༨. ཨཱ་ནཱ་པཱ་ན་སྶ་ཏི་སུ་ཏྟཾ

༡༤༤. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ ས་མྦ་ཧུ་ལེ་ཧི ཨ་བྷི་ཉྙཱ་ཏེ་ཧི ཨ་བྷི་ཉྙཱ་ཏེ་ཧི ཐེ་རེ་ཧི སཱ་ཝ་ཀེ་ཧི ས་དྡྷིཾ – ཨཱ་ཡ་སྨ་ཏཱ ཙ སཱ་རི་པུ་ཏྟེ་ན ཨཱ་ཡ་སྨ་ཏཱ ཙ མ་ཧཱ་མོ་གྒ་ལླཱ་ནེ་ན [མ་ཧཱ་མོ་གྒ་ལཱ་ནེ་ན (ཀ.)] ཨཱ་ཡ་སྨ་ཏཱ ཙ མ་ཧཱ་ཀ་སྶ་པེ་ན ཨཱ་ཡ་སྨ་ཏཱ ཙ མ་ཧཱ་ཀ་ཙྩཱ་ཡ་ནེ་ན ཨཱ་ཡ་སྨ་ཏཱ ཙ མ་ཧཱ་ཀོ་ཊྛི་ཀེ་ན ཨཱ་ཡ་སྨ་ཏཱ ཙ མ་ཧཱ་ཀ་པྤི་ནེ་ན ཨཱ་ཡ་སྨ་ཏཱ ཙ མ་ཧཱ་ཙུ་ནྡེ་ན ཨཱ་ཡ་སྨ་ཏཱ ཙ ཨ་ནུ་རུ་དྡྷེ་ན ཨཱ་ཡ་སྨ་ཏཱ ཙ རེ་ཝ་ཏེ་ན ཨཱ་ཡ་སྨ་ཏཱ ཙ ཨཱ་ན་ནྡེ་ན, ཨ་ཉྙེ་ཧི ཙ ཨ་བྷི་ཉྙཱ་ཏེ་ཧི ཨ་བྷི་ཉྙཱ་ཏེ་ཧི ཐེ་རེ་ཧི སཱ་ཝ་ཀེ་ཧི ས་དྡྷིཾ.

ཏེ་ན ཁོ པ་ན ས་མ་ཡེ་ན ཐེ་རཱ བྷི་ཀྑཱུ ན་ཝེ བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི. ཨ་པྤེ་ཀ་ཙྩེ ཐེ་རཱ བྷི་ཀྑཱུ ད་ས་པི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཝཱི་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཏིཾ་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཙ་ཏྟཱ་རཱི་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི. ཏེ ཙ ན་ཝཱ བྷི་ཀྑཱུ ཐེ་རེ་ཧི བྷི་ཀྑཱུ་ཧི ཨོ་ཝ་དི་ཡ་མཱ་ནཱ ཨ་ནུ་སཱ་སི་ཡ་མཱ་ནཱ ཨུ་ལཱ༹་རཾ པུ་བྦེ་ནཱ་པ་རཾ ཝི་སེ་སཾ ཛཱ་ན་ནྟི [པ་ཛཱ་ན་ནྟི (སྱཱ. ཀཾ.), ས་ཉྫཱ་ན་ནྟི (ཀ.)].

