༡༣. ས་དྡྷ་མྨ་པྤ་ཏི་རཱུ་པ་ཀ་སུ་ཏྟཾ
༡༥༦. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ མ་ཧཱ་ཀ་སྶ་པོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀོ ནུ ཁོ, བྷ་ནྟེ, ཧེ་ཏུ ཀོ པ་ཙྩ་ཡོ, ཡེ་ན པུ་བྦེ ཨ་པྤ་ཏ་རཱ་ནི ཙེ་ཝ སི་ཀྑཱ་པ་དཱ་ནི ཨ་ཧེ་སུཾ བ་ཧུ་ཏ་རཱ ཙ བྷི་ཀྑཱུ ཨ་ཉྙཱ་ཡ ས་ཎྛ་ཧིཾ་སུ? ཀོ པ་ན, བྷ་ནྟེ, ཧེ་ཏུ ཀོ པ་ཙྩ་ཡོ, ཡེ་ནེ་ཏ་ར་ཧི བ་ཧུ་ཏ་རཱ་ནི ཙེ་ཝ སི་ཀྑཱ་པ་དཱ་ནི ཨ་པྤ་ཏ་རཱ ཙ བྷི་ཀྑཱུ ཨ་ཉྙཱ་ཡ ས་ཎྛ་ཧ་ནྟཱི’’ཏི? ‘‘ཨེ་ཝ་ཉྩེ་ཏཾ, ཀ་སྶ་པ, ཧོ་ཏི ས་ཏྟེ་སུ ཧཱ་ཡ་མཱ་ནེ་སུ ས་དྡྷ་མྨེ ཨ་ནྟ་ར་དྷཱ་ཡ་མཱ་ནེ, བ་ཧུ་ཏ་རཱ་ནི ཙེ་ཝ སི་ཀྑཱ་པ་དཱ་ནི ཧོ་ནྟི ཨ་པྤ་ཏ་རཱ ཙ བྷི་ཀྑཱུ ཨ་ཉྙཱ་ཡ ས་ཎྛ་ཧ་ནྟི. ན ཏཱ་ཝ, ཀ་སྶ་པ, ས་དྡྷ་མྨ་སྶ ཨ་ནྟ་ར་དྷཱ་ནཾ ཧོ་ཏི ཡཱ་ཝ ན ས་དྡྷ་མྨ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི. ཡ་ཏོ ཙ ཁོ, ཀ་སྶ་པ, ས་དྡྷ་མྨ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི, ཨ་ཐ ས་དྡྷ་མྨ་སྶ ཨ་ནྟ་ར་དྷཱ་ནཾ ཧོ་ཏི’’.
‘‘སེ་ཡྻ་ཐཱ་པི, ཀ་སྶ་པ, ན ཏཱ་ཝ ཛཱ་ཏ་རཱུ་པ་སྶ ཨ་ནྟ་ར་དྷཱ་ནཾ ཧོ་ཏི ཡཱ་ཝ ན ཛཱ་ཏ་རཱུ་པ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི. ཡ་ཏོ ཙ ཁོ, ཀ་སྶ་པ, ཛཱ་ཏ་རཱུ་པ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི, ཨ་ཐ ཛཱ་ཏ་རཱུ་པ་སྶ ཨ་ནྟ་ར་དྷཱ་ནཾ ཧོ་ཏི. ཨེ་ཝ་མེ་ཝ ཁོ, ཀ་སྶ་པ, ན ཏཱ་ཝ ས་དྡྷ་མྨ་སྶ ཨ་ནྟ་ར་དྷཱ་ནཾ ཧོ་ཏི ཡཱ་ཝ ན ས་དྡྷ་མྨ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི. ཡ་ཏོ ཙ ཁོ, ཀ་སྶ་པ, ས་དྡྷ་མྨ་པྤ་ཏི་རཱུ་པ་ཀཾ ལོ་ཀེ ཨུ་པྤ་ཛྫ་ཏི, ཨ་ཐ ས་དྡྷ་མྨ་སྶ ཨ་ནྟ་ར་དྷཱ་ནཾ ཧོ་ཏི.
