ད་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ བྱཱ་པཱ་ད་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, པ་ཊི་གྷ་ནི་མི་ཏྟཾ. ཏ་ཏྠ ཨ་ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ བྱཱ་པཱ་ད་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ བྱཱ་པཱ་ད་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ཐི་ན་མི་དྡྷ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཐི་ན་མི་དྡྷ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཨ་ར་ཏི ཏ་ནྡི ཝི་ཛ་མྦྷི་ཏཱ བྷ་ཏྟ་ས་མྨ་དོ ཙེ་ཏ་སོ ཙ ལཱི་ན་ཏྟཾ. ཏ་ཏྠ ཨ་ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ཐི་ན་མི་དྡྷ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཐི་ན་མི་དྡྷ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཙེ་ཏ་སོ ཨ་ཝཱུ་པ་ས་མོ. ཏ་ཏྠ ཨ་ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ ཨུ་པྤཱ་དཱ་ཡ, ཨུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཝི་ཙི་ཀི་ཙྪཱ་ཊྛཱ་ནཱི་ཡཱ དྷ་མྨཱ. ཏ་ཏྠ ཨ་ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ ཨུ་པྤཱ་དཱ་ཡ, ཨུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ས་ཏི་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཀུ་ས་ལཱ་ཀུ་ས་ལཱ དྷ་མྨཱ སཱ་ཝ་ཛྫཱ་ན་ཝ་ཛྫཱ དྷ་མྨཱ ཧཱི་ན་པ་ཎཱི་ཏཱ དྷ་མྨཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཨཱ་ར་མྦྷ་དྷཱ་ཏུ ནི་ཀྐ་མ་དྷཱ་ཏུ པ་ར་ཀྐ་མ་དྷཱ་ཏུ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, པཱི་ཏི་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཀཱ་ཡ་པྤ་སྶ་དྡྷི ཙི་ཏྟ་པྤ་སྶ་དྡྷི. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ས་མ་ཐ་ནི་མི་ཏྟཾ ཨ་བྱ་གྒ་ནི་མི་ཏྟཾ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཨུ་པེ་ཀྑཱ་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཨ་སུ་བྷ་ནི་མི་ཏྟཾ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཀཱ་མ་ཙྪ་ནྡ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ བྱཱ་པཱ་ད་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ བྱཱ་པཱ་ད་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, མེ་ཏྟཱ་ཙེ་ཏོ་ཝི་མུ་ཏྟི. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ བྱཱ་པཱ་ད་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ བྱཱ་པཱ་ད་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཐི་ན་མི་དྡྷ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཐི་ན་མི་དྡྷ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཨཱ་ར་མྦྷ་དྷཱ་ཏུ ནི་ཀྐ་མ་དྷཱ་ཏུ པ་ར་ཀྐ་མ་དྷཱ་ཏུ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཐི་ན་མི་དྡྷ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཐི་ན་མི་དྡྷ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཙེ་ཏ་སོ ཝཱུ་པ་ས་མོ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་དྡྷ་ཙྩ་ཀུ་ཀྐུ་ཙྩ་སྶ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ ཨུ་པྤཱ་དཱ་ཡ, ཨུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ? ཨ་ཏྠི, བྷི་ཀྑ་ཝེ, ཀུ་ས་ལཱ་ཀུ་ས་ལཱ དྷ་མྨཱ སཱ་ཝ་ཛྫཱ་ན་ཝ་ཛྫཱ དྷ་མྨཱ ཧཱི་ན་པ་ཎཱི་ཏཱ དྷ་མྨཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ. ཏ་ཏྠ ཡོ་ནི་སོ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ ཨུ་པྤཱ་དཱ་ཡ, ཨུ་པྤ་ནྣཱ་ཡ ཝཱ ཝི་ཙི་ཀི་ཙྪཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ས་ཏི་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཀུ་ས་ལཱ་ཀུ་ས་ལཱ དྷ་མྨཱ སཱ་ཝ་ཛྫཱ་ན་ཝ་ཛྫཱ དྷ་མྨཱ ཧཱི་ན་པ་ཎཱི་ཏཱ དྷ་མྨཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཨཱ་ར་མྦྷ་དྷཱ་ཏུ ནི་ཀྐ་མ་དྷཱ་ཏུ པ་ར་ཀྐ་མ་དྷཱ་ཏུ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, པཱི་ཏི་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཀཱ་ཡ་པྤ་སྶ་དྡྷི ཙི་ཏྟ་པྤ་སྶ་དྡྷི. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ས་མ་ཐ་ནི་མི་ཏྟཾ ཨ་བྱ་གྒ་ནི་མི་ཏྟཾ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ.
‘‘ཀོ ཙ, བྷི་ཀྑ་ཝེ, ཨ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ? ཨ་ཏྠི, བྷི་ཀྑ་ཝེ, ཨུ་པེ་ཀྑཱ་ས་མྦོ་ཛ྄ཛྷ་ངྒ་ཊྛཱ་ནཱི་ཡཱ དྷ་མྨཱ. ཏ་ཏྠ ཨ་མ་ན་སི་ཀཱ་ར་བ་ཧུ་ལཱི་ཀཱ་རོ – ཨ་ཡ་མ་ནཱ་ཧཱ་རོ ཨ་ནུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ, ཨུ་པྤ་ནྣ་སྶ ཝཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ པཱ་རི་པཱུ་རི་ཡཱ’’ཏི. པ་ཋ་མཾ.
༢. པ་རི་ཡཱ་ཡ་སུ་ཏྟཾ
༢༣༣. ཨ་ཐ ཁོ ས་མྦ་ཧུ་ལཱ བྷི་ཀྑཱུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པ་ཝི་སིཾ་སུ. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཨ་ཏི་པྤ་གོ ཁོ ཏཱ་ཝ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏུཾ. ཡཾ་ནཱུ་ན མ་ཡཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻཱ་མཱ’’ཏི.
ཨ་ཐ ཁོ ཏེ བྷི་ཀྑཱུ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དིཾ་སུ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣེ ཁོ ཏེ བྷི་ཀྑཱུ ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘‘ས་མ་ཎོ, ཨཱ་ཝུ་སོ, གོ་ཏ་མོ སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་ཏི – ‘ཨེ་ཐ ཏུ་མྷེ, བྷི་ཀྑ་ཝེ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ ས་ཏྟ བོ་ཛ྄ཛྷ་ངྒེ ཡ་ཐཱ་བྷཱུ་ཏཾ བྷཱ་ཝེ་ཐཱ’ཏི. མ་ཡ་མྤི ཁོ, ཨཱ་ཝུ་སོ, སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་མ – ‘ཨེ་ཐ ཏུ་མྷེ, ཨཱ་ཝུ་སོ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ ས་ཏྟ བོ་ཛ྄ཛྷ་ངྒེ ཡ་ཐཱ་བྷཱུ་ཏཾ བྷཱ་ཝེ་ཐཱ’ཏི. ཨི་དྷ ནོ, ཨཱ་ཝུ་སོ, ཀོ ཝི་སེ་སོ, ཀོ ཨ་དྷི་པྤ་ཡཱ་སོ, ཀིཾ ནཱ་ནཱ་ཀ་ར་ཎཾ ས་མ་ཎ་སྶ ཝཱ གོ་ཏ་མ་སྶ ཨ་མྷཱ་ཀཾ ཝཱ, ཡ་དི་དཾ – དྷ་མྨ་དེ་ས་ནཱ་ཡ ཝཱ དྷ་མྨ་དེ་ས་ནཾ, ཨ་ནུ་སཱ་ས་ནི་ཡཱ ཝཱ ཨ་ནུ་སཱ་ས་ནི’’ནྟི?
