༡༠. ཨུ་པ་སྶ་ཡ་སུ་ཏྟཾ
༡༥༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ ཨཱ་ཡ་སྨཱ མ་ཧཱ་ཀ་སྶ་པོ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ནཱ་ཡ་སྨཱ མ་ཧཱ་ཀ་སྶ་པོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙ – ‘‘ཨཱ་ཡཱ་མ, བྷ་ནྟེ ཀ་སྶ་པ, ཡེ་ན ཨ་ཉྙ་ཏ་རོ བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི་སྶཱ་མཱ’’ཏི. ‘‘ག་ཙྪ ཏྭཾ, ཨཱ་ཝུ་སོ ཨཱ་ན་ནྡ, བ་ཧུ་ཀི་ཙྩོ ཏྭཾ བ་ཧུ་ཀ་ར་ཎཱི་ཡོ’’ཏི. དུ་ཏི་ཡ་མྤི ཁོ ཨཱ་ཡ་སྨཱ ཨཱ་ན་ནྡོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙ – ‘‘ཨཱ་ཡཱ་མ, བྷ་ནྟེ ཀ་སྶ་པ, ཡེ་ན ཨ་ཉྙ་ཏ་རོ བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི་སྶཱ་མཱ’’ཏི. ‘‘ག་ཙྪ ཏྭཾ, ཨཱ་ཝུ་སོ ཨཱ་ན་ནྡ, བ་ཧུ་ཀི་ཙྩོ ཏྭཾ བ་ཧུ་ཀ་ར་ཎཱི་ཡོ’’ཏི. ཏ་ཏི་ཡ་མྤི ཁོ ཨཱ་ཡ་སྨཱ ཨཱ་ན་ནྡོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙ – ‘‘ཨཱ་ཡཱ་མ, བྷ་ནྟེ ཀ་སྶ་པ, ཡེ་ན ཨ་ཉྙ་ཏ་རོ བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི་སྶཱ་མཱ’’ཏི.
ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཨཱ་ཡ་སྨ་ཏཱ ཨཱ་ན་ནྡེ་ན པ་ཙྪཱ་ས་མ་ཎེ་ན ཡེ་ན ཨ་ཉྙ་ཏ་རོ བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ ས་མྦ་ཧུ་ལཱ བྷི་ཀྑུ་ནི་ཡོ ཡེ་ནཱ་ཡ་སྨཱ མ་ཧཱ་ཀ་སྶ་པོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏཱ བྷི་ཀྑུ་ནི་ཡོ ཨཱ་ཡ་སྨཱ མ་ཧཱ་ཀ་སྶ་པོ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཏཱ བྷི་ཀྑུ་ནི་ཡོ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི.
ཨ་ཐ ཁོ ཐུ་ལླ་ཏི་སྶཱ བྷི་ཀྑུ་ནཱི ཨ་ན་ཏྟ་མ་ནཱ ཨ་ན་ཏྟ་མ་ན་ཝཱ་ཙཾ ནི་ཙྪཱ་རེ་སི – ‘‘ཀིཾ པ་ན ཨ་ཡྻོ མ་ཧཱ་ཀ་སྶ་པོ, ཨ་ཡྻ་སྶ ཨཱ་ན་ནྡ་སྶ ཝེ་དེ་ཧ་མུ་ནི་ནོ ས་མྨུ་ཁཱ དྷ་མྨཾ བྷཱ་སི་ཏ་བྦཾ མ་ཉྙ་ཏི? སེ་ཡྻ་ཐཱ་པི ནཱ་མ སཱུ་ཙི་ཝཱ་ཎི་ཛ་ཀོ སཱུ་ཙི་ཀཱ་ར་སྶ ས་ནྟི་ཀེ སཱུ་ཙིཾ ཝི་ཀྐེ་ཏ་བྦཾ མ་ཉྙེ་ཡྻ; ཨེ་ཝ་མེ་ཝ ཨ་ཡྻོ མ་ཧཱ་ཀ་སྶ་པོ ཨ་ཡྻ་སྶ ཨཱ་ན་ནྡ་སྶ ཝེ་དེ་ཧ་མུ་ནི་ནོ ས་མྨུ་ཁཱ དྷ་མྨཾ བྷཱ་སི་ཏ་བྦཾ མ་ཉྙ་ཏཱི’’ཏི.
