༡༡. ཙཱི་ཝ་ར་སུ་ཏྟཾ
༡༥༤. ཨེ་ཀཾ ས་མ་ཡཾ ཨཱ་ཡ་སྨཱ མ་ཧཱ་ཀ་སྶ་པོ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨཱ་ན་ནྡོ ད་ཀྑི་ཎ་གི་རི་སྨིཾ ཙཱ་རི་ཀཾ ཙ་ར་ཏི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ.
ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨཱ་ན་ནྡ་སྶ ཏིཾ་ས་མ་ཏྟཱ ས་དྡྷི་ཝི་ཧཱ་རི་ནོ བྷི་ཀྑཱུ སི་ཀྑཾ པ་ཙྩ་ཀྑཱ་ཡ ཧཱི་ནཱ་ཡཱ་ཝ་ཏྟཱ བྷ་ཝ་ནྟི ཡེ་བྷུ་ཡྻེ་ན ཀུ་མཱ་ར་བྷཱུ་ཏཱ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ད་ཀྑི་ཎ་གི་རི་སྨིཾ ཡ་ཐཱ་བྷི་ར་ནྟཾ ཙཱ་རི་ཀཾ ཙ་རི་ཏྭཱ ཡེ་ན རཱ་ཛ་ག་ཧཾ ཝེ་ལུ༹་ཝ་ནཾ ཀ་ལ་ནྡ་ཀ་ནི་ཝཱ་པོ ཡེ་ནཱ་ཡ་སྨཱ མ་ཧཱ་ཀ་སྶ་པོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ ཨཱ་ན་ནྡཾ ཨཱ་ཡ་སྨཱ མ་ཧཱ་ཀ་སྶ་པོ ཨེ་ཏ་ད་ཝོ་ཙ – ‘‘ཀ་ཏི ནུ ཁོ, ཨཱ་ཝུ་སོ ཨཱ་ན་ནྡ, ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ ཀུ་ལེ་སུ ཏི་ཀ་བྷོ་ཛ་ནཾ པ་ཉྙ་ཏྟ’’ནྟི?
‘‘ཏ་ཡོ ཁོ, བྷ་ནྟེ ཀ་སྶ་པ, ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ ཀུ་ལེ་སུ ཏི་ཀ་བྷོ་ཛ་ནཾ པ་ཉྙ་ཏྟཾ – དུ་མྨ་ངྐཱུ་ནཾ པུ་གྒ་ལཱ་ནཾ ནི་གྒ་ཧཱ་ཡ པེ་ས་ལཱ་ནཾ བྷི་ཀྑཱུ་ནཾ ཕཱ་སུ་ཝི་ཧཱ་རཱ་ཡ, མཱ པཱ་པི་ཙྪཱ པ་ཀྑཾ ནི་སྶཱ་ཡ ས་ངྒྷཾ བྷི་ནྡེ་ཡྻུཾ [ཝི་ན་ཡ་པི་ཊ་ཀེ ཙཱུ་ལ༹་ཝ་གྒེ སཾ་གྷ་བྷེ་ད་ཀ་ཀྑ་ནྡྷ་ཀེ ཝ་ཛི་ར་བུ་དྡྷི་ཡཾ ཨ་ཉྙ་ཐཱ ས་མྦ་ནྡྷོ ད་སྶི་ཏོ], ཀུ་ལཱ་ནུ་དྡ་ཡ་ཏཱ་ཡ ཙ. ཨི་མེ ཁོ, བྷ་ནྟེ ཀ་སྶ་པ, ཏ་ཡོ ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ ཀུ་ལེ་སུ ཏི་ཀ་བྷོ་ཛ་ནཾ པ་ཉྙ་ཏྟ’’ནྟི.