ཨ་ཐ ཁོ ཏེ བྷི་ཀྑཱུ ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡིཾ་སུ ན་པྤ་ཊི་ཀྐོ་སིཾ་སུ; ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐ་མིཾ་སུ – ‘‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱ’’ཏི. ཨ་ཐ ཁོ ཏེ བྷི་ཀྑཱུ སཱ་ཝ་ཏྠིཾ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ –
‘‘ཨི་དྷ མ་ཡཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པ་ཝི་སི་མྷ. ཏེ་སཾ ནོ, བྷ་ནྟེ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཏི་པྤ་གོ ཁོ ཏཱ་ཝ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏུཾ, ཡཾ་ནཱུ་ན མ་ཡཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻཱ་མཱ’ཏི. ཨ་ཐ ཁོ མ་ཡཾ, བྷ་ནྟེ, ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མི་མྷ; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དི་མྷ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི་མྷ. ཨེ་ཀ་མ་ནྟཾ ནི་སི་ནྣེ ཁོ ཨ་མྷེ, བྷ་ནྟེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘‘ས་མ་ཎོ, ཨཱ་ཝུ་སོ, གོ་ཏ་མོ སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་ཏི ‘ཨེ་ཐ ཏུ་མྷེ, བྷི་ཀྑ་ཝེ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ ས་ཏྟ བོ་ཛ྄ཛྷ་ངྒེ ཡ་ཐཱ་བྷཱུ་ཏཾ བྷཱ་ཝེ་ཐཱ’ཏི. མ་ཡ་མྤི ཁོ, ཨཱ་ཝུ་སོ, སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་མ – ‘ཨེ་ཐ ཏུ་མྷེ, ཨཱ་ཝུ་སོ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ ས་ཏྟ བོ་ཛ྄ཛྷ་ངྒེ ཡ་ཐཱ་བྷཱུ་ཏཾ བྷཱ་ཝེ་ཐཱ’ཏི. ཨི་དྷ ནོ, ཨཱ་ཝུ་སོ, ཀོ ཝི་སེ་སོ, ཀོ ཨ་དྷི་པྤ་ཡཱ་སོ, ཀིཾ ནཱ་ནཱ་ཀ་ར་ཎཾ ས་མ་ཎ་སྶ ཝཱ གོ་ཏ་མ་སྶ ཨ་མྷཱ་ཀཾ ཝཱ, ཡ་དི་དཾ – དྷ་མྨ་དེ་ས་ནཱ་ཡ ཝཱ དྷ་མྨ་དེ་ས་ནཾ, ཨ་ནུ་སཱ་ས་ནི་ཡཱ ཝཱ ཨ་ནུ་སཱ་ས་ནི’’ནྟི?
‘‘ཨ་ཐ ཁོ མ་ཡཾ, བྷ་ནྟེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡི་མྷ ན་པྤ་ཊི་ཀྐོ་སི་མྷ, ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐ་མི་མྷ – ‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱ’’’ཏི.
‘‘ཨེ་ཝཾ་ཝཱ་དི་ནོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཝ་མ་སྶུ ཝ་ཙ་ནཱི་ཡཱ – ‘ཨ་ཏྠི པ་ནཱ་ཝུ་སོ, པ་རི་ཡཱ་ཡོ, ཡཾ པ་རི་ཡཱ་ཡཾ ཨཱ་ག་མྨ པ་ཉྩ ནཱི་ཝ་ར་ཎཱ ད་ས ཧོ་ནྟི, ས་ཏྟ བོ་ཛ྄ཛྷ་ངྒཱ ཙ་ཏུ་དྡ་སཱ’ཏི. ཨེ་ཝཾ པུ་ཊྛཱ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ན ཙེ་ཝ ས་མྤཱ་ཡི་སྶ་ནྟི, ཨུ་ཏྟ་རི་ཉྩ ཝི་གྷཱ་ཏཾ ཨཱ་པ་ཛྫི་སྶ་ནྟི. ཏཾ ཀི་སྶ ཧེ་ཏུ? ཡ་ཐཱ ཏཾ, བྷི་ཀྑ་ཝེ, ཨ་ཝི་ས་ཡ་སྨིཾ. ‘‘ནཱ་ཧཾ ཏཾ, བྷི་ཀྑ་ཝེ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ, ཡོ ཨི་མེ་སཾ པ་ཉྷཱ་ནཾ ཝེ་ཡྻཱ་ཀ་ར་ཎེ་ན ཙི་ཏྟཾ ཨཱ་རཱ་དྷེ་ཡྻ, ཨ་ཉྙ་ཏྲ ཏ་ཐཱ་ག་ཏེ་ན ཝཱ ཏ་ཐཱ་ག་ཏ་སཱ་ཝ་ཀེ་ན ཝཱ ཨི་ཏོ ཝཱ པ་ན སུ་ཏྭཱ’’.
‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ, ཡཾ པ་རི་ཡཱ་ཡཾ ཨཱ་ག་མྨ པ་ཉྩ ནཱི་ཝ་ར་ཎཱ ད་ས ཧོ་ནྟི? ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ ཀཱ་མ་ཙྪ་ནྡོ ཏ་ད་པི ནཱི་ཝ་ར་ཎཾ, ཡ་ད་པི བ་ཧི་དྡྷཱ ཀཱ་མ་ཙྪ་ནྡོ ཏ་ད་པི ནཱི་ཝ་ར་ཎཾ. ‘ཀཱ་མ་ཙྪ་ནྡ་ནཱི་ཝ་ར་ཎ’ནྟི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ བྱཱ་པཱ་དོ ཏ་ད་པི ནཱི་ཝ་ར་ཎཾ, ཡ་ད་པི བ་ཧི་དྡྷཱ བྱཱ་པཱ་དོ ཏ་ད་པི ནཱི་ཝ་ར་ཎཾ. ‘བྱཱ་པཱ་ད་ནཱི་ཝ་ར་ཎ’ནྟི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཡ་ད་པི, བྷི་ཀྑ་ཝེ, ཐི་ནཾ ཏ་ད་པི ནཱི་ཝ་ར་ཎཾ, ཡ་ད་པི མི་དྡྷཾ ཏ་ད་པི ནཱི་ཝ་ར་ཎཾ. ‘ཐི་ན་མི་དྡྷ་ནཱི་ཝ་ར་ཎ’ནྟི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཡ་ད་པི, བྷི་ཀྑ་ཝེ, ཨུ་དྡྷ་ཙྩཾ ཏ་ད་པི ནཱི་ཝ་ར་ཎཾ, ཡ་ད་པི ཀུ་ཀྐུ་ཙྩཾ ཏ་ད་པི ནཱི་ཝ་ར་ཎཾ. ‘ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎ’ནྟི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ དྷ་མྨེ་སུ ཝི་ཙི་ཀི་ཙྪཱ ཏ་ད་པི ནཱི་ཝ་ར་ཎཾ, ཡ་ད་པི བ་ཧི་དྡྷཱ དྷ་མྨེ་སུ ཝི་ཙི་ཀི་ཙྪཱ ཏ་ད་པི ནཱི་ཝ་ར་ཎཾ. ‘ཝི་ཙི་ཀི་ཙྪཱ་ནཱི་ཝ་ར་ཎ’ནྟི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཨ་ཡཾ ཁོ, བྷི་ཀྑ་ཝེ, པ་རི་ཡཱ་ཡོ, ཡཾ པ་རི་ཡཱ་ཡཾ ཨཱ་ག་མྨ པ་ཉྩ ནཱི་ཝ་ར་ཎཱ ད་ས ཧོ་ནྟི.
‘‘ཀ་ཏ་མོ ཙ, བྷི་ཀྑ་ཝེ, པ་རི་ཡཱ་ཡོ, ཡཾ པ་རི་ཡཱ་ཡཾ ཨཱ་ག་མྨ ས་ཏྟ བོ་ཛ྄ཛྷ་ངྒཱ ཙ་ཏུ་དྡ་ས ཧོ་ནྟི? ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ དྷ་མྨེ་སུ ས་ཏི ཏ་ད་པི ས་ཏི་ས་མྦོ་ཛ྄ཛྷ་ངྒོ, ཡ་ད་པི བ་ཧི་དྡྷཱ དྷ་མྨེ་སུ ས་ཏི ཏ་ད་པི ས་ཏི་ས་མྦོ་ཛ྄ཛྷ་ངྒོ. ‘ས་ཏི་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ དྷ་མྨེ་སུ པ་ཉྙཱ་ཡ པ་ཝི་ཙི་ན་ཏི [པ་ཝི་ཙི་ནཱ་ཏི (ཀ.)] པ་ཝི་ཙ་ར་ཏི པ་རི་ཝཱི་མཾ་ས་མཱ་པ་ཛྫ་ཏི ཏ་ད་པི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཡ་ད་པི བ་ཧི་དྡྷཱ དྷ་མྨེ་སུ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ར་ཏི པ་རི་ཝཱི་མཾ་ས་མཱ་པ་ཛྫ་ཏི ཏ་ད་པི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ. ‘དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ཀཱ་ཡི་ཀཾ ཝཱི་རི་ཡཾ ཏ་ད་པི ཝཱི་རི་ཡ་ས་མྦོ་ཛ྄ཛྷ་ངྒོ, ཡ་ད་པི ཙེ་ཏ་སི་ཀཾ ཝཱི་རི་ཡཾ ཏ་ད་པི ཝཱི་རི་ཡ་ས་མྦོ་ཛ྄ཛྷ་ངྒོ. ‘ཝཱི་རི་ཡ་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ས་ཝི་ཏ་ཀྐ་ས་ཝི་ཙཱ་རཱ པཱི་ཏི ཏ་ད་པི པཱི་ཏི་ས་མྦོ་ཛ྄ཛྷ་ངྒོ, ཡ་ད་པི ཨ་ཝི་ཏ་ཀྐ་ཨ་ཝི་ཙཱ་རཱ པཱི་ཏི ཏ་ད་པི པཱི་ཏི་ས་མྦོ་ཛ྄ཛྷ་ངྒོ. ‘པཱི་ཏི་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ཀཱ་ཡ་པྤ་སྶ་དྡྷི ཏ་ད་པི པ་སྶ་དྡྷི་ས་མྦོ་ཛ྄ཛྷ་ངྒོ, ཡ་ད་པི ཙི་ཏྟ་པྤ་སྶ་དྡྷི ཏ་ད་པི པ་སྶ་དྡྷི་ས་མྦོ་ཛ྄ཛྷ་ངྒོ. ‘པ་སྶ་དྡྷི་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ས་ཝི་ཏ་ཀྐོ ས་ཝི་ཙཱ་རོ ས་མཱ་དྷི ཏ་ད་པི ས་མཱ་དྷི་ས་མྦོ་ཛ྄ཛྷ་ངྒོ, ཡ་ད་པི ཨ་ཝི་ཏ་ཀྐ་ཨ་ཝི་ཙཱ་རོ ས་མཱ་དྷི ཏ་ད་པི ས་མཱ་དྷི་ས་མྦོ་ཛ྄ཛྷ་ངྒོ. ‘ས་མཱ་དྷི་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི.
