༡༠. ཙཱུ་ལ༹་པུ་ཎྞ་མ་སུ་ཏྟཾ
༩༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ད་ཧུ་པོ་ས་ཐེ པ་ནྣ་ར་སེ པུ་ཎྞཱ་ཡ པུ་ཎྞ་མཱ་ཡ ར་ཏྟི་ཡཱ བྷི་ཀྑུ་ས་ངྒྷ་པ་རི་ཝུ་ཏོ ཨ་བྦྷོ་ཀཱ་སེ ནི་སི་ནྣོ ཧོ་ཏི. ཨ་ཐ ཁོ བྷ་ག་ཝཱ ཏུ་ཎྷཱི་བྷཱུ་ཏཾ ཏུ་ཎྷཱི་བྷཱུ་ཏཾ བྷི་ཀྑུ་ས་ངྒྷཾ ཨ་ནུ་ཝི་ལོ་ཀེ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཛཱ་ནེ་ཡྻ ནུ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་སཾ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ནོ ཧེ་ཏཾ, བྷ་ནྟེ’’. ‘‘སཱ་དྷུ, བྷི་ཀྑ་ཝེ; ཨ་ཊྛཱ་ན་མེ་ཏཾ, བྷི་ཀྑ་ཝེ, ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ‘ཨ་ས་པྤུ་རི་སོ ཨ་ཡཾ བྷ་ཝ’ནྟི. ཛཱ་ནེ་ཡྻ པ་ན, བྷི་ཀྑ་ཝེ, ཨ་ས་པྤུ་རི་སོ ས་པྤུ་རི་སཾ – ‘ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ནོ ཧེ་ཏཾ, བྷ་ནྟེ’’. ‘‘སཱ་དྷུ, བྷི་ཀྑ་ཝེ; ཨེ་ཏ་མྤི ཁོ, བྷི་ཀྑ་ཝེ, ཨ་ཊྛཱ་ནཾ ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ‘ས་པྤུ་རི་སོ ཨ་ཡཾ བྷ་ཝ’ནྟི. ཨ་ས་པྤུ་རི་སོ, བྷི་ཀྑ་ཝེ, ཨ་སྶ་དྡྷ་མྨ་ས་མ་ནྣཱ་ག་ཏོ ཧོ་ཏི, ཨ་ས་པྤུ་རི་ས་བྷ་ཏྟི [ཨ་ས་པྤུ་རི་ས་བྷ་ཏྟཱི (ས་བྦ་ཏྠ)] ཧོ་ཏི, ཨ་ས་པྤུ་རི་ས་ཙི་ནྟཱི ཧོ་ཏི, ཨ་ས་པྤུ་རི་ས་མ་ནྟཱི ཧོ་ཏི, ཨ་ས་པྤུ་རི་ས་ཝཱ་ཙོ ཧོ་ཏི, ཨ་ས་པྤུ་རི་ས་ཀ་མྨ་ནྟོ ཧོ་ཏི, ཨ་ས་པྤུ་རི་ས་དི་ཊྛི [ཨ་ས་པྤུ་རི་ས་དི་ཊྛཱི (ས་བྦ་ཏྠ)] ཧོ་ཏི; ཨ་ས་པྤུ་རི་ས་དཱ་ནཾ དེ་ཏི’’.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་སྶ་དྡྷ་མྨ་ས་མ་ནྣཱ་ག་ཏོ ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ ཨ་སྶ་དྡྷོ ཧོ་ཏི, ཨ་ཧི་རི་ཀོ ཧོ་ཏི, ཨ་ནོ་ཏྟ་པྤཱི ཧོ་ཏི, ཨ་པྤ་སྶུ་ཏོ ཧོ་ཏི, ཀུ་སཱི་ཏོ ཧོ་ཏི, མུ་ཊྛ་སྶ་ཏི ཧོ་ཏི, དུ་པྤ་ཉྙོ ཧོ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་སྶ་དྡྷ་མྨ་ས་མ་ནྣཱ་ག་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་བྷ་ཏྟི ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་ས་སྶ ཡེ ཏེ ས་མ་ཎ་བྲཱ་ཧྨ་ཎཱ ཨ་སྶ་དྡྷཱ ཨ་ཧི་རི་ཀཱ ཨ་ནོ་ཏྟ་པྤི་ནོ ཨ་པྤ་སྶུ་ཏཱ ཀུ་སཱི་ཏཱ མུ་ཊྛ་སྶ་ཏི་ནོ དུ་པྤ་ཉྙཱ ཏྱཱ་སྶ མི་ཏྟཱ ཧོ་ནྟི ཏེ ས་ཧཱ་ཡཱ. