༡. ས་གཱ་ཐཱ་ཝ་གྒོ

༡. ས་མཱ་དྷི་སུ་ཏྟཾ

༢༤༩. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ – ཨི་མཱ ཁོ, བྷི་ཀྑ་ཝེ, ཏི་སྶོ ཝེ་ད་ནཱ་ཏི.

‘‘ས་མཱ་ཧི་ཏོ ས་མྤ་ཛཱ་ནོ, ས་ཏོ བུ་དྡྷ་སྶ སཱ་ཝ་ཀོ;

ཝེ་ད་ནཱ ཙ པ་ཛཱ་ནཱ་ཏི, ཝེ་ད་ནཱ་ན་ཉྩ ས་མྦྷ་ཝཾ.

‘‘ཡ་ཏྠ ཙེ་ཏཱ ནི་རུ་ཛ྄ཛྷ་ནྟི, མ་གྒ་ཉྩ ཁ་ཡ་གཱ་མི་ནཾ;

ཝེ་ད་ནཱ་ནཾ ཁ་ཡཱ བྷི་ཀྑུ, ནི་ཙྪཱ་ཏོ པ་རི་ནི་བྦུ་ཏོ’’ཏི. པ་ཋ་མཾ;

༢. སུ་ཁ་སུ་ཏྟཾ

༢༥༠. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ – ཨི་མཱ ཁོ, བྷི་ཀྑ་ཝེ, ཏི་སྶོ ཝེ་ད་ནཱ་ཏི.

‘‘སུ་ཁཾ ཝཱ ཡ་དི ཝཱ དུ་ཀྑཾ, ཨ་དུ་ཀྑ་མ་སུ་ཁཾ ས་ཧ;

ཨ་ཛ྄ཛྷ་ཏྟ་ཉྩ བ་ཧི་དྡྷཱ ཙ, ཡཾ ཀི་ཉྩི ཨ་ཏྠི ཝེ་དི་ཏཾ.

‘‘ཨེ་ཏཾ དུ་ཀྑ་ནྟི ཉ་ཏྭཱ་ན, མོ་ས་དྷ་མྨཾ པ་ལོ་ཀི་ནཾ;

ཕུ་སྶ ཕུ་སྶ ཝ་ཡཾ པ་སྶཾ, ཨེ་ཝཾ ཏ་ཏྠ ཝི་ར་ཛྫ་ཏཱི’’ཏི. དུ་ཏི་ཡཾ;

༣. པ་ཧཱ་ན་སུ་ཏྟཾ

༢༥༡. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ. སུ་ཁཱ་ཡ, བྷི་ཀྑ་ཝེ, ཝེ་ད་ནཱ་ཡ རཱ་གཱ་ནུ་ས་ཡོ པ་ཧཱ་ཏ་བྦོ, དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ པ་ཧཱ་ཏ་བྦོ, ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ཨ་ཝི་ཛྫཱ་ནུ་ས་ཡོ པ་ཧཱ་ཏ་བྦོ. ཡ་ཏོ ཁོ, བྷི་ཀྑ་ཝེ, བྷི་ཀྑུ་ནོ སུ་ཁཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ པ་ཧཱི་ནོ ཧོ་ཏི, དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ པ་ཧཱི་ནོ ཧོ་ཏི, ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘བྷི་ཀྑུ ནི་ར་ནུ་ས་ཡོ ས་མྨ་དྡ་སོ ཨ་ཙྪེ་ཙྪི [ཨ་ཙྪེ་ཛྫི (བ་ཧཱུ་སུ)] ཏ་ཎྷཾ, ཝི་ཝ་ཏྟ་ཡི [ཝཱ་ཝ་ཏྟ་ཡི (སཱི.)] སཾ་ཡོ་ཛ་ནཾ, ས་མྨཱ མཱ་ནཱ་བྷི་ས་མ་ཡཱ ཨ་ནྟ་མ་ཀཱ་སི དུ་ཀྑ་སྶཱ’’’ཏི.

‘‘སུ་ཁཾ ཝེ་ད་ཡ་མཱ་ན་སྶ [ཝེ་དི་ཡ་མཱ་ན་སྶ (སཱི. པཱི.)], ཝེ་ད་ནཾ ཨ་པྤ་ཛཱ་ན་ཏོ;

སོ རཱ་གཱ་ནུ་ས་ཡོ ཧོ་ཏི, ཨ་ནི་སྶ་ར་ཎ་ད་སྶི་ནོ.

‘‘དུ་ཀྑཾ ཝེ་ད་ཡ་མཱ་ན་སྶ, ཝེ་ད་ནཾ ཨ་པྤ་ཛཱ་ན་ཏོ;

པ་ཊི་གྷཱ་ནུ་ས་ཡོ ཧོ་ཏི, ཨ་ནི་སྶ་ར་ཎ་ད་སྶི་ནོ.

‘‘ཨ་དུ་ཀྑ་མ་སུ་ཁཾ ས་ནྟཾ, བྷཱུ་རི་པ་ཉྙེ་ན དེ་སི་ཏཾ;

ཏ་ཉྩཱ་པི ཨ་བྷི་ན་ནྡ་ཏི, ནེ་ཝ དུ་ཀྑཱ པ་མུ་ཙྩ་ཏི.

‘‘ཡ་ཏོ ཙ བྷི་ཀྑུ ཨཱ་ཏཱ་པཱི, ས་མྤ་ཛ་ཉྙཾ ན རི་ཉྩ་ཏི;

ཏ་ཏོ སོ ཝེ་ད་ནཱ ས་བྦཱ, པ་རི་ཛཱ་ནཱ་ཏི པ་ཎྜི་ཏོ.

‘‘སོ ཝེ་ད་ནཱ པ་རི་ཉྙཱ་ཡ, དི་ཊྛེ དྷ་མྨེ ཨ་ནཱ་ས་ཝོ;

ཀཱ་ཡ་སྶ བྷེ་དཱ དྷ་མྨ་ཊྛོ, ས་ངྑྱཾ ནོ་པེ་ཏི ཝེ་ད་གཱུ’’ཏི. ཏ་ཏི་ཡཾ;