༡༤༥. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ད་ཧུ་པོ་ས་ཐེ པ་ནྣ་ར་སེ པ་ཝཱ་ར་ཎཱ་ཡ པུ་ཎྞཱ་ཡ པུ་ཎྞ་མཱ་ཡ ར་ཏྟི་ཡཱ བྷི་ཀྑུ་ས་ངྒྷ་པ་རི་ཝུ་ཏོ ཨ་བྦྷོ་ཀཱ་སེ ནི་སི་ནྣོ ཧོ་ཏི. ཨ་ཐ ཁོ བྷ་ག་ཝཱ ཏུ་ཎྷཱི་བྷཱུ་ཏཾ ཏུ་ཎྷཱི་བྷཱུ་ཏཾ བྷི་ཀྑུ་ས་ངྒྷཾ ཨ་ནུ་ཝི་ལོ་ཀེ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨཱ་ར་དྡྷོ་སྨི, བྷི་ཀྑ་ཝེ, ཨི་མཱ་ཡ པ་ཊི་པ་དཱ་ཡ; ཨཱ་ར་དྡྷ་ཙི་ཏྟོ་སྨི, བྷི་ཀྑ་ཝེ, ཨི་མཱ་ཡ པ་ཊི་པ་དཱ་ཡ. ཏ་སྨཱ་ཏི་ཧ, བྷི་ཀྑ་ཝེ, བྷི་ཡྻོ་སོ་མ་ཏྟཱ་ཡ ཝཱི་རི་ཡཾ ཨཱ་ར་བྷ་ཐ ཨ་པྤ་ཏྟ་སྶ པ་ཏྟི་ཡཱ, ཨ་ན་དྷི་ག་ཏ་སྶ ཨ་དྷི་ག་མཱ་ཡ, ཨ་ས་ཙྪི་ཀ་ཏ་སྶ ས་ཙྪི་ཀི་རི་ཡཱ་ཡ. ཨི་དྷེ་ཝཱ་ཧཾ སཱ་ཝ་ཏྠི་ཡཾ ཀོ་མུ་དིཾ ཙཱ་ཏུ་མཱ་སི་ནིཾ ཨཱ་ག་མེ་སྶཱ་མཱི’’ཏི. ཨ་སྶོ་སུཾ ཁོ ཛཱ་ན་པ་དཱ བྷི་ཀྑཱུ – ‘‘བྷ་ག་ཝཱ ཀི་ར ཏ་ཏྠེ་ཝ སཱ་ཝ་ཏྠི་ཡཾ ཀོ་མུ་དིཾ ཙཱ་ཏུ་མཱ་སི་ནིཾ ཨཱ་ག་མེ་སྶ་ཏཱི’’ཏི. ཏེ ཛཱ་ན་པ་དཱ བྷི་ཀྑཱུ སཱ་ཝ་ཏྠིཾ [སཱ་ཝ་ཏྠི་ཡཾ (སྱཱ. ཀཾ. པཱི. ཀ.)] ཨོ་ས་ར་ནྟི བྷ་ག་ཝ་ནྟཾ ད་སྶ་ནཱ་ཡ. ཏེ ཙ ཁོ ཐེ་རཱ བྷི་ཀྑཱུ བྷི་ཡྻོ་སོ་མ་ཏྟཱ་ཡ ན་ཝེ བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི. ཨ་པྤེ་ཀ་ཙྩེ ཐེ་རཱ བྷི་ཀྑཱུ ད་ས་པི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཝཱི་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཏིཾ་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི, ཨ་པྤེ་ཀ་ཙྩེ ཐེ་རཱ བྷི་ཀྑཱུ ཙ་ཏྟཱ་རཱི་ས་མྤི བྷི་ཀྑཱུ ཨོ་ཝ་ད་ནྟི ཨ་ནུ་སཱ་ས་ནྟི. ཏེ ཙ ན་ཝཱ བྷི་ཀྑཱུ ཐེ་རེ་ཧི བྷི་ཀྑཱུ་ཧི ཨོ་ཝ་དི་ཡ་མཱ་ནཱ ཨ་ནུ་སཱ་སི་ཡ་མཱ་ནཱ ཨུ་ལཱ༹་རཾ པུ་བྦེ་ནཱ་པ་རཾ ཝི་སེ་སཾ ཛཱ་ན་ནྟི.

