༡༠. ས་ངྒཱ་ར་ཝ་སུ་ཏྟཾ

༤༧༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་ལེ་སུ ཙཱ་རི་ཀཾ ཙ་ར་ཏི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ. ཏེ་ན ཁོ པ་ན ས་མ་ཡེ་ན དྷ་ན་ཉྫཱ་ནཱི [དྷཱ་ན་ཉྫཱ་ནཱི (སཱི. པཱི.)] ནཱ་མ བྲཱ་ཧྨ་ཎཱི ཙ་ཉྩ་ལི་ཀ་པྤེ [མ་ཎྜ་ལ་ཀ་པྤེ (སཱི.), པ་ཙྩ་ལ་ཀ་པྤེ (སྱཱ. ཀཾ.), ཙ་ཎྜ་ལ་ཀ་པྤེ (པཱི.)] པ་ཊི་ཝ་ས་ཏི ཨ་བྷི་པྤ་ས་ནྣཱ བུ་དྡྷེ ཙ དྷ་མྨེ ཙ ས་ངྒྷེ ཙ. ཨ་ཐ ཁོ དྷ་ན་ཉྫཱ་ནཱི བྲཱ་ཧྨ་ཎཱི ཨུ་པ་ཀྑ་ལི་ཏྭཱ ཏི་ཀྑ་ཏྟུཾ ཨུ་དཱ་ནཾ ཨུ་དཱ་ནེ་སི – ‘‘ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶཱ’’ཏི.

ཏེ་ན ཁོ པ་ན ས་མ་ཡེ་ན ས་ངྒཱ་ར་ཝོ ནཱ་མ མཱ་ཎ་ཝོ ཙ་ཉྩ་ལི་ཀ་པྤེ པ་ཊི་ཝ་ས་ཏི ཏི་ཎྞཾ ཝེ་དཱ་ནཾ པཱ་ར་གཱུ ས་ནི་གྷ་ཎྜུ་ཀེ་ཊུ་བྷཱ་ནཾ སཱ་ཀྑ་ར་པྤ་བྷེ་དཱ་ནཾ ཨི་ཏི་ཧཱ་ས་པ་ཉྩ་མཱ་ནཾ, པ་ད་ཀོ, ཝེ་ཡྻཱ་ཀ་ར་ཎོ, ལོ་ཀཱ་ཡ་ཏ་མ་ཧཱ་པུ་རི་ས་ལ་ཀྑ་ཎེ་སུ ཨ་ན་ཝ་ཡོ. ཨ་སྶོ་སི ཁོ ས་ངྒཱ་ར་ཝོ མཱ་ཎ་ཝོ དྷ་ན་ཉྫཱ་ནི་ཡཱ བྲཱ་ཧྨ་ཎི་ཡཱ ཨེ་ཝཾ ཝཱ་ཙཾ བྷཱ་ས་མཱ་ནཱ་ཡ. སུ་ཏྭཱ དྷ་ན་ཉྫཱ་ནིཾ བྲཱ་ཧྨ་ཎིཾ ཨེ་ཏ་ད་ཝོ་ཙ – ‘‘ཨ་ཝ་བྷཱུ་ཏཱ་ཝ ཨ་ཡཾ [ཨ་ཝ་བྷཱུ་ཏཱ ཙ་ཡཾ (སཱི. སྱཱ. ཀཾ. པཱི.)] དྷ་ན་ཉྫཱ་ནཱི བྲཱ་ཧྨ་ཎཱི, པ་ར་བྷཱུ་ཏཱ་ཝ ཨ་ཡཾ [པ་རཱ་བྷཱུ་ཏཱ ཙ་ཡཾ (སཱི. སྱཱ. ཀཾ. པཱི.)] དྷ་ན་ཉྫཱ་ནཱི བྲཱ་ཧྨ་ཎཱི, ཝི་ཛྫ་མཱ་ནཱ་ནཾ (ཏེ་ཝི་ཛྫཱ་ནཾ) [( ) སཱི. སྱཱ. ཀཾ. པཱི. པོ་ཏྠ་ཀེ་སུ ན་ཏྠི] བྲཱ་ཧྨ་ཎཱ་ནཾ, ཨ་ཐ ཙ པ་ན ཏ་སྶ མུ་ཎྜ་ཀ་སྶ ས་མ་ཎ་ཀ་སྶ ཝ་ཎྞཾ བྷཱ་སི་སྶ་ཏཱི’’ཏི [བྷཱ་ས་ཏཱི་ཏི (སཱི. སྱཱ. ཀཾ. པཱི)]. ‘‘ན ཧི པ་ན ཏྭཾ, ཏཱ་ཏ བྷ་དྲ་མུ་ཁ, ཏ་སྶ བྷ་ག་ཝ་ཏོ སཱི་ལ་པ་ཉྙཱ་ཎཾ ཛཱ་ནཱ་སི. ས་ཙེ ཏྭཾ, ཏཱ་ཏ བྷ་དྲ་མུ་ཁ, ཏ་སྶ བྷ་ག་ཝ་ཏོ སཱི་ལ་པ་ཉྙཱ་ཎཾ ཛཱ་ནེ་ཡྻཱ་སི, ན ཏྭཾ, ཏཱ་ཏ བྷ་དྲ་མུ་ཁ, ཏཾ བྷ་ག་ཝ་ནྟཾ ཨ་ཀྐོ་སི་ཏ་བྦཾ པ་རི་བྷཱ་སི་ཏ་བྦཾ མ་ཉྙེ་ཡྻཱ་སཱི’’ཏི. ‘‘ཏེ་ན ཧི, བྷོ་ཏི, ཡ་དཱ ས་མ་ཎོ གོ་ཏ་མོ ཙ་ཉྩ་ལི་ཀ་པྤཾ ཨ་ནུ་པྤ་ཏྟོ ཧོ་ཏི ཨ་ཐ མེ ཨཱ་རོ་ཙེ་ཡྻཱ་སཱི’’ཏི. ‘‘ཨེ་ཝཾ, བྷ་དྲ་མུ་ཁཱ’’ཏི ཁོ དྷ་ན་ཉྫཱ་ནཱི བྲཱ་ཧྨ་ཎཱི ས་ངྒཱ་ར་ཝ་སྶ མཱ་ཎ་ཝ་སྶ པ་ཙྩ་སྶོ་སི.

ཨ་ཐ ཁོ བྷ་ག་ཝཱ ཀོ་ས་ལེ་སུ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཙ་ཉྩ་ལི་ཀ་པྤཾ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ ཙ་ཉྩ་ལི་ཀ་པྤེ ཝི་ཧ་ར་ཏི ཏོ་དེ་ཡྻཱ་ནཾ བྲཱ་ཧྨ་ཎཱ་ནཾ ཨ་མྦ་ཝ་ནེ. ཨ་སྶོ་སི ཁོ དྷ་ན་ཉྫཱ་ནཱི བྲཱ་ཧྨ་ཎཱི – ‘‘བྷ་ག་ཝཱ ཀི་ར ཙ་ཉྩ་ལི་ཀ་པྤཾ ཨ་ནུ་པྤ་ཏྟོ, ཙ་ཉྩ་ལི་ཀ་པྤེ ཝི་ཧ་ར་ཏི ཏོ་དེ་ཡྻཱ་ནཾ བྲཱ་ཧྨ་ཎཱ་ནཾ ཨ་མྦ་ཝ་ནེ’’ཏི. ཨ་ཐ ཁོ དྷ་ན་ཉྫཱ་ནཱི བྲཱ་ཧྨ་ཎཱི ཡེ་ན ས་ངྒཱ་ར་ཝོ མཱ་ཎ་ཝོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ས་ངྒཱ་ར་ཝཾ མཱ་ཎ་ཝཾ ཨེ་ཏ་ད་ཝོ་ཙ – ‘‘ཨ་ཡཾ, ཏཱ་ཏ བྷ་དྲ་མུ་ཁ, སོ བྷ་ག་ཝཱ ཙ་ཉྩ་ལི་ཀ་པྤཾ ཨ་ནུ་པྤ་ཏྟོ, ཙ་ཉྩ་ལི་ཀ་པྤེ ཝི་ཧ་ར་ཏི ཏོ་དེ་ཡྻཱ་ནཾ བྲཱ་ཧྨ་ཎཱ་ནཾ ཨ་མྦ་ཝ་ནེ. ཡ་སྶ་དཱ་ནི, ཏཱ་ཏ བྷ་དྲ་མུ་ཁ, ཀཱ་ལཾ མ་ཉྙ་སཱི’’ཏི.