༤. པཱ་ཏཱ་ལ་སུ་ཏྟཾ

༢༥༢. ‘‘ཨ་སྶུ་ཏ་ཝཱ, བྷི་ཀྑ་ཝེ, པུ་ཐུ་ཛྫ་ནོ ཡཾ ཝཱ་ཙཾ བྷཱ་ས་ཏི – ‘ཨ་ཏྠི མ་ཧཱ་ས་མུ་དྡེ པཱ་ཏཱ་ལོ’ཏི. ཏཾ ཁོ པ་ནེ་ཏཾ, བྷི་ཀྑ་ཝེ, ཨ་སྶུ་ཏ་ཝཱ པུ་ཐུ་ཛྫ་ནོ ཨ་ས་ནྟཾ ཨ་ཝི་ཛྫ་མཱ་ནཾ ཨེ་ཝཾ ཝཱ་ཙཾ བྷཱ་ས་ཏི – ‘ཨ་ཏྠི མ་ཧཱ་ས་མུ་དྡེ པཱ་ཏཱ་ལོ’ཏི. སཱ་རཱི་རི་ཀཱ་ནཾ ཁོ ཨེ་ཏཾ, བྷི་ཀྑ་ཝེ, དུ་ཀྑཱ་ནཾ ཝེ་ད་ནཱ་ནཾ ཨ་དྷི་ཝ་ཙ་ནཾ ཡ་དི་དཾ ‘པཱ་ཏཱ་ལོ’ཏི. ཨ་སྶུ་ཏ་ཝཱ, བྷི་ཀྑ་ཝེ, པུ་ཐུ་ཛྫ་ནོ སཱ་རཱི་རི་ཀཱ་ཡ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ སོ་ཙ་ཏི ཀི་ལ་མ་ཏི པ་རི་དེ་ཝ་ཏི ཨུ་ར་ཏྟཱ་ལི༹ཾ ཀ་ནྡ་ཏི ས་མྨོ་ཧཾ ཨཱ་པ་ཛྫ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘ཨ་སྶུ་ཏ་ཝཱ པུ་ཐུ་ཛྫ་ནོ པཱ་ཏཱ་ལེ ན པ་ཙྩུ་ཊྛཱ་སི, གཱ་དྷ་ཉྩ ནཱ་ཛ྄ཛྷ་གཱ’. སུ་ཏ་ཝཱ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀོ སཱ་རཱི་རི་ཀཱ་ཡ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ནེ་ཝ སོ་ཙ་ཏི, ན ཀི་ལ་མ་ཏི, ན པ་རི་དེ་ཝ་ཏི, ན ཨུ་ར་ཏྟཱ་ལི༹ཾ ཀ་ནྡ་ཏི, ན ས་མྨོ་ཧཾ ཨཱ་པ་ཛྫ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘སུ་ཏ་ཝཱ ཨ་རི་ཡ་སཱ་ཝ་ཀོ པཱ་ཏཱ་ལེ པ་ཙྩུ་ཊྛཱ་སི, གཱ་དྷ་ཉྩ ཨ་ཛ྄ཛྷ་གཱ’’’ཏི.

‘‘ཡོ ཨེ་ཏཱ ནཱ་དྷི་ཝཱ་སེ་ཏི, ཨུ་པྤ་ནྣཱ ཝེ་ད་ནཱ དུ་ཁཱ;

སཱ་རཱི་རི་ཀཱ པཱ་ཎ་ཧ་རཱ, ཡཱ་ཧི ཕུ་ཊྛོ པ་ཝེ་དྷ་ཏི.

‘‘ཨ་ཀྐ་ནྡ་ཏི པ་རོ་ད་ཏི, དུ་བྦ་ལོ ཨ་པྤ་ཐཱ་མ་ཀོ;

ན སོ པཱ་ཏཱ་ལེ པ་ཙྩུ་ཊྛཱ་སི, ཨ་ཐོ གཱ་དྷ་མྤི ནཱ་ཛ྄ཛྷ་གཱ.

‘‘ཡོ ཙེ་ཏཱ ཨ་དྷི་ཝཱ་སེ་ཏི, ཨུ་པྤ་ནྣཱ ཝེ་ད་ནཱ དུ་ཁཱ;

སཱ་རཱི་རི་ཀཱ པཱ་ཎ་ཧ་རཱ, ཡཱ་ཧི ཕུ་ཊྛོ ན ཝེ་དྷ་ཏི;

ས ཝེ པཱ་ཏཱ་ལེ པ་ཙྩུ་ཊྛཱ་སི, ཨ་ཐོ གཱ་དྷ་མྤི ཨ་ཛ྄ཛྷ་གཱ’’ཏི. ཙ་ཏུ་ཏྠཾ;

༥. ད་ཊྛ་བྦ་སུ་ཏྟཾ

༢༥༣. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ. སུ་ཁཱ, བྷི་ཀྑ་ཝེ, ཝེ་ད་ནཱ དུ་ཀྑ་ཏོ ད་ཊྛ་བྦཱ, དུ་ཀྑཱ ཝེ་ད་ནཱ ས་ལླ་ཏོ ད་ཊྛ་བྦཱ, ཨ་དུ་ཀྑ་མ་སུ་ཁཱ ཝེ་ད་ནཱ ཨ་ནི་ཙྩ་ཏོ ད་ཊྛ་བྦཱ. ཡ་ཏོ ཁོ, བྷི་ཀྑ་ཝེ, བྷི་ཀྑུ་ནོ སུ་ཁཱ ཝེ་ད་ནཱ དུ་ཀྑ་ཏོ དི་ཊྛཱ ཧོ་ཏི, དུ་ཀྑཱ ཝེ་ད་ནཱ ས་ལླ་ཏོ དི་ཊྛཱ ཧོ་ཏི, ཨ་དུ་ཀྑ་མ་སུ་ཁཱ ཝེ་ད་ནཱ ཨ་ནི་ཙྩ་ཏོ དི་ཊྛཱ ཧོ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘བྷི་ཀྑུ ས་མྨ་དྡ་སོ ཨ་ཙྪེ་ཙྪི ཏ་ཎྷཾ, ཝི་ཝ་ཏྟ་ཡི སཾ་ཡོ་ཛ་ནཾ, ས་མྨཱ མཱ་ནཱ་བྷི་ས་མ་ཡཱ ཨ་ནྟ་མ་ཀཱ་སི དུ་ཀྑ་སྶཱ’’’ཏི.

‘‘ཡོ སུ་ཁཾ དུ་ཀྑ་ཏོ ཨ་དྡ, དུ་ཀྑ་མ་དྡ་ཀྑི ས་ལླ་ཏོ;

ཨ་དུ་ཀྑ་མ་སུ་ཁཾ ས་ནྟཾ, ཨ་དྡ་ཀྑི ནཾ ཨ་ནི་ཙྩ་ཏོ.

