༢. རཱ་ཛ་ཀཱ་རཱ་མ་ཝ་གྒོ
༡. ས་ཧ་སྶ་བྷི་ཀྑུ་ནི་ས་ངྒྷ་སུ་ཏྟཾ
༡༠༠༧. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི རཱ་ཛ་ཀཱ་རཱ་མེ. ཨ་ཐ ཁོ ས་ཧ་སྶ་བྷི་ཀྑུ་ནི་ས་ངྒྷོ [ས་ཧ་སྶོ བྷི་ཀྑུ་ནི་སཾ་གྷོ (སཱི.)] ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏཱ ཁོ ཏཱ བྷི་ཀྑུ་ནི་ཡོ བྷ་ག་ཝཱ ཨེ་ཏ་ད་ཝོ་ཙ –
‘‘ཙ་ཏཱུ་ཧི ཁོ, བྷི་ཀྑུ་ནི་ཡོ, དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ སོ་ཏཱ་པ་ནྣོ ཧོ་ཏི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ཎོ. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑུ་ནི་ཡོ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ …པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི, ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་མེ་ཧི ཁོ, བྷི་ཀྑུ་ནི་ཡོ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ སོ་ཏཱ་པ་ནྣོ ཧོ་ཏི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ཎོ’’ཏི. པ་ཋ་མཾ.
༢. བྲཱ་ཧྨ་ཎ་སུ་ཏྟཾ
༡༠༠༨. སཱ་ཝ་ཏྠི་ནི་དཱ་ནཾ. ‘‘བྲཱ་ཧྨ་ཎཱ, བྷི་ཀྑ་ཝེ, ཨུ་ད་ཡ་གཱ་མི་ནིཾ ནཱ་མ པ་ཊི་པ་དཾ པ་ཉྙ་པེ་ནྟི. ཏེ སཱ་ཝ་ཀཾ ཨེ་ཝཾ ས་མཱ་ད་པེ་ནྟི – ‘ཨེ་ཧི ཏྭཾ, ཨ་མྦྷོ པུ་རི་ས, ཀཱ་ལ་སྶེ་ཝ ཨུ་ཊྛཱ་ཡ པཱ་ཙཱི་ན་མུ་ཁོ ཡཱ་ཧི. སོ ཏྭཾ མཱ སོ་བྦྷཾ པ་རི་ཝ་ཛྫེ་ཧི, མཱ པ་པཱ་ཏཾ, མཱ ཁཱ་ཎུཾ, མཱ ཀ་ཎྜ་ཀ་ཋཱ་ནཾ [ཀ་ཎྜ་ཀཾ ཋཱ་ནཾ (པཱི. ཀ.)], མཱ ཙ་ནྡ་ནི་ཡཾ, མཱ ཨོ་ལི༹་ག་ལླཾ. ཡ་ཏྠ [ཡ་ཏྠེ་ཝ (སྱཱ. ཀཾ.), ཡཱ་ནི ཝཱ (སཱི.)] པ་པ་ཏེ་ཡྻཱ་སི ཏ་ཏྠེ་ཝ མ་ར་ཎཾ ཨཱ་ག་མེ་ཡྻཱ་སི. ཨེ་ཝཾ ཏྭཾ, ཨ་མྦྷོ པུ་རི་ས, ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫི་སྶ་སཱི’’’ཏི.
