༨. ཀོ་ས་མྦི་སུ་ཏྟཾ
༦༨. ཨེ་ཀཾ ས་མ་ཡཾ ཨཱ་ཡ་སྨཱ ཙ མུ་སི་ལོ [མཱུ་སི་ལོ (སཱི.), མུ་སཱི་ལོ (པཱི.)] ཨཱ་ཡ་སྨཱ ཙ པ་ཝི་ཊྛོ [ས་ཝི་ཊྛོ (སཱི. པཱི.)] ཨཱ་ཡ་སྨཱ ཙ ནཱ་ར་དོ ཨཱ་ཡ་སྨཱ ཙ ཨཱ་ན་ནྡོ ཀོ་ས་མྦི་ཡཾ ཝི་ཧ་ར་ནྟི གྷོ་སི་ཏཱ་རཱ་མེ. ཨ་ཐ ཁོ ཨཱ་ཡ་སྨཱ པ་ཝི་ཊྛོ ཨཱ་ཡ་སྨ་ནྟཾ མུ་སི་ལཾ ཨེ་ཏ་ད་ཝོ་ཙ – ‘‘ཨ་ཉྙ་ཏྲེ་ཝ, ཨཱ་ཝུ་སོ མུ་སི་ལ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ མུ་སི་ལ་སྶ པ་ཙྩ་ཏྟ་མེ་ཝ ཉཱ་ཎཾ – ‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི.
‘‘ཨ་ཉྙ་ཏྲེ་ཝ, ཨཱ་ཝུ་སོ མུ་སི་ལ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ མུ་སི་ལ་སྶ པ་ཙྩ་ཏྟ་མེ་ཝ ཉཱ་ཎཾ – ‘བྷ་ཝ་པ་ཙྩ་ཡཱ ཛཱ་ཏཱི་ཏི…པེ… ཨུ་པཱ་དཱ་ན་པ་ཙྩ་ཡཱ བྷ་ཝོ་ཏི… ཏ་ཎྷཱ་པ་ཙྩ་ཡཱ ཨུ་པཱ་དཱ་ན་ནྟི… ཝེ་ད་ནཱ་པ་ཙྩ་ཡཱ ཏ་ཎྷཱ་ཏི… ཕ་སྶ་པ་ཙྩ་ཡཱ ཝེ་ད་ནཱ་ཏི… ས་ལཱ༹་ཡ་ཏ་ན་པ་ཙྩ་ཡཱ ཕ་སྶོ་ཏི… ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ན་ནྟི… ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པ་ནྟི… ས་ངྑཱ་ར་པ་ཙྩ་ཡཱ ཝི་ཉྙཱ་ཎ་ནྟི… ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ མུ་སི་ལ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ མུ་སི་ལ་སྶ པ་ཙྩ་ཏྟ་མེ་ཝ ཉཱ་ཎཾ – ‘ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ མུ་སི་ལ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ མུ་སི་ལ་སྶ པ་ཙྩ་ཏྟ་མེ་ཝ ཉཱ་ཎཾ – ‘བྷ་ཝ་ནི་རོ་དྷཱ ཛཱ་ཏི་ནི་རོ་དྷོ་ཏི…པེ… ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ་ཏི… ཏ་ཎྷཱ་ནི་རོ་དྷཱ ཨུ་པཱ་དཱ་ན་ནི་རོ་དྷོ་ཏི… ཝེ་ད་ནཱ་ནི་རོ་དྷཱ ཏ་ཎྷཱ་ནི་རོ་དྷོ་ཏི… ཕ་སྶ་ནི་རོ་དྷཱ ཝེ་ད་ནཱ་ནི་རོ་དྷོ་ཏི… ས་ལཱ༹་ཡ་ཏ་ན་ནི་རོ་དྷཱ ཕ་སྶ་ནི་རོ་དྷོ་ཏི… ནཱ་མ་རཱུ་པ་ནི་རོ་དྷཱ ས་ལཱ༹་ཡ་ཏ་ན་ནི་རོ་དྷོ་ཏི… ཝི་ཉྙཱ་ཎ་ནི་རོ་དྷཱ ནཱ་མ་རཱུ་པ་ནི་རོ་དྷོ་ཏི … ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ་ཏི… ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ མུ་སི་ལ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ མུ་སི་ལ་སྶ པ་ཙྩ་ཏྟ་མེ་ཝ ཉཱ་ཎཾ – ‘བྷ་ཝ་ནི་རོ་དྷོ ནི་བྦཱ་ན’’’ནྟི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘བྷ་ཝ་ནི་རོ་དྷོ ནི་བྦཱ་ན’’’ནྟི.
