༩. ཨེ་ཀ་དྷ་མྨ་སུ་ཏྟཾ

༢༡༠. ‘‘ནཱ་ཧཾ, བྷི་ཀྑ་ཝེ, ཨ་ཉྙཾ ཨེ་ཀ་དྷ་མྨ་མྤི ས་མ་ནུ་པ་སྶཱ་མི, ཡོ ཨེ་ཝཾ བྷཱ་ཝི་ཏོ བ་ཧུ་ལཱི་ཀ་ཏོ སཾ་ཡོ་ཛ་ནཱི་ཡཱ་ནཾ དྷ་མྨཱ་ནཾ པ་ཧཱ་ནཱ་ཡ སཾ་ཝ་ཏྟ་ཏི, ཡ་ཐ་ཡི་དཾ, བྷི་ཀྑ་ཝེ, ས་ཏྟ བོ་ཛ྄ཛྷ་ངྒཱ. ཀ་ཏ་མེ ས་ཏྟ? ས་ཏི་ས་མྦོ་ཛ྄ཛྷ་ངྒོ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒོ. ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ས་ཏྟ བོ་ཛ྄ཛྷ་ངྒཱ ཀ་ཐཾ བ་ཧུ་ལཱི་ཀ་ཏཱ སཾ་ཡོ་ཛ་ནཱི་ཡཱ་ནཾ དྷ་མྨཱ་ནཾ པ་ཧཱ་ནཱ་ཡ སཾ་ཝ་ཏྟ་ནྟི?

‘‘ཨི་དྷ, བྷི་ཀྑ་ཝེ, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. ཨེ་ཝཾ བྷཱ་ཝི་ཏཱ ཁོ, བྷི་ཀྑ་ཝེ, ས་ཏྟ བོ་ཛ྄ཛྷ་ངྒཱ ཨེ་ཝཾ བ་ཧུ་ལཱི་ཀ་ཏཱ སཾ་ཡོ་ཛ་ནཱི་ཡཱ་ནཾ དྷ་མྨཱ་ནཾ པ་ཧཱ་ནཱ་ཡ སཾ་ཝ་ཏྟ་ནྟི.

‘‘ཀ་ཏ་མེ ཙ, བྷི་ཀྑ་ཝེ, སཾ་ཡོ་ཛ་ནཱི་ཡཱ དྷ་མྨཱ? ཙ་ཀྑུ, བྷི་ཀྑ་ཝེ, སཾ་ཡོ་ཛ་ནཱི་ཡོ དྷ་མྨོ. ཨེ་ཏྠེ་ཏེ ཨུ་པྤ་ཛྫ་ནྟི སཾ་ཡོ་ཛ་ན་ཝི་ནི་བ་ནྡྷཱ ཨ་ཛ྄ཛྷོ་སཱ་ནཱ…པེ… ཛི་ཝ྄ཧཱ སཾ་ཡོ་ཛ་ནཱི་ཡཱ དྷ་མྨཱ. ཨེ་ཏྠེ་ཏེ ཨུ་པྤ་ཛྫ་ནྟི སཾ་ཡོ་ཛ་ན་ཝི་ནི་བ་ནྡྷཱ ཨ་ཛ྄ཛྷོ་སཱ་ནཱ…པེ… མ་ནོ སཾ་ཡོ་ཛ་ནཱི་ཡོ དྷ་མྨོ. ཨེ་ཏྠེ་ཏེ ཨུ་པྤ་ཛྫ་ནྟི སཾ་ཡོ་ཛ་ན་ཝི་ནི་བ་ནྡྷཱ ཨ་ཛ྄ཛྷོ་སཱ་ནཱ. ཨི་མེ ཝུ་ཙྩ་ནྟི, བྷི་ཀྑ་ཝེ, སཾ་ཡོ་ཛ་ནཱི་ཡཱ དྷ་མྨཱ’’ཏི. ན་ཝ་མཾ.