༣. ད་ས་བ་ལ་ཝ་གྒོ
༡. ད་ས་བ་ལ་སུ་ཏྟཾ
༢༡. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ད་ས་བ་ལ་ས་མ་ནྣཱ་ག་ཏོ, བྷི་ཀྑ་ཝེ, ཏ་ཐཱ་ག་ཏོ ཙ་ཏཱུ་ཧི ཙ ཝེ་སཱ་ར་ཛྫེ་ཧི ས་མ་ནྣཱ་ག་ཏོ ཨཱ་ས་བྷཾ ཋཱ་ནཾ པ་ཊི་ཛཱ་ནཱ་ཏི, པ་རི་སཱ་སུ སཱི་ཧ་ནཱ་དཾ ན་ད་ཏི, བྲ་ཧྨ་ཙ་ཀྐཾ པ་ཝ་ཏྟེ་ཏི – ཨི་ཏི རཱུ་པཾ ཨི་ཏི རཱུ་པ་སྶ ས་མུ་ད་ཡོ ཨི་ཏི རཱུ་པ་སྶ ཨ་ཏྠ་ངྒ་མོ, ཨི་ཏི ཝེ་ད་ནཱ ཨི་ཏི ཝེ་ད་ནཱ་ཡ ས་མུ་ད་ཡོ ཨི་ཏི ཝེ་ད་ནཱ་ཡ ཨ་ཏྠ་ངྒ་མོ, ཨི་ཏི ས་ཉྙཱ ཨི་ཏི ས་ཉྙཱ་ཡ ས་མུ་ད་ཡོ ཨི་ཏི ས་ཉྙཱ་ཡ ཨ་ཏྠ་ངྒ་མོ, ཨི་ཏི ས་ངྑཱ་རཱ ཨི་ཏི ས་ངྑཱ་རཱ་ནཾ ས་མུ་ད་ཡོ ཨི་ཏི ས་ངྑཱ་རཱ་ནཾ ཨ་ཏྠ་ངྒ་མོ, ཨི་ཏི ཝི་ཉྙཱ་ཎཾ ཨི་ཏི ཝི་ཉྙཱ་ཎ་སྶ ས་མུ་ད་ཡོ ཨི་ཏི ཝི་ཉྙཱ་ཎ་སྶ ཨ་ཏྠ་ངྒ་མོ. ཨི་ཏི ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྶུ་པྤཱ་དཱ ཨི་དཾ ཨུ་པྤ་ཛྫ་ཏི. ཨི་མ་སྨིཾ ཨ་ས་ཏི ཨི་དཾ ན ཧོ་ཏི, ཨི་མ་སྶ ནི་རོ་དྷཱ ཨི་དཾ ནི་རུ་ཛ྄ཛྷ་ཏི. ཡ་དི་དཾ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི. ཨ་ཝི་ཛྫཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ས་ངྑཱ་ར་ནི་རོ་དྷོ; ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི’’ཏི. པ་ཋ་མཾ.
༢. དུ་ཏི་ཡ་ད་ས་བ་ལ་སུ་ཏྟཾ
༢༢. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ད་ས་བ་ལ་ས་མ་ནྣཱ་ག་ཏོ, བྷི་ཀྑ་ཝེ, ཏ་ཐཱ་ག་ཏོ ཙ་ཏཱུ་ཧི ཙ ཝེ་སཱ་ར་ཛྫེ་ཧི ས་མ་ནྣཱ་ག་ཏོ ཨཱ་ས་བྷཾ ཋཱ་ནཾ པ་ཊི་ཛཱ་ནཱ་ཏི, པ་རི་སཱ་སུ སཱི་ཧ་ནཱ་དཾ ན་ད་ཏི, བྲ་ཧྨ་ཙ་ཀྐཾ པ་ཝ་ཏྟེ་ཏྟི – ‘ཨི་ཏི རཱུ་པཾ ཨི་ཏི རཱུ་པ་སྶ ས་མུ་ད་ཡོ ཨི་ཏི རཱུ་པ་སྶ ཨ་ཏྠ་ངྒ་མོ, ཨི་ཏི ཝེ་ད་ནཱ ཨི་ཏི ཝེ་ད་ནཱ་ཡ ས་མུ་ད་ཡོ ཨི་ཏི ཝེ་ད་ནཱ་ཡ ཨ་ཏྠ་ངྒ་མོ, ཨི་ཏི ས་ཉྙཱ ཨི་ཏི ས་ཉྙཱ་ཡ ས་མུ་ད་ཡོ ཨི་ཏི ས་ཉྙཱ་ཡ ཨ་ཏྠ་ངྒ་མོ, ཨི་ཏི ས་ངྑཱ་རཱ ཨི་ཏི ས་ངྑཱ་རཱ་ནཾ ས་མུ་ད་ཡོ ཨི་ཏི ས་ངྑཱ་རཱ་ནཾ ཨ་ཏྠ་ངྒ་མོ, ཨི་ཏི ཝི་ཉྙཱ་ཎཾ ཨི་ཏི ཝི་ཉྙཱ་ཎ་སྶ ས་མུ་ད་ཡོ ཨི་ཏི ཝི་ཉྙཱ་ཎ་སྶ ཨ་ཏྠ་ངྒ་མོ. ཨི་ཏི ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྶུ་པྤཱ་དཱ ཨི་དཾ ཨུ་པྤ་ཛྫ་ཏི; ཨི་མ་སྨིཾ ཨ་ས་ཏི ཨི་དཾ ན ཧོ་ཏི ཨི་མ་སྶ ནི་རོ་དྷཱ ཨི་དཾ ནི་རུ་ཛ྄ཛྷ་ཏི. ཡ་དི་དཾ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི. ཨ་ཝི་ཛྫཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ས་ངྑཱ་ར་ནི་རོ་དྷོ; ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི’’’.
‘‘ཨེ་ཝཾ སྭཱ་ཀྑཱ་ཏོ, བྷི་ཀྑ་ཝེ, མ་ཡཱ དྷ་མྨོ ཨུ་ཏྟཱ་ནོ ཝི་ཝ་ཊོ པ་ཀཱ་སི་ཏོ ཚི་ནྣ་པི་ལོ་ཏི་ཀོ. ཨེ་ཝཾ སྭཱ་ཀྑཱ་ཏེ ཁོ, བྷི་ཀྑ་ཝེ, མ་ཡཱ དྷ་མྨེ ཨུ་ཏྟཱ་ནེ ཝི་ཝ་ཊེ པ་ཀཱ་སི་ཏེ ཚི་ནྣ་པི་ལོ་ཏི་ཀེ ཨ་ལ་མེ་ཝ ས་དྡྷཱ་པ་བྦ་ཛི་ཏེ་ན ཀུ་ལ་པུ་ཏྟེ་ན ཝཱི་རི་ཡཾ ཨཱ་ར་བྷི་ཏུཾ – ‘ཀཱ་མཾ ཏ་ཙོ ཙ ནྷཱ་རུ [ན་ཧཱ་རུ (སཱི. སྱཱ. ཀཾ. པཱི.)] ཙ ཨ་ཊྛི ཙ ཨ་ཝ་སི་སྶ་ཏུ, ས་རཱི་རེ ཨུ་པ་སུ་སྶ་ཏུ [ཨ་ཝ་སུ་སྶ་ཏུ མ. ནི. ༢.༡༨༤] མཾ་ས་ལོ་ཧི་ཏཾ. ཡཾ ཏཾ པུ་རི་ས་ཐཱ་མེ་ན པུ་རི་ས་ཝཱི་རི་ཡེ་ན པུ་རི་ས་པ་ར་ཀྐ་མེ་ན པ་ཏྟ་བྦཾ, ན ཏཾ ཨ་པཱ་པུ་ཎི་ཏྭཱ ཝཱི་རི་ཡ་སྶ ས་ཎྛཱ་ནཾ བྷ་ཝི་སྶ་ཏཱི’’’ཏི.
