༦. ལཱ་བྷ་ས་ཀྐཱ་ར་སཾ་ཡུ་ཏྟཾ
༡. པ་ཋ་མ་ཝ་གྒོ
༡. དཱ་རུ་ཎ་སུ་ཏྟཾ
༡༥༧. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –
‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ པ་ཛ་ཧི་སྶཱ་མ, ན ཙ ནོ ཨུ་པྤ་ནྣོ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི’ཏི. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. པ་ཋ་མཾ.
༢. བ་ལི༹་ས་སུ་ཏྟཾ
༡༥༨. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. སེ་ཡྻ་ཐཱ་པི, བྷི་ཀྑ་ཝེ, བཱ་ལི༹་སི་ཀོ ཨཱ་མི་ས་ག་ཏཾ བ་ལི༹་སཾ ག་མྦྷཱི་རེ ཨུ་ད་ཀ་ར་ཧ་དེ པ་ཀྑི་པེ་ཡྻ. ཏ་མེ་ནཾ ཨ་ཉྙ་ཏ་རོ ཨཱ་མི་ས་ཙ་ཀྑུ མ་ཙྪོ གི་ལེ་ཡྻ. ཨེ་ཝ་ཉྷི སོ, བྷི་ཀྑ་ཝེ, མ་ཙྪོ གི་ལ་བ་ལི༹་སོ བཱ་ལི༹་སི་ཀ་སྶ ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ བཱ་ལི༹་སི་ཀ་སྶ’’.
‘‘བཱ་ལི༹་སི་ཀོ་ཏི ཁོ, བྷི་ཀྑ་ཝེ, མཱ་ར་སྶེ་ཏཾ པཱ་པི་མ་ཏོ ཨ་དྷི་ཝ་ཙ་ནཾ. བ་ལི༹་ས་ནྟི ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀ་སྶེ་ཏཾ ཨ་དྷི་ཝ་ཙ་ནཾ. ཡོ ཧི ཀོ་ཙི, བྷི་ཀྑ་ཝེ, བྷི་ཀྑུ ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ ཨ་སྶཱ་དེ་ཏི ནི་ཀཱ་མེ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ གི་ལ་བ་ལི༹་སོ མཱ་ར་སྶ ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ པ་ཛ་ཧི་སྶཱ་མ, ན ཙ ནོ ཨུ་པྤ་ནྣོ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི’ཏི. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. དུ་ཏི་ཡཾ.
༣. ཀུ་མྨ་སུ་ཏྟཾ
༡༥༩. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. བྷཱུ་ཏ་པུ་བྦཾ, བྷི་ཀྑ་ཝེ, ཨ་ཉྙ་ཏ་ར་སྨིཾ ཨུ་ད་ཀ་ར་ཧ་དེ མ་ཧཱ་ཀུ་མྨ་ཀུ་ལཾ ཙི་ར་ནི་ཝཱ་སི ཨ་ཧོ་སི. ཨ་ཐ ཁོ, བྷི་ཀྑ་ཝེ, ཨ་ཉྙ་ཏ་རོ ཀུ་མྨོ ཨ་ཉྙ་ཏ་རཾ ཀུ་མྨཾ ཨེ་ཏ་ད་ཝོ་ཙ – ‘མཱ ཁོ ཏྭཾ, ཏཱ་ཏ ཀུ་མྨ, ཨེ་ཏཾ པ་དེ་སཾ ཨ་ག་མཱ་སཱི’ཏི. ཨ་ག་མཱ་སི ཁོ, བྷི་ཀྑ་ཝེ, སོ ཀུ་མྨོ ཏཾ པ་དེ་སཾ. ཏ་མེ་ནཾ ལུ་དྡོ པ་པ་ཏཱ་ཡ ཝི་ཛ྄ཛྷི. ཨ་ཐ ཁོ, བྷི་ཀྑ་ཝེ, སོ ཀུ་མྨོ ཡེ་ན སོ ཀུ་མྨོ ཏེ་ནུ་པ་ས་ངྐ་མི. ཨ་དྡ་སཱ ཁོ, བྷི་ཀྑ་ཝེ, སོ ཀུ་མྨོ ཏཾ ཀུ་མྨཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན ཏཾ ཀུ་མྨཾ ཨེ་ཏ་ད་ཝོ་ཙ – ‘ཀ་ཙྩི ཏྭཾ, ཏཱ་ཏ ཀུ་མྨ, ན ཏཾ པ་དེ་སཾ ཨ་ག་མཱ་སཱི’ཏི? ‘ཨ་ག་མཱ་སིཾ ཁྭཱ་ཧཾ, ཏཱ་ཏ ཀུ་མྨ, ཏཾ པ་དེ་ས’ནྟི. ‘ཀ་ཙྩི པ་ནཱ་སི, ཏཱ་ཏ ཀུ་མྨ, ཨ་ཀྑ་ཏོ ཨ་ནུ་པ་ཧ་ཏོ’ཏི? ‘ཨ་ཀྑ་ཏོ ཁོ་མྷི, ཏཱ་ཏ ཀུ་མྨ, ཨ་ནུ་པ་ཧ་ཏོ, ཨ་ཏྠི ཙ མེ ཨི་དཾ སུ་ཏྟ་ཀཾ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷ’ནྟི. ‘ཏ་གྒྷ་སི, ཏཱ་ཏ ཀུ་མྨ, ཁ་ཏོ, ཏ་གྒྷ ཨུ་པ་ཧ་ཏོ. ཨེ་ཏེ་ན ཧི ཏེ, ཏཱ་ཏ ཀུ་མྨ, སུ་ཏྟ་ཀེ་ན པི་ཏ་རོ ཙ པི་ཏཱ་མ་ཧཱ ཙ ཨ་ན་ཡཾ ཨཱ་པ་ནྣཱ བྱ་ས་ནཾ ཨཱ་པ་ནྣཱ. ག་ཙྪ དཱ་ནི ཏྭཾ, ཏཱ་ཏ ཀུ་མྨ, ན དཱ་ནི ཏྭཾ ཨ་མྷཱ་ཀ’’’ནྟི.
‘‘ལུ་དྡོ་ཏི ཁོ, བྷི་ཀྑ་ཝེ, མཱ་ར་སྶེ་ཏཾ པཱ་པི་མ་ཏོ ཨ་དྷི་ཝ་ཙ་ནཾ. པ་པ་ཏཱ་ཏི ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀ་སྶེ་ཏཾ ཨ་དྷི་ཝ་ཙ་ནཾ. སུ་ཏྟ་ཀ་ནྟི ཁོ, བྷི་ཀྑ་ཝེ, ན་ནྡི་རཱ་ག་སྶེ་ཏཾ ཨ་དྷི་ཝ་ཙ་ནཾ. ཡོ ཧི ཀོ་ཙི, བྷི་ཀྑ་ཝེ, བྷི་ཀྑུ ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ ཨ་སྶཱ་དེ་ཏི ནི་ཀཱ་མེ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ གི་དྡྷོ པ་པ་ཏཱ་ཡ [བྷི་ཀྑུ པ་པ་ཏཱ་ཡ (སྱཱ. ཀཾ.), བྷི་ཀྑུ ཝི་དྡྷོ པ་པ་ཏཱ་ཡ (?)] ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཏ་ཏི་ཡཾ.
