༩. ཨ་ཙེ་ལ་ཀ་སྶ་པ་སུ་ཏྟཾ
༣༥༡. ཏེ་ན ཁོ པ་ན ས་མ་ཡེ་ན ཨ་ཙེ་ལོ ཀ་སྶ་པོ མ་ཙྪི་ཀཱ་ས་ཎྜཾ ཨ་ནུ་པྤ་ཏྟོ ཧོ་ཏི ཙི་ཏྟ་སྶ ག་ཧ་པ་ཏི་ནོ པུ་རཱ་ཎ་གི་ཧི་ས་ཧཱ་ཡོ. ཨ་སྶོ་སི ཁོ ཙི་ཏྟོ ག་ཧ་པ་ཏི – ‘‘ཨ་ཙེ་ལོ ཀི་ར ཀ་སྶ་པོ མ་ཙྪི་ཀཱ་ས་ཎྜཾ ཨ་ནུ་པྤ་ཏྟོ ཨ་མྷཱ་ཀཾ པུ་རཱ་ཎ་གི་ཧི་ས་ཧཱ་ཡོ’’ཏི. ཨ་ཐ ཁོ ཙི་ཏྟོ ག་ཧ་པ་ཏི ཡེ་ན ཨ་ཙེ་ལོ ཀ་སྶ་པོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨ་ཙེ་ལེ་ན ཀ་སྶ་པེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཙི་ཏྟོ ག་ཧ་པ་ཏི ཨ་ཙེ་ལཾ ཀ་སྶ་པཾ ཨེ་ཏ་ད་ཝོ་ཙ – ‘‘ཀཱི་ཝ་ཙི་རཾ པ་བྦ་ཛི་ཏ་སྶ, བྷ་ནྟེ, ཀ་སྶ་པཱ’’ཏི? ‘‘ཏིཾ་ས་མ་ཏྟཱ་ནི ཁོ མེ, ག་ཧ་པ་ཏི, ཝ་སྶཱ་ནི པ་བྦ་ཛི་ཏ་སྶཱ’’ཏི. ‘‘ཨི་མེ་ཧི པ་ན ཏེ, བྷ་ནྟེ, ཏིཾ་ས་མ་ཏྟེ་ཧི ཝ་སྶེ་ཧི ཨ་ཏྠི ཀོ་ཙི ཨུ་ཏྟ་རི་མ་ནུ་སྶ་དྷ་མྨཱ [ཨུ་ཏྟ་རི་མ་ནུ་སྶ་དྷ་མྨོ (སྱཱ. ཀཾ.)] ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོ ཨ་དྷི་ག་ཏོ ཕཱ་སུ་ཝི་ཧཱ་རོ’’ཏི? ‘‘ཨི་མེ་ཧི ཁོ མེ, ག་ཧ་པ་ཏི, ཏིཾ་ས་མ་ཏྟེ་ཧི ཝ་སྶེ་ཧི པ་བྦ་ཛི་ཏ་སྶ ན་ཏྠི ཀོ་ཙི ཨུ་ཏྟ་རི་མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོ ཨ་དྷི་ག་ཏོ ཕཱ་སུ་ཝི་ཧཱ་རོ, ཨ་ཉྙ་ཏྲ ན་གྒེ་ཡྻཱ ཙ མུ་ཎྜེ་ཡྻཱ ཙ པཱ་ཝ་ལ༹་ནི་པྥོ་ཊ་ནཱ་ཡ ཙཱ’’ཏི. ཨེ་ཝཾ ཝུ་ཏྟེ, ཙི་ཏྟོ ག་ཧ་པ་ཏི ཨ་ཙེ་ལཾ ཀ་སྶ་པཾ ཨེ་ཏ་ད་ཝོ་ཙ – ‘‘ཨ་ཙྪ་རི་ཡཾ ཝ་ཏ, བྷོ, ཨ་བྦྷུ་ཏཾ ཝ་ཏ, བྷོ! དྷ་མྨ་སྶ སྭཱ་ཀྑཱ་ཏ་ཏཱ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི] ཡ་ཏྲ ཧི ནཱ་མ ཏིཾ་ས་མ་ཏྟེ་ཧི ཝ་སྶེ་ཧི ན ཀོ་ཙི ཨུ་ཏྟ་རི་མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོ ཨ་དྷི་ག་ཏོ ཨ་བྷ་ཝི་སྶ ཕཱ་སུ་ཝི་ཧཱ་རོ, ཨ་ཉྙ་ཏྲ ན་གྒེ་ཡྻཱ ཙ མུ་ཎྜེ་ཡྻཱ ཙ པཱ་ཝ་ལ༹་ནི་པྥོ་ཊ་ནཱ་ཡ ཙཱ’’ཏི!