‘‘ཡ་ད་པི, བྷི་ཀྑ་ཝེ, ཨ་ཛ྄ཛྷ་ཏྟཾ དྷ་མྨེ་སུ ཨུ་པེ་ཀྑཱ ཏ་ད་པི ཨུ་པེ་ཀྑཱ་ས་མྦོ་ཛ྄ཛྷ་ངྒོ, ཡ་ད་པི བ་ཧི་དྡྷཱ དྷ་མྨེ་སུ ཨུ་པེ་ཀྑཱ ཏ་ད་པི ཨུ་པེ་ཀྑཱ་ས་མྦོ་ཛ྄ཛྷ་ངྒོ. ‘ཨུ་པེ་ཀྑཱ་ས་མྦོ་ཛ྄ཛྷ་ངྒོ’ཏི ཨི་ཏི ཧི་དཾ ཨུ་དྡེ་སཾ ག་ཙྪ་ཏི. ཏ་ད་མི་ནཱ་པེ་ཏཾ པ་རི་ཡཱ་ཡེ་ན དྭ་ཡཾ ཧོ་ཏི. ཨ་ཡཾ ཁོ, བྷི་ཀྑ་ཝེ, པ་རི་ཡཱ་ཡོ, ཡཾ པ་རི་ཡཱ་ཡཾ ཨཱ་ག་མྨ ས་ཏྟ བོ་ཛ྄ཛྷ་ངྒཱ ཙ་ཏུ་དྡ་སཱ’’ཏི. དུ་ཏི་ཡཾ.
༣. ཨ་གྒི་སུ་ཏྟཾ
༢༣༤. ཨ་ཐ ཁོ ས་མྦ་ཧུ་ལཱ བྷི་ཀྑཱུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠི་ཡཾ པི་ཎྜཱ་ཡ པ་ཝི་སིཾ་སུ. (པ་རི་ཡཱ་ཡ་སུ་ཏྟ་ས་དི་སཾ).
‘‘ཨེ་ཝཾ་ཝཱ་དི་ནོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཝ་མ་སྶུ ཝ་ཙ་ནཱི་ཡཱ – ‘ཡ་སྨིཾ, ཨཱ་ཝུ་སོ, ས་མ་ཡེ ལཱི་ནཾ ཙི་ཏྟཾ ཧོ་ཏི, ཀ་ཏ་མེ་སཾ ཏ་སྨིཾ ས་མ་ཡེ བོ་ཛ྄ཛྷ་ངྒཱ་ནཾ ཨ་ཀཱ་ལོ བྷཱ་ཝ་ནཱ་ཡ, ཀ་ཏ་མེ་སཾ ཏ་སྨིཾ ས་མ་ཡེ བོ་ཛ྄ཛྷ་ངྒཱ་ནཾ ཀཱ་ལོ བྷཱ་ཝ་ནཱ་ཡ? ཡ་སྨིཾ པ་ནཱ་ཝུ་སོ, ས་མ་ཡེ ཨུ་དྡྷ་ཏཾ ཙི་ཏྟཾ ཧོ་ཏི, ཀ་ཏ་མེ་སཾ ཏ་སྨིཾ ས་མ་ཡེ བོ་ཛ྄ཛྷ་ངྒཱ་ནཾ ཨ་ཀཱ་ལོ བྷཱ་ཝ་ནཱ་ཡ, ཀ་ཏ་མེ་སཾ ཏ་སྨིཾ ས་མ་ཡེ བོ་ཛ྄ཛྷ་ངྒཱ་ནཾ ཀཱ་ལོ བྷཱ་ཝ་ནཱ་ཡཱ’ཏི? ཨེ་ཝཾ པུ་ཊྛཱ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ན ཙེ་ཝ ས་མྤཱ་ཡི་སྶ་ནྟི, ཨུ་ཏྟ་རི་ཉྩ ཝི་གྷཱ་ཏཾ ཨཱ་པ་ཛྫི་སྶ་ནྟི. ཏཾ ཀི་སྶ ཧེ་ཏུ? ཡ་ཐཱ ཏཾ, བྷི་ཀྑ་ཝེ, ཨ་ཝི་ས་ཡ་སྨིཾ.
‘‘ནཱ་ཧཾ ཏཾ, བྷི་ཀྑ་ཝེ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཡོ ཨི་མེ་སཾ པ་ཉྷཱ་ནཾ ཝེ་ཡྻཱ་ཀ་ར་ཎེ་ན ཙི་ཏྟཾ ཨཱ་རཱ་དྷེ་ཡྻ, ཨ་ཉྙ་ཏྲ ཏ་ཐཱ་ག་ཏེ་ན ཝཱ ཏ་ཐཱ་ག་ཏ་སཱ་ཝ་ཀེ་ན ཝཱ ཨི་ཏོ ཝཱ པ་ན སུ་ཏྭཱ.
‘‘ཡ་སྨིཾ, བྷི་ཀྑ་ཝེ, ས་མ་ཡེ ལཱི་ནཾ ཙི་ཏྟཾ ཧོ་ཏི, ཨ་ཀཱ་ལོ ཏ་སྨིཾ ས་མ་ཡེ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ལཱི་ནཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི དུ་སྶ་མུ་ཊྛཱ་པ་ཡཾ ཧོ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ པ་རི་ཏྟཾ ཨ་གྒིཾ ཨུ་ཛྫཱ་ལེ་ཏུ་ཀཱ་མོ ཨ་སྶ. སོ ཏ་ཏྠ ཨ་ལླཱ་ནི ཙེ་ཝ ཏི་ཎཱ་ནི པ་ཀྑི་པེ་ཡྻ, ཨ་ལླཱ་ནི ཙ གོ་མ་ཡཱ་ནི པ་ཀྑི་པེ་ཡྻ, ཨ་ལླཱ་ནི ཙ ཀ་ཊྛཱ་ནི པ་ཀྑི་པེ་ཡྻ, ཨུ་ད་ཀ་ཝཱ་ཏ་ཉྩ ད་དེ་ཡྻ, པཾ་སུ་ཀེ་ན ཙ ཨོ་ཀི་རེ་ཡྻ; བྷ་བྦོ ནུ ཁོ སོ པུ་རི་སོ པ་རི་ཏྟཾ ཨ་གྒིཾ ཨུ་ཛྫཱ་ལི་ཏུ’’ནྟི? ‘‘ནོ ཧེ་ཏཾ, བྷ་ནྟེ’’.
‘‘ཨེ་ཝ་མེ་ཝ ཁོ, བྷི་ཀྑ་ཝེ, ཡ་སྨིཾ ས་མ་ཡེ ལཱི་ནཾ ཙི་ཏྟཾ ཧོ་ཏི, ཨ་ཀཱ་ལོ ཏ་སྨིཾ ས་མ་ཡེ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ལཱི་ནཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི དུ་སྶ་མུ་ཊྛཱ་པ་ཡཾ ཧོ་ཏི.
‘‘ཡ་སྨི་ཉྩ ཁོ, བྷི་ཀྑ་ཝེ, ས་མ་ཡེ ལཱི་ནཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ལཱི་ནཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི སུ་ས་མུ་ཊྛཱ་པ་ཡཾ ཧོ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ པ་རི་ཏྟཾ ཨ་གྒིཾ ཨུ་ཛྫཱ་ལེ་ཏུ་ཀཱ་མོ ཨ་སྶ. སོ ཏ་ཏྠ སུ་ཀྑཱ་ནི ཙེ་ཝ ཏི་ཎཱ་ནི པ་ཀྑི་པེ་ཡྻ, སུ་ཀྑཱ་ནི གོ་མ་ཡཱ་ནི པ་ཀྑི་པེ་ཡྻ, སུ་ཀྑཱ་ནི ཀ་ཊྛཱ་ནི པ་ཀྑི་པེ་ཡྻ, མུ་ཁ་ཝཱ་ཏ་ཉྩ ད་དེ་ཡྻ, ན ཙ པཾ་སུ་ཀེ་ན ཨོ་ཀི་རེ་ཡྻ; བྷ་བྦོ ནུ ཁོ སོ པུ་རི་སོ པ་རི་ཏྟཾ ཨ་གྒིཾ ཨུ་ཛྫཱ་ལི་ཏུ’’ནྟི? ‘‘ཨེ་ཝཾ, བྷ་ནྟེ’’.