ཨ་སྶོ་སི ཁོ ཨཱ་ཡ་སྨཱ མ་ཧཱ་ཀ་སྶ་པོ ཐུ་ལླ་ཏི་སྶཱ་ཡ བྷི་ཀྑུ་ནི་ཡཱ ཨི་མཾ ཝཱ་ཙཾ བྷཱ་ས་མཱ་ནཱ་ཡ. ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཀིཾ ནུ ཁོ, ཨཱ་ཝུ་སོ ཨཱ་ན་ནྡ, ཨ་ཧཾ སཱུ་ཙི་ཝཱ་ཎི་ཛ་ཀོ, ཏྭཾ སཱུ་ཙི་ཀཱ་རོ; ཨུ་དཱ་ཧུ ཨ་ཧཾ སཱུ་ཙི་ཀཱ་རོ, ཏྭཾ སཱུ་ཙི་ཝཱ་ཎི་ཛ་ཀོ’’ཏི? ‘‘ཁ་མ, བྷ་ནྟེ ཀ་སྶ་པ, བཱ་ལོ མཱ་ཏུ་གཱ་མོ’’ཏི. ‘‘ཨཱ་ག་མེ་ཧི ཏྭཾ, ཨཱ་ཝུ་སོ ཨཱ་ན་ནྡ, མཱ ཏེ ས་ངྒྷོ ཨུ་ཏྟ་རི ཨུ་པ་པ་རི་ཀྑི’’.
‘‘ཏཾ ཀིཾ མ་ཉྙ་སི, ཨཱ་ཝུ་སོ ཨཱ་ན་ནྡ, ཨ་པི ནུ ཏྭཾ བྷ་ག་ཝ་ཏོ ས་མྨུ་ཁཱ བྷི་ཀྑུ་ས་ངྒྷེ ཨུ་པ་ནཱི་ཏོ – ‘ཨ་ཧཾ, བྷི་ཀྑ་ཝེ, ཡཱ་ཝ་དེ་ཝ ཨཱ་ཀ་ངྑཱ་མི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཨཱ་ན་ནྡོ་པི, བྷི་ཀྑ་ཝེ, ཡཱ་ཝ་དེ་ཝ ཨཱ་ཀ་ངྑ་ཏི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི’’’ཏི? ‘‘ནོ ཧེ་ཏཾ, བྷ་ནྟེ’’.
‘‘ཨ་ཧཾ ཁོ, ཨཱ་ཝུ་སོ, བྷ་ག་ཝ་ཏོ ས་མྨུ་ཁཱ བྷི་ཀྑུ་ས་ངྒྷེ ཨུ་པ་ནཱི་ཏོ – ‘ཨ་ཧཾ, བྷི་ཀྑ་ཝེ, ཡཱ་ཝ་དེ་ཝ ཨཱ་ཀ་ངྑཱ་མི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རཱ་མི. ཀ་སྶ་པོ་པི, བྷི་ཀྑ་ཝེ, ཡཱ་ཝ་དེ་ཝ ཨཱ་ཀ་ངྑ་ཏི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི’ཏི…པེ…. (ན་ཝ་ནྣཾ ཨ་ནུ་པུ་བྦ་ཝི་ཧཱ་ར་ས་མཱ་པ་ཏྟཱི་ནཾ པ་ཉྩ་ནྣ་ཉྩ ཨ་བྷི་ཉྙཱ་ནཾ ཨེ་ཝཾ ཝི་ཏྠཱ་རོ ཝེ་དི་ཏ་བྦོ.)
‘‘ཏཾ ཀིཾ མ་ཉྙ་སི, ཨཱ་ཝུ་སོ ཨཱ་ན་ནྡ, ཨ་པི ནུ ཏྭཾ བྷ་ག་ཝ་ཏོ ས་མྨུ་ཁཱ བྷི་ཀྑུ་ས་ངྒྷེ ཨུ་པ་ནཱི་ཏོ – ‘ཨ་ཧཾ, བྷི་ཀྑ་ཝེ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མི. ཨཱ་ན་ནྡོ་པི, བྷི་ཀྑ་ཝེ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’’ཏི? ‘‘ནོ ཧེ་ཏཾ, བྷ་ནྟེ’’.
‘‘ཨ་ཧཾ ཁོ, ཨཱ་ཝུ་སོ, བྷ་ག་ཝ་ཏོ ས་མྨུ་ཁཱ བྷི་ཀྑུ་ས་ངྒྷེ ཨུ་པ་ནཱི་ཏོ – ‘ཨ་ཧཾ, བྷི་ཀྑ་ཝེ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མི. ཀ་སྶ་པོ་པི, བྷི་ཀྑ་ཝེ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’’ཏི.
‘‘ས་ཏྟ་ར་ཏ་ནཾ ཝཱ, ཨཱ་ཝུ་སོ, ནཱ་གཾ ཨ་ཌྜྷ་ཊྛ་མ་ར་ཏ་ནཾ ཝཱ ཏཱ་ལ་པ་ཏྟི་ཀཱ་ཡ ཚཱ་དེ་ཏ་བྦཾ མ་ཉྙེ་ཡྻ, ཡོ མེ ཚ ཨ་བྷི་ཉྙཱ ཚཱ་དེ་ཏ་བྦཾ མ་ཉྙེ་ཡྻཱ’’ཏི.
ཙ་ཝི་ཏྠ ཙ པ་ན ཐུ་ལླ་ཏི་སྶཱ བྷི་ཀྑུ་ནཱི བྲ་ཧྨ་ཙ་རི་ཡ་མྷཱ་ཏི. ད་ས་མཾ.