༡. སཱི་ས་པཱ་ཝ་ན་སུ་ཏྟཾ

༡༡༠༡. ཨེ་ཀཾ ས་མ་ཡཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི སཱི་ས་པཱ་ཝ་ནེ [སིཾ་ས་པཱ་ཝ་ནེ (སཱི. པཱི.)]. ཨ་ཐ ཁོ བྷ་ག་ཝཱ པ་རི་ཏྟཱ་ནི སཱི་ས་པཱ་པ་ཎྞཱ་ནི པཱ་ཎི་ནཱ ག་ཧེ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏཾ ཀིཾ མ་ཉྙ་ཐ, བྷི་ཀྑ་ཝེ, ཀ་ཏ་མཾ ནུ ཁོ བ་ཧུ་ཏ་རཾ – ཡཱ་ནི ཝཱ མ་ཡཱ པ་རི་ཏྟཱ་ནི སཱི་ས་པཱ་པ་ཎྞཱ་ནི པཱ་ཎི་ནཱ ག་ཧི་ཏཱ་ནི ཡ་དི་དཾ ཨུ་པ་རི སཱི་ས་པཱ་ཝ་ནེ’’ཏི? ‘‘ཨ་པྤ་མ་ཏྟ་ཀཱ་ནི, བྷ་ནྟེ, བྷ་ག་ཝ་ཏཱ པ་རི་ཏྟཱ་ནི སཱི་ས་པཱ་པ་ཎྞཱ་ནི པཱ་ཎི་ནཱ ག་ཧི་ཏཱ་ནི; ཨ་ཐ ཁོ ཨེ་ཏཱ་ནེ་ཝ བ་ཧུ་ཏ་རཱ་ནི ཡ་དི་དཾ ཨུ་པ་རི སཱི་ས་པཱ་ཝ་ནེ’’ཏི. ‘‘ཨེ་ཝ་མེ་ཝ ཁོ, བྷི་ཀྑ་ཝེ, ཨེ་ཏ་དེ་ཝ བ་ཧུ་ཏ་རཾ ཡཾ ཝོ མ་ཡཱ ཨ་བྷི་ཉྙཱ་ཡ ཨ་ན་ཀྑཱ་ཏཾ. ཀ་སྨཱ ཙེ་ཏཾ, བྷི་ཀྑ་ཝེ, མ་ཡཱ ཨ་ན་ཀྑཱ་ཏཾ? ན ཧེ་ཏཾ, བྷི་ཀྑ་ཝེ, ཨ་ཏྠ་སཾ་ཧི་ཏཾ ནཱ་དི་བྲ་ཧྨ་ཙ་རི་ཡ་ཀཾ ན ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི; ཏ་སྨཱ ཏཾ མ་ཡཱ ཨ་ན་ཀྑཱ་ཏཾ’’.

‘‘ཀི་ཉྩ, བྷི་ཀྑ་ཝེ, མ་ཡཱ ཨ་ཀྑཱ་ཏཾ? ‘ཨི་དཾ དུ་ཀྑ’ནྟི, བྷི་ཀྑ་ཝེ, མ་ཡཱ ཨ་ཀྑཱ་ཏཾ, ‘ཨ་ཡཾ དུ་ཀྑ་ས་མུ་ད་ཡོ’ཏི མ་ཡཱ ཨ་ཀྑཱ་ཏཾ, ‘ཨ་ཡཾ དུ་ཀྑ་ནི་རོ་དྷོ’ཏི མ་ཡཱ ཨ་ཀྑཱ་ཏཾ, ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི མ་ཡཱ ཨ་ཀྑཱ་ཏཾ’’.

‘‘ཀ་སྨཱ ཙེ་ཏཾ, བྷི་ཀྑ་ཝེ, མ་ཡཱ ཨ་ཀྑཱ་ཏཾ? ཨེ་ཏ་ཉྷི, བྷི་ཀྑ་ཝེ, ཨ་ཏྠ་སཾ་ཧི་ཏཾ ཨེ་ཏཾ ཨཱ་དི་བྲ་ཧྨ་ཙ་རི་ཡ་ཀཾ ཨེ་ཏཾ ནི་བྦི་དཱ་ཡ ཝི་རཱ་གཱ་ཡ ནི་རོ་དྷཱ་ཡ ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི; ཏ་སྨཱ ཏཾ མ་ཡཱ ཨ་ཀྑཱ་ཏཾ.

‘‘ཏ་སྨཱ་ཏི་ཧ, བྷི་ཀྑ་ཝེ, ‘ཨི་དཾ དུ་ཀྑ’ནྟི ཡོ་གོ ཀ་ར་ཎཱི་ཡོ…པེ… ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡོ་གོ ཀ་ར་ཎཱི་ཡོ’’ཏི. པ་ཋ་མཾ.