༡༤༦. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ད་ཧུ་པོ་ས་ཐེ པ་ནྣ་ར་སེ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ པུ་ཎྞཱ་ཡ པུ་ཎྞ་མཱ་ཡ ར་ཏྟི་ཡཱ བྷི་ཀྑུ་ས་ངྒྷ་པ་རི་ཝུ་ཏོ ཨ་བྦྷོ་ཀཱ་སེ ནི་སི་ནྣོ ཧོ་ཏི. ཨ་ཐ ཁོ བྷ་ག་ཝཱ ཏུ་ཎྷཱི་བྷཱུ་ཏཾ ཏུ་ཎྷཱི་བྷཱུ་ཏཾ བྷི་ཀྑུ་ས་ངྒྷཾ ཨ་ནུ་ཝི་ལོ་ཀེ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་པ་ལཱ་པཱ་ཡཾ, བྷི་ཀྑ་ཝེ, པ་རི་སཱ; ནི་པྤ་ལཱ་པཱ་ཡཾ, བྷི་ཀྑ་ཝེ, པ་རི་སཱ; སུ་དྡྷཱ སཱ་རེ [སུ་དྡྷ་སཱ་རེ པ་ཏི་ཊྛི་ཏཱ (སྱཱ. ཀཾ. པཱི.)] པ་ཏི་ཊྛི་ཏཱ. ཏ་ཐཱ་རཱུ་པོ ཨ་ཡཾ, བྷི་ཀྑ་ཝེ, བྷི་ཀྑུ་ས་ངྒྷོ; ཏ་ཐཱ་རཱུ་པཱ ཨ་ཡཾ, བྷི་ཀྑ་ཝེ, པ་རི་སཱ ཡ་ཐཱ་རཱུ་པཱ པ་རི་སཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཏ་ཐཱ་རཱུ་པོ ཨ་ཡཾ, བྷི་ཀྑ་ཝེ, བྷི་ཀྑུ་ས་ངྒྷོ; ཏ་ཐཱ་རཱུ་པཱ ཨ་ཡཾ, བྷི་ཀྑ་ཝེ, པ་རི་སཱ ཡ་ཐཱ་རཱུ་པཱ་ཡ པ་རི་སཱ་ཡ ཨ་པྤཾ དི་ནྣཾ བ་ཧུ ཧོ་ཏི, བ་ཧུ དི་ནྣཾ བ་ཧུ་ཏ་རཾ. ཏ་ཐཱ་རཱུ་པོ ཨ་ཡཾ, བྷི་ཀྑ་ཝེ, བྷི་ཀྑུ་ས་ངྒྷོ; ཏ་ཐཱ་རཱུ་པཱ ཨ་ཡཾ, བྷི་ཀྑ་ཝེ, པ་རི་སཱ ཡ་ཐཱ་རཱུ་པཱ པ་རི་སཱ དུ་ལླ་བྷཱ ད་སྶ་ནཱ་ཡ ལོ་ཀ་སྶ. ཏ་ཐཱ་རཱུ་པོ ཨ་ཡཾ, བྷི་ཀྑ་ཝེ, བྷི་ཀྑུ་ས་ངྒྷོ; ཏ་ཐཱ་རཱུ་པཱ ཨ་ཡཾ, བྷི་ཀྑ་ཝེ, པ་རི་སཱ ཡ་ཐཱ་རཱུ་པཾ པ་རི་སཾ ཨ་ལཾ ཡོ་ཛ་ན་ག་ཎ་ནཱ་ནི ད་སྶ་ནཱ་ཡ ག་ནྟུཾ པུ་ཊོ་སེ་ནཱ་པི’’ [པུ་ཊོ་སེ་ནཱ་པི, ཏ་ཐཱ་རཱུ་པོ ཨ་ཡཾ བྷི་ཀྑ་ཝེ བྷི་ཀྑུ་སཾ་གྷོ, ཏ་ཐཱ་རཱུ་པཱ ཨ་ཡཾ པ་རི་སཱ (སཱི. པཱི. ཀ.)].