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་བྷ་ཏྟི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཙི་ནྟཱི ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ ཨ་ཏྟ་བྱཱ་བཱ་དྷཱ་ཡ་པི ཙེ་ཏེ་ཏི, པ་ར་བྱཱ་བཱ་དྷཱ་ཡ་པི ཙེ་ཏེ་ཏི, ཨུ་བྷ་ཡ་བྱཱ་བཱ་དྷཱ་ཡ་པི ཙེ་ཏེ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཙི་ནྟཱི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་མ་ནྟཱི ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ ཨ་ཏྟ་བྱཱ་བཱ་དྷཱ་ཡ་པི མ་ནྟེ་ཏི, པ་ར་བྱཱ་བཱ་དྷཱ་ཡ་པི མ་ནྟེ་ཏི, ཨུ་བྷ་ཡ་བྱཱ་བཱ་དྷཱ་ཡ་པི མ་ནྟེ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་མ་ནྟཱི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཝཱ་ཙོ ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ མུ་སཱ་ཝཱ་དཱི ཧོ་ཏི, པི་སུ་ཎ་ཝཱ་ཙོ ཧོ་ཏི, ཕ་རུ་ས་ཝཱ་ཙོ ཧོ་ཏི, ས་མྥ་པྤ་ལཱ་པཱི ཧོ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཝཱ་ཙོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཀ་མྨ་ནྟོ ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ པཱ་ཎཱ་ཏི་པཱ་ཏཱི ཧོ་ཏི, ཨ་དི་ནྣཱ་དཱ་ཡཱི ཧོ་ཏི, ཀཱ་མེ་སུ་མི་ཙྪཱ་ཙཱ་རཱི ཧོ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་ཀ་མྨ་ནྟོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་དི་ཊྛི ཧོ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ ཨེ་ཝཾ་དི་ཊྛི [ཨེ་ཝཾ་དི་ཊྛཱི (སཱི. པཱི.), ཨེ་ཝཾ་དི་ཊྛི་ཀོ (སྱཱ. ཀཾ.)] ཧོ་ཏི – ‘ན་ཏྠི དི་ནྣཾ, ན་ཏྠི ཡི་ཊྛཾ, ན་ཏྠི ཧུ་ཏཾ, ན་ཏྠི སུ་ཀ་ཏ་དུ་ཀྐ་ཊཱ་ནཾ [སུ་ཀྐ་ཊ་དུ་ཀྐ་ཊཱ་ནཾ (སཱི. པཱི.)] ཀ་མྨཱ་ནཾ ཕ་ལཾ ཝི་པཱ་ཀོ, ན་ཏྠི ཨ་ཡཾ ལོ་ཀོ, ན་ཏྠི པ་རོ ལོ་ཀོ, ན་ཏྠི མཱ་ཏཱ, ན་ཏྠི པི་ཏཱ, ན་ཏྠི ས་ཏྟཱ ཨོ་པ་པཱ་ཏི་ཀཱ, ན་ཏྠི ལོ་ཀེ ས་མ་ཎ་བྲཱ་ཧྨ་ཎཱ ས་མྨ་གྒ་ཏཱ [ས་མ་གྒ་ཏཱ (ཀ.)] ས་མྨཱ་པ་ཊི་པ་ནྣཱ, ཡེ ཨི་མ་ཉྩ ལོ་ཀཾ པ་ར་ཉྩ ལོ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ནྟཱི’ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་དི་ཊྛི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་དཱ་ནཾ དེ་ཏི? ཨི་དྷ, བྷི་ཀྑ་ཝེ, ཨ་ས་པྤུ་རི་སོ ཨ་ས་ཀྐ་ཙྩཾ དཱ་ནཾ དེ་ཏི, ཨ་ས་ཧ་ཏྠཱ དཱ་ནཾ དེ་ཏི, ཨ་ཙི་ཏྟཱི་ཀ་ཏྭཱ དཱ་ནཾ དེ་ཏི, ཨ་པ་ཝི་ཊྛཾ དཱ་ནཾ དེ་ཏི ཨ་ནཱ་ག་མ་ན་དི་ཊྛི་ཀོ དཱ་ནཾ དེ་ཏི. ཨེ་ཝཾ ཁོ, བྷི་ཀྑ་ཝེ, ཨ་ས་པྤུ་རི་སོ ཨ་ས་པྤུ་རི་ས་དཱ་ནཾ དེ་ཏི.
‘‘སོ, བྷི་ཀྑ་ཝེ, ཨ་ས་པྤུ་རི་སོ ཨེ་ཝཾ ཨ་སྶ་དྡྷ་མྨ་ས་མ་ནྣཱ་ག་ཏོ, ཨེ་ཝཾ ཨ་ས་པྤུ་རི་ས་བྷ་ཏྟི, ཨེ་ཝཾ ཨ་ས་པྤུ་རི་ས་ཙི་ནྟཱི, ཨེ་ཝཾ ཨ་ས་པྤུ་རི་ས་མ་ནྟཱི, ཨེ་ཝཾ ཨ་ས་པྤུ་རི་ས་ཝཱ་ཙོ, ཨེ་ཝཾ ཨ་ས་པྤུ་རི་ས་ཀ་མྨ་ནྟོ, ཨེ་ཝཾ ཨ་ས་པྤུ་རི་ས་དི་ཊྛི; ཨེ་ཝཾ ཨ་ས་པྤུ་རི་ས་དཱ་ནཾ ད་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཡཱ ཨ་ས་པྤུ་རི་སཱ་ནཾ ག་ཏི ཏ་ཏྠ ཨུ་པ་པ་ཛྫ་ཏི. ཀཱ ཙ, བྷི་ཀྑ་ཝེ, ཨ་ས་པྤུ་རི་སཱ་ནཾ ག་ཏི? ནི་ར་ཡོ ཝཱ ཏི་ར་ཙྪཱ་ན་ཡོ་ནི ཝཱ.
༩༢. ‘‘ཛཱ་ནེ་ཡྻ ནུ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་སཾ – ‘ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཨེ་ཝཾ, བྷ་ནྟེ’’. ‘‘སཱ་དྷུ, བྷི་ཀྑ་ཝེ; ཋཱ་ན་མེ་ཏཾ, བྷི་ཀྑ་ཝེ, ཝི་ཛྫ་ཏི ཡཾ ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ‘ས་པྤུ་རི་སོ ཨ་ཡཾ བྷ་ཝ’ནྟི. ཛཱ་ནེ་ཡྻ པ་ན, བྷི་ཀྑ་ཝེ, ས་པྤུ་རི་སོ ཨ་ས་པྤུ་རི་སཾ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཨེ་ཝཾ, བྷ་ནྟེ’’. ‘‘སཱ་དྷུ, བྷི་ཀྑ་ཝེ; ཨེ་ཏ་མྤི ཁོ, བྷི་ཀྑ་ཝེ, ཋཱ་ནཾ ཝི་ཛྫ་ཏི ཡཾ ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ‘ཨ་ས་པྤུ་རི་སོ ཨ་ཡཾ བྷ་ཝ’ནྟི. ས་པྤུ་རི་སོ, བྷི་ཀྑ་ཝེ, ས་དྡྷ་མྨ་ས་མ་ནྣཱ་ག་ཏོ ཧོ་ཏི, ས་པྤུ་རི་ས་བྷ་ཏྟི ཧོ་ཏི, ས་པྤུ་རི་ས་ཙི་ནྟཱི ཧོ་ཏི, ས་པྤུ་རི་ས་མ་ནྟཱི ཧོ་ཏི, ས་པྤུ་རི་ས་ཝཱ་ཙོ ཧོ་ཏི, ས་པྤུ་རི་ས་ཀ་མྨ་ནྟོ ཧོ་ཏི, ས་པྤུ་རི་ས་དི་ཊྛི ཧོ་ཏི; ས་པྤུ་རི་ས་དཱ་ནཾ དེ་ཏི’’.