༧. པ་ཋ་མ་ཚི་གྒ་ལ༹་ཡུ་ག་སུ་ཏྟཾ

༡༡༡༧. ‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ མ་ཧཱ་ས་མུ་དྡེ ཨེ་ཀ་ཙྪི་གྒ་ལ༹ཾ ཡུ་གཾ པ་ཀྑི་པེ་ཡྻ. ཏ་ཏྲཱ་པི་སྶ ཀཱ་ཎོ ཀ་ཙྪ་པོ. སོ ཝ་སྶ་ས་ཏ་སྶ ཝ་སྶ་ས་ཏ་སྶ ཨ་ཙྩ་ཡེ་ན ས་ཀིཾ ས་ཀིཾ ཨུ་མྨུ་ཛྫེ་ཡྻ. ཏཾ ཀིཾ མ་ཉྙ་ཐ, བྷི་ཀྑ་ཝེ, ཨ་པི ནུ ཁོ ཀཱ་ཎོ ཀ་ཙྪ་པོ ཝ་སྶ་ས་ཏ་སྶ ཝ་སྶ་ས་ཏ་སྶ ཨ་ཙྩ་ཡེ་ན ས་ཀིཾ ས་ཀིཾ ཨུ་མྨུ་ཛྫ་ནྟོ ཨ་མུ་སྨིཾ ཨེ་ཀ་ཙྪི་གྒ་ལེ༹ ཡུ་གེ གཱི་ཝཾ པ་ཝེ་སེ་ཡྻཱ’’ཏི? ‘‘ཡ་དི ནཱུ་ན, བྷ་ནྟེ, ཀ་དཱ་ཙི ཀ་ར་ཧ་ཙི དཱི་གྷ་སྶ ཨ་དྡྷུ་ནོ ཨ་ཙྩ་ཡེ་ནཱ’’ཏི.

‘‘ཁི་པྤ་ཏ་རཾ ཁོ སོ, བྷི་ཀྑ་ཝེ, ཀཱ་ཎོ ཀ་ཙྪ་པོ ཝ་སྶ་ས་ཏ་སྶ ཝ་སྶ་ས་ཏ་སྶ ཨ་ཙྩ་ཡེ་ན ས་ཀིཾ ས་ཀིཾ ཨུ་མྨུ་ཛྫ་ནྟོ ཨ་མུ་སྨིཾ ཨེ་ཀ་ཙྪི་གྒ་ལེ༹ ཡུ་གེ གཱི་ཝཾ པ་ཝེ་སེ་ཡྻ, ན ཏྭེ་ཝཱ་ཧཾ, བྷི་ཀྑ་ཝེ, ས་ཀིཾ ཝི་ནི་པཱ་ཏ་ག་ཏེ་ན བཱ་ལེ་ན [ཝི་ནཱི་ཏ་ག་ཏེ་ན བ་ཧུ་ལེ་ན (ཀ.)] མ་ནུ་སྶ་ཏྟཾ ཝ་དཱ་མི’’.

ཏཾ ཀི་སྶ ཧེ་ཏུ? ན ཧེ་ཏྠ, བྷི་ཀྑ་ཝེ, ཨ་ཏྠི དྷ་མྨ་ཙ་རི་ཡཱ, ས་མ་ཙ་རི་ཡཱ, ཀུ་ས་ལ་ཀི་རི་ཡཱ, པུ་ཉྙ་ཀི་རི་ཡཱ. ཨ་ཉྙ་མ་ཉྙ་ཁཱ་དི་ཀཱ ཨེ་ཏྠ, བྷི་ཀྑ་ཝེ, ཝ་ཏྟ་ཏི དུ་བྦ་ལ་ཁཱ་དི་ཀཱ. ཏཾ ཀི་སྶ ཧེ་ཏུ? ཨ་དི་ཊྛ་ཏྟཱ, བྷི་ཀྑ་ཝེ, ཙ་ཏུ་ནྣཾ ཨ་རི་ཡ་ས་ཙྩཱ་ནཾ. ཀ་ཏ་མེ་སཾ ཙ་ཏུ་ནྣཾ? དུ་ཀྑ་སྶ ཨ་རི་ཡ་ས་ཙྩ་སྶ…པེ… དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཨ་རི་ཡ་ས་ཙྩ་སྶ.

‘‘ཏ་སྨཱ་ཏི་ཧ, བྷི་ཀྑ་ཝེ, ‘ཨི་དཾ དུ་ཀྑ’ནྟི ཡོ་གོ ཀ་ར་ཎཱི་ཡོ…པེ… ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡོ་གོ ཀ་ར་ཎཱི་ཡོ’’ཏི. ས་ཏྟ་མཾ.