‘‘དུ་ཀྑཾ, བྷི་ཀྑ་ཝེ, ཀུ་སཱི་ཏོ ཝི་ཧ་ར་ཏི ཝོ་ཀི་ཎྞོ པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི, མ་ཧ་ནྟ་ཉྩ ས་ད་ཏྠཾ པ་རི་ཧཱ་པེ་ཏི. ཨཱ་ར་དྡྷ་ཝཱི་རི་ཡོ ཙ ཁོ, བྷི་ཀྑ་ཝེ, སུ་ཁཾ ཝི་ཧ་ར་ཏི པ་ཝི་ཝི་ཏྟོ པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི, མ་ཧ་ནྟ་ཉྩ ས་ད་ཏྠཾ པ་རི་པཱུ་རེ་ཏི. ན, བྷི་ཀྑ་ཝེ, ཧཱི་ནེ་ན ཨ་གྒ་སྶ པ་ཏྟི ཧོ་ཏི. ཨ་གྒེ་ན ཙ ཁོ, བྷི་ཀྑ་ཝེ, ཨ་གྒ་སྶ པ་ཏྟི ཧོ་ཏི. མ་ཎྜ་པེ་ཡྻ་མི་དཾ, བྷི་ཀྑ་ཝེ, བྲ་ཧྨ་ཙ་རི་ཡཾ, ས་ཏྠཱ ས་མྨུ་ཁཱི་བྷཱུ་ཏོ. ཏ་སྨཱ་ཏི་ཧ, བྷི་ཀྑ་ཝེ, ཝཱི་རི་ཡཾ ཨཱ་ར་བྷ་ཐ ཨ་པྤ་ཏྟ་སྶ པ་ཏྟི་ཡཱ, ཨ་ན་དྷི་ག་ཏ་སྶ ཨ་དྷི་ག་མཱ་ཡ, ཨ་ས་ཙྪི་ཀ་ཏ་སྶ ས་ཙྪི་ཀི་རི་ཡཱ་ཡ. ‘ཨེ་ཝཾ ནོ ཨ་ཡཾ ཨ་མྷཱ་ཀཾ པ་བྦ་ཛྫཱ ཨ་ཝ་ཉྫྷཱ བྷ་ཝི་སྶ་ཏི ས་ཕ་ལཱ ས་ཨུ་དྲ་ཡཱ. ཡེ་ས་ཉྩ [ཡེ་སཾ (སཱི. སྱཱ. ཀཾ.), ཡེ་སཾ ཧི (པཱི. ཀ.)] མ་ཡཾ པ་རི་བྷུ་ཉྫཱ་མ ཙཱི་ཝ་ར-པི་ཎྜ་པཱ་ཏ་སེ་ནཱ་ས་ན-གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ཏེ་སཾ ཏེ ཀཱ་རཱ ཨ་མྷེ་སུ མ་ཧ་པྥ་ལཱ བྷ་ཝི་སྶ་ནྟི མ་ཧཱ་ནི་སཾ་སཱ’ཏི – ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦཾ. ཨ་ཏྟ་ཏྠཾ ཝཱ ཧི, བྷི་ཀྑ་ཝེ, ས་མྤ་སྶ་མཱ་ནེ་ན ཨ་ལ་མེ་ཝ ཨ་པྤ་མཱ་དེ་ན ས་མྤཱ་དེ་ཏུཾ; པ་ར་ཏྠཾ ཝཱ ཧི, བྷི་ཀྑ་ཝེ, ས་མྤ་སྶ་མཱ་ནེ་ན ཨ་ལ་མེ་ཝ ཨ་པྤ་མཱ་དེ་ན ས་མྤཱ་དེ་ཏུཾ; ཨུ་བྷ་ཡ་ཏྠཾ ཝཱ ཧི, བྷི་ཀྑ་ཝེ, ས་མྤ་སྶ་མཱ་ནེ་ན ཨ་ལ་མེ་ཝ ཨ་པྤ་མཱ་དེ་ན ས་མྤཱ་དེ་ཏུ’’ནྟི. དུ་ཏི་ཡཾ.
༣. ཨུ་པ་ནི་ས་སུ་ཏྟཾ
༢༣. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཛཱ་ན་ཏོ ཨ་ཧཾ, བྷི་ཀྑ་ཝེ, པ་སྶ་ཏོ ཨཱ་ས་ཝཱ་ནཾ ཁ་ཡཾ ཝ་དཱ་མི, ནོ ཨ་ཛཱ་ན་ཏོ ནོ ཨ་པ་སྶ་ཏོ. ཀི་ཉྩ, བྷི་ཀྑ་ཝེ, ཛཱ་ན་ཏོ ཀིཾ པ་སྶ་ཏོ ཨཱ་ས་ཝཱ་ནཾ ཁ་ཡོ ཧོ་ཏི? ཨི་ཏི རཱུ་པཾ ཨི་ཏི རཱུ་པ་སྶ ས་མུ་ད་ཡོ ཨི་ཏི རཱུ་པ་སྶ ཨ་ཏྠ་ངྒ་མོ, ཨི་ཏི ཝེ་ད་ནཱ…པེ… ཨི་ཏི ས་ཉྙཱ… ཨི་ཏི ས་ངྑཱ་རཱ… ཨི་ཏི ཝི་ཉྙཱ་ཎཾ ཨི་ཏི ཝི་ཉྙཱ་ཎ་སྶ ས་མུ་ད་ཡོ ཨི་ཏི ཝི་ཉྙཱ་ཎ་སྶ ཨ་ཏྠ་ངྒ་མོ་ཏི. ཨེ་ཝཾ ཁོ, བྷི་ཀྑ་ཝེ, ཛཱ་ན་ཏོ ཨེ་ཝཾ པ་སྶ་ཏོ ཨཱ་ས་ཝཱ་ནཾ ཁ་ཡོ ཧོ་ཏི’’.
‘‘ཡ་མྤི་སྶ ཏཾ, བྷི་ཀྑ་ཝེ, ཁ་ཡ་སྨིཾ ཁ་ཡེ་ཉྙཱ་ཎཾ, ཏ་མྤི ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཁ་ཡེ་ཉཱ་ཎ་སྶ ཨུ་པ་ནི་སཱ? ‘ཝི་མུ་ཏྟཱི’ཏི་སྶ ཝ་ཙ་ནཱི་ཡཾ. ཝི་མུ་ཏྟི་མྤཱ་ཧཾ [ཝི་མུ་ཏྟི་མྤ་ཧཾ (སཱི. སྱཱ. ཀཾ.)], བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཝི་མུ་ཏྟི་ཡཱ ཨུ་པ་ནི་སཱ? ‘ཝི་རཱ་གོ’ཏི་སྶ ཝ་ཙ་ནཱི་ཡཾ. ཝི་རཱ་ག་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཝི་རཱ་ག་སྶ ཨུ་པ་ནི་སཱ? ‘ནི་བྦི་དཱ’ཏི་སྶ ཝ་ཙ་ནཱི་ཡཾ. ནི་བྦི་ད་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ནི་བྦི་དཱ་ཡ ཨུ་པ་ནི་སཱ? ‘ཡ་ཐཱ་བྷཱུ་ཏ་ཉཱ་ཎ་ད་སྶ་ན’ནྟི་སྶ ཝ་ཙ་ནཱི་ཡཾ. ཡ་ཐཱ་བྷཱུ་ཏ་ཉཱ་ཎ་ད་སྶ་ན་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཡ་ཐཱ་བྷཱུ་ཏ་ཉཱ་ཎ་ད་སྶ་ན་སྶ ཨུ་པ་ནི་སཱ? ‘ས་མཱ་དྷཱི’ཏི་སྶ ཝ་ཙ་ནཱི་ཡཾ. ས་མཱ་དྷི་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ.
‘‘ཀཱ ཙ, བྷི་ཀྑ་ཝེ, ས་མཱ་དྷི་སྶ ཨུ་པ་ནི་སཱ? ‘སུ་ཁ’ནྟི་སྶ ཝ་ཙ་ནཱི་ཡཾ. སུ་ཁ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, སུ་ཁ་སྶ ཨུ་པ་ནི་སཱ? ‘པ་སྶ་དྡྷཱི’ཏི་སྶ ཝ་ཙ་ནཱི་ཡཾ. པ་སྶ་དྡྷི་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, པ་སྶ་དྡྷི་ཡཱ ཨུ་པ་ནི་སཱ? ‘པཱི་ཏཱི’ཏི་སྶ ཝ་ཙ་ནཱི་ཡཾ. པཱི་ཏི་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, པཱི་ཏི་ཡཱ ཨུ་པ་ནི་སཱ? ‘པཱ་མོ་ཛྫ’ནྟི་སྶ ཝ་ཙ་ནཱི་ཡཾ. པཱ་མོ་ཛྫ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, པཱ་མོ་ཛྫ་སྶ ཨུ་པ་ནི་སཱ? ‘ས་དྡྷཱ’ཏི་སྶ ཝ་ཙ་ནཱི་ཡཾ. ས་དྡྷ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ.
‘‘ཀཱ ཙ, བྷི་ཀྑ་ཝེ, ས་དྡྷཱ་ཡ ཨུ་པ་ནི་སཱ? ‘དུ་ཀྑ’ནྟི་སྶ ཝ་ཙ་ནཱི་ཡཾ. དུ་ཀྑ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, དུ་ཀྑ་སྶ ཨུ་པ་ནི་སཱ? ‘ཛཱ་ཏཱི’ཏི་སྶ ཝ་ཙ་ནཱི་ཡཾ. ཛཱ་ཏི་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཛཱ་ཏི་ཡཱ ཨུ་པ་ནི་སཱ? ‘བྷ་ཝོ’ཏི་སྶ ཝ་ཙ་ནཱི་ཡཾ. བྷ་ཝ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, བྷ་ཝ་སྶ ཨུ་པ་ནི་སཱ? ‘ཨུ་པཱ་དཱ་ན’ནྟི་སྶ ཝ་ཙ་ནཱི་ཡཾ. ཨུ་པཱ་དཱ་ན་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ. ཀཱ ཙ, བྷི་ཀྑ་ཝེ, ཨུ་པཱ་དཱ་ན་སྶ ཨུ་པ་ནི་སཱ? ‘ཏ་ཎྷཱ’ཏི་སྶ ཝ་ཙ་ནཱི་ཡཾ. ཏ་ཎྷ་མྤཱ་ཧཾ, བྷི་ཀྑ་ཝེ, ས་ཨུ་པ་ནི་སཾ ཝ་དཱ་མི, ནོ ཨ་ནུ་པ་ནི་སཾ.