༤༧༤. ‘‘ཨེ་ཝཾ, བྷོ’’ཏི ཁོ ས་ངྒཱ་ར་ཝོ མཱ་ཎ་ཝོ དྷ་ན་ཉྫཱ་ནི་ཡཱ བྲཱ་ཧྨ་ཎི་ཡཱ པ་ཊི་སྶུ་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ས་ངྒཱ་ར་ཝོ མཱ་ཎ་ཝོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ནྟི ཁོ, བྷོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི. ཏ་ཏྲ, བྷོ གོ་ཏ་མ, ཡེ ཏེ ས་མ་ཎ་བྲཱ་ཧྨ་ཎཱ དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི, ཏེ་སཾ བྷ་ཝཾ གོ་ཏ་མོ ཀ་ཏ་མོ’’ཏི? ‘‘དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ་ནཾ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟཱ་ན་མྤི ཁོ ཨ་ཧཾ, བྷཱ་ར་དྭཱ་ཛ, ཝེ་མ་ཏྟཾ ཝ་དཱ་མི. ས་ནྟི, བྷཱ་ར་དྭཱ་ཛ, ཨེ་ཀེ ས་མ་ཎ་བྲཱ་ཧྨ་ཎཱ ཨ་ནུ་སྶ་ཝི་ཀཱ. ཏེ ཨ་ནུ་སྶ་ཝེ་ན དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི; སེ་ཡྻ་ཐཱ་པི བྲཱ་ཧྨ་ཎཱ ཏེ་ཝི་ཛྫཱ. ས་ནྟི པ་ན, བྷཱ་ར་དྭཱ་ཛ, ཨེ་ཀེ ས་མ་ཎ་བྲཱ་ཧྨ་ཎཱ ཀེ་ཝ་ལཾ ས་དྡྷཱ་མ་ཏྟ་ཀེ་ན དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི; སེ་ཡྻ་ཐཱ་པི ཏ་ཀྐཱི ཝཱི་མཾ་སཱི. ས་ནྟི, བྷཱ་ར་དྭཱ་ཛ, ཨེ་ཀེ ས་མ་ཎ་བྲཱ་ཧྨ་ཎཱ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ སཱ་མཾ་ཡེ་ཝ དྷ་མྨཾ ཨ་བྷི་ཉྙཱ་ཡ དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི. ཏ་ཏྲ, བྷཱ་ར་དྭཱ་ཛ, ཡེ ཏེ ས་མ་ཎ་བྲཱ་ཧྨ་ཎཱ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ སཱ་མཾ་ཡེ་ཝ དྷ་མྨཾ ཨ་བྷི་ཉྙཱ་ཡ དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི, ཏེ་སཱ་ཧ་མ་སྨི. ཏ་ད་མི་ནཱ་པེ་ཏཾ, བྷཱ་ར་དྭཱ་ཛ, པ་རི་ཡཱ་ཡེ་ན ཝེ་དི་ཏ་བྦཾ, ཡ་ཐཱ ཡེ ཏེ ས་མ་ཎ་བྲཱ་ཧྨ་ཎཱ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ སཱ་མཾ་ཡེ་ཝ དྷ་མྨཾ ཨ་བྷི་ཉྙཱ་ཡ དི་ཊྛ་དྷ་མྨཱ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟཱ, ཨཱ་དི་བྲ་ཧྨ་ཙ་རི་ཡཾ པ་ཊི་ཛཱ་ན་ནྟི, ཏེ་སཱ་ཧ་མ་སྨི.

༤༧༥. ‘‘ཨི་དྷ མེ, བྷཱ་ར་དྭཱ་ཛ, པུ་བྦེ་ཝ ས་མྦོ་དྷཱ ཨ་ན་བྷི་ས་མྦུ་དྡྷ་སྶ བོ་དྷི་ས་ཏྟ་སྶེ་ཝ ས་ཏོ ཨེ་ཏ་ད་ཧོ་སི – ‘ས་མྦཱ་དྷོ གྷ་རཱ་ཝཱ་སོ ར་ཛཱ་པ་ཐོ, ཨ་བྦྷོ་ཀཱ་སོ པ་བྦ་ཛྫཱ. ན་ཡི་དཾ སུ་ཀ་རཾ ཨ་གཱ་རཾ ཨ་ཛ྄ཛྷཱ་ཝ་ས་ཏཱ ཨེ་ཀ་ནྟ་པ་རི་པུ་ཎྞཾ ཨེ་ཀ་ནྟ་པ་རི་སུ་དྡྷཾ ས་ངྑ་ལི་ཁི་ཏཾ བྲ་ཧྨ་ཙ་རི་ཡཾ ཙ་རི་ཏུཾ. ཡཾ་ནཱུ་ནཱ་ཧཾ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ཨ་པ་རེ་ན ས་མ་ཡེ་ན ད་ཧ་རོ་ཝ ས་མཱ་ནོ སུ་སུ་ཀཱ་ལ༹་ཀེ་སོ བྷ་དྲེ་ན ཡོ་བྦ་ནེ་ན ས་མ་ནྣཱ་ག་ཏོ པ་ཋ་མེ་ན ཝ་ཡ་སཱ ཨ་ཀཱ་མ་ཀཱ་ནཾ མཱ་ཏཱ་པི་ཏཱུ་ནཾ ཨ་སྶུ་མུ་ཁཱ་ནཾ རུ་ད་ནྟཱ་ནཾ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛིཾ. སོ ཨེ་ཝཾ པ་བྦ་ཛི་ཏོ ས་མཱ་ནོ ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཨི་ཙྪཱ་མ་ཧཾ, ཨཱ་ཝུ་སོ ཀཱ་ལཱ་མ, ཨི་མ་སྨིཾ དྷ་མྨ་ཝི་ན་ཡེ བྲ་ཧྨ་ཙ་རི་ཡཾ ཙ་རི་ཏུ’ནྟི. ཨེ་ཝཾ ཝུ་ཏྟེ, བྷཱ་ར་དྭཱ་ཛ, ཨཱ་ལཱ༹་རོ ཀཱ་ལཱ་མོ མཾ ཨེ་ཏ་ད་ཝོ་ཙ – ‘ཝི་ཧ་ར་ཏཱ་ཡ་སྨཱ. ཏཱ་དི་སོ ཨ་ཡཾ དྷ་མྨོ ཡ་ཏྠ ཝི་ཉྙཱུ པུ་རི་སོ ན་ཙི་ར་སྶེ་ཝ ས་ཀཾ ཨཱ་ཙ་རི་ཡ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རེ་ཡྻཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ པ་རི་ཡཱ་པུ་ཎིཾ. སོ ཁོ ཨ་ཧཾ, བྷཱ་ར་དྭཱ་ཛ, ཏཱ་ཝ་ཏ་ཀེ་ནེ་ཝ ཨོ་ཊྛ་པ་ཧ་ཏ་མ་ཏྟེ་ན ལ་པི་ཏ་ལཱ་པ་ན་མ་ཏྟེ་ན ‘ཉཱ་ཎ་ཝཱ་ད་ཉྩ ཝ་དཱ་མི, ཐེ་ར་ཝཱ་ད་ཉྩ ཛཱ་ནཱ་མི, པ་སྶཱ་མཱི’ཏི ཙ པ་ཊི་ཛཱ་ནཱ་མི, ཨ་ཧ་ཉྩེ་ཝ ཨ་ཉྙེ ཙ. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ ཨཱ་ལཱ༹་རོ ཀཱ་ལཱ་མོ ཨི་མཾ དྷ་མྨཾ ཀེ་ཝ་ལཾ ས་དྡྷཱ་མ་ཏྟ་ཀེ་ན ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་ཏི; ཨ་དྡྷཱ ཨཱ་ལཱ༹་རོ ཀཱ་ལཱ་མོ ཨི་མཾ དྷ་མྨཾ ཛཱ་ནཾ པ་སྶཾ ཝི་ཧ་ར་ཏཱི’ཏི.

