༥. ཨ་ཝི་ཛྫཱ་པ་ཙྩ་ཡ་སུ་ཏྟཾ
༣༥. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཨ་ཝི་ཛྫཱ་པ་ཙྩ་ཡཱ, བྷི་ཀྑ་ཝེ, ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏཱི’’ཏི. ཨེ་ཝཾ ཝུ་ཏྟེ, ཨ་ཉྙ་ཏ་རོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘‘ཀ་ཏ་མཾ ནུ ཁོ, བྷ་ནྟེ, ཛ་རཱ་མ་ར་ཎཾ, ཀ་སྶ ཙ པ་ནི་དཾ ཛ་རཱ་མ་ར་ཎ’ནྟི? ‘ནོ ཀ་ལློ པ་ཉྷོ’ཏི བྷ་ག་ཝཱ ཨ་ཝོ་ཙ, ‘ཀ་ཏ་མཾ ཛ་རཱ་མ་ར་ཎཾ, ཀ་སྶ ཙ པ་ནི་དཾ ཛ་རཱ་མ་ར་ཎ’ནྟི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ‘ཨ་ཉྙཾ ཛ་རཱ་མ་ར་ཎཾ ཨ་ཉྙ་སྶ ཙ པ་ནི་དཾ ཛ་རཱ་མ་ར་ཎ’ནྟི, ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ཨུ་བྷ་ཡ་མེ་ཏཾ ཨེ་ཀ་ཏྠཾ བྱ་ཉྫ་ན་མེ་ཝ ནཱ་ནཾ. ཏཾ ཛཱི་ཝཾ ཏཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨ་ཉྙཾ ཛཱི་ཝཾ ཨ་ཉྙཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨེ་ཏེ ཏེ, བྷི་ཀྑུ, ཨུ་བྷོ ཨ་ནྟེ ཨ་ནུ་པ་ག་མྨ མ་ཛ྄ཛྷེ་ན ཏ་ཐཱ་ག་ཏོ དྷ་མྨཾ དེ་སེ་ཏི – ‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི.
‘‘ཀ་ཏ་མཱ ནུ ཁོ, བྷ་ནྟེ, ཛཱ་ཏི, ཀ་སྶ ཙ པ་ནཱ་ཡཾ ཛཱ་ཏཱི’’ཏི? ‘‘ནོ ཀ་ལློ པ་ཉྷོ’’ཏི བྷ་ག་ཝཱ ཨ་ཝོ་ཙ, ‘‘‘ཀ་ཏ་མཱ ཛཱ་ཏི, ཀ་སྶ ཙ པ་ནཱ་ཡཾ ཛཱ་ཏཱི’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ‘ཨ་ཉྙཱ ཛཱ་ཏི ཨ་ཉྙ་སྶ ཙ པ་ནཱ་ཡཾ ཛཱ་ཏཱི’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ཨུ་བྷ་ཡ་མེ་ཏཾ ཨེ་ཀ་ཏྠཾ བྱ་ཉྫ་ན་མེ་ཝ ནཱ་ནཾ. ཏཾ ཛཱི་ཝཾ ཏཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨ་ཉྙཾ ཛཱི་ཝཾ ཨ་ཉྙཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨེ་ཏེ ཏེ, བྷི་ཀྑུ, ཨུ་བྷོ ཨ་ནྟེ ཨ་ནུ་པ་ག་མྨ མ་ཛ྄ཛྷེ་ན ཏ་ཐཱ་ག་ཏོ དྷ་མྨཾ དེ་སེ་ཏི – ‘བྷ་ཝ་པ་ཙྩ་ཡཱ ཛཱ་ཏཱི’’’ཏི.
‘‘ཀ་ཏ་མོ ནུ ཁོ, བྷ་ནྟེ, བྷ་ཝོ, ཀ་སྶ ཙ པ་ནཱ་ཡཾ བྷ་ཝོ’’ཏི? ‘‘ནོ ཀ་ལློ པ་ཉྷོ’’ཏི བྷ་ག་ཝཱ ཨ་ཝོ་ཙ, ‘‘‘ཀ་ཏ་མོ བྷ་ཝོ, ཀ་སྶ ཙ པ་ནཱ་ཡཾ བྷ་ཝོ’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ‘ཨ་ཉྙོ བྷ་ཝོ ཨ་ཉྙ་སྶ ཙ པ་ནཱ་ཡཾ བྷ་ཝོ’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ཨུ་བྷ་ཡ་མེ་ཏཾ ཨེ་ཀ་ཏྠཾ བྱ་ཉྫ་ན་མེ་ཝ ནཱ་ནཾ. ཏཾ ཛཱི་ཝཾ ཏཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི; ཨ་ཉྙཾ ཛཱི་ཝཾ ཨ་ཉྙཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨེ་ཏེ ཏེ, བྷི་ཀྑུ, ཨུ་བྷོ ཨ་ནྟེ ཨ་ནུ་པ་ག་མྨ མ་ཛ྄ཛྷེ་ན ཏ་ཐཱ་ག་ཏོ དྷ་མྨཾ དེ་སེ་ཏི – ‘ཨུ་པཱ་དཱ་ན་པ་ཙྩ་ཡཱ བྷ་ཝོ’ཏི…པེ… ‘ཏ་ཎྷཱ་པ་ཙྩ་ཡཱ ཨུ་པཱ་དཱ་ན་ནྟི… ཝེ་ད་ནཱ་པ་ཙྩ་ཡཱ ཏ་ཎྷཱ་ཏི… ཕ་སྶ་པ་ཙྩ་ཡཱ ཝེ་ད་ནཱ་ཏི… ས་ལཱ༹་ཡ་ཏ་ན་པ་ཙྩ་ཡཱ ཕ་སྶོ་ཏི… ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ན་ནྟི… ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པ་ནྟི… ས་ངྑཱ་ར་པ་ཙྩ་ཡཱ ཝི་ཉྙཱ་ཎ’’’ནྟི.