‘‘ཨ་ཐ ཀི་ཉྩ་ར་ཧི ཏྭཾ, ཨཱ་ཝུ་སོ ཨཱ་ན་ནྡ, ཨི་མེ་ཧི ན་ཝེ་ཧི བྷི་ཀྑཱུ་ཧི ཨི་ནྡྲི་ཡེ་སུ ཨ་གུ་ཏྟ་དྭཱ་རེ་ཧི བྷོ་ཛ་ནེ ཨ་མ་ཏྟ་ཉྙཱུ་ཧི ཛཱ་ག་རི་ཡཾ ཨ་ན་ནུ་ཡུ་ཏྟེ་ཧི ས་དྡྷིཾ ཙཱ་རི་ཀཾ ཙ་ར་སི? ས་སྶ་གྷཱ་ཏཾ མ་ཉྙེ ཙ་ར་སི, ཀུ་ལཱུ་པ་གྷཱ་ཏཾ མ་ཉྙེ ཙ་ར་སི. ཨོ་ལུ་ཛྫ་ཏི [ཨུ་ལླུ་ཛྫ་ཏི (སཱི. ཨ་ཊྛ་ཀ་ཐཱ་སུ ཙ)] ཁོ ཏེ, ཨཱ་ཝུ་སོ ཨཱ་ན་ནྡ, པ་རི་སཱ; པ་ལུ་ཛྫ་ནྟི ཁོ ཏེ, ཨཱ་ཝུ་སོ, ན་ཝ་པྤཱ་ཡཱ. ན ཝཱ་ཡཾ ཀུ་མཱ་ར་ཀོ མ་ཏྟ་མ་ཉྙཱ་སཱི’’ཏི.
‘‘ཨ་པི མེ, བྷ་ནྟེ ཀ་སྶ་པ, སི་ར་སྨིཾ པ་ལི་ཏཱ་ནི ཛཱ་ཏཱ་ནི. ཨ་ཐ ཙ པ་ན མ་ཡཾ ཨ་ཛྫཱ་པི ཨཱ་ཡ་སྨ་ཏོ མ་ཧཱ་ཀ་སྶ་པ་སྶ ཀུ་མཱ་ར་ཀ་ཝཱ་དཱ ན མུ་ཙྩཱ་མཱ’’ཏི. ‘‘ཏ་ཐཱ ཧི པ་ན ཏྭཾ, ཨཱ་ཝུ་སོ ཨཱ་ན་ནྡ, ཨི་མེ་ཧི ན་ཝེ་ཧི བྷི་ཀྑཱུ་ཧི ཨི་ནྡྲི་ཡེ་སུ ཨ་གུ་ཏྟ་དྭཱ་རེ་ཧི བྷོ་ཛ་ནེ ཨ་མ་ཏྟ་ཉྙཱུ་ཧི ཛཱ་ག་རི་ཡཾ ཨ་ན་ནུ་ཡུ་ཏྟེ་ཧི ས་དྡྷིཾ ཙཱ་རི་ཀཾ ཙ་ར་སི, ས་སྶ་གྷཱ་ཏཾ མ་ཉྙེ ཙ་ར་སི, ཀུ་ལཱུ་པ་གྷཱ་ཏཾ མ་ཉྙེ ཙ་ར་སི. ཨོ་ལུ་ཛྫ་ཏི ཁོ ཏེ, ཨཱ་ཝུ་སོ ཨཱ་ན་ནྡ, པ་རི་སཱ; པ་ལུ་ཛྫ་ནྟི ཁོ ཏེ, ཨཱ་ཝུ་སོ, ན་ཝ་པྤཱ་ཡཱ. [པ་ལུ་ཛྫ་ཏི ཁོ ཏེ ཨཱ་ཝུ་སོ ཨཱ་ན་ནྡ པ་རི་སཱ (ཀ. སཱི.)] ན ཝཱ་ཡཾ ཀུ་མཱ་ར་ཀོ མ་ཏྟ་མ་ཉྙཱ་སཱི’’ཏི.
ཨ་སྶོ་སི ཁོ ཐུ་ལླ་ན་ནྡཱ བྷི་ཀྑུ་ནཱི – ‘‘ཨ་ཡྻེ་ན ཀི་ར མ་ཧཱ་ཀ་སྶ་པེ་ན ཨ་ཡྻོ ཨཱ་ན་ནྡོ ཝེ་དེ་ཧ་མུ་ནི ཀུ་མཱ་ར་ཀ་ཝཱ་དེ་ན ཨ་པ་སཱ་དི་ཏོ’’ཏི.