‘‘ཨ་ཐ ཁྭཱ་ཧཾ, བྷཱ་ར་དྭཱ་ཛ, ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཀི་ཏྟཱ་ཝ་ཏཱ ནོ, ཨཱ་ཝུ་སོ ཀཱ་ལཱ་མ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སཱི’ཏི? ཨེ་ཝཾ ཝུ་ཏྟེ, བྷཱ་ར་དྭཱ་ཛ, ཨཱ་ལཱ༹་རོ ཀཱ་ལཱ་མོ ཨཱ་ཀི་ཉྩ་ཉྙཱ་ཡ་ཏ་ནཾ པ་ཝེ་དེ་སི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ས་དྡྷཱ, མ་ཡ྄ཧཾ་པ་ཏྠི ས་དྡྷཱ; ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ཝཱི་རི་ཡཾ…པེ… ས་ཏི… ས་མཱ་དྷི… པ་ཉྙཱ, མ་ཡ྄ཧཾ་པ་ཏྠི པ་ཉྙཱ. ཡཾ་ནཱུ་ནཱ་ཧཾ ཡཾ དྷ་མྨཾ ཨཱ་ལཱ༹་རོ ཀཱ་ལཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་ཏི ཏ་སྶ དྷ་མྨ་སྶ ས་ཙྪི་ཀི་རི་ཡཱ་ཡ པ་ད་ཧེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སིཾ. ཨ་ཐ ཁྭཱ་ཧཾ, བྷཱ་ར་དྭཱ་ཛ, ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཨེ་ཏྟཱ་ཝ་ཏཱ ནོ, ཨཱ་ཝུ་སོ ཀཱ་ལཱ་མ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི? ‘ཨེ་ཏྟཱ་ཝ་ཏཱ ཁོ ཨ་ཧཾ, ཨཱ་ཝུ་སོ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མཱི’ཏི. ‘ཨ་ཧ་མྤི ཁོ, ཨཱ་ཝུ་སོ, ཨེ་ཏྟཱ་ཝ་ཏཱ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི’ཏི. ‘ལཱ་བྷཱ ནོ, ཨཱ་ཝུ་སོ, སུ་ལ་དྡྷཾ ནོ, ཨཱ་ཝུ་སོ, ཡེ མ་ཡཾ ཨཱ་ཡ་སྨ་ནྟཾ ཏཱ་དི་སཾ ས་བྲ་ཧྨ་ཙཱ་རིཾ པ་སྶཱ་མ. ཨི་ཏི ཡཱ་ཧཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མི ཏཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི; ཡཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི ཏ་མ་ཧཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མི. ཨི་ཏི ཡཱ་ཧཾ དྷ་མྨཾ ཛཱ་ནཱ་མི ཏཾ ཏྭཾ དྷ་མྨཾ ཛཱ་ནཱ་སི, ཡཾ ཏྭཾ དྷ་མྨཾ ཛཱ་ནཱ་སི ཏ་མ་ཧཾ དྷ་མྨཾ ཛཱ་ནཱ་མི. ཨི་ཏི ཡཱ་དི་སོ ཨ་ཧཾ ཏཱ་དི་སོ ཏུ་ཝཾ, ཡཱ་དི་སོ ཏུ་ཝཾ ཏཱ་དི་སོ ཨ་ཧཾ. ཨེ་ཧི དཱ་ནི, ཨཱ་ཝུ་སོ, ཨུ་བྷོ་ཝ ས་ནྟཱ ཨི་མཾ ག་ཎཾ པ་རི་ཧ་རཱ་མཱ’ཏི. ཨི་ཏི ཁོ, བྷཱ་ར་དྭཱ་ཛ, ཨཱ་ལཱ༹་རོ ཀཱ་ལཱ་མོ ཨཱ་ཙ་རི་ཡོ མེ ས་མཱ་ནོ ཨ་ཏྟ་ནོ ཨ་ནྟེ་ཝཱ་སིཾ མཾ ས་མཱ་ནཾ ཨ་ཏྟ་ནཱ ས་མ་ས་མཾ ཋ་པེ་སི, ཨུ་ལཱ༹་རཱ་ཡ ཙ མཾ པཱུ་ཛཱ་ཡ པཱུ་ཛེ་སི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ནཱ་ཡཾ དྷ་མྨོ ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི, ཡཱ་ཝ་དེ་ཝ ཨཱ་ཀི་ཉྩ་ཉྙཱ་ཡ་ཏ་ནཱུ་པ་པ་ཏྟི་ཡཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ཏཾ དྷ་མྨཾ ཨ་ན་ལ་ངྐ་རི་ཏྭཱ ཏ་སྨཱ དྷ་མྨཱ ནི་བྦི་ཛྫ ཨ་པ་ཀྐ་མིཾ.

༤༧༦. ‘‘སོ ཁོ ཨ་ཧཾ, བྷཱ་ར་དྭཱ་ཛ, ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཨི་ཙྪཱ་མ་ཧཾ, ཨཱ་ཝུ་སོ [པ་སྶ མ. ནི. ༡.༢༧༨ པཱ་ས་རཱ་སི་སུ་ཏྟེ], ཨི་མ་སྨིཾ དྷ་མྨ་ཝི་ན་ཡེ བྲ་ཧྨ་ཙ་རི་ཡཾ ཙ་རི་ཏུ’ནྟི. ཨེ་ཝཾ ཝུ་ཏྟེ, བྷཱ་ར་དྭཱ་ཛ, ཨུ་ད་ཀོ རཱ་མ་པུ་ཏྟོ མཾ ཨེ་ཏ་ད་ཝོ་ཙ – ‘ཝི་ཧ་ར་ཏཱ་ཡ་སྨཱ. ཏཱ་དི་སོ ཨ་ཡཾ དྷ་མྨོ ཡ་ཏྠ ཝི་ཉྙཱུ པུ་རི་སོ ན་ཙི་ར་སྶེ་ཝ ས་ཀཾ ཨཱ་ཙ་རི་ཡ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རེ་ཡྻཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ པ་རི་ཡཱ་པུ་ཎིཾ. སོ ཁོ ཨ་ཧཾ, བྷཱ་ར་དྭཱ་ཛ, ཏཱ་ཝ་ཏ་ཀེ་ནེ་ཝ ཨོ་ཊྛ་པ་ཧ་ཏ་མ་ཏྟེ་ན ལ་པི་ཏ་ལཱ་པ་ན་མ་ཏྟེ་ན ‘ཉཱ་ཎ་ཝཱ་ད་ཉྩ ཝ་དཱ་མི, ཐེ་ར་ཝཱ་ད་ཉྩ ཛཱ་ནཱ་མི, པ་སྶཱ་མཱི’ཏི ཙ པ་ཊི་ཛཱ་ནཱ་མི, ཨ་ཧ་ཉྩེ་ཝ ཨ་ཉྙེ ཙ. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ རཱ་མོ ཨི་མཾ དྷ་མྨཾ ཀེ་ཝ་ལཾ ས་དྡྷཱ་མ་ཏྟ་ཀེ་ན ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སི; ཨ་དྡྷཱ རཱ་མོ ཨི་མཾ དྷ་མྨཾ ཛཱ་ནཾ པ་སྶཾ ཝི་ཧཱ་སཱི’ཏི. ཨ་ཐ ཁྭཱ་ཧཾ, བྷཱ་ར་དྭཱ་ཛ, ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཀི་ཏྟཱ་ཝ་ཏཱ ནོ, ཨཱ་ཝུ་སོ, རཱ་མོ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སཱི’ཏི? ཨེ་ཝཾ ཝུ་ཏྟེ, བྷཱ་ར་དྭཱ་ཛ, ཨུ་ད་ཀོ རཱ་མ་པུ་ཏྟོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ པ་ཝེ་དེ་སི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ རཱ་མ་སྶེ་ཝ ཨ་ཧོ་སི ས་དྡྷཱ, མ་ཡ྄ཧཾ་པ་ཏྠི ས་དྡྷཱ; ན ཁོ རཱ་མ་སྶེ་ཝ ཨ་ཧོ་སི ཝཱི་རི་ཡཾ…པེ… ས་ཏི… ས་མཱ་དྷི… པ་ཉྙཱ, མ་ཡ྄ཧཾ་པ་ཏྠི པ་ཉྙཱ. ཡཾ་ནཱུ་ནཱ་ཧཾ ཡཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སི ཏ་སྶ དྷ་མྨ་སྶ ས་ཙྪི་ཀི་རི་ཡཱ་ཡ པ་ད་ཧེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སིཾ.

