༡. ཨ་སྶུ་ཏ་ཝཱ་སུ་ཏྟཾ
༦༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ…པེ… ‘‘ཨ་སྶུ་ཏ་ཝཱ, བྷི་ཀྑ་ཝེ, པུ་ཐུ་ཛྫ་ནོ ཨི་མ་སྨིཾ ཙཱ་ཏུ་མ་ཧཱ་བྷཱུ་ཏི་ཀ་སྨིཾ ཀཱ་ཡ་སྨིཾ ནི་བྦི་ནྡེ་ཡྻ་པི ཝི་ར་ཛྫེ་ཡྻ་པི ཝི་མུ་ཙྩེ་ཡྻ་པི. ཏཾ ཀི་སྶ ཧེ་ཏུ? [ཙཱ་ཏུ་མྨ་ཧཱ་བྷཱུ་ཏི་ཀ་སྨིཾ (སཱི. སྱཱ. ཀཾ.)] དི་སྶ་ཏི, བྷི་ཀྑ་ཝེ [དི་སྶ་ཏི ཧི བྷི་ཀྑ་ཝེ (སཱི. སྱཱ. ཀཾ.)], ཨི་མ་སྶ ཙཱ་ཏུ་མ་ཧཱ་བྷཱུ་ཏི་ཀ་སྶ ཀཱ་ཡ་སྶ ཨཱ་ཙ་ཡོ་པི ཨ་པ་ཙ་ཡོ་པི ཨཱ་དཱ་ན་མྤི ནི་ཀྑེ་པ་ན་མྤི. ཏ་སྨཱ ཏ་ཏྲཱ་སྶུ་ཏ་ཝཱ པུ་ཐུ་ཛྫ་ནོ ནི་བྦི་ནྡེ་ཡྻ་པི ཝི་ར་ཛྫེ་ཡྻ་པི ཝི་མུ་ཙྩེ་ཡྻ་པི’’.
‘‘ཡ་ཉྩ ཁོ ཨེ་ཏཾ, བྷི་ཀྑ་ཝེ, ཝུ་ཙྩ་ཏི ཙི་ཏྟཾ ཨི་ཏི་པི, མ་ནོ ཨི་ཏི་པི, ཝི་ཉྙཱ་ཎཾ ཨི་ཏི་པི, ཏ་ཏྲཱ་སྶུ་ཏ་ཝཱ པུ་ཐུ་ཛྫ་ནོ ནཱ་ལཾ ནི་བྦི་ནྡི་ཏུཾ ནཱ་ལཾ ཝི་ར་ཛྫི་ཏུཾ ནཱ་ལཾ ཝི་མུ་ཙྩི་ཏུཾ. ཏཾ ཀི་སྶ ཧེ་ཏུ? དཱི་གྷ་ར་ཏྟ་ཉྷེ་ཏཾ, བྷི་ཀྑ་ཝེ, ཨ་སྶུ་ཏ་ཝ་ཏོ པུ་ཐུ་ཛྫ་ན་སྶ ཨ་ཛ྄ཛྷོ་སི་ཏཾ མ་མཱ་ཡི་ཏཾ པ་རཱ་མ་ཊྛཾ – ‘ཨེ་ཏཾ མ་མ, ཨེ་སོ་ཧ་མ་སྨི, ཨེ་སོ མེ ཨ་ཏྟཱ’ཏི. ཏ་སྨཱ ཏ་ཏྲཱ་སྶུ་ཏ་ཝཱ པུ་ཐུ་ཛྫ་ནོ ནཱ་ལཾ ནི་བྦི་ནྡི་ཏུཾ ནཱ་ལཾ ཝི་ར་ཛྫི་ཏུཾ ནཱ་ལཾ ཝི་མུ་ཙྩི་ཏུཾ.