ཨ་ཐ ཁོ ཐུ་ལླ་ན་ནྡཱ བྷི་ཀྑུ་ནཱི ཨ་ན་ཏྟ་མ་ནཱ ཨ་ན་ཏྟ་མ་ན་ཝཱ་ཙཾ ནི་ཙྪཱ་རེ་སི – ‘‘ཀིཾ པ་ན ཨ་ཡྻོ མ་ཧཱ་ཀ་སྶ་པོ ཨ་ཉྙ་ཏི་ཏྠི་ཡ་པུ་བྦོ ས་མཱ་ནོ ཨ་ཡྻཾ ཨཱ་ན་ནྡཾ ཝེ་དེ་ཧ་མུ་ནིཾ ཀུ་མཱ་ར་ཀ་ཝཱ་དེ་ན ཨ་པ་སཱ་དེ་ཏ་བྦཾ མ་ཉྙ་ཏཱི’’ཏི! ཨ་སྶོ་སི ཁོ ཨཱ་ཡ་སྨཱ མ་ཧཱ་ཀ་སྶ་པོ ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ཨི་མཾ ཝཱ་ཙཾ བྷཱ་ས་མཱ་ནཱ་ཡ.
ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཏ་གྒྷཱ་ཝུ་སོ ཨཱ་ན་ནྡ, ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ས་ཧ་སཱ ཨ་པྤ་ཊི་ས་ངྑཱ ཝཱ་ཙཱ བྷཱ་སི་ཏཱ. ཡ་ཏྭཱ་ཧཾ, ཨཱ་ཝུ་སོ, ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏོ, ནཱ་བྷི་ཛཱ་ནཱ་མི ཨ་ཉྙཾ ས་ཏྠཱ་རཾ ཨུ་དྡི་སི་ཏཱ [ཨུ་དྡི་སི་ཏུཾ (སཱི. པཱི. ཀ.)], ཨ་ཉྙ་ཏྲ ཏེ་ན བྷ་ག་ཝ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན. པུ་བྦེ མེ, ཨཱ་ཝུ་སོ, ཨ་གཱ་རི་ཀ་བྷཱུ་ཏ་སྶ ས་ཏོ ཨེ་ཏ་ད་ཧོ་སི – ‘ས་མྦཱ་དྷོ གྷ་རཱ་ཝཱ་སོ ར་ཛཱ་པ་ཐོ [ར་ཛོ་པ་ཐོ (སཱི.)], ཨ་བྦྷོ་ཀཱ་སོ པ་བྦ་ཛྫཱ. ན་ཡི་དཾ སུ་ཀ་རཾ ཨ་གཱ་རཾ ཨ་ཛ྄ཛྷཱ་ཝ་ས་ཏཱ ཨེ་ཀ་ནྟ་པ་རི་པུ་ཎྞཾ ཨེ་ཀ་ནྟ་པ་རི་སུ་དྡྷཾ ས་ངྑ་ལི་ཁི་ཏཾ བྲ་ཧྨ་ཙ་རི་ཡཾ ཙ་རི་ཏུཾ. ཡཾ་ནཱུ་ནཱ་ཧཾ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛེ་ཡྻ’ནྟི. སོ ཁྭཱ་ཧཾ, ཨཱ་ཝུ་སོ, ཨ་པ་རེ་ན ས་མ་ཡེ་ན པ་ཊ་པི་ལོ་ཏི་ཀཱ་ནཾ ས་ངྒྷཱ་ཊིཾ ཀཱ་རེ་ཏྭཱ [ཀ་རི་ཏྭཱ (སཱི. སྱཱ. ཀཾ. པཱི.)] ཡེ ལོ་ཀེ ཨ་ར་ཧ་ནྟོ ཏེ ཨུ་དྡི་སྶ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛིཾ.