‘‘ས ཝེ ས་མྨ་དྡ་སོ བྷི་ཀྑུ, པ་རི་ཛཱ་ནཱ་ཏི ཝེ་ད་ནཱ;

སོ ཝེ་ད་ནཱ པ་རི་ཉྙཱ་ཡ, དི་ཊྛེ དྷ་མྨེ ཨ་ནཱ་ས་ཝོ;

ཀཱ་ཡ་སྶ བྷེ་དཱ དྷ་མྨ་ཊྛོ, ས་ངྑྱཾ ནོ་པེ་ཏི ཝེ་ད་གཱུ’’ཏི. པ་ཉྩ་མཾ;

༦. ས་ལླ་སུ་ཏྟཾ

༢༥༤. ‘‘ཨ་སྶུ་ཏ་ཝཱ, བྷི་ཀྑ་ཝེ, པུ་ཐུ་ཛྫ་ནོ སུ་ཁ་མྤི ཝེ་ད་ནཾ ཝེ་ད་ཡ་ཏི [ཝེ་དི་ཡ་ཏི (སཱི. པཱི.)], དུ་ཀྑ་མྤི ཝེ་ད་ནཾ ཝེ་ད་ཡ་ཏི, ཨ་དུ་ཀྑ་མ་སུ་ཁ་མྤི ཝེ་ད་ནཾ ཝེ་ད་ཡ་ཏི. སུ་ཏ་ཝཱ, བྷི་ཀྑ་ཝེ, ཨ་རི་ཡ་སཱ་ཝ་ཀོ སུ་ཁ་མྤི ཝེ་ད་ནཾ ཝེ་ད་ཡ་ཏི, དུ་ཀྑ་མྤི ཝེ་ད་ནཾ ཝེ་ད་ཡ་ཏི, ཨ་དུ་ཀྑ་མ་སུ་ཁ་མྤི ཝེ་ད་ནཾ ཝེ་ད་ཡ་ཏི. ཏ་ཏྲ, བྷི་ཀྑ་ཝེ, ཀོ ཝི་སེ་སོ ཀོ ཨ་དྷི་པྤ་ཡཱ་སོ [ཨ་དྷི་པྤཱ་ཡོ (སཱི. ཀ.), ཨ་དྷི་པྤཱ་ཡ་སོ (སྱཱ. ཀཾ.), ཨ་དྷི་པྤཱ་ཡོ་སོ (པཱི.)] ཀིཾ ནཱ་ནཱ་ཀ་ར་ཎཾ སུ་ཏ་ཝ་ཏོ ཨ་རི་ཡ་སཱ་ཝ་ཀ་སྶ ཨ་སྶུ་ཏ་ཝ་ཏཱ པུ་ཐུ་ཛྫ་ནེ་ནཱ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ཨ་སྶུ་ཏ་ཝཱ. བྷི་ཀྑ་ཝེ, པུ་ཐུ་ཛྫ་ནོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ སོ་ཙ་ཏི ཀི་ལ་མ་ཏི པ་རི་དེ་ཝ་ཏི ཨུ་ར་ཏྟཱ་ལི༹ཾ ཀ་ནྡ་ཏི ས་མྨོ་ཧཾ ཨཱ་པ་ཛྫ་ཏི. སོ དྭེ ཝེ་ད་ནཱ ཝེ་ད་ཡ་ཏི – ཀཱ་ཡི་ཀ་ཉྩ, ཙེ་ཏ་སི་ཀ་ཉྩ. སེ་ཡྻ་ཐཱ་པི, བྷི་ཀྑ་ཝེ, པུ་རི་སཾ ས་ལླེ་ན ཝི་ཛ྄ཛྷེ་ཡྻ [ས་ལླེ་ན ཨ་ནུ་ཝི་ཛ྄ཛྷེ་ཡྻུཾ (སཱི. སྱཱ. ཀཾ. པཱི.)]. ཏ་མེ་ནཾ དུ་ཏི་ཡེ་ན ས་ལླེ་ན ཨ་ནུ་ཝེ་དྷཾ ཝི་ཛ྄ཛྷེ་ཡྻ [ས་ལླེ་ན ཨ་ནུ་ཝི་ཛ྄ཛྷེ་ཡྻུཾ (སཱི.), ས་ལླེ་ན ཨ་ནུ་ཝེ་དྷཾ ཝི་ཛ྄ཛྷེ་ཡྻུཾ (སྱཱ. ཀཾ.), ས་ལླེ་ན ཝི་ཛ྄ཛྷེ་ཡྻུཾ (པཱི.)]. ཨེ་ཝ་ཉྷི སོ, བྷི་ཀྑ་ཝེ, པུ་རི་སོ དྭི་ས་ལླེ་ན ཝེ་ད་ནཾ ཝེ་ད་ཡ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཨ་སྶུ་ཏ་ཝཱ པུ་ཐུ་ཛྫ་ནོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ སོ་ཙ་ཏི ཀི་ལ་མ་ཏི པ་རི་དེ་ཝ་ཏི ཨུ་ར་ཏྟཱ་ལི༹ཾ ཀ་ནྡ་ཏི ས་མྨོ་ཧཾ ཨཱ་པ་ཛྫ་ཏི. སོ དྭེ ཝེ་ད་ནཱ ཝེ་ད་ཡ་ཏི – ཀཱ་ཡི་ཀ་ཉྩ, ཙེ་ཏ་སི་ཀ་ཉྩ. ཏ་སྶཱ་ཡེ་ཝ ཁོ པ་ན དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ པ་ཊི་གྷ་ཝཱ ཧོ་ཏི. ཏ་མེ་ནཾ དུ་ཀྑཱ་ཡ ཝེ་ད་ནཱ་ཡ པ་ཊི་གྷ་ཝ་ནྟཾ, ཡོ དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ, སོ ཨ་ནུ་སེ་ཏི. སོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ཀཱ་མ་སུ་ཁཾ ཨ་བྷི་ན་ནྡ་ཏི. ཏཾ ཀི་སྶ ཧེ་ཏུ? ན ཧི སོ, བྷི་ཀྑ་ཝེ, པ་ཛཱ་ནཱ་ཏི ཨ་སྶུ་ཏ་ཝཱ པུ་ཐུ་ཛྫ་ནོ ཨ་ཉྙ་ཏྲ ཀཱ་མ་སུ་ཁཱ དུ་ཀྑཱ་ཡ ཝེ་ད་ནཱ་ཡ ནི་སྶ་ར་ཎཾ, ཏ་སྶ ཀཱ་མ་སུ་ཁ་ཉྩ ཨ་བྷི་ན་ནྡ་ཏོ, ཡོ སུ་ཁཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ, སོ ཨ་ནུ་སེ་ཏི. སོ ཏཱ་སཾ ཝེ་ད་ནཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི. ཏ་སྶ ཏཱ་སཾ ཝེ་ད་ནཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ ཨ་པྤ་ཛཱ་ན་ཏོ, ཡོ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ཨ་ཝི་ཛྫཱ་ནུ་ས་ཡོ, སོ ཨ་ནུ་སེ་ཏི. སོ སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ས་ཉྙུ་ཏྟོ ནཾ ཝེ་ད་ཡ་ཏི. དུ་ཀྑ་ཉྩེ ཝེ་ད་ནཾ ཝེ་ད་ཡ་ཏི, ས་ཉྙུ་ཏྟོ ནཾ ཝེ་ད་ཡ་ཏི. ཨ་དུ་ཀྑ་མ་སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ས་ཉྙུ་ཏྟོ ནཾ ཝེ་ད་ཡ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘ཨ་སྶུ་ཏ་ཝཱ པུ་ཐུ་ཛྫ་ནོ ས་ཉྙུ་ཏྟོ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ས་ཉྙུ་ཏྟོ དུ་ཀྑ་སྨཱ’ཏི ཝ་དཱ་མི.

