༨. ཀུ་ལ་གྷ་ར་ཎཱི་སུ་ཏྟཾ

༢༢༨. ཨེ་ཀཾ ས་མ་ཡཾ ཨ་ཉྙ་ཏ་རོ བྷི་ཀྑུ ཀོ་ས་ལེ་སུ ཝི་ཧ་ར་ཏི ཨ་ཉྙ་ཏ་ར་སྨིཾ ཝ་ན་ས་ཎྜེ. ཏེ་ན ཁོ པ་ན ས་མ་ཡེ་ན སོ བྷི་ཀྑུ ཨ་ཉྙ་ཏ་ར་སྨིཾ ཀུ་ལེ ཨ་ཏི་ཝེ་ལཾ ཨ་ཛ྄ཛྷོ་གཱ་ལ༹ྷ་པྤ་ཏྟོ ཝི་ཧ་ར་ཏི. ཨ་ཐ ཁོ ཡཱ ཏ་སྨིཾ ཝ་ན་ས་ཎྜེ ཨ་དྷི་ཝ་ཏྠཱ དེ་ཝ་ཏཱ ཏ་སྶ བྷི་ཀྑུ་ནོ ཨ་ནུ་ཀ་མྤི་ཀཱ ཨ་ཏྠ་ཀཱ་མཱ ཏཾ བྷི་ཀྑུཾ སཾ་ཝེ་ཛེ་ཏུ་ཀཱ་མཱ ཡཱ ཏ་སྨིཾ ཀུ་ལེ ཀུ་ལ་གྷ་ར་ཎཱི, ཏ་སྶཱ ཝ་ཎྞཾ ཨ་བྷི་ནི་མྨི་ནི་ཏྭཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ བྷི་ཀྑུཾ གཱ་ཐཱ་ཡ ཨ་ཛ྄ཛྷ་བྷཱ་སི –

‘‘ན་དཱི་ཏཱི་རེ་སུ ས་ཎྛཱ་ནེ, ས་བྷཱ་སུ ར་ཐི་ཡཱ་སུ ཙ;

ཛ་ནཱ ས་ངྒ་མྨ མ་ནྟེ་ནྟི, མ་ཉྩ ཏ་ཉྩ [ཏྭ་ཉྩ (ཀ.)] ཀི་མ་ནྟ་ར’’ནྟི.

‘‘བ་ཧཱུ་ཧི ས་དྡཱ པ་ཙྩཱུ་ཧཱ, ཁ་མི་ཏ་བྦཱ ཏ་པ་སྶི་ནཱ;

ན ཏེ་ན མ་ངྐུ ཧོ་ཏ་བྦཾ, ན ཧི ཏེ་ན ཀི་ལི་སྶ་ཏི.

‘‘ཡོ ཙ ས་དྡ་པ་རི་ཏྟཱ་སཱི, ཝ་ནེ ཝཱ་ཏ་མི་གོ ཡ་ཐཱ;

ལ་ཧུ་ཙི་ཏྟོ་ཏི ཏཾ ཨཱ་ཧུ, ནཱ་སྶ ས་མྤ་ཛྫ་ཏེ ཝ་ཏ’’ནྟི.