༡༤༧. ‘‘ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཨ་ར་ཧ་ནྟོ ཁཱི་ཎཱ་ས་ཝཱ ཝུ་སི་ཏ་ཝ་ནྟོ ཀ་ཏ་ཀ་ར་ཎཱི་ཡཱ ཨོ་ཧི་ཏ་བྷཱ་རཱ ཨ་ནུ་པྤ་ཏྟ་ས་ད་ཏྠཱ པ་རི་ཀྑཱི་ཎ་བྷ་ཝ་སཾ་ཡོ་ཛ་ནཱ ས་མྨ་ད་ཉྙཱ་ཝི་མུ་ཏྟཱ – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨོ་པ་པཱ་ཏི་ཀཱ ཏ་ཏྠ པ་རི་ནི་བྦཱ་ཡི་ནོ ཨ་ནཱ་ཝ་ཏྟི་དྷ་མྨཱ ཏ་སྨཱ ལོ་ཀཱ – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མི་ནོ ས་ཀི་དེ་ཝ [ས་ཀིཾ དེ་ཝ (ཀ.)] ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རི་སྶ་ནྟི – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ནཱ – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ.

‘‘ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཙ་ཏུ་ནྣཾ ས་ཏི་པ་ཊྛཱ་ནཱ་ནཾ བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཙ་ཏུ་ནྣཾ ས་མྨ་པྤ་དྷཱ་ནཱ་ནཾ བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི…པེ… ཙ་ཏུ་ནྣཾ ཨི་དྡྷི་པཱ་དཱ་ནཾ… པ་ཉྩ་ནྣཾ ཨི་ནྡྲི་ཡཱ་ནཾ… པ་ཉྩ་ནྣཾ བ་ལཱ་ནཾ… ས་ཏྟ་ནྣཾ བོ་ཛ྄ཛྷ་ངྒཱ་ནཾ… ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶ བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ མེ་ཏྟཱ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི… ཀ་རུ་ཎཱ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི… མུ་དི་ཏཱ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི… ཨུ་པེ་ཀྑཱ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི… ཨ་སུ་བྷ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི… ཨ་ནི་ཙྩ་ས་ཉྙཱ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི – ཨེ་ཝ་རཱུ་པཱ་པི, བྷི་ཀྑ་ཝེ, ས་ནྟི བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ. ས་ནྟི, བྷི་ཀྑ་ཝེ, བྷི་ཀྑཱུ ཨི་མ་སྨིཾ བྷི་ཀྑུ་ས་ངྒྷེ ཨཱ་ནཱ་པཱ་ན་སྶ་ཏི་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི. ཨཱ་ནཱ་པཱ་ན་སྶ་ཏི, བྷི་ཀྑ་ཝེ, བྷཱ་ཝི་ཏཱ བ་ཧུ་ལཱི་ཀ་ཏཱ མ་ཧ་པྥ་ལཱ ཧོ་ཏི མ་ཧཱ་ནི་སཾ་སཱ. ཨཱ་ནཱ་པཱ་ན་སྶ་ཏི, བྷི་ཀྑ་ཝེ, བྷཱ་ཝི་ཏཱ བ་ཧུ་ལཱི་ཀ་ཏཱ ཙ་ཏྟཱ་རོ ས་ཏི་པ་ཊྛཱ་ནེ པ་རི་པཱུ་རེ་ཏི. ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝི་ཏཱ བ་ཧུ་ལཱི་ཀ་ཏཱ ས་ཏྟ བོ་ཛ྄ཛྷ་ངྒེ པ་རི་པཱུ་རེ་ནྟི. ས་ཏྟ བོ་ཛ྄ཛྷ་ངྒཱ བྷཱ་ཝི་ཏཱ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟིཾ པ་རི་པཱུ་རེ་ནྟི.

༡༤༨. ‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ཨཱ་ནཱ་པཱ་ན་སྶ་ཏི ཀ་ཐཾ བ་ཧུ་ལཱི་ཀ་ཏཱ མ་ཧ་པྥ་ལཱ ཧོ་ཏི མ་ཧཱ་ནི་སཾ་སཱ? ཨི་དྷ, བྷི་ཀྑ་ཝེ, བྷི་ཀྑུ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ནི་སཱི་ད་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ. སོ ས་ཏོ་ཝ ཨ་སྶ་ས་ཏི ས་ཏོ་ཝ [ས་ཏོ (སཱི. སྱཱ. ཀཾ. པཱི.)] པ་སྶ་ས་ཏི.