‘‘ཀཱ ཙ, བྷི་ཀྑ་ཝེ, ཏ་ཎྷཱ་ཡ ཨུ་པ་ནི་སཱ? ‘ཝེ་ད་ནཱ’ཏི་སྶ ཝ་ཙ་ནཱི་ཡཾ…པེ… ‘ཕ་སྶོ’ཏི་སྶ ཝ་ཙ་ནཱི་ཡཾ… ‘ས་ལཱ༹་ཡ་ཏ་ན’ནྟི་སྶ ཝ་ཙ་ནཱི་ཡཾ… ‘ནཱ་མ་རཱུ་པ’ནྟི་སྶ ཝ་ཙ་ནཱི་ཡཾ… ‘ཝི་ཉྙཱ་ཎ’ནྟི་སྶ ཝ་ཙ་ནཱི་ཡཾ… ‘ས་ངྑཱ་རཱ’ཏི་སྶ ཝ་ཙ་ནཱི་ཡཾ. ས་ངྑཱ་རེ་པཱ་ཧཾ, བྷི་ཀྑ་ཝེ, ས་ཨུ་པ་ནི་སེ ཝ་དཱ་མི, ནོ ཨ་ནུ་པ་ནི་སེ. ཀཱ ཙ, བྷི་ཀྑ་ཝེ, ས་ངྑཱ་རཱ་ནཾ ཨུ་པ་ནི་སཱ? ‘ཨ་ཝི་ཛྫཱ’ཏི་སྶ ཝ་ཙ་ནཱི་ཡཾ.
‘‘ཨི་ཏི ཁོ, བྷི་ཀྑ་ཝེ, ཨ་ཝི་ཛྫཱུ་པ་ནི་སཱ ས་ངྑཱ་རཱ, ས་ངྑཱ་རཱུ་པ་ནི་སཾ ཝི་ཉྙཱ་ཎཾ, ཝི་ཉྙཱ་ཎཱུ་པ་ནི་སཾ ནཱ་མ་རཱུ་པཾ, ནཱ་མ་རཱུ་པཱུ་པ་ནི་སཾ ས་ལཱ༹་ཡ་ཏ་ནཾ, ས་ལཱ༹་ཡ་ཏ་ནཱུ་པ་ནི་སོ ཕ་སྶོ, ཕ་སྶཱུ་པ་ནི་སཱ ཝེ་ད་ནཱ, ཝེ་ད་ནཱུ་པ་ནི་སཱ ཏ་ཎྷཱ, ཏ་ཎྷཱུ་པ་ནི་སཾ ཨུ་པཱ་དཱ་ནཾ, ཨུ་པཱ་དཱ་ནཱུ་པ་ནི་སོ བྷ་ཝོ, བྷ་ཝཱུ་པ་ནི་སཱ ཛཱ་ཏི, ཛཱ་ཏཱུ་པ་ནི་སཾ དུ་ཀྑཾ, དུ་ཀྑཱུ་པ་ནི་སཱ ས་དྡྷཱ, ས་དྡྷཱུ་པ་ནི་སཾ པཱ་མོ་ཛྫཾ, པཱ་མོ་ཛྫཱུ་པ་ནི་སཱ པཱི་ཏི, པཱི་ཏཱུ་པ་ནི་སཱ པ་སྶ་དྡྷི, པ་སྶ་དྡྷཱུ་པ་ནི་སཾ སུ་ཁཾ, སུ་ཁཱུ་པ་ནི་སོ ས་མཱ་དྷི, ས་མཱ་དྷཱུ་པ་ནི་སཾ ཡ་ཐཱ་བྷཱུ་ཏ་ཉཱ་ཎ་ད་སྶ་ནཾ, ཡ་ཐཱ་བྷཱུ་ཏ་ཉཱ་ཎ་ད་སྶ་ནཱུ་པ་ནི་སཱ ནི་བྦི་དཱ, ནི་བྦི་དཱུ་པ་ནི་སོ ཝི་རཱ་གོ, ཝི་རཱ་གཱུ་པ་ནི་སཱ ཝི་མུ་ཏྟི, ཝི་མུ་ཏྟཱུ་པ་ནི་སཾ ཁ་ཡེ་ཉཱ་ཎཾ.
‘‘སེ་ཡྻ་ཐཱ་པི, བྷི་ཀྑ་ཝེ, ཨུ་པ་རི་པ་བྦ་ཏེ ཐུ་ལླ་ཕུ་སི་ཏ་ཀེ དེ་ཝེ ཝ་སྶ་ནྟེ ཏཾ ཨུ་ད་ཀཾ ཡ་ཐཱ་ནི་ནྣཾ པ་ཝ་ཏྟ་མཱ་ནཾ པ་བྦ་ཏ་ཀ་ནྡ་ར་པ་ད་ར་སཱ་ཁཱ པ་རི་པཱུ་རེ་ཏི. པ་བྦ་ཏ་ཀ་ནྡ་ར་པ་ད་ར་སཱ་ཁཱ་པ་རི་པཱུ་རཱ ཀུ་སོ་བྦྷེ [ཀུ་སྶུ་བྦྷེ (སཱི. སྱཱ. ཀཾ.), ཀུ་སུ་བྦྷེ (པཱི.) ཎྭཱ་དི ༡༢༩ སུ་ཏྟཾ ཨོ་ལོ་ཀེ་ཏ་བྦཾ] པ་རི་པཱུ་རེ་ནྟི. ཀུ་སོ་བྦྷཱ པ་རི་པཱུ་རཱ མ་ཧཱ་སོ་བྦྷེ པ་རི་པཱུ་རེ་ནྟི. མ་ཧཱ་སོ་བྦྷཱ པ་རི་པཱུ་རཱ ཀུ་ནྣ་དི་ཡོ པ་རི་པཱུ་རེ་ནྟི. ཀུ་ནྣ་དི་ཡོ པ་རི་པཱུ་རཱ མ་ཧཱ་ན་དི་ཡོ པ་རི་པཱུ་རེ་ནྟི. མ་ཧཱ་ན་དི་ཡོ པ་རི་པཱུ་རཱ མ་ཧཱ་ས་མུ་དྡཾ པ་རི་པཱུ་རེ་ནྟི.
‘‘ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཝི་ཛྫཱུ་པ་ནི་སཱ ས་ངྑཱ་རཱ, ས་ངྑཱ་རཱུ་པ་ནི་སཾ ཝི་ཉྙཱ་ཎཾ, ཝི་ཉྙཱ་ཎཱུ་པ་ནི་སཾ ནཱ་མ་རཱུ་པཾ, ནཱ་མ་རཱུ་པཱུ་པ་ནི་སཾ ས་ལཱ༹་ཡ་ཏ་ནཾ, ས་ལཱ༹་ཡ་ཏ་ནཱུ་པ་ནི་སོ ཕ་སྶོ, ཕ་སྶཱུ་པ་ནི་སཱ ཝེ་ད་ནཱ, ཝེ་ད་ནཱུ་པ་ནི་སཱ ཏ་ཎྷཱ, ཏ་ཎྷཱུ་པ་ནི་སཾ ཨུ་པཱ་དཱ་ནཾ, ཨུ་པཱ་དཱ་ནཱུ་པ་ནི་སོ བྷ་ཝོ, བྷ་ཝཱུ་པ་ནི་སཱ ཛཱ་ཏི, ཛཱ་ཏཱུ་པ་ནི་སཾ དུ་ཀྑཾ, དུ་ཀྑཱུ་པ་ནི་སཱ ས་དྡྷཱ, ས་དྡྷཱུ་པ་ནི་སཾ པཱ་མོ་ཛྫཾ, པཱ་མོ་ཛྫཱུ་པ་ནི་སཱ པཱི་ཏི, པཱི་ཏཱུ་པ་ནི་སཱ པ་སྶ་དྡྷི, པ་སྶ་དྡྷཱུ་པ་ནི་སཾ སུ་ཁཾ, སུ་ཁཱུ་པ་ནི་སོ ས་མཱ་དྷི, ས་མཱ་དྷཱུ་པ་ནི་སཾ ཡ་ཐཱ་བྷཱུ་ཏ་ཉཱ་ཎ་ད་སྶ་ནཾ, ཡ་ཐཱ་བྷཱུ་ཏ་ཉཱ་ཎ་ད་སྶ་ནཱུ་པ་ནི་སཱ ནི་བྦི་དཱ, ནི་བྦི་དཱུ་པ་ནི་སོ ཝི་རཱ་གོ, ཝི་རཱ་གཱུ་པ་ནི་སཱ ཝི་མུ་ཏྟི, ཝི་མུ་ཏྟཱུ་པ་ནི་སཾ ཁ་ཡེ་ཉཱ་ཎ’’ནྟི. ཏ་ཏི་ཡཾ.
༤. ཨ་ཉྙ་ཏི་ཏྠི་ཡ་སུ་ཏྟཾ
༢༤. རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ རཱ་ཛ་ག་ཧཾ པི་ཎྜཱ་ཡ པཱ་ཝི་སི. ཨ་ཐ ཁོ ཨཱ་ཡ་སྨ་ཏོ སཱ་རི་པུ་ཏྟ་སྶ ཨེ་ཏ་ད་ཧོ་སི – ‘‘ཨ་ཏི་པྤ་གོ ཁོ ཏཱ་ཝ རཱ་ཛ་ག་ཧེ པི་ཎྜཱ་ཡ ཙ་རི་ཏུཾ. ཡཾ་ནཱུ་ནཱ་ཧཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻ’’ནྟི.
ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ སཱ་རི་པུ་ཏྟཾ ཏེ ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘‘ས་ནྟཱ་ཝུ་སོ, སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ པ་རཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི. ཨི་དྷ, པ་ནཱ་ཝུ་སོ སཱ་རི་པུ་ཏྟ, ས་མ་ཎོ གོ་ཏ་མོ ཀིཾ་ཝཱ་དཱི ཀི་མ་ཀྑཱ་ཡཱི? ཀ་ཐཾ བྱཱ་ཀ་ར་མཱ་ནཱ ཙ མ་ཡཾ ཝུ་ཏྟ་ཝཱ་དི་ནོ ཙེ་ཝ ས་མ་ཎ་སྶ གོ་ཏ་མ་སྶ ཨ་སྶཱ་མ, ན ཙ ས་མ་ཎཾ གོ་ཏ་མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻཱ་མ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻཱ་མ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ [ཝཱ་དཱ་ནུ་ཝཱ་དོ (ཀ.) དཱི. ནི. ༡.༣༨༡] གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻཱ’’ཏི?
‘‘པ་ཊི་ཙྩ་ས་མུ་པྤ་ནྣཾ ཁོ, ཨཱ་ཝུ་སོ, དུ་ཀྑཾ ཝུ་ཏྟཾ བྷ་ག་ཝ་ཏཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ བྷ་ག་ཝ་ཏོ ཨ་སྶ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻ.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ པ་རཾ་ཀ་ཏཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ པ་རཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏཱི’’ཏི.
ཨ་སྶོ་སི ཁོ ཨཱ་ཡ་སྨཱ ཨཱ་ན་ནྡོ ཨཱ་ཡ་སྨ་ཏོ སཱ་རི་པུ་ཏྟ་སྶ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ཨི་མཾ ཀ་ཐཱ་ས་ལླཱ་པཾ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ རཱ་ཛ་ག་ཧེ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ ཡཱ་ཝ་ཏ་ཀོ ཨཱ་ཡ་སྨ་ཏོ སཱ་རི་པུ་ཏྟ་སྶ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ཨ་ཧོ་སི ཀ་ཐཱ་ས་ལླཱ་པོ ཏཾ ས་བྦཾ བྷ་ག་ཝ་ཏོ ཨཱ་རོ་ཙེ་སི.
‘‘སཱ་དྷུ སཱ་དྷུ, ཨཱ་ན་ནྡ, ཡ་ཐཱ ཏཾ སཱ་རི་པུ་ཏྟོ ས་མྨཱ བྱཱ་ཀ་ར་མཱ་ནོ བྱཱ་ཀ་རེ་ཡྻ. པ་ཊི་ཙྩ་ས་མུ་པྤ་ནྣཾ ཁོ, ཨཱ་ན་ནྡ, དུ་ཀྑཾ ཝུ་ཏྟཾ མ་ཡཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ མེ ཨ་སྶ, ན ཙ མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻ.
‘‘ཏ་ཏྲཱ་ན་ནྡ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲཱ་ན་ནྡ, ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཨེ་ཀ་མི་དཱ་ཧཾ, ཨཱ་ན་ནྡ, ས་མ་ཡཾ ཨི་དྷེ་ཝ རཱ་ཛ་ག་ཧེ ཝི་ཧ་རཱ་མི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཨ་ཐ ཁྭཱ་ཧཾ, ཨཱ་ན་ནྡ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ རཱ་ཛ་ག་ཧཾ པི་ཎྜཱ་ཡ པཱ་ཝི་སིཾ. ཏ་སྶ མ་ཡ྄ཧཾ, ཨཱ་ན་ནྡ, ཨེ་ཏ་ད་ཧོ་སི – ‘ཨ་ཏི་པྤ་གོ ཁོ ཏཱ་ཝ རཱ་ཛ་ག་ཧེ པི་ཎྜཱ་ཡ ཙ་རི་ཏུཾ. ཡཾ་ནཱུ་ནཱ་ཧཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻ’’’ནྟི.
‘‘ཨ་ཐ ཁྭཱ་ཧཾ, ཨཱ་ན་ནྡ, ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དིཾ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ. ཨེ་ཀ་མ་ནྟཾ ནི་སི་ནྣཾ ཁོ མཾ, ཨཱ་ན་ནྡ, ཏེ ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཏ་ད་ཝོ་ཙུཾ –
‘ས་ནྟཱ་ཝུ་སོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ པ་རཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟཱ་ཝུ་སོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི. ཨི་དྷ ནོ ཨཱ་ཡ་སྨཱ གོ་ཏ་མོ ཀིཾ་ཝཱ་དཱི ཀི་མ་ཀྑཱ་ཡཱི? ཀ་ཐཾ བྱཱ་ཀ་ར་མཱ་ནཱ ཙ མ་ཡཾ ཝུ་ཏྟ་ཝཱ་དི་ནོ ཙེ་ཝ ཨཱ་ཡ་སྨ་ཏོ གོ་ཏ་མ་སྶ ཨ་སྶཱ་མ, ན ཙ ཨཱ་ཡ་སྨ་ནྟཾ གོ་ཏ་མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻཱ་མ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻཱ་མ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻཱ’’’ཏི?
‘‘ཨེ་ཝཾ ཝུ་ཏྟཱ་ཧཾ, ཨཱ་ན་ནྡ, ཏེ ཨ་ཉྙ་ཏི་ཏྠི་ཡེ པ་རི་བྦཱ་ཛ་ཀེ ཨེ་ཏ་ད་ཝོ་ཙཾ – ‘པ་ཊི་ཙྩ་ས་མུ་པྤ་ནྣཾ ཁོ, ཨཱ་ཝུ་སོ, དུ་ཀྑཾ ཝུ་ཏྟཾ མ་ཡཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ མེ ཨ་སྶ, ན ཙ མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻཱ’’’ཏི.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏཱི’’ཏི. ‘‘ཨ་ཙྪ་རི་ཡཾ བྷ་ནྟེ, ཨ་བྦྷུ་ཏཾ བྷ་ནྟེ! ཡ་ཏྲ ཧི ནཱ་མ ཨེ་ཀེ་ན པ་དེ་ན ས་བྦོ ཨ་ཏྠོ ཝུ་ཏྟོ བྷ་ཝི་སྶ་ཏི. སི་ཡཱ ནུ ཁོ, བྷ་ནྟེ, ཨེ་སེ་ཝ་ཏྠོ ཝི་ཏྠཱ་རེ་ན ཝུ་ཙྩ་མཱ་ནོ ག་མྦྷཱི་རོ ཙེ་ཝ ཨ་སྶ ག་མྦྷཱི་རཱ་ཝ་བྷཱ་སོ ཙཱ’’ཏི?
‘‘ཏེ་ན ཧཱ་ན་ནྡ, ཏ་ཉྙེ་ཝེ་ཏྠ པ་ཊི་བྷཱ་ཏཱུ’’ཏི. ‘‘ས་ཙེ མཾ, བྷ་ནྟེ, ཨེ་ཝཾ པུ་ཙྪེ་ཡྻུཾ – ‘ཛ་རཱ་མ་ར་ཎཾ, ཨཱ་ཝུ་སོ ཨཱ་ན་ནྡ, ཀིཾ་ནི་དཱ་ནཾ ཀིཾ་ས་མུ་ད་ཡཾ ཀིཾ་ཛཱ་ཏི་ཀཾ ཀིཾ་པ་བྷ་ཝ’ནྟི? ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ – ‘ཛ་རཱ་མ་ར་ཎཾ ཁོ, ཨཱ་ཝུ་སོ, ཛཱ་ཏི་ནི་དཱ་ནཾ ཛཱ་ཏི་ས་མུ་ད་ཡཾ ཛཱ་ཏི་ཛཱ་ཏི་ཀཾ ཛཱ་ཏི་པ་བྷ་ཝ’ནྟི. ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ.
‘‘ས་ཙེ མཾ, བྷ་ནྟེ, ཨེ་ཝཾ པུ་ཙྪེ་ཡྻུཾ – ‘ཛཱ་ཏི པ་ནཱ་ཝུ་སོ ཨཱ་ན་ནྡ, ཀིཾ་ནི་དཱ་ནཱ ཀིཾ་ས་མུ་ད་ཡཱ ཀིཾ་ཛཱ་ཏི་ཀཱ ཀིཾ་པ་བྷ་ཝཱ’ཏི? ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ – ‘ཛཱ་ཏི ཁོ, ཨཱ་ཝུ་སོ, བྷ་ཝ་ནི་དཱ་ནཱ བྷ་ཝ་ས་མུ་ད་ཡཱ བྷ་ཝ་ཛཱ་ཏི་ཀཱ བྷ་ཝ་པྤ་བྷ་ཝཱ’ཏི. ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ.
‘‘ས་ཙེ མཾ, བྷ་ནྟེ, ཨེ་ཝཾ པུ་ཙྪེ་ཡྻུཾ – ‘བྷ་ཝོ པ་ནཱ་ཝུ་སོ ཨཱ་ན་ནྡ, ཀིཾ་ནི་དཱ་ནོ ཀིཾ་ས་མུ་ད་ཡོ ཀིཾ་ཛཱ་ཏི་ཀོ ཀིཾ་པ་བྷ་ཝོ’ཏི? ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ – ‘བྷ་ཝོ ཁོ, ཨཱ་ཝུ་སོ, ཨུ་པཱ་དཱ་ན་ནི་དཱ་ནོ ཨུ་པཱ་དཱ་ན་ས་མུ་ད་ཡོ ཨུ་པཱ་དཱ་ན་ཛཱ་ཏི་ཀོ ཨུ་པཱ་དཱ་ན་པྤ་བྷ་ཝོ’ཏི. ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ.
