༦. ཨཱ་ནེ་ཉྫ་ས་པྤཱ་ཡ་སུ་ཏྟཾ

༦༦. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀུ་རཱུ་སུ ཝི་ཧ་ར་ཏི ཀ་མྨཱ་ས་དྷ་མྨཾ ནཱ་མ ཀུ་རཱུ་ནཾ ནི་ག་མོ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ – ‘‘ཨ་ནི་ཙྩཱ, བྷི་ཀྑ་ཝེ, ཀཱ་མཱ ཏུ་ཙྪཱ མུ་སཱ མོ་ས་དྷ་མྨཱ. མཱ་ཡཱ་ཀ་ཏ་མེ ཏཾ, བྷི་ཀྑ་ཝེ, བཱ་ལ་ལཱ་པ་ནཾ. ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ – ཨུ་བྷ་ཡ་མེ་ཏཾ མཱ་ར་དྷེ་ཡྻཾ, མཱ་ར་སྶེ་ས [མཱ་ར་སྶེ་ཝ (ཀ.)] ཝི་ས་ཡོ, མཱ་ར་སྶེ་ས ནི་ཝཱ་པོ, མཱ་ར་སྶེ་ས གོ་ཙ་རོ. ཨེ་ཏྠེ་ཏེ པཱ་པ་ཀཱ ཨ་ཀུ་ས་ལཱ མཱ་ན་སཱ ཨ་བྷི་ཛ྄ཛྷཱ་པི བྱཱ་པཱ་དཱ་པི སཱ་ར་མྦྷཱ་པི སཾ་ཝ་ཏྟ་ནྟི. ཏེ་ཝ ཨ་རི་ཡ་སཱ་ཝ་ཀ་སྶ ཨི་དྷ་མ་ནུ་སི་ཀྑ་ཏོ ཨ་ནྟ་རཱ་ཡཱ་ཡ ས་མྦྷ་ཝ་ནྟི. ཏ་ཏྲ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ – ཨུ་བྷ་ཡ་མེ་ཏཾ མཱ་ར་དྷེ་ཡྻཾ, མཱ་ར་སྶེ་ས ཝི་ས་ཡོ, མཱ་ར་སྶེ་ས ནི་ཝཱ་པོ, མཱ་ར་སྶེ་ས གོ་ཙ་རོ. ཨེ་ཏྠེ་ཏེ པཱ་པ་ཀཱ ཨ་ཀུ་ས་ལཱ མཱ་ན་སཱ ཨ་བྷི་ཛ྄ཛྷཱ་པི བྱཱ་པཱ་དཱ་པི སཱ་ར་མྦྷཱ་པི སཾ་ཝ་ཏྟ་ནྟི, ཏེ་ཝ ཨ་རི་ཡ་སཱ་ཝ་ཀ་སྶ ཨི་དྷ་མ་ནུ་སི་ཀྑ་ཏོ ཨ་ནྟ་རཱ་ཡཱ་ཡ ས་མྦྷ་ཝ་ནྟི. ཡཾ་ནཱུ་ནཱ་ཧཾ ཝི་པུ་ལེ་ན མ་ཧ་གྒ་ཏེ་ན ཙེ་ཏ་སཱ ཝི་ཧ་རེ་ཡྻཾ ཨ་བྷི་བྷུ་ཡྻ ལོ་ཀཾ ཨ་དྷི་ཊྛཱ་ཡ མ་ན་སཱ. ཝི་པུ་ལེ་ན ཧི མེ མ་ཧ་གྒ་ཏེ་ན ཙེ་ཏ་སཱ ཝི་ཧ་ར་ཏོ ཨ་བྷི་བྷུ་ཡྻ ལོ་ཀཾ ཨ་དྷི་ཊྛཱ་ཡ མ་ན་སཱ ཡེ པཱ་པ་ཀཱ ཨ་ཀུ་ས་ལཱ མཱ་ན་སཱ ཨ་བྷི་ཛ྄ཛྷཱ་པི བྱཱ་པཱ་དཱ་པི སཱ་ར་མྦྷཱ་པི ཏེ ན བྷ་ཝི་སྶ་ནྟི. ཏེ་སཾ པ་ཧཱ་ནཱ ཨ་པ་རི་ཏྟ་ཉྩ མེ ཙི་ཏྟཾ བྷ་ཝི་སྶ་ཏི ཨ་པྤ་མཱ་ཎཾ སུ་བྷཱ་ཝི་ཏ’ནྟི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ནེ་ཉྫཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ནེ་ཉྫཱུ་པ་གཾ. ཨ་ཡཾ, བྷི་ཀྑ་ཝེ, པ་ཋ་མཱ ཨཱ་ནེ་ཉྫ་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི’’.