‘‘ཏཾ ཁོ པ་ནེ་ཏཾ, བྷི་ཀྑ་ཝེ, བྲཱ་ཧྨ་ཎཱ་ནཾ བཱ་ལ་ག་མ་ན་མེ་ཏཾ [བཱ་ལཱ་ནཾ ག་མ་ན་མེ་ཏཾ (སཱི.)] མཱུ་ལ༹ྷ་ག་མ་ན་མེ་ཏཾ ན ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི. ཨ་ཧ་ཉྩ ཁོ, བྷི་ཀྑ་ཝེ, ཨ་རི་ཡ་སྶ ཝི་ན་ཡེ ཨུ་ད་ཡ་གཱ་མི་ནིཾ པ་ཊི་པ་དཾ པ་ཉྙ་པེ་མི; ཡཱ ཨེ་ཀ་ནྟ་ནི་བྦི་དཱ་ཡ ཝི་རཱ་གཱ་ཡ ནི་རོ་དྷཱ་ཡ ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
‘‘ཀ་ཏ་མཱ ཙ སཱ, བྷི་ཀྑ་ཝེ, ཨུ་ད་ཡ་གཱ་མི་ནཱི པ་ཊི་པ་དཱ; ཡཱ ཨེ་ཀ་ནྟ་ནི་བྦི་དཱ་ཡ…པེ… ནི་བྦཱ་ནཱ་ཡ སཾ་ཝ་ཏྟ་ཏི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི; དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་ཡཾ ཁོ སཱ, བྷི་ཀྑ་ཝེ, ཨུ་ད་ཡ་གཱ་མི་ནཱི པ་ཊི་པ་དཱ ཨེ་ཀ་ནྟ་ནི་བྦི་དཱ་ཡ…པེ… ནི་བྦཱ་ནཱ་ཡ སཾ་ཝ་ཏྟ་ཏཱི’’ཏི. དུ་ཏི་ཡཾ.
༣. ཨཱ་ན་ནྡ་ཏྠེ་ར་སུ་ཏྟཾ
༡༠༠༩. ཨེ་ཀཾ ས་མ་ཡཾ ཨཱ་ཡ་སྨཱ ཙ ཨཱ་ན་ནྡོ ཨཱ་ཡ་སྨཱ ཙ སཱ་རི་པུ་ཏྟོ སཱ་ཝ་ཏྠི་ཡཾ ཝི་ཧ་ར་ནྟི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཀ་ཏི་ནཾ ཁོ, ཨཱ་ཝུ་སོ ཨཱ་ན་ནྡ, དྷ་མྨཱ་ནཾ པ་ཧཱ་ནཱ, ཀ་ཏི་ནཾ དྷ་མྨཱ་ནཾ ས་མ་ནྣཱ་ག་མ་ན་ཧེ་ཏུ, ཨེ་ཝ་མ་ཡཾ པ་ཛཱ བྷ་ག་ཝ་ཏཱ བྱཱ་ཀ་ཏཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི? ‘‘ཙ་ཏུ་ནྣཾ ཁོ, ཨཱ་ཝུ་སོ, དྷ་མྨཱ་ནཾ པ་ཧཱ་ནཱ, ཙ་ཏུ་ནྣཾ དྷ་མྨཱ་ནཾ ས་མ་ནྣཱ་ག་མ་ན་ཧེ་ཏུ, ཨེ་ཝ་མ་ཡཾ པ་ཛཱ བྷ་ག་ཝ་ཏཱ བྱཱ་ཀ་ཏཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི.
‘‘ཀ་ཏ་མེ་སཾ ཙ་ཏུ་ནྣཾ? ཡ་ཐཱ་རཱུ་པེ་ན ཁོ, ཨཱ་ཝུ་སོ, བུ་དྡྷེ ཨ་པྤ་སཱ་དེ་ན ས་མ་ནྣཱ་ག་ཏོ ཨ་སྶུ་ཏ་ཝཱ པུ་ཐུ་ཛྫ་ནོ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ བུ་དྡྷེ ཨ་པྤ་སཱ་དོ ན ཧོ་ཏི. ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ སུ་ཏ་ཝཱ ཨ་རི་ཡ་སཱ་ཝ་ཀོ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ བུ་དྡྷེ ཨ་ཝེ་ཙྩ་པྤ་སཱ་དོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’’ཏི.
