༣. གོ་དྷ་ས་ཀྐ་སུ་ཏྟཾ

༡༠༡༩. ཀ་པི་ལ་ཝ་ཏྠུ་ནི་དཱ་ནཾ. ཨ་ཐ ཁོ མ་ཧཱ་ནཱ་མོ ས་ཀྐོ ཡེ་ན གོ་དྷཱ ས་ཀྐོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ གོ་དྷཾ ས་ཀྐཾ ཨེ་ཏ་ད་ཝོ་ཙ – ‘‘ཀ་ཏི་ཧི [ཀ་ཏཱི་ཧི (པཱི. ཀ.) རཱུ་པ་སི་དྡྷི ཨོ་ལོ་ཀེ་ཏ་བྦཱ] ཏྭཾ, གོ་དྷེ, དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་སི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎ’’ནྟི?

‘‘ཏཱི་ཧི ཁྭཱ་ཧཾ, མ་ཧཱ་ནཱ་མ, དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎཾ. ཀ་ཏ་མེ་ཧི ཏཱི་ཧི? ཨི་དྷ, མ་ཧཱ་ནཱ་མ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི. ཨི་མེ་ཧི ཁྭཱ་ཧཾ, མ་ཧཱ་ནཱ་མ, ཏཱི་ཧི དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎཾ.

‘‘ཏྭཾ པ་ན, མ་ཧཱ་ནཱ་མ, ཀ་ཏི་ཧི དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་སི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎ’’ནྟི? ‘‘ཙ་ཏཱུ་ཧི ཁྭཱ་ཧཾ, གོ་དྷེ, དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎཾ. ཀ་ཏ་མེ་ཧི ཙ་ཏཱུ་ཧི? ཨི་དྷ, གོ་དྷེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་མེ་ཧི ཁྭཱ་ཧཾ, གོ་དྷེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎ’’ནྟི.

‘‘ཨཱ་ག་མེ་ཧི ཏྭཾ, མ་ཧཱ་ནཱ་མ, ཨཱ་ག་མེ་ཧི ཏྭཾ, མ་ཧཱ་ནཱ་མ! བྷ་ག་ཝཱ་ཝ ཨེ་ཏཾ ཛཱ་ནེ་ཡྻ ཨེ་ཏེ་ཧི དྷ་མྨེ་ཧི ས་མ་ནྣཱ་ག་ཏཾ ཝཱ ཨ་ས་མ་ནྣཱ་ག་ཏཾ ཝཱ’’ཏི. ‘‘ཨཱ་ཡཱ་མ, གོ་དྷེ, ཡེ་ན བྷ་ག་ཝཱ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སྶཱ་མཱ’’ཏི. ཨ་ཐ ཁོ མ་ཧཱ་ནཱ་མོ ས་ཀྐོ གོ་དྷཱ ཙ ས་ཀྐོ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣོ ཁོ མ་ཧཱ་ནཱ་མོ ས་ཀྐོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཨི་དྷཱ་ཧཾ, བྷ་ནྟེ, ཡེ་ན གོ་དྷཱ ས་ཀྐོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ གོ་དྷཾ ས་ཀྐཾ ཨེ་ཏ་ད་ཝོ་ཙཾ – ‘ཀ་ཏི་ཧི ཏྭཾ, གོ་དྷེ, དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་སི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎཾ’? ཨེ་ཝཾ ཝུ་ཏྟེ, བྷ་ནྟེ, གོ་དྷཱ ས་ཀྐོ མཾ ཨེ་ཏ་ད་ཝོ་ཙ –

‘‘ཨེ་ཝཾ ཝུ་ཏྟཱ་ཧཾ, བྷ་ནྟེ, གོ་དྷཾ ས་ཀྐཾ ཨེ་ཏ་ད་ཝོ་ཙཾ – ‘ཙ་ཏཱུ་ཧི ཁྭཱ་ཧཾ, གོ་དྷེ, དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎཾ. ཀ་ཏ་མེ་ཧི ཙ་ཏཱུ་ཧི? ཨི་དྷ, གོ་དྷེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་མེ་ཧི ཁྭཱ་ཧཾ, གོ་དྷེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏཾ སོ་ཏཱ་པ་ནྣ་པུ་གྒ་ལཾ ཨཱ་ཛཱ་ནཱ་མི ཨ་ཝི་ནི་པཱ་ཏ་དྷ་མྨཾ ནི་ཡ་ཏཾ ས་མྦོ་དྷི་པ་རཱ་ཡ་ཎ’’’ནྟི.

