༡༠. གི་ལཱ་ན་ད་སྶ་ན་སུ་ཏྟཾ
༣༥༢. ཏེ་ན ཁོ པ་ན ས་མ་ཡེ་ན ཙི་ཏྟོ ག་ཧ་པ་ཏི ཨཱ་བཱ་དྷི་ཀོ ཧོ་ཏི དུ་ཀྑི་ཏོ བཱ་ལ༹ྷ་གི་ལཱ་ནོ. ཨ་ཐ ཁོ ས་མྦ་ཧུ་ལཱ ཨཱ་རཱ་མ་དེ་ཝ་ཏཱ ཝ་ན་དེ་ཝ་ཏཱ རུ་ཀྑ་དེ་ཝ་ཏཱ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ དེ་ཝ་ཏཱ ས་ངྒ་མྨ ས་མཱ་ག་མྨ ཙི་ཏྟཾ ག་ཧ་པ་ཏིཾ ཨེ་ཏ་ད་ཝོ་ཙུཾ – ‘‘པ་ཎི་དྷེ་ཧི, ག་ཧ་པ་ཏི, ཨ་ནཱ་ག་ཏ་མ་དྡྷཱ་ནཾ རཱ་ཛཱ ཨ་སྶཾ ཙ་ཀྐ་ཝ་ཏྟཱི’’ཏི.
ཨེ་ཝཾ ཝུ་ཏྟེ, ཙི་ཏྟོ ག་ཧ་པ་ཏི ཏཱ ཨཱ་རཱ་མ་དེ་ཝ་ཏཱ ཝ་ན་དེ་ཝ་ཏཱ རུ་ཀྑ་དེ་ཝ་ཏཱ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ དེ་ཝ་ཏཱ ཨེ་ཏ་ད་ཝོ་ཙ – ‘‘ཏ་མྤི ཨ་ནི་ཙྩཾ, ཏ་མྤི ཨ་དྡྷུ་ཝཾ, ཏ་མྤི པ་ཧཱ་ཡ ག་མ་ནཱི་ཡ’’ནྟི. ཨེ་ཝཾ ཝུ་ཏྟེ, ཙི་ཏྟ་སྶ ག་ཧ་པ་ཏི་ནོ མི་ཏྟཱ་མ་ཙྩཱ ཉཱ་ཏི་སཱ་ལོ་ཧི་ཏཱ ཙི་ཏྟཾ ག་ཧ་པ་ཏིཾ ཨེ་ཏ་ད་ཝོ་ཙུཾ – ‘‘ས་ཏིཾ, ཨ་ཡྻ་པུ་ཏྟ, ཨུ་པ་ཊྛ་པེ་ཧི, མཱ ཝི་པྤ་ལ་པཱི’’ཏི. ‘‘ཀིཾ ཏཱ་ཧཾ ཝ་དཱ་མི ཡཾ མཾ ཏུ་མྷེ ཨེ་ཝཾ ཝ་དེ་ཐ – ‘ས་ཏིཾ, ཨ་ཡྻ་པུ་ཏྟ, ཨུ་པ་ཊྛ་པེ་ཧི, མཱ ཝི་པྤ་ལ་པཱི’’’ཏི? ‘‘ཨེ་ཝཾ ཁོ ཏྭཾ, ཨ་ཡྻ་པུ་ཏྟ, ཝ་དེ་སི – ‘ཏ་མྤི ཨ་ནི་ཙྩཾ, ཏ་མྤི ཨ་དྡྷུ་ཝཾ, ཏ་མྤི པ་ཧཱ་ཡ ག་མ་ནཱི་ཡ’’’ནྟི. ‘‘ཏ་ཐཱ ཧི པ་ན མཾ ཨཱ་རཱ་མ་དེ་ཝ་ཏཱ ཝ་ན་དེ་ཝ་ཏཱ རུ་ཀྑ་དེ་ཝ་ཏཱ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ དེ་ཝ་ཏཱ ཨེ་ཝ་མཱ་ཧཾ་སུ – ‘པ་ཎི་དྷེ་ཧི, ག་ཧ་པ་ཏི, ཨ་ནཱ་ག་ཏ་མ་དྡྷཱ་ནཾ རཱ་ཛཱ ཨ་སྶཾ ཙ་ཀྐ་ཝ་ཏྟཱི’ཏི. ཏཱ་ཧཾ ཨེ་ཝཾ ཝ་དཱ་མི – ‘ཏ་མྤི ཨ་ནི་ཙྩཾ…པེ… ཏ་མྤི པ་ཧཱ་ཡ ག་མ་ནཱི་ཡ’’’ནྟི. ‘‘ཀིཾ པ་ན ཏཱ, ཨ་ཡྻ་པུ་ཏྟ, ཨཱ་རཱ་མ་དེ་ཝ་ཏཱ ཝ་ན་དེ་ཝ་ཏཱ རུ་ཀྑ་དེ་ཝ་ཏཱ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ དེ་ཝ་ཏཱ ཨ་ཏྠ་ཝ་སཾ ས་མྤ་སྶ་མཱ་ནཱ ཨེ་ཝ་མཱ་ཧཾ་སུ – ‘པ་ཎི་དྷེ་ཧི, ག་ཧ་པ་ཏི, ཨ་ནཱ་ག་ཏ་མ་དྡྷཱ་ནཾ རཱ་ཛཱ ཨ་སྶཾ ཙ་ཀྐ་ཝ་ཏྟཱི’’’ཏི? ‘‘ཏཱ་སཾ ཁོ ཨཱ་རཱ་མ་དེ་ཝ་ཏཱ་ནཾ ཝ་ན་དེ་ཝ་ཏཱ་ནཾ རུ་ཀྑ་དེ་ཝ་ཏཱ་ནཾ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ་ནཾ དེ་ཝ་ཏཱ་ནཾ ཨེ་ཝཾ ཧོ་ཏི – ‘ཨ་ཡཾ ཁོ ཙི་ཏྟོ ག་ཧ་པ་ཏི, སཱི་ལ་ཝཱ [སཱི་ལ་ཝ་ནྟོ (ཀ.)] ཀ་ལྱཱ་ཎ་དྷ་མྨོ. ས་ཙེ པ་ཎི་ད་ཧི་སྶ་ཏི – ཨ་ནཱ་ག་ཏ་མ་དྡྷཱ་ནཾ རཱ་ཛཱ ཨ་སྶཾ ཙ་ཀྐ་ཝ་ཏྟཱི’ཏི, ‘ཏ་སྶ ཁོ ཨ་ཡཾ ཨི་ཛ྄ཛྷི་སྶ་ཏི, སཱི་ལ་ཝ་ཏོ ཙེ་ཏོ་པ་ཎི་དྷི ཝི་སུ་དྡྷ་ཏྟཱ དྷ་མྨི་ཀོ དྷ་མྨི་ཀཾ ཕ་ལཾ ཨ་ནུ་པ་སྶ་ཏཱི’ཏི. ཨི་མཾ ཁོ ཏཱ ཨཱ་རཱ་མ་དེ་ཝ་ཏཱ ཝ་ན་དེ་ཝ་ཏཱ རུ་ཀྑ་དེ་ཝ་ཏཱ ཨོ་ས་དྷི་ཏི་ཎ་ཝ་ན་པྤ་ཏཱི་སུ ཨ་དྷི་ཝ་ཏྠཱ དེ་ཝ་ཏཱ ཨ་ཏྠ་ཝ་སཾ ས་མྤ་སྶ་མཱ་ནཱ ཨེ་ཝ་མཱ་ཧཾ་སུ – ‘པ་ཎི་དྷེ་ཧི, ག་ཧ་པ་ཏི, ཨ་ནཱ་ག་ཏ་མ་དྡྷཱ་ནཾ རཱ་ཛཱ ཨ་སྶཾ ཙ་ཀྐ་ཝ་ཏྟཱི’ཏི. ཏཱ་ཧཾ ཨེ་ཝཾ ཝ་དཱ་མི – ‘ཏ་མྤི ཨ་ནི་ཙྩཾ, ཏ་མྤི ཨ་དྡྷུ་ཝཾ, ཏ་མྤི པ་ཧཱ་ཡ ག་མ་ནཱི་ཡ’’’ནྟི.
‘‘ཏེ་ན ཧི, ཨ་ཡྻ་པུ་ཏྟ, ཨ་མྷེ་པི ཨོ་ཝ་དཱ་ཧཱི’’ཏི. ‘‘ཏ་སྨཱ ཧི ཝོ ཨེ་ཝཾ སི་ཀྑི་ཏ་བྦཾ – བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ བྷ་ཝི་སྶཱ་མ – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’ཏི. དྷ་མྨེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ བྷ་ཝི་སྶཱ་མ – ‘སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ ས་ནྡི་ཊྛི་ཀོ ཨ་ཀཱ་ལི་ཀོ ཨེ་ཧི་པ་སྶི་ཀོ ཨོ་པ་ནེ་ཡྻི་ཀོ པ་ཙྩ་ཏྟཾ ཝེ་དི་ཏ་བྦོ ཝི་ཉྙཱུ་ཧཱི’ཏི. ས་ངྒྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ བྷ་ཝི་སྶཱ་མ – ‘སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཨུ་ཛུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཉཱ་ཡ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, སཱ་མཱི་ཙི་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཡ་དི་དཾ ཙ་ཏྟཱ་རི པུ་རི་ས་ཡུ་གཱ་ནི ཨ་ཊྛ པུ་རི་ས་པུ་གྒ་ལཱ ཨེ་ས བྷ་ག་ཝ་ཏོ སཱ་ཝ་ཀ་ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’ཏི. ཡཾ ཁོ པ་ན ཀི་ཉྩི ཀུ་ལེ དེ་ཡྻ་དྷ་མྨཾ ས་བྦཾ ཏཾ ཨ་པྤ་ཊི་ཝི་བྷ་ཏྟཾ བྷ་ཝི་སྶ་ཏི སཱི་ལ་ཝ་ནྟེ་ཧི ཀ་ལྱཱ་ཎ་དྷ་མྨེ་ཧཱི་ཏི ཨེ་ཝ་ཉྷི ཝོ སི་ཀྑི་ཏ་བྦ’’ནྟི. ཨ་ཐ ཁོ ཙི་ཏྟོ ག་ཧ་པ་ཏི མི་ཏྟཱ་མ་ཙྩེ ཉཱ་ཏི་སཱ་ལོ་ཧི་ཏེ བུ་དྡྷེ ཙ དྷ་མྨེ ཙ ས་ངྒྷེ ཙ ཙཱ་གེ ཙ ས་མཱ་ད་པེ་ཏྭཱ ཀཱ་ལ་མ་ཀཱ་སཱི་ཏི. ད་ས་མཾ.
ཙི་ཏྟ་སཾ་ཡུ་ཏྟཾ ས་མ་ཏྟཾ.