༦. དུ་ཏི་ཡ་ཀཱ་མ་བྷཱུ་སུ་ཏྟཾ
༣༤༨. ཨེ་ཀཾ ས་མ་ཡཾ ཨཱ་ཡ་སྨཱ ཀཱ་མ་བྷཱུ མ་ཙྪི་ཀཱ་ས་ཎྜེ ཝི་ཧ་ར་ཏི ཨ་མྦཱ་ཊ་ཀ་ཝ་ནེ. ཨ་ཐ ཁོ ཙི་ཏྟོ ག་ཧ་པ་ཏི ཡེ་ནཱ་ཡ་སྨཱ ཀཱ་མ་བྷཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཙི་ཏྟོ ག་ཧ་པ་ཏི ཨཱ་ཡ་སྨ་ནྟཾ ཀཱ་མ་བྷུཾ ཨེ་ཏ་ད་ཝོ་ཙ – ‘‘ཀ་ཏི ནུ ཁོ, བྷ་ནྟེ, ས་ངྑཱ་རཱ’’ཏི? ‘‘ཏ་ཡོ ཁོ, ག་ཧ་པ་ཏི, ས་ངྑཱ་རཱ – ཀཱ་ཡ་ས་ངྑཱ་རོ, ཝ་ཙཱི་ས་ངྑཱ་རོ, ཙི་ཏྟ་ས་ངྑཱ་རོ’’ཏི. ‘‘སཱ་དྷུ, བྷ་ནྟེ’’ཏི ཁོ ཙི་ཏྟོ ག་ཧ་པ་ཏི ཨཱ་ཡ་སྨ་ཏོ ཀཱ་མ་བྷུ་སྶ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨཱ་ཡ་སྨ་ནྟཾ ཀཱ་མ་བྷུཾ ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ཀ་ཏ་མོ པ་ན, བྷ་ནྟེ, ཀཱ་ཡ་ས་ངྑཱ་རོ, ཀ་ཏ་མོ ཝ་ཙཱི་ས་ངྑཱ་རོ, ཀ་ཏ་མོ ཙི་ཏྟ་ས་ངྑཱ་རོ’’ཏི? ‘‘ཨ་སྶཱ་ས་པ་སྶཱ་སཱ ཁོ, ག་ཧ་པ་ཏི, ཀཱ་ཡ་ས་ངྑཱ་རོ, ཝི་ཏ་ཀྐ་ཝི་ཙཱ་རཱ ཝ་ཙཱི་ས་ངྑཱ་རོ, ས་ཉྙཱ ཙ ཝེ་ད་ནཱ ཙ ཙི་ཏྟ་ས་ངྑཱ་རོ’’ཏི.
‘‘སཱ་དྷུ, བྷ་ནྟེ’’ཏི ཁོ ཙི་ཏྟོ ག་ཧ་པ་ཏི…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ཀ་སྨཱ པ་ན, བྷ་ནྟེ, ཨ་སྶཱ་ས་པ་སྶཱ་སཱ ཀཱ་ཡ་ས་ངྑཱ་རོ, ཀ་སྨཱ ཝི་ཏ་ཀྐ་ཝི་ཙཱ་རཱ ཝ་ཙཱི་ས་ངྑཱ་རོ, ཀ་སྨཱ ས་ཉྙཱ ཙ ཝེ་ད་ནཱ ཙ ཙི་ཏྟ་ས་ངྑཱ་རོ’’ཏི? ‘‘ཨ་སྶཱ་ས་པ་སྶཱ་སཱ ཁོ, ག་ཧ་པ་ཏི, ཀཱ་ཡི་ཀཱ. ཨེ་ཏེ དྷ་མྨཱ ཀཱ་ཡ་པྤ་ཊི་བ་དྡྷཱ, ཏ་སྨཱ ཨ་སྶཱ་ས་པ་སྶཱ་སཱ ཀཱ་ཡ་ས་ངྑཱ་རོ. པུ་བྦེ ཁོ, ག་ཧ་པ་ཏི, ཝི་ཏ་ཀྐེ་ཏྭཱ ཝི་ཙཱ་རེ་ཏྭཱ པ་ཙྪཱ ཝཱ་ཙཾ བྷི་ནྡ་ཏི, ཏ་སྨཱ ཝི་ཏ་ཀྐ་ཝི་ཙཱ་རཱ ཝ་ཙཱི་ས་ངྑཱ་རོ. ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ. ཨེ་ཏེ དྷ་མྨཱ ཙི་ཏྟ་པྤ་ཊི་བ་དྡྷཱ, ཏ་སྨཱ ས་ཉྙཱ ཙ ཝེ་ད་ནཱ ཙ ཙི་ཏྟ་ས་ངྑཱ་རོ’’ཏི.
