༥. པ་ཋ་མ་ཀཱ་མ་བྷཱུ་སུ་ཏྟཾ

༣༤༧. ཨེ་ཀཾ ས་མ་ཡཾ ཨཱ་ཡ་སྨཱ ཀཱ་མ་བྷཱུ མ་ཙྪི་ཀཱ་ས་ཎྜེ ཝི་ཧ་ར་ཏི ཨ་མྦཱ་ཊ་ཀ་ཝ་ནེ. ཨ་ཐ ཁོ ཙི་ཏྟོ ག་ཧ་པ་ཏི ཡེ་ནཱ་ཡ་སྨཱ ཀཱ་མ་བྷཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཀཱ་མ་བྷུཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཙི་ཏྟཾ ག་ཧ་པ་ཏིཾ ཨཱ་ཡ་སྨཱ ཀཱ་མ་བྷཱུ ཨེ་ཏ་ད་ཝོ་ཙ –

‘‘ཝུ་ཏྟ་མི་དཾ, ག་ཧ་པ་ཏི –

‘‘ནེ་ལ་ངྒོ སེ་ཏ་པ་ཙྪཱ་དོ, ཨེ་ཀཱ་རོ ཝ་ཏྟ་ཏཱི ར་ཐོ;

ཨ་ནཱི་གྷཾ པ་སྶ ཨཱ་ཡ་ནྟཾ [ཨ་པྤ་ཏྟཾ (སྱཱ. ཀཾ. ཀ.)], ཚི་ནྣ་སོ་ཏཾ ཨ་བ་ནྡྷ་ན’’ནྟི.

‘‘ཨི་མ་སྶ ནུ ཁོ, ག་ཧ་པ་ཏི, སཾ་ཁི་ཏྟེ་ན བྷཱ་སི་ཏ་སྶ ཀ་ཐཾ ཝི་ཏྠཱ་རེ་ན ཨ་ཏྠོ ད་ཊྛ་བྦོ’’ཏི? ‘‘ཀིཾ ནུ ཁོ ཨེ་ཏཾ, བྷ་ནྟེ, བྷ་ག་ཝ་ཏཱ བྷཱ་སི་ཏ’’ནྟི? ‘‘ཨེ་ཝཾ, ག་ཧ་པ་ཏཱི’’ཏི. ‘‘ཏེ་ན ཧི, བྷ་ནྟེ, མུ་ཧུ་ཏྟཾ ཨཱ་ག་མེ་ཧི ཡཱ་ཝ་སྶ ཨ་ཏྠཾ པེ་ཀྑཱ་མཱི’’ཏི. ཨ་ཐ ཁོ ཙི་ཏྟོ ག་ཧ་པ་ཏི མུ་ཧུ་ཏྟཾ ཏུ་ཎྷཱི ཧུ་ཏྭཱ ཨཱ་ཡ་སྨ་ནྟཾ ཀཱ་མ་བྷུཾ ཨེ་ཏ་ད་ཝོ་ཙ –

