༦. པཱ་ཎ་སུ་ཏྟཾ

༡༡༠༦. ‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ ཡཾ ཨི་མ་སྨིཾ ཛ་མྦུ་དཱི་པེ ཏི་ཎ་ཀ་ཊྛ་སཱ་ཁཱ་པ་ལཱ་སཾ ཏ་ཙྪེ་ཏྭཱ ཨེ་ཀ་ཛ྄ཛྷཾ སཾ་ཧ་རེ་ཡྻ; ཨེ་ཀ་ཛ྄ཛྷཾ སཾ་ཧ་རི་ཏྭཱ སཱུ་ལཾ ཀ་རེ་ཡྻ. སཱུ་ལཾ ཀ་རི་ཏྭཱ ཡེ མ་ཧཱ་ས་མུ་དྡེ མ་ཧ་ནྟ་ཀཱ པཱ་ཎཱ ཏེ མ་ཧ་ནྟ་ཀེ་སུ སཱུ་ལེ་སུ ཨཱ་ཝུ་ནེ་ཡྻ, ཡེ མ་ཧཱ་ས་མུ་དྡེ མ་ཛ྄ཛྷི་མ་ཀཱ པཱ་ཎཱ ཏེ མ་ཛ྄ཛྷི་མ་ཀེ་སུ སཱུ་ལེ་སུ ཨཱ་ཝུ་ནེ་ཡྻ, ཡེ མ་ཧཱ་ས་མུ་དྡེ སུ་ཁུ་མ་ཀཱ པཱ་ཎཱ ཏེ སུ་ཁུ་མ་ཀེ་སུ སཱུ་ལེ་སུ ཨཱ་ཝུ་ནེ་ཡྻ. ཨ་པ་རི་ཡཱ་དི་ནྣཱ ཙ, བྷི་ཀྑ་ཝེ, མ་ཧཱ་ས་མུ་དྡེ ཨོ་ལཱ༹་རི་ཀཱ པཱ་ཎཱ ཨ་སྶུ.

‘‘ཨ་ཐ ཨི་མ་སྨིཾ ཛ་མྦུ་དཱི་པེ ཏི་ཎ་ཀ་ཊྛ་སཱ་ཁཱ་པ་ལཱ་སཾ པ་རི་ཀྑ་ཡཾ པ་རི་ཡཱ་དཱ་ནཾ ག་ཙྪེ་ཡྻ. ཨི་ཏོ བ་ཧུ་ཏ་རཱ ཁོ, བྷི་ཀྑ་ཝེ, མ་ཧཱ་ས་མུ་དྡེ སུ་ཁུ་མ་ཀཱ པཱ་ཎཱ, ཡེ ན སུ་ཀ་རཱ སཱུ་ལེ་སུ ཨཱ་ཝུ་ནི་ཏུཾ. ཏཾ ཀི་སྶ ཧེ་ཏུ? སུ་ཁུ་མ་ཏྟཱ, བྷི་ཀྑ་ཝེ, ཨ་ཏྟ་བྷཱ་ཝ་སྶ. ཨེ་ཝཾ མ་ཧཱ ཁོ, བྷི་ཀྑ་ཝེ, ཨ་པཱ་ཡོ. ཨེ་ཝཾ མ་ཧ་ནྟ་སྨཱ ཁོ, བྷི་ཀྑ་ཝེ, ཨ་པཱ་ཡ་སྨཱ པ་རི་མུ་ཏྟོ དི་ཊྛི་ས་མྤ་ནྣོ པུ་གྒ་ལོ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ པ་ཛཱ་ནཱ་ཏི…པེ… ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི.

‘‘ཏ་སྨཱ་ཏི་ཧ, བྷི་ཀྑ་ཝེ, ‘ཨི་དཾ དུ་ཀྑ’ནྟི ཡོ་གོ ཀ་ར་ཎཱི་ཡོ…པེ… ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡོ་གོ ཀ་ར་ཎཱི་ཡོ’’ཏི. ཚ་ཊྛཾ.