‘‘ཨ་ཐ ཁྭཱ་ཧཾ, བྷཱ་ར་དྭཱ་ཛ, ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཨེ་ཏྟཱ་ཝ་ཏཱ ནོ, ཨཱ་ཝུ་སོ, རཱ་མོ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི? ‘ཨེ་ཏྟཱ་ཝ་ཏཱ ཁོ, ཨཱ་ཝུ་སོ, རཱ་མོ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི. ‘ཨ་ཧ་མྤི ཁོ, ཨཱ་ཝུ་སོ, ཨེ་ཏྟཱ་ཝ་ཏཱ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི’ཏི. ‘ལཱ་བྷཱ ནོ, ཨཱ་ཝུ་སོ, སུ་ལ་དྡྷཾ ནོ, ཨཱ་ཝུ་སོ, ཡེ མ་ཡཾ ཨཱ་ཡ་སྨ་ནྟཾ ཏཱ་དི་སཾ ས་བྲ་ཧྨ་ཙཱ་རིཾ པ་སྶཱ་མ. ཨི་ཏི ཡཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སི ཏཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི; ཡཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི ཏཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སི. ཨི་ཏི ཡཾ དྷ་མྨཾ རཱ་མོ ཨ་བྷི་ཉྙཱ་སི ཏཾ ཏྭཾ དྷ་མྨཾ ཛཱ་ནཱ་སི, ཡཾ ཏྭཾ དྷ་མྨཾ ཛཱ་ནཱ་སི ཏཾ དྷ་མྨཾ རཱ་མོ ཨ་བྷི་ཉྙཱ་སི. ཨི་ཏི ཡཱ་དི་སོ རཱ་མོ ཨ་ཧོ་སི ཏཱ་དི་སོ ཏུ་ཝཾ, ཡཱ་དི་སོ ཏུ་ཝཾ ཏཱ་དི་སོ རཱ་མོ ཨ་ཧོ་སི. ཨེ་ཧི དཱ་ནི, ཨཱ་ཝུ་སོ, ཏུ་ཝཾ ཨི་མཾ ག་ཎཾ པ་རི་ཧ་རཱ’ཏི. ཨི་ཏི ཁོ, བྷཱ་ར་དྭཱ་ཛ, ཨུ་ད་ཀོ རཱ་མ་པུ་ཏྟོ ས་བྲ་ཧྨ་ཙཱ་རཱི མེ ས་མཱ་ནོ ཨཱ་ཙ་རི་ཡ་ཊྛཱ་ནེ མཾ ཋ་པེ་སི, ཨུ་ལཱ༹་རཱ་ཡ ཙ མཾ པཱུ་ཛཱ་ཡ པཱུ་ཛེ་སི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ནཱ་ཡཾ དྷ་མྨོ ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི, ཡཱ་ཝ་དེ་ཝ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཱུ་པ་པ་ཏྟི་ཡཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ཏཾ དྷ་མྨཾ ཨ་ན་ལ་ངྐ་རི་ཏྭཱ ཏ་སྨཱ དྷ་མྨཱ ནི་བྦི་ཛྫ ཨ་པ་ཀྐ་མིཾ.

༤༧༧. ‘‘སོ ཁོ ཨ་ཧཾ, བྷཱ་ར་དྭཱ་ཛ, ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ མ་ག་དྷེ་སུ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཨུ་རུ་ཝེ་ལཱ༹ སེ་ནཱ་ནི་ག་མོ ཏ་ད་ཝ་ས་རིཾ. ཏ་ཏྠ་དྡ་སཾ ར་མ་ཎཱི་ཡཾ བྷཱུ་མི་བྷཱ་གཾ, པཱ་སཱ་དི་ཀ་ཉྩ ཝ་ན་ས་ཎྜཾ, ན་དི་ཉྩ ས་ནྡ་ནྟིཾ སེ་ཏ་ཀཾ སུ་པ་ཏི་ཏྠཾ ར་མ་ཎཱི་ཡཾ, ས་མ་ནྟཱ ཙ གོ་ཙ་ར་གཱ་མཾ. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ར་མ་ཎཱི་ཡོ ཝ་ཏ, བྷོ, བྷཱུ་མི་བྷཱ་གོ, པཱ་སཱ་དི་ཀོ ཙ ཝ་ན་ས་ཎྜོ, ན་དཱི ཙ ས་ནྡ་ཏི སེ་ཏ་ཀཱ སུ་པ་ཏི་ཏྠཱ ར་མ་ཎཱི་ཡཱ, ས་མ་ནྟཱ ཙ གོ་ཙ་ར་གཱ་མོ. ཨ་ལཾ ཝ་ཏི་དཾ ཀུ་ལ་པུ་ཏྟ་སྶ པ་དྷཱ་ན་ཏྠི་ཀ་སྶ པ་དྷཱ་ནཱ་ཡཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ཏ་ཏྠེ་ཝ ནི་སཱི་དིཾ – ‘ཨ་ལ་མི་དཾ པ་དྷཱ་ནཱ་ཡཱ’ཏི. ཨ་པི་སྶུ མཾ, བྷཱ་ར་དྭཱ་ཛ, ཏི་སྶོ ཨུ་པ་མཱ པ་ཊི་བྷཾ་སུ ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.

‘‘སེ་ཡྻ་ཐཱ་པི, བྷཱ་ར་དྭཱ་ཛ, ཨ་ལླཾ ཀ་ཊྛཾ ས་སྣེ་ཧཾ ཨུ་ད་ཀེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, བྷཱ་ར་དྭཱ་ཛ, ཨ་པི ནུ སོ པུ་རི་སོ ཨ་མུཾ ཨ་ལླཾ ཀ་ཊྛཾ ས་སྣེ་ཧཾ ཨུ་ད་ཀེ ནི་ཀྑི་ཏྟཾ ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ, ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ནོ ཧི་དཾ, བྷོ གོ་ཏ་མ. ཏཾ ཀི་སྶ ཧེ་ཏུ? ཨ་དུ་ཉྷི, བྷོ གོ་ཏ་མ, ཨ་ལླཾ ཀ་ཊྛཾ ས་སྣེ་ཧཾ, ཏ་ཉྩ པ་ན ཨུ་ད་ཀེ ནི་ཀྑི་ཏྟཾ; ཡཱ་ཝ་དེ་ཝ ཙ པ་ན སོ པུ་རི་སོ ཀི་ལ་མ་ཐ་སྶ ཝི་གྷཱ་ཏ་སྶ བྷཱ་གཱི ཨ་སྶཱ’’ཏི. ‘‘ཨེ་ཝ་མེ་ཝ ཁོ, བྷཱ་ར་དྭཱ་ཛ, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཨ་ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ སོ ཙ ཨ་ཛ྄ཛྷ་ཏྟཾ ན སུ་པྤ་ཧཱི་ནོ ཧོ་ཏི ན སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, བྷཱ་ར་དྭཱ་ཛ, པ་ཋ་མཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.

