༦. ས་མྨ་ས་སུ་ཏྟཾ
༦༦. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀུ་རཱུ་སུ ཝི་ཧ་ར་ཏི ཀ་མྨཱ་ས་དྷ་མྨཾ ནཱ་མ ཀུ་རཱུ་ནཾ ནི་ག་མོ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ – ‘‘ས་མྨ་ས་ཐ ནོ ཏུ་མྷེ, བྷི་ཀྑ་ཝེ, ཨ་ནྟ་རཾ ས་མྨ་ས’’ནྟི [ཨ་ནྟ་རཱ ས་མྨ་ས་ན་ནྟི (སཱི.)]. ཨེ་ཝཾ ཝུ་ཏྟེ, ཨ་ཉྙ་ཏ་རོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཧཾ ཁོ, བྷ་ནྟེ, ས་མྨ་སཱ་མི ཨ་ནྟ་རཾ ས་མྨ་ས’’ནྟི. ‘‘ཡ་ཐཱ ཀ་ཐཾ པ་ན ཏྭཾ, བྷི་ཀྑུ, ས་མྨ་ས་སི ཨ་ནྟ་རཾ ས་མྨ་ས’’ནྟི? ཨ་ཐ ཁོ སོ བྷི་ཀྑུ བྱཱ་ཀཱ་སི. ཡ་ཐཱ སོ བྷི་ཀྑུ བྱཱ་ཀཱ་སི ན སོ བྷི་ཀྑུ བྷ་ག་ཝ་ཏོ ཙི་ཏྟཾ ཨཱ་རཱ་དྷེ་སི.
ཨེ་ཝཾ ཝུ་ཏྟེ, ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨེ་ཏ་སྶ, བྷ་ག་ཝཱ, ཀཱ་ལོ; ཨེ་ཏ་སྶ, སུ་ག་ཏ, ཀཱ་ལོ; ཡཾ བྷ་ག་ཝཱ ཨ་ནྟ་རཾ ས་མྨ་སཾ བྷཱ་སེ་ཡྻ. བྷ་ག་ཝ་ཏོ སུ་ཏྭཱ བྷི་ཀྑཱུ དྷཱ་རེ་སྶ་ནྟཱི’’ཏི. ‘‘ཏེ་ན་ཧཱ་ན་ནྡ, སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –
‘‘ཨི་དྷ, བྷི་ཀྑ་ཝེ, བྷི་ཀྑུ ས་མྨ་ས་མཱ་ནོ ས་མྨ་ས་ཏི ཨ་ནྟ་རཾ ས་མྨ་སཾ [ས་མྨ་ས་ནཾ (སཱི.)] – ‘ཡཾ ཁོ ཨི་དཾ ཨ་ནེ་ཀ་ཝི་དྷཾ ནཱ་ན་པྤ་ཀཱ་ར་ཀཾ དུ་ཀྑཾ ལོ་ཀེ ཨུ་པྤ་ཛྫ་ཏི ཛ་རཱ་མ་ར་ཎཾ. ཨི་དཾ ཁོ དུ་ཀྑཾ ཀིཾ་ནི་དཱ་ནཾ ཀིཾ་ས་མུ་ད་ཡཾ ཀིཾ་ཛཱ་ཏི་ཀཾ ཀིཾ་པ་བྷ་ཝཾ, ཀི་སྨིཾ ས་ཏི ཛ་རཱ་མ་ར་ཎཾ ཧོ་ཏི, ཀི་སྨིཾ ཨ་ས་ཏི ཛ་རཱ་མ་ར་ཎཾ ན ཧོ་ཏཱི’ཏི? སོ ས་མྨ་ས་མཱ་ནོ ཨེ་ཝཾ ཛཱ་ནཱ་ཏི – ‘ཡཾ ཁོ ཨི་དཾ ཨ་ནེ་ཀ་ཝི་དྷཾ ནཱ་ན་པྤ་ཀཱ་ར་ཀཾ དུ་ཀྑཾ ལོ་ཀེ ཨུ་པྤ་ཛྫ་ཏི ཛ་རཱ་མ་ར་ཎཾ. ཨི་དཾ ཁོ དུ་ཀྑཾ ཨུ་པ་དྷི་ནི་དཱ་ནཾ ཨུ་པ་དྷི་ས་མུ་ད་ཡཾ ཨུ་པ་དྷི་ཛཱ་ཏི་ཀཾ ཨུ་པ་དྷི་པ་བྷ་ཝཾ, ཨུ་པ་དྷི་སྨིཾ ས་ཏི ཛ་རཱ་མ་ར་ཎཾ ཧོ་ཏི, ཨུ་པ་དྷི་སྨིཾ ཨ་ས་ཏི ཛ་རཱ་མ་ར་ཎཾ ན ཧོ་ཏཱི’ཏི. སོ ཛ་རཱ་མ་ར་ཎ་ཉྩ པ་ཛཱ་ནཱ་ཏི ཛ་རཱ་མ་ར་ཎ་ས་མུ་ད་ཡ་ཉྩ པ་ཛཱ་ནཱ་ཏི ཛ་རཱ་མ་ར་ཎ་ནི་རོ་དྷ་ཉྩ པ་ཛཱ་ནཱ་ཏི ཡཱ ཙ ཛ་རཱ་མ་ར་ཎ་ནི་རོ་དྷ་སཱ་རུ་པྤ་གཱ་མི་ནཱི པ་ཊི་པ་དཱ ཏ་ཉྩ པ་ཛཱ་ནཱ་ཏི. ཏ་ཐཱ་པ་ཊི་པ་ནྣོ ཙ ཧོ་ཏི ཨ་ནུ་དྷ་མྨ་ཙཱ་རཱི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ པ་ཊི་པ་ནྣོ ཛ་རཱ་མ་ར་ཎ་ནི་རོ་དྷཱ་ཡ.
‘‘ཨ་ཐཱ་པ་རཾ ས་མྨ་ས་མཱ་ནོ ས་མྨ་ས་ཏི ཨ་ནྟ་རཾ ས་མྨ་སཾ – ‘ཨུ་པ་དྷི པ་ནཱ་ཡཾ ཀིཾ་ནི་དཱ་ནོ ཀིཾ་ས་མུ་ད་ཡོ ཀིཾ་ཛཱ་ཏི་ཀོ ཀིཾ་པ་བྷ་ཝོ, ཀི་སྨིཾ ས་ཏི ཨུ་པ་དྷི ཧོ་ཏི, ཀི་སྨིཾ ཨ་ས་ཏི ཨུ་པ་དྷི ན ཧོ་ཏཱི’ཏི? སོ ས་མྨ་ས་མཱ་ནོ ཨེ་ཝཾ ཛཱ་ནཱ་ཏི – ‘ཨུ་པ་དྷི ཏ་ཎྷཱ་ནི་དཱ་ནོ ཏ་ཎྷཱ་ས་མུ་ད་ཡོ ཏ་ཎྷཱ་ཛཱ་ཏི་ཀོ ཏ་ཎྷཱ་པ་བྷ་ཝོ, ཏ་ཎྷཱ་ཡ ས་ཏི ཨུ་པ་དྷི ཧོ་ཏི, ཏ་ཎྷཱ་ཡ ཨ་ས་ཏི ཨུ་པ་དྷི ན ཧོ་ཏཱི’ཏི. སོ ཨུ་པ་དྷི་ཉྩ པ་ཛཱ་ནཱ་ཏི ཨུ་པ་དྷི་ས་མུ་ད་ཡ་ཉྩ པ་ཛཱ་ནཱ་ཏི ཨུ་པ་དྷི་ནི་རོ་དྷ་ཉྩ པ་ཛཱ་ནཱ་ཏི ཡཱ ཙ ཨུ་པ་དྷི་ནི་རོ་དྷ་སཱ་རུ་པྤ་གཱ་མི་ནཱི པ་ཊི་པ་དཱ ཏ་ཉྩ པ་ཛཱ་ནཱ་ཏི. ཏ་ཐཱ པ་ཊི་པ་ནྣོ ཙ ཧོ་ཏི ཨ་ནུ་དྷ་མྨ་ཙཱ་རཱི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ པ་ཊི་པ་ནྣོ ཨུ་པ་དྷི་ནི་རོ་དྷཱ་ཡ.