སཱ་དྷུ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ཀ་ཐཾ པ་ན, བྷ་ནྟེ, ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི ཧོ་ཏཱི’’ཏི? ‘‘ན ཁོ, ག་ཧ་པ་ཏི, ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ཛྫ་ནྟ་སྶ བྷི་ཀྑུ་ནོ ཨེ་ཝཾ ཧོ་ཏི – ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ཛྫི་སྶ’ནྟི ཝཱ ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ཛྫཱ་མཱི’ཏི ཝཱ ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ནྣོ’ཏི ཝཱ. ཨ་ཐ ཁྭ་སྶ པུ་བྦེ་ཝ ཏ་ཐཱ ཙི་ཏྟཾ བྷཱ་ཝི་ཏཾ ཧོ་ཏི ཡཾ ཏཾ ཏ་ཐ་ཏྟཱ་ཡ ཨུ་པ་ནེ་ཏཱི’’ཏི.
སཱ་དྷུ …པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ཛྫ་ནྟ་སྶ པ་ན, བྷ་ནྟེ, བྷི་ཀྑུ་ནོ ཀ་ཏ་མེ དྷ་མྨཱ པ་ཋ་མཾ ནི་རུ་ཛ྄ཛྷ་ནྟི, ཡ་དི ཝཱ ཀཱ་ཡ་ས་ངྑཱ་རོ, ཡ་དི ཝཱ ཝ་ཙཱི་ས་ངྑཱ་རོ, ཡ་དི ཝཱ ཙི་ཏྟ་ས་ངྑཱ་རོ’’ཏི? ‘‘ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ཛྫ་ནྟ་སྶ ཁོ, ག་ཧ་པ་ཏི, བྷི་ཀྑུ་ནོ ཝ་ཙཱི་ས་ངྑཱ་རོ པ་ཋ་མཾ ནི་རུ་ཛ྄ཛྷ་ཏི, ཏ་ཏོ ཀཱ་ཡ་ས་ངྑཱ་རོ, ཏ་ཏོ ཙི་ཏྟ་ས་ངྑཱ་རོ’’ཏི.
སཱ་དྷུ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ཡྭཱ་ཡཾ, བྷ་ནྟེ, མ་ཏོ ཀཱ་ལ་ངྐ་ཏོ, ཡོ ཙཱ་ཡཾ བྷི་ཀྑུ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ནྣོ, ཨི་མེ་སཾ ཀིཾ ནཱ་ནཱ་ཀ་ར་ཎ’’ནྟི? ‘‘ཡྭཱ་ཡཾ ག་ཧ་པ་ཏི, མ་ཏོ ཀཱ་ལ་ངྐ་ཏོ ཏ་སྶ ཀཱ་ཡ་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཝ་ཙཱི་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཙི་ཏྟ་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཨཱ་ཡུ པ་རི་ཀྑཱི་ཎོ, ཨུ་སྨཱ ཝཱུ་པ་ས་ནྟཱ, ཨི་ནྡྲི་ཡཱ་ནི ཝི་པ་རི་བྷི་ནྣཱ་ནི. ཡོ ཙ ཁྭཱ་ཡཾ, ག་ཧ་པ་ཏི, བྷི་ཀྑུ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ནྣོ, ཏ་སྶ་པི ཀཱ་ཡ་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཝ་ཙཱི་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཙི་ཏྟ་ས་ངྑཱ་རོ ནི་རུ་དྡྷོ པ་ཊི་པྤ་སྶ་དྡྷོ, ཨཱ་ཡུ ཨ་པ་རི་ཀྑཱི་ཎོ, ཨུ་སྨཱ ཨ་ཝཱུ་པ་ས་ནྟཱ, ཨི་ནྡྲི་ཡཱ་ནི ཝི་པྤ་ས་ནྣཱ་ནི. ཡྭཱ་ཡཾ, ག་ཧ་པ་ཏི, མ་ཏོ ཀཱ་ལ་ངྐ་ཏོ, ཡོ ཙཱ་ཡཾ བྷི་ཀྑུ ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ནྣོ, ཨི་དཾ ནེ་སཾ ནཱ་ནཱ་ཀ་ར་ཎ’’ནྟི.