༦༧. ‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ; ཡཾ ཀི་ཉྩི རཱུ་པཾ (ས་བྦཾ རཱུ་པཾ) [( ) ན་ཏྠི སཱི. པཱི. པོ་ཏྠ་ཀེ་སུ] ཙ་ཏྟཱ་རི ཙ མ་ཧཱ་བྷཱུ་ཏཱ་ནི, ཙ་ཏུ་ནྣ་ཉྩ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ་རཱུ་པ’ནྟི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ནེ་ཉྫཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ནེ་ཉྫཱུ་པ་གཾ. ཨ་ཡཾ, བྷི་ཀྑ་ཝེ, དུ་ཏི་ཡཱ ཨཱ་ནེ་ཉྫ་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི.

‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ; ཡེ ཙ དི་ཊྛ་དྷ་མྨི་ཀཱ རཱུ་པཱ, ཡེ ཙ ས་མྤ་རཱ་ཡི་ཀཱ རཱུ་པཱ; ཡཱ ཙ དི་ཊྛ་དྷ་མྨི་ཀཱ རཱུ་པ་ས་ཉྙཱ, ཡཱ ཙ ས་མྤ་རཱ་ཡི་ཀཱ རཱུ་པ་ས་ཉྙཱ – ཨུ་བྷ་ཡ་མེ་ཏཾ ཨ་ནི་ཙྩཾ. ཡ་ད་ནི་ཙྩཾ ཏཾ ནཱ་ལཾ ཨ་བྷི་ན་ནྡི་ཏུཾ, ནཱ་ལཾ ཨ་བྷི་ཝ་དི་ཏུཾ, ནཱ་ལཾ ཨ་ཛ྄ཛྷོ་སི་ཏུ’ནྟི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ནེ་ཉྫཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ནེ་ཉྫཱུ་པ་གཾ. ཨ་ཡཾ, བྷི་ཀྑ་ཝེ, ཏ་ཏི་ཡཱ ཨཱ་ནེ་ཉྫ་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི.

༦༨. ‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ; ཡེ ཙ དི་ཊྛ་དྷ་མྨི་ཀཱ རཱུ་པཱ, ཡེ ཙ ས་མྤ་རཱ་ཡི་ཀཱ རཱུ་པཱ; ཡཱ ཙ དི་ཊྛ་དྷ་མྨི་ཀཱ རཱུ་པ་ས་ཉྙཱ, ཡཱ ཙ ས་མྤ་རཱ་ཡི་ཀཱ རཱུ་པ་ས་ཉྙཱ; ཡཱ ཙ ཨཱ་ནེ་ཉྫ་ས་ཉྙཱ – ས་བྦཱ ས་ཉྙཱ. ཡ་ཏྠེ་ཏཱ ཨ་པ་རི་སེ་སཱ ནི་རུ་ཛ྄ཛྷ་ནྟི ཨེ་ཏཾ ས་ནྟཾ ཨེ་ཏཾ པ་ཎཱི་ཏཾ – ཡ་དི་དཾ ཨཱ་ཀི་ཉྩ་ཉྙཱ་ཡ་ཏ་ན’ནྟི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ཀི་ཉྩ་ཉྙཱ་ཡ་ཏ་ནཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ཀི་ཉྩ་ཉྙཱ་ཡ་ཏ་ནཱུ་པ་གཾ. ཨ་ཡཾ, བྷི་ཀྑ་ཝེ, པ་ཋ་མཱ ཨཱ་ཀི་ཉྩ་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི.

༦༩. ‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ཨི་ཏི པ་ཊི་ས་ཉྩི་ཀྑ་ཏི – ‘སུ་ཉྙ་མི་དཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ’ཏི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ཀི་ཉྩ་ཉྙཱ་ཡ་ཏ་ནཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ཀི་ཉྩ་ཉྙཱ་ཡ་ཏ་ནཱུ་པ་གཾ. ཨ་ཡཾ, བྷི་ཀྑ་ཝེ, དུ་ཏི་ཡཱ ཨཱ་ཀི་ཉྩ་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི.