‘‘ཏུ་ཡ྄ཧཾ པ་ན, ག་ཧ་པ་ཏི, ཀཱི་ཝ་ཙི་རཾ ཨུ་པཱ་ས་ཀ་ཏྟཾ ཨུ་པ་ག་ཏ་སྶཱ’’ཏི? ‘‘མ་ཡ྄ཧ་མྤི ཁོ པ་ན, བྷ་ནྟེ, ཏིཾ་ས་མ་ཏྟཱ་ནི ཝ་སྶཱ་ནི ཨུ་པཱ་ས་ཀ་ཏྟཾ ཨུ་པ་ག་ཏ་སྶཱ’’ཏི. ‘‘ཨི་མེ་ཧི པ་ན ཏེ, ག་ཧ་པ་ཏི, ཏིཾ་ས་མ་ཏྟེ་ཧི ཝ་སྶེ་ཧི ཨ་ཏྠི ཀོ་ཙི ཨུ་ཏྟ་རི་མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོ ཨ་དྷི་ག་ཏོ ཕཱ་སུ་ཝི་ཧཱ་རོ’’ཏི? ‘‘གི་ཧི་ནོ་པི སི་ཡཱ, བྷ་ནྟེ. ཨ་ཧ་ཉྷི, བྷ་ནྟེ, ཡཱ་ཝ་དེ་ཝ ཨཱ་ཀ་ངྑཱ་མི, ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཨ་ཧ་ཉྷི, བྷ་ནྟེ, ཡཱ་ཝ་དེ་ཝ ཨཱ་ཀ་ངྑཱ་མི, ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ …པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཨ་ཧ་ཉྷི, བྷ་ནྟེ, ཡཱ་ཝ་དེ་ཝ ཨཱ་ཀ་ངྑཱ་མི, པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཨ་ཧ་ཉྷི, བྷ་ནྟེ, ཡཱ་ཝ་དེ་ཝ ཨཱ་ཀ་ངྑཱ་མི, སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ས་ཙེ ཁོ པ་ནཱ་ཧཾ, བྷ་ནྟེ, བྷ་ག་ཝ་ཏོ [བྷ་ག་ཝ་ཏཱ (སྱཱ. ཀཾ.)] པ་ཋ་མ་ཏ་རཾ ཀཱ་ལཾ ཀ་རེ་ཡྻཾ, ཨ་ན་ཙྪ་རི་ཡཾ ཁོ པ་ནེ་ཏཾ ཡཾ མཾ བྷ་ག་ཝཱ ཨེ་ཝཾ བྱཱ་ཀ་རེ་ཡྻ – ‘ན་ཏྠི ཏཾ སཾ་ཡོ་ཛ་ནཾ ཡེ་ན སཾ་ཡོ་ཛ་ནེ་ན སཾ་ཡུ་ཏྟོ ཙི་ཏྟོ ག་ཧ་པ་ཏི པུ་ན ཨི་མཾ ལོ་ཀཾ ཨཱ་ག་ཙྪེ་ཡྻཱ’’’ཏི. ཨེ་ཝཾ ཝུ་ཏྟེ, ཨ་ཙེ་ལོ ཀ་སྶ་པོ ཙི་ཏྟཾ ག་ཧ་པ་ཏིཾ ཨེ་ཏ་ད་ཝོ་ཙ – ‘‘ཨ་ཙྪ་རི་ཡཾ ཝ་ཏ བྷོ, ཨ་བྦྷུ་ཏཾ ཝ་ཏ བྷོ! དྷ་མྨ་སྶ སྭཱ་ཀྑཱ་ཏ་ཏཱ, ཡ་ཏྲ ཧི ནཱ་མ གི་ཧཱི