སོ ཨེ་ཝཾ པ་བྦ་ཛི་ཏོ ས་མཱ་ནོ ཨ་དྡྷཱ་ན་མ་གྒ་པྤ་ཊི་པ་ནྣོ ཨ་དྡ་སཾ བྷ་ག་ཝ་ནྟཾ ཨ་ནྟ་རཱ ཙ རཱ་ཛ་ག་ཧཾ ཨ་ནྟ་རཱ ཙ ནཱ་ལ༹་ནྡཾ བ་ཧུ་པུ་ཏྟེ ཙེ་ཏི་ཡེ ནི་སི་ནྣཾ. དི་སྭཱ་ན མེ ཨེ་ཏ་ད་ཧོ་སི – ‘ས་ཏྠཱ་ར་ཉྩ ཝ་ཏཱ་ཧཾ པ་སྶེ་ཡྻཾ, བྷ་ག་ཝ་ནྟ་མེ་ཝ པ་སྶེ་ཡྻཾ; སུ་ག་ཏ་ཉྩ ཝ་ཏཱ་ཧཾ པ་སྶེ་ཡྻཾ, བྷ་ག་ཝ་ནྟ་མེ་ཝ པ་སྶེ་ཡྻཾ; ས་མྨཱ་ས་མྦུ་དྡྷ་ཉྩ ཝ་ཏཱ་ཧཾ པ་སྶེ་ཡྻཾ; བྷ་ག་ཝ་ནྟ་མེ་ཝ པ་སྶེ་ཡྻ’ནྟི. སོ ཁྭཱ་ཧཾ, ཨཱ་ཝུ་སོ, ཏ་ཏྠེ་ཝ བྷ་ག་ཝ་ཏོ པཱ་དེ་སུ སི་ར་སཱ ནི་པ་ཏི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙཾ – ‘ས་ཏྠཱ མེ, བྷ་ནྟེ, བྷ་ག་ཝཱ, སཱ་ཝ་ཀོ་ཧ་མ་སྨི; ས་ཏྠཱ མེ, བྷ་ནྟེ, བྷ་ག་ཝཱ, སཱ་ཝ་ཀོ་ཧ་མ་སྨཱི’ཏི. ཨེ་ཝཾ ཝུ་ཏྟེ མཾ, ཨཱ་ཝུ་སོ, བྷ་ག་ཝཱ ཨེ་ཏ་ད་ཝོ་ཙ – ‘ཡོ ཁོ, ཀ་སྶ་པ, ཨེ་ཝཾ ས་བྦ་ཙེ་ཏ་སཱ ས་མ་ནྣཱ་ག་ཏཾ སཱ་ཝ་ཀཾ ཨ་ཛཱ་ན་ཉྙེ་ཝ ཝ་དེ་ཡྻ ཛཱ་ནཱ་མཱི་ཏི, ཨ་པ་སྶ་ཉྙེ་ཝ ཝ་དེ་ཡྻ པ་སྶཱ་མཱི་ཏི, མུ་དྡྷཱ་པི ཏ་སྶ ཝི་པ་ཏེ་ཡྻ. ཨ་ཧཾ ཁོ པ་ན, ཀ་སྶ་པ, ཛཱ་ན་ཉྙེ་ཝ ཝ་དཱ་མི ཛཱ་ནཱ་མཱི་ཏི, པ་སྶ་ཉྙེ་ཝ ཝ་དཱ་མི པ་སྶཱ་མཱི’ཏི.
ཏ་སྨཱ་ཏི་ཧ ཏེ, ཀ་སྶ་པ, ཨེ་ཝཾ སི་ཀྑི་ཏ་བྦཾ – ‘ཏི་བྦཾ མེ ཧི་རོ་ཏྟ་པྤཾ པ་ཙྩུ་པ་ཊྛི་ཏཾ བྷ་ཝི་སྶ་ཏི ཐེ་རེ་སུ ན་ཝེ་སུ མ་ཛ྄ཛྷི་མེ་སཱུ’ཏི. ཨེ་ཝ་ཉྷི ཏེ, ཀ་སྶ་པ, སི་ཀྑི་ཏ་བྦཾ.