‘‘ཨ་ཐཱ་པ་རཾ ས་མྨ་ས་མཱ་ནོ ས་མྨ་ས་ཏི ཨ་ནྟ་རཾ ས་མྨ་སཾ – ‘ཏ་ཎྷཱ པ་ནཱ་ཡཾ ཀ་ཏྠ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, ཀ་ཏྠ ནི་ཝི་ས་མཱ་ནཱ ནི་ཝི་ས་ཏཱི’ཏི? སོ ས་མྨ་ས་མཱ་ནོ ཨེ་ཝཾ ཛཱ་ནཱ་ཏི – ཡཾ ཁོ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཨེ་ཏྠེ་སཱ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, ཨེ་ཏྠ ནི་ཝི་ས་མཱ་ནཱ ནི་ཝི་ས་ཏི. ཀི་ཉྩ ལོ་ཀེ པི་ཡ་རཱུ་པཾ སཱ་ཏ་རཱུ་པཾ? ཙ་ཀྑུཾ ལོ་ཀེ པི་ཡ་རཱུ་པཾ, སཱ་ཏ་རཱུ་པཾ. ཨེ་ཏྠེ་སཱ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, ཨེ་ཏྠ ནི་ཝི་ས་མཱ་ནཱ ནི་ཝི་ས་ཏི. སོ་ཏཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ…པེ… གྷཱ་ནཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ… ཛི་ཝ྄ཧཱ ལོ་ཀེ པི་ཡ་རཱུ་པཾ སཱ་ཏ་རཱུ་པཾ… ཀཱ་ཡོ ལོ་ཀེ པི་ཡ་རཱུ་པཾ སཱ་ཏ་རཱུ་པཾ… མ་ནོ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཨེ་ཏྠེ་སཱ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི ཨེ་ཏྠ ནི་ཝི་ས་མཱ་ནཱ ནི་ཝི་ས་ཏི.
‘‘ཡེ ཧི ཀེ་ཙི, བྷི་ཀྑ་ཝེ, ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ནི་ཙྩ་ཏོ ཨ་དྡ་ཀྑུཾ སུ་ཁ་ཏོ ཨ་དྡ་ཀྑུཾ ཨ་ཏྟ་ཏོ ཨ་དྡ་ཀྑུཾ ཨཱ་རོ་གྱ་ཏོ ཨ་དྡ་ཀྑུཾ ཁེ་མ་ཏོ ཨ་དྡ་ཀྑུཾ. ཏེ ཏ་ཎྷཾ ཝ་ཌྜྷེ་སུཾ. ཡེ ཏ་ཎྷཾ ཝ་ཌྜྷེ་སུཾ ཏེ ཨུ་པ་དྷིཾ ཝ་ཌྜྷེ་སུཾ. ཡེ ཨུ་པ་དྷིཾ ཝ་ཌྜྷེ་སུཾ ཏེ དུ་ཀྑཾ ཝ་ཌྜྷེ་སུཾ. ཡེ དུ་ཀྑཾ ཝ་ཌྜྷེ་སུཾ ཏེ ན པ་རི་མུ་ཙྩིཾ་སུ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ན པ་རི་མུ་ཙྩིཾ་སུ དུ་ཀྑ་སྨཱ་ཏི ཝ་དཱ་མི.
‘‘ཡེ་པི ཧི ཀེ་ཙི, བྷི་ཀྑ་ཝེ, ཨ་ནཱ་ག་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ནི་ཙྩ་ཏོ ད་ཀྑི་སྶ་ནྟི [ད་ཀྑི་ནྟི (སཱི.)] སུ་ཁ་ཏོ ད་ཀྑི་སྶ་ནྟི ཨ་ཏྟ་ཏོ ད་ཀྑི་སྶ་ནྟི ཨཱ་རོ་གྱ་ཏོ ད་ཀྑི་སྶ་ནྟི ཁེ་མ་ཏོ ད་ཀྑི་སྶ་ནྟི. ཏེ ཏ་ཎྷཾ ཝ་ཌྜྷི་སྶ་ནྟི. ཡེ ཏ་ཎྷཾ ཝ་ཌྜྷི་སྶ་ནྟི ཏེ ཨུ་པ་དྷིཾ ཝ་ཌྜྷི་སྶ་ནྟི. ཡེ ཨུ་པ་དྷིཾ ཝ་ཌྜྷི་སྶ་ནྟི ཏེ དུ་ཀྑཾ ཝ་ཌྜྷི་སྶ་ནྟི. ཡེ དུ་ཀྑཾ ཝ་ཌྜྷི་སྶ་ནྟི ཏེ ན པ་རི་མུ་ཙྩི་སྶ་ནྟི ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ན པ་རི་མུ་ཙྩི་སྶ་ནྟི དུ་ཀྑ་སྨཱ་ཏི ཝ་དཱ་མི.
