༧. གོ་ད་ཏྟ་སུ་ཏྟཾ
༣༤༩. ཨེ་ཀཾ ས་མ་ཡཾ ཨཱ་ཡ་སྨཱ གོ་ད་ཏྟོ མ་ཙྪི་ཀཱ་ས་ཎྜེ ཝི་ཧ་ར་ཏི ཨ་མྦཱ་ཊ་ཀ་ཝ་ནེ. ཨ་ཐ ཁོ ཙི་ཏྟོ ག་ཧ་པ་ཏི ཡེ་ནཱ་ཡ་སྨཱ གོ་ད་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ གོ་ད་ཏྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཙི་ཏྟཾ ག་ཧ་པ་ཏིཾ ཨཱ་ཡ་སྨཱ གོ་ད་ཏྟོ ཨེ་ཏ་ད་ཝོ་ཙ – ‘‘ཡཱ ཙཱ་ཡཾ, ག་ཧ་པ་ཏི, ཨ་པྤ་མཱ་ཎཱ ཙེ་ཏོ་ཝི་མུ་ཏྟི, ཡཱ ཙ ཨཱ་ཀི་ཉྩ་ཉྙཱ ཙེ་ཏོ་ཝི་མུ་ཏྟི, ཡཱ ཙ སུ་ཉྙ་ཏཱ ཙེ་ཏོ་ཝི་མུ་ཏྟི, ཡཱ ཙ ཨ་ནི་མི་ཏྟཱ ཙེ་ཏོ་ཝི་མུ་ཏྟི, ཨི་མེ དྷ་མྨཱ ནཱ་ན་ཏྠཱ ནཱ་ནཱ་བྱ་ཉྫ་ནཱ ཨུ་དཱ་ཧུ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི? ‘‘ཨ་ཏྠི, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙ. ཨ་ཏྠི པ་ན, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི.
‘‘ཀ་ཏ་མོ ཙ, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙ? ཨི་དྷ, བྷ་ནྟེ, བྷི་ཀྑུ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཏི, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ [ཙ་ཏུ་ཏྠིཾ (?)]. ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན [ཨ་བྱཱ་པ་ཛ྄ཛྷེ་ན (སཱི. སྱཱ. ཀཾ. པཱི.), ཨ་བྱཱ་བ་ཛ྄ཛྷེ་ན (?)] ཕ་རི་ཏྭཱ ཝི་ཧ་ར་ཏི. ཀ་རུ་ཎཱ་ས་ཧ་ག་ཏེ་ན ཙེ་ཏ་སཱ…པེ… མུ་དི་ཏཱ་ས་ཧ་ག་ཏེ་ན ཙེ་ཏ་སཱ…པེ… ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཏི, ཏ་ཐཱ དུ་ཏི་ཡཾ, ཏ་ཐཱ ཏ་ཏི་ཡཾ, ཏ་ཐཱ ཙ་ཏུ་ཏྠཾ. ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ ཨུ་པེ་ཀྑཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཏི. ཨ་ཡཾ ཝུ་ཙྩ་ཏི, བྷ་ནྟེ, ཨ་པྤ་མཱ་ཎཱ ཙེ་ཏོ་ཝི་མུ་ཏྟི.
‘‘ཀ་ཏ་མཱ ཙ, བྷ་ནྟེ, ཨཱ་ཀི་ཉྩ་ཉྙཱ ཙེ་ཏོ་ཝི་མུ་ཏྟི? ཨི་དྷ, བྷ་ནྟེ, བྷི་ཀྑུ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ, ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨ་ཡཾ ཝུ་ཙྩ་ཏི, བྷ་ནྟེ, ཨཱ་ཀི་ཉྩ་ཉྙཱ ཙེ་ཏོ་ཝི་མུ་ཏྟི.
‘‘ཀ་ཏ་མཱ ཙ, བྷ་ནྟེ, སུ་ཉྙ་ཏཱ ཙེ་ཏོ་ཝི་མུ་ཏྟི? ཨི་དྷ, བྷ་ནྟེ, བྷི་ཀྑུ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ཨི་ཏི པ་ཊི་ས་ཉྩི་ཀྑ་ཏི – ‘སུ་ཉྙ་མི་དཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ’ཏི. ཨ་ཡཾ ཝུ་ཙྩ་ཏི, བྷ་ནྟེ, སུ་ཉྙ་ཏཱ ཙེ་ཏོ་ཝི་མུ་ཏྟི.
