༦. མ་ཧཱ་ས་ཙྩ་ཀ་སུ་ཏྟཾ

༣༦༤. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཏེ་ན ཁོ པ་ན ས་མ་ཡེ་ན བྷ་ག་ཝཱ པུ་བྦ་ཎྷ་ས་མ་ཡཾ སུ་ནི་ཝ་ཏྠོ ཧོ་ཏི པ་ཏྟ་ཙཱི་ཝ་ར་མཱ་དཱ་ཡ ཝེ་སཱ་ལིཾ པི་ཎྜཱ་ཡ པ་ཝི་སི་ཏུ་ཀཱ་མོ [པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ… པ་ཝི་སི་ཏུ་ཀཱ་མོ ཧོ་ཏི (སཱི.)]. ཨ་ཐ ཁོ ས་ཙྩ་ཀོ ནི་ག་ཎྛ་པུ་ཏྟོ ཛ་ངྒྷཱ་ཝི་ཧཱ་རཾ ཨ་ནུ་ཙ་ངྐ་མ་མཱ་ནོ ཨ་ནུ་ཝི་ཙ་ར་མཱ་ནོ ཡེ་ན མ་ཧཱ་ཝ་ནཾ ཀཱུ་ཊཱ་གཱ་ར་སཱ་ལཱ ཏེ་ནུ་པ་ས་ངྐ་མི. ཨ་དྡ་སཱ ཁོ ཨཱ་ཡ་སྨཱ ཨཱ་ན་ནྡོ ས་ཙྩ་ཀཾ ནི་ག་ཎྛ་པུ་ཏྟཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཡཾ, བྷ་ནྟེ, ས་ཙྩ་ཀོ ནི་ག་ཎྛ་པུ་ཏྟོ ཨཱ་ག་ཙྪ་ཏི བྷ་སྶ་པྤ་ཝཱ་ད་ཀོ པ་ཎྜི་ཏ་ཝཱ་དོ སཱ་དྷུ་ས་མྨ་ཏོ བ་ཧུ་ཛ་ན་སྶ. ཨེ་སོ ཁོ, བྷ་ནྟེ, ཨ་ཝ་ཎྞ་ཀཱ་མོ བུ་དྡྷ་སྶ, ཨ་ཝ་ཎྞ་ཀཱ་མོ དྷ་མྨ་སྶ, ཨ་ཝ་ཎྞ་ཀཱ་མོ ས་ངྒྷ་སྶ. སཱ་དྷུ, བྷ་ནྟེ, བྷ་ག་ཝཱ མུ་ཧུ་ཏྟཾ ནི་སཱི་ད་ཏུ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི. ནི་སཱི་དི བྷ་ག་ཝཱ པ་ཉྙ་ཏྟེ ཨཱ་ས་ནེ. ཨ་ཐ ཁོ ས་ཙྩ་ཀོ ནི་ག་ཎྛ་པུ་ཏྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི, ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ –

༣༦༥. ‘‘ས་ནྟི, བྷོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཀཱ་ཡ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི, ནོ ཙི་ཏྟ་བྷཱ་ཝ་ནཾ. ཕུ་ས་ནྟི ཧི ཏེ, བྷོ གོ་ཏ་མ, སཱ་རཱི་རི་ཀཾ དུ་ཀྑཾ ཝེ་ད་ནཾ. བྷཱུ་ཏ་པུ་བྦཾ, བྷོ གོ་ཏ་མ, སཱ་རཱི་རི་ཀཱ་ཡ དུ་ཀྑཱ་ཡ ཝེ་ད་ནཱ་ཡ ཕུ་ཊྛ་སྶ ས་ཏོ ཨཱུ་རུ་ཀྑ་མྦྷོ་པི ནཱ་མ བྷ་ཝི་སྶ་ཏི, ཧ་ད་ཡ་མྤི ནཱ་མ ཕ་ལི་སྶ་ཏི, ཨུ་ཎྷ་མྤི ལོ་ཧི་ཏཾ མུ་ཁ་ཏོ ཨུ་གྒ་མི་སྶ་ཏི, ཨུ་མྨཱ་ད་མྤི པཱ་པུ་ཎི་སྶ་ཏི [པཱ་པུ་ཎི་སྶ་ནྟི (སྱཱ. ཀཾ.)] ཙི་ཏྟ་ཀྑེ་པཾ. ཏ་སྶ ཁོ ཨེ་ཏཾ, བྷོ གོ་ཏ་མ, ཀཱ་ཡ་ནྭ་ཡཾ ཙི་ཏྟཾ ཧོ་ཏི, ཀཱ་ཡ་སྶ ཝ་སེ་ན ཝ་ཏྟ་ཏི. ཏཾ ཀི་སྶ ཧེ་ཏུ? ཨ་བྷཱ་ཝི་ཏ་ཏྟཱ ཙི་ཏྟ་སྶ. ས་ནྟི པ་ན, བྷོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ཙི་ཏྟ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི, ནོ ཀཱ་ཡ་བྷཱ་ཝ་ནཾ. ཕུ་ས་ནྟི ཧི ཏེ, བྷོ གོ་ཏ་མ, ཙེ་ཏ་སི་ཀཾ དུ་ཀྑཾ ཝེ་ད་ནཾ. བྷཱུ་ཏ་པུ་བྦཾ, བྷོ གོ་ཏ་མ, ཙེ་ཏ་སི་ཀཱ་ཡ དུ་ཀྑཱ་ཡ ཝེ་ད་ནཱ་ཡ ཕུ་ཊྛ་སྶ ས་ཏོ ཨཱུ་རུ་ཀྑ་མྦྷོ་པི ནཱ་མ བྷ་ཝི་སྶ་ཏི, ཧ་ད་ཡ་མྤི ནཱ་མ ཕ་ལི་སྶ་ཏི, ཨུ་ཎྷ་མྤི ལོ་ཧི་ཏཾ མུ་ཁ་ཏོ ཨུ་གྒ་མི་སྶ་ཏི, ཨུ་མྨཱ་ད་མྤི པཱ་པུ་ཎི་སྶ་ཏི ཙི་ཏྟ་ཀྑེ་པཾ. ཏ་སྶ ཁོ ཨེ་སོ, བྷོ གོ་ཏ་མ, ཙི་ཏྟ་ནྭ་ཡོ ཀཱ་ཡོ ཧོ་ཏི, ཙི་ཏྟ་སྶ ཝ་སེ་ན ཝ་ཏྟ་ཏི. ཏཾ ཀི་སྶ ཧེ་ཏུ? ཨ་བྷཱ་ཝི་ཏ་ཏྟཱ ཀཱ་ཡ་སྶ. ཏ་སྶ མ་ཡ྄ཧཾ, བྷོ གོ་ཏ་མ, ཨེ་ཝཾ ཧོ་ཏི – ‘ཨ་དྡྷཱ བྷོ་ཏོ གོ་ཏ་མ་སྶ སཱ་ཝ་ཀཱ ཙི་ཏྟ་བྷཱ་ཝ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི, ནོ ཀཱ་ཡ་བྷཱ་ཝ་ན’’’ནྟི.

