༡༠. གོ་ཏ་མ་སུ་ཏྟཾ

༡༠. ‘‘པུ་བྦེ་ཝ མེ, བྷི་ཀྑ་ཝེ, ས་མྦོ་དྷཱ ཨ་ན་བྷི་ས་མྦུ་དྡྷ་སྶ བོ་དྷི་ས་ཏྟ་སྶེ་ཝ ས་ཏོ ཨེ་ཏ་ད་ཧོ་སི – ‘ཀི་ཙྪཾ ཝ་ཏཱ་ཡཾ ལོ་ཀོ ཨཱ་པ་ནྣོ ཛཱ་ཡ་ཏི ཙ ཛཱི་ཡ་ཏི ཙ མཱི་ཡ་ཏི ཙ ཙ་ཝ་ཏི ཙ ཨུ་པ་པ་ཛྫ་ཏི ཙ. ཨ་ཐ ཙ པ་ནི་མ་སྶ དུ་ཀྑ་སྶ ནི་སྶ་ར་ཎཾ ན་པྤ་ཛཱ་ནཱ་ཏི ཛ་རཱ་མ་ར་ཎ་སྶ. ཀུ་དཱ་སྶུ ནཱ་མ ཨི་མ་སྶ དུ་ཀྑ་སྶ ནི་སྶ་ར་ཎཾ པ་ཉྙཱ་ཡི་སྶ་ཏི ཛ་རཱ་མ་ར་ཎ་སྶཱ’’’ཏི?

‘‘ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཀི་མྷི ནུ ཁོ ས་ཏི ཛ་རཱ་མ་ར་ཎཾ ཧོ་ཏི, ཀིཾ་པ་ཙྩ་ཡཱ ཛ་རཱ་མ་ར་ཎ’ནྟི? ཏ་སྶ མ་ཡ྄ཧཾ, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཨ་ཧུ པ་ཉྙཱ་ཡ ཨ་བྷི་ས་མ་ཡོ – ‘ཛཱ་ཏི་ཡཱ ཁོ ས་ཏི ཛ་རཱ་མ་ར་ཎཾ ཧོ་ཏི, ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’’ནྟི.

‘‘ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཀི་མྷི ནུ ཁོ ས་ཏི ཛཱ་ཏི ཧོ་ཏི…པེ… བྷ་ཝོ… ཨུ་པཱ་དཱ་ནཾ… ཏ་ཎྷཱ… ཝེ་ད་ནཱ… ཕ་སྶོ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རཱ ཧོ་ནྟི, ཀིཾ་པ་ཙྩ་ཡཱ ས་ངྑཱ་རཱ’ཏི? ཏ་སྶ མ་ཡ྄ཧཾ, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཨ་ཧུ པ་ཉྙཱ་ཡ ཨ་བྷི་ས་མ་ཡོ – ‘ཨ་ཝི་ཛྫཱ་ཡ ཁོ ས་ཏི ས་ངྑཱ་རཱ ཧོ་ནྟི, ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’’ཏི.

‘‘ཨི་ཏི ཧི་དཾ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ; ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི. ‘ས་མུ་ད་ཡོ, ས་མུ་ད་ཡོ’ཏི ཁོ མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི.

‘‘ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཀི་མྷི ནུ ཁོ ཨ་ས་ཏི ཛ་རཱ་མ་ར་ཎཾ ན ཧོ་ཏི, ཀི་སྶ ནི་རོ་དྷཱ ཛ་རཱ་མ་ར་ཎ་ནི་རོ་དྷོ’ཏི? ཏ་སྶ མ་ཡ྄ཧཾ, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཨ་ཧུ པ་ཉྙཱ་ཡ ཨ་བྷི་ས་མ་ཡོ – ‘ཛཱ་ཏི་ཡཱ ཁོ ཨ་ས་ཏི ཛ་རཱ་མ་ར་ཎཾ ན ཧོ་ཏི, ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’’ཏི.

‘‘ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཀི་མྷི ནུ ཁོ ཨ་ས་ཏི ཛཱ་ཏི ན ཧོ་ཏི…པེ… བྷ་ཝོ… ཨུ་པཱ་དཱ་ནཾ… ཏ་ཎྷཱ… ཝེ་ད་ནཱ… ཕ་སྶོ… ས་ལཱ༹་ཡ་ཏ་ནཾ… ནཱ་མ་རཱུ་པཾ… ཝི་ཉྙཱ་ཎཾ… ས་ངྑཱ་རཱ ན ཧོ་ནྟི, ཀི་སྶ ནི་རོ་དྷཱ ས་ངྑཱ་ར་ནི་རོ་དྷོ’ཏི? ཏ་སྶ མ་ཡ྄ཧཾ, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཨ་ཧུ པ་ཉྙཱ་ཡ ཨ་བྷི་ས་མ་ཡོ – ‘ཨ་ཝི་ཛྫཱ་ཡ ཁོ ཨ་ས་ཏི ས་ངྑཱ་རཱ ན ཧོ་ནྟི, ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’’ཏི.

‘‘ཨི་ཏི ཧི་དཾ ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ; ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི. ‘ནི་རོ་དྷོ, ནི་རོ་དྷོ’ཏི ཁོ མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དཱི’’ཏི. ད་ས་མོ.

བུ་དྡྷ་ཝ་གྒོ པ་ཋ་མོ.

ཏ་སྶུ་དྡཱ་ནཾ –

དེ་ས་ནཱ ཝི་བྷ་ངྒ་པ་ཊི་པ་དཱ ཙ,

ཝི་པ་སྶཱི སི་ཁཱི ཙ ཝེ་སྶ་བྷཱུ;

ཀ་ཀུ་ས་ནྡྷོ ཀོ་ཎཱ་ག་མ་ནོ ཀ་སྶ་པོ,

མ་ཧཱ་ས་ཀྱ་མུ་ནི ཙ གོ་ཏ་མོ་ཏི.