‘‘ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, དྷ་མྨེ ཨ་པྤ་སཱ་དེ་ན ས་མ་ནྣཱ་ག་ཏོ ཨ་སྶུ་ཏ་ཝཱ པུ་ཐུ་ཛྫ་ནོ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ དྷ་མྨེ ཨ་པྤ་སཱ་དོ ན ཧོ་ཏི. ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, དྷ་མྨེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ སུ་ཏ་ཝཱ ཨ་རི་ཡ་སཱ་ཝ་ཀོ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ དྷ་མྨེ ཨ་ཝེ་ཙྩ་པྤ་སཱ་དོ ཧོ་ཏི – སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ…པེ… ཝི་ཉྙཱུ་ཧཱི་ཏི.
‘‘ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, ས་ངྒྷེ ཨ་པྤ་སཱ་དེ་ན ས་མ་ནྣཱ་ག་ཏོ ཨ་སྶུ་ཏ་ཝཱ པུ་ཐུ་ཛྫ་ནོ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ ས་ངྒྷེ ཨ་པྤ་སཱ་དོ ན ཧོ་ཏི. ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, ས་ངྒྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ སུ་ཏ་ཝཱ ཨ་རི་ཡ་སཱ་ཝ་ཀོ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ ས་ངྒྷེ ཨ་ཝེ་ཙྩ་པྤ་སཱ་དོ ཧོ་ཏི – སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི.
‘‘ཡ་ཐཱ་རཱུ་པེ་ན ཙ ཁོ, ཨཱ་ཝུ་སོ, དུ་སྶཱི་ལྱེ་ན ས་མ་ནྣཱ་ག་ཏོ ཨ་སྶུ་ཏ་ཝཱ པུ་ཐུ་ཛྫ་ནོ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི ཏ་ཐཱ་རཱུ་པ་སྶ དུ་སྶཱི་ལྱཾ ན ཧོ་ཏི. ཡ་ཐཱ་རཱུ་པེ་ཧི ཙ ཁོ, ཨཱ་ཝུ་སོ, ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ སུ་ཏ་ཝཱ ཨ་རི་ཡ་སཱ་ཝ་ཀོ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ཏི ཏ་ཐཱ་རཱུ་པཱ་ནི ཨ་རི་ཡ་ཀ་ནྟཱ་ནི སཱི་ལཱ་ནི ཧོ་ནྟི ཨ་ཁ་ཎྜཱ་ནི…པེ… ས་མཱ་དྷི་སཾ་ཝ་ཏྟ་ནི་ཀཱ་ནི. ཨི་མེ་སཾ ཁོ, ཨཱ་ཝུ་སོ, ཙ་ཏུ་ནྣཾ དྷ་མྨཱ་ནཾ པ་ཧཱ་ནཱ ཨི་མེ་སཾ ཙ་ཏུ་ནྣཾ དྷ་མྨཱ་ནཾ ས་མ་ནྣཱ་ག་མ་ན་ཧེ་ཏུ ཨེ་ཝ་མ་ཡཾ པ་ཛཱ བྷ་ག་ཝ་ཏཱ བྱཱ་ཀ་ཏཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི. ཏ་ཏི་ཡཾ.
༤. དུ་གྒ་ཏི་བྷ་ཡ་སུ་ཏྟཾ
༡༠༡༠. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ས་བྦ་དུ་གྒ་ཏི་བྷ་ཡཾ ས་མ་ཏི་ཀྐ་ནྟོ ཧོ་ཏི. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ས་བྦ་དུ་གྒ་ཏི་བྷ་ཡཾ ས་མ་ཏི་ཀྐ་ནྟོ ཧོ་ཏཱི’’ཏི. ཙ་ཏུ་ཏྠཾ.
༥. དུ་གྒ་ཏི་ཝི་ནི་པཱ་ཏ་བྷ་ཡ་སུ་ཏྟཾ
༡༠༡༡. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ས་བྦ་དུ་གྒ་ཏི་ཝི་ནི་པཱ་ཏ་བྷ་ཡཾ ས་མ་ཏི་ཀྐ་ནྟོ ཧོ་ཏི. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ས་བྦ་དུ་གྒ་ཏི་ཝི་ནི་པཱ་ཏ་བྷ་ཡཾ ས་མ་ཏི་ཀྐ་ནྟོ ཧོ་ཏཱི’’ཏི. པ་ཉྩ་མཾ.