‘‘ཨེ་ཝ་མེ་ཝ ཁོ, བྷི་ཀྑ་ཝེ, ཡ་སྨིཾ ས་མ་ཡེ ལཱི་ནཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ལཱི་ནཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི སུ་ས་མུ་ཊྛཱ་པ་ཡཾ ཧོ་ཏི.
‘‘ཡ་སྨིཾ, བྷི་ཀྑ་ཝེ, ས་མ་ཡེ ཨུ་དྡྷ་ཏྟཾ ཙི་ཏྟཾ ཧོ་ཏི, ཨ་ཀཱ་ལོ ཏ་སྨིཾ ས་མ་ཡེ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ཨུ་དྡྷ་ཏཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི དུ་ཝཱུ་པ་ས་མ་ཡཾ ཧོ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ མ་ཧ་ནྟཾ ཨ་གྒི་ཀྑ་ནྡྷཾ ནི་བྦཱ་པེ་ཏུ་ཀཱ་མོ ཨ་སྶ. སོ ཏ་ཏྠ སུ་ཀྑཱ་ནི ཙེ་ཝ ཏི་ཎཱ་ནི པ་ཀྑི་པེ་ཡྻ, སུ་ཀྑཱ་ནི ཙ གོ་མ་ཡཱ་ནི པ་ཀྑི་པེ་ཡྻ, སུ་ཀྑཱ་ནི ཙ ཀ་ཊྛཱ་ནི པ་ཀྑི་པེ་ཡྻ, མུ་ཁ་ཝཱ་ཏ་ཉྩ ད་དེ་ཡྻ, ན ཙ པཾ་སུ་ཀེ་ན ཨོ་ཀི་རེ་ཡྻ; བྷ་བྦོ ནུ ཁོ སོ པུ་རི་སོ མ་ཧ་ནྟཾ ཨ་གྒི་ཀྑ་ནྡྷཾ ནི་བྦཱ་པེ་ཏུ’’ནྟི? ‘‘ནོ ཧེ་ཏཾ, བྷ་ནྟེ’’.
‘‘ཨེ་ཝ་མེ་ཝ ཁོ, བྷི་ཀྑ་ཝེ, ཡ་སྨིཾ ས་མ་ཡེ ཨུ་དྡྷ་ཏཾ ཙི་ཏྟཾ ཧོ་ཏི, ཨ་ཀཱ་ལོ ཏ་སྨིཾ ས་མ་ཡེ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ ཝཱི་རི་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཨ་ཀཱ་ལོ པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ཨུ་དྡྷ་ཏཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི དུ་ཝཱུ་པ་ས་མ་ཡཾ ཧོ་ཏི.
‘‘ཡ་སྨི་ཉྩ ཁོ, བྷི་ཀྑ་ཝེ, ས་མ་ཡེ ཨུ་དྡྷ་ཏཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ཨུ་དྡྷ་ཏཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི སུ་ཝཱུ་པ་ས་མ་ཡཾ ཧོ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ མ་ཧ་ནྟཾ ཨ་གྒི་ཀྑ་ནྡྷཾ ནི་བྦཱ་པེ་ཏུ་ཀཱ་མོ ཨ་སྶ. སོ ཏ་ཏྠ ཨ་ལླཱ་ནི ཙེ་ཝ ཏི་ཎཱ་ནི པ་ཀྑི་པེ་ཡྻ, ཨ་ལླཱ་ནི ཙ གོ་མ་ཡཱ་ནི པ་ཀྑི་པེ་ཡྻ, ཨ་ལླཱ་ནི ཙ ཀ་ཊྛཱ་ནི པ་ཀྑི་པེ་ཡྻ, ཨུ་ད་ཀ་ཝཱ་ཏ་ཉྩ ད་དེ་ཡྻ, པཾ་སུ་ཀེ་ན ཙ ཨོ་ཀི་རེ་ཡྻ; བྷ་བྦོ ནུ ཁོ སོ པུ་རི་སོ མ་ཧ་ནྟཾ ཨ་གྒི་ཀྑ་ནྡྷཾ ནི་བྦཱ་པེ་ཏུ’’ནྟི? ‘‘ཨེ་ཝཾ, བྷ་ནྟེ’’.
‘‘ཨེ་ཝ་མེ་ཝ ཁོ, བྷི་ཀྑ་ཝེ, ཡ་སྨིཾ ས་མ་ཡེ ཨུ་དྡྷ་ཏཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ས་མཱ་དྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ. ཏཾ ཀི་སྶ ཧེ་ཏུ? ཨུ་དྡྷ་ཏཾ, བྷི་ཀྑ་ཝེ, ཙི་ཏྟཾ ཏཾ ཨེ་ཏེ་ཧི དྷ་མྨེ་ཧི སུ་ཝཱུ་པ་ས་མ་ཡཾ ཧོ་ཏི. ས་ཏི་ཉྩ ཁྭཱ་ཧཾ, བྷི་ཀྑ་ཝེ, ས་བྦ་ཏྠི་ཀཾ ཝ་དཱ་མཱི’’ཏི. ཏ་ཏི་ཡཾ.
༤. མེ་ཏྟཱ་ས་ཧ་ག་ཏ་སུ་ཏྟཾ
༢༣༥. ཨེ་ཀཾ ས་མ་ཡཾ བྷ་ག་ཝཱ ཀོ་ལི་ཡེ་སུ ཝི་ཧ་ར་ཏི ཧ་ལི་དྡ་ཝ་ས་ནཾ ནཱ་མ ཀོ་ལི་ཡཱ་ནཾ ནི་ག་མོ. ཨ་ཐ ཁོ ས་མྦ་ཧུ་ལཱ བྷི་ཀྑཱུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཧ་ལི་དྡ་ཝ་ས་ནཾ པི་ཎྜཱ་ཡ པ་ཝི་སིཾ་སུ. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཨ་ཏི་པྤ་གོ ཁོ ཏཱ་ཝ ཧ་ལི་དྡ་ཝ་ས་ནེ པི་ཎྜཱ་ཡ ཙ་རི་ཏུཾ. ཡཾ་ནཱུ་ན མ་ཡཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻཱ་མཱ’’ཏི.
ཨ་ཐ ཁོ ཏེ བྷི་ཀྑཱུ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དིཾ་སུ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣེ ཁོ ཏེ བྷི་ཀྑཱུ ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘‘ས་མ་ཎོ, ཨཱ་ཝུ་སོ, གོ་ཏ་མོ སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་ཏི – ‘ཨེ་ཐ ཏུ་མྷེ, བྷི་ཀྑ་ཝེ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐ. ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐ. མུ་དི་ཏཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ མུ་དི་ཏཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐ. ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐཱ’’’ཏི.
‘‘མ་ཡ་མྤི ཁོ, ཨཱ་ཝུ་སོ, སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་མ – ‘ཨེ་ཐ ཏུ་མྷེ, ཨཱ་ཝུ་སོ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ…པེ… ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ… མུ་དི་ཏཱ་ས་ཧ་ག་ཏེ་ན ཙེ་ཏ་སཱ… ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐཱ’ཏི. ཨི་དྷ ནོ, ཨཱ་ཝུ་སོ, ཀོ ཝི་སེ་སོ, ཀོ ཨ་དྷི་པྤ་ཡཱ་སོ, ཀིཾ ནཱ་ནཱ་ཀ་ར་ཎཾ ས་མ་ཎ་སྶ ཝཱ གོ་ཏ་མ་སྶ ཨ་མྷཱ་ཀཾ ཝཱ, ཡ་དི་དཾ – དྷ་མྨ་དེ་ས་ནཱ་ཡ ཝཱ དྷ་མྨ་དེ་ས་ནཾ, ཨ་ནུ་སཱ་ས་ནི་ཡཱ ཝཱ ཨ་ནུ་སཱ་ས་ནི’’ནྟི?
ཨ་ཐ ཁོ ཏེ བྷི་ཀྑཱུ ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡིཾ་སུ ན་པྤ་ཊི་ཀྐོ་སིཾ་སུ. ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐ་མིཾ་སུ – ‘‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱ’’ཏི. ཨ་ཐ ཁོ ཏེ བྷི་ཀྑཱུ ཧ་ལི་དྡ་ཝ་ས་ནེ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ –
‘‘ཨི་དྷ མ་ཡཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཧ་ལི་དྡ་ཝ་ས་ནེ པི་ཎྜཱ་ཡ པ་ཝི་སི་མྷ. ཏེ་སཾ ནོ, བྷ་ནྟེ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཏི་པྤ་གོ ཁོ ཏཱ་ཝ ཧ་ལི་དྡ་ཝ་ས་ནེ པི་ཎྜཱ་ཡ ཙ་རི་ཏུཾ. ཡཾ་ནཱུ་ན མ་ཡཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻཱ་མཱ’’’ཏི.