‘‘ཏེ་ན་ཧཱ་ཡ་སྨཱ མུ་སི་ལོ ཨ་ར་ཧཾ ཁཱི་ཎཱ་ས་ཝོ’’ཏི? ཨེ་ཝཾ ཝུ་ཏྟེ, ཨཱ་ཡ་སྨཱ མུ་སི་ལོ ཏུ་ཎྷཱི ཨ་ཧོ་སི. ཨ་ཐ ཁོ ཨཱ་ཡ་སྨཱ ནཱ་ར་དོ ཨཱ་ཡ་སྨ་ནྟཾ པ་ཝི་ཊྛཾ ཨེ་ཏ་ད་ཝོ་ཙ – ‘‘སཱ་དྷཱ་ཝུ་སོ པ་ཝི་ཊྛ, ཨ་ཧཾ ཨེ་ཏཾ པ་ཉྷཾ ལ་བྷེ་ཡྻཾ. མཾ ཨེ་ཏཾ པ་ཉྷཾ པུ་ཙྪ. ཨ་ཧཾ ཏེ ཨེ་ཏཾ པ་ཉྷཾ བྱཱ་ཀ་རི་སྶཱ་མཱི’’ཏི. ‘‘ལ་བྷ་ཏཱ་ཡ་སྨཱ ནཱ་ར་དོ ཨེ་ཏཾ པ་ཉྷཾ. པུ་ཙྪཱ་མ་ཧཾ ཨཱ་ཡ་སྨ་ནྟཾ ནཱ་ར་དཾ ཨེ་ཏཾ པ་ཉྷཾ. བྱཱ་ཀ་རོ་ཏུ ཙ མེ ཨཱ་ཡ་སྨཱ ནཱ་ར་དོ ཨེ་ཏཾ པ་ཉྷཾ’’.
‘‘ཨ་ཉྙ་ཏྲེ་ཝ, ཨཱ་ཝུ་སོ ནཱ་ར་ད, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ ནཱ་ར་ད་སྶ པ་ཙྩ་ཏྟ་མེ་ཝ ཉཱ་ཎཾ – ‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི.
‘‘ཨ་ཉྙ་ཏྲེ་ཝ, ཨཱ་ཝུ་སོ ནཱ་ར་ད, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ ནཱ་ར་ད་སྶ པ་ཙྩ་ཏྟ་མེ་ཝ ཉཱ་ཎཾ – བྷ་ཝ་པ་ཙྩ་ཡཱ ཛཱ་ཏི…པེ… ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ ནཱ་ར་ད, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ ནཱ་ར་ད་སྶ པ་ཙྩ་ཏྟ་མེ་ཝ ཉཱ་ཎཾ – ‘ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ ནཱ་ར་ད, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ ནཱ་ར་ད་སྶ པ་ཙྩ་ཏྟ་མེ་ཝ ཉཱ་ཎཾ – ‘བྷ་ཝ་ནི་རོ་དྷཱ ཛཱ་ཏི་ནི་རོ་དྷོ་ཏི…པེ… ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’’ཏི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’’ཏི.