‘‘དཱི་གྷཾ ཝཱ ཨ་སྶ་ས་ནྟོ ‘དཱི་གྷཾ ཨ་སྶ་སཱ་མཱི’ཏི པ་ཛཱ་ནཱ་ཏི, དཱི་གྷཾ ཝཱ པ་སྶ་ས་ནྟོ ‘དཱི་གྷཾ པ་སྶ་སཱ་མཱི’ཏི པ་ཛཱ་ནཱ་ཏི; ར་སྶཾ ཝཱ ཨ་སྶ་ས་ནྟོ ‘ར་སྶཾ ཨ་སྶ་སཱ་མཱི’ཏི པ་ཛཱ་ནཱ་ཏི, ར་སྶཾ ཝཱ པ་སྶ་ས་ནྟོ ‘ར་སྶཾ པ་སྶ་སཱ་མཱི’ཏི པ་ཛཱ་ནཱ་ཏི; ‘ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ས་བྦ་ཀཱ་ཡ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’ཏི སི་ཀྑ་ཏི.

‘‘‘པཱི་ཏི་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘པཱི་ཏི་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘སུ་ཁ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘སུ་ཁ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ པ་སྶ་སི་སྶཱ་མཱི’ཏི སི་ཀྑ་ཏི.

‘‘‘ཙི་ཏྟ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཙི་ཏྟ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཨ་བྷི་པྤ་མོ་ད་ཡཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ཨ་བྷི་པྤ་མོ་ད་ཡཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི; ‘ས་མཱ་ད་ཧཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ས་མཱ་ད་ཧཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི; ‘ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི.

‘‘‘ཨ་ནི་ཙྩཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཨ་ནི་ཙྩཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཝི་རཱ་གཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཝི་རཱ་གཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི. ཨེ་ཝཾ བྷཱ་ཝི་ཏཱ ཁོ, བྷི་ཀྑ་ཝེ, ཨཱ་ནཱ་པཱ་ན་སྶ་ཏི ཨེ་ཝཾ བ་ཧུ་ལཱི་ཀ་ཏཱ མ་ཧ་པྥ་ལཱ ཧོ་ཏི མ་ཧཱ་ནི་སཾ་སཱ.

༡༤༩. ‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ཨཱ་ནཱ་པཱ་ན་སྶ་ཏི ཀ་ཐཾ བ་ཧུ་ལཱི་ཀ་ཏཱ ཙ་ཏྟཱ་རོ ས་ཏི་པ་ཊྛཱ་ནེ པ་རི་པཱུ་རེ་ཏི? ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ དཱི་གྷཾ ཝཱ ཨ་སྶ་ས་ནྟོ ‘དཱི་གྷཾ ཨ་སྶ་སཱ་མཱི’ཏི པ་ཛཱ་ནཱ་ཏི, དཱི་གྷཾ ཝཱ པ་སྶ་ས་ནྟོ ‘དཱི་གྷཾ པ་སྶ་སཱ་མཱི’ཏི པ་ཛཱ་ནཱ་ཏི; ར་སྶཾ ཝཱ ཨ་སྶ་ས་ནྟོ ‘ར་སྶཾ ཨ་སྶ་སཱ་མཱི’ཏི པ་ཛཱ་ནཱ་ཏི, ར་སྶཾ ཝཱ པ་སྶ་ས་ནྟོ ‘ར་སྶཾ པ་སྶ་སཱ་མཱི’ཏི པ་ཛཱ་ནཱ་ཏི; ‘ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ས་བྦ་ཀཱ་ཡ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’ཏི སི་ཀྑ་ཏི; ཀཱ་ཡེ ཀཱ་ཡཱ་ནུ་པ་སྶཱི, བྷི་ཀྑ་ཝེ, ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཀཱ་ཡེ་སུ ཀཱ་ཡ་ཉྙ་ཏ་རཱ་ཧཾ, བྷི་ཀྑ་ཝེ, ཨེ་ཝཾ ཝ་དཱ་མི ཡ་དི་དཾ – ཨ་སྶཱ་ས་པ་སྶཱ་སཱ. ཏ་སྨཱ་ཏི་ཧ, བྷི་ཀྑ་ཝེ, ཀཱ་ཡེ ཀཱ་ཡཱ་ནུ་པ་སྶཱི ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ.