‘‘ཡེ་པི ཧི ཀེ་ཙི, བྷི་ཀྑ་ཝེ, ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ནི་ཙྩ་ཏོ པ་སྶ་ནྟི སུ་ཁ་ཏོ པ་སྶ་ནྟི ཨ་ཏྟ་ཏོ པ་སྶ་ནྟི ཨཱ་རོ་གྱ་ཏོ པ་སྶ་ནྟི ཁེ་མ་ཏོ པ་སྶ་ནྟི. ཏེ ཏ་ཎྷཾ ཝ་ཌྜྷེ་ནྟི. ཡེ ཏ་ཎྷཾ ཝ་ཌྜྷེ་ནྟི ཏེ ཨུ་པ་དྷིཾ ཝ་ཌྜྷེ་ནྟི. ཡེ ཨུ་པ་དྷིཾ ཝ་ཌྜྷེ་ནྟི ཏེ དུ་ཀྑཾ ཝ་ཌྜྷེ་ནྟི. ཡེ དུ་ཀྑཾ ཝ་ཌྜྷེ་ནྟི ཏེ ན པ་རི་མུ་ཙྩ་ནྟི ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ན པ་རི་མུ་ཙྩ་ནྟི དུ་ཀྑ་སྨཱ་ཏི ཝ་དཱ་མི.
‘‘སེ་ཡྻ་ཐཱ་པི, བྷི་ཀྑ་ཝེ, ཨཱ་པཱ་ནཱི་ཡ་ཀཾ་སོ ཝ་ཎྞ་ས་མྤ་ནྣོ ག་ནྡྷ་ས་མྤ་ནྣོ ར་ས་ས་མྤ་ནྣོ. སོ ཙ ཁོ ཝི་སེ་ན སཾ་ས་ཊྛོ. ཨ་ཐ པུ་རི་སོ ཨཱ་ག་ཙྪེ་ཡྻ གྷ་མྨཱ་བྷི་ཏ་ཏྟོ གྷ་མྨ་པ་རེ་ཏོ ཀི་ལ་ནྟོ ཏ་སི་ཏོ པི་པཱ་སི་ཏོ. ཏ་མེ་ནཾ ཨེ་ཝཾ ཝ་དེ་ཡྻུཾ – ‘ཨ་ཡཾ ཏེ, ཨ་མྦྷོ པུ་རི་ས, ཨཱ་པཱ་ནཱི་ཡ་ཀཾ་སོ ཝ་ཎྞ་ས་མྤ་ནྣོ ག་ནྡྷ་ས་མྤ་ནྣོ ར་ས་ས་མྤ་ནྣོ; སོ ཙ ཁོ ཝི་སེ་ན སཾ་ས་ཊྛོ. ས་ཙེ ཨཱ་ཀ་ངྑ་སི པི་ཝ. པི་ཝ་ཏོ ཧི ཁོ ཏཾ ཚཱ་དེ་སྶ་ཏི ཝ་ཎྞེ་ན་པི ག་ནྡྷེ་ན་པི ར་སེ་ན་པི, པི་ཝི་ཏྭཱ ཙ པ་ན ཏ་ཏོ་ནི་དཱ་ནཾ མ་ར་ཎཾ ཝཱ ནི་ག་ཙྪ་སི མ་ར་ཎ་མ་ཏྟཾ ཝཱ དུ་ཀྑ’ནྟི. སོ ཏཾ ཨཱ་པཱ་ནཱི་ཡ་ཀཾ་སཾ ས་ཧ་སཱ ཨ་པྤ་ཊི་ས་ངྑཱ པི་ཝེ་ཡྻ, ན་པྤ་ཊི་ནི་སྶ་ཛྫེ་ཡྻ. སོ ཏ་ཏོ་ནི་དཱ་ནཾ མ་ར་ཎཾ ཝཱ ནི་ག་ཙྪེ་ཡྻ མ་ར་ཎ་མ་ཏྟཾ ཝཱ དུ་ཀྑཾ. ཨེ་ཝ་མེ་ཝ ཁོ, བྷི་ཀྑ་ཝེ, ཡེ ཧི ཀེ་ཙི ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ…པེ… ཨ་ནཱ་ག་ཏ་མ་དྡྷཱ་ནཾ…པེ… ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ནི་ཙྩ་ཏོ པ་སྶ་ནྟི སུ་ཁ་ཏོ པ་སྶ་ནྟི ཨ་ཏྟ་ཏོ པ་སྶ་ནྟི ཨཱ་རོ་གྱ་ཏོ པ་སྶ་ནྟི ཁེ་མ་ཏོ པ་སྶ་ནྟི, ཏེ ཏ་ཎྷཾ ཝ་ཌྜྷེ་ནྟི. ཡེ ཏ་ཎྷཾ ཝ་ཌྜྷེ་ནྟི ཏེ ཨུ་པ་དྷིཾ ཝ་ཌྜྷེ་ནྟི. ཡེ ཨུ་པ་དྷིཾ ཝ་ཌྜྷེ་ནྟི ཏེ དུ་ཀྑཾ ཝ་ཌྜྷེ་ནྟི. ཡེ དུ་ཀྑཾ ཝ་ཌྜྷེ་ནྟི ཏེ ན པ་རི་མུ་ཙྩ་ནྟི ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, ན པ་རི་མུ་ཙྩ་ནྟི དུ་ཀྑ་སྨཱ་ཏི ཝ་དཱ་མི.
‘‘ཡེ ཙ ཁོ ཀེ་ཙི, བྷི་ཀྑ་ཝེ, ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ཨ་ནི་ཙྩ་ཏོ ཨ་དྡ་ཀྑུཾ དུ་ཀྑ་ཏོ ཨ་དྡ་ཀྑུཾ ཨ་ན་ཏྟ་ཏོ ཨ་དྡ་ཀྑུཾ རོ་ག་ཏོ ཨ་དྡ་ཀྑུཾ བྷ་ཡ་ཏོ ཨ་དྡ་ཀྑུཾ, ཏེ ཏ་ཎྷཾ པ་ཛ་ཧིཾ་སུ. ཡེ ཏ་ཎྷཾ པ་ཛ་ཧིཾ་སུ ཏེ ཨུ་པ་དྷིཾ པ་ཛ་ཧིཾ་སུ. ཡེ ཨུ་པ་དྷིཾ པ་ཛ་ཧིཾ་སུ ཏེ དུ་ཀྑཾ པ་ཛ་ཧིཾ་སུ. ཡེ དུ་ཀྑཾ པ་ཛ་ཧིཾ་སུ ཏེ པ་རི་མུ་ཙྩིཾ་སུ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, པ་རི་མུ་ཙྩིཾ་སུ དུ་ཀྑ་སྨཱ་ཏི ཝ་དཱ་མི.
‘‘ཡེ་པི ཧི ཀེ་ཙི, བྷི་ཀྑ་ཝེ, ཨ་ནཱ་ག་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ཨ་ནི་ཙྩ་ཏོ ད་ཀྑི་སྶ་ནྟི དུ་ཀྑ་ཏོ ད་ཀྑི་སྶ་ནྟི ཨ་ན་ཏྟ་ཏོ ད་ཀྑི་སྶ་ནྟི རོ་ག་ཏོ ད་ཀྑི་སྶ་ནྟི བྷ་ཡ་ཏོ ད་ཀྑི་སྶ་ནྟི, ཏེ ཏ་ཎྷཾ པ་ཛ་ཧི་སྶ་ནྟི. ཡེ ཏ་ཎྷཾ པ་ཛ་ཧི་སྶ་ནྟི…པེ… པ་རི་མུ་ཙྩི་སྶ་ནྟི དུ་ཀྑ་སྨཱ་ཏི ཝ་དཱ་མི.