༣༦༦. ‘‘ཀི་ནྟི པ་ན ཏེ, ཨ་གྒི་ཝེ་སྶ་ན, ཀཱ་ཡ་བྷཱ་ཝ་ནཱ སུ་ཏཱ’’ཏི? ‘‘སེ་ཡྻ་ཐི་དཾ – ན་ནྡོ ཝ་ཙྪོ, ཀི་སོ སཾ་ཀི་ཙྩོ, མ་ཀྑ་ལི གོ་སཱ་ལོ – ཨེ་ཏེ་ཧི, བྷོ གོ་ཏ་མ, ཨ་ཙེ་ལ་ཀཱ མུ་ཏྟཱ་ཙཱ་རཱ ཧ་ཏྠཱ་པ་ལེ་ཁ་ནཱ ན་ཨེ་ཧི་བྷ་དྡ་ནྟི་ཀཱ ན་ཏི་ཊྛ་བྷ་དྡ་ནྟི་ཀཱ [ན་ཨེ་ཧི་བྷ་ད་ནྟི་ཀཱ, ན་ཏི་ཊྛ་བྷ་ད་ནྟི་ཀཱ (སཱི. སྱཱ. ཀཾ. པཱི. ཀ.)] ན ཨ་བྷི་ཧ་ཊཾ ན ཨུ་དྡི་སྶ་ཀ་ཏཾ ན ནི་མ་ནྟ་ནཾ སཱ་དི་ཡ་ནྟི, ཏེ ན ཀུ་མྦྷི་མུ་ཁཱ པ་ཊི་གྒ་ཎྷ་ནྟི ན ཀ་ལོ༹་པི་མུ་ཁཱ པ་ཊི་གྒ་ཎྷ་ནྟི ན ཨེ་ལ༹་ཀ་མ་ནྟ་རཾ ན ད་ཎྜ་མ་ནྟ་རཾ ན མུ་ས་ལ་མ་ནྟ་རཾ ན དྭི་ནྣཾ བྷུ་ཉྫ་མཱ་ནཱ་ནཾ ན ག་བྦྷི་ནི་ཡཱ ན པཱ་ཡ་མཱ་ནཱ་ཡ ན པུ་རི་ས་ནྟ་ར་ག་ཏཱ་ཡ ན ས་ངྐི་ཏྟཱི་སུ ན ཡ་ཏྠ སཱ ཨུ་པ་ཊྛི་ཏོ ཧོ་ཏི ན ཡ་ཏྠ མ་ཀྑི་ཀཱ ས་ཎྜ་ས་ཎྜ་ཙཱ་རི་ནཱི, ན མ་ཙྪཾ ན མཾ་སཾ ན སུ་རཾ ན མེ་ར་ཡཾ ན ཐུ་སོ་ད་ཀཾ པི་ཝ་ནྟི. ཏེ ཨེ་ཀཱ་གཱ་རི་ཀཱ ཝཱ ཧོ་ནྟི ཨེ་ཀཱ་ལོ་པི་ཀཱ, དྭཱ་གཱ་རི་ཀཱ ཝཱ ཧོ་ནྟི དྭཱ་ལོ་པི་ཀཱ…པེ… ས་ཏྟཱ་གཱ་རི་ཀཱ ཝཱ ཧོ་ནྟི ས་ཏྟཱ་ལོ་པི་ཀཱ. ཨེ་ཀི་སྶཱ་པི ད་ཏྟི་ཡཱ ཡཱ་པེ་ནྟི, དྭཱི་ཧི་པི ད་ཏྟཱི་ཧི ཡཱ་པེ་ནྟི…པེ… ས་ཏྟ་ཧི་པི ད་ཏྟཱི་ཧི ཡཱ་པེ་ནྟི. ཨེ་ཀཱ་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ནྟི, དྭཱི་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ནྟི…པེ… ས་ཏྟཱ་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ནྟི. ཨི་ཏི ཨེ་ཝ་རཱུ་པཾ ཨ་དྡྷ་མཱ་སི་ཀ་མྤི པ་རི་ཡཱ་ཡ་བྷ་ཏྟ་བྷོ་ཛ་ནཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟཱི’’ཏི.

‘‘ཀིཾ པ་ན ཏེ, ཨ་གྒི་ཝེ་སྶ་ན, ཏཱ་ཝ་ཏ་ཀེ་ནེ་ཝ ཡཱ་པེ་ནྟཱི’’ཏི? ‘‘ནོ ཧི་དཾ, བྷོ གོ་ཏ་མ. ཨ་པྤེ་ཀ་དཱ, བྷོ གོ་ཏ་མ, ཨུ་ལཱ༹་རཱ་ནི ཨུ་ལཱ༹་རཱ་ནི ཁཱ་ད་ནཱི་ཡཱ་ནི ཁཱ་ད་ནྟི, ཨུ་ལཱ༹་རཱ་ནི ཨུ་ལཱ༹་རཱ་ནི བྷོ་ཛ་ནཱ་ནི བྷུ་ཉྫ་ནྟི, ཨུ་ལཱ༹་རཱ་ནི ཨུ་ལཱ༹་རཱ་ནི སཱ་ཡ་ནཱི་ཡཱ་ནི སཱ་ཡ་ནྟི, ཨུ་ལཱ༹་རཱ་ནི ཨུ་ལཱ༹་རཱ་ནི པཱ་ནཱ་ནི པི་ཝ་ནྟི. ཏེ ཨི་མཾ ཀཱ་ཡཾ བ་ལཾ གཱ་ཧེ་ནྟི ནཱ་མ, བྲཱུ་ཧེ་ནྟི ནཱ་མ, མེ་དེ་ནྟི ནཱ་མཱ’’ཏི.

‘‘ཡཾ ཁོ ཏེ, ཨ་གྒི་ཝེ་སྶ་ན, པུ་རི་མཾ པ་ཧཱ་ཡ པ་ཙྪཱ ཨུ་པ་ཙི་ན་ནྟི, ཨེ་ཝཾ ཨི་མ་སྶ ཀཱ་ཡ་སྶ ཨཱ་ཙ་ཡཱ་པ་ཙ་ཡོ ཧོ་ཏི. ཀི་ནྟི པ་ན ཏེ, ཨ་གྒི་ཝེ་སྶ་ན, ཙི་ཏྟ་བྷཱ་ཝ་ནཱ སུ་ཏཱ’’ཏི? ཙི་ཏྟ་བྷཱ་ཝ་ནཱ་ཡ ཁོ ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ཏཱ པུ་ཊྛོ ས་མཱ་ནོ ན ས་མྤཱ་ཡཱ་སི.

༣༦༧. ཨ་ཐ ཁོ བྷ་ག་ཝཱ ས་ཙྩ་ཀཾ ནི་ག་ཎྛ་པུ་ཏྟཾ ཨེ་ཏ་ད་ཝོ་ཙ – ‘‘ཡཱ་པི ཁོ ཏེ ཨེ་སཱ, ཨ་གྒི་ཝེ་སྶ་ན, པུ་རི་མཱ ཀཱ་ཡ་བྷཱ་ཝ་ནཱ བྷཱ་སི་ཏཱ སཱ་པི ཨ་རི་ཡ་སྶ ཝི་ན་ཡེ ནོ དྷ་མྨི་ཀཱ ཀཱ་ཡ་བྷཱ་ཝ་ནཱ. ཀཱ་ཡ་བྷཱ་ཝ་ན་མྤི [ཀཱ་ཡ་བྷཱ་ཝ་ནཾ ཧི (སཱི. པཱི. ཀ.)] ཁོ ཏྭཾ, ཨ་གྒི་ཝེ་སྶ་ན, ན ཨ་ཉྙཱ་སི, ཀུ་ཏོ པ་ན ཏྭཾ ཙི་ཏྟ་བྷཱ་ཝ་ནཾ ཛཱ་ནི་སྶ་སི? ཨ་པི ཙ, ཨ་གྒི་ཝེ་སྶ་ན, ཡ་ཐཱ ཨ་བྷཱ་ཝི་ཏ་ཀཱ་ཡོ ཙ ཧོ་ཏི ཨ་བྷཱ་ཝི་ཏ་ཙི་ཏྟོ ཙ, བྷཱ་ཝི་ཏ་ཀཱ་ཡོ ཙ ཧོ་ཏི བྷཱ་ཝི་ཏ་ཙི་ཏྟོ ཙ. ཏཾ སུ་ཎཱ་ཧི, སཱ་དྷུ་ཀཾ མ་ན་སི ཀ་རོ་ཧི, བྷཱ་སི་སྶཱ་མཱི’’ཏི. ‘‘ཨེ་ཝཾ, བྷོ’’ཏི ཁོ ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ཏོ པ་ཙྩ་སྶོ་སི. བྷ་ག་ཝཱ ཨེ་ཏ་ད་ཝོ་ཙ –

