༡༢. པ་རཾ་མ་ར་ཎ་སུ་ཏྟཾ

༡༥༥. ཨེ་ཀཾ ས་མ་ཡཾ ཨཱ་ཡ་སྨཱ ཙ མ་ཧཱ་ཀ་སྶ་པོ ཨཱ་ཡ་སྨཱ ཙ སཱ་རི་པུ་ཏྟོ བཱ་རཱ་ཎ་སི་ཡཾ ཝི་ཧ་ར་ནྟི ཨི་སི་པ་ཏ་ནེ མི་ག་དཱ་ཡེ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ མ་ཧཱ་ཀ་སྶ་པོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ མ་ཧཱ་ཀ་སྶ་པེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙ – ‘‘ཀིཾ ནུ ཁོ, ཨཱ་ཝུ་སོ ཀ་སྶ་པ, ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི? ‘‘ཨ་བྱཱ་ཀ་ཏཾ ཁོ ཨེ་ཏཾ, ཨཱ་ཝུ་སོ, བྷ་ག་ཝ་ཏཱ – ‘ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’’ཏི. ‘‘ཀིཾ པ་ནཱ་ཝུ་སོ, ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི? ‘‘ཨེ་ཝ་མྤི ཁོ, ཨཱ་ཝུ་སོ, ཨ་བྱཱ་ཀ་ཏཾ བྷ་ག་ཝ་ཏཱ – ‘ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’’ཏི. ‘‘ཀིཾ ནུ ཁོ, ཨཱ་ཝུ་སོ, ཧོ་ཏི ཙ ན ཙ ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི? ‘‘ཨ་བྱཱ་ཀ་ཏཾ ཁོ ཨེ་ཏཾ, ཨཱ་ཝུ་སོ, བྷ་ག་ཝ་ཏཱ – ‘ཧོ་ཏི ཙ ན ཙ ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’’ཏི. ‘‘ཀིཾ པ་ནཱ་ཝུ་སོ, ནེ་ཝ ཧོ་ཏི, ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི? ‘‘ཨེ་ཝ་མྤི ཁོ, ཨཱ་ཝུ་སོ, ཨ་བྱཱ་ཀ་ཏཾ བྷ་ག་ཝ་ཏཱ – ‘ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’’ཏི. ‘‘ཀ་སྨཱ ཙེ་ཏཾ, ཨཱ་ཝུ་སོ, ཨ་བྱཱ་ཀ་ཏཾ བྷ་ག་ཝ་ཏཱ’’ཏི? ‘‘ན ཧེ་ཏཾ, ཨཱ་ཝུ་སོ, ཨ་ཏྠ་སཾ་ཧི་ཏཾ ནཱ་དི་བྲ་ཧྨ་ཙ་རི་ཡ་ཀཾ ན ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི. ཏ་སྨཱ ཏཾ ཨ་བྱཱ་ཀ་ཏཾ བྷ་ག་ཝ་ཏཱ’’ཏི.

‘‘ཨ་ཐ ཀི་ཉྩ་ར་ཧཱ་ཝུ་སོ, བྱཱ་ཀ་ཏཾ བྷ་ག་ཝ་ཏཱ’’ཏི? ‘‘ཨི་དཾ ‘དུ་ཀྑ’ནྟི ཁོ, ཨཱ་ཝུ་སོ, བྱཱ་ཀ་ཏཾ བྷ་ག་ཝ་ཏཱ; ཨ་ཡཾ ‘དུ་ཀྑ་ས་མུ་ད་ཡོ’ཏི བྱཱ་ཀ་ཏཾ བྷ་ག་ཝ་ཏཱ; ཨ་ཡཾ ‘དུ་ཀྑ་ནི་རོ་དྷོ’ཏི བྱཱ་ཀ་ཏཾ བྷ་ག་ཝ་ཏཱ; ཨ་ཡཾ ‘དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི བྱཱ་ཀ་ཏཾ བྷ་ག་ཝ་ཏཱ’’ཏི. ‘‘ཀ་སྨཱ ཙེ་ཏཾ, ཨཱ་ཝུ་སོ, བྱཱ་ཀ་ཏཾ བྷ་ག་ཝ་ཏཱ’’ཏི? ‘‘ཨེ་ཏ་ཉྷི, ཨཱ་ཝུ་སོ, ཨ་ཏྠ་སཾ་ཧི་ཏཾ ཨེ་ཏཾ ཨཱ་དི་བྲ་ཧྨ་ཙ་རི་ཡ་ཀཾ ཨེ་ཏཾ ནི་བྦི་དཱ་ཡ ཝི་རཱ་གཱ་ཡ ནི་རོ་དྷཱ་ཡ ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཏ་སྨཱ ཏཾ བྱཱ་ཀ་ཏཾ བྷ་ག་ཝ་ཏཱ’’ཏི. དྭཱ་ད་ས་མཾ.