‘‘ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ‘པཱི་ཏི་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘པཱི་ཏི་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘སུ་ཁ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘སུ་ཁ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ པ་སྶ་སི་སྶཱ་མཱི’ཏི སི་ཀྑ་ཏི; ཝེ་ད་ནཱ་སུ ཝེ་ད་ནཱ་ནུ་པ་སྶཱི, བྷི་ཀྑ་ཝེ, ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཝེ་ད་ནཱ་སུ ཝེ་ད་ནཱ་ཉྙ་ཏ་རཱ་ཧཾ, བྷི་ཀྑ་ཝེ, ཨེ་ཝཾ ཝ་དཱ་མི ཡ་དི་དཾ – ཨ་སྶཱ་ས་པ་སྶཱ་སཱ་ནཾ སཱ་དྷུ་ཀཾ མ་ན་སི་ཀཱ་རཾ. ཏ་སྨཱ་ཏི་ཧ, བྷི་ཀྑ་ཝེ, ཝེ་ད་ནཱ་སུ ཝེ་ད་ནཱ་ནུ་པ་སྶཱི ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ.

‘‘ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ‘ཙི་ཏྟ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཙི་ཏྟ་པ་ཊི་སཾ་ཝེ་དཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཨ་བྷི་པྤ་མོ་ད་ཡཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ཨ་བྷི་པྤ་མོ་ད་ཡཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི; ‘ས་མཱ་ད་ཧཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ས་མཱ་ད་ཧཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི; ‘ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’ཏི སི་ཀྑ་ཏི, ‘ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’ཏི སི་ཀྑ་ཏི; ཙི་ཏྟེ ཙི་ཏྟཱ་ནུ་པ་སྶཱི, བྷི་ཀྑ་ཝེ, ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ནཱ་ཧཾ, བྷི་ཀྑ་ཝེ, མུ་ཊྛ་སྶ་ཏི་སྶ ཨ་ས་མྤ་ཛཱ་ན་སྶ ཨཱ་ནཱ་པཱ་ན་སྶ་ཏིཾ ཝ་དཱ་མི. ཏ་སྨཱ་ཏི་ཧ, བྷི་ཀྑ་ཝེ, ཙི་ཏྟེ ཙི་ཏྟཱ་ནུ་པ་སྶཱི ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ.

‘‘ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ‘ཨ་ནི་ཙྩཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཨ་ནི་ཙྩཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘ཝི་རཱ་གཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ཝི་རཱ་གཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; ‘པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི; དྷ་མྨེ་སུ དྷ་མྨཱ་ནུ་པ་སྶཱི, བྷི་ཀྑ་ཝེ, ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. སོ ཡཾ ཏཾ ཨ་བྷི་ཛ྄ཛྷཱ་དོ་མ་ན་སྶཱ་ནཾ པ་ཧཱ་ནཾ ཏཾ པ་ཉྙཱ་ཡ དི་སྭཱ སཱ་དྷུ་ཀཾ ཨ་ཛ྄ཛྷུ་པེ་ཀྑི་ཏཱ ཧོ་ཏི. ཏ་སྨཱ་ཏི་ཧ, བྷི་ཀྑ་ཝེ, དྷ་མྨེ་སུ དྷ་མྨཱ་ནུ་པ་སྶཱི ཏ་སྨིཾ ས་མ་ཡེ བྷི་ཀྑུ ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ.