༣༦༨. ‘‘ཀ་ཐ་ཉྩ, ཨ་གྒི་ཝེ་སྶ་ན, ཨ་བྷཱ་ཝི་ཏ་ཀཱ་ཡོ ཙ ཧོ་ཏི ཨ་བྷཱ་ཝི་ཏ་ཙི་ཏྟོ ཙ? ཨི་དྷ, ཨ་གྒི་ཝེ་སྶ་ན, ཨ་སྶུ་ཏ་ཝ་ཏོ པུ་ཐུ་ཛྫ་ན་སྶ ཨུ་པྤ་ཛྫ་ཏི སུ་ཁཱ ཝེ་ད་ནཱ. སོ སུ་ཁཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ སུ་ཁ་སཱ་རཱ་གཱི ཙ ཧོ་ཏི སུ་ཁ་སཱ་རཱ་གི་ཏ་ཉྩ ཨཱ་པ་ཛྫ་ཏི. ཏ་སྶ སཱ སུ་ཁཱ ཝེ་ད་ནཱ ནི་རུ་ཛ྄ཛྷ་ཏི. སུ་ཁཱ་ཡ ཝེ་ད་ནཱ་ཡ ནི་རོ་དྷཱ ཨུ་པྤ་ཛྫ་ཏི དུ་ཀྑཱ ཝེ་ད་ནཱ. སོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ སོ་ཙ་ཏི ཀི་ལ་མ་ཏི པ་རི་དེ་ཝ་ཏི ཨུ་ར་ཏྟཱ་ལི༹ཾ ཀ་ནྡ་ཏི ས་མྨོ་ཧཾ ཨཱ་པ་ཛྫ་ཏི. ཏ་སྶ ཁོ ཨེ་སཱ, ཨ་གྒི་ཝེ་སྶ་ན, ཨུ་པྤ་ནྣཱ་པི སུ་ཁཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཨ་བྷཱ་ཝི་ཏ་ཏྟཱ ཀཱ་ཡ་སྶ, ཨུ་པྤ་ནྣཱ་པི དུ་ཀྑཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཨ་བྷཱ་ཝི་ཏ་ཏྟཱ ཙི་ཏྟ་སྶ. ཡ་སྶ ཀ་སྶ་ཙི, ཨ་གྒི་ཝེ་སྶ་ན, ཨེ་ཝཾ ཨུ་བྷ་ཏོ་པ་ཀྑཾ ཨུ་པྤ་ནྣཱ་པི སུ་ཁཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཨ་བྷཱ་ཝི་ཏ་ཏྟཱ ཀཱ་ཡ་སྶ, ཨུ་པྤ་ནྣཱ་པི དུ་ཀྑཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛ་ཏི ཨ་བྷཱ་ཝི་ཏ་ཏྟཱ ཙི་ཏྟ་སྶ, ཨེ་ཝཾ ཁོ, ཨ་གྒི་ཝེ་སྶ་ན, ཨ་བྷཱ་ཝི་ཏ་ཀཱ་ཡོ ཙ ཧོ་ཏི ཨ་བྷཱ་ཝི་ཏ་ཙི་ཏྟོ ཙ.

༣༦༩. ‘‘ཀ་ཐ་ཉྩ, ཨ་གྒི་ཝེ་སྶ་ན, བྷཱ་ཝི་ཏ་ཀཱ་ཡོ ཙ ཧོ་ཏི བྷཱ་ཝི་ཏ་ཙི་ཏྟོ ཙ? ཨི་དྷ, ཨ་གྒི་ཝེ་སྶ་ན, སུ་ཏ་ཝ་ཏོ ཨ་རི་ཡ་སཱ་ཝ་ཀ་སྶ ཨུ་པྤ་ཛྫ་ཏི སུ་ཁཱ ཝེ་ད་ནཱ. སོ སུ་ཁཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ན སུ་ཁ་སཱ་རཱ་གཱི ཙ ཧོ་ཏི, ན སུ་ཁ་སཱ་རཱ་གི་ཏ་ཉྩ ཨཱ་པ་ཛྫ་ཏི. ཏ་སྶ སཱ སུ་ཁཱ ཝེ་ད་ནཱ ནི་རུ་ཛ྄ཛྷ་ཏི. སུ་ཁཱ་ཡ ཝེ་ད་ནཱ་ཡ ནི་རོ་དྷཱ ཨུ་པྤ་ཛྫ་ཏི དུ་ཀྑཱ ཝེ་ད་ནཱ. སོ དུ་ཀྑཱ་ཡ ཝེ་ད་ནཱ་ཡ ཕུ་ཊྛོ ས་མཱ་ནོ ན སོ་ཙ་ཏི ན ཀི་ལ་མ་ཏི ན པ་རི་དེ་ཝ་ཏི ན ཨུ་ར་ཏྟཱ་ལི༹ཾ ཀ་ནྡ་ཏི ན ས་མྨོ་ཧཾ ཨཱ་པ་ཛྫ་ཏི. ཏ་སྶ ཁོ ཨེ་སཱ, ཨ་གྒི་ཝེ་སྶ་ན, ཨུ་པྤ་ནྣཱ་པི སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི བྷཱ་ཝི་ཏ་ཏྟཱ ཀཱ་ཡ་སྶ, ཨུ་པྤ་ནྣཱ་པི དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི བྷཱ་ཝི་ཏ་ཏྟཱ ཙི་ཏྟ་སྶ. ཡ་སྶ ཀ་སྶ་ཙི, ཨ་གྒི་ཝེ་སྶ་ན, ཨེ་ཝཾ ཨུ་བྷ་ཏོ་པ་ཀྑཾ ཨུ་པྤ་ནྣཱ་པི སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི བྷཱ་ཝི་ཏ་ཏྟཱ ཀཱ་ཡ་སྶ, ཨུ་པྤ་ནྣཱ་པི དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི བྷཱ་ཝི་ཏ་ཏྟཱ ཙི་ཏྟ་སྶ. ཨེ་ཝཾ ཁོ, ཨ་གྒི་ཝེ་སྶ་ན, བྷཱ་ཝི་ཏ་ཀཱ་ཡོ ཙ ཧོ་ཏི བྷཱ་ཝི་ཏ་ཙི་ཏྟོ ཙཱ’’ཏི.

༣༧༠. ‘‘ཨེ་ཝཾ པ་ས་ནྣོ ཨ་ཧཾ བྷོ་ཏོ གོ་ཏ་མ་སྶ! བྷ་ཝ་ཉྷི གོ་ཏ་མོ བྷཱ་ཝི་ཏ་ཀཱ་ཡོ ཙ ཧོ་ཏི བྷཱ་ཝི་ཏ་ཙི་ཏྟོ ཙཱ’’ཏི. ‘‘ཨ་དྡྷཱ ཁོ ཏེ ཨ་ཡཾ, ཨ་གྒི་ཝེ་སྶ་ན, ཨཱ་ས་ཛྫ ཨུ་པ་ནཱི་ཡ ཝཱ་ཙཱ བྷཱ་སི་ཏཱ, ཨ་པི ཙ ཏེ ཨ་ཧཾ བྱཱ་ཀ་རི་སྶཱ་མི. ཡ་ཏོ ཁོ ཨ་ཧཾ, ཨ་གྒི་ཝེ་སྶ་ན, ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏོ, ཏཾ ཝ་ཏ མེ ཨུ་པྤ་ནྣཱ ཝཱ སུ་ཁཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཋ་སྶ་ཏི, ཨུ་པྤ་ནྣཱ ཝཱ དུ་ཀྑཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཋ་སྶ་ཏཱི་ཏི ནེ་ཏཾ ཋཱ་ནཾ [ནེ་ཏཾ ཁོ་ཋཱ་ནཾ (སཱི. པཱི.)] ཝི་ཛྫ་ཏཱི’’ཏི.

‘‘ན ཧི ནཱུ་ན [ན ཧ་ནཱུ་ན (སཱི. སྱཱ. ཀཾ. པཱི.)] བྷོ་ཏོ གོ་ཏ་མ་སྶ ཨུ་པྤ་ཛྫ་ཏི ཏ་ཐཱ་རཱུ་པཱ སུ་ཁཱ ཝེ་ད་ནཱ ཡ་ཐཱ་རཱུ་པཱ ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛེ་ཡྻ; ན ཧི ནཱུ་ན བྷོ་ཏོ གོ་ཏ་མ་སྶ ཨུ་པྤ་ཛྫ་ཏི ཏ་ཐཱ་རཱུ་པཱ དུ་ཀྑཱ ཝེ་ད་ནཱ ཡ་ཐཱ་རཱུ་པཱ ཨུ་པྤ་ནྣཱ དུ་ཀྑཱ ཝེ་ད་ནཱ ཙི་ཏྟཾ པ་རི་ཡཱ་དཱ་ཡ ཏི་ཊྛེ་ཡྻཱ’’ཏི.