སཱ་དྷུ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ཀ་ཐཾ པ་ན, བྷ་ནྟེ, ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛཱ་ནཾ ཧོ་ཏཱི’’ཏི? ‘‘ན ཁོ, ག་ཧ་པ་ཏི, ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛ་ཧ་ནྟ་སྶ བྷི་ཀྑུ་ནོ ཨེ་ཝཾ ཧོ་ཏི – ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛ་ཧི་སྶ’ནྟི ཝཱ ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛ་ཧཱ་མཱི’ཏི ཝཱ ‘ཨ་ཧཾ ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛི་ཏོ’ཏི ཝཱ. ཨ་ཐ ཁྭ་སྶ པུ་བྦེ་ཝ ཏ་ཐཱ ཙི་ཏྟཾ བྷཱ་ཝི་ཏཾ ཧོ་ཏི, ཡཾ ཏཾ ཏ་ཐ་ཏྟཱ་ཡ ཨུ་པ་ནེ་ཏཱི’’ཏི.
སཱ་དྷུ, བྷ་ནྟེ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛ་ཧ་ནྟ་སྶ པ་ན, བྷ་ནྟེ, བྷི་ཀྑུ་ནོ ཀ་ཏ་མེ དྷ་མྨཱ པ་ཋ་མཾ ཨུ་པྤ་ཛྫ་ནྟི, ཡ་དི ཝཱ ཀཱ་ཡ་ས་ངྑཱ་རོ, ཡ་དི ཝཱ ཝ་ཙཱི་ས་ངྑཱ་རོ, ཡ་དི ཝཱ ཙི་ཏྟ་ས་ངྑཱ་རོ’’ཏི? ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛ་ཧ་ནྟ་སྶ, ག་ཧ་པ་ཏི, བྷི་ཀྑུ་ནོ ཙི་ཏྟ་ས་ངྑཱ་རོ པ་ཋ་མཾ ཨུ་པྤ་ཛྫ་ཏི, ཏ་ཏོ ཀཱ་ཡ་ས་ངྑཱ་རོ, ཏ་ཏོ ཝ་ཙཱི་ས་ངྑཱ་རོ’’ཏི.
སཱ་དྷུ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛི་ཏཾ པ་ན, བྷ་ནྟེ, བྷི་ཀྑུཾ ཀ་ཏི ཕ་སྶཱ ཕུ་ས་ནྟི’’? ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛི་ཏཾ ཁོ, ག་ཧ་པ་ཏི, བྷི་ཀྑུཾ ཏ་ཡོ ཕ་སྶཱ ཕུ་ས་ནྟི – སུ་ཉྙ་ཏོ ཕ་སྶོ, ཨ་ནི་མི་ཏྟོ ཕ་སྶོ, ཨ་པྤ་ཎི་ཧི་ཏོ ཕ་སྶོ’’ཏི.
སཱ་དྷུ…པེ… ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛི་ཏ་སྶ པ་ན, བྷ་ནྟེ, བྷི་ཀྑུ་ནོ ཀིཾ་ནི་ནྣཾ ཙི་ཏྟཾ ཧོ་ཏི, ཀིཾ་པོ་ཎཾ, ཀིཾ་པ་བྦྷཱ་ར’’ནྟི? ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཝུ་ཊྛི་ཏ་སྶ ཁོ, ག་ཧ་པ་ཏི, བྷི་ཀྑུ་ནོ ཝི་ཝེ་ཀ་ནི་ནྣཾ ཙི་ཏྟཾ ཧོ་ཏི ཝི་ཝེ་ཀ་པོ་ཎཾ ཝི་ཝེ་ཀ་པ་བྦྷཱ་ར’’ནྟི.
‘‘སཱ་དྷུ, བྷ་ནྟེ’’ཏི ཁོ ཙི་ཏྟོ ག་ཧ་པ་ཏི ཨཱ་ཡ་སྨ་ཏོ ཀཱ་མ་བྷུ་སྶ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨཱ་ཡ་སྨ་ནྟཾ ཀཱ་མ་བྷུཾ ཨུ་ཏྟ་རིཾ པ་ཉྷཾ ཨ་པུ་ཙྪི – ‘‘ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ པ་ན, བྷ་ནྟེ, ཀ་ཏི དྷ་མྨཱ བ་ཧཱུ་པ་ཀཱ་རཱ’’ཏི? ‘‘ཨ་དྡྷཱ ཁོ ཏྭཾ, ག་ཧ་པ་ཏི, ཡཾ པ་ཋ་མཾ པུ་ཙྪི་ཏ་བྦཾ ཏཾ པུ་ཙྪ་སི. ཨ་པི ཙ ཏྱཱ་ཧཾ བྱཱ་ཀ་རི་སྶཱ་མི. ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡཱ ཁོ, ག་ཧ་པ་ཏི, དྭེ དྷ་མྨཱ བ་ཧཱུ་པ་ཀཱ་རཱ – ས་མ་ཐོ ཙ ཝི་པ་སྶ་ནཱ ཙཱ’’ཏི. ཚ་ཊྛཾ.