‘‘ཨེ་ཝཾ བྷཱ་ཝི་ཏཱ ཁོ, བྷི་ཀྑ་ཝེ, ཨཱ་ནཱ་པཱ་ན་སྶ་ཏི ཨེ་ཝཾ བ་ཧུ་ལཱི་ཀ་ཏཱ ཙ་ཏྟཱ་རོ ས་ཏི་པ་ཊྛཱ་ནེ པ་རི་པཱུ་རེ་ཏི.

༡༥༠. ‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ཙ་ཏྟཱ་རོ ས་ཏི་པ་ཊྛཱ་ནཱ ཀ་ཐཾ བ་ཧུ་ལཱི་ཀ་ཏཱ ས་ཏྟ བོ་ཛ྄ཛྷ་ངྒེ པ་རི་པཱུ་རེ་ནྟི? ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ, ཨུ་པ་ཊྛི་ཏཱ་སྶ ཏ་སྨིཾ ས་མ་ཡེ ས་ཏི ཧོ་ཏི ཨ་ས་མྨུ་ཊྛཱ [ཨ་པྤ་མྨུ་ཊྛཱ (སྱཱ. ཀཾ.)]. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ ཨུ་པ་ཊྛི་ཏཱ ས་ཏི ཧོ་ཏི ཨ་ས་མྨུ་ཊྛཱ, ས་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི. ས་ཏི་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, ས་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘སོ ཏ་ཐཱ་ས་ཏོ ཝི་ཧ་ར་ནྟོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ཡ་ཏི [པ་ཝི་ཙ་ར་ཏི (སཱི. སྱཱ. ཀཾ. པཱི.)] པ་རི་ཝཱི་མཾ་སཾ ཨཱ་པ་ཛྫ་ཏི. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ཏ་ཐཱ་ས་ཏོ ཝི་ཧ་ར་ནྟོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ཡ་ཏི པ་རི་ཝཱི་མཾ་སཾ ཨཱ་པ་ཛྫ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘ཏ་སྶ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏོ པ་ཝི་ཙ་ཡ་ཏོ པ་རི་ཝཱི་མཾ་སཾ ཨཱ་པ་ཛྫ་ཏོ ཨཱ་ར་དྡྷཾ ཧོ་ཏི ཝཱི་རི་ཡཾ ཨ་ས་ལླཱི་ནཾ. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏོ པ་ཝི་ཙ་ཡ་ཏོ པ་རི་ཝཱི་མཾ་སཾ ཨཱ་པ་ཛྫ་ཏོ ཨཱ་ར་དྡྷཾ ཧོ་ཏི ཝཱི་རི་ཡཾ ཨ་ས་ལླཱི་ནཾ, ཝཱི་རི་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, ཝཱི་རི་ཡ་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, ཝཱི་རི་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘ཨཱ་ར་དྡྷ་ཝཱི་རི་ཡ་སྶ ཨུ་པྤ་ཛྫ་ཏི པཱི་ཏི ནི་རཱ་མི་སཱ. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ ཨཱ་ར་དྡྷ་ཝཱི་རི་ཡ་སྶ ཨུ་པྤ་ཛྫ་ཏི པཱི་ཏི ནི་རཱ་མི་སཱ, པཱི་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, པཱི་ཏི་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, པཱི་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘པཱི་ཏི་མ་ན་སྶ ཀཱ་ཡོ་པི པ་སྶ་མྦྷ་ཏི, ཙི་ཏྟ་མྤི པ་སྶ་མྦྷ་ཏི. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ པཱི་ཏི་མ་ན་སྶ ཀཱ་ཡོ་པི པ་སྶ་མྦྷ་ཏི, ཙི་ཏྟ་མྤི པ་སྶ་མྦྷ་ཏི, པ་སྶ་དྡྷི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, པ་སྶ་དྡྷི་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, པ་སྶ་དྡྷི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘པ་སྶ་དྡྷ་ཀཱ་ཡ་སྶ སུ་ཁི་ནོ ཙི་ཏྟཾ ས་མཱ་དྷི་ཡ་ཏི. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ པ་སྶ་དྡྷ་ཀཱ་ཡ་སྶ སུ་ཁི་ནོ ཙི་ཏྟཾ ས་མཱ་དྷི་ཡ་ཏི, ས་མཱ་དྷི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, ས་མཱ་དྷི་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, ས་མཱ་དྷི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘སོ ཏ་ཐཱ་ས་མཱ་ཧི་ཏཾ ཙི་ཏྟཾ སཱ་དྷུ་ཀཾ ཨ་ཛ྄ཛྷུ་པེ་ཀྑི་ཏཱ ཧོ་ཏི. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ཏ་ཐཱ་ས་མཱ་ཧི་ཏཾ ཙི་ཏྟཾ སཱ་དྷུ་ཀཾ ཨ་ཛ྄ཛྷུ་པེ་ཀྑི་ཏཱ ཧོ་ཏི, ཨུ་པེ་ཀྑཱ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, ཨུ་པེ་ཀྑཱ་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, ཨུ་པེ་ཀྑཱ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