༧༠. ‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ནཱ་ཧཾ ཀྭ་ཙ་ནི [ཀྭ་ཙི་ནི (སྱཱ. ཀཾ. སཱི. ཨ་ཊྛ.)] ཀ་སྶ་ཙི ཀི་ཉྩ་ན་ཏ་སྨིཾ [ཀི་ཉྩ་ན་ཏ་སྨི (?)], ན ཙ མ་མ ཀྭ་ཙ་ནི ཀི་སྨི་ཉྩི ཀི་ཉྩ་ནཾ ན་ཏྠཱི’ཏི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ཨཱ་ཀི་ཉྩ་ཉྙཱ་ཡ་ཏ་ནཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ཨཱ་ཀི་ཉྩ་ཉྙཱ་ཡ་ཏ་ནཱུ་པ་གཾ. ཨ་ཡཾ, བྷི་ཀྑ་ཝེ, ཏ་ཏི་ཡཱ ཨཱ་ཀི་ཉྩ་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏི.

‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ; ཡེ ཙ དི་ཊྛ་དྷ་མྨི་ཀཱ རཱུ་པཱ, ཡེ ཙ ས་མྤ་རཱ་ཡི་ཀཱ རཱུ་པཱ; ཡཱ ཙ དི་ཊྛ་དྷ་མྨི་ཀཱ རཱུ་པ་ས་ཉྙཱ, ཡཱ ཙ ས་མྤ་རཱ་ཡི་ཀཱ རཱུ་པ་ས་ཉྙཱ; ཡཱ ཙ ཨཱ་ནེ་ཉྫ་ས་ཉྙཱ, ཡཱ ཙ ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ – ས་བྦཱ ས་ཉྙཱ. ཡ་ཏྠེ་ཏཱ ཨ་པ་རི་སེ་སཱ ནི་རུ་ཛ྄ཛྷ་ནྟི ཨེ་ཏཾ ས་ནྟཾ ཨེ་ཏཾ པ་ཎཱི་ཏཾ – ཡ་དི་དཾ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན’ནྟི. ཏ་སྶ ཨེ་ཝཾ་པ་ཊི་པ་ནྣ་སྶ ཏ་བྦ་ཧུ་ལ་ཝི་ཧཱ་རི་ནོ ཨཱ་ཡ་ཏ་ནེ ཙི་ཏྟཾ པ་སཱི་ད་ཏི. ས་མྤ་སཱ་དེ ས་ཏི ཨེ་ཏ་ར་ཧི ཝཱ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མཱ་པ་ཛྫ་ཏི པ་ཉྙཱ་ཡ ཝཱ ཨ་དྷི་མུ་ཙྩ་ཏི ཀཱ་ཡ་སྶ བྷེ་དཱ པ་རཾ མ་ར་ཎཱ. ཋཱ་ན་མེ་ཏཾ ཝི་ཛྫ་ཏི ཡཾ ཏཾ་སཾ་ཝ་ཏྟ་ནི་ཀཾ ཝི་ཉྙཱ་ཎཾ ཨ་སྶ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཱུ་པ་གཾ. ཨ་ཡཾ, བྷི་ཀྑ་ཝེ, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ ཨ་ཀྑཱ་ཡ་ཏཱི’’ཏི.

