༡༣. པཱ་ཀ་ཏི་ནྡྲི་ཡ་སུ་ཏྟཾ

༢༣༣. ཨེ་ཀཾ ས་མ་ཡཾ ས་མྦ་ཧུ་ལཱ བྷི་ཀྑཱུ ཀོ་ས་ལེ་སུ ཝི་ཧ་ར་ནྟི ཨ་ཉྙ་ཏ་ར་སྨིཾ ཝ་ན་ས་ཎྜེ ཨུ་དྡྷ་ཏཱ ཨུ་ནྣ་ལཱ༹ ཙ་པ་ལཱ མུ་ཁ་རཱ ཝི་ཀི་ཎྞ་ཝཱ་ཙཱ མུ་ཊྛ་སྶ་ཏི་ནོ ཨ་ས་མྤ་ཛཱ་ནཱ ཨ་ས་མཱ་ཧི་ཏཱ ཝི་བྦྷ་ནྟ་ཙི་ཏྟཱ པཱ་ཀ་ཏི་ནྡྲི་ཡཱ. ཨ་ཐ ཁོ ཡཱ ཏ་སྨིཾ ཝ་ན་ས་ཎྜེ ཨ་དྷི་ཝ་ཏྠཱ དེ་ཝ་ཏཱ ཏེ་སཾ བྷི་ཀྑཱུ་ནཾ ཨ་ནུ་ཀ་མྤི་ཀཱ ཨ་ཏྠ་ཀཱ་མཱ ཏེ བྷི་ཀྑཱུ སཾ་ཝེ་ཛེ་ཏུ་ཀཱ་མཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ བྷི་ཀྑཱུ གཱ་ཐཱ་ཧི ཨ་ཛ྄ཛྷ་བྷཱ་སི –

‘‘སུ་ཁ་ཛཱི་ཝི་ནོ པུ་རེ ཨཱ་སུཾ, བྷི་ཀྑཱུ གོ་ཏ་མ་སཱ་ཝ་ཀཱ;

ཨ་ནི་ཙྪཱ པི་ཎྜ་མེ་ས་ནཱ, ཨ་ནི་ཙྪཱ ས་ཡ་ནཱ་ས་ནཾ;

ལོ་ཀེ ཨ་ནི་ཙྩ་ཏཾ ཉ་ཏྭཱ, དུ་ཀྑ་སྶ་ནྟཾ ཨ་ཀཾ་སུ ཏེ.

‘‘དུ་པྤོ་སཾ ཀ་ཏྭཱ ཨ་ཏྟཱ་ནཾ, གཱ་མེ གཱ་མ་ཎི་ཀཱ ཝི་ཡ;

བྷུ་ཏྭཱ བྷུ་ཏྭཱ ནི་པ་ཛྫ་ནྟི, པ་རཱ་གཱ་རེ་སུ མུ་ཙྪི་ཏཱ.

‘‘ས་ངྒྷ་སྶ ཨ་ཉྫ་ལིཾ ཀ་ཏྭཱ, ཨི་དྷེ་ཀ་ཙྩེ ཝ་དཱ་མ་ཧཾ;

ཨ་པ་ཝི་དྡྷཱ [ཨ་པ་ཝི་ཊྛཱ (སྱཱ. ཀཾ.)] ཨ་ནཱ་ཐཱ ཏེ, ཡ་ཐཱ པེ་ཏཱ ཏ་ཐེ་ཝ ཏེ.

‘‘ཡེ ཁོ པ་མ་ཏྟཱ ཝི་ཧ་ར་ནྟི, ཏེ མེ ས་ནྡྷཱ་ཡ བྷཱ་སི་ཏཾ;

ཡེ ཨ་པྤ་མ་ཏྟཱ ཝི་ཧ་ར་ནྟི, ན་མོ ཏེ་སཾ ཀ་རོ་མ་ཧ’’ནྟི.

ཨ་ཐ ཁོ ཏེ བྷི་ཀྑཱུ ཏཱ་ཡ དེ་ཝ་ཏཱ་ཡ སཾ་ཝེ་ཛི་ཏཱ སཾ་ཝེ་ག་མཱ་པཱ་དུ་ནྟི.