༤. དཱི་གྷ་ལོ་མི་ཀ་སུ་ཏྟཾ
༡༦༠. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. སེ་ཡྻ་ཐཱ་པི, བྷི་ཀྑ་ཝེ, དཱི་གྷ་ལོ་མི་ཀཱ ཨེ་ལ༹་ཀཱ ཀ་ཎྚ་ཀ་ག་ཧ་ནཾ པ་ཝི་སེ་ཡྻ. སཱ ཏ་ཏྲ ཏ་ཏྲ ས་ཛྫེ་ཡྻ, ཏ་ཏྲ ཏ་ཏྲ ག་ཡ྄ཧེ་ཡྻ [ག་ཙྪེ་ཡྻ (སཱི.), ག་ཎྷེ་ཡྻ (སྱཱ. ཀཾ. པཱི. ཀ.)], ཏ་ཏྲ ཏ་ཏྲ བ་ཛ྄ཛྷེ་ཡྻ, ཏ་ཏྲ ཏ་ཏྲ ཨ་ན་ཡ་བྱ་ས་ནཾ ཨཱ་པ་ཛྫེ་ཡྻ. ‘ཨེ་ཝ་མེ་ཝ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ གཱ་མཾ ཝཱ ནི་ག་མཾ ཝཱ པི་ཎྜཱ་ཡ པ་ཝི་ས་ཏི. སོ ཏ་ཏྲ ཏ་ཏྲ ས་ཛྫ་ཏི, ཏ་ཏྲ ཏ་ཏྲ ག་ཡ྄ཧ་ཏི, ཏ་ཏྲ ཏ་ཏྲ བ་ཛ྄ཛྷ་ཏི, ཏ་ཏྲ ཏ་ཏྲ ཨ་ན་ཡ་བྱ་ས་ནཾ ཨཱ་པ་ཛྫ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’’ནྟི. ཙ་ཏུ་ཏྠཾ.
༥. མཱི་ལ༹ྷ་ཀ་སུ་ཏྟཾ
༡༦༡. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. སེ་ཡྻ་ཐཱ་པི, བྷི་ཀྑ་ཝེ, མཱི་ལ༹ྷ་ཀཱ གཱུ་ཐཱ་དཱི གཱུ་ཐ་པཱུ་རཱ པུ་ཎྞཱ གཱུ་ཐ་སྶ. པུ་ར་ཏོ ཙ་སྶ མ་ཧཱ་གཱུ་ཐ་པུ་ཉྫོ. སཱ ཏེ་ན ཨ་ཉྙཱ མཱི་ལ༹ྷ་ཀཱ ཨ་ཏི་མ་ཉྙེ་ཡྻ – ‘ཨ་ཧ་མྷི གཱུ་ཐཱ་དཱི གཱུ་ཐ་པཱུ་རཱ པུ་ཎྞཱ གཱུ་ཐ་སྶ, པུ་ར་ཏོ ཙ མྱཱ་ཡཾ མ་ཧཱ་གཱུ་ཐ་པུ་ཉྫོ’ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ གཱ་མཾ ཝཱ ནི་ག་མཾ ཝཱ པི་ཎྜཱ་ཡ པ་ཝི་ས་ཏི. སོ ཏ་ཏྠ བྷུ་ཏྟཱ་ཝཱི ཙ ཧོ་ཏི ཡཱ་ཝ་ད་ཏྠོ, ནི་མ་ནྟི་ཏོ ཙ སྭཱ་ཏ་ནཱ་ཡ, པི་ཎྜ་པཱ་ཏོ ཙ་སྶ པཱུ་རོ. སོ ཨཱ་རཱ་མཾ ག་ནྟྭཱ བྷི་ཀྑུ་ག་ཎ་སྶ མ་ཛ྄ཛྷེ ཝི་ཀ་ཏྠ་ཏི – ‘བྷུ་ཏྟཱ་ཝཱི ཙ་མྷི ཡཱ་ཝ་ད་ཏྠོ, ནི་མ་ནྟི་ཏོ ཙ་མྷི སྭཱ་ཏ་ནཱ་ཡ, པི་ཎྜ་པཱ་ཏོ ཙ མྱཱ་ཡཾ པཱུ་རོ, ལཱ་བྷཱི ཙ་མྷི ཙཱི་ཝ་ར-པི་ཎྜ་པཱ་ཏ-སེ་ནཱ་ས་ན-གི་ལཱ་ན་པྤ་ཙྩ་ཡ-བྷེ་ས་ཛྫ་པ་རི་ཀྑཱ་རཱ་ནཾ, ཨི་མེ པ་ན་ཉྙེ བྷི་ཀྑཱུ ཨ་པྤ་པུ་ཉྙཱ ཨ་པྤེ་ས་ཀྑཱ ན ལཱ་བྷི་ནོ ཙཱི་ཝ་ར-པི་ཎྜ་པཱ་ཏ་སེ་ནཱ་ས་ན-གི་ལཱ་ན་པྤ་ཙྩ་ཡ-བྷེ་ས་ཛྫ-པ་རི་ཀྑཱ་རཱ་ན’ནྟི. སོ ཏེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ ཨ་ཉྙེ པེ་ས་ལེ བྷི་ཀྑཱུ ཨ་ཏི་མ་ཉྙ་ཏི. ཏ་ཉྷི ཏ་སྶ, བྷི་ཀྑ་ཝེ, མོ་གྷ་པུ་རི་ས་སྶ ཧོ་ཏི དཱི་གྷ་ར་ཏྟཾ ཨ་ཧི་ཏཱ་ཡ དུ་ཀྑཱ་ཡ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ བྷི་ཀྑ་ཝེ, སི་ཀྑི་ཏ་བྦ’’ནྟི. པ་ཉྩ་མཾ.
༦. ཨ་ས་ནི་སུ་ཏྟཾ
༡༦༢. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. [ཨུ་པ་རི ཏ་ཏི་ཡ་ཝ་གྒེ ཏ་ཏི་ཡ་ཙ་ཏུ་ཏྠ་སུ་ཏྟེ་སུ ‘‘མཱ ཙ ཁོ ཏྭཾ ཏཱ་ཏ སེ་ཁཾ… ཨ་ནུ་པཱ་པུ་ཎཱ་ཏཱུ’’ཏི ཨཱ་ག་ཏཾ. ཏེ་ན ན་ཡེ་ན ཨི་དྷཱ་པི ཨ་ཏྠོ ག་ཧེ་ཏ་བྦོ. ཨེ་ཏྠ ཧི ཀིཾ ས་དྡེ་ན པ་ཊི་ཀྑེ་པ་ཏྠོ་པི ས་ཀྐཱ ཉཱ་ཏུཾ, ཡ་ཐཱ ‘‘ས་ཡཾ ཨ་བྷི་ཉྙཱ་ཡ ཀ་མུ་དྡི་སེ་ཡྻ’’ནྟི. ཏ་སྨཱ ཀཾ… ཨཱ་ག་ཙྪ་ཏཱུ་ཏི ཨེ་ཏྠ ཀ་མ་པི… མཱ ཨཱ་ག་ཙྪ་ཏཱུ་ཏི ཙ, ཀཾ སེ་ཁཾ… ཨ་ནུ་པཱ་པུ་ཎཱ་ཏཱུ་ཏི ཨེ་ཏྠ ཀ་མ་པི སེ་ཁཾ… མཱ པཱ་པུ་ཎཱ་ཏཱུ་ཏི ཙ ཨ་ཏྠོ ཝེ་དི་ཏ་བྦོ. ཨ་ཊྛ་ཀ་ཐཱ་ཊཱི་ཀཱ་སུ ཙ ཨ་ཡ་མེ་ཝ་ཏྠོ ཉཱ་པི་ཏོ] ཀཾ, བྷི་ཀྑ་ཝེ, ཨ་ས་ནི་ཝི་ཙ་ཀྐཾ ཨཱ་ག་ཙྪ་ཏུ [ཨུ་པ་རི ཏ་ཏི་ཡ་ཝ་གྒེ ཏ་རི་ཡ་ཙ་ཏུ་ཏྠ་སུ་ཏྟེ་སུ ‘‘མཱ ཙ ཁོ ཏྭཾ ཏཱ་ཏ སེ་ཁཾ… ཨ་ནུ་པཱ་པུ་ཎཱ་ཏཱུ’’ཏི ཨཱ་ག་ཏཾ. ཏེ་ན ན་ཡེ་ན ཨི་དྷཱ་པི ཨ་ཏྠོ ག་ཧེ་ཏ་བྦོ. ཨེ་ཏྠ ཧི ཀིཾ ས་དྡེ་ན པ་ཊི་ཀྑེ་པ་ཏྠོ་པི ས་ཀྐཱ ཉཱ་ཏུཾ, ཡ་ཐཱ ‘‘ས་ཡཾ ཨ་བྷི་ཉྙཱ་ཡ ཀ་མུ་དྡི་སེ་ཡྻ’’ནྟི. ཏ་སྨཱ ཀཾ… ཨཱ་ག་ཙྪ་ཏཱུ་ཏི ཨེ་ཏྠ ཀ་མ་པི… མཱ ཨཱ་ག་ཙྪ་ཏཱུ་ཏི་ཙ, ཏཾ སེ་ཁཾ… ཨ་ནུ་པཱ་པུ་ཎཱ་ཏཱུ་ཏི ཨེ་ཏྠ ཀ་མ་པི སེ་ཁཾ… མཱ པཱ་པུ་ཎཱ་ཏཱུ་ཏི ཙ ཨ་ཏྠོ ཝེ་དི་ཏ་བྦོ. ཨ་ཊྛ་ཀ་ཐཱ་ཊཱི་ཀཱ་སུ ཙ ཨ་ཡ་མེ་ཝ་ཏྠོ ཉཱ་པི་ཏོ], སེ་ཁཾ [ཨ་ས་ནི་ཝི་ཙ་ཀྐཾ, ཏཾ སེ་ཁཾ (པཱི. ཀ.), ཨ་ས་ནི་ཝི་ཙ་ཀྐཾ, སེ་ཁཾ (སྱཱ. ཀཾ.), ཨ་ས་ནི་ཝི་ཙ་ཀྐཾ ཨཱ་ག་ཙྪ་ཏུ, ཀཾ སེ་ཁཾ (?)] ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏུ’’ [ཨ་ནུ་པཱ་པུ་ཎཱ་ཏི (པཱི. ཀ.)].