‘‘ས་ཙེ མཾ, བྷ་ནྟེ, ཨེ་ཝཾ པུ་ཙྪེ་ཡྻུཾ – ཨུ་པཱ་དཱ་ནཾ པ་ནཱ་ཝུ་སོ…པེ… ཏ་ཎྷཱ པ་ནཱ་ཝུ་སོ…པེ… ཝེ་ད་ནཱ པ་ནཱ་ཝུ་སོ…པེ… ས་ཙེ མཾ, བྷ་ནྟེ, ཨེ་ཝཾ པུ་ཙྪེ་ཡྻུཾ – ‘ཕ་སྶོ པ་ནཱ་ཝུ་སོ ཨཱ་ན་ནྡ, ཀིཾ་ནི་དཱ་ནོ ཀིཾ་ས་མུ་ད་ཡོ ཀིཾ་ཛཱ་ཏི་ཀོ ཀིཾ་པ་བྷ་ཝོ’ཏི? ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻཾ – ‘ཕ་སྶོ ཁོ, ཨཱ་ཝུ་སོ, ས་ལཱ༹་ཡ་ཏ་ན་ནི་དཱ་ནོ ས་ལཱ༹་ཡ་ཏ་ན་ས་མུ་ད་ཡོ ས་ལཱ༹་ཡ་ཏ་ན་ཛཱ་ཏི་ཀོ ས་ལཱ༹་ཡ་ཏ་ན་པྤ་བྷ་ཝོ’ཏི. ‘ཚ་ནྣཾ་ཏྭེ་ཝ, ཨཱ་ཝུ་སོ, ཕ་སྶཱ་ཡ་ཏ་ནཱ་ནཾ ཨ་སེ་ས་ཝི་རཱ་ག་ནི་རོ་དྷཱ ཕ་སྶ་ནི་རོ་དྷོ; ཕ་སྶ་ནི་རོ་དྷཱ ཝེ་ད་ནཱ་ནི་རོ་དྷོ; ཝེ་ད་ནཱ་ནི་རོ་དྷཱ ཏ་ཎྷཱ་ནི་རོ་དྷོ; ཏ་ཎྷཱ་ནི་རོ་དྷཱ ཨུ་པཱ་དཱ་ན་ནི་རོ་དྷོ; ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ; བྷ་ཝ་ནི་རོ་དྷཱ ཛཱ་ཏི་ནི་རོ་དྷོ; ཛཱ་ཏི་ནི་རོ་དྷཱ ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ནི་རུ་ཛ྄ཛྷ་ནྟི. ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི’ཏི. ཨེ་ཝཾ པུ་ཊྛོ་ཧཾ, བྷ་ནྟེ, ཨེ་ཝཾ བྱཱ་ཀ་རེ་ཡྻ’’ནྟི. ཙ་ཏུ་ཏྠཾ.
༥. བྷཱུ་མི་ཛ་སུ་ཏྟཾ
༢༥. སཱ་ཝ་ཏྠི་ཡཾ ཝི་ཧ་ར་ཏི. ཨ་ཐ ཁོ ཨཱ་ཡ་སྨཱ བྷཱུ་མི་ཛོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ སཱ་རི་པུ་ཏྟེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ བྷཱུ་མི་ཛོ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ –
‘‘ས་ནྟཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ པ་རཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི. ས་ནྟཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ སུ་ཁ་དུ་ཀྑཾ པ་ཉྙ་པེ་ནྟི. ས་ནྟི པ་ནཱ་ཝུ་སོ སཱ་རི་པུ་ཏྟ, ཨེ་ཀེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑཾ པ་ཉྙ་པེ་ནྟི. ཨི་དྷ ནོ, ཨཱ་ཝུ་སོ སཱ་རི་པུ་ཏྟ, བྷ་ག་ཝཱ ཀིཾ་ཝཱ་དཱི ཀི་མ་ཀྑཱ་ཡཱི, ཀ་ཐཾ བྱཱ་ཀ་ར་མཱ་ནཱ ཙ མ་ཡཾ ཝུ་ཏྟ་ཝཱ་དི་ནོ ཙེ་ཝ བྷ་ག་ཝ་ཏོ ཨ་སྶཱ་མ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻཱ་མ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻཱ་མ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻཱ’’ཏི?
‘‘པ་ཊི་ཙྩ་ས་མུ་པྤ་ནྣཾ ཁོ, ཨཱ་ཝུ་སོ, སུ་ཁ་དུ་ཀྑཾ ཝུ་ཏྟཾ བྷ་ག་ཝ་ཏཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ བྷ་ག་ཝ་ཏོ ཨ་སྶ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻ.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི, ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑཾ པ་ཉྙ་པེ་ནྟི, ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲཱ་ཝུ་སོ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ…པེ. … ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏཱི’’ཏི.
ཨ་སྶོ་སི ཁོ ཨཱ་ཡ་སྨཱ ཨཱ་ན་ནྡོ ཨཱ་ཡ་སྨ་ཏོ སཱ་རི་པུ་ཏྟ་སྶ ཨཱ་ཡ་སྨ་ཏཱ བྷཱུ་མི་ཛེ་ན ས་དྡྷིཾ ཨི་མཾ ཀ་ཐཱ་ས་ལླཱ་པཾ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ ཡཱ་ཝ་ཏ་ཀོ ཨཱ་ཡ་སྨ་ཏོ སཱ་རི་པུ་ཏྟ་སྶ ཨཱ་ཡ་སྨ་ཏཱ བྷཱུ་མི་ཛེ་ན ས་དྡྷིཾ ཨ་ཧོ་སི ཀ་ཐཱ་ས་ལླཱ་པོ ཏཾ ས་བྦཾ བྷ་ག་ཝ་ཏོ ཨཱ་རོ་ཙེ་སི.
‘‘སཱ་དྷུ སཱ་དྷུ, ཨཱ་ན་ནྡ, ཡ་ཐཱ ཏཾ སཱ་རི་པུ་ཏྟོ ས་མྨཱ བྱཱ་ཀ་ར་མཱ་ནོ བྱཱ་ཀ་རེ་ཡྻ. པ་ཊི་ཙྩ་ས་མུ་པྤ་ནྣཾ ཁོ, ཨཱ་ན་ནྡ, སུ་ཁ་དུ་ཀྑཾ ཝུ་ཏྟཾ མ་ཡཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ མེ ཨ་སྶ, ན ཙ མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻ.
‘‘ཏ་ཏྲཱ་ན་ནྡ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲཱ་ན་ནྡ, ཡེ ཏེ ས་མ་ཎ་བྲཱ་ཧྨ་ཎཱ ཀ་མྨ་ཝཱ་དཱ ས་ཡཾ་ཀ་ཏཾ སུ་ཁ་དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ་ཀ་མྨ་ཝཱ་དཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཀཱ་ཡེ ཝཱ ཧཱ་ན་ནྡ, ས་ཏི ཀཱ་ཡ་ས་ཉྩེ་ཏ་ནཱ་ཧེ་ཏུ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ཝཱ་ཙཱ་ཡ ཝཱ ཧཱ་ན་ནྡ, ས་ཏི ཝ་ཙཱི་ས་ཉྩེ་ཏ་ནཱ་ཧེ་ཏུ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. མ་ནེ ཝཱ ཧཱ་ན་ནྡ, ས་ཏི མ་ནོ་ས་ཉྩེ་ཏ་ནཱ་ཧེ་ཏུ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ ཨ་ཝི་ཛྫཱ་པ་ཙྩ་ཡཱ ཙ.
‘‘སཱ་མཾ ཝཱ ཏཾ, ཨཱ་ན་ནྡ, ཀཱ་ཡ་ས་ངྑཱ་རཾ ཨ་བྷི་ས་ངྑ་རོ་ཏི, ཡཾ་པ་ཙྩ་ཡཱ་སྶ [ཡཾ་པ་ཙྩ་ཡཱ་ཡ (སྱཱ. ཀཾ.), ཡཾ་པ་ཙྩ་ཡཱ ཡཾ (ཀ.)] ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. པ་རེ ཝཱ ཏཾ [པ་རེ ཝཱ་སྶ ཏཾ (སཱི. པཱི.), པ་རེ ཝཱ་ཡ་ཏཾ (སྱཱ. ཀཾ.)], ཨཱ་ན་ནྡ, ཀཱ་ཡ་ས་ངྑཱ་རཾ ཨ་བྷི་ས་ངྑ་རོ་ནྟི, ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ས་མྤ་ཛཱ་ནོ ཝཱ ཏཾ, ཨཱ་ན་ནྡ, ཀཱ་ཡ་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ཨ་ས་མྤ་ཛཱ་ནོ ཝཱ ཏཾ, ཨཱ་ན་ནྡ, ཀཱ་ཡ་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ.
‘‘སཱ་མཾ ཝཱ ཏཾ, ཨཱ་ན་ནྡ, ཝ་ཙཱི་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. པ་རེ ཝཱ ཏཾ, ཨཱ་ན་ནྡ, ཝ་ཙཱི་ས་ངྑཱ་རཾ ཨ་བྷི་ས་ངྑ་རོ་ནྟི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ས་མྤ་ཛཱ་ནོ ཝཱ ཏཾ, ཨཱ་ན་ནྡ…པེ… ཨ་ས་མྤ་ཛཱ་ནོ ཝཱ ཏཾ, ཨཱ་ན་ནྡ, ཝ་ཙཱི་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ.
‘‘སཱ་མཾ ཝཱ ཏཾ, ཨཱ་ན་ནྡ, མ་ནོ་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. པ་རེ ཝཱ ཏཾ, ཨཱ་ན་ནྡ, མ་ནོ་ས་ངྑཱ་རཾ ཨ་བྷི་ས་ངྑ་རོ་ནྟི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ས་མྤ་ཛཱ་ནོ ཝཱ ཏཾ, ཨཱ་ན་ནྡ…པེ… ཨ་ས་མྤ་ཛཱ་ནོ ཝཱ ཏཾ, ཨཱ་ན་ནྡ, མ་ནོ་ས་ངྑཱ་རཾ ཨ་བྷི་ས་ངྑ་རོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ.