༧༡. ཨེ་ཝཾ ཝུ་ཏྟེ, ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷ, བྷ་ནྟེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ, ནོ ཙ མེ སི་ཡཱ; ན བྷ་ཝི་སྶ་ཏི, ན མེ བྷ་ཝི་སྶ་ཏི; ཡ་ད་ཏྠི ཡཾ, བྷཱུ་ཏཾ – ཏཾ པ་ཛ་ཧཱ་མཱི’ཏི. ཨེ་ཝཾ ཨུ་པེ་ཀྑཾ པ་ཊི་ལ་བྷ་ཏི. པ་རི་ནི་བྦཱ་ཡེ་ཡྻ ནུ ཁོ སོ, བྷ་ནྟེ, བྷི་ཀྑུ ན ཝཱ པ་རི་ནི་བྦཱ་ཡེ་ཡྻཱ’’ཏི? ‘‘ཨ་པེ་ཏྠེ་ཀ་ཙྩོ, ཨཱ་ན་ནྡ, བྷི་ཀྑུ པ་རི་ནི་བྦཱ་ཡེ་ཡྻ, ཨ་པེ་ཏྠེ་ཀ་ཙྩོ བྷི་ཀྑུ ན པ་རི་ནི་བྦཱ་ཡེ་ཡྻཱ’’ཏི. ‘‘ཀོ ནུ ཁོ, བྷ་ནྟེ, ཧེ་ཏུ ཀོ པ་ཙྩ་ཡོ ཡེ་ན་པེ་ཏྠེ་ཀ་ཙྩོ བྷི་ཀྑུ པ་རི་ནི་བྦཱ་ཡེ་ཡྻ, ཨ་པེ་ཏྠེ་ཀ་ཙྩོ བྷི་ཀྑུ ན པ་རི་ནི་བྦཱ་ཡེ་ཡྻཱ’’ཏི? ‘‘ཨི་དྷཱ་ན་ནྡ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ, ནོ ཙ མེ སི་ཡཱ; ན བྷ་ཝི་སྶ་ཏི, ན མེ བྷ་ཝི་སྶ་ཏི; ཡ་ད་ཏྠི, ཡཾ བྷཱུ་ཏཾ – ཏཾ པ་ཛ་ཧཱ་མཱི’ཏི. ཨེ་ཝཾ ཨུ་པེ་ཀྑཾ པ་ཊི་ལ་བྷ་ཏི. སོ ཏཾ ཨུ་པེ་ཀྑཾ ཨ་བྷི་ན་ནྡ་ཏི, ཨ་བྷི་ཝ་ད་ཏི, ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨུ་པེ་ཀྑཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཏ་ནྣི་སྶི་ཏཾ ཧོ་ཏི ཝི་ཉྙཱ་ཎཾ ཏ་དུ་པཱ་དཱ་ནཾ. ས་ཨུ་པཱ་དཱ་ནོ, ཨཱ་ན་ནྡ, བྷི་ཀྑུ ན པ་རི་ནི་བྦཱ་ཡ་ཏཱི’’ཏི. ‘‘ཀ་ཧཾ པ་ན སོ, བྷ་ནྟེ, བྷི་ཀྑུ ཨུ་པཱ་དི་ཡ་མཱ་ནོ ཨུ་པཱ་དི་ཡ་ཏཱི’’ཏི? ‘‘ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ, ཨཱ་ན་ནྡཱ’’ཏི. ‘‘ཨུ་པཱ་དཱ་ན་སེ་ཊྛཾ ཀི་ར སོ, བྷ་ནྟེ, བྷི་ཀྑུ ཨུ་པཱ་དི་ཡ་མཱ་ནོ ཨུ་པཱ་དི་ཡ་ཏཱི’’ཏི? ‘‘ཨུ་པཱ་དཱ་ན་སེ་ཊྛ་ཉྷི སོ, ཨཱ་ན་ནྡ, བྷི་ཀྑུ ཨུ་པཱ་དི་ཡ་མཱ་ནོ ཨུ་པཱ་དི་ཡ་ཏི. ཨུ་པཱ་དཱ་ན་སེ་ཊྛ་ཉྷེ་ཏཾ, ཨཱ་ན་ནྡ, ཡ་དི་དཾ – ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ’’.

༧༢. ‘‘ཨི་དྷཱ་ན་ནྡ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ, ནོ ཙ མེ སི་ཡཱ; ན བྷ་ཝི་སྶ་ཏི, ན མེ བྷ་ཝི་སྶ་ཏི; ཡ་ད་ཏྠི, ཡཾ བྷཱུ་ཏཾ – ཏཾ པ་ཛ་ཧཱ་མཱི’ཏི. ཨེ་ཝཾ ཨུ་པེ་ཀྑཾ པ་ཊི་ལ་བྷ་ཏི. སོ ཏཾ ཨུ་པེ་ཀྑཾ ནཱ་བྷི་ན་ནྡ་ཏི, ནཱ་བྷི་ཝ་ད་ཏི, ན ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨུ་པེ་ཀྑཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ན ཏ་ནྣི་སྶི་ཏཾ ཧོ་ཏི ཝི་ཉྙཱ་ཎཾ ན ཏ་དུ་པཱ་དཱ་ནཾ. ཨ་ནུ་པཱ་དཱ་ནོ, ཨཱ་ན་ནྡ, བྷི་ཀྑུ པ་རི་ནི་བྦཱ་ཡ་ཏཱི’’ཏི.