‘‘ཨ་ཐ ཁོ མ་ཡཾ, བྷ་ནྟེ, ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མི་མྷ, ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དི་མྷ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི་མྷ. ཨེ་ཀ་མ་ནྟཾ ནི་སི་ནྣེ ཁོ ཨ་མྷེ, བྷ་ནྟེ, ཏེ ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘‘ས་མ་ཎོ, ཨཱ་ཝུ་སོ, གོ་ཏ་མོ སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་ཏི – ‘ཨེ་ཐ ཏུ་མྷེ, བྷི་ཀྑ་ཝེ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ…པེ… ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ … མུ་དི་ཏཱ་ས་ཧ་ག་ཏེ་ན ཙེ་ཏ་སཱ… ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐཱ’’’ཏི.
‘‘མ་ཡ་མྤི ཁོ, ཨཱ་ཝུ་སོ, སཱ་ཝ་ཀཱ་ནཾ ཨེ་ཝཾ དྷ་མྨཾ དེ་སེ་མ – ‘ཨེ་ཐ ཏུ་མྷེ, ཨཱ་ཝུ་སོ, པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ…པེ… ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ…པེ… མུ་དི་ཏཱ་ས་ཧ་ག་ཏེ་ན ཙེ་ཏ་སཱ…པེ… ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཐ, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ; ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཐཱ’ཏི. ཨི་དྷ ནོ, ཨཱ་ཝུ་སོ, ཀོ ཝི་སེ་སོ, ཀོ ཨ་དྷི་པྤ་ཡཱ་སོ, ཀིཾ ནཱ་ནཱ་ཀ་ར་ཎཾ ས་མ་ཎ་སྶ ཝཱ གོ་ཏ་མ་སྶ ཨ་མྷཱ་ཀཾ ཝཱ, ཡ་དི་དཾ, དྷ་མྨ་དེ་ས་ནཱ་ཡ ཝཱ དྷ་མྨ་དེ་ས་ནཾ, ཨ་ནུ་སཱ་ས་ནི་ཡཱ ཝཱ ཨ་ནུ་སཱ་ས་ནི’’ནྟི?
ཨ་ཐ ཁོ མ་ཡཾ, བྷ་ནྟེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡི་མྷ ན་པྤ་ཊི་ཀྐོ་སི་མྷ, ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐ་མི་མྷ – ‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱ’ཏི.
‘‘ཨེ་ཝཾ་ཝཱ་དི་ནོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཝ་མ་སྶུ ཝ་ཙ་ནཱི་ཡཱ – ‘ཀ་ཐཾ བྷཱ་ཝི་ཏཱ པ་ནཱ་ཝུ་སོ, མེ་ཏྟཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཀ་ཐཾ བྷཱ་ཝི་ཏཱ པ་ནཱ་ཝུ་སོ, ཀ་རུ་ཎཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཀ་ཐཾ བྷཱ་ཝི་ཏཱ པ་ནཱ་ཝུ་སོ, མུ་དི་ཏཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཀ་ཐཾ བྷཱ་ཝི་ཏཱ པ་ནཱ་ཝུ་སོ, ཨུ་པེ་ཀྑཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ’’’ཏི? ཨེ་ཝཾ པུ་ཊྛཱ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ན ཙེ་ཝ ས་མྤཱ་ཡི་སྶ་ནྟི, ཨུ་ཏྟ་རི་ཉྩ ཝི་གྷཱ་ཏཾ ཨཱ་པ་ཛྫི་སྶ་ནྟི. ཏཾ ཀི་སྶ ཧེ་ཏུ? ཡ་ཐཱ ཏཾ, བྷི་ཀྑ་ཝེ, ཨ་ཝི་ས་ཡ་སྨིཾ. ‘‘ནཱ་ཧཾ ཏཾ, བྷི་ཀྑ་ཝེ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ, ཡོ ཨི་མེ་སཾ པ་ཉྷཱ་ནཾ ཝེ་ཡྻཱ་ཀ་ར་ཎེ་ན ཙི་ཏྟཾ ཨཱ་རཱ་དྷེ་ཡྻ, ཨ་ཉྙ་ཏྲ ཏ་ཐཱ་ག་ཏེ་ན ཝཱ ཏ་ཐཱ་ག་ཏ་སཱ་ཝ་ཀེ་ན ཝཱ ཨི་ཏོ ཝཱ པ་ན སུ་ཏྭཱ’’.
‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, མེ་ཏྟཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཨི་དྷ, བྷི་ཀྑ་ཝེ, བྷི་ཀྑུ མེ་ཏྟཱ་ས་ཧ་ག་ཏཾ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི…པེ… མེ་ཏྟཱ་ས་ཧ་ག་ཏཾ ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘པ་ཊི་ཀཱུ་ལེ ཨ་པྤ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, ཨ་པྤ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ ཙ པ་ཊི་ཀཱུ་ལེ ཙ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘པ་ཊི་ཀཱུ་ལེ ཙ ཨ་པྤ་ཊི་ཀཱུ་ལེ ཙ ཨ་པྤ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, ཨ་པྤ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལ་ཉྩ པ་ཊི་ཀཱུ་ལ་ཉྩ ཏ་དུ་བྷ་ཡཾ ཨ་བྷི་ནི་ཝ་ཛྫེ་ཏྭཱ ཨུ་པེ་ཀྑ་ཀོ ཝི་ཧ་རེ་ཡྻཾ ས་ཏོ ས་མྤ་ཛཱ་ནོ’ཏི, ཨུ་པེ་ཀྑ་ཀོ ཙ ཏ་ཏྠ ཝི་ཧ་ར་ཏི ས་ཏོ ས་མྤ་ཛཱ་ནོ, སུ་བྷཾ ཝཱ ཁོ པ་ན ཝི་མོ་ཀྑཾ ཨུ་པ་ས་མྤ་ཛྫ ཝི་ཧ་ར་ཏི. སུ་བྷ་པ་ར་མཱ་ཧཾ, བྷི་ཀྑ་ཝེ, མེ་ཏྟཱ་ཙེ་ཏོ་ཝི་མུ་ཏྟིཾ ཝ་དཱ་མི, ཨི་དྷ་པ་ཉྙ་སྶ བྷི་ཀྑུ་ནོ ཨུ་ཏྟ་རི་ཝི་མུ་ཏྟིཾ ཨ་པྤ་ཊི་ཝི་ཛ྄ཛྷ་ཏོ.
‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ཀ་རུ་ཎཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཨི་དྷ, བྷི་ཀྑ་ཝེ, བྷི་ཀྑུ ཀ་རུ་ཎཱ་ས་ཧ་ག་ཏཾ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི…པེ… ཀ་རུ་ཎཱ་ས་ཧ་ག་ཏཾ ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི…པེ… ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལ་ཉྩ པ་ཊི་ཀཱུ་ལ་ཉྩ ཏ་དུ་བྷ་ཡཾ ཨ་བྷི་ནི་ཝ་ཛྫེ་ཏྭཱ ཨུ་པེ་ཀྑ་ཀོ ཝི་ཧ་རེ་ཡྻཾ ས་ཏོ ས་མྤ་ཛཱ་ནོ’ཏི, ཨུ་པེ་ཀྑ་ཀོ ཏ་ཏྠ ཝི་ཧ་ར་ཏི ས་ཏོ ས་མྤ་ཛཱ་ནོ. ས་བྦ་སོ ཝཱ པ་ན རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘ཨ་ན་ནྟོ ཨཱ་ཀཱ་སོ’ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨཱ་ཀཱ་སཱ་ན་ཉྩཱ་ཡ་ཏ་ན་པ་ར་མཱ་ཧཾ, བྷི་ཀྑ་ཝེ, ཀ་རུ་ཎཱ་ཙེ་ཏོ་ཝི་མུ་ཏྟིཾ ཝ་དཱ་མི, ཨི་དྷ་པ་ཉྙ་སྶ བྷི་ཀྑུ་ནོ ཨུ་ཏྟ་རི་ཝི་མུ་ཏྟིཾ ཨ་པྤ་ཊི་ཝི་ཛ྄ཛྷ་ཏོ.
‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, མུ་དི་ཏཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཨི་དྷ, བྷི་ཀྑ་ཝེ, བྷི་ཀྑུ མུ་དི་ཏཱ་ས་ཧ་ག་ཏཾ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི…པེ… མུ་དི་ཏཱ་ས་ཧ་ག་ཏཾ ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི …པེ… ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལ་ཉྩ པ་ཊི་ཀཱུ་ལ་ཉྩ ཏ་དུ་བྷ་ཡཾ ཨ་བྷི་ནི་ཝ་ཛྫེ་ཏྭཱ ཨུ་པེ་ཀྑ་ཀོ ཝི་ཧ་རེ་ཡྻཾ ས་ཏོ ས་མྤ་ཛཱ་ནོ’ཏི, ཨུ་པེ་ཀྑ་ཀོ ཏ་ཏྠ ཝི་ཧ་ར་ཏི ས་ཏོ ས་མྤ་ཛཱ་ནོ. ས་བྦ་སོ ཝཱ པ་ན ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཝི་ཉྙཱ་ཎ་ཉྩཱ་ཡ་ཏ་ན་པ་ར་མཱ་ཧཾ, བྷི་ཀྑ་ཝེ, མུ་དི་ཏཱ་ཙེ་ཏོ་ཝི་མུ་ཏྟིཾ ཝ་དཱ་མི, ཨི་དྷ་པ་ཉྙ་སྶ བྷི་ཀྑུ་ནོ ཨུ་ཏྟ་རི་ཝི་མུ་ཏྟིཾ ཨ་པྤ་ཊི་ཝི་ཛ྄ཛྷ་ཏོ.
‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ཨུ་པེ་ཀྑཱ་ཙེ་ཏོ་ཝི་མུ་ཏྟི, ཀིཾ་ག་ཏི་ཀཱ ཧོ་ཏི, ཀིཾ་པ་ར་མཱ, ཀིཾ་ཕ་ལཱ, ཀིཾ་པ་རི་ཡོ་སཱ་ནཱ? ཨི་དྷ, བྷི་ཀྑ་ཝེ, བྷི་ཀྑུ ཨུ་པེ་ཀྑཱ་ས་ཧ་ག་ཏཾ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ…པེ… ཨུ་པེ་ཀྑཱ་ས་ཧ་ག་ཏཾ ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘པ་ཊི་ཀཱུ་ལེ ཨ་པྤ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, ཨ་པྤ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལེ ཙ པ་ཊི་ཀཱུ་ལེ ཙ པ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, པ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘པ་ཊི་ཀཱུ་ལེ ཙ ཨ་པྤ་ཊི་ཀཱུ་ལེ ཙ ཨ་པྤ་ཊི་ཀཱུ་ལ་ས་ཉྙཱི ཝི་ཧ་རེ་ཡྻ’ནྟི, ཨ་པྤ་ཊི་ཀཱུ་ལ་ས་ཉྙཱི ཏ་ཏྠ ཝི་ཧ་ར་ཏི. ས་ཙེ ཨཱ་ཀ་ངྑ་ཏི ‘ཨ་པྤ་ཊི་ཀཱུ་ལ་ཉྩ པ་ཊི་ཀཱུ་ལ་ཉྩ ཏ་དུ་བྷ་ཡཾ ཨ་བྷི་ནི་ཝ་ཛྫེ་ཏྭཱ ཨུ་པེ་ཀྑ་ཀོ ཝི་ཧ་རེ་ཡྻཾ ས་ཏོ ས་མྤ་ཛཱ་ནོ’ཏི, ཨུ་པེ་ཀྑ་ཀོ ཏ་ཏྠ ཝི་ཧ་ར་ཏི ས་ཏོ ས་མྤ་ཛཱ་ནོ. ས་བྦ་སོ ཝཱ པ་ན ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨཱ་ཀི་ཉྩ་ཉྙཱ་ཡ་ཏ་ན་པ་ར་མཱ་ཧཾ, བྷི་ཀྑ་ཝེ, ཨུ་པེ་ཀྑཱ་ཙེ་ཏོ་ཝི་མུ་ཏྟིཾ ཝ་དཱ་མི, ཨི་དྷ་པ་ཉྙ་སྶ བྷི་ཀྑུ་ནོ ཨུ་ཏྟ་རི་ཝི་མུ་ཏྟིཾ ཨ་པྤ་ཊི་ཝི་ཛ྄ཛྷ་ཏོ’’ཏི. ཙ་ཏུ་ཏྠཾ.
༥. ས་ངྒཱ་ར་ཝ་སུ་ཏྟཾ
༢༣༦. སཱ་ཝ་ཏྠི་ནི་དཱ་ནཾ. ཨ་ཐ ཁོ ས་ངྒཱ་ར་ཝོ བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ས་ངྒཱ་ར་ཝོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ –
‘‘ཀོ ནུ ཁོ, བྷོ གོ་ཏ་མ, ཧེ་ཏུ, ཀོ པ་ཙྩ་ཡོ ཡེ་ནེ་ཀ་དཱ དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ? ཀོ པ་ན, བྷོ གོ་ཏ་མ, ཧེ་ཏུ, ཀོ པ་ཙྩ་ཡོ ཡེ་ནེ་ཀ་དཱ དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ’’ཏི?
‘‘ཡ་སྨིཾ ཁོ, བྲཱ་ཧྨ་ཎ, ས་མ་ཡེ ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ སཾ་ས་ཊྛོ ལཱ་ཁཱ་ཡ ཝཱ ཧ་ལི་དྡི་ཡཱ ཝཱ ནཱི་ལི་ཡཱ ཝཱ མ་ཉྫི་ཊྛཱ་ཡ ཝཱ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི བྱཱ་པཱ་ད་པ་རེ་ཏེ་ན, ཨུ་པྤ་ནྣ་སྶ ཙ བྱཱ་པཱ་ད་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ཨ་གྒི་ནཱ ས་ནྟ་ཏྟོ པ་ཀྐུ་ཐི་ཏོ [པ་ཀྐུ་དྷི་ཏོ (ཀ.), ཨུ་ཀྐ་ཊྛི་ཏོ (སཱི.), ཨུ་ཀྐུ་ཊྛི་ཏོ (སྱཱ.)] ཨུ་སྨུ་ད་ཀ་ཛཱ་ཏོ [ཨུ་སྶ་ད་ཀ་ཛཱ་ཏོ (སཱི.), ཨུ་སྨཱ་ད་ཀ་ཛཱ་ཏོ (སྱཱ.)]. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི བྱཱ་པཱ་ད་པ་རེ་ཏེ་ན, ཨུ་པྤ་ནྣ་སྶ ཙ བྱཱ་པཱ་ད་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཐི་ན་མི་དྡྷ་པ་རེ་ཏེ་ན, ཨུ་པྤ་ནྣ་སྶ ཙ ཐི་ན་མི་དྡྷ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ སེ་ཝཱ་ལ་པ་ཎ་ཀ་པ་རི་ཡོ་ན་དྡྷོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཐི་ན་མི་དྡྷ་པ་རེ་ཏེ་ན, ཨུ་པྤ་ནྣ་སྶ ཙ ཐི་ན་མི་དྡྷ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཨུ་དྡྷ་ཙྩ་ཀུ་ཀྐུ་ཙྩ་པ་རེ་ཏེ་ན, ཨུ་པྤ་ནྣ་སྶ ཙ ཨུ་དྡྷ་ཙྩ་ཀུ་ཀྐུ་ཙྩ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ཝཱ་ཏེ་རི་ཏོ ཙ་ལི་ཏོ བྷ་ནྟོ ཨཱུ་མི་ཛཱ་ཏོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཨུ་དྡྷ་ཙྩ་ཀུ་ཀྐུ་ཙྩ་པ་རེ་ཏེ་ན, ཨུ་པྤ་ནྣ་སྶ ཙ ཨུ་དྡྷ་ཙྩ་ཀུ་ཀྐུ་ཙྩ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཝི་ཙི་ཀི་ཙྪཱ་པ་རེ་ཏེ་ན, ཨུ་པྤ་ནྣཱ་ཡ ཙ ཝི་ཙི་ཀི་ཙྪཱ་ཡ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ཨཱ་ཝི་ལོ ལུ་ལི༹་ཏོ ཀ་ལ་ལཱི་བྷཱུ་ཏོ ཨ་ནྡྷ་ཀཱ་རེ ནི་ཀྑི་ཏྟོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཝི་ཙི་ཀི་ཙྪཱ་པ་རེ་ཏེ་ན, ཨུ་པྤ་ནྣཱ་ཡ ཙ ཝི་ཙི་ཀི་ཙྪཱ་ཡ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི, ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི; དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ. ཨ་ཡཾ ཁོ, བྲཱ་ཧྨ་ཎ, ཧེ་ཏུ ཨ་ཡཾ པ་ཙྩ་ཡོ ཡེ་ནེ་ཀ་དཱ དཱི་གྷ་ར་ཏྟཾ ས་ཛ྄ཛྷཱ་ཡ་ཀ་ཏཱ་པི མ་ནྟཱ ན་པྤ་ཊི་བྷ་ནྟི, པ་གེ་ཝ ཨ་ས་ཛ྄ཛྷཱ་ཡ་ཀ་ཏཱ.
‘‘ཡ་སྨི་ཉྩ ཁོ, བྲཱ་ཧྨ་ཎ, ས་མ་ཡེ ན ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི; དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ཨ་སཾ་ས་ཊྛོ ལཱ་ཁཱ་ཡ ཝཱ ཧ་ལི་དྡི་ཡཱ ཝཱ ནཱི་ལི་ཡཱ ཝཱ མ་ཉྫི་ཊྛཱ་ཡ ཝཱ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ན ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི…པེ….
