༡༢. ཝ་ངྒཱི་ས་སུ་ཏྟཾ

༢༢༠. ཨེ་ཀཾ ས་མ་ཡཾ ཨཱ་ཡ་སྨཱ ཝ་ངྒཱི་སོ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཝ་ངྒཱི་སོ ཨ་ཙི་ར་ཨ་ར་ཧ་ཏྟ་པྤ་ཏྟོ ཧུ་ཏྭཱ [ཧོ་ཏི (སཱི. སྱཱ. ཀཾ.)] ཝི་མུ་ཏྟི་སུ་ཁཾ པ་ཊི་སཾ་ཝེ་དཱི [ཝི་མུ་ཏྟི་སུ་ཁ་པ་ཊི་སཾ་ཝེ་དཱི (སཱི. པཱི.)] ཏཱ་ཡཾ ཝེ་ལཱ་ཡཾ ཨི་མཱ གཱ་ཐཱ་ཡོ ཨ་བྷཱ་སི –

‘‘ཀཱ་ཝེ་ཡྻ་མ་ཏྟཱ ཝི་ཙ་རི་མྷ པུ་བྦེ, གཱ་མཱ གཱ་མཾ པུ་རཱ པུ་རཾ;

ཨ་ཐ་དྡ་སཱ་མ ས་མྦུ་དྡྷཾ, ས་དྡྷཱ ནོ ཨུ་པ་པ་ཛྫ་ཐ.

‘‘སོ མེ དྷ་མྨ་མ་དེ་སེ་སི, ཁ་ནྡྷཱ་ཡ་ཏ་ན་དྷཱ་ཏུ་ཡོ [ཁ་ནྡྷེ ཨཱ་ཡ་ཏ་ནཱ་ནི དྷཱ་ཏུ་ཡོ (སྱཱ. ཀཾ. པཱི. ཀ.)];

ཏ་སྶཱ་ཧཾ དྷ་མྨཾ སུ་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.

‘‘བ་ཧུ་ནྣཾ ཝ་ཏ ཨ་ཏྠཱ་ཡ, བོ་དྷིཾ ཨ་ཛ྄ཛྷ་ག་མཱ མུ་ནི;

བྷི་ཀྑཱུ་ནཾ བྷི་ཀྑུ་ནཱི་ན་ཉྩ, ཡེ ནི་ཡཱ་མ་ག་ཏ་དྡ་སཱ.

‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.

‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུཾ ཝི་སོ་དྷི་ཏཾ;

ཏེ་ཝི་ཛྫོ ཨི་དྡྷི་པ་ཏྟོ་མྷི, ཙེ་ཏོ་པ་རི་ཡཱ་ཡ་ཀོ་ཝི་དོ’’ཏི.

ཝ་ངྒཱི་ས་སཾ་ཡུ་ཏྟཾ ས་མ་ཏྟཾ.