༣༧༡. ‘‘ཀི་ཉྷི ནོ སི་ཡཱ, ཨ་གྒི་ཝེ་སྶ་ན? ཨི་དྷ མེ, ཨ་གྒི་ཝེ་སྶ་ན, པུ་བྦེ་ཝ ས་མྦོ་དྷཱ ཨ་ན་བྷི་ས་མྦུ་དྡྷ་སྶ བོ་དྷི་ས་ཏྟ་སྶེ་ཝ ས་ཏོ ཨེ་ཏ་ད་ཧོ་སི – ‘ས་མྦཱ་དྷོ གྷ་རཱ་ཝཱ་སོ ར་ཛཱ་པ་ཐོ, ཨ་བྦྷོ་ཀཱ་སོ པ་བྦ་ཛྫཱ. ན་ཡི་དཾ སུ་ཀ་རཾ ཨ་གཱ་རཾ ཨ་ཛ྄ཛྷཱ་ཝ་ས་ཏཱ ཨེ་ཀ་ནྟ་པ་རི་པུ་ཎྞཾ ཨེ་ཀ་ནྟ་པ་རི་སུ་དྡྷཾ ས་ངྑ་ལི་ཁི་ཏཾ བྲ་ཧྨ་ཙ་རི་ཡཾ ཙ་རི་ཏུཾ. ཡཾ་ནཱུ་ནཱ་ཧཾ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ཨ་པ་རེ་ན ས་མ་ཡེ་ན ད་ཧ་རོ་ཝ ས་མཱ་ནོ, སུ་སུ་ཀཱ་ལ༹་ཀེ་སོ བྷ་དྲེ་ན ཡོ་བྦ་ནེ་ན ས་མ་ནྣཱ་ག་ཏོ པ་ཋ་མེ་ན ཝ་ཡ་སཱ, ཨ་ཀཱ་མ་ཀཱ་ནཾ མཱ་ཏཱ་པི་ཏཱུ་ནཾ ཨ་སྶུ་མུ་ཁཱ་ནཾ རུ་ད་ནྟཱ་ནཾ, ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛིཾ. སོ ཨེ་ཝཾ པ་བྦ་ཛི་ཏོ ས་མཱ་ནོ ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཨི་ཙྪཱ་མ་ཧཾ, ཨཱ་ཝུ་སོ ཀཱ་ལཱ་མ, ཨི་མ་སྨིཾ དྷ་མྨ་ཝི་ན་ཡེ བྲ་ཧྨ་ཙ་རི་ཡཾ ཙ་རི་ཏུ’ནྟི. ཨེ་ཝཾ ཝུ་ཏྟེ, ཨ་གྒི་ཝེ་སྶ་ན, ཨཱ་ལཱ༹་རོ ཀཱ་ལཱ་མོ མཾ ཨེ་ཏ་ད་ཝོ་ཙ – ‘ཝི་ཧ་ར་ཏཱ་ཡ་སྨཱ, ཏཱ་དི་སོ ཨ་ཡཾ དྷ་མྨོ ཡ་ཏྠ ཝི་ཉྙཱུ པུ་རི་སོ ན་ཙི་ར་སྶེ་ཝ ས་ཀཾ ཨཱ་ཙ་རི་ཡ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རེ་ཡྻཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ པ་རི་ཡཱ་པུ་ཎིཾ. སོ ཁོ ཨ་ཧཾ, ཨ་གྒི་ཝེ་སྶ་ན, ཏཱ་ཝ་ཏ་ཀེ་ནེ་ཝ ཨོ་ཊྛ་པ་ཧ་ཏ་མ་ཏྟེ་ན ལ་པི་ཏ་ལཱ་པ་ན་མ་ཏྟེ་ན ཉཱ་ཎ་ཝཱ་ད་ཉྩ ཝ་དཱ་མི ཐེ་ར་ཝཱ་ད་ཉྩ, ‘ཛཱ་ནཱ་མི པ་སྶཱ་མཱི’ཏི ཙ པ་ཊི་ཛཱ་ནཱ་མི, ཨ་ཧ་ཉྩེ་ཝ ཨ་ཉྙེ ཙ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ ཨཱ་ལཱ༹་རོ ཀཱ་ལཱ་མོ ཨི་མཾ དྷ་མྨཾ ཀེ་ཝ་ལཾ ས་དྡྷཱ་མ་ཏྟ་ཀེ་ན ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་ཏི, ཨ་དྡྷཱ ཨཱ་ལཱ༹་རོ ཀཱ་ལཱ་མོ ཨི་མཾ དྷ་མྨཾ ཛཱ་ནཾ པ་སྶཾ ཝི་ཧ་ར་ཏཱི’’’ཏི.

‘‘ཨ་ཐ ཁྭཱ་ཧཾ, ཨ་གྒི་ཝེ་སྶ་ན, ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཀི་ཏྟཱ་ཝ་ཏཱ ནོ, ཨཱ་ཝུ་སོ ཀཱ་ལཱ་མ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སཱི’ཏི? ཨེ་ཝཾ ཝུ་ཏྟེ, ཨ་གྒི་ཝེ་སྶ་ན, ཨཱ་ལཱ༹་རོ ཀཱ་ལཱ་མོ ཨཱ་ཀི་ཉྩ་ཉྙཱ་ཡ་ཏ་ནཾ པ་ཝེ་དེ་སི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ས་དྡྷཱ, མ་ཡ྄ཧཾ་པ་ཏྠི ས་དྡྷཱ; ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ཝཱི་རི་ཡཾ, མ་ཡ྄ཧཾ་པ་ཏྠི ཝཱི་རི་ཡཾ; ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ས་ཏི, མ་ཡ྄ཧཾ་པ་ཏྠི ས་ཏི; ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི ས་མཱ་དྷི, མ་ཡ྄ཧཾ་པ་ཏྠི ས་མཱ་དྷི; ན ཁོ ཨཱ་ལཱ༹་ར་སྶེ་ཝ ཀཱ་ལཱ་མ་སྶ ཨ་ཏྠི པ་ཉྙཱ, མ་ཡ྄ཧཾ་པ་ཏྠི པ་ཉྙཱ; ཡཾ་ནཱུ་ནཱ་ཧཾ ཡཾ དྷ་མྨཾ ཨཱ་ལཱ༹་རོ ཀཱ་ལཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་ཏི ཏ་སྶ དྷ་མྨ་སྶ ས་ཙྪི་ཀི་རི་ཡཱ་ཡ པ་ད་ཧེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སིཾ.

‘‘ཨ་ཐ ཁྭཱ་ཧཾ, ཨ་གྒི་ཝེ་སྶ་ན, ཡེ་ན ཨཱ་ལཱ༹་རོ ཀཱ་ལཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨཱ་ལཱ༹་རཾ ཀཱ་ལཱ་མཾ ཨེ་ཏ་ད་ཝོ་ཙཾ – ‘ཨེ་ཏྟཱ་ཝ་ཏཱ ནོ, ཨཱ་ཝུ་སོ ཀཱ་ལཱ་མ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི? ‘ཨེ་ཏྟཱ་ཝ་ཏཱ ཁོ ཨ་ཧཾ, ཨཱ་ཝུ་སོ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མཱི’ཏི. ‘ཨ་ཧ་མྤི ཁོ, ཨཱ་ཝུ་སོ, ཨེ་ཏྟཱ་ཝ་ཏཱ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི’ཏི. ‘ལཱ་བྷཱ ནོ, ཨཱ་ཝུ་སོ, སུ་ལ་དྡྷཾ ནོ, ཨཱ་ཝུ་སོ, ཡེ མ་ཡཾ ཨཱ་ཡ་སྨ་ནྟཾ ཏཱ་དི་སཾ ས་བྲ་ཧྨ་ཙཱ་རིཾ པ་སྶཱ་མ. ཨི་ཏི ཡཱ་ཧཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མི ཏཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི; ཡཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི ཏ་མ་ཧཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་མི. ཨི་ཏི ཡཱ་ཧཾ དྷ་མྨཾ ཛཱ་ནཱ་མི ཏཾ ཏྭཾ དྷ་མྨཾ ཛཱ་ནཱ་སི; ཡཾ ཏྭཾ དྷ་མྨཾ ཛཱ་ནཱ་སི ཏ་མ་ཧཾ དྷ་མྨཾ ཛཱ་ནཱ་མི. ཨི་ཏི ཡཱ་དི་སོ ཨ་ཧཾ ཏཱ་དི་སོ ཏུ་ཝཾ, ཡཱ་དི་སོ ཏུ་ཝཾ ཏཱ་དི་སོ ཨ་ཧཾ. ཨེ་ཧི དཱ་ནི, ཨཱ་ཝུ་སོ, ཨུ་བྷོ་ཝ ས་ནྟཱ ཨི་མཾ ག་ཎཾ པ་རི་ཧ་རཱ་མཱ’ཏི. ཨི་ཏི ཁོ, ཨ་གྒི་ཝེ་སྶ་ན, ཨཱ་ལཱ༹་རོ ཀཱ་ལཱ་མོ ཨཱ་ཙ་རི་ཡོ མེ ས་མཱ་ནོ (ཨ་ཏྟ་ནོ) [( ) ན་ཏྠི (སཱི. པཱི.)] ཨ་ནྟེ་ཝཱ་སིཾ མཾ ས་མཱ་ནཾ ཨ་ཏྟ་ནཱ ས་མ་ས་མཾ ཋ་པེ་སི, ཨུ་ལཱ༹་རཱ་ཡ ཙ མཾ པཱུ་ཛཱ་ཡ པཱུ་ཛེ་སི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ནཱ་ཡཾ དྷ་མྨོ ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི, ཡཱ་ཝ་དེ་ཝ ཨཱ་ཀི་ཉྩ་ཉྙཱ་ཡ་ཏ་ནཱུ་པ་པ་ཏྟི་ཡཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ཏཾ དྷ་མྨཾ ཨ་ན་ལ་ངྐ་རི་ཏྭཱ ཏ་སྨཱ དྷ་མྨཱ ནི་བྦི་ཛྫ ཨ་པ་ཀྐ་མིཾ.