༤༧༨. ‘‘ཨ་པ་རཱ་པི ཁོ མཾ, བྷཱ་ར་དྭཱ་ཛ, དུ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. སེ་ཡྻ་ཐཱ་པི, བྷཱ་ར་དྭཱ་ཛ, ཨ་ལླཾ ཀ་ཊྛཾ ས་སྣེ་ཧཾ ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, བྷཱ་ར་དྭཱ་ཛ, ཨ་པི ནུ སོ པུ་རི་སོ ཨ་མུཾ ཨ་ལླཾ ཀ་ཊྛཾ ས་སྣེ་ཧཾ ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ནོ ཧི་དཾ, བྷོ གོ་ཏ་མ. ཏཾ ཀི་སྶ ཧེ་ཏུ? ཨ་དུ་ཉྷི, བྷོ གོ་ཏ་མ, ཨ་ལླཾ ཀ་ཊྛཾ ས་སྣེ་ཧཾ, ཀི་ཉྩཱ་པི ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ; ཡཱ་ཝ་དེ་ཝ ཙ པ་ན སོ པུ་རི་སོ ཀི་ལ་མ་ཐ་སྶ ཝི་གྷཱ་ཏ་སྶ བྷཱ་གཱི ཨ་སྶཱ’’ཏི. ‘‘ཨེ་ཝ་མེ་ཝ ཁོ, བྷཱ་ར་དྭཱ་ཛ, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ སོ ཙ ཨ་ཛ྄ཛྷ་ཏྟཾ ན སུ་པྤ་ཧཱི་ནོ ཧོ་ཏི ན སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, བྷཱ་ར་དྭཱ་ཛ, དུ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.

༤༧༩. ‘‘ཨ་པ་རཱ་པི ཁོ མཾ, བྷཱ་ར་དྭཱ་ཛ, ཏ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. སེ་ཡྻ་ཐཱ་པི, བྷཱ་ར་དྭཱ་ཛ, སུ་ཀྑཾ ཀ་ཊྛཾ ཀོ་ལཱ༹་པཾ ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, བྷཱ་ར་དྭཱ་ཛ, ཨ་པི ནུ སོ པུ་རི་སོ ཨ་མུཾ སུ་ཀྑཾ ཀ་ཊྛཾ ཀོ་ལཱ༹་པཾ ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ, ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ཨེ་ཝཾ བྷོ གོ་ཏ་མ. ཏཾ ཀི་སྶ ཧེ་ཏུ? ཨ་དུ་ཉྷི, བྷོ གོ་ཏ་མ, སུ་ཀྑཾ ཀ་ཊྛཾ ཀོ་ལཱ༹་པཾ, ཏ་ཉྩ པ་ན ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟ’’ནྟི. ‘‘ཨེ་ཝ་མེ་ཝ ཁོ, བྷཱ་ར་དྭཱ་ཛ, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ སོ ཙ ཨ་ཛ྄ཛྷ་ཏྟཾ སུ་པྤ་ཧཱི་ནོ ཧོ་ཏི སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, བྷཱ་ར་དྭཱ་ཛ, ཏ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. ཨི་མཱ ཁོ མཾ, བྷཱ་ར་དྭཱ་ཛ, ཏི་སྶོ ཨུ་པ་མཱ པ་ཊི་བྷཾ་སུ ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.

༤༨༠. ‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ད་ནྟེ་བྷི་ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷེ་ཡྻཾ ཨ་བྷི་ནི་པྤཱི་ལེ༹་ཡྻཾ ཨ་བྷི་ས་ནྟཱ་པེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ད་ནྟེ་བྷི་ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷཱ་མི ཨ་བྷི་ནི་པྤཱི་ལེ༹་མི ཨ་བྷི་ས་ནྟཱ་པེ་མི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ད་ནྟེ་བྷི་ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷ་ཏོ ཨ་བྷི་ནི་པྤཱི་ལ༹་ཡ་ཏོ ཨ་བྷི་ས་ནྟཱ་པ་ཡ་ཏོ ཀ་ཙྪེ་ཧི སེ་དཱ མུ་ཙྩ་ནྟི. སེ་ཡྻ་ཐཱ་པི, བྷཱ་ར་དྭཱ་ཛ, བ་ལ་ཝཱ པུ་རི་སོ དུ་བྦ་ལ་ཏ་རཾ པུ་རི་སཾ སཱི་སེ ཝཱ ག་ཧེ་ཏྭཱ ཁ་ནྡྷེ ཝཱ ག་ཧེ་ཏྭཱ ཨ་བྷི་ནི་གྒ་ཎྷེ་ཡྻ ཨ་བྷི་ནི་པྤཱི་ལེ༹་ཡྻ ཨ་བྷི་ས་ནྟཱ་པེ་ཡྻ, ཨེ་ཝ་མེ་ཝ ཁོ མེ, བྷཱ་ར་དྭཱ་ཛ, ད་ནྟེ་བྷི་ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷ་ཏོ ཨ་བྷི་ནི་པྤཱི་ལ༹་ཡ་ཏོ ཨ་བྷི་ས་ནྟཱ་པ་ཡ་ཏོ ཀ་ཙྪེ་ཧི སེ་དཱ མུ་ཙྩ་ནྟི. ཨཱ་ར་དྡྷཾ ཁོ པ་ན མེ, བྷཱ་ར་དྭཱ་ཛ, ཝཱི་རི་ཡཾ ཧོ་ཏི ཨ་ས་ལླཱི་ནཾ, ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ; སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ, ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ.

༤༨༡. ‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཨ་པྤཱ་ཎ་ཀཾ་ཡེ་ཝ ཛྷཱ་ནཾ ཛྷཱ་ཡེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ ཨུ་པ་རུ་ནྡྷིཾ. ཏ་སྶ མ་ཡ྄ཧཾ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཀ་ཎྞ་སོ་ཏེ་ཧི ཝཱ་ཏཱ་ནཾ ནི་ཀྑ་མ་ནྟཱ་ནཾ ཨ་དྷི་མ་ཏྟོ ས་དྡོ ཧོ་ཏི. སེ་ཡྻ་ཐཱ་པི ནཱ་མ ཀ་མྨཱ་ར་ག་གྒ་རི་ཡཱ དྷ་མ་མཱ་ནཱ་ཡ ཨ་དྷི་མ་ཏྟོ ས་དྡོ ཧོ་ཏི, ཨེ་ཝ་མེ་ཝ ཁོ མེ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཀ་ཎྞ་སོ་ཏེ་ཧི ཝཱ་ཏཱ་ནཾ ནི་ཀྑ་མ་ནྟཱ་ནཾ ཨ་དྷི་མ་ཏྟོ ས་དྡོ ཧོ་ཏི. ཨཱ་ར་དྡྷཾ ཁོ པ་ན མེ, བྷཱ་ར་དྭཱ་ཛ, ཝཱི་རི་ཡཾ ཧོ་ཏི ཨ་ས་ལླཱི་ནཾ, ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ; སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ, ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ.

‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཨ་པྤཱ་ཎ་ཀཾ་ཡེ་ཝ ཛྷཱ་ནཾ ཛྷཱ་ཡེ་ཡྻ’ནྟི. སོ ཁོ ཨ་ཧཾ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ ཨུ་པ་རུ་ནྡྷིཾ. ཏ་སྶ མ་ཡ྄ཧཾ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟོ ཀཱ་ཡ་སྨིཾ ཌཱ་ཧོ ཧོ་ཏི. སེ་ཡྻ་ཐཱ་པི, བྷཱ་ར་དྭཱ་ཛ, དྭེ བ་ལ་ཝ་ནྟོ པུ་རི་སཱ དུ་བྦ་ལ་ཏ་རཾ པུ་རི་སཾ ནཱ་ནཱ་བཱ་ཧཱ་སུ ག་ཧེ་ཏྭཱ ཨ་ངྒཱ་ར་ཀཱ་སུ་ཡཱ ས་ནྟཱ་པེ་ཡྻུཾ ས་མྤ་རི་ཏཱ་པེ་ཡྻུཾ, ཨེ་ཝ་མེ་ཝ ཁོ མེ, བྷཱ་ར་དྭཱ་ཛ, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟོ ཀཱ་ཡ་སྨིཾ ཌཱ་ཧོ ཧོ་ཏི. ཨཱ་ར་དྡྷཾ ཁོ པ་ན མེ, བྷཱ་ར་དྭཱ་ཛ, ཝཱི་རི་ཡཾ ཧོ་ཏི ཨ་ས་ལླཱི་ནཾ, ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ, སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ, ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ. ཨ་པི་སྶུ མཾ, བྷཱ་ར་དྭཱ་ཛ, དེ་ཝ་ཏཱ དི་སྭཱ ཨེ་ཝ་མཱ་ཧཾ་སུ – ‘ཀཱ་ལ་ངྐ་ཏོ ས་མ་ཎོ གོ་ཏ་མོ’ཏི. ཨེ་ཀ་ཙྩཱ དེ་ཝ་ཏཱ ཨེ་ཝ་མཱ་ཧཾ་སུ – ‘ན ཀཱ་ལ་ངྐ་ཏོ ས་མ་ཎོ གོ་ཏ་མོ, ཨ་པི ཙ ཀཱ་ལ་ངྐ་རོ་ཏཱི’ཏི. ཨེ་ཀ་ཙྩཱ དེ་ཝ་ཏཱ ཨེ་ཝ་མཱ་ཧཾ་སུ – ‘ན ཀཱ་ལ་ངྐ་ཏོ ས་མ་ཎོ གོ་ཏ་མོ, ནཱ་པི ཀཱ་ལ་ངྐ་རོ་ཏི; ཨ་ར་ཧཾ ས་མ་ཎོ གོ་ཏ་མོ, ཝི་ཧཱ་རོ་ཏྭེ་ཝ སོ ཨ་ར་ཧ་ཏོ ཨེ་ཝ་རཱུ་པོ ཧོ་ཏཱི’ཏི.

‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫེ་ཡྻ’ནྟི. ཨ་ཐ ཁོ མཾ, བྷཱ་ར་དྭཱ་ཛ, དེ་ཝ་ཏཱ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘མཱ ཁོ ཏྭཾ, མཱ་རི་ས, ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫི. ས་ཙེ ཁོ ཏྭཾ, མཱ་རི་ས, ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫི་སྶ་སི, ཏ་སྶ ཏེ མ་ཡཾ དི་བྦཾ ཨོ་ཛཾ ལོ་མ་ཀཱུ་པེ་ཧི ཨ་ཛ྄ཛྷོ་ཧཱ་རེ་སྶཱ་མ. ཏཱ་ཡ ཏྭཾ ཡཱ་པེ་སྶ་སཱི’ཏི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཨ་ཧ་ཉྩེ་ཝ ཁོ པ་ན ས་བྦ་སོ ཨ་ཛ་ཛྫི་ཏཾ པ་ཊི་ཛཱ་ནེ་ཡྻཾ, ཨི་མཱ ཙ མེ དེ་ཝ་ཏཱ དི་བྦཾ ཨོ་ཛཾ ལོ་མ་ཀཱུ་པེ་ཧི ཨ་ཛ྄ཛྷོ་ཧཱ་རེ་ཡྻུཾ, ཏཱ་ཡ ཙཱ་ཧཾ ཡཱ་པེ་ཡྻཾ. ཏཾ མ་མ་སྶ མུ་སཱ’ཏི. སོ ཁོ ཨ་ཧཾ, བྷཱ་ར་དྭཱ་ཛ, ཏཱ དེ་ཝ་ཏཱ པ་ཙྩཱ་ཙི་ཀྑཱ་མི, ‘ཧ་ལ’ནྟི ཝ་དཱ་མི.

‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་རེ་ཡྻཾ པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་ས’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་རེ་སིཾ པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་སཾ. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་ར་ཡ་ཏོ པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་སཾ, ཨ་དྷི་མ་ཏྟ་ཀ་སི་མཱ་ནཾ པ་ཏྟོ ཀཱ་ཡོ ཧོ་ཏི. སེ་ཡྻ་ཐཱ་པི ནཱ་མ ཨཱ་སཱི་ཏི་ཀ་པ་བྦཱ་ནི ཝཱ ཀཱ་ལ༹་པ་བྦཱ་ནི ཝཱ, ཨེ་ཝ་མེ་ཝ་སྶུ མེ ཨ་ངྒ་པ་ཙྩ་ངྒཱ་ནི བྷ་ཝ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ; སེ་ཡྻ་ཐཱ་པི ནཱ་མ ཨོ་ཊྛ་པ་དཾ, ཨེ་ཝ་མེ་ཝ་སྶུ མེ ཨཱ་ནི་ས་དཾ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ; སེ་ཡྻ་ཐཱ་པི ནཱ་མ ཝ་ཊྚ་ནཱ་ཝ་ལཱི༹, ཨེ་ཝ་མེ་ཝ་སྶུ མེ པི་ཊྛི་ཀ་ཎྚ་ཀོ ཨུ་ཎྞ་ཏཱ་ཝ་ན་ཏོ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ; སེ་ཡྻ་ཐཱ་པི ནཱ་མ ཛ་ར་སཱ་ལཱ་ཡ གོ་པཱ་ན་སི་ཡོ ཨོ་ལུ་གྒ་ཝི་ལུ་གྒཱ བྷ་ཝ་ནྟི, ཨེ་ཝ་མེ་ཝ་སྶུ མེ ཕཱ་སུ་ལི༹་ཡོ ཨོ་ལུ་གྒ་ཝི་ལུ་གྒཱ བྷ་ཝ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ; སེ་ཡྻ་ཐཱ་པི ནཱ་མ ག་མྦྷཱི་རེ ཨུ་ད་པཱ་ནེ ཨུ་ད་ཀ་ཏཱ་ར་ཀཱ ག་མྦྷཱི་ར་ག་ཏཱ ཨོ་ཀྑཱ་ཡི་ཀཱ དི་སྶ་ནྟི, ཨེ་ཝ་མེ་ཝ་སྶུ མེ ཨ་ཀྑི་ཀཱུ་པེ་སུ ཨ་ཀྑི་ཏཱ་ར་ཀཱ ག་མྦྷཱི་ར་ག་ཏཱ ཨོ་ཀྑཱ་ཡི་ཀཱ དི་སྶ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ; སེ་ཡྻ་ཐཱ་པི ནཱ་མ ཏི་ཏྟ་ཀཱ་ལཱ་བུ ཨཱ་མ་ཀ་ཙྪི་ནྣོ ཝཱ་ཏཱ་ཏ་པེ་ན སཾ་ཕུ་ཊི་ཏོ ཧོ་ཏི ས་མྨི་ལཱ་ཏོ, ཨེ་ཝ་མེ་ཝ་སྶུ མེ སཱི་ས་ཙྪ་ཝི སཾ་ཕུ་ཊི་ཏཱ ཧོ་ཏི ས་མྨི་ལཱ་ཏཱ ཏཱ་ཡེ་ཝ་པྤཱ་ཧཱ་ར་ཏཱ་ཡ. སོ ཁོ ཨ་ཧཾ, བྷཱ་ར་དྭཱ་ཛ, ‘ཨུ་ད་ར་ཙྪ་ཝིཾ པ་རི་མ་སི་སྶཱ་མཱི’ཏི པི་ཊྛི་ཀ་ཎྚ་ཀཾ་ཡེ་ཝ པ་རི་གྒ་ཎྷཱ་མི, ‘པི་ཊྛི་ཀ་ཎྚ་ཀཾ པ་རི་མ་སི་སྶཱ་མཱི’ཏི ཨུ་ད་ར་ཙྪ་ཝིཾ་ཡེ་ཝ པ་རི་གྒ་ཎྷཱ་མི; ཡཱ་ཝ་སྶུ མེ, བྷཱ་ར་དྭཱ་ཛ, ཨུ་ད་ར་ཙྪ་ཝི པི་ཊྛི་ཀ་ཎྚ་ཀཾ ཨ་ལླཱི་ནཱ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ. སོ ཁོ ཨ་ཧཾ, བྷཱ་ར་དྭཱ་ཛ, ‘ཝ་ཙྩཾ ཝཱ མུ་ཏྟཾ ཝཱ ཀ་རི་སྶཱ་མཱི’ཏི ཏ་ཏྠེ་ཝ ཨ་ཝ་ཀུ་ཛྫོ པ་པ་ཏཱ་མི ཏཱ་ཡེ་ཝ་པྤཱ་ཧཱ་ར་ཏཱ་ཡ. སོ ཁོ ཨ་ཧཾ, བྷཱ་ར་དྭཱ་ཛ, ཨི་མ་མེ་ཝ ཀཱ་ཡཾ ཨ་སྶཱ་སེ་ནྟོ པཱ་ཎི་ནཱ ག་ཏྟཱ་ནི ཨ་ནུ་མ་ཛྫཱ་མི. ཏ་སྶ མ་ཡ྄ཧཾ, བྷཱ་ར་དྭཱ་ཛ, པཱ་ཎི་ནཱ ག་ཏྟཱ་ནི ཨ་ནུ་མ་ཛྫ་ཏོ པཱུ་ཏི་མཱུ་ལཱ་ནི ལོ་མཱ་ནི ཀཱ་ཡ་སྨཱ པ་པ་ཏ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ. ཨ་པི་སྶུ མཾ, བྷཱ་ར་དྭཱ་ཛ, མ་ནུ་སྶཱ དི་སྭཱ ཨེ་ཝ་མཱ་ཧཾ་སུ – ‘ཀཱ་ལོ༹ ས་མ་ཎོ གོ་ཏ་མོ’ཏི. ཨེ་ཀ་ཙྩེ མ་ནུ་སྶཱ ཨེ་ཝ་མཱ་ཧཾ་སུ – ‘ན ཀཱ་ལོ༹ ས་མ་ཎོ གོ་ཏ་མོ, སཱ་མོ ས་མ་ཎོ གོ་ཏ་མོ’ཏི. ཨེ་ཀ་ཙྩེ མ་ནུ་སྶཱ ཨེ་ཝ་མཱ་ཧཾ་སུ – ‘ན ཀཱ་ལོ༹ ས་མ་ཎོ གོ་ཏ་མོ ན་པི སཱ་མོ, མ་ངྒུ་ར་ཙྪ་ཝི ས་མ་ཎོ གོ་ཏ་མོ’ཏི; ཡཱ་ཝ་སྶུ མེ, བྷཱ་ར་དྭཱ་ཛ, ཏཱ་ཝ པ་རི་སུ་དྡྷོ ཚ་ཝི་ཝ་ཎྞོ པ་རི་ཡོ་དཱ་ཏོ ཨུ་པ་ཧ་ཏོ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ.