‘‘ན ཁོ, ཀ་སྶ་པ, པ་ཐ་ཝཱི་དྷཱ་ཏུ ས་དྡྷ་མྨཾ ཨ་ནྟ་ར་དྷཱ་པེ་ཏི, ན ཨཱ་པོ་དྷཱ་ཏུ ས་དྡྷ་མྨཾ ཨ་ནྟ་ར་དྷཱ་པེ་ཏི, ན ཏེ་ཛོ་དྷཱ་ཏུ ས་དྡྷ་མྨཾ ཨ་ནྟ་ར་དྷཱ་པེ་ཏི, ན ཝཱ་ཡོ་དྷཱ་ཏུ ས་དྡྷ་མྨཾ ཨ་ནྟ་ར་དྷཱ་པེ་ཏི; ཨ་ཐ ཁོ ཨི་དྷེ་ཝ ཏེ ཨུ་པྤ་ཛྫ་ནྟི མོ་གྷ་པུ་རི་སཱ ཡེ ཨི་མཾ ས་དྡྷ་མྨཾ ཨ་ནྟ་ར་དྷཱ་པེ་ནྟི. སེ་ཡྻ་ཐཱ་པི, ཀ་སྶ་པ, ནཱ་ཝཱ ཨཱ་དི་ཀེ་ནེ་ཝ ཨོ་པི་ལ་ཝ་ཏི; ན ཁོ, ཀ་སྶ་པ, ཨེ་ཝཾ ས་དྡྷ་མྨ་སྶ ཨ་ནྟ་ར་དྷཱ་ནཾ ཧོ་ཏི.
‘‘པ་ཉྩ ཁོ་མེ, ཀ་སྶ་པ, ཨོ་ཀྐ་མ་ནི་ཡཱ དྷ་མྨཱ ས་དྡྷ་མྨ་སྶ ས་མྨོ་སཱ་ཡ ཨ་ནྟ་ར་དྷཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ པ་ཉྩ? ཨི་དྷ, ཀ་སྶ་པ, བྷི་ཀྑཱུ བྷི་ཀྑུ་ནི་ཡོ ཨུ་པཱ་ས་ཀཱ ཨུ་པཱ་སི་ཀཱ་ཡོ ས་ཏྠ་རི ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱ, དྷ་མྨེ ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱ, ས་ངྒྷེ ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱ, སི་ཀྑཱ་ཡ ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱ, ས་མཱ་དྷི་སྨིཾ ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱ – ཨི་མེ ཁོ, ཀ་སྶ་པ, པ་ཉྩ ཨོ་ཀྐ་མ་ནི་ཡཱ དྷ་མྨཱ ས་དྡྷ་མྨ་སྶ ས་མྨོ་སཱ་ཡ ཨ་ནྟ་ར་དྷཱ་ནཱ་ཡ སཾ་ཝ་ཏྟ་ནྟི.
‘‘པ་ཉྩ ཁོ་མེ, ཀ་སྶ་པ, དྷ་མྨཱ ས་དྡྷ་མྨ་སྶ ཋི་ཏི་ཡཱ ཨ་ས་མྨོ་སཱ་ཡ ཨ་ན་ནྟ་ར་དྷཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ པ་ཉྩ? ཨི་དྷ, ཀ་སྶ་པ, བྷི་ཀྑཱུ བྷི་ཀྑུ་ནི་ཡོ ཨུ་པཱ་ས་ཀཱ ཨུ་པཱ་སི་ཀཱ་ཡོ ས་ཏྠ་རི ས་གཱ་ར་ཝཱ ཝི་ཧ་ར་ནྟི ས་པྤ་ཏི་སྶཱ, དྷ་མྨེ ས་གཱ་ར་ཝཱ ཝི་ཧ་ར་ནྟི ས་པྤ་ཏི་སྶཱ, ས་ངྒྷེ ས་གཱ་ར་ཝཱ ཝི་ཧ་ར་ནྟི ས་པྤ་ཏི་སྶཱ, སི་ཀྑཱ་ཡ ས་གཱ་ར་ཝཱ ཝི་ཧ་ར་ནྟི ས་པྤ་ཏི་སྶཱ, ས་མཱ་དྷི་སྨིཾ ས་གཱ་ར་ཝཱ ཝི་ཧ་ར་ནྟི ས་པྤ་ཏི་སྶཱ – ཨི་མེ ཁོ, ཀ་སྶ་པ, པ་ཉྩ དྷ་མྨཱ ས་དྡྷ་མྨ་སྶ ཋི་ཏི་ཡཱ ཨ་ས་མྨོ་སཱ་ཡ ཨ་ན་ནྟ་ར་དྷཱ་ནཱ་ཡ སཾ་ཝ་ཏྟ་ནྟཱི’’ཏི. ཏེ་ར་ས་མཾ.
ཀ་སྶ་པ་སཾ་ཡུ་ཏྟཾ ས་མ་ཏྟཾ.