༦. པ་ཋ་མ་མི་ཏྟཱ་མ་ཙྩ་སུ་ཏྟཾ
༡༠༡༢. ‘‘ཡེ ཏེ, བྷི་ཀྑ་ཝེ, ཨ་ནུ་ཀ་མྤེ་ཡྻཱ་ཐ, ཡེ ཙ སོ་ཏ་བྦཾ མ་ཉྙེ་ཡྻུཾ – མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ – ཏེ, བྷི་ཀྑ་ཝེ, ཙ་ཏཱུ་སུ སོ་ཏཱ་པ་ཏྟི་ཡ་ངྒེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ. ཀ་ཏ་མེ་སུ ཙ་ཏཱུ་སུ? བུ་དྡྷེ ཨ་ཝེ་ཙྩ་པྤ་སཱ་དེ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་སུ སཱི་ལེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ ཨ་ཁ་ཎྜེ་སུ…པེ… ས་མཱ་དྷི་སཾ་ཝ་ཏྟ་ནི་ཀེ་སུ. ཡེ ཏེ, བྷི་ཀྑ་ཝེ, ཨ་ནུ་ཀ་མྤེ་ཡྻཱ་ཐ, ཡེ ཙ སོ་ཏ་བྦཾ མ་ཉྙེ་ཡྻུཾ – མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ – ཏེ, བྷི་ཀྑ་ཝེ, ཨི་མེ་སུ ཙ་ཏཱུ་སུ སོ་ཏཱ་པ་ཏྟི་ཡ་ངྒེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ’’ཏི. ཚ་ཊྛཾ.
༧. དུ་ཏི་ཡ་མི་ཏྟཱ་མ་ཙྩ་སུ་ཏྟཾ
༡༠༡༣. ‘‘ཡེ ཏེ, བྷི་ཀྑ་ཝེ, ཨ་ནུ་ཀ་མྤེ་ཡྻཱ་ཐ, ཡེ ཙ སོ་ཏ་བྦཾ མ་ཉྙེ་ཡྻུཾ – མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ – ཏེ, བྷི་ཀྑ་ཝེ, ཙ་ཏཱུ་སུ སོ་ཏཱ་པ་ཏྟི་ཡ་ངྒེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ. ཀ་ཏ་མེ་སུ ཙ་ཏཱུ་སུ? བུ་དྡྷེ ཨ་ཝེ་ཙྩ་པྤ་སཱ་དེ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’’ཏི.
‘‘སི་ཡཱ, བྷི་ཀྑ་ཝེ, ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨ་ཉྙ་ཐ་ཏྟཾ – པ་ཐ་ཝཱི་དྷཱ་ཏུ་ཡཱ, ཨཱ་པོ་དྷཱ་ཏུ་ཡཱ, ཏེ་ཛོ་དྷཱ་ཏུ་ཡཱ, ཝཱ་ཡོ་དྷཱ་ཏུ་ཡཱ – ན ཏྭེ་ཝ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏ་སྶ ཨ་རི་ཡ་སཱ་ཝ་ཀ་སྶ སི་ཡཱ ཨ་ཉྙ་ཐ་ཏྟཾ. ཏ་ཏྲི་དཾ ཨ་ཉྙ་ཐ་ཏྟཾ – སོ ཝ་ཏ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫི་སྶ་ཏཱི’’ཏི – ནེ་ཏཾ ཋཱ་ནཾ ཝི་ཛྫ་ཏི. ‘‘དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་སུ སཱི་ལེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ ཨ་ཁ་ཎྜེ་སུ…པེ… ས་མཱ་དྷི་སཾ་ཝ་ཏྟ་ནི་ཀེ་སུ. སི་ཡཱ, བྷི་ཀྑ་ཝེ, ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨ་ཉྙ་ཐ་ཏྟཾ – པ་ཐ་ཝཱི་དྷཱ་ཏུ་ཡཱ, ཨཱ་པོ་དྷཱ་ཏུ་ཡཱ, ཏེ་ཛོ་དྷཱ་ཏུ་ཡཱ, ཝཱ་ཡོ་དྷཱ་ཏུ་ཡཱ – ན ཏྭེ་ཝ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏ་སྶ ཨ་རི་ཡ་སཱ་ཝ་ཀ་སྶ སི་ཡཱ ཨ་ཉྙ་ཐ་ཏྟཾ. ཏ་ཏྲི་དཾ ཨ་ཉྙ་ཐ་ཏྟཾ – སོ ཝ་ཏ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཨ་རི་ཡ་སཱ་ཝ་ཀོ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫི་སྶ་ཏཱི་ཏི – ནེ་ཏཾ ཋཱ་ནཾ ཝི་ཛྫ་ཏི. ཡེ ཏེ, བྷི་ཀྑ་ཝེ, ཨ་ནུ་ཀ་མྤེ་ཡྻཱ་ཐ, ཡེ ཙ སོ་ཏ་བྦཾ མ་ཉྙེ་ཡྻུཾ – མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ – ཏེ, བྷི་ཀྑ་ཝེ, ཨི་མེ་སུ ཙ་ཏཱུ་སུ སོ་ཏཱ་པ་ཏྟི་ཡ་ངྒེ་སུ ས་མཱ་ད་པེ་ཏ་བྦཱ, ནི་ཝེ་སེ་ཏ་བྦཱ, པ་ཏི་ཊྛཱ་པེ་ཏ་བྦཱ’’ཏི. ས་ཏྟ་མཾ.
༨. པ་ཋ་མ་དེ་ཝ་ཙཱ་རི་ཀ་སུ་ཏྟཾ
༡༠༡༤. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ – སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ – ཛེ་ཏ་ཝ་ནེ ཨ་ནྟ་ར་ཧི་ཏོ དེ་ཝེ་སུ ཏཱ་ཝ་ཏིཾ་སེ་སུ པཱ་ཏུ་ར་ཧོ་སི. ཨ་ཐ ཁོ ས་མྦ་ཧུ་ལཱ ཏཱ་ཝ་ཏིཾ་ས་ཀཱ་ཡི་ཀཱ དེ་ཝ་ཏཱ་ཡོ ཡེ་ནཱ་ཡ་སྨཱ མ་ཧཱ་མོ་གྒ་ལླཱ་ནོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཾ་སུ. ཨེ་ཀ་མ་ནྟཾ ཋི་ཏཱ ཁོ ཏཱ དེ་ཝ་ཏཱ་ཡོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཨེ་ཏ་ད་ཝོ་ཙ –
‘‘སཱ་དྷུ ཁོ, ཨཱ་ཝུ་སོ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ནྟི. སཱ་དྷུ ཁོ, ཨཱ་ཝུ་སོ, དྷ་མྨེ…པེ… ས་ངྒྷེ…པེ… སཱ་དྷུ ཁོ, ཨཱ་ཝུ་སོ, ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ནྟཱི’’ཏི.
‘‘སཱ་དྷུ ཁོ, མཱ་རི་ས མོ་གྒ་ལླཱ་ན, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས མོ་གྒ་ལླཱ་ན, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ནྟི. སཱ་དྷུ ཁོ, མཱ་རི་ས མོ་གྒ་ལླཱ་ན, དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས མོ་གྒ་ལླཱ་ན, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ནྟཱི’’ཏི. ཨ་ཊྛ་མཾ.
