༦. ཏ་ཏི་ཡ་གི་ལཱ་ན་སུ་ཏྟཾ

༡༩༧. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷ་ག་ཝཱ ཨཱ་བཱ་དྷི་ཀོ ཧོ་ཏི དུ་ཀྑི་ཏོ བཱ་ལ༹ྷ་གི་ལཱ་ནོ. ཨ་ཐ ཁོ ཨཱ་ཡ་སྨཱ མ་ཧཱ་ཙུ་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ མ་ཧཱ་ཙུ་ནྡཾ བྷ་ག་ཝཱ ཨེ་ཏ་ད་ཝོ་ཙ – ‘‘པ་ཊི་བྷ་ནྟུ ཏཾ, ཙུ་ནྡ, བོ་ཛ྄ཛྷ་ངྒཱ’’ཏི.

‘‘ས་ཏྟི་མེ, བྷ་ནྟེ, བོ་ཛ྄ཛྷ་ངྒཱ བྷ་ག་ཝ་ཏཱ ས་མྨ་ད་ཀྑཱ་ཏཱ བྷཱ་ཝི་ཏཱ བ་ཧུ་ལཱི་ཀ་ཏཱ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ས་ཏི་ས་མྦོ་ཛ྄ཛྷ་ངྒོ ཁོ, བྷ་ནྟེ, བྷ་ག་ཝ་ཏཱ ས་མྨ་ད་ཀྑཱ་ཏོ བྷཱ་ཝི་ཏོ བ་ཧུ་ལཱི་ཀ་ཏོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒོ ཁོ, བྷ་ནྟེ, བྷ་ག་ཝ་ཏཱ ས་མྨ་ད་ཀྑཱ་ཏོ བྷཱ་ཝི་ཏོ བ་ཧུ་ལཱི་ཀ་ཏོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཨི་མེ ཁོ, བྷ་ནྟེ, ས་ཏྟ བོ་ཛ྄ཛྷ་ངྒཱ བྷ་ག་ཝ་ཏཱ ས་མྨ་ད་ཀྑཱ་ཏཱ བྷཱ་ཝི་ཏཱ བ་ཧུ་ལཱི་ཀ་ཏཱ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ནྟཱི’’ཏི. ‘‘ཏ་གྒྷ, ཙུ་ནྡ, བོ་ཛ྄ཛྷ་ངྒཱ; ཏ་གྒྷ, ཙུ་ནྡ, བོ་ཛ྄ཛྷ་ངྒཱ’’ཏི.

ཨི་ད་མ་ཝོ་ཙཱ་ཡ་སྨཱ ཙུ་ནྡོ. ས་མ་ནུ་ཉྙོ ས་ཏྠཱ ཨ་ཧོ་སི. ཝུ་ཊྛ་ཧི ཙ བྷ་ག་ཝཱ ཏ་མྷཱ ཨཱ་བཱ་དྷཱ. ཏ་ཐཱ་པ་ཧཱི་ནོ ཙ བྷ་ག་ཝ་ཏོ སོ ཨཱ་བཱ་དྷོ ཨ་ཧོ་སཱི་ཏི. ཚ་ཊྛཾ.