‘‘ཨི་མེ་སུ, ཨཱ་ན་ནྡ, དྷ་མྨེ་སུ ཨ་ཝི་ཛྫཱ ཨ་ནུ་པ་ཏི་ཏཱ. ཨ་ཝི་ཛྫཱ་ཡ ཏྭེ་ཝ, ཨཱ་ན་ནྡ, ཨ་སེ་ས་ཝི་རཱ་ག་ནི་རོ་དྷཱ སོ ཀཱ་ཡོ ན ཧོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. སཱ ཝཱ་ཙཱ ན ཧོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. སོ མ་ནོ ན ཧོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑཾ. ཁེ་ཏྟཾ ཏཾ ན ཧོ་ཏི…པེ… ཝ་ཏྠུ ཏཾ ན ཧོ་ཏི…པེ… ཨཱ་ཡ་ཏ་ནཾ ཏཾ ན ཧོ་ཏི…པེ… ཨ་དྷི་ཀ་ར་ཎཾ ཏཾ ན ཧོ་ཏི ཡཾ་པ་ཙྩ་ཡཱ་སྶ ཏཾ ཨུ་པྤ་ཛྫ་ཏི ཨ་ཛ྄ཛྷ་ཏྟཾ སུ་ཁ་དུ་ཀྑ’’ནྟི. པ་ཉྩ་མཾ.
༦. ཨུ་པ་ཝཱ་ཎ་སུ་ཏྟཾ
༢༦. སཱ་ཝ་ཏྠི་ཡཾ ཝི་ཧ་ར་ཏི. ཨ་ཐ ཁོ ཨཱ་ཡ་སྨཱ ཨུ་པ་ཝཱ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་པ་ཝཱ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ –
‘‘ས་ནྟི, བྷ་ནྟེ, ཨེ་ཀེ ས་མ་ཎ་བྲཱ་ཧྨ་ཎཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟི པ་ན, བྷ་ནྟེ, ཨེ་ཀེ ས་མ་ཎ་བྲཱ་ཧྨ་ཎཱ པ་རཾ་ཀ་ཏཾ དུ་ཀྑཾ པ་ཉྙ་པེ་ནྟི. ས་ནྟི པ་ན, བྷ་ནྟེ, ཨེ་ཀེ ས་མ་ཎ་བྲཱ་ཧྨ་ཎཱ ས་ཡཾ་ཀ་ཏ་ཉྩ པ་རཾ་ཀ་ཏ་ཉྩ དུ་ཀྑཾ པ་ཉྙ་པེ་ནྟི. ས་ནྟི པ་ན, བྷ་ནྟེ, ཨེ་ཀེ ས་མ་ཎ་བྲཱ་ཧྨ་ཎཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི. ཨི་དྷ ནོ, བྷ་ནྟེ, བྷ་ག་ཝཱ ཀིཾ་ཝཱ་དཱི ཀི་མ་ཀྑཱ་ཡཱི ཀ་ཐཾ བྱཱ་ཀ་ར་མཱ་ནཱ ཙ མ་ཡཾ ཝུ་ཏྟ་ཝཱ་དི་ནོ ཙེ་ཝ བྷ་ག་ཝ་ཏོ ཨ་སྶཱ་མ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻཱ་མ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻཱ་མ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻཱ’’ཏི?
‘‘པ་ཊི་ཙྩ་ས་མུ་པྤ་ནྣཾ ཁོ, ཨུ་པ་ཝཱ་ཎ, དུ་ཀྑཾ ཝུ་ཏྟཾ མ་ཡཱ. ཀིཾ པ་ཊི་ཙྩ? ཕ་སྶཾ པ་ཊི་ཙྩ. ཨི་ཏི ཝ་དཾ ཝུ་ཏྟ་ཝཱ་དཱི ཙེ་ཝ མེ ཨ་སྶ, ན ཙ མཾ ཨ་བྷཱུ་ཏེ་ན ཨ་བྦྷཱ་ཙི་ཀྑེ་ཡྻ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རེ་ཡྻ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ གཱ་ར་ཡ྄ཧཾ ཋཱ་ནཾ ཨཱ་ག་ཙྪེ་ཡྻ.
‘‘ཏ་ཏྲ, ཨུ་པ་ཝཱ་ཎ, ཡེ ཏེ ས་མ་ཎ་བྲཱ་ཧྨ་ཎཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏ་ད་པི ཕ་སྶ་པ་ཙྩ་ཡཱ. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི ཏ་ད་པི ཕ་སྶ་པ་ཙྩ་ཡཱ.
‘‘ཏ་ཏྲ, ཨུ་པ་ཝཱ་ཎ, ཡེ ཏེ ས་མ་ཎ་བྲཱ་ཧྨ་ཎཱ ས་ཡཾ་ཀ་ཏཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཡེ་པི ཏེ…པེ… ཡེ་པི ཏེ…པེ… ཡེ་པི ཏེ ས་མ་ཎ་བྲཱ་ཧྨ་ཎཱ ཨ་ས་ཡཾ་ཀཱ་རཾ ཨ་པ་རཾ་ཀཱ་རཾ ཨ་དྷི་ཙྩ་ས་མུ་པྤ་ནྣཾ དུ་ཀྑཾ པ་ཉྙ་པེ་ནྟི, ཏེ ཝ་ཏ ཨ་ཉྙ་ཏྲ ཕ་སྶཱ པ་ཊི་སཾ་ཝེ་དི་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏཱི’’ཏི. ཚ་ཊྛཾ.
༧. པ་ཙྩ་ཡ་སུ་ཏྟཾ
༢༧. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཨ་ཝི་ཛྫཱ་པ་ཙྩ་ཡཱ, བྷི་ཀྑ་ཝེ, ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི.
‘‘ཀ་ཏ་མ་ཉྩ, བྷི་ཀྑ་ཝེ, ཛ་རཱ་མ་ར་ཎཾ? ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷི ཏ་མྷི ས་ཏྟ་ནི་ཀཱ་ཡེ ཛ་རཱ ཛཱི་ར་ཎ་ཏཱ ཁ་ཎྜི་ཙྩཾ པཱ་ལི་ཙྩཾ ཝ་ལི་ཏྟ་ཙ་ཏཱ ཨཱ་ཡུ་ནོ སཾ་ཧཱ་ནི ཨི་ནྡྲི་ཡཱ་ནཾ པ་རི་པཱ་ཀོ – ཨ་ཡཾ ཝུ་ཙྩ་ཏི ཛ་རཱ. ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷཱ ཏ་མྷཱ ས་ཏྟ་ནི་ཀཱ་ཡཱ ཙུ་ཏི ཙ་ཝ་ན་ཏཱ བྷེ་དོ ཨ་ནྟ་ར་དྷཱ་ནཾ མ་ཙྩུ མ་ར་ཎཾ ཀཱ་ལ་ཀི་རི་ཡཱ ཁ་ནྡྷཱ་ནཾ བྷེ་དོ ཀ་ལེ༹་ཝ་ར་སྶ ནི་ཀྑེ་པོ; ཨི་དཾ ཝུ་ཙྩ་ཏི མ་ར་ཎཾ. ཨི་ཏི ཨ་ཡ་ཉྩ ཛ་རཱ ཨི་ད་ཉྩ མ་ར་ཎཾ. ཨི་དཾ ཝུ་ཙྩ་ཏི, བྷི་ཀྑ་ཝེ, ཛ་རཱ་མ་ར་ཎཾ. ཛཱ་ཏི་ས་མུ་ད་ཡཱ ཛ་རཱ་མ་ར་ཎ་ས་མུ་ད་ཡོ; ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཛ་རཱ་མ་ར་ཎ་ནི་རོ་དྷ་གཱ་མི་ནཱི པ་ཊི་པ་དཱ. སེ་ཡྻ་ཐི་དཾ – ས་མྨཱ་དི་ཊྛི, ས་མྨཱ་ས་ངྐ་པྤོ, ས་མྨཱ་ཝཱ་ཙཱ, ས་མྨཱ་ཀ་མྨ་ནྟོ, ས་མྨཱ་ཨཱ་ཛཱི་ཝོ, ས་མྨཱ་ཝཱ་ཡཱ་མོ, ས་མྨཱ་ས་ཏི, ས་མྨཱ་ས་མཱ་དྷི.
‘‘ཀ་ཏ་མཱ ཙ, བྷི་ཀྑ་ཝེ, ཛཱ་ཏི…པེ… ཀ་ཏ་མོ ཙ, བྷི་ཀྑ་ཝེ, བྷ་ཝོ… ཀ་ཏ་མ་ཉྩ, བྷི་ཀྑ་ཝེ, ཨུ་པཱ་དཱ་ནཾ… ཀ་ཏ་མཱ ཙ, བྷི་ཀྑ་ཝེ, ཏ་ཎྷཱ… ཀ་ཏ་མཱ ཙ, བྷི་ཀྑ་ཝེ, ཝེ་ད་ནཱ… ཀ་ཏ་མོ ཙ, བྷི་ཀྑ་ཝེ, ཕ་སྶོ… ཀ་ཏ་མ་ཉྩ, བྷི་ཀྑ་ཝེ, ས་ལཱ༹་ཡ་ཏ་ནཾ… ཀ་ཏ་མ་ཉྩ, བྷི་ཀྑ་ཝེ, ནཱ་མ་རཱུ་པཾ… ཀ་ཏ་མ་ཉྩ, བྷི་ཀྑ་ཝེ, ཝི་ཉྙཱ་ཎཾ…?