‘‘སུ་ཏ་ཝཱ ཙ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ན སོ་ཙ་ཏི, ན ཀི་ལ་མ་ཏི, ན པ་རི་དེ་ཝ་ཏི, ན ཨུ་ར་ཏྟཱ་ལི༹ཾ ཀ་ནྡ་ཏི, ན ས་མྨོ་ཧཾ ཨཱ་པ་ཛྫ་ཏི. སོ ཨེ་ཀཾ ཝེ་ད་ནཾ ཝེ་ད་ཡ་ཏི – ཀཱ་ཡི་ཀཾ, ན ཙེ་ཏ་སི་ཀཾ.

‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སཾ ས་ལླེ་ན ཝི་ཛ྄ཛྷེ་ཡྻ. ཏ་མེ་ནཾ དུ་ཏི་ཡེ་ན ས་ལླེ་ན ཨ་ནུ་ཝེ་དྷཾ ན ཝི་ཛ྄ཛྷེ་ཡྻ. ཨེ་ཝ་ཉྷི སོ, བྷི་ཀྑ་ཝེ, པུ་རི་སོ ཨེ་ཀ་ས་ལླེ་ན ཝེ་ད་ནཾ ཝེ་ད་ཡ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ན སོ་ཙ་ཏི, ན ཀི་ལ་མ་ཏི, ན པ་རི་དེ་ཝ་ཏི, ན ཨུ་ར་ཏྟཱ་ལི༹ཾ ཀ་ནྡ་ཏི, ན ས་མྨོ་ཧཾ ཨཱ་པ་ཛྫ་ཏི. སོ ཨེ་ཀཾ ཝེ་ད་ནཾ ཝེ་ད་ཡ་ཏི – ཀཱ་ཡི་ཀཾ, ན ཙེ་ཏ་སི་ཀཾ. ཏ་སྶཱ་ཡེ་ཝ ཁོ པ་ན དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ པ་ཊི་གྷ་ཝཱ ན ཧོ་ཏི. ཏ་མེ་ནཾ དུ་ཀྑཱ་ཡ ཝེ་ད་ནཱ་ཡ ཨ་པྤ་ཊི་གྷ་ཝ་ནྟཾ, ཡོ དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ, སོ ནཱ་ནུ་སེ་ཏི. སོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ཀཱ་མ་སུ་ཁཾ ནཱ་བྷི་ན་ནྡ་ཏི. ཏཾ ཀི་སྶ ཧེ་ཏུ? པ་ཛཱ་ནཱ་ཏི ཧི སོ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ ཨ་ཉྙ་ཏྲ ཀཱ་མ་སུ་ཁཱ དུ་ཀྑཱ་ཡ ཝེ་ད་ནཱ་ཡ ནི་སྶ་ར་ཎཾ. ཏ་སྶ ཀཱ་མ་སུ་ཁཾ ནཱ་བྷི་ན་ནྡ་ཏོ ཡོ སུ་ཁཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ, སོ ནཱ་ནུ་སེ་ཏི. སོ ཏཱ་སཾ ཝེ་ད་ནཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝཾ ཙ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ པ་ཛཱ་ནཱ་ཏི. ཏ་སྶ ཏཱ་སཾ ཝེ་ད་ནཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ པ་ཛཱ་ན་ཏོ, ཡོ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ཨ་ཝི་ཛྫཱ་ནུ་ས་ཡོ, སོ ནཱ་ནུ་སེ་ཏི. སོ སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི. དུ་ཀྑ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི. ཨ་དུ་ཀྑ་མ་སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘སུ་ཏ་ཝཱ ཨ་རི་ཡ་སཱ་ཝ་ཀོ ཝི་ས་ཉྙུ་ཏྟོ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ཝི་ས་ཉྙུ་ཏྟོ དུ་ཀྑ་སྨཱ’ཏི ཝ་དཱ་མི. ཨ་ཡཾ ཁོ, བྷི་ཀྑ་ཝེ, ཝི་སེ་སོ, ཨ་ཡཾ ཨ་དྷི་པྤ་ཡཱ་སོ, ཨི་དཾ ནཱ་ནཱ་ཀ་ར་ཎཾ སུ་ཏ་ཝ་ཏོ ཨ་རི་ཡ་སཱ་ཝ་ཀ་སྶ ཨ་སྶུ་ཏ་ཝ་ཏཱ པུ་ཐུ་ཛྫ་ནེ་ནཱ’’ཏི.

‘‘ན ཝེ་ད་ནཾ ཝེ་ད་ཡ་ཏི ས་པ་ཉྙོ,

སུ་ཁ་མྤི དུ་ཀྑ་མྤི བ་ཧུ་སྶུ་ཏོ་པི;

ཨ་ཡ་ཉྩ དྷཱི་ར་སྶ པུ་ཐུ་ཛྫ་ནེ་ན,

མ་ཧཱ [ཨ་ཡཾ (སྱཱ. ཀཾ. ཀ.)] ཝི་སེ་སོ ཀུ་ས་ལ་སྶ ཧོ་ཏི.

‘‘ས་ངྑཱ་ཏ་དྷ་མྨ་སྶ བ་ཧུ་སྶུ་ཏ་སྶ,

ཝི་པ་སྶ་ཏོ [ས་མྤ་སྶ་ཏོ (སཱི. པཱི.)] ལོ་ཀ་མི་མཾ པ་ར་ཉྩ;

ཨི་ཊྛ་སྶ དྷ་མྨཱ ན མ་ཐེ་ནྟི ཙི་ཏྟཾ,

ཨ་ནི་ཊྛ་ཏོ ནོ པ་ཊི་གྷཱ་ཏ་མེ་ཏི.

‘‘ཏ་སྶཱ་ནུ་རོ་དྷཱ ཨ་ཐ་ཝཱ ཝི་རོ་དྷཱ,

ཝི་དྷཱུ་པི་ཏཱ ཨ་ཏྠ་ག་ཏཱ ན ས་ནྟི;

པ་ད་ཉྩ ཉ་ཏྭཱ ཝི་ར་ཛཾ ཨ་སོ་ཀཾ,

ས་མྨཱ པ་ཛཱ་ནཱ་ཏི བྷ་ཝ་སྶ པཱ་ར་གཱུ’’ཏི. ཚ་ཊྛཾ;

༧. པ་ཋ་མ་གེ་ལ་ཉྙ་སུ་ཏྟཾ

༢༥༥. ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཨ་ཐ ཁོ བྷ་ག་ཝཱ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ན གི་ལཱ་ན་སཱ་ལཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ནི་ས་ཛྫ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི –

‘‘ས་ཏོ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཀཱ་ལཾ ཨཱ་ག་མེ་ཡྻ. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ས་ཏོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ ཝེ་ད་ནཱ་ནུ་པ་སྶཱི ཝི་ཧ་ར་ཏི…པེ… ཙི་ཏྟེ ཙི་ཏྟཱ་ནུ་པ་སྶཱི ཝི་ཧ་ར་ཏི…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ས་ཏོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཨ་བྷི་ཀྐ་ནྟེ པ་ཊི་ཀྐ་ནྟེ ས་མྤ་ཛཱ་ན་ཀཱ་རཱི ཧོ་ཏི, ཨཱ་ལོ་ཀི་ཏེ ཝི་ལོ་ཀི་ཏེ ས་མྤ་ཛཱ་ན་ཀཱ་རཱི ཧོ་ཏི, ས་མི་ཉྫི་ཏེ པ་སཱ་རི་ཏེ ས་མྤ་ཛཱ་ན་ཀཱ་རཱི ཧོ་ཏི, ས་ངྒྷཱ་ཊི་པ་ཏྟ་ཙཱི་ཝ་ར་དྷཱ་ར་ཎེ ས་མྤ་ཛཱ་ན་ཀཱ་རཱི ཧོ་ཏི, ཨ་སི་ཏེ པཱི་ཏེ ཁཱ་ཡི་ཏེ སཱ་ཡི་ཏེ ས་མྤ་ཛཱ་ན་ཀཱ་རཱི ཧོ་ཏི, ཨུ་ཙྩཱ་ར་པ་སྶཱ་ཝ་ཀ་མྨེ ས་མྤ་ཛཱ་ན་ཀཱ་རཱི ཧོ་ཏི, ག་ཏེ ཋི་ཏེ ནི་སི་ནྣེ སུ་ཏྟེ ཛཱ་ག་རི་ཏེ བྷཱ་སི་ཏེ ཏུ་ཎྷཱི་བྷཱ་ཝེ ས་མྤ་ཛཱ་ན་ཀཱ་རཱི ཧོ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ས་མྤ་ཛཱ་ན་ཀཱ་རཱི ཧོ་ཏི. ས་ཏོ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཀཱ་ལཾ ཨཱ་ག་མེ་ཡྻ. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱི.

‘‘ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ ཨེ་ཝཾ ས་ཏ་སྶ ས་མྤ་ཛཱ་ན་སྶ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ ཨུ་པྤ་ཛྫ་ཏི སུ་ཁཱ ཝེ་ད་ནཱ, སོ ཨེ་ཝཾ པ་ཛཱ་ནཱ་ཏི – ‘ཨུ་པྤ་ནྣཱ ཁོ མྱཱ་ཡཾ སུ་ཁཱ ཝེ་ད་ནཱ. སཱ ཙ ཁོ པ་ཊི་ཙྩ, ནོ ཨ་པྤ་ཊི་ཙྩ. ཀིཾ པ་ཊི་ཙྩ? ཨི་མ་མེ་ཝ ཀཱ་ཡཾ པ་ཊི་ཙྩ. ཨ་ཡཾ ཁོ པ་ན ཀཱ་ཡོ ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ. ཨ་ནི་ཙྩཾ ཁོ པ་ན ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཀཱ་ཡཾ པ་ཊི་ཙྩ ཨུ་པྤ་ནྣཱ སུ་ཁཱ ཝེ་ད་ནཱ ཀུ་ཏོ ནི་ཙྩཱ བྷ་ཝི་སྶ་ཏཱི’ཏི! སོ ཀཱ་ཡེ ཙ སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཝ་ཡཱ་ནུ་པ་སྶཱི ཝི་ཧ་ར་ཏི, ཝི་རཱ་གཱ་ནུ་པ་སྶཱི ཝི་ཧ་ར་ཏི, ནི་རོ་དྷཱ་ནུ་པ་སྶཱི ཝི་ཧ་ར་ཏི, པ་ཊི་ནི་སྶ་གྒཱ་ནུ་པ་སྶཱི ཝི་ཧ་ར་ཏི. ཏ་སྶ ཀཱ་ཡེ ཙ སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶི་ནོ ཝི་ཧ་ར་ཏོ, ཝ་ཡཱ་ནུ་པ་སྶི་ནོ ཝི་ཧ་ར་ཏོ, ཝི་རཱ་གཱ་ནུ་པ་སྶི་ནོ ཝི་ཧ་ར་ཏོ, ནི་རོ་དྷཱ་ནུ་པ་སྶི་ནོ ཝི་ཧ་ར་ཏོ, པ་ཊི་ནི་སྶ་གྒཱ་ནུ་པ་སྶི་ནོ ཝི་ཧ་ར་ཏོ, ཡོ ཀཱ་ཡེ ཙ སུ་ཁཱ་ཡ ཙ ཝེ་ད་ནཱ་ཡ རཱ་གཱ་ནུ་ས་ཡོ, སོ པ་ཧཱི་ཡ་ཏི.

‘‘ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ ཨེ་ཝཾ ས་ཏ་སྶ ས་མྤ་ཛཱ་ན་སྶ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ ཨུ་པྤ་ཛྫ་ཏི དུ་ཀྑཱ ཝེ་ད་ནཱ. སོ ཨེ་ཝཾ པ་ཛཱ་ནཱ་ཏི – ‘ཨུ་པྤ་ནྣཱ ཁོ མྱཱ་ཡཾ དུ་ཀྑཱ ཝེ་ད་ནཱ. སཱ ཙ ཁོ པ་ཊི་ཙྩ, ནོ ཨ་པྤ་ཊི་ཙྩ. ཀིཾ པ་ཊི་ཙྩ? ཨི་མ་མེ་ཝ ཀཱ་ཡཾ པ་ཊི་ཙྩ. ཨ་ཡཾ ཁོ པ་ན ཀཱ་ཡོ ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ. ཨ་ནི་ཙྩཾ ཁོ པ་ན ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཀཱ་ཡཾ པ་ཊི་ཙྩ ཨུ་པྤ་ནྣཱ དུ་ཀྑཱ ཝེ་ད་ནཱ ཀུ་ཏོ ནི་ཙྩཱ བྷ་ཝི་སྶ་ཏཱི’ཏི! སོ ཀཱ་ཡེ ཙ དུ་ཀྑཱ་ཡ ཝེ་ད་ནཱ་ཡ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཝ་ཡཱ་ནུ་པ་སྶཱི ཝི་ཧ་ར་ཏི, ཝི་རཱ་གཱ་ནུ་པ་སྶཱི ཝི་ཧ་ར་ཏི, ནི་རོ་དྷཱ་ནུ་པ་སྶཱི ཝི་ཧ་ར་ཏི, པ་ཊི་ནི་སྶ་གྒཱ་ནུ་པ་སྶཱི ཝི་ཧ་ར་ཏི. ཏ་སྶ ཀཱ་ཡེ ཙ དུ་ཀྑཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶི་ནོ ཝི་ཧ་ར་ཏོ…པེ… པ་ཊི་ནི་སྶ་གྒཱ་ནུ་པ་སྶི་ནོ ཝི་ཧ་ར་ཏོ, ཡོ ཀཱ་ཡེ ཙ དུ་ཀྑཱ་ཡ ཙ ཝེ་ད་ནཱ་ཡ པ་ཊི་གྷཱ་ནུ་ས་ཡོ, སོ པ་ཧཱི་ཡ་ཏི.