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ན བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན བྱཱ་པཱ་ད་པ་རེ་ཏེ་ན, ཨུ་པྤ་ནྣ་སྶ ཙ བྱཱ་པཱ་ད་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ན ཨ་གྒི་ནཱ ས་ནྟ་ཏྟོ ན པ་ཀྐུ་ཐི་ཏོ ན ཨུ་སྨུ་ད་ཀ་ཛཱ་ཏོ, ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ན བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན བྱཱ་པཱ་ད་པ་རེ་ཏེ་ན, ཨུ་པྤ་ནྣ་སྶ ཙ བྱཱ་པཱ་ད་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ན ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཐི་ན་མི་དྡྷ་པ་རེ་ཏེ་ན, ཨུ་པྤ་ནྣ་སྶ ཙ ཐི་ན་མི་དྡྷ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི … དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ན སེ་ཝཱ་ལ་པ་ཎ་ཀ་པ་རི་ཡོ་ན་དྡྷོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ན ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཐི་ན་མི་དྡྷ་པ་རེ་ཏེ་ན, ཨུ་པྤ་ནྣ་སྶ ཙ ཐི་ན་མི་དྡྷ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ན ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཨུ་དྡྷ་ཙྩ་ཀུ་ཀྐུ་ཙྩ་པ་རེ་ཏེ་ན, ཨུ་པྤ་ནྣ་སྶ ཙ ཨུ་དྡྷ་ཙྩ་ཀུ་ཀྐུ་ཙྩ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ན ཝཱ་ཏེ་རི་ཏོ ན ཙ་ལི་ཏོ ན བྷ་ནྟོ ན ཨཱུ་མི་ཛཱ་ཏོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ན ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཨུ་དྡྷ་ཙྩ་ཀུ་ཀྐུ་ཙྩ་པ་རེ་ཏེ་ན, ཨུ་པྤ་ནྣ་སྶ ཙ ཨུ་དྡྷ་ཙྩ་ཀུ་ཀྐུ་ཙྩ་སྶ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི…པེ… ཨུ་བྷ་ཡ་ཏྠ་མྤི… དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘པུ་ན ཙ་པ་རཾ, བྲཱ་ཧྨ་ཎ, ཡ་སྨིཾ ས་མ་ཡེ ན ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཝི་ཙི་ཀི་ཙྪཱ་པ་རེ་ཏེ་ན, ཨུ་པྤ་ནྣཱ་ཡ ཙ ཝི་ཙི་ཀི་ཙྪཱ་ཡ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི [པ་ཛཱ་ནཱ་ཏི པ་སྶ་ཏི (སྱཱ.)], ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི; ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི; དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘སེ་ཡྻ་ཐཱ་པི, བྲཱ་ཧྨ་ཎ, ཨུ་ད་པ་ཏྟོ ཨ་ཙྪོ ཝི་པྤ་ས་ནྣོ ཨ་ནཱ་ཝི་ལོ ཨཱ་ལོ་ཀེ ནི་ཀྑི་ཏྟོ. ཏ་ཏྠ ཙ་ཀྑུ་མཱ པུ་རི་སོ ས་ཀཾ མུ་ཁ་ནི་མི་ཏྟཾ པ་ཙྩ་ཝེ་ཀྑ་མཱ་ནོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ. ཨེ་ཝ་མེ་ཝ ཁོ, བྲཱ་ཧྨ་ཎ, ཡ་སྨིཾ ས་མ་ཡེ ན ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ན ཝི་ཙི་ཀི་ཙྪཱ་པ་རེ་ཏེ་ན, ཨུ་པྤ་ནྣཱ་ཡ ཙ ཝི་ཙི་ཀི་ཙྪཱ་ཡ ནི་སྶ་ར་ཎཾ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཏྟ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, པ་ར་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི, ཨུ་བྷ་ཡ་ཏྠ་མྤི ཏ་སྨིཾ ས་མ་ཡེ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི; དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ. ཨ་ཡཾ ཁོ, བྲཱ་ཧྨ་ཎ, ཧེ་ཏུ ཨ་ཡཾ པ་ཙྩ་ཡོ ཡེ་ནེ་ཀ་དཱ དཱི་གྷ་ར་ཏྟཾ ཨ་ས་ཛ྄ཛྷཱ་ཡ་ཀ་ཏཱ་པི མ་ནྟཱ པ་ཊི་བྷ་ནྟི, པ་གེ་ཝ ས་ཛ྄ཛྷཱ་ཡ་ཀ་ཏཱ.
‘‘ས་ཏྟི་མེ, བྲཱ་ཧྨ་ཎ, བོ་ཛ྄ཛྷ་ངྒཱ ཨ་ནཱ་ཝ་ར་ཎཱ ཨ་ནཱི་ཝ་ར་ཎཱ ཙེ་ཏ་སོ ཨ་ནུ་པ་ཀྐི་ལེ་སཱ བྷཱ་ཝི་ཏཱ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟི་ཕ་ལ་ས་ཙྪི་ཀི་རི་ཡཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ས་ཏི་ས་མྦོ་ཛ྄ཛྷ་ངྒོ ཁོ, བྲཱ་ཧྨ་ཎ, ཨ་ནཱ་ཝ་ར་ཎོ ཨ་ནཱི་ཝ་ར་ཎོ ཙེ་ཏ་སོ ཨ་ནུ་པ་ཀྐི་ལེ་སོ བྷཱ་ཝི་ཏོ བ་ཧུ་ལཱི་ཀ་ཏོ ཝི་ཛྫཱ་ཝི་མུ་ཏྟི་ཕ་ལ་ས་ཙྪི་ཀི་རི་ཡཱ་ཡ སཾ་ཝ་ཏྟ་ཏི…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒོ ཁོ, བྲཱ་ཧྨ་ཎ, ཨ་ནཱ་ཝ་ར་ཎོ ཨ་ནཱི་ཝ་ར་ཎོ ཙེ་ཏ་སོ ཨ་ནུ་པ་ཀྐི་ལེ་སོ བྷཱ་ཝི་ཏོ བ་ཧུ་ལཱི་ཀ་ཏོ ཝི་ཛྫཱ་ཝི་མུ་ཏྟི་ཕ་ལ་ས་ཙྪི་ཀི་རི་ཡཱ་ཡ སཾ་ཝ་ཏྟ་ཏི. ཨི་མེ ཁོ, བྲཱ་ཧྨ་ཎ, ས་ཏྟ བོ་ཛ྄ཛྷ་ངྒཱ ཨ་ནཱ་ཝ་ར་ཎཱ ཨ་ནཱི་ཝ་ར་ཎཱ ཙེ་ཏ་སོ ཨ་ནུ་པ་ཀྐི་ལེ་སཱ བྷཱ་ཝི་ཏཱ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟི་ཕ་ལ་ས་ཙྪི་ཀི་རི་ཡཱ་ཡ སཾ་ཝ་ཏྟ་ནྟཱི’’ཏི. ཨེ་ཝཾ ཝུ་ཏྟེ ས་ངྒཱ་ར་ཝོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷོ གོ་ཏ་མ…པེ… ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. པ་ཉྩ་མཾ.
༦. ཨ་བྷ་ཡ་སུ་ཏྟཾ
༢༣༧. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཨ་ཐ ཁོ ཨ་བྷ་ཡོ རཱ་ཛ་ཀུ་མཱ་རོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨ་བྷ་ཡོ རཱ་ཛ་ཀུ་མཱ་རོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘པཱུ་ར་ཎོ, བྷ་ནྟེ, ཀ་སྶ་པོ ཨེ་ཝ་མཱ་ཧ – ‘ན་ཏྠི ཧེ་ཏུ, ན་ཏྠི པ་ཙྩ་ཡོ ཨ་ཉྙཱ་ཎཱ་ཡ ཨ་ད་སྶ་ནཱ་ཡ. ཨ་ཧེ་ཏུ, ཨ་པྤ་ཙྩ་ཡོ [ཨ་པྤ་ཙྩ་ཡཱ (སཱི.), ཨ་པྤ་ཙྩ་ཡཾ (?)] ཨ་ཉྙཱ་ཎཾ ཨ་ད་སྶ་ནཾ ཧོ་ཏི. ན་ཏྠི ཧེ་ཏུ, ན་ཏྠི པ་ཙྩ་ཡོ ཉཱ་ཎཱ་ཡ ད་སྶ་ནཱ་ཡ. ཨ་ཧེ་ཏུ, ཨ་པྤ་ཙྩ་ཡོ ཉཱ་ཎཾ ད་སྶ་ནཾ ཧོ་ཏཱི’ཏི. ཨི་དྷ བྷ་ག་ཝཱ ཀི་མཱ་ཧཱ’’ཏི? ‘‘ཨ་ཏྠི, རཱ་ཛ་ཀུ་མཱ་ར, ཧེ་ཏུ, ཨ་ཏྠི པ་ཙྩ་ཡོ ཨ་ཉྙཱ་ཎཱ་ཡ ཨ་ད་སྶ་ནཱ་ཡ. ས་ཧེ་ཏུ, ས་པྤ་ཙྩ་ཡོ [ས་པྤ་ཙྩ་ཡཱ (སཱི.), ས་པྤ་ཙྩ་ཡཾ (?)] ཨ་ཉྙཱ་ཎཾ ཨ་ད་སྶ་ནཾ ཧོ་ཏི. ཨ་ཏྠི, རཱ་ཛ་ཀུ་མཱ་ར, ཧེ་ཏུ, ཨ་ཏྠི པ་ཙྩ་ཡོ ཉཱ་ཎཱ་ཡ ད་སྶ་ནཱ་ཡ. ས་ཧེ་ཏུ, ས་པྤ་ཙྩ་ཡོ ཉཱ་ཎཾ ད་སྶ་ནཾ ཧོ་ཏཱི’’ཏི.