༧༣. ‘‘ཨ་ཙྪ་རི་ཡཾ, བྷ་ནྟེ, ཨ་བྦྷུ་ཏཾ, བྷ་ནྟེ! ནི་སྶཱ་ཡ ནི་སྶཱ་ཡ ཀི་ར ནོ, བྷ་ནྟེ, བྷ་ག་ཝ་ཏཱ ཨོ་གྷ་སྶ ནི་ཏྠ་ར་ཎཱ ཨ་ཀྑཱ་ཏཱ. ཀ་ཏ་མོ པ་ན, བྷ་ནྟེ, ཨ་རི་ཡོ ཝི་མོ་ཀྑོ’’ཏི? ‘‘ཨི་དྷཱ་ན་ནྡ, བྷི་ཀྑུ ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡེ ཙ དི་ཊྛ་དྷ་མྨི་ཀཱ ཀཱ་མཱ, ཡེ ཙ ས་མྤ་རཱ་ཡི་ཀཱ ཀཱ་མཱ; ཡཱ ཙ དི་ཊྛ་དྷ་མྨི་ཀཱ ཀཱ་མ་ས་ཉྙཱ, ཡཱ ཙ ས་མྤ་རཱ་ཡི་ཀཱ ཀཱ་མ་ས་ཉྙཱ; ཡེ ཙ དི་ཊྛ་དྷ་མྨི་ཀཱ རཱུ་པཱ, ཡེ ཙ ས་མྤ་རཱ་ཡི་ཀཱ རཱུ་པཱ; ཡཱ ཙ དི་ཊྛ་དྷ་མྨི་ཀཱ རཱུ་པ་ས་ཉྙཱ, ཡཱ ཙ ས་མྤ་རཱ་ཡི་ཀཱ རཱུ་པ་ས་ཉྙཱ; ཡཱ ཙ ཨཱ་ནེ་ཉྫ་ས་ཉྙཱ, ཡཱ ཙ ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ, ཡཱ ཙ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་ཉྙཱ – ཨེ་ས ས་ཀྐཱ་ཡོ ཡཱ་ཝ་ཏཱ ས་ཀྐཱ་ཡོ. ཨེ་ཏཾ ཨ་མ་ཏཾ ཡ་དི་དཾ ཨ་ནུ་པཱ་དཱ ཙི་ཏྟ་སྶ ཝི་མོ་ཀྑོ. ཨི་ཏི, ཁོ, ཨཱ་ན་ནྡ, དེ་སི་ཏཱ མ་ཡཱ ཨཱ་ནེ་ཉྫ་ས་པྤཱ་ཡཱ པ་ཊི་པ་དཱ, དེ་སི་ཏཱ ཨཱ་ཀི་ཉྩ་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ, དེ་སི་ཏཱ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་པྤཱ་ཡཱ པ་ཊི་པ་དཱ, དེ་སི་ཏཱ ནི་སྶཱ་ཡ ནི་སྶཱ་ཡ ཨོ་གྷ་སྶ ནི་ཏྠ་ར་ཎཱ, དེ་སི་ཏོ ཨ་རི་ཡོ ཝི་མོ་ཀྑོ. ཡཾ ཁོ, ཨཱ་ན་ནྡ, ས་ཏྠཱ་རཱ ཀ་ར་ཎཱི་ཡཾ སཱ་ཝ་ཀཱ་ནཾ ཧི་ཏེ་སི་ནཱ ཨ་ནུ་ཀ་མྤ་ཀེ་ན ཨ་ནུ་ཀ་མྤཾ ཨུ་པཱ་དཱ་ཡ, ཀ་ཏཾ ཝོ ཏཾ མ་ཡཱ. ཨེ་ཏཱ་ནི, ཨཱ་ན་ནྡ, རུ་ཀྑ་མཱུ་ལཱ་ནི, ཨེ་ཏཱ་ནི སུ་ཉྙཱ་གཱ་རཱ་ནི. ཛྷཱ་ཡ་ཐཱ་ན་ནྡ, མཱ པ་མཱ་ད་ཏྠ, མཱ པ་ཙྪཱ ཝི་པྤ་ཊི་སཱ་རི་ནོ ཨ་ཧུ་ཝ་ཏྠ. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱི’’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡཱི་ཏི.

ཨཱ་ནེ་ཉྫ་ས་པྤཱ་ཡ་སུ་ཏྟཾ ནི་ཊྛི་ཏཾ ཚ་ཊྛཾ.