༡. སཾ་ཡོ་ཛ་ན་སུ་ཏྟཾ

༣༤༣. ཨེ་ཀཾ ས་མ་ཡཾ ས་མྦ་ཧུ་ལཱ ཐེ་རཱ བྷི་ཀྑཱུ མ་ཙྪི་ཀཱ་ས་ཎྜེ ཝི་ཧ་ར་ནྟི ཨ་མྦཱ་ཊ་ཀ་ཝ་ནེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ་ནཾ ཐེ་རཱ་ནཾ བྷི་ཀྑཱུ་ནཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ནཱ་ནཱ་བྱ་ཉྫ་ནཱ ཨུ་དཱ་ཧུ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི? ཏ་ཏྲེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ ཧོ་ཏི – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙཱ’’ཏི. ཨེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ ཧོ་ཏི – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི.

ཏེ་ན ཁོ པ་ན ས་མ་ཡེ་ན ཙི་ཏྟོ ག་ཧ་པ་ཏི མི་ག་པ་ཐ་ཀཾ ཨ་ནུ་པྤ་ཏྟོ ཧོ་ཏི ཀེ་ན་ཙི་དེ་ཝ ཀ་ར་ཎཱི་ཡེ་ན. ཨ་སྶོ་སི ཁོ ཙི་ཏྟོ ག་ཧ་པ་ཏི ས་མྦ་ཧུ་ལཱ་ནཾ ཀི་ར ཐེ་རཱ་ནཾ བྷི་ཀྑཱུ་ནཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ནཱ་ནཱ་བྱ་ཉྫ་ནཱ ཨུ་དཱ་ཧུ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི? ཏ་ཏྲེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙཱ’’ཏི. ཨེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ ‘སཾ་ཡོ་ཛ་ན’ནྟི ཝཱ, ཨཱ་ཝུ་སོ ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན་ནྟི. ཨ་ཐ ཁོ ཙི་ཏྟོ ག་ཧ་པ་ཏི ཡེ་ན ཐེ་རཱ བྷི་ཀྑཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཐེ་རེ བྷི་ཀྑཱུ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཙི་ཏྟོ ག་ཧ་པ་ཏི ཐེ་རེ བྷི་ཀྑཱུ ཨེ་ཏ་ད་ཝོ་ཙ – ‘‘སུ་ཏཾ མེ་ཏཾ, བྷ་ནྟེ, ས་མྦ་ཧུ་ལཱ་ནཾ ཀི་ར ཐེ་རཱ་ནཾ བྷི་ཀྑཱུ་ནཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ནཱ་ནཱ་བྱ་ཉྫ་ནཱ ཨུ་དཱ་ཧུ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི? ཨེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ – ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙཱ’’ཏི. ཨེ་ཀ་ཙྩེ་ཧི ཐེ་རེ་ཧི བྷི་ཀྑཱུ་ཧི ཨེ་ཝཾ བྱཱ་ཀ་ཏཾ ‘‘‘སཾ་ཡོ་ཛ་ན’ནྟི ཝཱ, ཨཱ་ཝུ་སོ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ཨེ་ཀ་ཏྠཱ བྱ་ཉྫ་ན་མེ་ཝ ནཱ་ན’’ནྟི. ‘‘ཨེ་ཝཾ, ག་ཧ་པ་ཏཱི’’ཏི.