༤༨༢. ‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཡེ ཁོ ཀེ་ཙི ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡིཾ་སུ, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ; ཡེ་པི ཧི ཀེ་ཙི ཨ་ནཱ་ག་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡི་སྶ་ནྟི, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ; ཡེ་པི ཧི ཀེ་ཙི ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ. ན ཁོ པ་ནཱ་ཧཾ ཨི་མཱ་ཡ ཀ་ཊུ་ཀཱ་ཡ དུ་ཀྐ་ར་ཀཱ་རི་ཀཱ་ཡ ཨ་དྷི་ག་ཙྪཱ་མི ཨུ་ཏྟ་རི མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སཾ. སི་ཡཱ ནུ ཁོ ཨ་ཉྙོ མ་གྒོ བོ་དྷཱ་ཡཱ’ཏི? ཏ་སྶ མ་ཡ྄ཧཾ བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཨ་བྷི་ཛཱ་ནཱ་མི ཁོ པ་ནཱ་ཧཾ པི་ཏུ ས་ཀྐ་སྶ ཀ་མྨ་ནྟེ སཱི་ཏཱ་ཡ ཛ་མྦུ་ཙྪཱ་ཡཱ་ཡ ནི་སི་ནྣོ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏཱ. སི་ཡཱ ནུ ཁོ ཨེ་སོ མ་གྒོ བོ་དྷཱ་ཡཱ’ཏི? ཏ་སྶ མ་ཡ྄ཧཾ, བྷཱ་ར་དྭཱ་ཛ, ས་ཏཱ་ནུ་སཱ་རི ཝི་ཉྙཱ་ཎཾ ཨ་ཧོ་སི – ‘ཨེ་སེ་ཝ མ་གྒོ བོ་དྷཱ་ཡཱ’ཏི. ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ཀིཾ ནུ ཁོ ཨ་ཧཾ ཏ་སྶ སུ་ཁ་སྶ བྷཱ་ཡཱ་མི ཡཾ ཏཾ སུ་ཁཾ ཨ་ཉྙ་ཏྲེ་ཝ ཀཱ་མེ་ཧི ཨ་ཉྙ་ཏྲ ཨ་ཀུ་ས་ལེ་ཧི དྷ་མྨེ་ཧཱི’ཏི? ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ ཨ་ཧཾ ཏ་སྶ སུ་ཁ་སྶ བྷཱ་ཡཱ་མི ཡཾ ཏཾ སུ་ཁཾ ཨ་ཉྙ་ཏྲེ་ཝ ཀཱ་མེ་ཧི ཨ་ཉྙ་ཏྲ ཨ་ཀུ་ས་ལེ་ཧི དྷ་མྨེ་ཧཱི’ཏི.

༤༨༣. ‘‘ཏ་སྶ མ་ཡ྄ཧཾ, བྷཱ་ར་དྭཱ་ཛ, ཨེ་ཏ་ད་ཧོ་སི – ‘ན ཁོ ཏཾ སུ་ཀ་རཾ སུ་ཁཾ ཨ་དྷི་ག་ནྟུཾ ཨེ་ཝཾ ཨ་དྷི་མ་ཏྟ་ཀ་སི་མཱ་ནཾ པ་ཏྟ་ཀཱ་ཡེ་ན. ཡཾ་ནཱུ་ནཱ་ཧཾ ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་ཡྻཾ ཨོ་ད་ན་ཀུ་མྨཱ་ས’ནྟི. སོ ཁོ ཨ་ཧཾ, བྷཱ་ར་དྭཱ་ཛ, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་སིཾ ཨོ་ད་ན་ཀུ་མྨཱ་སཾ. ཏེ་ན ཁོ པ་ན མཾ, བྷཱ་ར་དྭཱ་ཛ, ས་མ་ཡེ་ན པ་ཉྩ་ཝ་གྒི་ཡཱ བྷི་ཀྑཱུ པ་ཙྩུ་པ་ཊྛི་ཏཱ ཧོ་ནྟི – ‘ཡཾ ཁོ ས་མ་ཎོ གོ་ཏ་མོ དྷ་མྨཾ ཨ་དྷི་ག་མི་སྶ་ཏི ཏཾ ནོ ཨཱ་རོ་ཙེ་སྶ་ཏཱི’ཏི. ཡ་ཏོ ཁོ ཨ་ཧཾ, བྷཱ་ར་དྭཱ་ཛ, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་སིཾ ཨོ་ད་ན་ཀུ་མྨཱ་སཾ, ཨ་ཐ མེ ཏེ པ་ཉྩ་ཝ་གྒི་ཡཱ བྷི་ཀྑཱུ ནི་བྦི་ཛྫ པ་ཀྐ་མིཾ་སུ – ‘བཱ་ཧུ་ལླི་ཀོ ས་མ་ཎོ གོ་ཏ་མོ པ་དྷཱ་ན་ཝི་བྦྷ་ནྟོ ཨཱ་ཝ་ཏྟོ བཱ་ཧུ་ལླཱ་ཡཱ’ཏི.