‘‘ཨ་ས་ནི་ཝི་ཙ་ཀྐ་ནྟི ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀ་སྶེ་ཏཾ ཨ་དྷི་ཝ་ཙ་ནཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཚ་ཊྛཾ.
༧. དི་དྡྷ་སུ་ཏྟཾ
༡༦༣. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. ཀཾ, བྷི་ཀྑ་ཝེ, དི་དྡྷ་ག་ཏེ་ན ཝི་ས་ལླེ་ན ས་ལླེ་ན [དི་ཊྛི་ག་ཏེ་ན ཝི་ས་ལླེ་ན (ཀ. སཱི.), དི་ཊྛི་ག་ཏེ་ན ས་ལླེ་ན (སྱཱ. ཀཾ.), དི་ཊྛི་ག་ཏེ་ན ཝི་ས་ལླེ་ན ས་ལླེ་ན (ཀ.), དི་ཊྛ་ག་ཏེ་ན ཝི་ས་ལླེ་ན ས་ལླེ་ན (པཱི.)] ཝི་ཛ྄ཛྷ་ཏུ, སེ་ཁཾ [ཝི་ཛ྄ཛྷ་ཏུ, ཏཾ སེ་ཁཾ (སཱི.), ཝི་ཛ྄ཛྷ་ཏི, ཏཾ སེ་ཁཾ (པཱི. ཀ.)] ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏུ’’ [ཨ་ནུ་པཱ་པུ་ཎཱ་ཏི (པཱི. ཀ.)].
‘‘ས་ལླ་ནྟི ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀ་སྶེ་ཏཾ ཨ་དྷི་ཝ་ཙ་ནཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ས་ཏྟ་མཾ.
༨. སི་ངྒཱ་ལ་སུ་ཏྟཾ
༡༦༤. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. ཨ་སྶུ་ཏྠ ནོ ཏུ་མྷེ, བྷི་ཀྑ་ཝེ, ར་ཏྟི་ཡཱ པ་ཙྩཱུ་ས་ས་མ་ཡཾ ཛ་ར་སི་ངྒཱ་ལ་སྶ [སི་ངྒཱ་ལ་སྶ (ཀ.), ཛ་ར་སི་གཱ་ལ་སྶ (སཱི. སྱཱ. ཀཾ.)] ཝ་སྶ་མཱ་ན་སྶཱ’’ཏི? ‘‘ཨེ་ཝཾ, བྷ་ནྟེ’’. ‘‘ཨེ་སོ ཁོ, བྷི་ཀྑ་ཝེ, ཛ་ར་སི་ངྒཱ་ལོ ཨུ་ཀྐ་ཎྜ་ཀེ་ན [ཨུ་ཀྐ་ཎྜ་ཀེ་ན (སཱི.), ཨུ་ཀྐ་ཎྞ་ཀེ་ན (སྱཱ. ཀཾ. པཱི.)] ནཱ་མ རོ་ག་ཛཱ་ཏེ་ན ཕུ་ཊྛོ ནེ་ཝ བི་ལ་ག་ཏོ ར་མ་ཏི, ན རུ་ཀྑ་མཱུ་ལ་ག་ཏོ ར་མ་ཏི, ན ཨ་ཛ྄ཛྷོ་ཀཱ་ས་ག་ཏོ ར་མ་ཏི; ཡེ་ན ཡེ་ན ག་ཙྪ་ཏི, ཡ་ཏྠ ཡ་ཏྠ ཏི་ཊྛ་ཏི, ཡ་ཏྠ ཡ་ཏྠ ནི་སཱི་ད་ཏི, ཡ་ཏྠ ཡ་ཏྠ ནི་པ་ཛྫ་ཏི; ཏ་ཏྠ ཏ་ཏྠ ཨ་ན་ཡ་བྱ་ས་ནཾ ཨཱ་པ་ཛྫ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ ནེ་ཝ སུ་ཉྙཱ་གཱ་ར་ག་ཏོ ར་མ་ཏི, ན རུ་ཀྑ་མཱུ་ལ་ག་ཏོ ར་མ་ཏི, ན ཨ་ཛ྄ཛྷོ་ཀཱ་ས་ག་ཏོ ར་མ་ཏི; ཡེ་ན ཡེ་ན ག་ཙྪ་ཏི, ཡ་ཏྠ ཡ་ཏྠ ཏི་ཊྛ་ཏི, ཡ་ཏྠ ཡ་ཏྠ ནི་སཱི་ད་ཏི, ཡ་ཏྠ ཡ་ཏྠ ནི་པ་ཛྫ་ཏི; ཏ་ཏྠ ཏ་ཏྠ ཨ་ན་ཡ་བྱ་ས་ནཾ ཨཱ་པ་ཛྫ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཨ་ཊྛ་མཾ.