‘‘ཨ་ཉྙ་ཏྲེ་ཝ, ཨཱ་ཝུ་སོ ནཱ་ར་ད, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཏྠཱ་ཡ་སྨ་ཏོ ནཱ་ར་ད་སྶ པ་ཙྩ་ཏྟ་མེ་ཝ ཉཱ་ཎཾ – ‘བྷ་ཝ་ནི་རོ་དྷོ ནི་བྦཱ་ན’’’ནྟི? ‘‘ཨ་ཉྙ་ཏྲེ་ཝ, ཨཱ་ཝུ་སོ པ་ཝི་ཊྛ, ས་དྡྷཱ་ཡ ཨ་ཉྙ་ཏྲ རུ་ཙི་ཡཱ ཨ་ཉྙ་ཏྲ ཨ་ནུ་སྶ་ཝཱ ཨ་ཉྙ་ཏྲ ཨཱ་ཀཱ་ར་པ་རི་ཝི་ཏ་ཀྐཱ ཨ་ཉྙ་ཏྲ དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ ཨ་ཧ་མེ་ཏཾ ཛཱ་ནཱ་མི ཨ་ཧ་མེ་ཏཾ པ་སྶཱ་མི – ‘བྷ་ཝ་ནི་རོ་དྷོ ནི་བྦཱ་ན’’’ནྟི.
‘‘ཏེ་ན་ཧཱ་ཡ་སྨཱ ནཱ་ར་དོ ཨ་ར་ཧཾ ཁཱི་ཎཱ་ས་ཝོ’’ཏི? ‘‘‘བྷ་ཝ་ནི་རོ་དྷོ ནི་བྦཱ་ན’ནྟི ཁོ མེ, ཨཱ་ཝུ་སོ, ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ན ཙ་མྷི ཨ་ར་ཧཾ ཁཱི་ཎཱ་ས་ཝོ. སེ་ཡྻ་ཐཱ་པི, ཨཱ་ཝུ་སོ, ཀ་ནྟཱ་ར་མ་གྒེ ཨུ་ད་པཱ་ནོ. ཏ་ཏྲ ནེ་ཝ་སྶ ར་ཛྫུ ན ཨུ་ད་ཀ་ཝཱ་ར་ཀོ. ཨ་ཐ པུ་རི་སོ ཨཱ་ག་ཙྪེ་ཡྻ གྷ་མྨཱ་བྷི་ཏ་ཏྟོ གྷ་མྨ་པ་རེ་ཏོ ཀི་ལ་ནྟོ ཏ་སི་ཏོ པི་པཱ་སི་ཏོ, སོ ཏཾ ཨུ་ད་པཱ་ནཾ ཨོ་ལོ་ཀེ་ཡྻ. ཏ་སྶ ‘ཨུ་ད་ཀ’ནྟི ཧི ཁོ ཉཱ་ཎཾ ཨ་སྶ, ན ཙ ཀཱ་ཡེ་ན ཕུ་སི་ཏྭཱ ཝི་ཧ་རེ་ཡྻ. ཨེ་ཝ་མེ་ཝ ཁོ, ཨཱ་ཝུ་སོ, ‘བྷ་ཝ་ནི་རོ་དྷོ ནི་བྦཱ་ན’ནྟི ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ན ཙ་མྷི ཨ་ར་ཧཾ ཁཱི་ཎཱ་ས་ཝོ’’ཏི.
ཨེ་ཝཾ ཝུ་ཏྟེ, ཨཱ་ཡ་སྨཱ ཨཱ་ན་ནྡོ ཨཱ་ཡ་སྨ་ནྟཾ པ་ཝི་ཊྛཾ ཨེ་ཏ་ད་ཝོ་ཙ – ‘‘ཨེ་ཝཾ་ཝཱ་དཱི [ཨེ་ཝཾ་ཝཱ་དིཾ (?)] ཏྭཾ, ཨཱ་ཝུ་སོ པ་ཝི་ཊྛ, ཨཱ་ཡ་སྨ་ནྟཾ ནཱ་ར་དཾ ཀིཾ ཝ་དེ་སཱི’’ཏི? ‘‘ཨེ་ཝཾ་ཝཱ་དཱ་ཧཾ, ཨཱ་ཝུ་སོ ཨཱ་ན་ནྡ, ཨཱ་ཡ་སྨ་ནྟཾ ནཱ་ར་དཾ ན ཀི་ཉྩི ཝ་དཱ་མི ཨ་ཉྙ་ཏྲ ཀ་ལྱཱ་ཎཱ ཨ་ཉྙ་ཏྲ ཀུ་ས་ལཱ’’ཏི. ཨ་ཊྛ་མཾ.