‘‘སོ ཁོ ཨ་ཧཾ, བྷཱ་ར་དྭཱ་ཛ, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་ཏྭཱ བ་ལཾ ག་ཧེ་ཏྭཱ ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ… ཏ་ཏི་ཡཾ ཛྷཱ་ནཾ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ.

‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི, སེ་ཡྻ་ཐི་དཾ – ཨེ་ཀ་མྤི ཛཱ་ཏིཾ དྭེ་པི ཛཱ་ཏི་ཡོ…པེ… ཨི་ཏི སཱ་ཀཱ་རཾ ས་ཨུ་དྡེ་སཾ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི. ཨ་ཡཾ ཁོ མེ, བྷཱ་ར་དྭཱ་ཛ, ར་ཏྟི་ཡཱ པ་ཋ་མེ ཡཱ་མེ པ་ཋ་མཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ.

༤༨༤. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ས་ཏྟཱ་ནཾ ཙུ་ཏཱུ་པ་པཱ་ཏ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶཱ་མི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་མི…པེ… ཨ་ཡཾ ཁོ མེ, བྷཱ་ར་དྭཱ་ཛ, ར་ཏྟི་ཡཱ མ་ཛ྄ཛྷི་མེ ཡཱ་མེ དུ་ཏི་ཡཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ.

‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ཨཱ་ས་ཝཱ་ནཾ ཁ་ཡ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ; ‘ཨི་མེ ཨཱ་ས་ཝཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ. ཏ་སྶ མེ ཨེ་ཝཾ ཛཱ་ན་ཏོ ཨེ་ཝཾ པ་སྶ་ཏོ ཀཱ་མཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ, བྷ་ཝཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ, ཨ་ཝི་ཛྫཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ. ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཨ་ཧོ་སི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི ཨ་བྦྷ་ཉྙཱ་སིཾ. ཨ་ཡཾ ཁོ མེ, བྷཱ་ར་དྭཱ་ཛ, ར་ཏྟི་ཡཱ པ་ཙྪི་མེ ཡཱ་མེ ཏ་ཏི་ཡཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ’’ཏི.

༤༨༥. ཨེ་ཝཾ ཝུ་ཏྟེ, ས་ངྒཱ་ར་ཝོ མཱ་ཎ་ཝོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཊྛི་ཏ་ཝ་ཏཾ [ཨ་ཊྛི་ཏ ཝ་ཏ (སཱི. སྱཱ. ཀཾ. པཱི.)] བྷོ་ཏོ གོ་ཏ་མ་སྶ པ་དྷཱ་ནཾ ཨ་ཧོ་སི, ས་པྤུ་རི་ས་ཝ་ཏཾ [ས་པྤུ་རི་ས ཝ་ཏ (སཱི. སྱཱ. ཀཾ. པཱི.)] བྷོ་ཏོ གོ་ཏ་མ་སྶ པ་དྷཱ་ནཾ ཨ་ཧོ་སི; ཡ་ཐཱ ཏཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཀིཾ ནུ ཁོ, བྷོ གོ་ཏ་མ, ཨ་ཏྠི དེ་ཝཱ’’ཏི [ཨ་དྷི་དེ་ཝཱ་ཏི (ཀ.) ཨེ་ཝཾ ས་བྦེ་སུ ‘ཨ་ཏྠི དེ་ཝཱ’ཏི་པ་དེ་སུ]? ‘‘ཋཱ་ན་སོ མེ་ཏཾ [ཁོ པ་ནེ་ཏཾ (སྱཱ. ཀཾ. ཀ.)], བྷཱ་ར་དྭཱ་ཛ, ཝི་དི་ཏཾ ཡ་དི་དཾ – ཨ་དྷི་དེ་ཝཱ’’ཏི [ཨ་ཏྠི དེ་ཝཱ་ཏི (སཱི. སྱཱ. ཀཾ. པཱི.), ཨ་ཏི་དེ་ཝཱ་ཏི (?) ཨེ་ཝཾ ས་བྦེ་སུ ‘ཨ་དྷི་དེ་ཝཱ’ཏི་པ་དེ་སུ]. ‘‘ཀིཾ ནུ ཁོ, བྷོ གོ་ཏ་མ, ‘ཨ་ཏྠི དེ་ཝཱ’ཏི པུ་ཊྛོ ས་མཱ་ནོ ‘ཋཱ་ན་སོ མེ་ཏཾ, བྷཱ་ར་དྭཱ་ཛ, ཝི་དི་ཏཾ ཡ་དི་དཾ ཨ་དྷི་དེ་ཝཱ’ཏི ཝ་དེ་སི. ན་ནུ, བྷོ གོ་ཏ་མ, ཨེ་ཝཾ ས་ནྟེ ཏུ་ཙྪཱ མུ་སཱ ཧོ་ཏཱི’’ཏི? ‘‘‘ཨ་ཏྠི དེ་ཝཱ’ཏི, བྷཱ་ར་དྭཱ་ཛ, པུ་ཊྛོ ས་མཱ་ནོ ‘ཨ་ཏྠི དེ་ཝཱ’ཏི ཡོ ཝ་དེ་ཡྻ, ‘ཋཱ་ན་སོ མེ ཝི་དི་ཏཱ’ཏི [ཋཱ་ན་སོ ཝི་དི་ཏཱ མེ ཝི་དི་ཏཱ་ཏི (སཱི. སྱཱ. ཀཾ. པཱི.), ཋཱ་ན་སོ མེ ཝི་དི་ཏཱ ཨ་ཏི་དེ་ཝཱ་ཏི (?)] ཡོ ཝ་དེ་ཡྻ; ཨ་ཐ ཁྭེ་ཏྠ ཝི་ཉྙུ་ནཱ པུ་རི་སེ་ན ཨེ་ཀཾ་སེ་ན ནི་ཊྛཾ ག་ནྟ་བྦཾ [ག་ནྟུཾ (ཀ.), ག་ནྟུཾ ཝཱ (སྱཱ. ཀཾ.)] ཡ་དི་དཾ – ‘ཨ་ཏྠི དེ་ཝཱ’’’ཏི. ‘‘ཀི་སྶ པ་ན མེ བྷ་ཝཾ གོ་ཏ་མོ ཨཱ་དི་ཀེ་ནེ་ཝ ན བྱཱ་ཀཱ་སཱི’’ཏི [གོ་ཏ་མོ ཨཱ་དི་ཀེ་ནེ་ཝ བྱཱ་ཀཱ་སཱི་ཏི (ཀ.), གོ་ཏ་མོ ཨ་ཏྠི དེ་ཝཱ་ཏི ན བྱཱ་ཀཱ་སཱི་ཏི (?)]? ‘‘ཨུ་ཙྩེ་ན ས་མྨ་ཏཾ ཁོ ཨེ་ཏཾ, བྷཱ་ར་དྭཱ་ཛ, ལོ་ཀ་སྨིཾ ཡ་དི་དཾ – ‘ཨ་ཏྠི དེ་ཝཱ’’’ཏི.

༤༨༦. ཨེ་ཝཾ ཝུ་ཏྟེ, ས་ངྒཱ་ར་ཝོ མཱ་ཎ་ཝོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷོ གོ་ཏ་མ, ཨ་བྷི་ཀྐ་ནྟཾ, བྷོ གོ་ཏ་མ! སེ་ཡྻ་ཐཱ་པི, བྷོ གོ་ཏ་མ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི – ཨེ་ཝ་མེ་ཝཾ བྷོ་ཏཱ གོ་ཏ་མེ་ན ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ བྷ་ཝ་ནྟཾ གོ་ཏ་མཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི.

ས་ངྒཱ་ར་ཝ་སུ་ཏྟཾ ནི་ཊྛི་ཏཾ ད་ས་མཾ.

བྲཱ་ཧྨ་ཎ་ཝ་གྒོ ནི་ཊྛི་ཏོ པ་ཉྩ་མོ.