༡༥༡. ‘‘ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ཝེ་ད་ནཱ་སུ…པེ… ཙི་ཏྟེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ, ཨུ་པ་ཊྛི་ཏཱ་སྶ ཏ་སྨིཾ ས་མ་ཡེ ས་ཏི ཧོ་ཏི ཨ་ས་མྨུ་ཊྛཱ. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ་ནོ ཨུ་པ་ཊྛི་ཏཱ ས་ཏི ཧོ་ཏི ཨ་ས་མྨུ་ཊྛཱ, ས་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, ས་ཏི་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, ས་ཏི་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

‘‘སོ ཏ་ཐཱ་ས་ཏོ ཝི་ཧ་ར་ནྟོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ཡ་ཏི པ་རི་ཝཱི་མཾ་སཾ ཨཱ་པ་ཛྫ་ཏི. ཡ་སྨིཾ ས་མ་ཡེ, བྷི་ཀྑ་ཝེ, བྷི་ཀྑུ ཏ་ཐཱ་ས་ཏོ ཝི་ཧ་ར་ནྟོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ཡ་ཏི པ་རི་ཝཱི་མཾ་སཾ ཨཱ་པ་ཛྫ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ ཨཱ་ར་དྡྷོ ཧོ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ ཏ་སྨིཾ ས་མ་ཡེ བྷི་ཀྑུ བྷཱ་ཝེ་ཏི, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཏ་སྨིཾ ས་མ་ཡེ བྷི་ཀྑུ་ནོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏི.

༡༥༢. ‘‘ཀ་ཐཾ བྷཱ་ཝི་ཏཱ ཙ, བྷི་ཀྑ་ཝེ, ས་ཏྟ བོ་ཛ྄ཛྷ་ངྒཱ ཀ་ཐཾ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟིཾ པ་རི་པཱུ་རེ་ནྟི? ཨི་དྷ, བྷི་ཀྑ་ཝེ, བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ བྷཱ་ཝེ་ཏི…པེ… ཝཱི་རི་ཡ་ས་མྦོ་ཛ྄ཛྷ་ངྒཾ བྷཱ་ཝེ་ཏི… པཱི་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི… པ་སྶ་དྡྷི་ས་མྦོ་ཛ྄ཛྷ་ངྒཾ བྷཱ་ཝེ་ཏི… ས་མཱ་དྷི་ས་མྦོ་ཛ྄ཛྷ་ངྒཾ བྷཱ་ཝེ་ཏི… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ. ཨེ་ཝཾ བྷཱ་ཝི་ཏཱ ཁོ, བྷི་ཀྑ་ཝེ, ས་ཏྟ བོ་ཛ྄ཛྷ་ངྒཱ ཨེ་ཝཾ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟིཾ པ་རི་པཱུ་རེ་ནྟཱི’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནཱ ཏེ བྷི་ཀྑཱུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡུ་ནྟི.

ཨཱ་ནཱ་པཱ་ན་སྶ་ཏི་སུ་ཏྟཾ ནི་ཊྛི་ཏཾ ཨ་ཊྛ་མཾ.