༩. ཝེ་ར་མྦྷ་སུ་ཏྟཾ
༡༦༥. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. ཨུ་པ་རི, བྷི་ཀྑ་ཝེ, ཨཱ་ཀཱ་སེ ཝེ་ར་མྦྷཱ [ཝེ་ར་མྦཱ (སཱི. པཱི.)] ནཱ་མ ཝཱ་ཏཱ ཝཱ་ཡ་ནྟི. ཏ་ཏྠ ཡོ པ་ཀྑཱི ག་ཙྪ་ཏི ཏ་མེ་ནཾ ཝེ་ར་མྦྷཱ ཝཱ་ཏཱ ཁི་པ་ནྟི. ཏ་སྶ ཝེ་ར་མྦྷ་ཝཱ་ཏ་ཀྑི་ཏྟ་སྶ ཨ་ཉྙེ་ནེ་ཝ པཱ་དཱ ག་ཙྪ་ནྟི, ཨ་ཉྙེ་ན པ་ཀྑཱ ག་ཙྪ་ནྟི, ཨ་ཉྙེ་ན སཱི་སཾ ག་ཙྪ་ཏི, ཨ་ཉྙེ་ན ཀཱ་ཡོ ག་ཙྪ་ཏི. ཨེ་ཝ་མེ་ཝ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ གཱ་མཾ ཝཱ ནི་ག་མཾ ཝཱ པི་ཎྜཱ་ཡ པ་ཝི་ས་ཏི ཨ་ར་ཀྑི་ཏེ་ནེ་ཝ ཀཱ་ཡེ་ན ཨ་ར་ཀྑི་ཏཱ་ཡ ཝཱ་ཙཱ་ཡ ཨ་ར་ཀྑི་ཏེ་ན ཙི་ཏྟེ་ན, ཨ་ནུ་པ་ཊྛི་ཏཱ་ཡ ས་ཏི་ཡཱ, ཨ་སཾ་ཝུ་ཏེ་ཧི ཨི་ནྡྲི་ཡེ་ཧི. སོ ཏ་ཏྠ པ་སྶ་ཏི མཱ་ཏུ་གཱ་མཾ དུ་ནྣི་ཝ་ཏྠཾ ཝཱ དུ་པྤཱ་རུ་ཏཾ ཝཱ. ཏ་སྶ མཱ་ཏུ་གཱ་མཾ དི་སྭཱ དུ་ནྣི་ཝ་ཏྠཾ ཝཱ དུ་པྤཱ་རུ་ཏཾ ཝཱ རཱ་གོ ཙི་ཏྟཾ ཨ་ནུ་དྡྷཾ་སེ་ཏི. སོ རཱ་གཱ་ནུ་དྡྷཾ་སི་ཏེ་ན ཙི་ཏྟེ་ན སི་ཀྑཾ པ་ཙྩ་ཀྑཱ་ཡ ཧཱི་ནཱ་ཡཱ་ཝ་ཏྟ་ཏི. ཏ་སྶ ཨ་ཉྙེ ཙཱི་ཝ་རཾ ཧ་ར་ནྟི, ཨ་ཉྙེ པ་ཏྟཾ ཧ་ར་ནྟི, ཨ་ཉྙེ ནི་སཱི་ད་ནཾ ཧ་ར་ནྟི, ཨ་ཉྙེ སཱུ་ཙི་གྷ་རཾ ཧ་ར་ནྟི, ཝེ་ར་མྦྷ་ཝཱ་ཏ་ཀྑི་ཏྟ་སྶེ་ཝ ས་ཀུ་ཎ་སྶ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ན་ཝ་མཾ.
༡༠. ས་གཱ་ཐ་ཀ་སུ་ཏྟཾ
༡༦༦. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ པ་སྶཱ་མི ས་ཀྐཱ་རེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ, ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཾ. ཨི་དྷ པ་ནཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ པ་སྶཱ་མི ཨ་ས་ཀྐཱ་རེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ, ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཾ. ཨི་དྷ པ་ནཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ པ་སྶཱ་མི ས་ཀྐཱ་རེ་ན ཙ ཨ་ས་ཀྐཱ་རེ་ན ཙ ཏ་དུ་བྷ་ཡེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ, ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི.
ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
‘‘ཡ་སྶ ས་ཀྐ་རི་ཡ་མཱ་ན་སྶ, ཨ་ས་ཀྐཱ་རེ་ན ཙཱུ་བྷ་ཡཾ;
ས་མཱ་དྷི ན ཝི་ཀ་མྤ་ཏི, ཨ་པྤ་མཱ་ཎ་ཝི་ཧཱ་རི་ནོ [ཨ་པྤ་མཱ་ད་ཝི་ཧཱ་རི་ནོ (པཱི. ཀ.) ཨ་པྤ་མཱ་ཎོ་ཏི ཧེ་ཏྠ ཕ་ལ་ས་མཱ་དྷི, ན ས་ཏི].
‘‘ཏཾ ཛྷཱ་ཡི་ནཾ སཱ་ཏ་ཏི་ཀཾ, སུ་ཁུ་མཾ དི་ཊྛི་ཝི་པ་སྶ་ཀཾ;
ཨུ་པཱ་དཱ་ན་ཀྑ་ཡཱ་རཱ་མཾ, ཨཱ་ཧུ ས་པྤུ་རི་སོ ཨི་ཏཱི’’ཏི. ད་ས་མཾ;
པ་ཋ་མོ ཝ་གྒོ.
ཏ་སྶུ་དྡཱ་ནཾ –
དཱ་རུ་ཎོ བ་ལི༹་སཾ ཀུ་མྨཾ, དཱི་གྷ་ལོ་མི ཙ མཱི་ལ༹ྷ་ཀཾ;
ཨ་ས་ནི དི་དྡྷཾ སི་ངྒཱ་ལཾ, ཝེ་ར་མྦྷེ་ན ས་གཱ་ཐ་ཀ་ནྟི.
༢. དུ་ཏི་ཡ་ཝ་གྒོ
༡. སུ་ཝ་ཎྞ་པཱ་ཏི་སུ་ཏྟཾ
༡༦༧. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨ་དྷི་ག་མཱ་ཡ. ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ན ཙཱ་ཡ་མཱ་ཡ་སྨཱ སུ་ཝ་ཎྞ་པཱ་ཏི་ཡཱ་པི རཱུ་པི་ཡ་ཙུ་ཎྞ་པ་རི་པཱུ་རཱ་ཡ ཧེ་ཏུ ས་མྤ་ཛཱ་ན་མུ་སཱ བྷཱ་སེ་ཡྻཱ’ཏི. ཏ་མེ་ནཾ པ་སྶཱ་མི ཨ་པ་རེ་ན ས་མ་ཡེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ ས་མྤ་ཛཱ་ན་མུ་སཱ བྷཱ་ས་ནྟཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. པ་ཋ་མཾ.
༢. རཱུ་པི་ཡ་པཱ་ཏི་སུ་ཏྟཾ
༡༦༨. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ན ཙཱ་ཡ་མཱ་ཡ་སྨཱ རཱུ་པི་ཡ་པཱ་ཏི་ཡཱ་པི སུ་ཝ་ཎྞ་ཙུ་ཎྞ་པ་རི་པཱུ་རཱ་ཡ ཧེ་ཏུ ས་མྤ་ཛཱ་ན་མུ་སཱ བྷཱ་སེ་ཡྻཱ’ཏི. ཏ་མེ་ནཾ པ་སྶཱ་མི ཨ་པ་རེ་ན ས་མ་ཡེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ ས་མྤ་ཛཱ་ན་མུ་སཱ བྷཱ་ས་ནྟཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. དུ་ཏི་ཡཾ.
༣-༡༠. སུ་ཝ་ཎྞ་ནི་ཀྑ་སུ་ཏྟཱ་དི་ཨ་ཊྛ་ཀཾ
༡༦༩. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ན ཙཱ་ཡ་མཱ་ཡ་སྨཱ སུ་ཝ་ཎྞ་ནི་ཀྑ་སྶཱ་པི ཧེ་ཏུ…པེ… སུ་ཝ་ཎྞ་ནི་ཀྑ་ས་ཏ་སྶཱ་པི ཧེ་ཏུ… སི་ངྒཱི་ནི་ཀྑ་སྶཱ་པི ཧེ་ཏུ… སི་ངྒཱི་ནི་ཀྑ་ས་ཏ་སྶཱ་པི ཧེ་ཏུ… པ་ཐ་ཝི་ཡཱ་པི ཛཱ་ཏ་རཱུ་པ་པ་རི་པཱུ་རཱ་ཡ ཧེ་ཏུ… ཨཱ་མི་ས་ཀི་ཉྩི་ཀྑ་ཧེ་ཏུ་པི… ཛཱི་ཝི་ཏ་ཧེ་ཏུ་པི… ཛ་ན་པ་ད་ཀ་ལྱཱ་ཎི་ཡཱ་པི ཧེ་ཏུ ས་མྤ་ཛཱ་ན་མུ་སཱ བྷཱ་སེ་ཡྻཱ’ཏི. ཏ་མེ་ནཾ པ་སྶཱ་མི ཨ་པ་རེ་ན ས་མ་ཡེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ ས་མྤ་ཛཱ་ན་མུ་སཱ བྷཱ་ས་ནྟཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ད་ས་མཾ.