‘‘ཀ་ཏ་མེ ནུ ཁོ, བྷ་ནྟེ, ས་ངྑཱ་རཱ, ཀ་སྶ ཙ པ་ནི་མེ ས་ངྑཱ་རཱ’’ཏི? ‘‘ནོ ཀ་ལློ པ་ཉྷོ’’ཏི བྷ་ག་ཝཱ ཨ་ཝོ་ཙ, ‘‘‘ཀ་ཏ་མེ ས་ངྑཱ་རཱ ཀ་སྶ ཙ པ་ནི་མེ ས་ངྑཱ་རཱ’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ‘ཨ་ཉྙེ ས་ངྑཱ་རཱ ཨ་ཉྙ་སྶ ཙ པ་ནི་མེ ས་ངྑཱ་རཱ’ཏི ཨི་ཏི ཝཱ, བྷི་ཀྑུ, ཡོ ཝ་དེ་ཡྻ, ཨུ་བྷ་ཡ་མེ་ཏཾ ཨེ་ཀ་ཏྠཾ བྱ་ཉྫ་ན་མེ་ཝ ནཱ་ནཾ. ཏཾ ཛཱི་ཝཾ ཏཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི; ཨ་ཉྙཾ ཛཱི་ཝཾ ཨ་ཉྙཾ ས་རཱི་ར་ནྟི ཝཱ, བྷི་ཀྑུ, དི་ཊྛི་ཡཱ ས་ཏི བྲ་ཧྨ་ཙ་རི་ཡ་ཝཱ་སོ ན ཧོ་ཏི. ཨེ་ཏེ ཏེ, བྷི་ཀྑུ, ཨུ་བྷོ ཨ་ནྟེ ཨ་ནུ་པ་ག་མྨ མ་ཛ྄ཛྷེ་ན ཏ་ཐཱ་ག་ཏོ དྷ་མྨཾ དེ་སེ་ཏི – ‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’’ཏི.
‘‘ཨ་ཝི་ཛྫཱ་ཡ ཏྭེ་ཝ, བྷི་ཀྑུ, ཨ་སེ་ས་ཝི་རཱ་ག་ནི་རོ་དྷཱ ཡཱ་ནི་སྶ ཏཱ་ནི ཝི་སཱུ་ཀཱ་ཡི་ཀཱ་ནི ཝི་སེ་ཝི་ཏཱ་ནི ཝི་པྥ་ནྡི་ཏཱ་ནི ཀཱ་ནི་ཙི ཀཱ་ནི་ཙི. ‘ཀ་ཏ་མཾ ཛ་རཱ་མ་ར་ཎཾ, ཀ་སྶ ཙ པ་ནི་དཾ ཛ་རཱ་མ་ར་ཎཾ’ ཨི་ཏི ཝཱ, ‘ཨ་ཉྙཾ ཛ་རཱ་མ་ར་ཎཾ, ཨ་ཉྙ་སྶ ཙ པ་ནི་དཾ ཛ་རཱ་མ་ར་ཎཾ’ ཨི་ཏི ཝཱ, ‘ཏཾ ཛཱི་ཝཾ ཏཾ ས་རཱི་རཾ’ ཨི་ཏི ཝཱ, ‘ཨ་ཉྙཾ ཛཱི་ཝཾ ཨ་ཉྙཾ ས་རཱི་རཾ’ ཨི་ཏི ཝཱ. ས་བྦཱ་ནི་སྶ ཏཱ་ནི པ་ཧཱི་ནཱ་ནི བྷ་ཝ་ནྟི ཨུ་ཙྪི་ནྣ་མཱུ་ལཱ་ནི ཏཱ་ལཱ་ཝ་ཏྠུ་ཀ་ཏཱ་ནི ཨ་ན་བྷཱ་ཝ་ངྐ་ཏཱ་ནི ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ་ནི.
