༡༤. ག་ནྡྷ་ཏྠེ་ན་སུ་ཏྟཾ

༢༣༤. ཨེ་ཀཾ ས་མ་ཡཾ ཨ་ཉྙ་ཏ་རོ བྷི་ཀྑུ ཀོ་ས་ལེ་སུ ཝི་ཧ་ར་ཏི ཨ་ཉྙ་ཏ་ར་སྨིཾ ཝ་ན་ས་ཎྜེ. ཏེ་ན ཁོ པ་ན ས་མ་ཡེ་ན སོ བྷི་ཀྑུ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ པོ་ཀྑ་ར་ཎིཾ ཨོ་གཱ་ཧེ་ཏྭཱ པ་དུ་མཾ ཨུ་པ་སི་ངྒྷ་ཏི. ཨ་ཐ ཁོ ཡཱ ཏ་སྨིཾ ཝ་ན་ས་ཎྜེ ཨ་དྷི་ཝ་ཏྠཱ དེ་ཝ་ཏཱ ཏ་སྶ བྷི་ཀྑུ་ནོ ཨ་ནུ་ཀ་མྤི་ཀཱ ཨ་ཏྠ་ཀཱ་མཱ ཏཾ བྷི་ཀྑུཾ སཾ་ཝེ་ཛེ་ཏུ་ཀཱ་མཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ བྷི་ཀྑུཾ གཱ་ཐཱ་ཡ ཨ་ཛ྄ཛྷ་བྷཱ་སི –

‘‘ཡ་མེ་ཏཾ ཝཱ་རི་ཛཾ པུ་པྥཾ, ཨ་དི་ནྣཾ ཨུ་པ་སི་ངྒྷ་སི;

ཨེ་ཀ་ངྒ་མེ་ཏཾ ཐེ་ཡྻཱ་ནཾ, ག་ནྡྷ་ཏྠེ་ནོ་སི མཱ་རི་སཱ’’ཏི.

‘‘ན ཧ་རཱ་མི ན བྷ་ཉྫཱ་མི, ཨཱ་རཱ སི་ངྒྷཱ་མི ཝཱ་རི་ཛཾ;

ཨ་ཐ ཀེ་ན ནུ ཝ་ཎྞེ་ན, ག་ནྡྷ་ཏྠེ་ནོ་ཏི ཝུ་ཙྩ་ཏི.

‘‘ཡྭཱ་ཡཾ བྷི་སཱ་ནི ཁ་ན་ཏི, པུ་ཎྜ་རཱི་ཀཱ་ནི བྷ་ཉྫ་ཏི;

ཨེ་ཝཾ ཨཱ་ཀི་ཎྞ་ཀ་མྨ་ནྟོ, ཀ་སྨཱ ཨེ་སོ ན ཝུ་ཙྩ་ཏཱི’’ཏི.

‘‘ཨཱ་ཀི་ཎྞ་ལུ་དྡོ པུ་རི་སོ, དྷཱ་ཏི་ཙེ་ལཾ་ཝ མ་ཀྑི་ཏོ;

ཏ་སྨིཾ མེ ཝ་ཙ་ནཾ ན་ཏྠི, ཏྭ་ཉྩཱ་ར་ཧཱ་མི ཝ་ཏྟ་ཝེ.

‘‘ཨ་ན་ངྒ་ཎ་སྶ པོ་ས་སྶ, ནི་ཙྩཾ སུ་ཙི་ག་ཝེ་སི་ནོ;

ཝཱ་ལ་གྒ་མ་ཏྟཾ པཱ་པ་སྶ, ཨ་བྦྷཱ་མ་ཏྟཾ་ཝ ཁཱ་ཡ་ཏཱི’’ཏི.

‘‘ཨ་དྡྷཱ མཾ ཡ་ཀྑ ཛཱ་ནཱ་སི, ཨ་ཐོ མེ ཨ་ནུ་ཀ་མྤ་སི;

པུ་ན་པི ཡ་ཀྑ ཝ་ཛྫཱ་སི, ཡ་དཱ པ་སྶ་སི ཨེ་དི་ས’’ནྟི.

‘‘ནེ་ཝ ཏཾ ཨུ་པ་ཛཱི་ཝཱ་མ, ན་པི ཏེ བྷ་ཏ་ཀཱ་མྷ་སེ;

ཏྭ་མེ་ཝ བྷི་ཀྑུ ཛཱ་ནེ་ཡྻ, ཡེ་ན ག་ཙྪེ་ཡྻ སུ་གྒ་ཏི’’ནྟི.

ཨ་ཐ ཁོ སོ བྷི་ཀྑུ ཏཱ་ཡ དེ་ཝ་ཏཱ་ཡ སཾ་ཝེ་ཛི་ཏོ སཾ་ཝེ་ག་མཱ་པཱ་དཱི་ཏི.

ཝ་ན་སཾ་ཡུ་ཏྟཾ ས་མ་ཏྟཾ.