༢. ཨ་ནོ་ཏྟ་པྤཱི་སུ་ཏྟཾ
༡༤༥. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ ཨཱ་ཡ་སྨཱ ཙ མ་ཧཱ་ཀ་སྶ་པོ ཨཱ་ཡ་སྨཱ ཙ སཱ་རི་པུ་ཏྟོ བཱ་རཱ་ཎ་སི་ཡཾ ཝི་ཧ་ར་ནྟི ཨི་སི་པ་ཏ་ནེ མི་ག་དཱ་ཡེ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ མ་ཧཱ་ཀ་སྶ་པོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ མ་ཧཱ་ཀ་སྶ་པེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙ – ‘‘ཝུ་ཙྩ་ཏི ཧི་དཾ, ཨཱ་ཝུ་སོ ཀ་སྶ་པ, ཨ་ནཱ་ཏཱ་པཱི ཨ་ནོ་ཏྟ་པྤཱི ཨ་བྷ་བྦོ ས་མྦོ་དྷཱ་ཡ ཨ་བྷ་བྦོ ནི་བྦཱ་ནཱ་ཡ ཨ་བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ; ཨཱ་ཏཱ་པཱི ཙ ཁོ ཨོ་ཏྟ་པྤཱི བྷ་བྦོ ས་མྦོ་དྷཱ་ཡ བྷ་བྦོ ནི་བྦཱ་ནཱ་ཡ བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡཱ’’ཏི.
‘‘ཀི་ཏྟཱ་ཝ་ཏཱ ནུ ཁོ, ཨཱ་ཝུ་སོ, ཨ་ནཱ་ཏཱ་པཱི ཧོ་ཏི ཨ་ནོ་ཏྟ་པྤཱི ཨ་བྷ་བྦོ ས་མྦོ་དྷཱ་ཡ ཨ་བྷ་བྦོ ནི་བྦཱ་ནཱ་ཡ ཨ་བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ; ཀི་ཏྟཱ་ཝ་ཏཱ ཙ པ་ནཱ་ཝུ་སོ, ཨཱ་ཏཱ་པཱི ཧོ་ཏི ཨོ་ཏྟ་པྤཱི བྷ་བྦོ ས་མྦོ་དྷཱ་ཡ བྷ་བྦོ ནི་བྦཱ་ནཱ་ཡ བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡཱ’’ཏི? ‘‘ཨི་དྷཱ་ཝུ་སོ, བྷི་ཀྑུ ‘ཨ་ནུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨཱ་ཏ་པྤཾ ཀ་རོ་ཏི, ‘ཨུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་པྤ་ཧཱི་ཡ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨཱ་ཏ་པྤཾ ཀ་རོ་ཏི, ‘ཨ་ནུ་པྤ་ནྣཱ མེ ཀུ་ས་ལཱ དྷ་མྨཱ་ནུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨཱ་ཏ་པྤཾ ཀ་རོ་ཏི, ‘ཨུ་པྤ་ནྣཱ མེ ཀུ་ས་ལཱ དྷ་མྨཱ ནི་རུ་ཛ྄ཛྷ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨཱ་ཏ་པྤཾ ཀ་རོ་ཏི. ཨེ་ཝཾ ཁོ, ཨཱ་ཝུ་སོ, ཨ་ནཱ་ཏཱ་པཱི ཧོ་ཏི’’.
‘‘ཀ་ཐ་ཉྩཱ་ཝུ་སོ, ཨ་ནོ་ཏྟ་པྤཱི ཧོ་ཏི? ཨི་དྷཱ་ཝུ་སོ, བྷི་ཀྑུ ‘ཨ་ནུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨོ་ཏྟ་པྤ་ཏི, ‘ཨུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་པྤ་ཧཱི་ཡ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨོ་ཏྟ་པྤ་ཏི, ‘ཨ་ནུ་པྤ་ནྣཱ མེ ཀུ་ས་ལཱ དྷ་མྨཱ་ནུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨོ་ཏྟ་པྤ་ཏི, ‘ཨུ་པྤ་ནྣཱ མེ ཀུ་ས་ལཱ དྷ་མྨཱ ནི་རུ་ཛ྄ཛྷ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ན ཨོ་ཏྟ་པྤ་ཏི. ཨེ་ཝཾ ཁོ, ཨཱ་ཝུ་སོ, ཨ་ནོ་ཏྟ་པྤཱི ཧོ་ཏི. ཨེ་ཝཾ ཁོ, ཨཱ་ཝུ་སོ, ཨ་ནཱ་ཏཱ་པཱི ཨ་ནོ་ཏྟ་པྤཱི ཨ་བྷ་བྦོ ས་མྦོ་དྷཱ་ཡ ཨ་བྷ་བྦོ ནི་བྦཱ་ནཱ་ཡ ཨ་བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ.
‘‘ཀ་ཐ་ཉྩཱ་ཝུ་སོ, ཨཱ་ཏཱ་པཱི ཧོ་ཏི? ཨི་དྷཱ་ཝུ་སོ, བྷི་ཀྑུ ‘ཨ་ནུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨཱ་ཏ་པྤཾ ཀ་རོ་ཏི, ‘ཨུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་པྤ་ཧཱི་ཡ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨཱ་ཏ་པྤཾ ཀ་རོ་ཏི, ཨ་ནུ་པྤ་ནྣཱ མེ ཀུ་ས་ལཱ དྷ་མྨཱ…པེ… ཨཱ་ཏ་པྤཾ ཀ་རོ་ཏི. ཨེ་ཝཾ ཁོ, ཨཱ་ཝུ་སོ, ཨཱ་ཏཱ་པཱི ཧོ་ཏི.
‘‘ཀ་ཐ་ཉྩཱ་ཝུ་སོ, ཨོ་ཏྟ་པྤཱི ཧོ་ཏི? ཨི་དྷཱ་ཝུ་སོ, བྷི་ཀྑུ ‘ཨ་ནུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨོ་ཏྟ་པྤ་ཏི, ‘ཨུ་པྤ་ནྣཱ མེ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་པྤ་ཧཱི་ཡ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨོ་ཏྟ་པྤ་ཏི, ‘ཨ་ནུ་པྤ་ནྣཱ མེ ཀུ་ས་ལཱ དྷ་མྨཱ ཨ་ནུ་པྤ་ཛྫ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨོ་ཏྟ་པྤ་ཏི, ‘ཨུ་པྤ་ནྣཱ མེ ཀུ་ས་ལཱ དྷ་མྨཱ ནི་རུ་ཛ྄ཛྷ་མཱ་ནཱ ཨ་ན་ཏྠཱ་ཡ སཾ་ཝ་ཏྟེ་ཡྻུ’ནྟི ཨོ་ཏྟ་པྤ་ཏི. ཨེ་ཝཾ ཁོ, ཨཱ་ཝུ་སོ, ཨོ་ཏྟ་པྤཱི ཧོ་ཏི. ཨེ་ཝཾ ཁོ, ཨཱ་ཝུ་སོ, ཨཱ་ཏཱ་པཱི ཨོ་ཏྟ་པྤཱི བྷ་བྦོ ས་མྦོ་དྷཱ་ཡ བྷ་བྦོ ནི་བྦཱ་ནཱ་ཡ བྷ་བྦོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡཱ’’ཏི. དུ་ཏི་ཡཾ.