‘‘ཀ་ཏ་མོ པ་ན, བྷ་ནྟེ, ཧེ་ཏུ, ཀ་ཏ་མོ པ་ཙྩ་ཡོ ཨ་ཉྙཱ་ཎཱ་ཡ ཨ་ད་སྶ་ནཱ་ཡ? ཀ་ཐཾ ས་ཧེ་ཏུ, ས་པྤ་ཙྩ་ཡོ ཨ་ཉྙཱ་ཎཾ ཨ་ད་སྶ་ནཾ ཧོ་ཏཱི’’ཏི? ‘‘ཡ་སྨིཾ ཁོ, རཱ་ཛ་ཀུ་མཱ་ར, ས་མ་ཡེ ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི – ཨ་ཡ་མྤི ཁོ, རཱ་ཛ་ཀུ་མཱ་ར, ཧེ་ཏུ, ཨ་ཡཾ པ་ཙྩ་ཡོ ཨ་ཉྙཱ་ཎཱ་ཡ ཨ་ད་སྶ་ནཱ་ཡ. ཨེ་ཝ་མྤི ས་ཧེ་ཏུ ས་པྤ་ཙྩ་ཡོ ཨ་ཉྙཱ་ཎཾ ཨ་ད་སྶ་ནཾ ཧོ་ཏི.
‘‘པུ་ན ཙ་པ་རཾ, རཱ་ཛ་ཀུ་མཱ་ར, ཡ་སྨིཾ ས་མ་ཡེ བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི བྱཱ་པཱ་ད་པ་རེ་ཏེ་ན…པེ… ཐི་ན་མི་དྡྷ་པ་རི་ཡུ་ཊྛི་ཏེ་ན… ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན… ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཝི་ཙི་ཀི་ཙྪཱ་པ་རེ་ཏེ་ན, ཨུ་པྤ་ནྣཱ་ཡ ཙ ཝི་ཙི་ཀི་ཙྪཱ་ཡ ནི་སྶ་ར་ཎཾ ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི – ཨ་ཡ་མྤི ཁོ, རཱ་ཛ་ཀུ་མཱ་ར, ཧེ་ཏུ, ཨ་ཡཾ པ་ཙྩ་ཡོ ཨ་ཉྙཱ་ཎཱ་ཡ ཨ་ད་སྶ་ནཱ་ཡ. ཨེ་ཝ་མྤི ས་ཧེ་ཏུ ས་པྤ་ཙྩ་ཡོ ཨ་ཉྙཱ་ཎཾ ཨ་ད་སྶ་ནཾ ཧོ་ཏཱི’’ཏི.
‘‘ཀོ ནཱ་མཱ་ཡཾ, བྷ་ནྟེ, དྷ་མྨ་པ་རི་ཡཱ་ཡོ’’ཏི? ‘‘ནཱི་ཝ་ར་ཎཱ ནཱ་མེ་ཏེ, རཱ་ཛ་ཀུ་མཱ་རཱ’’ཏི. ‘‘ཏ་གྒྷ, བྷ་ག་ཝཱ, ནཱི་ཝ་ར་ཎཱ; ཏ་གྒྷ, སུ་ག་ཏ, ནཱི་ཝ་ར་ཎཱ! ཨེ་ཀ་མེ་ཀེ་ན་པི ཁོ, བྷ་ནྟེ, ནཱི་ཝ་ར་ཎེ་ན ཨ་བྷི་བྷཱུ་ཏོ ཡ་ཐཱ་བྷཱུ་ཏཾ ན ཛཱ་ནེ་ཡྻ ན པ་སྶེ་ཡྻ, ཀོ པ་ན ཝཱ་དོ པ་ཉྩ་ཧི ནཱི་ཝ་ར་ཎེ་ཧི?
‘‘ཀ་ཏ་མོ པ་ན, བྷ་ནྟེ, ཧེ་ཏུ, ཀ་ཏ་མོ པ་ཙྩ་ཡོ ཉཱ་ཎཱ་ཡ ད་སྶ་ནཱ་ཡ? ཀ་ཐཾ ས་ཧེ་ཏུ, ས་པྤ་ཙྩ་ཡོ ཉཱ་ཎཾ ད་སྶ་ནཾ ཧོ་ཏཱི’’ཏི? ‘‘ཨི་དྷ, རཱ་ཛ་ཀུ་མཱ་ར, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ས་ཏི་ས་མྦོ་ཛ྄ཛྷ་ངྒཾ བྷཱ་ཝི་ཏེ་ན ཙི་ཏྟེ་ན ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི – ཨ་ཡ་མྤི ཁོ, རཱ་ཛ་ཀུ་མཱ་ར, ཧེ་ཏུ, ཨ་ཡཾ པ་ཙྩ་ཡོ ཉཱ་ཎཱ་ཡ ད་སྶ་ནཱ་ཡ. ཨེ་ཝ་མྤི ས་ཧེ་ཏུ, ས་པྤ་ཙྩ་ཡོ ཉཱ་ཎཾ ད་སྶ་ནཾ ཧོ་ཏི.
‘‘པུ་ན ཙ་པ་རཾ, རཱ་ཛ་ཀུ་མཱ་ར, བྷི་ཀྑུ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. སོ ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝི་ཏེ་ན ཙི་ཏྟེ་ན ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི – ཨ་ཡ་མྤི ཁོ, རཱ་ཛ་ཀུ་མཱ་ར, ཧེ་ཏུ, ཨ་ཡཾ པ་ཙྩ་ཡོ ཉཱ་ཎཱ་ཡ ད་སྶ་ནཱ་ཡ. ཨེ་ཝཾ ས་ཧེ་ཏུ, ས་པྤ་ཙྩ་ཡོ ཉཱ་ཎཾ ད་སྶ་ནཾ ཧོ་ཏཱི’’ཏི.
‘‘ཀོ ནཱ་མཱ་ཡཾ, བྷ་ནྟེ, དྷ་མྨ་པ་རི་ཡཱ་ཡོ’’ཏི? ‘‘བོ་ཛ྄ཛྷ་ངྒཱ ནཱ་མེ་ཏེ, རཱ་ཛ་ཀུ་མཱ་རཱ’’ཏི. ‘‘ཏ་གྒྷ, བྷ་ག་ཝཱ, བོ་ཛ྄ཛྷ་ངྒཱ; ཏ་གྒྷ, སུ་ག་ཏ, བོ་ཛ྄ཛྷ་ངྒཱ! ཨེ་ཀ་མེ་ཀེ་ན་པི ཁོ, བྷ་ནྟེ, བོ་ཛ྄ཛྷ་ངྒེ་ན ས་མ་ནྣཱ་ག་ཏོ ཡ་ཐཱ་བྷཱུ་ཏཾ ཛཱ་ནེ་ཡྻ པ་སྶེ་ཡྻ, ཀོ པ་ན ཝཱ་དོ ས་ཏྟ་ཧི བོ་ཛ྄ཛྷ་ངྒེ་ཧི? ཡོ་པི མེ, བྷ་ནྟེ, གི་ཛ྄ཛྷ་ཀཱུ་ཊཾ པ་བྦ་ཏཾ ཨཱ་རོ་ཧ་ནྟ་སྶ ཀཱ་ཡ་ཀི་ལ་མ་ཐོ ཙི་ཏྟ་ཀི་ལ་མ་ཐོ, སོ་པི མེ པ་ཊི་པྤ་སྶ་དྡྷོ, དྷ་མྨོ ཙ མེ ཨ་བྷི་ས་མི་ཏོ’’ཏི. ཚ་ཊྛཾ.
སཱ་ཀ་ཙྪ་ཝ་གྒོ ཚ་ཊྛོ.
ཏ་སྶུ་དྡཱ་ནཾ –
ཨཱ་ཧཱ་རཱ པ་རི་ཡཱ་ཡ་མ་གྒི, མེ་ཏྟཾ ས་ངྒཱ་ར་ཝེ་ན ཙ;
ཨ་བྷ་ཡོ པུ་ཙྪི་ཏོ པ་ཉྷཾ, གི་ཛ྄ཛྷ་ཀཱུ་ཊ་མྷི པ་བྦ་ཏེ་ཏི.