༣༧༢. ‘‘སོ ཁོ ཨ་ཧཾ, ཨ་གྒི་ཝེ་སྶ་ན, ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཨི་ཙྪཱ་མ་ཧཾ, ཨཱ་ཝུ་སོ [པ་སྶ མ. ནི. ༡.༢༧༨ པཱ་ས་རཱ་སི་སུ་ཏྟེ] ཨི་མ་སྨིཾ དྷ་མྨ་ཝི་ན་ཡེ བྲ་ཧྨ་ཙ་རི་ཡཾ ཙ་རི་ཏུ’ནྟི. ཨེ་ཝཾ ཝུ་ཏྟེ, ཨ་གྒི་ཝེ་སྶ་ན, ཨུ་ད་ཀོ རཱ་མ་པུ་ཏྟོ མཾ ཨེ་ཏ་ད་ཝོ་ཙ – ‘ཝི་ཧ་ར་ཏཱ་ཡ་སྨཱ, ཏཱ་དི་སོ ཨ་ཡཾ དྷ་མྨོ ཡ་ཏྠ ཝི་ཉྙཱུ པུ་རི་སོ ན་ཙི་ར་སྶེ་ཝ ས་ཀཾ ཨཱ་ཙ་རི་ཡ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རེ་ཡྻཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ པ་རི་ཡཱ་པུ་ཎིཾ. སོ ཁོ ཨ་ཧཾ, ཨ་གྒི་ཝེ་སྶ་ན, ཏཱ་ཝ་ཏ་ཀེ་ནེ་ཝ ཨོ་ཊྛ་པ་ཧ་ཏ་མ་ཏྟེ་ན ལ་པི་ཏ་ལཱ་པ་ན་མ་ཏྟེ་ན ཉཱ་ཎ་ཝཱ་ད་ཉྩ ཝ་དཱ་མི ཐེ་ར་ཝཱ་ད་ཉྩ, ‘ཛཱ་ནཱ་མི པ་སྶཱ་མཱི’ཏི ཙ པ་ཊི་ཛཱ་ནཱ་མི, ཨ་ཧ་ཉྩེ་ཝ ཨ་ཉྙེ ཙ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ རཱ་མོ ཨི་མཾ དྷ་མྨཾ ཀེ་ཝ་ལཾ ས་དྡྷཱ་མ་ཏྟ་ཀེ་ན ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སི. ཨ་དྡྷཱ རཱ་མོ ཨི་མཾ དྷ་མྨཾ ཛཱ་ནཾ པ་སྶཾ ཝི་ཧཱ་སཱི’ཏི. ཨ་ཐ ཁྭཱ་ཧཾ, ཨ་གྒི་ཝེ་སྶ་ན, ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཀི་ཏྟཱ་ཝ་ཏཱ ནོ, ཨཱ་ཝུ་སོ རཱ་མོ, ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སཱི’ཏི? ཨེ་ཝཾ ཝུ་ཏྟེ, ཨ་གྒི་ཝེ་སྶ་ན, ཨུ་ད་ཀོ རཱ་མ་པུ་ཏྟོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ པ་ཝེ་དེ་སི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ རཱ་མ་སྶེ་ཝ ཨ་ཧོ་སི ས་དྡྷཱ, མ་ཡ྄ཧཾ་པ་ཏྠི ས་དྡྷཱ; ན ཁོ རཱ་མ་སྶེ་ཝ ཨ་ཧོ་སི ཝཱི་རི་ཡཾ, མ་ཡ྄ཧཾ་པ་ཏྠི ཝཱི་རི་ཡཾ; ན ཁོ རཱ་མ་སྶེ་ཝ ཨ་ཧོ་སི ས་ཏི, མ་ཡ྄ཧཾ་པ་ཏྠི ས་ཏི; ན ཁོ རཱ་མ་སྶེ་ཝ ཨ་ཧོ་སི ས་མཱ་དྷི, མ་ཡ྄ཧཾ་པ་ཏྠི ས་མཱ་དྷི; ན ཁོ རཱ་མ་སྶེ་ཝ ཨ་ཧོ་སི པ་ཉྙཱ, མ་ཡ྄ཧཾ་པ་ཏྠི པ་ཉྙཱ; ཡཾ་ནཱུ་ནཱ་ཧཾ ཡཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི་ཏི པ་ཝེ་དེ་སི ཏ་སྶ དྷ་མྨ་སྶ ས་ཙྪི་ཀི་རི་ཡཱ་ཡ པ་ད་ཧེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ན་ཙི་ར་སྶེ་ཝ ཁི་པྤ་མེ་ཝ ཏཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སིཾ.

‘‘ཨ་ཐ ཁྭཱ་ཧཾ, ཨ་གྒི་ཝེ་སྶ་ན, ཡེ་ན ཨུ་ད་ཀོ རཱ་མ་པུ་ཏྟོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཨུ་ད་ཀཾ རཱ་མ་པུ་ཏྟཾ ཨེ་ཏ་ད་ཝོ་ཙཾ – ‘ཨེ་ཏྟཱ་ཝ་ཏཱ ནོ, ཨཱ་ཝུ་སོ, རཱ་མོ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི? ‘ཨེ་ཏྟཱ་ཝ་ཏཱ ཁོ, ཨཱ་ཝུ་སོ, རཱ་མོ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སཱི’ཏི. ‘ཨ་ཧ་མྤི ཁོ, ཨཱ་ཝུ་སོ, ཨེ་ཏྟཱ་ཝ་ཏཱ ཨི་མཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རཱ་མཱི’ཏི. ‘ལཱ་བྷཱ ནོ, ཨཱ་ཝུ་སོ, སུ་ལ་དྡྷཾ ནོ, ཨཱ་ཝུ་སོ, ཡེ མ་ཡཾ ཨཱ་ཡ་སྨ་ནྟཾ ཏཱ་དི་སཾ ས་བྲ་ཧྨ་ཙཱ་རིཾ པ་སྶཱ་མ. ཨི་ཏི ཡཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སི, ཏཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི; ཡཾ ཏྭཾ དྷ་མྨཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་སི, ཏཾ དྷ་མྨཾ རཱ་མོ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ པ་ཝེ་དེ་སི. ཨི་ཏི ཡཾ དྷ་མྨཾ རཱ་མོ ཨ་བྷི་ཉྙཱ་སི ཏཾ ཏྭཾ དྷ་མྨཾ ཛཱ་ནཱ་སི; ཡཾ ཏྭཾ དྷ་མྨཾ ཛཱ་ནཱ་སི ཏཾ དྷ་མྨཾ རཱ་མོ ཨ་བྷི་ཉྙཱ་སི. ཨི་ཏི ཡཱ་དི་སོ རཱ་མོ ཨ་ཧོ་སི ཏཱ་དི་སོ ཏུ་ཝཾ; ཡཱ་དི་སོ ཏུ་ཝཾ ཏཱ་དི་སོ རཱ་མོ ཨ་ཧོ་སི. ཨེ་ཧི དཱ་ནི, ཨཱ་ཝུ་སོ, ཏུ་ཝཾ ཨི་མཾ ག་ཎཾ པ་རི་ཧ་རཱ’ཏི. ཨི་ཏི ཁོ, ཨ་གྒི་ཝེ་སྶ་ན, ཨུ་ད་ཀོ རཱ་མ་པུ་ཏྟོ ས་བྲ་ཧྨ་ཙཱ་རཱི མེ ས་མཱ་ནོ ཨཱ་ཙ་རི་ཡ་ཊྛཱ་ནེ ཙ མཾ ཋ་པེ་སི, ཨུ་ལཱ༹་རཱ་ཡ ཙ མཾ པཱུ་ཛཱ་ཡ པཱུ་ཛེ་སི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ནཱ་ཡཾ དྷ་མྨོ ནི་བྦི་དཱ་ཡ ན ཝི་རཱ་གཱ་ཡ ན ནི་རོ་དྷཱ་ཡ ན ཨུ་པ་ས་མཱ་ཡ ན ཨ་བྷི་ཉྙཱ་ཡ ན ས་མྦོ་དྷཱ་ཡ ན ནི་བྦཱ་ནཱ་ཡ སཾ་ཝ་ཏྟ་ཏི, ཡཱ་ཝ་དེ་ཝ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཱུ་པ་པ་ཏྟི་ཡཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ཏཾ དྷ་མྨཾ ཨ་ན་ལ་ངྐ་རི་ཏྭཱ ཏ་སྨཱ དྷ་མྨཱ ནི་བྦི་ཛྫ ཨ་པ་ཀྐ་མིཾ.