‘‘ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ ཨེ་ཝཾ ས་ཏ་སྶ ས་མྤ་ཛཱ་ན་སྶ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ ཨུ་པྤ་ཛྫ་ཏི ཨ་དུ་ཀྑ་མ་སུ་ཁཱ ཝེ་ད་ནཱ, སོ ཨེ་ཝཾ པ་ཛཱ་ནཱ་ཏི – ‘ཨུ་པྤ་ནྣཱ ཁོ མྱཱ་ཡཾ ཨ་དུ་ཀྑ་མ་སུ་ཁཱ ཝེ་ད་ནཱ. སཱ ཙ ཁོ པ་ཊི་ཙྩ, ནོ ཨ་པྤ་ཊི་ཙྩ. ཀིཾ པ་ཊི་ཙྩ? ཨི་མ་མེ་ཝ ཀཱ་ཡཾ པ་ཊི་ཙྩ. ཨ་ཡཾ ཁོ པ་ན ཀཱ་ཡོ ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ. ཨ་ནི་ཙྩཾ ཁོ པ་ན ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཀཱ་ཡཾ པ་ཊི་ཙྩ ཨུ་པྤ་ནྣཱ ཨ་དུ་ཀྑ་མ་སུ་ཁཱ ཝེ་ད་ནཱ ཀུ་ཏོ ནི་ཙྩཱ བྷ་ཝི་སྶ་ཏཱི’ཏི! སོ ཀཱ་ཡེ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཝ་ཡཱ་ནུ་པ་སྶཱི ཝི་ཧ་ར་ཏི, ཝི་རཱ་གཱ་ནུ་པ་སྶཱི ཝི་ཧ་ར་ཏི, ནི་རོ་དྷཱ་ནུ་པ་སྶཱི ཝི་ཧ་ར་ཏི, པ་ཊི་ནི་སྶ་གྒཱ་ནུ་པ་སྶཱི ཝི་ཧ་ར་ཏི. ཏ་སྶ ཀཱ་ཡེ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶི་ནོ ཝི་ཧ་ར་ཏོ…པེ… པ་ཊི་ནི་སྶ་གྒཱ་ནུ་པ་སྶི་ནོ ཝི་ཧ་ར་ཏོ, ཡོ ཀཱ་ཡེ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཡ ཨ་ཝི་ཛྫཱ་ནུ་ས་ཡོ, སོ པ་ཧཱི་ཡ་ཏི.

‘‘སོ སུ་ཁ་ཉྩེ ཝེ་ད་ནཾ ཝེ་ད་ཡ་ཏི, སཱ ཨ་ནི་ཙྩཱ་ཏི པ་ཛཱ་ནཱ་ཏི, ཨ་ན་ཛ྄ཛྷོ་སི་ཏཱ་ཏི པ་ཛཱ་ནཱ་ཏི, ཨ་ན་བྷི་ན་ནྡི་ཏཱ་ཏི པ་ཛཱ་ནཱ་ཏི; དུ་ཀྑ་ཉྩེ ཝེ་ད་ནཾ ཝེ་ད་ཡ་ཏི, སཱ ཨ་ནི་ཙྩཱ་ཏི པ་ཛཱ་ནཱ་ཏི, ཨ་ན་ཛ྄ཛྷོ་སི་ཏཱ་ཏི པ་ཛཱ་ནཱ་ཏི, ཨ་ན་བྷི་ན་ནྡི་ཏཱ་ཏི པ་ཛཱ་ནཱ་ཏི; ཨ་དུ་ཀྑ་མ་སུ་ཁ་ཉྩེ ཝེ་ད་ནཾ ཝེ་ད་ཡ་ཏི, སཱ ཨ་ནི་ཙྩཱ་ཏི པ་ཛཱ་ནཱ་ཏི, ཨ་ན་ཛ྄ཛྷོ་སི་ཏཱ་ཏི པ་ཛཱ་ནཱ་ཏི, ཨ་ན་བྷི་ན་ནྡི་ཏཱ་ཏི པ་ཛཱ་ནཱ་ཏི. སོ སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི; དུ་ཀྑ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི; ཨ་དུ་ཀྑ་མ་སུ་ཁ་ཉྩེ ཝེ་ད་ནཾ ཝེ་ད་ཡ་ཏི, ཝི་ས་ཉྙུ་ཏྟོ ནཾ ཝེ་ད་ཡ་ཏི. སོ ཀཱ་ཡ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡ་མཱ་ནོ ‘ཀཱ་ཡ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡཱ་མཱི’ཏི པ་ཛཱ་ནཱ་ཏི, ཛཱི་ཝི་ཏ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡ་མཱ་ནོ ‘ཛཱི་ཝི་ཏ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡཱ་མཱི’ཏི པ་ཛཱ་ནཱ་ཏི. ‘ཀཱ་ཡ་སྶ བྷེ་དཱ ཨུ་དྡྷཾ ཛཱི་ཝི་ཏ་པ་རི་ཡཱ་དཱ་ནཱ ཨི་དྷེ་ཝ ས་བྦ་ཝེ་ད་ཡི་ཏཱ་ནི ཨ་ན་བྷི་ན་ནྡི་ཏཱ་ནི སཱི་ཏཱི་བྷ་ཝི་སྶ་ནྟཱི’ཏི [སཱི་ཏི་བྷ་ཝི་སྶ་ནྟཱི་ཏི (སཱི. པཱི. ཀ.)] པ་ཛཱ་ནཱ་ཏི.

‘‘སེ་ཡྻ་ཐཱ་པི, བྷི་ཀྑ་ཝེ, ཏེ་ལ་ཉྩ པ་ཊི་ཙྩ ཝ་ཊྚི་ཉྩ པ་ཊི་ཙྩ ཏེ་ལ་པྤ་དཱི་པོ ཛྷཱ་ཡེ་ཡྻ, ཏ་སྶེ་ཝ ཏེ་ལ་སྶ ཙ ཝ་ཊྚི་ཡཱ ཙ པ་རི་ཡཱ་དཱ་ནཱ ཨ་ནཱ་ཧཱ་རོ ནི་བྦཱ་ཡེ་ཡྻ; ཨེ་ཝ་མེ་ཝ ཁོ, བྷི་ཀྑ་ཝེ, བྷི་ཀྑུ ཀཱ་ཡ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡ་མཱ་ནོ ‘ཀཱ་ཡ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡཱ་མཱི’ཏི པ་ཛཱ་ནཱ་ཏི. ཛཱི་ཝི་ཏ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡ་མཱ་ནོ ‘ཛཱི་ཝི་ཏ་པ་རི་ཡ་ནྟི་ཀཾ ཝེ་ད་ནཾ ཝེ་ད་ཡཱ་མཱི’ཏི པ་ཛཱ་ནཱ་ཏི. ‘ཀཱ་ཡ་སྶ བྷེ་དཱ ཨུ་དྡྷཾ ཛཱི་ཝི་ཏ་པ་རི་ཡཱ་དཱ་ནཱ ཨི་དྷེ་ཝ ས་བྦ་ཝེ་ད་ཡི་ཏཱ་ནི ཨ་ན་བྷི་ན་ནྡི་ཏཱ་ནི སཱི་ཏཱི་བྷ་ཝི་སྶ་ནྟཱི’ཏི པ་ཛཱ་ནཱ་ཏཱི’’ཏི. ས་ཏྟ་མཾ.