‘‘ཀ་ཏ་མེ ཙ, བྷི་ཀྑ་ཝེ, ས་ངྑཱ་རཱ? ཏ་ཡོ་མེ, བྷི་ཀྑ་ཝེ, ས་ངྑཱ་རཱ – ཀཱ་ཡ་ས་ངྑཱ་རོ, ཝ་ཙཱི་ས་ངྑཱ་རོ, ཙི་ཏྟ་ས་ངྑཱ་རོ. ཨི་མེ ཝུ་ཙྩ་ནྟི, བྷི་ཀྑ་ཝེ, ས་ངྑཱ་རཱ. ཨ་ཝི་ཛྫཱ་ས་མུ་ད་ཡཱ ས་ངྑཱ་ར་ས་མུ་ད་ཡོ; ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ས་ངྑཱ་ར་ནི་རོ་དྷ་གཱ་མི་ནཱི པ་ཊི་པ་དཱ. སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི.
‘‘ཡ་ཏོ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨེ་ཝཾ པ་ཙྩ་ཡཾ པ་ཛཱ་ནཱ་ཏི, ཨེ་ཝཾ པ་ཙྩ་ཡ་ས་མུ་ད་ཡཾ པ་ཛཱ་ནཱ་ཏི, ཨེ་ཝཾ པ་ཙྩ་ཡ་ནི་རོ་དྷཾ པ་ཛཱ་ནཱ་ཏི, ཨེ་ཝཾ པ་ཙྩ་ཡ་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ནཱ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་རི་ཡ་སཱ་ཝ་ཀོ དི་ཊྛི་ས་མྤ་ནྣོ ཨི་ཏི་པི, ད་སྶ་ན་ས་མྤ་ནྣོ ཨི་ཏི་པི, ཨཱ་ག་ཏོ ཨི་མཾ ས་དྡྷ་མྨཾ ཨི་ཏི་པི, པ་སྶ་ཏི ཨི་མཾ ས་དྡྷ་མྨཾ ཨི་ཏི་པི, སེ་ཀྑེ་ན ཉཱ་ཎེ་ན ས་མ་ནྣཱ་ག་ཏོ ཨི་ཏི་པི, སེ་ཀྑཱ་ཡ ཝི་ཛྫཱ་ཡ ས་མ་ནྣཱ་ག་ཏོ ཨི་ཏི་པི, དྷ་མྨ་སོ་ཏཾ ས་མཱ་པ་ནྣོ ཨི་ཏི་པི, ཨ་རི་ཡོ ནི་བྦེ་དྷི་ཀ་པ་ཉྙོ ཨི་ཏི་པི, ཨ་མ་ཏ་དྭཱ་རཾ ཨཱ་ཧ་ཙྩ ཏི་ཊྛ་ཏི ཨི་ཏི་པཱི’’ཏི. ས་ཏྟ་མཾ.
༨. བྷི་ཀྑུ་སུ་ཏྟཾ
༢༨. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཏ་ཏྲ ཁོ…པེ… ཨི་དྷ, བྷི་ཀྑ་ཝེ, བྷི་ཀྑུ ཛ་རཱ་མ་ར་ཎཾ པ་ཛཱ་ནཱ་ཏི, ཛ་རཱ་མ་ར་ཎ་ས་མུ་ད་ཡཾ པ་ཛཱ་ནཱ་ཏི, ཛ་རཱ་མ་ར་ཎ་ནི་རོ་དྷཾ པ་ཛཱ་ནཱ་ཏི, ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ནཱ་ཏི, ཛཱ་ཏིཾ པ་ཛཱ་ནཱ་ཏི…པེ… བྷ་ཝཾ པ་ཛཱ་ནཱ་ཏི… ཨུ་པཱ་དཱ་ནཾ པ་ཛཱ་ནཱ་ཏི… ཏ་ཎྷཾ པ་ཛཱ་ནཱ་ཏི… ཝེ་ད་ནཾ པ་ཛཱ་ནཱ་ཏི… ཕ་སྶཾ པ་ཛཱ་ནཱ་ཏི… ས་ལཱ༹་ཡ་ཏ་ནཾ པ་ཛཱ་ནཱ་ཏི… ནཱ་མ་རཱུ་པཾ པ་ཛཱ་ནཱ་ཏི… ཝི་ཉྙཱ་ཎཾ པ་ཛཱ་ནཱ་ཏི… ས་ངྑཱ་རེ པ་ཛཱ་ནཱ་ཏི, ས་ངྑཱ་ར་ས་མུ་ད་ཡཾ པ་ཛཱ་ནཱ་ཏི, ས་ངྑཱ་ར་ནི་རོ་དྷཾ པ་ཛཱ་ནཱ་ཏི, ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ནཱ་ཏི.
‘‘ཀ་ཏ་མ་ཉྩ, བྷི་ཀྑ་ཝེ, ཛ་རཱ་མ་ར་ཎཾ? ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷི ཏ་མྷི ས་ཏྟ་ནི་ཀཱ་ཡེ ཛ་རཱ ཛཱི་ར་ཎ་ཏཱ ཁ་ཎྜི་ཙྩཾ པཱ་ལི་ཙྩཾ ཝ་ལི་ཏྟ་ཙ་ཏཱ ཨཱ་ཡུ་ནོ སཾ་ཧཱ་ནི ཨི་ནྡྲི་ཡཱ་ནཾ པ་རི་པཱ་ཀོ – ཨ་ཡཾ ཝུ་ཙྩ་ཏི ཛ་རཱ. ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷཱ ཏ་མྷཱ ས་ཏྟ་ནི་ཀཱ་ཡཱ ཙུ་ཏི ཙ་ཝ་ན་ཏཱ བྷེ་དོ ཨ་ནྟ་ར་དྷཱ་ནཾ མ་ཙྩུ མ་ར་ཎཾ ཀཱ་ལ་ཀི་རི་ཡཱ ཁ་ནྡྷཱ་ནཾ བྷེ་དོ ཀ་ལེ༹་ཝ་ར་སྶ ནི་ཀྑེ་པོ; ཨི་དཾ ཝུ་ཙྩ་ཏི མ་ར་ཎཾ. ཨི་ཏི ཨ་ཡཾ ཙ ཛ་རཱ ཨི་ད་ཉྩ མ་ར་ཎཾ. ཨི་དཾ ཝུ་ཙྩ་ཏི, བྷི་ཀྑ་ཝེ, ཛ་རཱ་མ་ར་ཎཾ. ཛཱ་ཏི་ས་མུ་ད་ཡཱ ཛ་རཱ་མ་ར་ཎ་ས་མུ་ད་ཡོ; ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཛ་རཱ་མ་ར་ཎ་ནི་རོ་དྷ་གཱ་མི་ནཱི པ་ཊི་པ་དཱ. སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི.
‘‘ཀ་ཏ་མཱ ཙ, བྷི་ཀྑ་ཝེ, ཛཱ་ཏི…པེ… ཀ་ཏ་མོ ཙ, བྷི་ཀྑ་ཝེ, བྷ་ཝོ… ཀ་ཏ་མ་ཉྩ, བྷི་ཀྑ་ཝེ, ཨུ་པཱ་དཱ་ནཾ… ཝེ་ད་ནཱ… ཕ་སྶོ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ….
‘‘ཀ་ཏ་མེ ཙ, བྷི་ཀྑ་ཝེ, ས་ངྑཱ་རཱ? ཏ་ཡོ་མེ, བྷི་ཀྑ་ཝེ, ས་ངྑཱ་རཱ – ཀཱ་ཡ་ས་ངྑཱ་རོ, ཝ་ཙཱི་ས་ངྑཱ་རོ, ཙི་ཏྟ་ས་ངྑཱ་རོ. ཨི་མེ ཝུ་ཙྩ་ནྟི, བྷི་ཀྑ་ཝེ, ས་ངྑཱ་རཱ. ཨ་ཝི་ཛྫཱ་ས་མུ་ད་ཡཱ ས་ངྑཱ་ར་ས་མུ་ད་ཡོ; ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ས་ངྑཱ་ར་ནི་རོ་དྷ་གཱ་མི་ནཱི པ་ཊི་པ་དཱ. སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི.