ཨོ་དཱ་ཏ་ཝ་ས་ནོ [གི་ཧཱི ཨོ་དཱ་ཏ་ཝ་ས་ནཱ (སཱི. པཱི.)] ཨེ་ཝ་རཱུ་པཾ ཨུ་ཏྟ་རི་མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སཾ ཨ་དྷི་ག་མི་སྶ་ཏི [ཨ་དྷི་ག་མི་སྶ་ནྟི (སཱི. པཱི.)] ཕཱ་སུ་ཝི་ཧཱ་རཾ. ལ་བྷེ་ཡྻཱ་ཧཾ, ག་ཧ་པ་ཏི, ཨི་མ་སྨིཾ དྷ་མྨ་ཝི་ན་ཡེ པ་བྦ་ཛྫཾ, ལ་བྷེ་ཡྻཾ ཨུ་པ་ས་མྤ་ད’’ནྟི.
ཨ་ཐ ཁོ ཙི་ཏྟོ ག་ཧ་པ་ཏི ཨ་ཙེ་ལཾ ཀ་སྶ་པཾ ཨཱ་དཱ་ཡ ཡེ་ན ཐེ་རཱ བྷི་ཀྑཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཐེ་རེ བྷི་ཀྑཱུ ཨེ་ཏ་ད་ཝོ་ཙ – ‘‘ཨ་ཡཾ, བྷ་ནྟེ, ཨ་ཙེ་ལོ ཀ་སྶ་པོ ཨ་མྷཱ་ཀཾ པུ་རཱ་ཎ་གི་ཧི་ས་ཧཱ་ཡོ. ཨི་མཾ ཐེ་རཱ པ་བྦཱ་ཛེ་ནྟུ ཨུ་པ་ས་མྤཱ་དེ་ནྟུ. ཨ་ཧ་མ་སྶ ཨུ་སྶུ་ཀྐཾ ཀ་རི་སྶཱ་མི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ན’’ནྟི. ཨ་ལ་ཏྠ ཁོ ཨ་ཙེ་ལོ ཀ་སྶ་པོ ཨི་མ་སྨིཾ དྷ་མྨ་ཝི་ན་ཡེ པ་བྦ་ཛྫཾ, ཨ་ལ་ཏྠ ཨུ་པ་ས་མྤ་དཾ. ཨ་ཙི་རཱུ་པ་ས་མྤ་ནྣོ ཙ པ་ནཱ་ཡ་སྨཱ ཀ་སྶ་པོ ཨེ་ཀོ ཝཱུ་པ་ཀ་ཊྛོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་ར་ནྟོ ན་ཙི་ར་སྶེ་ཝ – ཡ་སྶ་ཏྠཱ་ཡ ཀུ་ལ་པུ་ཏྟཱ ས་མྨ་དེ་ཝ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་ནྟི, ཏ་ད་ནུ་ཏྟ་རཾ བྲ་ཧྨ་ཙ་རི་ཡ་པ་རི་ཡོ་སཱ་ནཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སི. ‘‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’’ཏི ཨ་བྦྷ་ཉྙཱ་སི. ཨ་ཉྙ་ཏ་རོ ཙ པ་ནཱ་ཡ་སྨཱ ཀ་སྶ་པོ ཨ་ར་ཧ་ཏཾ ཨ་ཧོ་སཱི་ཏི. ན་ཝ་མཾ.