༨. དུ་ཏི་ཡ་གེ་ལ་ཉྙ་སུ་ཏྟཾ

༢༥༦. ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཨ་ཐ ཁོ བྷ་ག་ཝཱ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ན གི་ལཱ་ན་སཱ་ལཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ནི་ས་ཛྫ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི –

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ས་ཏོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ ཝེ་ད་ནཱ་ནུ་པ་སྶཱི ཝི་ཧ་ར་ཏི… ཙི་ཏྟེ ཙི་ཏྟཱ་ནུ་པ་སྶཱི ཝི་ཧ་ར་ཏི… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ས་ཏོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཨ་བྷི་ཀྐ་ནྟེ པ་ཊི་ཀྐ་ནྟེ ས་མྤ་ཛཱ་ན་ཀཱ་རཱི ཧོ་ཏི…པེ… བྷཱ་སི་ཏེ ཏུ་ཎྷཱི་བྷཱ་ཝེ ས་མྤ་ཛཱ་ན་ཀཱ་རཱི ཧོ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཧོ་ཏི. ས་ཏོ, བྷི་ཀྑ་ཝེ, བྷི་ཀྑུ ས་མྤ་ཛཱ་ནོ ཀཱ་ལཾ ཨཱ་ག་མེ་ཡྻ. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱི.

‘‘ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ ཨེ་ཝཾ ས་ཏ་སྶ ས་མྤ་ཛཱ་ན་སྶ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ ཨུ་པྤ་ཛྫ་ཏི སུ་ཁཱ ཝེ་ད་ནཱ. སོ ཨེ་ཝཾ པ་ཛཱ་ནཱ་ཏི – ‘ཨུ་པྤ་ནྣཱ ཁོ མྱཱ་ཡཾ སུ་ཁཱ ཝེ་ད་ནཱ; སཱ ཙ ཁོ པ་ཊི་ཙྩ, ནོ ཨ་པྤ་ཊི་ཙྩ. ཀིཾ པ་ཊི་ཙྩ? ཨི་མ་མེ་ཝ ཕ་སྶཾ པ་ཊི་ཙྩ. ཨ་ཡཾ ཁོ པ་ན ཕ་སྶོ ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ. ཨ་ནི་ཙྩཾ ཁོ པ་ན ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཕ་སྶཾ པ་ཊི་ཙྩ ཨུ་པྤ་ནྣཱ སུ་ཁཱ ཝེ་ད་ནཱ ཀུ་ཏོ ནི་ཙྩཱ བྷ་ཝི་སྶ་ཏཱི’ཏི! སོ ཕ་སྶེ ཙ སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཝ་ཡཱ་ནུ་པ་སྶཱི ཝི་ཧ་ར་ཏི, ཝི་རཱ་གཱ་ནུ་པ་སྶཱི ཝི་ཧ་ར་ཏི, ནི་རོ་དྷཱ་ནུ་པ་སྶཱི ཝི་ཧ་ར་ཏི, པ་ཊི་ནི་སྶ་གྒཱ་ནུ་པ་སྶཱི ཝི་ཧ་ར་ཏི. ཏ་སྶ ཕ་སྶེ ཙ སུ་ཁཱ་ཡ ཙ ཝེ་ད་ནཱ་ཡ ཨ་ནི་ཙྩཱ་ནུ་པ་སྶི་ནོ ཝི་ཧ་ར་ཏོ, ཝ་ཡཱ་ནུ་པ་སྶི་ནོ ཝི་ཧ་ར་ཏོ, ཝི་རཱ་གཱ་ནུ་པ་སྶི་ནོ ཝི་ཧ་ར་ཏོ, ནི་རོ་དྷཱ་ནུ་པ་སྶི་ནོ ཝི་ཧ་ར་ཏོ, པ་ཊི་ནི་སྶ་གྒཱ་ནུ་པ་སྶི་ནོ ཝི་ཧ་ར་ཏོ ཡོ ཕ་སྶེ ཙ སུ་ཁཱ་ཡ ཙ ཝེ་ད་ནཱ་ཡ རཱ་གཱ་ནུ་ས་ཡོ, སོ པ་ཧཱི་ཡ་ཏི.

‘‘ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ ཨེ་ཝཾ ས་ཏ་སྶ…པེ… ཝི་ཧ་ར་ཏོ ཨུ་པྤ་ཛྫ་ཏི དུ་ཀྑཱ ཝེ་ད་ནཱ…པེ… ཨུ་པྤ་ཛྫ་ཏི ཨ་དུ་ཀྑ་མ་སུ་ཁཱ ཝེ་ད་ནཱ. སོ ཨེ་ཝཾ པ་ཛཱ་ནཱ་ཏི – ‘ཨུ་པྤ་ནྣཱ ཁོ མྱཱ་ཡཾ ཨ་དུ་ཀྑ་མ་སུ་ཁཱ ཝེ་ད་ནཱ; སཱ ཙ ཁོ པ་ཊི་ཙྩ, ནོ ཨ་པྤ་ཊི་ཙྩ. ཀིཾ པ་ཊི་ཙྩ? ཨི་མ་མེ་ཝ ཕ་སྶཾ པ་ཊི་ཙྩ…པེ… ཀཱ་ཡ་སྶ བྷེ་དཱ ཨུ་དྡྷཾ ཛཱི་ཝི་ཏ་པ་རི་ཡཱ་དཱ་ནཱ ཨི་དྷེ་ཝ ས་བྦ་ཝེ་ད་ཡི་ཏཱ་ནི ཨ་ན་བྷི་ན་ནྡི་ཏཱ་ནི སཱི་ཏཱི་བྷ་ཝི་སྶ་ནྟཱི’ཏི པ་ཛཱ་ནཱ་ཏི’’.

