༩. ཝ་ཛྫི་པུ་ཏྟ་སུ་ཏྟཾ

༢༢༩. ཨེ་ཀཾ ས་མ་ཡཾ ཨ་ཉྙ་ཏ་རོ ཝ་ཛྫི་པུ་ཏྟ་ཀོ བྷི་ཀྑུ ཝེ་སཱ་ལི་ཡཾ ཝི་ཧ་ར་ཏི ཨ་ཉྙ་ཏ་ར་སྨིཾ ཝ་ན་ས་ཎྜེ. ཏེ་ན ཁོ པ་ན ས་མ་ཡེ་ན ཝེ་སཱ་ལི་ཡཾ ཝ་ཛྫི་པུ་ཏྟ་ཀོ ས་བྦ་ར་ཏྟི་ཙཱ་རོ ཧོ་ཏི. ཨ་ཐ ཁོ སོ བྷི་ཀྑུ ཝེ་སཱ་ལི་ཡཱ ཏཱུ་རི་ཡ-ཏཱ་ལི༹་ཏ-ཝཱ་དི་ཏ-ནི་གྒྷོ་ས་ས་དྡཾ སུ་ཏྭཱ པ་རི་དེ་ཝ་མཱ་ནོ ཏཱ་ཡཾ ཝེ་ལཱ་ཡཾ ཨི་མཾ གཱ་ཐཾ ཨ་བྷཱ་སི –

‘‘ཨེ་ཀ་ཀཱ མ་ཡཾ ཨ་ར་ཉྙེ ཝི་ཧ་རཱ་མ,

ཨ་པ་ཝི་དྡྷཾ་ཝ [ཨ་པ་ཝི་ཊྛཾ་ཝ (སྱཱ. ཀཾ.)] ཝ་ན་སྨིཾ དཱ་རུ་ཀཾ;

ཨེ་ཏཱ་དི་སི་ཀཱ་ཡ ར་ཏྟི་ཡཱ,

ཀོ སུ ནཱ་མ་མྷེ་ཧི [ནཱ་མ ཨ་མྷེ་ཧི (སཱི. པཱི.)] པཱ་པི་ཡོ’’ཏི.

ཨ་ཐ ཁོ ཡཱ ཏ་སྨིཾ ཝ་ན་ས་ཎྜེ ཨ་དྷི་ཝ་ཏྠཱ དེ་ཝ་ཏཱ ཏ་སྶ བྷི་ཀྑུ་ནོ ཨ་ནུ་ཀ་མྤི་ཀཱ ཨ་ཏྠ་ཀཱ་མཱ ཏཾ བྷི་ཀྑུཾ སཾ་ཝེ་ཛེ་ཏུ་ཀཱ་མཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ བྷི་ཀྑུཾ གཱ་ཐཱ་ཡ ཨ་ཛ྄ཛྷ་བྷཱ་སི –

‘‘ཨེ་ཀ་ཀོ་ཝ ཏྭཾ ཨ་ར་ཉྙེ ཝི་ཧ་ར་སི, ཨ་པ་ཝི་དྡྷཾ་ཝ ཝ་ན་སྨིཾ དཱ་རུ་ཀཾ;

ཏ་སྶ ཏེ བ་ཧུ་ཀཱ པི་ཧ་ཡ་ནྟི, ནེ་ར་ཡི་ཀཱ ཝི་ཡ ས་གྒ་གཱ་མི་ན’’ནྟི.

ཨ་ཐ ཁོ སོ བྷི་ཀྑུ ཏཱ་ཡ དེ་ཝ་ཏཱ་ཡ སཾ་ཝེ་ཛི་ཏོ སཾ་ཝེ་ག་མཱ་པཱ་དཱི་ཏི.