‘‘‘སཾ་ཡོ་ཛ་ན’ནྟི ཝཱ, བྷ་ནྟེ, ‘སཾ་ཡོ་ཛ་ནི་ཡཱ དྷ་མྨཱ’ཏི ཝཱ ཨི་མེ དྷ་མྨཱ ནཱ་ན་ཏྠཱ ཙེ་ཝ ནཱ་ནཱ་བྱ་ཉྫ་ནཱ ཙ. ཏེ་ན ཧི, བྷ་ནྟེ, ཨུ་པ་མཾ ཝོ ཀ་རི་སྶཱ་མི. ཨུ་པ་མཱ་ཡ་པི་དྷེ་ཀ་ཙྩེ ཝི་ཉྙཱུ པུ་རི་སཱ བྷཱ་སི་ཏ་སྶ ཨ་ཏྠཾ ཨཱ་ཛཱ་ན་ནྟི. སེ་ཡྻ་ཐཱ་པི, བྷ་ནྟེ, ཀཱ་ལོ༹ ཙ བ་ལཱི་བ་དྡོ ཨོ་དཱ་ཏོ ཙ བ་ལཱི་བ་དྡོ ཨེ་ཀེ་ན དཱ་མེ་ན ཝཱ ཡོ་ཏྟེ་ན ཝཱ སཾ་ཡུ་ཏྟཱ ཨ་སྶུ. ཡོ ནུ ཁོ ཨེ་ཝཾ ཝ་དེ་ཡྻ – ‘ཀཱ་ལོ༹ བ་ལཱི་བ་དྡོ ཨོ་དཱ་ཏ་སྶ བ་ལཱི་བ་དྡ་སྶ སཾ་ཡོ་ཛ་ནཾ, ཨོ་དཱ་ཏོ བ་ལཱི་བ་དྡོ ཀཱ་ལ༹་སྶ བ་ལཱི་བ་དྡ་སྶ སཾ་ཡོ་ཛ་ན’ནྟི, ས་མྨཱ ནུ ཁོ སོ ཝ་ད་མཱ་ནོ ཝ་དེ་ཡྻཱ’’ཏི? ‘‘ནོ ཧེ་ཏཾ, ག་ཧ་པ་ཏི! ན ཁོ, ག་ཧ་པ་ཏི, ཀཱ་ལོ༹ བ་ལཱི་བ་དྡོ ཨོ་དཱ་ཏ་སྶ བ་ལཱི་བ་དྡ་སྶ སཾ་ཡོ་ཛ་ནཾ, ན་པི ཨོ་དཱ་ཏོ བ་ལཱི་བ་དྡོ ཀཱ་ལ༹་སྶ བ་ལཱི༹་བ་དྡ་སྶ སཾ་ཡོ་ཛ་ནཾ; ཡེ་ན ཁོ ཏེ ཨེ་ཀེ་ན དཱ་མེ་ན ཝཱ ཡོ་ཏྟེ་ན ཝཱ སཾ་ཡུ་ཏྟཱ ཏཾ ཏ་ཏྠ སཾ་ཡོ་ཛ་ན’’ནྟི. ‘‘ཨེ་ཝ་མེ་ཝ ཁོ, བྷ་ནྟེ, ན ཙ་ཀྑུ རཱུ་པཱ་ནཾ སཾ་ཡོ་ཛ་ནཾ, ན རཱུ་པཱ ཙ་ཀྑུ་སྶ སཾ་ཡོ་ཛ་ནཾ; ཡ་ཉྩ ཏ་ཏྠ ཏ་དུ་བྷ་ཡཾ པ་ཊི་ཙྩ ཨུ་པྤ་ཛྫ་ཏི ཚ་ནྡ་རཱ་གོ ཏཾ ཏ་ཏྠ སཾ་ཡོ་ཛ་ནཾ. ན སོ་ཏཾ ས་དྡཱ་ནཾ… ན གྷཱ་ནཾ ག་ནྡྷཱ་ནཾ… ན ཛི་ཝ྄ཧཱ ར་སཱ་ནཾ… ན ཀཱ་ཡོ ཕོ་ཊྛ་བྦཱ་ནཾ སཾ་ཡོ་ཛ་ནཾ, ན ཕོ་ཊྛ་བྦཱ ཀཱ་ཡ་སྶ སཾ་ཡོ་ཛ་ནཾ; ཡ་ཉྩ ཏ་ཏྠ ཏ་དུ་བྷ་ཡཾ པ་ཊི་ཙྩ ཨུ་པྤ་ཛྫ་ཏི ཚ་ནྡ་རཱ་གོ ཏཾ ཏ་ཏྠ སཾ་ཡོ་ཛ་ནཾ. ན མ་ནོ དྷ་མྨཱ་ནཾ སཾ་ཡོ་ཛ་ནཾ, ན དྷ་མྨཱ མ་ན་སྶ སཾ་ཡོ་ཛ་ནཾ; ཡ་ཉྩ ཏ་ཏྠ ཏ་དུ་བྷ་ཡཾ པ་ཊི་ཙྩ ཨུ་པྤ་ཛྫ་ཏི ཚ་ནྡ་རཱ་གོ ཏཾ ཏ་ཏྠ སཾ་ཡོ་ཛ་ན’’ནྟི. ‘‘ལཱ་བྷཱ ཏེ, ག་ཧ་པ་ཏི, སུ་ལ་དྡྷཾ ཏེ, ག་ཧ་པ་ཏི, ཡ་སྶ ཏེ ག་མྦྷཱི་རེ བུ་དྡྷ་ཝ་ཙ་ནེ པ་ཉྙཱ་ཙ་ཀྑུ ཀ་མ་ཏཱི’’ཏི. པ་ཋ་མཾ.