‘‘‘ནེ་ལ་ངྒ’ནྟི ཁོ, བྷ་ནྟེ, སཱི་ལཱ་ན་མེ་ཏཾ ཨ་དྷི་ཝ་ཙ་ནཾ. ‘སེ་ཏ་པ་ཙྪཱ་དོ’ཏི ཁོ, བྷ་ནྟེ, ཝི་མུ་ཏྟི་ཡཱ ཨེ་ཏཾ ཨ་དྷི་ཝ་ཙ་ནཾ. ‘ཨེ་ཀཱ་རོ’ཏི ཁོ, བྷ་ནྟེ, ས་ཏི་ཡཱ ཨེ་ཏཾ ཨ་དྷི་ཝ་ཙ་ནཾ. ‘ཝ་ཏྟ་ཏཱི’ཏི ཁོ, བྷ་ནྟེ, ཨ་བྷི་ཀྐ་མ་པ་ཊི་ཀྐ་མ་སྶེ་ཏཾ ཨ་དྷི་ཝ་ཙ་ནཾ. ‘ར་ཐོ’ཏི ཁོ, བྷ་ནྟེ, ཨི་མ་སྶེ་ཏཾ ཙཱ་ཏུ་མ་ཧཱ་བྷཱུ་ཏི་ཀ་སྶ ཀཱ་ཡ་སྶ ཨ་དྷི་ཝ་ཙ་ནཾ མཱ་ཏཱ་པེ་ཏྟི་ཀ་ས་མྦྷ་ཝ་སྶ ཨོ་ད་ན་ཀུ་མྨཱ་སཱུ་པ་ཙ་ཡ་སྶ ཨ་ནི་ཙྩུ་ཙྪཱ་ད་ན་པ་རི་མ་དྡ་ན་བྷེ་ད་ན་ཝི་དྡྷཾ་ས་ན་དྷ་མྨ་སྶ. རཱ་གོ ཁོ, བྷ་ནྟེ, ནཱི་གྷོ, དོ་སོ ནཱི་གྷོ, མོ་ཧོ ནཱི་གྷོ. ཏེ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཏ་སྨཱ ཁཱི་ཎཱ་ས་ཝོ བྷི་ཀྑུ ‘ཨ་ནཱི་གྷོ’ཏི ཝུ་ཙྩ་ཏི. ‘ཨཱ་ཡ་ནྟ’ནྟི ཁོ, བྷ་ནྟེ, ཨ་ར་ཧ་ཏོ ཨེ་ཏཾ ཨ་དྷི་ཝ་ཙ་ནཾ. ‘སོ་ཏོ’ཏི ཁོ, བྷ་ནྟེ, ཏ་ཎྷཱ་ཡེ་ཏཾ ཨ་དྷི་ཝ་ཙ་ནཾ. སཱ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཏ་སྨཱ ཁཱི་ཎཱ་ས་ཝོ བྷི་ཀྑུ ‘ཚི་ནྣ་སོ་ཏོ’ཏི ཝུ་ཙྩ་ཏི. རཱ་གོ ཁོ, བྷ་ནྟེ, བ་ནྡྷ་ནཾ, དོ་སོ བ་ནྡྷ་ནཾ, མོ་ཧོ བ་ནྡྷ་ནཾ. ཏེ ཁཱི་ཎཱ་ས་ཝ་སྶ བྷི་ཀྑུ་ནོ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཏ་སྨཱ ཁཱི་ཎཱ་ས་ཝོ བྷི་ཀྑུ ‘ཨ་བ་ནྡྷ་ནོ’ཏི ཝུ་ཙྩ་ཏི. ཨི་ཏི ཁོ, བྷ་ནྟེ, ཡཾ ཏཾ བྷ་ག་ཝ་ཏཱ ཝུ་ཏྟཾ –

‘‘ནེ་ལ་ངྒོ སེ་ཏ་པ་ཙྪཱ་དོ, ཨེ་ཀཱ་རོ ཝ་ཏྟ་ཏཱི ར་ཐོ;

ཨ་ནཱི་གྷཾ པ་སྶ ཨཱ་ཡ་ནྟཾ, ཚི་ནྣ་སོ་ཏཾ ཨ་བ་ནྡྷ་ན’’ནྟི.

‘‘ཨི་མ་སྶ ཁོ, བྷ་ནྟེ, བྷ་ག་ཝ་ཏཱ སཾ་ཁི་ཏྟེ་ན བྷཱ་སི་ཏ་སྶ ཨེ་ཝཾ ཝི་ཏྠཱ་རེ་ན ཨ་ཏྠཾ ཨཱ་ཛཱ་ནཱ་མཱི’’ཏི. ‘‘ལཱ་བྷཱ ཏེ, ག་ཧ་པ་ཏི, སུ་ལ་དྡྷཾ ཏེ, ག་ཧ་པ་ཏི! ཡ་སྶ ཏེ ག་མྦྷཱི་རེ བུ་དྡྷ་ཝ་ཙ་ནེ པ་ཉྙཱ་ཙ་ཀྑུ ཀ་མ་ཏཱི’’ཏི. པ་ཉྩ་མཾ.