༩. མ་ཙྪ་རི་སུ་ཏྟཾ
༤༩. ‘‘ཡེ་དྷ མ་ཙྪ་རི་ནོ ལོ་ཀེ, ཀ་ད་རི་ཡཱ པ་རི་བྷཱ་ས་ཀཱ;
ཨ་ཉྙེ་སཾ ད་ད་མཱ་ནཱ་ནཾ, ཨ་ནྟ་རཱ་ཡ་ཀ་རཱ ན་རཱ.
‘‘ཀཱི་དི་སོ ཏེ་སཾ ཝི་པཱ་ཀོ, ས་མྤ་རཱ་ཡོ ཙ ཀཱི་དི་སོ;
བྷ་ག་ཝ་ནྟཾ པུ་ཊྛུ་མཱ་ག་མྨ, ཀ་ཐཾ ཛཱ་ནེ་མུ ཏཾ མ་ཡ’’ནྟི.
‘‘ཡེ་དྷ མ་ཙྪ་རི་ནོ ལོ་ཀེ, ཀ་ད་རི་ཡཱ པ་རི་བྷཱ་ས་ཀཱ;
ཨ་ཉྙེ་སཾ ད་ད་མཱ་ནཱ་ནཾ, ཨ་ནྟ་རཱ་ཡ་ཀ་རཱ ན་རཱ.
‘‘ནི་ར་ཡཾ ཏི་ར་ཙྪཱ་ན་ཡོ་ནིཾ, ཡ་མ་ལོ་ཀཾ ཨུ་པ་པ་ཛྫ་རེ;
ས་ཙེ ཨེ་ནྟི མ་ནུ་སྶ་ཏྟཾ, ད་ལི་དྡེ ཛཱ་ཡ་རེ ཀུ་ལེ.
‘‘ཙོ་ལ༹ཾ པི་ཎྜོ ར་ཏཱི ཁི་ཌྜཱ, ཡ་ཏྠ ཀི་ཙྪེ་ན ལ་བྦྷ་ཏི;
པ་ར་ཏོ ཨཱ་སཱི་ས་རེ [ཨཱ་སིཾ་ས་རེ (སཱི. སྱཱ. ཀཾ. པཱི.)] བཱ་ལཱ, ཏ་མྤི ཏེ་སཾ ན ལ་བྦྷ་ཏི;
དི་ཊྛེ དྷ་མྨེ་ས ཝི་པཱ་ཀོ, ས་མྤ་རཱ་ཡེ [ས་མྤ་རཱ་ཡོ (སྱཱ. ཀཾ. པཱི.)] ཙ དུ་གྒ་ཏཱི’’ཏི.
‘‘ཨི་ཏི་ཧེ་ཏཾ ཝི་ཛཱ་ནཱ་མ, ཨ་ཉྙཾ པུ་ཙྪཱ་མ གོ་ཏ་མ;
ཡེ་དྷ ལ་དྡྷཱ མ་ནུ་སྶ་ཏྟཾ, ཝ་ད་ཉྙཱུ ཝཱི་ཏ་མ་ཙྪ་རཱ.
‘‘བུ་དྡྷེ པ་ས་ནྣཱ དྷ་མྨེ ཙ, ས་ངྒྷེ ཙ ཏི་བྦ་གཱ་ར་ཝཱ;
ཀཱི་དི་སོ ཏེ་སཾ ཝི་པཱ་ཀོ, ས་མྤ་རཱ་ཡོ ཙ ཀཱི་དི་སོ;
བྷ་ག་ཝ་ནྟཾ པུ་ཊྛུ་མཱ་ག་མྨ, ཀ་ཐཾ ཛཱ་ནེ་མུ ཏཾ མ་ཡ’’ནྟི.
‘‘ཡེ་དྷ ལ་དྡྷཱ མ་ནུ་སྶ་ཏྟཾ, ཝ་ད་ཉྙཱུ ཝཱི་ཏ་མ་ཙྪ་རཱ;
བུ་དྡྷེ པ་ས་ནྣཱ དྷ་མྨེ ཙ, ས་ངྒྷེ ཙ ཏི་བྦ་གཱ་ར་ཝཱ;
ཨེ་ཏེ ས་གྒཱ [ས་གྒེ (སཱི. སྱཱ. ཀཾ.)] པ་ཀཱ་ས་ནྟི, ཡ་ཏྠ ཏེ ཨུ་པ་པ་ཛྫ་རེ.
‘‘ས་ཙེ ཨེ་ནྟི མ་ནུ་སྶ་ཏྟཾ, ཨ་ཌྜྷེ ཨཱ་ཛཱ་ཡ་རེ ཀུ་ལེ;
ཙོ་ལ༹ཾ པི་ཎྜོ ར་ཏཱི ཁི་ཌྜཱ, ཡ་ཏྠཱ་ཀི་ཙྪེ་ན ལ་བྦྷ་ཏི.
‘‘པ་ར་ས་མྦྷ་ཏེ་སུ བྷོ་གེ་སུ, ཝ་ས་ཝ་ཏྟཱི་ཝ མོ་ད་རེ;
དི་ཊྛེ དྷ་མྨེ་ས ཝི་པཱ་ཀོ, ས་མྤ་རཱ་ཡེ ཙ སུ་གྒ་ཏཱི’’ཏི.