༩. ཨ་ནི་ཙྩ་སུ་ཏྟཾ

༢༥༧. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ ཨ་ནི་ཙྩཱ ས་ངྑ་ཏཱ པ་ཊི་ཙྩ་ས་མུ་པྤ་ནྣཱ ཁ་ཡ་དྷ་མྨཱ ཝ་ཡ་དྷ་མྨཱ ཝི་རཱ་ག་དྷ་མྨཱ ནི་རོ་དྷ་དྷ་མྨཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ – ཨི་མཱ ཁོ, བྷི་ཀྑ་ཝེ, ཏི་སྶོ ཝེ་ད་ནཱ ཨ་ནི་ཙྩཱ ས་ངྑ་ཏཱ པ་ཊི་ཙྩ་ས་མུ་པྤ་ནྣཱ ཁ་ཡ་དྷ་མྨཱ ཝ་ཡ་དྷ་མྨཱ ཝི་རཱ་ག་དྷ་མྨཱ ནི་རོ་དྷ་དྷ་མྨཱ’’ཏི. ན་ཝ་མཾ.

༡༠. ཕ་སྶ་མཱུ་ལ་ཀ་སུ་ཏྟཾ

༢༥༨. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ ཕ་སྶ་ཛཱ ཕ་སྶ་མཱུ་ལ་ཀཱ ཕ་སྶ་ནི་དཱ་ནཱ ཕ་སྶ་པ་ཙྩ་ཡཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ. སུ་ཁ་ཝེ་ད་ནི་ཡཾ, བྷི་ཀྑ་ཝེ, ཕ་སྶཾ པ་ཊི་ཙྩ ཨུ་པྤ་ཛྫ་ཏི སུ་ཁཱ ཝེ་ད་ནཱ. ཏ་སྶེ་ཝ སུ་ཁ་ཝེ་ད་ནི་ཡ་སྶ ཕ་སྶ་སྶ ནི་རོ་དྷཱ, ཡཾ ཏ་ཛྫཾ ཝེ་ད་ཡི་ཏཾ སུ་ཁ་ཝེ་ད་ནི་ཡཾ ཕ་སྶཾ པ་ཊི་ཙྩ ཨུ་པྤ་ནྣཱ སུ་ཁཱ ཝེ་ད་ནཱ, སཱ ནི་རུ་ཛ྄ཛྷ་ཏི, སཱ ཝཱུ་པ་ས་མྨ་ཏི. དུ་ཀྑ་ཝེ་ད་ནི་ཡཾ, བྷི་ཀྑ་ཝེ, ཕ་སྶཾ པ་ཊི་ཙྩ ཨུ་པྤ་ཛྫ་ཏི དུ་ཀྑཱ ཝེ་ད་ནཱ. ཏ་སྶེ་ཝ དུ་ཀྑ་ཝེ་ད་ནི་ཡ་སྶ ཕ་སྶ་སྶ ནི་རོ་དྷཱ, ཡཾ ཏ་ཛྫཾ ཝེ་ད་ཡི་ཏཾ དུ་ཀྑ་ཝེ་ད་ནི་ཡཾ ཕ་སྶཾ པ་ཊི་ཙྩ ཨུ་པྤ་ནྣཱ དུ་ཀྑཱ ཝེ་ད་ནཱ, སཱ ནི་རུ་ཛ྄ཛྷ་ཏི, སཱ ཝཱུ་པ་ས་མྨ་ཏི. ཨ་དུ་ཀྑ་མ་སུ་ཁ་ཝེ་ད་ནི་ཡཾ, བྷི་ཀྑ་ཝེ, ཕ་སྶཾ པ་ཊི་ཙྩ ཨུ་པྤ་ཛྫ་ཏི ཨ་དུ་ཀྑ་མ་སུ་ཁཱ ཝེ་ད་ནཱ. ཏ་སྶེ་ཝ ཨ་དུ་ཀྑ་མ་སུ་ཁ་ཝེ་ད་ནི་ཡ་སྶ ཕ་སྶ་སྶ ནི་རོ་དྷཱ, ཡཾ ཏ་ཛྫཾ ཝེ་ད་ཡི་ཏཾ ཨ་དུ་ཀྑ་མ་སུ་ཁ་ཝེ་ད་ནི་ཡཾ ཕ་སྶཾ པ་ཊི་ཙྩ ཨུ་པྤ་ནྣཱ ཨ་དུ་ཀྑ་མ་སུ་ཁཱ ཝེ་ད་ནཱ, སཱ ནི་རུ་ཛ྄ཛྷ་ཏི, སཱ ཝཱུ་པ་ས་མྨ་ཏི. སེ་ཡྻ་ཐཱ་པི, བྷི་ཀྑ་ཝེ, དྭི་ནྣཾ ཀ་ཊྛཱ་ནཾ ས་ངྒྷ་ཊྚ་ན་ས་མོ་དྷཱ་ནཱ [ས་ངྑ་ཏྟཱ ཏ་སྶ ས་མོ་དྷཱ་ནཱ (སྱཱ. ཀཾ.) ས་ངྒྷ་ཏྟཱ ཏ་སྶ ས་མོ་དྷཱ་ནཱ (ཀ.) སཾ. ནི. ༢.༦༢ པ་སྶི་ཏ་བྦཾ] ཨུ་སྨཱ ཛཱ་ཡ་ཏི, ཏེ་ཛོ ཨ་བྷི་ནི་བྦ་ཏྟ་ཏི. ཏེ་སཾ་ཡེ་ཝ ཀ་ཊྛཱ་ནཾ ནཱ་ནཱ་བྷཱ་ཝཱ ཝི་ནི་ཀྑེ་པཱ, ཡཱ ཏ་ཛྫཱ ཨུ་སྨཱ, སཱ ནི་རུ་ཛ྄ཛྷ་ཏི, སཱ ཝཱུ་པ་ས་མྨ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཨི་མཱ ཏི་སྶོ ཝེ་ད་ནཱ ཕ་སྶ་ཛཱ ཕ་སྶ་མཱུ་ལ་ཀཱ ཕ་སྶ་ནི་དཱ་ནཱ ཕ་སྶ་པ་ཙྩ་ཡཱ. ཏ་ཛྫཾ ཕ་སྶཾ པ་ཊི་ཙྩ ཏ་ཛྫཱ ཝེ་ད་ནཱ ཨུ་པྤ་ཛྫ་ནྟི. ཏ་ཛྫ་སྶ ཕ་སྶ་སྶ ནི་རོ་དྷཱ ཏ་ཛྫཱ ཝེ་ད་ནཱ ནི་རུ་ཛ྄ཛྷ་ནྟཱི’’ཏི. ད་ས་མཾ.

ས་གཱ་ཐཱ་ཝ་གྒོ པ་ཋ་མོ.

ཏ་སྶུ་དྡཱ་ནཾ –

ས་མཱ་དྷི སུ་ཁཾ པ་ཧཱ་ནེ་ན, པཱ་ཏཱ་ལཾ ད་ཊྛ་བྦེ་ན ཙ;

ས་ལླེ་ན ཙེ་ཝ གེ་ལ་ཉྙཱ, ཨ་ནི་ཙྩ ཕ་སྶ་མཱུ་ལ་ཀཱ་ཏི.