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་དྡྷ་མྨ་ས་མ་ནྣཱ་ག་ཏོ ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ ས་དྡྷོ ཧོ་ཏི, ཧི་རི་མཱ ཧོ་ཏི, ཨོ་ཏྟ་པྤཱི ཧོ་ཏི, བ་ཧུ་སྶུ་ཏོ ཧོ་ཏི, ཨཱ་ར་དྡྷ་ཝཱི་རི་ཡོ ཧོ་ཏི, ཨུ་པ་ཊྛི་ཏ་སྶ་ཏི ཧོ་ཏི, པ་ཉྙ་ཝཱ ཧོ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་དྡྷ་མྨ་ས་མ་ནྣཱ་ག་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་བྷ་ཏྟི ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་ས་སྶ ཡེ ཏེ ས་མ་ཎ་བྲཱ་ཧྨ་ཎཱ ས་དྡྷཱ ཧི་རི་མ་ནྟོ ཨོ་ཏྟ་པྤི་ནོ བ་ཧུ་སྶུ་ཏཱ ཨཱ་ར་དྡྷ་ཝཱི་རི་ཡཱ ཨུ་པ་ཊྛི་ཏ་སྶ་ཏི་ནོ པ་ཉྙ་ཝ་ནྟོ ཏྱཱ་སྶ མི་ཏྟཱ ཧོ་ནྟི, ཏེ ས་ཧཱ་ཡཱ. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་བྷ་ཏྟི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཙི་ནྟཱི ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ ནེ་ཝ་ཏྟ་བྱཱ་བཱ་དྷཱ་ཡ ཙེ་ཏེ་ཏི, ན པ་ར་བྱཱ་བཱ་དྷཱ་ཡ ཙེ་ཏེ་ཏི, ན ཨུ་བྷ་ཡ་བྱཱ་བཱ་དྷཱ་ཡ ཙེ་ཏེ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཙི་ནྟཱི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་མ་ནྟཱི ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ ནེ་ཝ་ཏྟ་བྱཱ་བཱ་དྷཱ་ཡ མ་ནྟེ་ཏི, ན པ་ར་བྱཱ་བཱ་དྷཱ་ཡ མ་ནྟེ་ཏི, ན ཨུ་བྷ་ཡ་བྱཱ་བཱ་དྷཱ་ཡ མ་ནྟེ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་མ་ནྟཱི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཝཱ་ཙོ ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, པི་སུ་ཎཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ཕ་རུ་སཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ས་མྥ་པྤ་ལཱ་པཱ པ་ཊི་ཝི་ར་ཏོ ཧོ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཝཱ་ཙོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཀ་མྨ་ནྟོ ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, ཀཱ་མེ་སུ་མི་ཙྪཱ་ཙཱ་རཱ པ་ཊི་ཝི་ར་ཏོ ཧོ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་ཀ་མྨ་ནྟོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་དི་ཊྛི ཧོ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ ཨེ་ཝཾ་དི་ཊྛི ཧོ་ཏི – ‘ཨ་ཏྠི དི་ནྣཾ, ཨ་ཏྠི ཡི་ཊྛཾ, ཨ་ཏྠི ཧུ་ཏཾ, ཨ་ཏྠི སུ་ཀ་ཏ་དུ་ཀྐ་ཊཱ་ནཾ ཀ་མྨཱ་ནཾ ཕ་ལཾ ཝི་པཱ་ཀོ, ཨ་ཏྠི ཨ་ཡཾ ལོ་ཀོ, ཨ་ཏྠི པ་རོ ལོ་ཀོ, ཨ་ཏྠི མཱ་ཏཱ, ཨ་ཏྠི པི་ཏཱ, ཨ་ཏྠི ས་ཏྟཱ ཨོ་པ་པཱ་ཏི་ཀཱ, ཨ་ཏྠི ལོ་ཀེ ས་མ་ཎ་བྲཱ་ཧྨ་ཎཱ ས་མྨ་གྒ་ཏཱ ས་མྨཱ་པ་ཊི་པ་ནྣཱ ཡེ ཨི་མ་ཉྩ ལོ་ཀཾ པ་ར་ཉྩ ལོ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ནྟཱི’ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་དི་ཊྛི ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་དཱ་ནཾ དེ་ཏི? ཨི་དྷ, བྷི་ཀྑ་ཝེ, ས་པྤུ་རི་སོ ས་ཀྐ་ཙྩཾ དཱ་ནཾ དེ་ཏི, ས་ཧ་ཏྠཱ དཱ་ནཾ དེ་ཏི, ཙི་ཏྟཱི་ཀ་ཏྭཱ དཱ་ནཾ དེ་ཏི, ཨ་ན་པ་ཝི་ཊྛཾ དཱ་ནཾ དེ་ཏི, ཨཱ་ག་མ་ན་དི་ཊྛི་ཀོ དཱ་ནཾ དེ་ཏི. ཨེ་ཝཾ ཁོ, བྷི་ཀྑ་ཝེ, ས་པྤུ་རི་སོ ས་པྤུ་རི་ས་དཱ་ནཾ དེ་ཏི.
‘‘སོ, བྷི་ཀྑ་ཝེ, ས་པྤུ་རི་སོ ཨེ་ཝཾ ས་དྡྷ་མྨ་ས་མ་ནྣཱ་ག་ཏོ, ཨེ་ཝཾ ས་པྤུ་རི་ས་བྷ་ཏྟི, ཨེ་ཝཾ ས་པྤུ་རི་ས་ཙི་ནྟཱི, ཨེ་ཝཾ ས་པྤུ་རི་ས་མ་ནྟཱི, ཨེ་ཝཾ ས་པྤུ་རི་ས་ཝཱ་ཙོ, ཨེ་ཝཾ ས་པྤུ་རི་ས་ཀ་མྨ་ནྟོ, ཨེ་ཝཾ ས་པྤུ་རི་ས་དི་ཊྛི; ཨེ་ཝཾ ས་པྤུ་རི་ས་དཱ་ནཾ ད་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཡཱ ས་པྤུ་རི་སཱ་ནཾ ག་ཏི ཏ་ཏྠ ཨུ་པ་པ་ཛྫ་ཏི. ཀཱ ཙ, བྷི་ཀྑ་ཝེ, ས་པྤུ་རི་སཱ་ནཾ ག་ཏི? དེ་ཝ་མ་ཧ་ཏྟ་ཏཱ ཝཱ མ་ནུ་སྶ་མ་ཧ་ཏྟ་ཏཱ ཝཱ’’ཏི.
ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནཱ ཏེ བྷི་ཀྑཱུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡུ་ནྟི.
ཙཱུ་ལ༹་པུ་ཎྞ་མ་སུ་ཏྟཾ ནི་ཊྛི་ཏཾ ད་ས་མཾ.
དེ་ཝ་ད་ཧ་ཝ་གྒོ ནི་ཊྛི་ཏོ པ་ཋ་མོ.