‘‘ཝ་རཾ, བྷི་ཀྑ་ཝེ, ཨ་སྶུ་ཏ་ཝཱ པུ་ཐུ་ཛྫ་ནོ ཨི་མཾ ཙཱ་ཏུ་མ་ཧཱ་བྷཱུ་ཏི་ཀཾ ཀཱ་ཡཾ ཨ་ཏྟ་ཏོ ཨུ་པ་ག་ཙྪེ་ཡྻ, ན ཏྭེ་ཝ ཙི་ཏྟཾ. ཏཾ ཀི་སྶ ཧེ་ཏུ? དི་སྶ་ཏཱ་ཡཾ, བྷི་ཀྑ་ཝེ, ཙཱ་ཏུ་མ་ཧཱ་བྷཱུ་ཏི་ཀོ ཀཱ་ཡོ ཨེ་ཀ་མྤི ཝ་སྶཾ ཏི་ཊྛ་མཱ་ནོ དྭེ་པི ཝ་སྶཱ་ནི ཏི་ཊྛ་མཱ་ནོ ཏཱི་ཎི་པི ཝ་སྶཱ་ནི ཏི་ཊྛ་མཱ་ནོ ཙ་ཏྟཱ་རི་པི ཝ་སྶཱ་ནི ཏི་ཊྛ་མཱ་ནོ པ་ཉྩ་པི ཝ་སྶཱ་ནི ཏི་ཊྛ་མཱ་ནོ ད་ས་པི ཝ་སྶཱ་ནི ཏི་ཊྛ་མཱ་ནོ ཝཱི་ས་ཏི་པི ཝ་སྶཱ་ནི ཏི་ཊྛ་མཱ་ནོ ཏིཾ་ས་མྤི ཝ་སྶཱ་ནི ཏི་ཊྛ་མཱ་ནོ ཙ་ཏྟཱ་རཱི་ས་མྤི ཝ་སྶཱ་ནི ཏི་ཊྛ་མཱ་ནོ པ་ཉྙཱ་ས་མྤི ཝ་སྶཱ་ནི ཏི་ཊྛ་མཱ་ནོ ཝ་སྶ་ས་ཏ་མྤི ཏི་ཊྛ་མཱ་ནོ, བྷི་ཡྻོ་པི ཏི་ཊྛ་མཱ་ནོ.
‘‘ཡ་ཉྩ ཁོ ཨེ་ཏཾ, བྷི་ཀྑ་ཝེ, ཝུ་ཙྩ་ཏི ཙི་ཏྟཾ ཨི་ཏི་པི, མ་ནོ ཨི་ཏི་པི, ཝི་ཉྙཱ་ཎཾ ཨི་ཏི་པི, ཏཾ ར་ཏྟི་ཡཱ ཙ དི་ཝ་ས་སྶ ཙ ཨ་ཉྙ་དེ་ཝ ཨུ་པྤ་ཛྫ་ཏི ཨ་ཉྙཾ ནི་རུ་ཛ྄ཛྷ་ཏི. སེ་ཡྻ་ཐཱ་པི, བྷི་ཀྑ་ཝེ, མ་ཀྐ་ཊོ ཨ་ར་ཉྙེ པ་ཝ་ནེ ཙ་ར་མཱ་ནོ སཱ་ཁཾ ག་ཎྷ་ཏི, ཏཾ མུ་ཉྩི་ཏྭཱ ཨ་ཉྙཾ ག་ཎྷ་ཏི, ཏཾ མུ་ཉྩི་ཏྭཱ ཨ་ཉྙཾ ག་ཎྷ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡ་མི་དཾ ཝུ་ཙྩ་ཏི ཙི་ཏྟཾ ཨི་ཏི་པི, མ་ནོ ཨི་ཏི་པི, ཝི་ཉྙཱ་ཎཾ ཨི་ཏི་པི, ཏཾ ར་ཏྟི་ཡཱ ཙ དི་ཝ་ས་སྶ ཙ ཨ་ཉྙ་དེ་ཝ ཨུ་པྤ་ཛྫ་ཏི ཨ་ཉྙཾ ནི་རུ་ཛ྄ཛྷ་ཏི.
‘‘ཏ་ཏྲ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ པ་ཊི་ཙྩ་ས་མུ་པྤཱ་དཾ་ཡེ་ཝ སཱ་དྷུ་ཀཾ ཡོ་ནི་སོ མ་ན་སི ཀ་རོ་ཏི – ‘ཨི་ཏི ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྶུ་པྤཱ་དཱ ཨི་དཾ ཨུ་པྤ་ཛྫ་ཏི; ཨི་མ་སྨིཾ ཨ་ས་ཏི ཨི་དཾ ན ཧོ་ཏི, ཨི་མ་སྶ ནི་རོ་དྷཱ ཨི་དཾ ནི་རུ་ཛ྄ཛྷ་ཏི – ཡ་དི་དཾ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི. ཨ་ཝི་ཛྫཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ས་ངྑཱ་ར་ནི་རོ་དྷོ; ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི’’’ཏི.
‘‘ཨེ་ཝཾ པ་སྶཾ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ རཱུ་པ་སྨི་མྤི ནི་བྦི་ནྡ་ཏི, ཝེ་ད་ནཱ་ཡ་པི ནི་བྦི་ནྡ་ཏི, ས་ཉྙཱ་ཡ་པི ནི་བྦི་ནྡ་ཏི, ས་ངྑཱ་རེ་སུ་པི ནི་བྦི་ནྡ་ཏི, ཝི་ཉྙཱ་ཎ་སྨི་མྤི ནི་བྦི་ནྡ་ཏི; ནི་བྦི་ནྡཾ ཝི་ར་ཛྫ་ཏི, ཝི་རཱ་གཱ ཝི་མུ་ཙྩ་ཏི, ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཧོ་ཏི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་ཏཱི’’ཏི. པ་ཋ་མཾ.