༣༧༣. ‘‘སོ ཁོ ཨ་ཧཾ, ཨ་གྒི་ཝེ་སྶ་ན, ཀིཾ་ཀུ་ས་ལ་ག་ཝེ་སཱི ཨ་ནུ་ཏྟ་རཾ ས་ནྟི་ཝ་ར་པ་དཾ པ་རི་ཡེ་ས་མཱ་ནོ མ་ག་དྷེ་སུ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཨུ་རུ་ཝེ་ལཱ སེ་ནཱ་ནི་ག་མོ ཏ་ད་ཝ་ས་རིཾ. ཏ་ཏྠ་དྡ་སཾ ར་མ་ཎཱི་ཡཾ བྷཱུ་མི་བྷཱ་གཾ, པཱ་སཱ་དི་ཀ་ཉྩ ཝ་ན་ས་ཎྜཾ, ན་དི་ཉྩ ས་ནྡ་ནྟིཾ སེ་ཏ་ཀཾ སུ་པ་ཏི་ཏྠཾ ར་མ་ཎཱི་ཡཾ, ས་མ་ནྟཱ ཙ གོ་ཙ་ར་གཱ་མཾ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ར་མ་ཎཱི་ཡོ ཝ་ཏ, བྷོ, བྷཱུ་མི་བྷཱ་གོ, པཱ་སཱ་དི་ཀོ ཙ ཝ་ན་ས་ཎྜོ, ན་དཱི ཙ ས་ནྡ་ཏི སེ་ཏ་ཀཱ སུ་པ་ཏི་ཏྠཱ ར་མ་ཎཱི་ཡཱ, ས་མ་ནྟཱ ཙ གོ་ཙ་ར་གཱ་མོ. ཨ་ལཾ ཝ་ཏི་དཾ ཀུ་ལ་པུ་ཏྟ་སྶ པ་དྷཱ་ན་ཏྠི་ཀ་སྶ པ་དྷཱ་ནཱ་ཡཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ཏ་ཏྠེ་ཝ ནི་སཱི་དིཾ ‘ཨ་ལ་མི་དཾ པ་དྷཱ་ནཱ་ཡཱ’ཏི.

༣༧༤. ‘‘ཨ་པི་སྶུ་མཾ, ཨ་གྒི་ཝེ་སྶ་ན, ཏི་སྶོ ཨུ་པ་མཱ པ་ཊི་བྷཾ་སུ ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. སེ་ཡྻ་ཐཱ་པི, ཨ་གྒི་ཝེ་སྶ་ན, ཨ་ལླཾ ཀ་ཊྛཾ ས་སྣེ་ཧཾ ཨུ་ད་ཀེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, ཨ་གྒི་ཝེ་སྶ་ན, ཨ་པི ནུ སོ པུ་རི་སོ ཨ་མུཾ ཨ་ལླཾ ཀ་ཊྛཾ ས་སྣེ་ཧཾ, ཨུ་ད་ཀེ ནི་ཀྑི་ཏྟཾ, ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ, ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ནོ ཧི་དཾ, བྷོ གོ་ཏ་མ’’. ‘‘ཏཾ ཀི་སྶ ཧེ་ཏུ’’? ‘‘ཨ་དུ་ཉྷི, བྷོ གོ་ཏ་མ, ཨ་ལླཾ ཀ་ཊྛཾ ས་སྣེ་ཧཾ, ཏ་ཉྩ པ་ན ཨུ་ད་ཀེ ནི་ཀྑི་ཏྟཾ. ཡཱ་ཝ་དེ་ཝ ཙ པ་ན སོ པུ་རི་སོ ཀི་ལ་མ་ཐ་སྶ ཝི་གྷཱ་ཏ་སྶ བྷཱ་གཱི ཨ་སྶཱ’’ཏི. ‘‘ཨེ་ཝ་མེ་ཝ ཁོ, ཨ་གྒི་ཝེ་སྶ་ན, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཨ་ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ, སོ ཙ ཨ་ཛ྄ཛྷ་ཏྟཾ ན སུ་པྤ་ཧཱི་ནོ ཧོ་ཏི, ན སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, ཨ་གྒི་ཝེ་སྶ་ན, པ་ཋ་མཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.

༣༧༥. ‘‘ཨ་པ་རཱ་པི ཁོ མཾ, ཨ་གྒི་ཝེ་སྶ་ན, དུ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. སེ་ཡྻ་ཐཱ་པི, ཨ་གྒི་ཝེ་སྶ་ན, ཨ་ལླཾ ཀ་ཊྛཾ ས་སྣེ་ཧཾ, ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, ཨ་གྒི་ཝེ་སྶ་ན, ཨ་པི ནུ སོ པུ་རི་སོ ཨ་མུཾ ཨ་ལླཾ ཀ་ཊྛཾ ས་སྣེ་ཧཾ, ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ, ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ནོ ཧི་དཾ, བྷོ གོ་ཏ་མ’’. ‘‘ཏཾ ཀི་སྶ ཧེ་ཏུ’’? ‘‘ཨ་དུ་ཉྷི, བྷོ གོ་ཏ་མ, ཨ་ལླཾ ཀ་ཊྛཾ ས་སྣེ་ཧཾ, ཀི་ཉྩཱ་པི ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ. ཡཱ་ཝ་དེ་ཝ ཙ པ་ན སོ པུ་རི་སོ ཀི་ལ་མ་ཐ་སྶ ཝི་གྷཱ་ཏ་སྶ བྷཱ་གཱི ཨ་སྶཱ་ཏི. ཨེ་ཝ་མེ་ཝ ཁོ, ཨ་གྒི་ཝེ་སྶ་ན, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ སོ ཙ ཨ་ཛ྄ཛྷ་ཏྟཾ ན སུ་པྤ་ཧཱི་ནོ ཧོ་ཏི, ན སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨ་བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, ཨ་གྒི་ཝེ་སྶ་ན, དུ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ’’.

༣༧༦. ‘‘ཨ་པ་རཱ་པི ཁོ མཾ, ཨ་གྒི་ཝེ་སྶ་ན, ཏ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. སེ་ཡྻ་ཐཱ་པི, ཨ་གྒི་ཝེ་སྶ་ན, སུ་ཀྑཾ ཀ་ཊྛཾ ཀོ་ལཱ༹་པཾ, ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ. ཨ་ཐ པུ་རི་སོ ཨཱ་ག་ཙྪེ་ཡྻ ཨུ་ཏྟ་རཱ་ར་ཎིཾ ཨཱ་དཱ་ཡ – ‘ཨ་གྒིཾ ཨ་བྷི་ནི་བྦ་ཏྟེ་སྶཱ་མི, ཏེ་ཛོ པཱ་ཏུ་ཀ་རི་སྶཱ་མཱི’ཏི. ཏཾ ཀིཾ མ་ཉྙ་སི, ཨ་གྒི་ཝེ་སྶ་ན, ཨ་པི ནུ སོ པུ་རི་སོ ཨ་མུཾ སུ་ཀྑཾ ཀ་ཊྛཾ ཀོ་ལཱ༹་པཾ, ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟཾ, ཨུ་ཏྟ་རཱ་ར་ཎིཾ ཨཱ་དཱ་ཡ ཨ་བྷི་མ་ནྠེ་ནྟོ ཨ་གྒིཾ ཨ་བྷི་ནི་བྦ་ཏྟེ་ཡྻ, ཏེ་ཛོ པཱ་ཏུ་ཀ་རེ་ཡྻཱ’’ཏི? ‘‘ཨེ་ཝཾ, བྷོ གོ་ཏ་མ’’. ‘‘ཏཾ ཀི་སྶ ཧེ་ཏུ’’? ‘‘ཨ་དུ་ཉྷི, བྷོ གོ་ཏ་མ, སུ་ཀྑཾ ཀ་ཊྛཾ ཀོ་ལཱ༹་པཾ, ཏ་ཉྩ པ་ན ཨཱ་ར་ཀཱ ཨུ་ད་ཀཱ ཐ་ལེ ནི་ཀྑི་ཏྟ’’ནྟི. ‘‘ཨེ་ཝ་མེ་ཝ ཁོ, ཨ་གྒི་ཝེ་སྶ་ན, ཡེ ཧི ཀེ་ཙི ས་མ་ཎཱ ཝཱ བྲཱ་ཧྨ་ཎཱ ཝཱ ཀཱ་ཡེ་ན ཙེ་ཝ ཙི་ཏྟེ་ན ཙ ཀཱ་མེ་ཧི ཝཱུ་པ་ཀ་ཊྛཱ ཝི་ཧ་ར་ནྟི, ཡོ ཙ ནེ་སཾ ཀཱ་མེ་སུ ཀཱ་མ་ཙྪ་ནྡོ ཀཱ་མ་སྣེ་ཧོ ཀཱ་མ་མུ་ཙྪཱ ཀཱ་མ་པི་པཱ་སཱ ཀཱ་མ་པ་རི་ལཱ༹་ཧོ, སོ ཙ ཨ་ཛ྄ཛྷ་ཏྟཾ སུ་པྤ་ཧཱི་ནོ ཧོ་ཏི སུ་པྤ་ཊི་པྤ་སྶ་དྡྷོ, ཨོ་པ་ཀྐ་མི་ཀཱ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ནོ ཙེ་པི ཏེ བྷོ་ནྟོ ས་མ་ཎ་བྲཱ་ཧྨ་ཎཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, བྷ་བྦཱ་ཝ ཏེ ཉཱ་ཎཱ་ཡ ད་སྶ་ནཱ་ཡ ཨ་ནུ་ཏྟ་རཱ་ཡ ས་མྦོ་དྷཱ་ཡ. ཨ་ཡཾ ཁོ མཾ, ཨ་གྒི་ཝེ་སྶ་ན, ཏ་ཏི་ཡཱ ཨུ་པ་མཱ པ་ཊི་བྷཱ་སི ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ. ཨི་མཱ ཁོ མཾ, ཨ་གྒི་ཝེ་སྶ་ན, ཏི་སྶོ ཨུ་པ་མཱ པ་ཊི་བྷཾ་སུ ཨ་ན་ཙྪ་རི་ཡཱ པུ་བྦེ ཨ་སྶུ་ཏ་པུ་བྦཱ.’’

༣༧༧. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ད་ནྟེ་བྷི ད་ནྟ་མཱ་དྷཱ་ཡ [པ་སྶ མ. ནི. ༡.༢༢༡ ཝི་ཏ་ཀྐ་ས་ཎྛཱ་ན་སུ་ཏྟེ], ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷེ་ཡྻཾ ཨ་བྷི་ནི་པྤཱི་ལེ༹་ཡྻཾ ཨ་བྷི་ས་ནྟཱ་པེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ད་ནྟེ་བྷི ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷཱ་མི ཨ་བྷི་ནི་པྤཱི་ལེ༹་མི ཨ་བྷི་ས་ནྟཱ་པེ་མི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ད་ནྟེ་བྷི ད་ནྟ་མཱ་དྷཱ་ཡ ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷ་ཏོ ཨ་བྷི་ནི་པྤཱི་ལ༹་ཡ་ཏོ ཨ་བྷི་ས་ནྟཱ་པ་ཡ་ཏོ ཀ་ཙྪེ་ཧི སེ་དཱ མུ་ཙྩ་ནྟི. སེ་ཡྻ་ཐཱ་པི, ཨ་གྒི་ཝེ་སྶ་ན, བ་ལ་ཝཱ པུ་རི་སོ དུ་བྦ་ལ་ཏ་རཾ པུ་རི་སཾ སཱི་སེ ཝཱ ག་ཧེ་ཏྭཱ ཁ་ནྡྷེ ཝཱ ག་ཧེ་ཏྭཱ ཨ་བྷི་ནི་གྒ་ཎྷེ་ཡྻ ཨ་བྷི་ནི་པྤཱི་ལེ༹་ཡྻ ཨ་བྷི་ས་ནྟཱ་པེ་ཡྻ, ཨེ་ཝ་མེ་ཝ ཁོ མེ, ཨ་གྒི་ཝེ་སྶ་ན, ད་ནྟེ་བྷི ད་ནྟ་མཱ་དྷཱ་ཡ, ཛི་ཝ྄ཧཱ་ཡ ཏཱ་ལུཾ ཨཱ་ཧ་ཙྩ, ཙེ་ཏ་སཱ ཙི་ཏྟཾ ཨ་བྷི་ནི་གྒ་ཎྷ་ཏོ ཨ་བྷི་ནི་པྤཱི་ལ༹་ཡ་ཏོ ཨ་བྷི་ས་ནྟཱ་པ་ཡ་ཏོ ཀ་ཙྪེ་ཧི སེ་དཱ མུ་ཙྩ་ནྟི. ཨཱ་ར་དྡྷཾ ཁོ པ་ན མེ, ཨ་གྒི་ཝེ་སྶ་ན, ཝཱི་རི་ཡཾ ཧོ་ཏི ཨ་ས་ལླཱི་ནཾ, ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ, སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