དུ་ཏི་ཡོ ཝ་གྒོ.
ཏ་སྶུ་དྡཱ་ནཾ –
དྭེ པཱ་ཏི དྭེ སུ་ཝ་ཎྞཱ ཙ, སི་ངྒཱི་ཧི ཨ་པ་རེ དུ་ཝེ;
པ་ཐ་ཝཱི ཀི་ཉྩི་ཀྑ་ཛཱི་ཝི་ཏཾ, ཛ་ན་པ་ད་ཀ་ལྱཱ་ཎི་ཡཱ ད་སཱ་ཏི.
༣. ཏ་ཏི་ཡ་ཝ་གྒོ
༡. མཱ་ཏུ་གཱ་མ་སུ་ཏྟཾ
༡༧༠. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ན ཏ་སྶ, བྷི་ཀྑ་ཝེ, མཱ་ཏུ་གཱ་མོ ཨེ་ཀོ ཨེ་ཀ་སྶ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཡ་སྶ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ …པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. པ་ཋ་མཾ.
༢. ཀ་ལྱཱ་ཎཱི་སུ་ཏྟཾ
༡༧༡. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ན ཏ་སྶ, བྷི་ཀྑ་ཝེ, ཛ་ན་པ་ད་ཀ་ལྱཱ་ཎཱི ཨེ་ཀཱ ཨེ་ཀ་སྶ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཡ་སྶ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. དུ་ཏི་ཡཾ.
༣. ཨེ་ཀ་པུ་ཏྟ་ཀ་སུ་ཏྟཾ
༡༧༢. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ས་དྡྷཱ, བྷི་ཀྑ་ཝེ, ཨུ་པཱ་སི་ཀཱ ཨེ་ཀ་པུ་ཏྟ་ཀཾ པི་ཡཾ མ་ནཱ་པཾ ཨེ་ཝཾ ས་མྨཱ ཨཱ་ཡཱ་ཙ་མཱ་ནཱ ཨཱ་ཡཱ་ཙེ་ཡྻ – ‘ཏཱ་དི་སོ, ཏཱ་ཏ, བྷ་ཝཱ་ཧི ཡཱ་དི་སོ ཙི་ཏྟོ ཙ ག་ཧ་པ་ཏི ཧ་ཏྠ་ཀོ ཙ ཨཱ་ལ༹་ཝ་ཀོ’ཏི. ཨེ་སཱ, བྷི་ཀྑ་ཝེ, ཏུ་ལཱ ཨེ་ཏཾ པ་མཱ་ཎཾ མ་མ སཱ་ཝ་ཀཱ་ནཾ ཨུ་པཱ་ས་ཀཱ་ནཾ, ཡ་དི་དཾ ཙི་ཏྟོ ཙ ག་ཧ་པ་ཏི ཧ་ཏྠ་ཀོ ཙ ཨཱ་ལ༹་ཝ་ཀོ. ས་ཙེ ཁོ ཏྭཾ, ཏཱ་ཏ, ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་སི; ཏཱ་དི་སོ, ཏཱ་ཏ, བྷ་ཝཱ་ཧི ཡཱ་དི་སཱ སཱ་རི་པུ་ཏྟ་མོ་གྒ་ལླཱ་ནཱ་ཏི. ཨེ་སཱ, བྷི་ཀྑ་ཝེ, ཏུ་ལཱ ཨེ་ཏཾ པ་མཱ་ཎཾ མ་མ སཱ་ཝ་ཀཱ་ནཾ བྷི་ཀྑཱུ་ནཾ, ཡ་དི་དཾ སཱ་རི་པུ་ཏྟ་མོ་གྒ་ལཱ་ནཱ. མཱ ཙ ཁོ ཏྭཾ, ཏཱ་ཏ, སེ་ཁཾ ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏཱུ་ཏི. ཏ་ཉྩེ, བྷི་ཀྑ་ཝེ, བྷི་ཀྑུཾ སེ་ཁཾ ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏི, སོ ཏ་སྶ ཧོ་ཏི ཨ་ནྟ་རཱ་ཡཱ་ཡ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཏ་ཏི་ཡཾ.
༤. ཨེ་ཀ་དྷཱི་ཏུ་སུ་ཏྟཾ
༡༧༣. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ས་དྡྷཱ བྷི་ཀྑ་ཝེ ཨུ་པཱ་སི་ཀཱ ཨེ་ཀཾ དྷཱི་ཏ་རཾ པི་ཡཾ མ་ནཱ་པཾ ཨེ་ཝཾ ས་མྨཱ ཨཱ་ཡཱ་ཙ་མཱ་ནཱ ཨཱ་ཡཱ་ཙེ་ཡྻ – ‘ཏཱ་དི་སཱ, ཨ་ཡྻེ, བྷ་ཝཱ་ཧི ཡཱ་དི་སཱ ཁུ་ཛྫུ་ཏྟ་རཱ ཙ ཨུ་པཱ་སི་ཀཱ ཝེ་ལུ༹་ཀ་ཎྜ་ཀི་ཡཱ [ཝེ་ལུ༹་ཀ་ཎྜ་ཀཱི (སཱི. ཚ་ཀྐ་ངྒུ་ཏྟ་རེ་པི)] ཙ ན་ནྡ་མཱ་ཏཱ’ཏི. ཨེ་སཱ, བྷི་ཀྑ་ཝེ, ཏུ་ལཱ ཨེ་ཏཾ པ་མཱ་ཎཾ མ་མ སཱ་ཝི་ཀཱ་ནཾ ཨུ་པཱ་སི་ཀཱ་ནཾ, ཡ་དི་དཾ ཁུ་ཛྫུ་ཏྟ་རཱ ཙ ཨུ་པཱ་སི་ཀཱ ཝེ་ལུ༹་ཀ་ཎྜ་ཀི་ཡཱ ཙ ན་ནྡ་མཱ་ཏཱ. ས་ཙེ ཁོ ཏྭཾ, ཨ་ཡྻེ, ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་སི; ཏཱ་དི་སཱ, ཨ་ཡྻེ, བྷ་ཝཱ་ཧི ཡཱ་དི་སཱ ཁེ་མཱ ཙ བྷི་ཀྑུ་ནཱི ཨུ་པྤ་ལ་ཝ་ཎྞཱ ཙཱ་ཏི. ཨེ་སཱ, བྷི་ཀྑ་ཝེ, ཏུ་ལཱ ཨེ་ཏཾ པ་མཱ་ཎཾ མ་མ སཱ་ཝི་ཀཱ་ནཾ བྷི་ཀྑུ་ནཱི་ནཾ, ཡ་དི་དཾ ཁེ་མཱ ཙ བྷི་ཀྑུ་ནཱི ཨུ་པྤ་ལ་ཝ་ཎྞཱ ཙ. མཱ ཙ ཁོ ཏྭཾ, ཨ་ཡྻེ, སེ་ཁཾ ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏཱུ་ཏི. ཏཾ ཙེ, བྷི་ཀྑ་ཝེ, བྷི་ཀྑུ་ནིཾ སེ་ཁཾ ཨ་པྤ་ཏྟ་མཱ་ན་སཾ ལཱ་བྷ་ས་ཀྐཱ་ར་སི་ལོ་ཀོ ཨ་ནུ་པཱ་པུ་ཎཱ་ཏི, སོ ཏ་སྶཱ ཧོ་ཏི ཨ་ནྟ་རཱ་ཡཱ་ཡ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཙ་ཏུ་ཏྠཾ.