༩. དུ་ཏི་ཡ་དེ་ཝ་ཙཱ་རི་ཀ་སུ་ཏྟཾ
༡༠༡༥. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ – སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ – ཛེ་ཏ་ཝ་ནེ ཨ་ནྟ་ར་ཧི་ཏོ དེ་ཝེ་སུ ཏཱ་ཝ་ཏིཾ་སེ་སུ པཱ་ཏུ་ར་ཧོ་སི. ཨ་ཐ ཁོ ས་མྦ་ཧུ་ལཱ ཏཱ་ཝ་ཏིཾ་ས་ཀཱ་ཡི་ཀཱ དེ་ཝ་ཏཱ་ཡོ ཡེ་ནཱ་ཡ་སྨཱ མ་ཧཱ་མོ་གྒ་ལླཱ་ནོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཾ་སུ. ཨེ་ཀ་མ་ནྟཾ ཋི་ཏཱ ཁོ ཏཱ དེ་ཝ་ཏཱ་ཡོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཨེ་ཏ་ད་ཝོ་ཙ –
‘‘སཱ་དྷུ ཁོ, ཨཱ་ཝུ་སོ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ. སཱ་དྷུ ཁོ, ཨཱ་ཝུ་སོ, དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’’ཏི.
‘‘སཱ་དྷུ ཁོ, མཱ་རི་ས མོ་གྒ་ལླཱ་ན, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས མོ་གྒ་ལླཱ་ན, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ. སཱ་དྷུ ཁོ, མཱ་རི་ས མོ་གྒ་ལླཱ་ན, དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས མོ་གྒ་ལླཱ་ན, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’’ཏི. ན་ཝ་མཾ.
༡༠. ཏ་ཏི་ཡ་དེ་ཝ་ཙཱ་རི་ཀ་སུ་ཏྟཾ
༡༠༡༦. ཨ་ཐ ཁོ བྷ་ག་ཝཱ – སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ – ཛེ་ཏ་ཝ་ནེ ཨ་ནྟ་ར་ཧི་ཏོ དེ་ཝེ་སུ ཏཱ་ཝ་ཏིཾ་སེ་སུ པཱ་ཏུ་ར་ཧོ་སི. ཨ་ཐ ཁོ ས་མྦ་ཧུ་ལཱ ཏཱ་ཝ་ཏིཾ་ས་ཀཱ་ཡི་ཀཱ དེ་ཝ་ཏཱ་ཡོ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཾ་སུ. ཨེ་ཀ་མ་ནྟཾ ཋི་ཏཱ ཁོ ཏཱ དེ་ཝ་ཏཱ་ཡོ བྷ་ག་ཝཱ ཨེ་ཏ་ད་ཝོ་ཙ –
‘‘སཱ་དྷུ ཁོ, ཨཱ་ཝུ་སོ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ. སཱ་དྷུ ཁོ, ཨཱ་ཝུ་སོ, དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, ཨཱ་ཝུ་སོ, ཨེ་ཝ་མི་དྷེ་ཀ་ཙྩེ ས་ཏྟཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི.
‘‘སཱ་དྷུ ཁོ, མཱ་རི་ས, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ནཾ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས, ཨེ་ཝ་མ་ཡཾ པ་ཛཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ. སཱ་དྷུ ཁོ, མཱ་རི་ས, དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ནཾ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་མ་ན་ཧེ་ཏུ ཁོ, མཱ་རི་ས, ཨེ་ཝ་མ་ཡཾ པ་ཛཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི. ད་ས་མཾ.
རཱ་ཛ་ཀཱ་རཱ་མ་ཝ་གྒོ དུ་ཏི་ཡོ.
ཏ་སྶུ་དྡཱ་ནཾ –
ས་ཧ་སྶ་བྲཱ་ཧྨ་ཎཱ་ན་ནྡ, དུ་གྒ་ཏི ཨ་པ་རེ དུ་ཝེ;
མི་ཏྟཱ་མ་ཙྩཱ དུ་ཝེ ཝུ་ཏྟཱ, ཏ་ཡོ ཙ དེ་ཝ་ཙཱ་རི་ཀཱ་ཏི.