‘‘ཡ་ཏོ ཁོ, བྷི་ཀྑ་ཝེ, བྷི་ཀྑུ ཨེ་ཝཾ ཛ་རཱ་མ་ར་ཎཾ པ་ཛཱ་ནཱ་ཏི, ཨེ་ཝཾ ཛ་རཱ་མ་ར་ཎ་ས་མུ་ད་ཡཾ པ་ཛཱ་ནཱ་ཏི, ཨེ་ཝཾ ཛ་རཱ་མ་ར་ཎ་ནི་རོ་དྷཾ པ་ཛཱ་ནཱ་ཏི, ཨེ་ཝཾ ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ནཱ་ཏི, ཨེ་ཝཾ ཛཱ་ཏིཾ པ་ཛཱ་ནཱ་ཏི…པེ… བྷ་ཝཾ… ཨུ་པཱ་དཱ་ནཾ… ཏ་ཎྷཾ… ཝེ་ད་ནཾ… ཕ་སྶཾ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ … ས་ངྑཱ་རེ… ས་ངྑཱ་ར་ས་མུ་ད་ཡཾ… ས་ངྑཱ་ར་ནི་རོ་དྷཾ… ཨེ་ཝཾ ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ནཱ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ དི་ཊྛི་ས་མྤ་ནྣོ ཨི་ཏི་པི, ད་སྶ་ན་ས་མྤ་ནྣོ ཨི་ཏི་པི, ཨཱ་ག་ཏོ ཨི་མཾ ས་དྡྷ་མྨཾ ཨི་ཏི་པི, པ་སྶ་ཏི ཨི་མཾ ས་དྡྷ་མྨཾ ཨི་ཏི་པི, སེ་ཀྑེ་ན ཉཱ་ཎེ་ན ས་མ་ནྣཱ་ག་ཏོ ཨི་ཏི་པི, སེ་ཀྑཱ་ཡ ཝི་ཛྫཱ་ཡ ས་མ་ནྣཱ་ག་ཏོ ཨི་ཏི་པི, དྷ་མྨ་སོ་ཏཾ ས་མཱ་པ་ནྣོ ཨི་ཏི་པི, ཨ་རི་ཡོ ནི་བྦེ་དྷི་ཀ་པ་ཉྙོ ཨི་ཏི་པི, ཨ་མ་ཏ་དྭཱ་རཾ ཨཱ་ཧ་ཙྩ ཏི་ཊྛ་ཏི ཨི་ཏི་པཱི’’ཏི. ཨ་ཊྛ་མཾ.
༩. ས་མ་ཎ་བྲཱ་ཧྨ་ཎ་སུ་ཏྟཾ
༢༩. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཏ་ཏྲ ཁོ…པེ… ཡེ ཧི ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ཛ་རཱ་མ་ར་ཎཾ ན པ་རི་ཛཱ་ན་ནྟི, ཛ་རཱ་མ་ར་ཎ་ས་མུ་ད་ཡཾ ན པ་རི་ཛཱ་ན་ནྟི, ཛ་རཱ་མ་ར་ཎ་ནི་རོ་དྷཾ ན པ་རི་ཛཱ་ན་ནྟི, ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ ན པ་རི་ཛཱ་ན་ནྟི, ཛཱ་ཏིཾ ན པ་རི་ཛཱ་ན་ནྟི…པེ… བྷ་ཝཾ… ཨུ་པཱ་དཱ་ནཾ… ཏ་ཎྷཾ… ཝེ་ད་ནཾ… ཕ་སྶཾ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རེ… ས་ངྑཱ་ར་ས་མུ་ད་ཡཾ… ས་ངྑཱ་ར་ནི་རོ་དྷཾ… ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ ན པ་རི་ཛཱ་ན་ནྟི. ན མེ་ཏེ, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ས་མ་ཎེ་སུ ཝཱ ས་མ་ཎ་ས་མྨ་ཏཱ བྲཱ་ཧྨ་ཎེ་སུ ཝཱ བྲཱ་ཧྨ་ཎ་ས་མྨ་ཏཱ. ན ཙ པ་ནེ་ཏེ ཨཱ་ཡ་སྨ་ནྟོ སཱ་མ་ཉྙ་ཏྠཾ ཝཱ བྲ་ཧྨ་ཉྙ་ཏྠཾ ཝཱ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟི’’.
‘‘ཡེ ཙ ཁོ ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ཛ་རཱ་མ་ར་ཎཾ པ་རི་ཛཱ་ན་ནྟི, ཛ་རཱ་མ་ར་ཎ་ས་མུ་ད་ཡཾ པ་རི་ཛཱ་ན་ནྟི, ཛ་རཱ་མ་ར་ཎ་ནི་རོ་དྷཾ པ་རི་ཛཱ་ན་ནྟི, ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ པ་རི་ཛཱ་ན་ནྟི, ཛཱ་ཏིཾ པ་རི་ཛཱ་ན་ནྟི…པེ… བྷ་ཝཾ… ཨུ་པཱ་དཱ་ནཾ… ཏ་ཎྷཾ… ཝེ་ད་ནཾ… ཕ་སྶཾ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རེ པ་རི་ཛཱ་ན་ནྟི, ས་ངྑཱ་ར་ས་མུ་ད་ཡཾ པ་རི་ཛཱ་ན་ནྟི, ས་ངྑཱ་ར་ནི་རོ་དྷཾ པ་རི་ཛཱ་ན་ནྟི, ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ པ་རི་ཛཱ་ན་ནྟི. ཏེ ཁོ མེ, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ས་མ་ཎེ་སུ ཙེ་ཝ ས་མ་ཎ་ས་མྨ་ཏཱ བྲཱ་ཧྨ་ཎེ་སུ ཙ བྲཱ་ཧྨ་ཎ་ས་མྨ་ཏཱ. ཏེ ཙ པ་ནཱ་ཡ་སྨ་ནྟོ སཱ་མ་ཉྙ་ཏྠ་ཉྩ བྲ་ཧྨ་ཉྙ་ཏྠ་ཉྩ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟཱི’’ཏི. ན་ཝ་མཾ.
༡༠. དུ་ཏི་ཡ་ས་མ་ཎ་བྲཱ་ཧྨ་ཎ་སུ་ཏྟཾ
༣༠. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཏ་ཏྲ ཁོ…པེ… ཡེ ཧི ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ཛ་རཱ་མ་ར་ཎཾ ན་པྤ་ཛཱ་ན་ནྟི, ཛ་རཱ་མ་ར་ཎ་ས་མུ་ད་ཡཾ ན་པྤ་ཛཱ་ན་ནྟི, ཛ་རཱ་མ་ར་ཎ་ནི་རོ་དྷཾ ན་པྤ་ཛཱ་ན་ནྟི, ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ ན་པྤ་ཛཱ་ན་ནྟི ཏེ ཝ་ཏ ཛ་རཱ་མ་ར་ཎཾ ས་མ་ཏི་ཀྐ་མྨ ཋ་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཛཱ་ཏིཾ ན་པྤ་ཛཱ་ན་ནྟི…པེ… བྷ་ཝཾ… ཨུ་པཱ་དཱ་ནཾ… ཏ་ཎྷཾ… ཝེ་ད་ནཾ… ཕ་སྶཾ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རེ ན་པྤ་ཛཱ་ན་ནྟི, ས་ངྑཱ་ར་ས་མུ་ད་ཡཾ ན་པྤ་ཛཱ་ན་ནྟི, ས་ངྑཱ་ར་ནི་རོ་དྷཾ ན་པྤ་ཛཱ་ན་ནྟི, ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ ན་པྤ་ཛཱ་ན་ནྟི ཏེ ཝ་ཏ ས་ངྑཱ་རེ ས་མ་ཏི་ཀྐ་མྨ ཋ་སྶ་ནྟཱི་ཏི ནེ་ཏཾ ཋཱ་ནཾ ཝི་ཛྫ་ཏི’’.
‘‘ཡེ ཙ ཁོ ཀེ་ཙི, བྷི་ཀྑ་ཝེ, ས་མ་ཎཱ ཝཱ བྲཱ་ཧྨ་ཎཱ ཝཱ ཛ་རཱ་མ་ར་ཎཾ པ་ཛཱ་ན་ནྟི, ཛ་རཱ་མ་ར་ཎ་ས་མུ་ད་ཡཾ པ་ཛཱ་ན་ནྟི, ཛ་རཱ་མ་ར་ཎ་ནི་རོ་དྷཾ པ་ཛཱ་ན་ནྟི, ཛ་རཱ་མ་ར་ཎ་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ན་ནྟི ཏེ ཝ་ཏ ཛ་རཱ་མ་ར་ཎཾ ས་མ་ཏི་ཀྐ་མྨ ཋ་སྶ་ནྟཱི་ཏི ཋཱ་ན་མེ་ཏཾ ཝི་ཛྫ་ཏི. ཛཱ་ཏིཾ པ་ཛཱ་ན་ནྟི…པེ… བྷ་ཝཾ… ཨུ་པཱ་དཱ་ནཾ… ཏ་ཎྷཾ… ཝེ་ད་ནཾ… ཕ་སྶཾ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རེ པ་ཛཱ་ན་ནྟི, ས་ངྑཱ་ར་ས་མུ་ད་ཡཾ པ་ཛཱ་ན་ནྟི, ས་ངྑཱ་ར་ནི་རོ་དྷཾ པ་ཛཱ་ན་ནྟི, ས་ངྑཱ་ར་ནི་རོ་དྷ་གཱ་མི་ནིཾ པ་ཊི་པ་དཾ པ་ཛཱ་ན་ནྟི. ཏེ ཝ་ཏ ས་ངྑཱ་རེ ས་མ་ཏི་ཀྐ་མྨ ཋ་སྶ་ནྟཱི་ཏི ཋཱ་ན་མེ་ཏཾ ཝི་ཛྫ་ཏཱི’’ཏི. ད་ས་མཾ.
ད་ས་བ་ལ་ཝ་གྒོ ཏ་ཏི་ཡོ.
ཏ་སྶུ་དྡཱ་ནཾ –
དྭེ ད་ས་བ་ལཱ ཨུ་པ་ནི་སཱ ཙ, ཨ་ཉྙ་ཏི་ཏྠི་ཡ་བྷཱུ་མི་ཛོ;
ཨུ་པ་ཝཱ་ཎོ པ་ཙྩ་ཡོ བྷི་ཀྑུ, དྭེ ཙ ས་མ་ཎ་བྲཱ་ཧྨ་ཎཱ་ཏི.