ཏ་སྨཱ་ཏི་ཧ ཏེ, ཀ་སྶ་པ, ཨེ་ཝཾ སི་ཀྑི་ཏ་བྦཾ – ‘ཡཾ ཀི་ཉྩི དྷ་མྨཾ སུ་ཎི་སྶཱ་མི ཀུ་ས་ལཱུ་པ་སཾ་ཧི་ཏཾ ས་བྦཾ ཏཾ ཨ་ཊྛིཾ ཀ་ཏྭཱ མ་ན་སི ཀ་རི་ཏྭཱ ས་བྦ་ཙེ་ཏ་སཱ ས་མ་ནྣཱ་ཧ་རི་ཏྭཱ ཨོ་ཧི་ཏ་སོ་ཏོ དྷ་མྨཾ སུ་ཎི་སྶཱ་མཱི’ཏི. ཨེ་ཝ་ཉྷི ཏེ, ཀ་སྶ་པ, སི་ཀྑི་ཏ་བྦཾ.
ཏ་སྨཱ་ཏི་ཧ ཏེ, ཀ་སྶ་པ, ཨེ་ཝཾ སི་ཀྑི་ཏ་བྦཾ – ‘སཱ་ཏ་ས་ཧ་ག་ཏཱ ཙ མེ ཀཱ་ཡ་ག་ཏཱ་ས་ཏི ན ཝི་ཛ་ཧི་སྶ་ཏཱི’ཏི. ཨེ་ཝ་ཉྷི ཏེ, ཀ་སྶ་པ, སི་ཀྑི་ཏ་བྦ་ནྟི.
‘‘ཨ་ཐ ཁོ མཾ, ཨཱ་ཝུ་སོ, བྷ་ག་ཝཱ ཨི་མི་ནཱ ཨོ་ཝཱ་དེ་ན ཨོ་ཝ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ས་ཏྟཱ་ཧ་མེ་ཝ ཁྭཱ་ཧཾ, ཨཱ་ཝུ་སོ, ས་ར་ཎོ [སཱ་ཎོ (སཱི.)] ར་ཊྛ་པི་ཎྜཾ བྷུ་ཉྫིཾ’’. ཨ་ཊྛ་མི་ཡཱ ཨ་ཉྙཱ ཨུ་ད་པཱ་དི.
‘‘ཨ་ཐ ཁོ, ཨཱ་ཝུ་སོ, བྷ་ག་ཝཱ མ་གྒཱ ཨོ་ཀྐ་མྨ ཡེ་ན ཨ་ཉྙ་ཏ་རཾ རུ་ཀྑ་མཱུ་ལཾ ཏེ་ནུ་པ་ས་ངྐ་མི. ཨ་ཐ ཁྭཱ་ཧཾ, ཨཱ་ཝུ་སོ, པ་ཊ་པི་ལོ་ཏི་ཀཱ་ནཾ ས་ངྒྷཱ་ཊིཾ ཙ་ཏུ་གྒུ་ཎཾ པ་ཉྙ་པེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙཾ – ‘ཨི་དྷ, བྷ་ནྟེ, བྷ་ག་ཝཱ ནི་སཱི་ད་ཏུ, ཡཾ མ་མ་སྶ དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡཱ’ཏི. ནི་སཱི་དི ཁོ, ཨཱ་ཝུ་སོ, བྷ་ག་ཝཱ པ་ཉྙ་ཏྟེ ཨཱ་ས་ནེ. ནི་ས་ཛྫ ཁོ མཾ, ཨཱ་ཝུ་སོ, བྷ་ག་ཝཱ ཨེ་ཏ་ད་ཝོ་ཙ – ‘མུ་དུ་ཀཱ ཁོ ཏྱཱ་ཡཾ, ཀ་སྶ་པ, པ་ཊ་པི་ལོ་ཏི་ཀཱ་ནཾ ས་ངྒྷཱ་ཊཱི’ཏི. ‘པ་ཊི་གྒ་ཎྷཱ་ཏུ མེ, བྷ་ནྟེ, བྷ་ག་ཝཱ པ་ཊ་པི་ལོ་ཏི་ཀཱ་ནཾ ས་ངྒྷཱ་ཊིཾ ཨ་ནུ་ཀ་མྤཾ ཨུ་པཱ་དཱ་ཡཱ’ཏི. ‘དྷཱ་རེ་སྶ་སི པ་ན མེ ཏྭཾ, ཀ་སྶ་པ, སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནཱི’ཏི. ‘དྷཱ་རེ་སྶཱ་མ་ཧཾ, བྷ་ནྟེ, བྷ་ག་ཝ་ཏོ སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནཱི’ཏི. ‘‘སོ ཁྭཱ་ཧཾ, ཨཱ་ཝུ་སོ, པ་ཊ་པི་ལོ་ཏི་ཀཱ་ནཾ ས་ངྒྷཱ་ཊིཾ བྷ་ག་ཝ་ཏོ པཱ་དཱ་སིཾ. ཨ་ཧཾ པ་ན བྷ་ག་ཝ་ཏོ སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནི པ་ཊི་པ་ཛྫིཾ’’.