༥. ས་མ་ཎ་བྲཱ་ཧྨ་ཎ་སུ་ཏྟཾ
༡༧༤. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཡེ ཧི ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ལཱ་བྷ་ས་ཀྐཱ་ར་སི་ལོ་ཀ་སྶ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ ན་པྤ་ཛཱ་ན་ནྟི, ན མེ ཏེ, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ས་མ་ཎེ་སུ ཝཱ ས་མ་ཎ་ས་མྨ་ཏཱ བྲཱ་ཧྨ་ཎེ་སུ ཝཱ བྲཱ་ཧྨ་ཎ་ས་མྨ་ཏཱ, ན ཙ པ་ན ཏེ ཨཱ་ཡ་སྨ་ནྟཱ སཱ་མ་ཉྙ་ཏྠཾ ཝཱ བྲ་ཧྨ་ཉྙ་ཏྠཾ ཝཱ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟི. ཡེ ཙ ཁོ ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ལཱ་བྷ་ས་ཀྐཱ་ར་སི་ལོ་ཀ་སྶ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ པ་ཛཱ་ན་ནྟི, ཏེ ཙ ཁོ མེ, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ས་མ་ཎེ་སུ ཙེ་ཝ ས་མ་ཎ་ས་མྨ་ཏཱ བྲཱ་ཧྨ་ཎེ་སུ ཙ བྲཱ་ཧྨ་ཎ་ས་མྨ་ཏཱ, ཏེ ཙ པ་ནཱ་ཡ་སྨ་ནྟོ སཱ་མ་ཉྙ་ཏྠ་ཉྩ བྲ་ཧྨ་ཉྙ་ཏྠ་ཉྩ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟཱི’’ཏི. པ་ཉྩ་མཾ.
༦. དུ་ཏི་ཡ་ས་མ་ཎ་བྲཱ་ཧྨ་ཎ་སུ་ཏྟཾ
༡༧༥. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཡེ ཧི ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ལཱ་བྷ་ས་ཀྐཱ་ར་སི་ལོ་ཀ་སྶ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ ཡ་ཐཱ་བྷཱུ་ཏཾ ན་པྤ་ཛཱ་ན་ནྟི…པེ… པ་ཛཱ་ན་ནྟི…པེ… ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟཱི’’ཏི. ཚ་ཊྛཾ.
༧. ཏ་ཏི་ཡ་ས་མ་ཎ་བྲཱ་ཧྨ་ཎ་སུ་ཏྟཾ
༡༧༦. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཡེ ཧི ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ལཱ་བྷ་ས་ཀྐཱ་ར་སི་ལོ་ཀཾ ཡ་ཐཱ་བྷཱུ་ཏཾ ན་པྤ་ཛཱ་ན་ནྟི, ལཱ་བྷ་ས་ཀྐཱ་ར་སི་ལོ་ཀ་ས་མུ་ད་ཡཾ ན་པྤ་ཛཱ་ན་ནྟི, ལཱ་བྷ་ས་ཀྐཱ་ར་སི་ལོ་ཀ་ནི་རོ་དྷཾ ན་པྤ་ཛཱ་ན་ནྟི, ལཱ་བྷ་ས་ཀྐཱ་ར་སི་ལོ་ཀ་ནི་རོ་དྷ་གཱ་མི་ནིཾ པ་ཊི་པ་དཾ ན་པྤ་ཛཱ་ན་ནྟི …པེ… པ་ཛཱ་ན་ནྟི…པེ… ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟཱི’’ཏི. ས་ཏྟ་མཾ.
༨. ཚ་ཝི་སུ་ཏྟཾ
༡༧༧. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀོ, བྷི་ཀྑ་ཝེ, ཚ་ཝིཾ ཚི་ནྡ་ཏི, ཚ་ཝིཾ ཚེ་ཏྭཱ ཙ་མྨཾ ཚི་ནྡ་ཏི, ཙ་མྨཾ ཚེ་ཏྭཱ མཾ་སཾ ཚི་ནྡ་ཏི, མཾ་སཾ ཚེ་ཏྭཱ ནྷཱ་རུཾ ཚི་ནྡ་ཏི, ནྷཱ་རུཾ ཚེ་ཏྭཱ ཨ་ཊྛིཾ ཚི་ནྡ་ཏི, ཨ་ཊྛིཾ ཚེ་ཏྭཱ ཨ་ཊྛི་མི་ཉྫཾ ཨཱ་ཧ་ཙྩ ཏི་ཊྛ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ བྷི་ཀྑ་ཝེ, སི་ཀྑི་ཏ་བྦ’’ནྟི. ཨ་ཊྛ་མཾ.
༩. ར་ཛྫུ་སུ་ཏྟཾ
༡༧༨. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀོ, བྷི་ཀྑ་ཝེ, ཚ་ཝིཾ ཚི་ནྡ་ཏི, ཚ་ཝིཾ ཚེ་ཏྭཱ ཙ་མྨཾ ཚི་ནྡ་ཏི, ཙ་མྨཾ ཚེ་ཏྭཱ མཾ་སཾ ཚི་ནྡ་ཏི, མཾ་སཾ ཚེ་ཏྭཱ ནྷཱ་རུཾ ཚི་ནྡ་ཏི, ནྷཱ་རུཾ ཚེ་ཏྭཱ ཨ་ཊྛིཾ ཚི་ནྡ་ཏི, ཨ་ཊྛིཾ ཚེ་ཏྭཱ ཨ་ཊྛི་མི་ཉྫཾ ཨཱ་ཧ་ཙྩ ཏི་ཊྛ་ཏི’’.
‘‘སེ་ཡྻ་ཐཱ་པི, བྷི་ཀྑ་ཝེ, བ་ལ་ཝཱ པུ་རི་སོ ད་ལ༹ྷཱ་ཡ ཝཱ་ལ༹་ར་ཛྫུ་ཡཱ ཛ་ངྒྷཾ ཝེ་ཋེ་ཏྭཱ གྷཾ་སེ་ཡྻ. སཱ ཚ་ཝིཾ ཚི་ནྡེ་ཡྻ, ཚ་ཝིཾ ཚེ་ཏྭཱ ཙ་མྨཾ ཚི་ནྡེ་ཡྻ, ཙ་མྨཾ ཚེ་ཏྭཱ མཾ་སཾ ཚི་ནྡེ་ཡྻ, མཾ་སཾ ཚེ་ཏྭཱ ནྷཱ་རུཾ ཚི་ནྡེ་ཡྻ, ནྷཱ་རུཾ ཚེ་ཏྭཱ ཨ་ཊྛིཾ ཚི་ནྡེ་ཡྻ, ཨ་ཊྛིཾ ཚེ་ཏྭཱ ཨ་ཊྛི་མི་ཉྫཾ ཨཱ་ཧ་ཙྩ ཏི་ཊྛེ་ཡྻ. ཨེ་ཝ་མེ་ཝ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཚ་ཝིཾ ཚི་ནྡ་ཏི, ཚ་ཝིཾ ཚེ་ཏྭཱ ཙ་མྨཾ ཚི་ནྡ་ཏི, ཙ་མྨཾ ཚེ་ཏྭཱ མཾ་སཾ ཚི་ནྡ་ཏི, མཾ་སཾ ཚེ་ཏྭཱ ནྷཱ་རུཾ ཚི་ནྡ་ཏི, ནྷཱ་རུཾ ཚེ་ཏྭཱ ཨ་ཊྛིཾ ཚི་ནྡ་ཏི, ཨ་ཊྛིཾ ཚེ་ཏྭཱ ཨ་ཊྛིཾ་མི་ཉྫཾ ཨཱ་ཧ་ཙྩ ཏི་ཊྛ་ཏི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ན་ཝ་མཾ.