‘‘ཨ་ཝི་ཛྫཱ་ཡ ཏྭེ་ཝ, བྷི་ཀྑུ, ཨ་སེ་ས་ཝི་རཱ་ག་ནི་རོ་དྷཱ ཡཱ་ནི་སྶ ཏཱ་ནི ཝི་སཱུ་ཀཱ་ཡི་ཀཱ་ནི ཝི་སེ་ཝི་ཏཱ་ནི ཝི་པྥ་ནྡི་ཏཱ་ནི ཀཱ་ནི་ཙི ཀཱ་ནི་ཙི. ‘ཀ་ཏ་མཱ ཛཱ་ཏི, ཀ་སྶ ཙ པ་ནཱ་ཡཾ ཛཱ་ཏི’ ཨི་ཏི ཝཱ, ‘ཨ་ཉྙཱ ཛཱ་ཏི, ཨ་ཉྙ་སྶ ཙ པ་ནཱ་ཡཾ ཛཱ་ཏི’ ཨི་ཏི ཝཱ, ‘ཏཾ ཛཱི་ཝཾ ཏཾ ས་རཱི་རཾ’ ཨི་ཏི ཝཱ, ‘ཨ་ཉྙཾ ཛཱི་ཝཾ ཨ་ཉྙཾ ས་རཱི་རཾ’ ཨི་ཏི ཝཱ. ས་བྦཱ་ནི་སྶ ཏཱ་ནི པ་ཧཱི་ནཱ་ནི བྷ་ཝ་ནྟི ཨུ་ཙྪི་ནྣ་མཱུ་ལཱ་ནི ཏཱ་ལཱ་ཝ་ཏྠུ་ཀ་ཏཱ་ནི ཨ་ན་བྷཱ་ཝ་ངྐ་ཏཱ་ནི ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ་ནི.
‘‘ཨ་ཝི་ཛྫཱ་ཡ ཏྭེ་ཝ, བྷི་ཀྑུ, ཨ་སེ་ས་ཝི་རཱ་ག་ནི་རོ་དྷཱ ཡཱ་ནི་སྶ ཏཱ་ནི ཝི་སཱུ་ཀཱ་ཡི་ཀཱ་ནི ཝི་སེ་ཝི་ཏཱ་ནི ཝི་པྥ་ནྡི་ཏཱ་ནི ཀཱ་ནི་ཙི ཀཱ་ནི་ཙི. ཀ་ཏ་མོ བྷ་ཝོ…པེ… ཀ་ཏ་མཾ ཨུ་པཱ་དཱ་ནཾ… ཀ་ཏ་མཱ ཏ་ཎྷཱ… ཀ་ཏ་མཱ ཝེ་ད་ནཱ… ཀ་ཏ་མོ ཕ་སྶོ… ཀ་ཏ་མཾ ས་ལཱ༹་ཡ་ཏ་ནཾ… ཀ་ཏ་མཾ ནཱ་མ་རཱུ་པཾ… ཀ་ཏ་མཾ ཝི་ཉྙཱ་ཎཾ…པེ….
‘‘ཨ་ཝི་ཛྫཱ་ཡ ཏྭེ་ཝ, བྷི་ཀྑུ, ཨ་སེ་ས་ཝི་རཱ་ག་ནི་རོ་དྷཱ ཡཱ་ནི་སྶ ཏཱ་ནི ཝི་སཱུ་ཀཱ་ཡི་ཀཱ་ནི ཝི་སེ་ཝི་ཏཱ་ནི ཝི་པྥ་ནྡི་ཏཱ་ནི ཀཱ་ནི་ཙི ཀཱ་ནི་ཙི. ‘ཀ་ཏ་མེ ས་ངྑཱ་རཱ, ཀ་སྶ ཙ པ་ནི་མེ ས་ངྑཱ་རཱ’ ཨི་ཏི ཝཱ, ‘ཨ་ཉྙེ ས་ངྑཱ་རཱ, ཨ་ཉྙ་སྶ ཙ པ་ནི་མེ ས་ངྑཱ་རཱ’ ཨི་ཏི ཝཱ, ‘ཏཾ ཛཱི་ཝཾ ཏཾ ས་རཱི་རཾ’ ཨི་ཏི ཝཱ, ‘ཨ་ཉྙཾ ཛཱི་ཝཾ, ཨ་ཉྙཾ ས་རཱི་རཾ’ ཨི་ཏི ཝཱ. ས་བྦཱ་ནི་སྶ ཏཱ་ནི པ་ཧཱི་ནཱ་ནི བྷ་ཝ་ནྟི ཨུ་ཙྪི་ནྣ་མཱུ་ལཱ་ནི ཏཱ་ལཱ་ཝ་ཏྠུ་ཀ་ཏཱ་ནི ཨ་ན་བྷཱ་ཝ་ངྐ་ཏཱ་ནི ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ་ནཱི’’ཏི. པ་ཉྩ་མཾ.