‘‘ཡེ་པི ཧི ཀེ་ཙི, བྷི་ཀྑ་ཝེ, ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ཨ་ནི་ཙྩ་ཏོ པ་སྶ་ནྟི དུ་ཀྑ་ཏོ པ་སྶ་ནྟི ཨ་ན་ཏྟ་ཏོ པ་སྶ་ནྟི རོ་ག་ཏོ པ་སྶ་ནྟི བྷ་ཡ་ཏོ པ་སྶ་ནྟི, ཏེ ཏ་ཎྷཾ པ་ཛ་ཧ་ནྟི. ཡེ ཏ་ཎྷཾ པ་ཛ་ཧ་ནྟི ཏེ ཨུ་པ་དྷིཾ པ་ཛ་ཧ་ནྟི. ཡེ ཨུ་པ་དྷིཾ པ་ཛ་ཧ་ནྟི ཏེ དུ་ཀྑཾ པ་ཛ་ཧ་ནྟི. ཡེ དུ་ཀྑཾ པ་ཛ་ཧ་ནྟི ཏེ པ་རི་མུ་ཙྩ་ནྟི ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, པ་རི་མུ་ཙྩ་ནྟི དུ་ཀྑ་སྨཱ་ཏི ཝ་དཱ་མི.
‘‘སེ་ཡྻ་ཐཱ་པི, བྷི་ཀྑ་ཝེ, ཨཱ་པཱ་ནཱི་ཡ་ཀཾ་སོ ཝ་ཎྞ་ས་མྤ་ནྣོ ག་ནྡྷ་ས་མྤ་ནྣོ ར་ས་ས་མྤ་ནྣོ. སོ ཙ ཁོ ཝི་སེ་ན སཾ་ས་ཊྛོ. ཨ་ཐ པུ་རི་སོ ཨཱ་ག་ཙྪེ་ཡྻ གྷ་མྨཱ་བྷི་ཏ་ཏྟོ གྷ་མྨ་པ་རེ་ཏོ ཀི་ལ་ནྟོ ཏ་སི་ཏོ པི་པཱ་སི་ཏོ. ཏ་མེ་ནཾ ཨེ་ཝཾ ཝ་དེ་ཡྻུཾ – ‘ཨ་ཡཾ ཏེ, ཨ་མྦྷོ པུ་རི་ས, ཨཱ་པཱ་ནཱི་ཡ་ཀཾ་སོ ཝ་ཎྞ་ས་མྤ་ནྣོ ག་ནྡྷ་ས་མྤ་ནྣོ ར་ས་ས་མྤ་ནྣོ སོ ཙ ཁོ ཝི་སེ་ན སཾ་ས་ཊྛོ. ས་ཙེ ཨཱ་ཀ་ངྑ་སི པི་ཝ. པི་ཝ་ཏོ ཧི ཁོ ཏཾ ཚཱ་དེ་སྶ་ཏི ཝ་ཎྞེ་ན་པི ག་ནྡྷེ་ན་པི ར་སེ་ན་པི; པི་ཝི་ཏྭཱ ཙ པ་ན ཏ་ཏོ་ནི་དཱ་ནཾ མ་ར་ཎཾ ཝཱ ནི་ག་ཙྪ་སི མ་ར་ཎ་མ་ཏྟཾ ཝཱ དུ་ཀྑ’ནྟི. ཨ་ཐ ཁོ, བྷི་ཀྑ་ཝེ, ཏ་སྶ པུ་རི་ས་སྶ ཨེ་ཝ་མ་སྶ – ‘ས་ཀྐཱ ཁོ མེ ཨ་ཡཾ སུ་རཱ་པི་པཱ་སི་ཏཱ [སུ་རཱ་པི་པཱ་སཱ (?)] པཱ་ནཱི་ཡེ་ན ཝཱ ཝི་ནེ་ཏུཾ ད་དྷི་མ་ཎྜ་ཀེ་ན ཝཱ ཝི་ནེ་ཏུཾ བྷ་ཊྛ་ལོ་ཎི་ཀཱ་ཡ [མ་ཊྛ་ལོ་ཎི་ཀཱ་ཡ (སཱི. སྱཱ. ཀཾ. པཱི.)] ཝཱ ཝི་ནེ་ཏུཾ ལོ་ཎ་སོ་ཝཱི་ར་ཀེ་ན ཝཱ ཝི་ནེ་ཏུཾ, ན ཏྭེ་ཝཱ་ཧཾ ཏཾ པི་ཝེ་ཡྻཾ, ཡཾ མ་མ ཨ་སྶ དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡཱ’ཏི. སོ ཏཾ ཨཱ་པཱ་ནཱི་ཡ་ཀཾ་སཾ པ་ཊི་ས་ངྑཱ ན པི་ཝེ་ཡྻ, པ་ཊི་ནི་སྶ་ཛྫེ་ཡྻ. སོ ཏ་ཏོ་ནི་དཱ་ནཾ ན མ་ར་ཎཾ ཝཱ ནི་ག་ཙྪེ་ཡྻ མ་ར་ཎ་མ་ཏྟཾ ཝཱ དུ་ཀྑཾ. ཨེ་ཝ་མེ་ཝ ཁོ, བྷི་ཀྑ་ཝེ, ཡེ ཧི ཀེ་ཙི ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ཨ་ནི་ཙྩ་ཏོ ཨ་དྡ་ཀྑུཾ དུ་ཀྑ་ཏོ ཨ་དྡ་ཀྑུཾ ཨ་ན་ཏྟ་ཏོ ཨ་དྡ་ཀྑུཾ རོ་ག་ཏོ ཨ་དྡ་ཀྑུཾ བྷ་ཡ་ཏོ ཨ་དྡ་ཀྑུཾ, ཏེ ཏ་ཎྷཾ པ་ཛ་ཧིཾ་སུ. ཡེ ཏ་ཎྷཾ པ་ཛ་ཧིཾ་སུ ཏེ ཨུ་པ་དྷིཾ པ་ཛ་ཧིཾ་སུ. ཡེ ཨུ་པ་དྷིཾ པ་ཛ་ཧིཾ་སུ ཏེ དུ་ཀྑཾ པ་ཛ་ཧིཾ་སུ. ཡེ དུ་ཀྑཾ པ་ཛ་ཧིཾ་སུ ཏེ པ་རི་མུ་ཙྩིཾ་སུ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, པ་རི་མུ་ཙྩིཾ་སུ དུ་ཀྑ་སྨཱ་ཏི ཝ་དཱ་མི.
‘‘ཡེ་པི ཧི ཀེ་ཙི, བྷི་ཀྑ་ཝེ, ཨ་ནཱ་ག་ཏ་མ་དྡྷཱ་ནཾ…པེ… ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཏཾ ཨ་ནི་ཙྩ་ཏོ པ་སྶ་ནྟི དུ་ཀྑ་ཏོ པ་སྶ་ནྟི ཨ་ན་ཏྟ་ཏོ པ་སྶ་ནྟི རོ་ག་ཏོ པ་སྶ་ནྟི བྷ་ཡ་ཏོ པ་སྶ་ནྟི, ཏེ ཏ་ཎྷཾ པ་ཛ་ཧ་ནྟི. ཡེ ཏ་ཎྷཾ པ་ཛ་ཧ་ནྟི ཏེ ཨུ་པ་དྷིཾ པ་ཛ་ཧ་ནྟི. ཡེ ཨུ་པ་དྷིཾ པ་ཛ་ཧ་ནྟི ཏེ དུ་ཀྑཾ པ་ཛ་ཧ་ནྟི. ཡེ དུ་ཀྑཾ པ་ཛ་ཧ་ནྟི ཏེ པ་རི་མུ་ཙྩ་ནྟི ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི, པ་རི་མུ་ཙྩ་ནྟི དུ་ཀྑ་སྨཱ་ཏི ཝ་དཱ་མཱི’’ཏི. ཚ་ཊྛཾ.