‘‘ཡ་ཉྷི ཏཾ, ཨཱ་ཝུ་སོ, ས་མྨཱ ཝ་ད་མཱ་ནོ ཝ་དེ་ཡྻ – ‘བྷ་ག་ཝ་ཏོ པུ་ཏྟོ ཨོ་ར་སོ མུ་ཁ་ཏོ ཛཱ་ཏོ དྷ་མྨ་ཛོ དྷ་མྨ་ནི་མྨི་ཏོ དྷ་མྨ་དཱ་ཡཱ་དོ, པ་ཊི་གྒ་ཧི་ཏཱ་ནི [པ་ཊི་གྒ་ཧེ་ཏཱ (སཱི.)] སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནཱི’ཏི, མ་མཾ ཏཾ ས་མྨཱ ཝ་ད་མཱ་ནོ ཝ་དེ་ཡྻ – ‘བྷ་ག་ཝ་ཏོ པུ་ཏྟོ ཨོ་ར་སོ མུ་ཁ་ཏོ ཛཱ་ཏོ དྷ་མྨ་ཛོ དྷ་མྨ་ནི་མྨི་ཏོ དྷ་མྨ་དཱ་ཡཱ་དོ, པ་ཊི་གྒ་ཧི་ཏཱ་ནི སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནཱི’’’ཏི.
‘‘ཨ་ཧཾ ཁོ, ཨཱ་ཝུ་སོ, ཡཱ་ཝ་དེ་ཝ ཨཱ་ཀ་ངྑཱ་མི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཨ་ཧཾ ཁོ, ཨཱ་ཝུ་སོ, ཡཱ་ཝ་དེ ཨཱ་ཀ་ངྑཱ་མི…པེ… (ན་ཝ་ནྣཾ ཨ་ནུ་པུ་བྦ་ཝི་ཧཱ་ར་ས་མཱ་པ་ཏྟི་ནཾ པ་ཉྩ་ནྣ་ཉྩ ཨ་བྷི་ཉྙཱ་ནཾ ཨེ་ཝཾ ཝི་ཏྠཱ་རོ ཝེ་དི་ཏ་བྦོ).
‘‘ཨ་ཧཾ ཁོ, ཨཱ་ཝུ་སོ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མི; ས་ཏྟ་ར་ཏ་ནཾ ཝཱ, ཨཱ་ཝུ་སོ, ནཱ་གཾ ཨ་ཌྜྷ་ཊྛ་མ་ར་ཏ་ནཾ ཝཱ ཏཱ་ལ་པ་ཏྟི་ཀཱ་ཡ ཚཱ་དེ་ཏ་བྦཾ མ་ཉྙེ་ཡྻ, ཡོ མེ ཚ ཨ་བྷི་ཉྙཱ ཚཱ་དེ་ཏ་བྦཾ མ་ཉྙེ་ཡྻཱ’’ཏི.
ཙ་ཝི་ཏྠ ཙ པ་ན ཐུ་ལླ་ན་ནྡཱ བྷི་ཀྑུ་ནཱི བྲ་ཧྨ་ཙ་རི་ཡ་མྷཱ་ཏི. ཨེ་ཀཱ་ད་ས་མཾ.