‘‘ཨེ་ཝཾ ཝུ་ཏྟེ, བྷ་ནྟེ, གོ་དྷཱ ས་ཀྐོ མཾ ཨེ་ཏ་ད་ཝོ་ཙ – ‘ཨཱ་ག་མེ་ཧི ཏྭཾ, མ་ཧཱ་ནཱ་མ, ཨཱ་ག་མེ་ཧི ཏྭཾ, མ་ཧཱ་ནཱ་མ! བྷ་ག་ཝཱ་ཝ ཨེ་ཏཾ ཛཱ་ནེ་ཡྻ ཨེ་ཏེ་ཧི དྷ་མྨེ་ཧི ས་མ་ནྣཱ་ག་ཏཾ ཝཱ ཨ་ས་མ་ནྣཱ་ག་ཏཾ ཝཱ’’’ཏི. ‘‘ཨི་དྷ, བྷ་ནྟེ, ཀོ་ཙི་དེ་ཝ དྷ་མྨོ ས་མུ་པྤཱ་དོ ཨུ་པྤ་ཛྫེ་ཡྻ, ཨེ་ཀ་ཏོ ཨ་སྶ བྷ་ག་ཝཱ ཨེ་ཀ་ཏོ བྷི་ཀྑུ་ས་ངྒྷོ ཙ. ཡེ་ནེ་ཝ བྷ་ག་ཝཱ ཏེ་ནེ་ཝཱ་ཧཾ ཨ་སྶཾ. ཨེ་ཝཾ པ་ས་ནྣཾ མཾ, བྷ་ནྟེ, བྷ་ག་ཝཱ དྷཱ་རེ་ཏུ. ཨི་དྷ, བྷ་ནྟེ, ཀོ་ཙི་དེ་ཝ དྷ་མྨོ ས་མུ་པྤཱ་དོ ཨུ་པྤ་ཛྫེ་ཡྻ, ཨེ་ཀ་ཏོ ཨ་སྶ བྷ་ག་ཝཱ ཨེ་ཀ་ཏོ བྷི་ཀྑུ་ས་ངྒྷོ བྷི་ཀྑུ་ནི་ས་ངྒྷོ ཙ. ཡེ་ནེ་ཝ བྷ་ག་ཝཱ ཏེ་ནེ་ཝཱ་ཧཾ ཨ་སྶཾ. ཨེ་ཝཾ པ་ས་ནྣཾ མཾ, བྷ་ནྟེ, བྷ་ག་ཝཱ དྷཱ་རེ་ཏུ. ཨི་དྷ, བྷ་ནྟེ, ཀོ་ཙི་དེ་ཝ དྷ་མྨོ ས་མུ་པྤཱ་དོ ཨུ་པྤ་ཛྫེ་ཡྻ, ཨེ་ཀ་ཏོ ཨ་སྶ བྷ་ག་ཝཱ ཨེ་ཀ་ཏོ བྷི་ཀྑུ་ས་ངྒྷོ བྷི་ཀྑུ་ནི་ས་ངྒྷོ ཙ ཨུ་པཱ་ས་ཀཱ ཙ. ཡེ་ནེ་ཝ བྷ་ག་ཝཱ ཏེ་ནེ་ཝཱ་ཧཾ ཨ་སྶཾ. ཨེ་ཝཾ པ་ས་ནྣཾ མཾ, བྷ་ནྟེ, བྷ་ག་ཝཱ དྷཱ་རེ་ཏུ. ཨི་དྷ, བྷ་ནྟེ, ཀོ་ཙི་དེ་ཝ དྷ་མྨོ ས་མུ་པྤཱ་དོ ཨུ་པྤ་ཛྫེ་ཡྻ, ཨེ་ཀ་ཏོ ཨ་སྶ བྷ་ག་ཝཱ ཨེ་ཀ་ཏོ བྷི་ཀྑུ་ས་ངྒྷོ བྷི་ཀྑུ་ནི་ས་ངྒྷོ ཨུ་པཱ་ས་ཀཱ ཨུ་པཱ་སི་ཀཱ་ཡོ ཙ. ཡེ་ནེ་ཝ བྷ་ག་ཝཱ ཏེ་ནེ་ཝཱ་ཧཾ ཨ་སྶཾ. ཨེ་ཝཾ པ་ས་ནྣཾ མཾ, བྷ་ནྟེ, བྷ་ག་ཝཱ དྷཱ་རེ་ཏུ. ཨི་དྷ, བྷ་ནྟེ, ཀོ་ཙི་དེ་ཝ དྷ་མྨོ ས་མུ་པྤཱ་དོ ཨུ་པྤ་ཛྫེ་ཡྻ, ཨེ་ཀ་ཏོ ཨ་སྶ བྷ་ག་ཝཱ ཨེ་ཀ་ཏོ བྷི་ཀྑུ་ས་ངྒྷོ བྷི་ཀྑུ་ནི་ས་ངྒྷོ ཨུ་པཱ་ས་ཀཱ ཨུ་པཱ་སི་ཀཱ་ཡོ ས་དེ་ཝ་ཀོ ཙ ལོ་ཀོ ས་མཱ་ར་ཀོ ས་བྲ་ཧྨ་ཀོ ས་སྶ་མ་ཎ་བྲཱ་ཧྨ་ཎཱི པ་ཛཱ ས་དེ་ཝ་མ་ནུ་སྶཱ. ཡེ་ནེ་ཝ བྷ་ག་ཝཱ ཏེ་ནེ་ཝཱ་ཧཾ ཨ་སྶཾ. ཨེ་ཝཾ པ་ས་ནྣཾ མཾ, བྷ་ནྟེ, བྷ་ག་ཝཱ དྷཱ་རེ་ཏཱུ’’ཏི. ‘‘ཨེ་ཝཾ་ཝཱ་དཱི ཏྭཾ, གོ་དྷེ, མ་ཧཱ་ནཱ་མཾ ས་ཀྐཾ ཀིཾ ཝ་དེ་སཱི’’ཏི? ‘‘ཨེ་ཝཾ་ཝཱ་དཱ་ཧཾ, བྷ་ནྟེ, མ་ཧཱ་ནཱ་མཾ ས་ཀྐཾ ན ཀི་ཉྩི ཝ་དཱ་མི, ཨ་ཉྙ་ཏྲ ཀ་ལྱཱ་ཎཱ ཨ་ཉྙ་ཏྲ ཀུ་ས་ལཱ’’ཏི. ཏ་ཏི་ཡཾ.