༡༠. བྷི་ཀྑུ་སུ་ཏྟཾ
༡༧༩. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཡོ་པི སོ, བྷི་ཀྑ་ཝེ, བྷི་ཀྑུ ཨ་ར་ཧཾ ཁཱི་ཎཱ་ས་ཝོ ཏ་སྶ་པཱ་ཧཾ ལཱ་བྷ་ས་ཀྐཱ་ར་སི་ལོ་ཀོ ཨ་ནྟ་རཱ་ཡཱ་ཡ ཝ་དཱ་མཱི’’ཏི. ཨེ་ཝཾ ཝུ་ཏྟེ, ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀི་སྶ པ་ན, བྷ་ནྟེ, ཁཱི་ཎཱ་ས་ཝ་སྶ བྷི་ཀྑུ་ནོ ལཱ་བྷ་ས་ཀྐཱ་ར་སི་ལོ་ཀོ ཨ་ནྟ་རཱ་ཡཱ་ཡཱ’’ཏི? ‘‘ཡཱ ཧི་སྶ སཱ, ཨཱ་ན་ནྡ, ཨ་ཀུ་པྤཱ ཙེ་ཏོ་ཝི་མུ་ཏྟི ནཱ་ཧཾ ཏ་སྶཱ ལཱ་བྷ་ས་ཀྐཱ་ར་སི་ལོ་ཀཾ ཨ་ནྟ་རཱ་ཡཱ་ཡ ཝ་དཱ་མི. ཡེ ཙ ཁྭ་སྶ, ཨཱ་ན་ནྡ, ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ དི་ཊྛ་དྷ་མྨ་སུ་ཁ་ཝི་ཧཱ་རཱ ཨ་དྷི་ག་ཏཱ ཏེ་སཱ་ཧ་མ་སྶ ལཱ་བྷ་ས་ཀྐཱ་ར་སི་ལོ་ཀཾ ཨ་ནྟ་རཱ་ཡཱ་ཡ ཝ་དཱ་མི. ཨེ་ཝཾ དཱ་རུ་ཎོ ཁོ, ཨཱ་ན་ནྡ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཏ་སྨཱ་ཏི་ཧཱ་ན་ནྡ, ཨེ་ཝཾ སི་ཀྑི་ཏ་བྦཾ – ‘ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ པ་ཛ་ཧི་སྶཱ་མ, ན ཙ ནོ ཨུ་པྤ་ནྣོ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི’ཏི. ཨེ་ཝ་ཉྷི ཝོ, ཨཱ་ན་ནྡ, སི་ཀྑི་ཏ་བྦ’’ནྟི. ད་ས་མཾ.
ཏ་ཏི་ཡོ ཝ་གྒོ.
ཏ་སྶུ་དྡཱ་ནཾ –
མཱ་ཏུ་གཱ་མོ ཙ ཀ་ལྱཱ་ཎཱི, པུ་ཏྟོ ཙ ཨེ་ཀ་དྷཱི་ཏུ ཙ;
ས་མ་ཎ་བྲཱ་ཧྨ་ཎཱ ཏཱི་ཎི, ཚ་ཝི ར་ཛྫུ ཙ བྷི་ཀྑུ་ནཱ་ཏི.
༤. ཙ་ཏུ་ཏྠ་ཝ་གྒོ
༡. བྷི་ནྡི་སུ་ཏྟཾ
༡༨༠. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏོ པ་རི་ཡཱ་དི་ཎྞ་ཙི་ཏྟོ, བྷི་ཀྑ་ཝེ, དེ་ཝ་ད་ཏྟོ ས་ངྒྷཾ བྷི་ནྡི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… སི་ཀྑི་ཏ་བྦ’’ནྟི. པ་ཋ་མཾ.
༢. ཀུ་ས་ལ་མཱུ་ལ་སུ་ཏྟཾ
༡༨༡. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏ་སྶ པ་རི་ཡཱ་དི་ཎྞ་ཙི་ཏྟ་སྶ, བྷི་ཀྑ་ཝེ, དེ་ཝ་ད་ཏྟ་སྶ ཀུ་ས་ལ་མཱུ་ལཾ ས་མུ་ཙྪེ་ད་མ་ག་མཱ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… སི་ཀྑི་ཏ་བྦ’’ནྟི. དུ་ཏི་ཡཾ.
༣. ཀུ་ས་ལ་དྷ་མྨ་སུ་ཏྟཾ
༡༨༢. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏ་སྶ པ་རི་ཡཱ་དི་ཎྞ་ཙི་ཏྟ་སྶ, བྷི་ཀྑ་ཝེ, དེ་ཝ་ད་ཏྟ་སྶ ཀུ་ས་ལོ དྷ་མྨོ ས་མུ་ཙྪེ་ད་མ་ག་མཱ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… སི་ཀྑི་ཏ་བྦ’’ནྟི. ཏ་ཏི་ཡཾ.
༤. སུ་ཀྐ་དྷ་མྨ་སུ་ཏྟཾ
༡༨༣. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏ་སྶ པ་རི་ཡཱ་དི་ཎྞ་ཙི་ཏྟ་སྶ, བྷི་ཀྑ་ཝེ, དེ་ཝ་ད་ཏྟ་སྶ སུ་ཀྐོ དྷ་མྨོ ས་མུ་ཙྪེ་ད་མ་ག་མཱ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… སི་ཀྑི་ཏ་བྦ’’ནྟི. ཙ་ཏུ་ཏྠཾ.
༥. ཨ་ཙི་ར་པ་ཀྐ་ནྟ་སུ་ཏྟཾ
༡༨༤. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ ཨ་ཙི་ར་པ་ཀྐ་ནྟེ དེ་ཝ་ད་ཏྟེ. ཏ་ཏྲ ཁོ བྷ་ག་ཝཱ དེ་ཝ་ད་ཏྟཾ ཨཱ་ར་བྦྷ བྷི་ཀྑཱུ ཨཱ་མ་ནྟེ་སི – ‘‘ཨ་ཏྟ་ཝ་དྷཱ་ཡ, བྷི་ཀྑ་ཝེ, དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི’’.
‘‘སེ་ཡྻ་ཐཱ་པི, བྷི་ཀྑ་ཝེ, ཀ་ད་ལཱི ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.
‘‘སེ་ཡྻ་ཐཱ་པི, བྷི་ཀྑ་ཝེ, ཝེ་ལུ༹ ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.
‘‘སེ་ཡྻ་ཐཱ་པི, བྷི་ཀྑ་ཝེ, ན་ལོ༹ ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.
‘‘སེ་ཡྻ་ཐཱ་པི, བྷི་ཀྑ་ཝེ, ཨ་སྶ་ཏ་རཱི ཨ་ཏྟ་ཝ་དྷཱ་ཡ ག་བྦྷཾ ག་ཎྷཱ་ཏི, པ་རཱ་བྷ་ཝཱ་ཡ ག་བྦྷཾ ག་ཎྷཱ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི.
ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
‘‘ཕ་ལཾ ཝེ ཀ་ད་ལིཾ ཧ་ནྟི, ཕ་ལཾ ཝེ་ལུ༹ཾ ཕ་ལཾ ན་ལ༹ཾ;
ས་ཀྐཱ་རོ ཀཱ་པུ་རི་སཾ ཧ་ནྟི, ག་བྦྷོ ཨ་སྶ་ཏ་རིཾ ཡ་ཐཱ་ཏི’’. པ་ཉྩ་མཾ;
༦. པ་ཉྩ་ར་ཐ་ས་ཏ་སུ་ཏྟཾ
༡༨༥. རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན དེ་ཝ་ད་ཏྟ་སྶ ཨ་ཛཱ་ཏ་ས་ཏྟུ་ཀུ་མཱ་རོ པ་ཉྩ་ཧི ར་ཐ་ས་ཏེ་ཧི སཱ་ཡཾ པཱ་ཏཾ ཨུ་པ་ཊྛཱ་ནཾ ག་ཙྪ་ཏི, པ་ཉྩ ཙ ཐཱ་ལི་པཱ་ཀ་ས་ཏཱ་ནི བྷ་ཏྟཱ་བྷི་ཧཱ་རོ ཨ་བྷི་ཧ་རཱི་ཡ་ཏི. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘དེ་ཝ་ད་ཏྟ་སྶ, བྷ་ནྟེ, ཨ་ཛཱ་ཏ་ས་ཏྟུ་ཀུ་མཱ་རོ པ་ཉྩ་ཧི ར་ཐ་ས་ཏེ་ཧི སཱ་ཡཾ པཱ་ཏཾ ཨུ་པ་ཊྛཱ་ནཾ ག་ཙྪ་ཏི, པ་ཉྩ ཙ ཐཱ་ལི་པཱ་ཀ་ས་ཏཱ་ནི བྷ་ཏྟཱ་བྷི་ཧཱ་རོ ཨ་བྷི་ཧ་རཱི་ཡ་ཏཱི’’ཏི. ‘‘མཱ, བྷི་ཀྑ་ཝེ, དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀཾ པི་ཧ་ཡི་ཏྠ. ཡཱ་ཝ་ཀཱི་ཝ་ཉྩ, བྷི་ཀྑ་ཝེ, དེ་ཝ་ད་ཏྟ་སྶ ཨ་ཛཱ་ཏ་ས་ཏྟུ་ཀུ་མཱ་རོ པ་ཉྩ་ཧི ར་ཐ་ས་ཏེ་ཧི སཱ་ཡཾ པཱ་ཏཾ ཨུ་པ་ཊྛཱ་ནཾ ག་མི་སྶ་ཏི, པ་ཉྩ ཙ ཐཱ་ལི་པཱ་ཀ་ས་ཏཱ་ནི བྷ་ཏྟཱ་བྷི་ཧཱ་རོ ཨཱ་ཧ་རཱི་ཡི་སྶ་ཏི, ཧཱ་ནི་ཡེ་ཝ, བྷི་ཀྑ་ཝེ, དེ་ཝ་ད་ཏྟ་སྶ པཱ་ཊི་ཀ་ངྑཱ ཀུ་ས་ལེ་སུ དྷ་མྨེ་སུ, ནོ ཝུ་དྡྷི’’.
‘‘སེ་ཡྻ་ཐཱ་པི, བྷི་ཀྑ་ཝེ, ཙ་ཎྜ་སྶ ཀུ་ཀྐུ་ར་སྶ ནཱ་སཱ་ཡ པི་ཏྟཾ བྷི་ནྡེ་ཡྻུཾ, ཨེ་ཝ་ཉྷི སོ, བྷི་ཀྑ་ཝེ, ཀུ་ཀྐུ་རོ བྷི་ཡྻོ་སོ་མ་ཏྟཱ་ཡ ཙ་ཎྜ་ཏ་རོ ཨ་སྶ; ཨེ་ཝ་མེ་ཝ, བྷི་ཀྑ་ཝེ, ཡཱ་ཝ་ཀཱི་ཝ་ཉྩ དེ་ཝ་ད་ཏྟ་སྶ ཨ་ཛཱ་ཏ་ས་ཏྟུ་ཀུ་མཱ་རོ པ་ཉྩ་ཧི ར་ཐ་ས་ཏེ་ཧི སཱ་ཡཾ པཱ་ཏཾ ཨུ་པ་ཊྛཱ་ནཾ ག་མི་སྶ་ཏི, པ་ཉྩ ཙ ཐཱ་ལི་པཱ་ཀ་ས་ཏཱ་ནི བྷ་ཏྟཱ་བྷི་ཧཱ་རོ ཨཱ་ཧ་རཱི་ཡི་སྶ་ཏི, ཧཱ་ནི་ཡེ་ཝ, བྷི་ཀྑ་ཝེ, དེ་ཝ་ད་ཏྟ་སྶ པཱ་ཊི་ཀ་ངྑཱ ཀུ་ས་ལེ་སུ དྷ་མྨེ་སུ, ནོ ཝུ་དྡྷི. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ…པེ… ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཚ་ཊྛཾ.
༧. མཱ་ཏུ་སུ་ཏྟཾ
༡༨༦. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ན ཙཱ་ཡ་མཱ་ཡ་སྨཱ མཱ་ཏུ་པི ཧེ་ཏུ ས་མྤ་ཛཱ་ན་མུ་སཱ བྷཱ་སེ་ཡྻཱ’ཏི. ཏ་མེ་ནཾ པ་སྶཱ་མི ཨ་པ་རེ་ན ས་མ་ཡེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ ས་མྤ་ཛཱ་ན་མུ་སཱ བྷཱ་ས་ནྟཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ པ་ཛ་ཧི་སྶཱ་མ. ན ཙ ནོ ཨུ་པྤ་ནྣོ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི’ཏི. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ས་ཏྟ་མཾ.
༨-༡༣. པི་ཏུ་སུ་ཏྟཱ་དི་ཚ་ཀྐཾ
༡༨༧. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དཱ་རུ་ཎོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ན ཙཱ་ཡ་མཱ་ཡ་སྨཱ པི་ཏུ་པི ཧེ་ཏུ…པེ… བྷཱ་ཏུ་པི ཧེ་ཏུ… བྷ་གི་ནི་ཡཱ་པི ཧེ་ཏུ… པུ་ཏྟ་སྶ་པི ཧེ་ཏུ… དྷཱི་ཏུ་ཡཱ་པི ཧེ་ཏུ… པ་ཛཱ་པ་ཏི་ཡཱ་པི ཧེ་ཏུ ས་མྤ་ཛཱ་ན་མུ་སཱ བྷཱ་སེ་ཡྻཱ’ཏི. ཏ་མེ་ནཾ པ་སྶཱ་མི ཨ་པ་རེ་ན ས་མ་ཡེ་ན ལཱ་བྷ་ས་ཀྐཱ་ར་སི་ལོ་ཀེ་ན ཨ་བྷི་བྷཱུ་ཏཾ པ་རི་ཡཱ་དི་ཎྞ་ཙི་ཏྟཾ ས་མྤ་ཛཱ་ན་མུ་སཱ བྷཱ་ས་ནྟཾ. ཨེ་ཝཾ དཱ་རུ་ཎོ ཁོ, བྷི་ཀྑ་ཝེ, ལཱ་བྷ་ས་ཀྐཱ་ར་སི་ལོ་ཀོ ཀ་ཊུ་ཀོ ཕ་རུ་སོ ཨ་ནྟ་རཱ་ཡི་ཀོ ཨ་ནུ་ཏྟ་ར་སྶ ཡོ་ག་ཀྑེ་མ་སྶ ཨ་དྷི་ག་མཱ་ཡ. ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཨུ་པྤ་ནྣཾ ལཱ་བྷ་ས་ཀྐཱ་ར་སི་ལོ་ཀཾ པ་ཛ་ཧི་སྶཱ་མ, ན ཙ ནོ ཨུ་པྤ་ནྣོ ལཱ་བྷ་ས་ཀྐཱ་ར་སི་ལོ་ཀོ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི’ཏི. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཏེ་ར་ས་མཾ.
ཙ་ཏུ་ཏྠོ ཝ་གྒོ.
ཏ་སྶུ་དྡཱ་ནཾ –
བྷི་ནྡི མཱུ་ལཾ དུ་ཝེ དྷ་མྨཱ, པ་ཀྐ་ནྟཾ ར་ཐ མཱ་ཏ་རི;
པི་ཏཱ བྷཱ་ཏཱ ཙ བྷ་གི་ནཱི, པུ་ཏྟོ དྷཱི་ཏཱ པ་ཛཱ་པ་ཏཱི་ཏི.
ལཱ་བྷ་ས་ཀྐཱ་ར་སཾ་ཡུ་ཏྟཾ ས་མ་ཏྟཾ.