‘‘ཀ་ཏ་མཱ ཙ, བྷ་ནྟེ, ཨ་ནི་མི་ཏྟཱ ཙེ་ཏོ་ཝི་མུ་ཏྟི? ཨི་དྷ, བྷ་ནྟེ, བྷི་ཀྑུ ས་བྦ་ནི་མི་ཏྟཱ་ནཾ ཨ་མ་ན་སི་ཀཱ་རཱ ཨ་ནི་མི་ཏྟཾ ཙེ་ཏོ་ས་མཱ་དྷིཾ ཨུ་པ་ས་མྤ་ཛྫ ཝི་ཧ་ར་ཏི. ཨ་ཡཾ ཝུ་ཙྩ་ཏི, བྷ་ནྟེ, ཨ་ནི་མི་ཏྟཱ ཙེ་ཏོ་ཝི་མུ་ཏྟི. ཨ་ཡཾ ཁོ, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙ.
‘‘ཀ་ཏ་མོ ཙ, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ནཾ? རཱ་གོ, བྷ་ནྟེ, པ་མཱ་ཎ་ཀ་ར་ཎོ, དོ་སོ པ་མཱ་ཎ་ཀ་ར་ཎོ, མོ་ཧོ པ་མཱ་ཎ་ཀ་ར་ཎོ. ཏེ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཡཱ་ཝ་ཏཱ ཁོ, བྷ་ནྟེ, ཨ་པྤ་མཱ་ཎཱ ཙེ་ཏོ་ཝི་མུ་ཏྟི་ཡོ, ཨ་ཀུ་པྤཱ ཏཱ་སཾ ཙེ་ཏོ་ཝི་མུ་ཏྟི ཨ་གྒ་མ་ཀྑཱ་ཡ་ཏི. སཱ ཁོ པ་ན ཨ་ཀུ་པྤཱ ཙེ་ཏོ་ཝི་མུ་ཏྟི སུ་ཉྙཱ རཱ་གེ་ན, སུ་ཉྙཱ དོ་སེ་ན, སུ་ཉྙཱ མོ་ཧེ་ན. རཱ་གོ ཁོ, བྷ་ནྟེ, ཀི་ཉྩ་ནཾ, དོ་སོ ཀི་ཉྩ་ནཾ, མོ་ཧོ ཀི་ཉྩ་ནཾ. ཏེ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཡཱ་ཝ་ཏཱ ཁོ, བྷ་ནྟེ, ཨཱ་ཀི་ཉྩ་ཉྙཱ ཙེ་ཏོ་ཝི་མུ་ཏྟི་ཡོ, ཨ་ཀུ་པྤཱ ཏཱ་སཾ ཙེ་ཏོ་ཝི་མུ་ཏྟི ཨ་གྒ་མ་ཀྑཱ་ཡ་ཏི. སཱ ཁོ པ་ན ཨ་ཀུ་པྤཱ ཙེ་ཏོ་ཝི་མུ་ཏྟི སུ་ཉྙཱ རཱ་གེ་ན, སུ་ཉྙཱ དོ་སེ་ན, སུ་ཉྙཱ མོ་ཧེ་ན. རཱ་གོ ཁོ, བྷ་ནྟེ, ནི་མི་ཏྟ་ཀ་ར་ཎོ, དོ་སོ ནི་མི་ཏྟ་ཀ་ར་ཎོ, མོ་ཧོ ནི་མི་ཏྟ་ཀ་ར་ཎོ. ཏེ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཡཱ་ཝ་ཏཱ ཁོ, བྷ་ནྟེ, ཨ་ནི་མི་ཏྟཱ ཙེ་ཏོ་ཝི་མུ་ཏྟི་ཡོ, ཨ་ཀུ་པྤཱ ཏཱ་སཾ ཙེ་ཏོ་ཝི་མུ་ཏྟི ཨ་གྒ་མ་ཀྑཱ་ཡ་ཏི. སཱ ཁོ པ་ན ཨ་ཀུ་པྤཱ ཙེ་ཏོ་ཝི་མུ་ཏྟི སུ་ཉྙཱ རཱ་གེ་ན, སུ་ཉྙཱ དོ་སེ་ན, སུ་ཉྙཱ མོ་ཧེ་ན. ཨ་ཡཾ ཁོ, བྷ་ནྟེ, པ་རི་ཡཱ་ཡོ ཡཾ པ་རི་ཡཱ་ཡཾ ཨཱ་ག་མྨ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི. ‘‘ལཱ་བྷཱ ཏེ, ག་ཧ་པ་ཏི, སུ་ལ་དྡྷཾ ཏེ, ག་ཧ་པ་ཏི! ཡ་སྶ ཏེ ག་མྦྷཱི་རེ བུ་དྡྷ་ཝ་ཙ་ནེ པ་ཉྙཱ་ཙ་ཀྑུ ཀ་མ་ཏཱི’’ཏི. ས་ཏྟ་མཾ.