༣༧༨. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཨ་པྤཱ་ཎ་ཀཾ་ཡེ་ཝ ཛྷཱ་ནཾ ཛྷཱ་ཡེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ ཨུ་པ་རུ་ནྡྷིཾ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཀ་ཎྞ་སོ་ཏེ་ཧི ཝཱ་ཏཱ་ནཾ ནི་ཀྑ་མ་ནྟཱ་ནཾ ཨ་དྷི་མ་ཏྟོ ས་དྡོ ཧོ་ཏི. སེ་ཡྻ་ཐཱ་པི ནཱ་མ ཀ་མྨཱ་ར་ག་གྒ་རི་ཡཱ དྷ་མ་མཱ་ནཱ་ཡ ཨ་དྷི་མ་ཏྟོ ས་དྡོ ཧོ་ཏི, ཨེ་ཝ་མེ་ཝ ཁོ མེ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཀ་ཎྞ་སོ་ཏེ་ཧི ཝཱ་ཏཱ་ནཾ ནི་ཀྑ་མ་ནྟཱ་ནཾ ཨ་དྷི་མ་ཏྟོ ས་དྡོ ཧོ་ཏི. ཨཱ་ར་དྡྷཾ ཁོ པ་ན མེ, ཨ་གྒི་ཝེ་སྶ་ན, ཝཱི་རི་ཡཾ ཧོ་ཏི ཨ་ས་ལླཱི་ནཾ ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ. སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཨ་པྤཱ་ཎ་ཀཾ་ཡེ་ཝ ཛྷཱ་ནཾ ཛྷཱ་ཡེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ ཨུ་པ་རུ་ནྡྷིཾ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟཱ ཝཱ་ཏཱ མུ་དྡྷ་ནི ཨཱུ་ཧ་ན་ནྟི [ཨཱུ་ཧ་ནྟི (སཱི.), ཨོ་ཧ་ན་ནྟི (སྱཱ. ཀཾ.), ཨུ་ཧ་ན་ནྟི (ཀ.)]. སེ་ཡྻ་ཐཱ་པི, ཨ་གྒི་ཝེ་སྶ་ན, བ་ལ་ཝཱ པུ་རི་སོ ཏི་ཎྷེ་ན སི་ཁ་རེ་ན མུ་དྡྷ་ནི ཨ་བྷི་མ་ཏྠེ་ཡྻ [མུ་དྡྷཱ་ནཾ ཨ་བྷི་མ་ནྠེ་ཡྻ (སཱི. པཱི.), མུ་དྡྷཱ་ནཾ ཨ་བྷི་མ་ཏྠེ་ཡྻ (སྱཱ. ཀཾ.)], ཨེ་ཝ་མེ་ཝ ཁོ མེ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟཱ ཝཱ་ཏཱ མུ་དྡྷ་ནི ཨཱུ་ཧ་ན་ནྟི. ཨཱ་ར་དྡྷཾ ཁོ པ་ན མེ, ཨ་གྒི་ཝེ་སྶ་ན, ཝཱི་རི་ཡཾ ཧོ་ཏི ཨ་ས་ལླཱི་ནཾ ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ. སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཨ་པྤཱ་ཎ་ཀཾ་ཡེ་ཝ ཛྷཱ་ནཾ ཛྷཱ་ཡེ་ཡྻ’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ ཨུ་པ་རུ་ནྡྷིཾ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟོ ཀཱ་ཡ་སྨིཾ ཌཱ་ཧོ ཧོ་ཏི. སེ་ཡྻ་ཐཱ་པི, ཨ་གྒི་ཝེ་སྶ་ན, དྭེ བ་ལ་ཝ་ནྟོ པུ་རི་སཱ དུ་བྦ་ལ་ཏ་རཾ པུ་རི་སཾ ནཱ་ནཱ་བཱ་ཧཱ་སུ ག་ཧེ་ཏྭཱ ཨ་ངྒཱ་ར་ཀཱ་སུ་ཡཱ ས་ནྟཱ་པེ་ཡྻུཾ ས་མྤ་རི་ཏཱ་པེ་ཡྻུཾ, ཨེ་ཝ་མེ་ཝ ཁོ མེ, ཨ་གྒི་ཝེ་སྶ་ན, མུ་ཁ་ཏོ ཙ ནཱ་ས་ཏོ ཙ ཀ་ཎྞ་ཏོ ཙ ཨ་སྶཱ་ས་པ་སྶཱ་སེ་སུ ཨུ་པ་རུ་དྡྷེ་སུ ཨ་དྷི་མ་ཏྟོ ཀཱ་ཡ་སྨིཾ ཌཱ་ཧོ ཧོ་ཏི. ཨཱ་ར་དྡྷཾ ཁོ པ་ན མེ, ཨ་གྒི་ཝེ་སྶ་ན, ཝཱི་རི་ཡཾ ཧོ་ཏི ཨ་ས་ལླཱི་ནཾ ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ. སཱ་ར་དྡྷོ ཙ པ་ན མེ ཀཱ་ཡོ ཧོ་ཏི ཨ་པྤ་ཊི་པྤ་སྶ་དྡྷོ ཏེ་ནེ་ཝ དུ་ཀྑ་པྤ་དྷཱ་ནེ་ན པ་དྷཱ་ནཱ་བྷི་ཏུ་ནྣ་སྶ ས་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ དུ་ཀྑཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི. ཨ་པི་སྶུ མཾ, ཨ་གྒི་ཝེ་སྶ་ན, དེ་ཝ་ཏཱ དི་སྭཱ ཨེ་ཝ་མཱ་ཧཾ་སུ – ‘ཀཱ་ལ་ངྐ་ཏོ ས་མ་ཎོ གོ་ཏ་མོ’ཏི. ཨེ་ཀ་ཙྩཱ དེ་ཝ་ཏཱ ཨེ་ཝ་མཱ་ཧཾ་སུ – ‘ན ཀཱ་ལ་ངྐ་ཏོ ས་མ་ཎོ གོ་ཏ་མོ, ཨ་པི ཙ ཀཱ་ལ་ངྐ་རོ་ཏཱི’ཏི. ཨེ་ཀ་ཙྩཱ དེ་ཝ་ཏཱ ཨེ་ཝ་མཱ་ཧཾ་སུ – ‘ན ཀཱ་ལ་ངྐ་ཏོ ས་མ་ཎོ གོ་ཏ་མོ, ན་པི ཀཱ་ལ་ངྐ་རོ་ཏི, ཨ་ར་ཧཾ ས་མ་ཎོ གོ་ཏ་མོ, ཝི་ཧཱ་རོ་ཏྭེ་ཝ སོ [ཝི་ཧཱ་རོ་ཏྭེ་ཝེ་སོ (སཱི.)] ཨ་ར་ཧ་ཏོ ཨེ་ཝ་རཱུ་པོ ཧོ་ཏཱི’ཏི [ཝི་ཧཱ་རོ་ཏྭེ་ཝེ་སོ ཨ་ར་ཧ་ཏོ’’ཏི (?)].

༣༧༩. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫེ་ཡྻ’ནྟི. ཨ་ཐ ཁོ མཾ, ཨ་གྒི་ཝེ་སྶ་ན, དེ་ཝ་ཏཱ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘མཱ ཁོ ཏྭཾ, མཱ་རི་ས, ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫི. ས་ཙེ ཁོ ཏྭཾ, མཱ་རི་ས, ས་བྦ་སོ ཨཱ་ཧཱ་རུ་པ་ཙྪེ་དཱ་ཡ པ་ཊི་པ་ཛྫི་སྶ་སི, ཏ་སྶ ཏེ མ་ཡཾ དི་བྦཾ ཨོ་ཛཾ ལོ་མ་ཀཱུ་པེ་ཧི ཨ་ཛ྄ཛྷོ་ཧཱ་རེ་སྶཱ་མ [ཨ་ཛ྄ཛྷོ་ཧ་རི་སྶཱ་མ (སྱཱ. ཀཾ. པཱི. ཀ.)], ཏཱ་ཡ ཏྭཾ ཡཱ་པེ་སྶ་སཱི’ཏི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཨ་ཧ་ཉྩེ་ཝ ཁོ པ་ན ས་བྦ་སོ ཨ་ཛ་ཛྫི་ཏཾ [ཨ་ཛ་དྡྷུ་ཀཾ (སཱི. པཱི.), ཛ་དྡྷུ་ཀཾ (སྱཱ. ཀཾ.)] པ་ཊི་ཛཱ་ནེ་ཡྻཾ, ཨི་མཱ ཙ མེ དེ་ཝ་ཏཱ དི་བྦཾ ཨོ་ཛཾ ལོ་མ་ཀཱུ་པེ་ཧི ཨ་ཛ྄ཛྷོ་ཧཱ་རེ་ཡྻུཾ [ཨ་ཛ྄ཛྷོ་ཧ་རེ་ཡྻུཾ (སྱཱ. ཀཾ. པཱི. ཀ.)], ཏཱ་ཡ ཙཱ་ཧཾ ཡཱ་པེ་ཡྻཾ, ཏཾ མ་མ་སྶ མུ་སཱ’ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ཏཱ དེ་ཝ་ཏཱ པ་ཙྩཱ་ཙི་ཀྑཱ་མི, ‘ཧ་ལ’ནྟི ཝ་དཱ་མི.

༣༨༠. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡཾ་ནཱུ་ནཱ་ཧཾ ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་རེ་ཡྻཾ, པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་ས’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་རེ་སིཾ, པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་སཾ. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཐོ་ཀཾ ཐོ་ཀཾ ཨཱ་ཧཱ་རཾ ཨཱ་ཧཱ་ར་ཡ་ཏོ, པ་ས་ཏཾ པ་ས་ཏཾ, ཡ་དི ཝཱ མུ་གྒ་ཡཱུ་སཾ, ཡ་དི ཝཱ ཀུ་ལ་ཏྠ་ཡཱུ་སཾ, ཡ་དི ཝཱ ཀ་ལཱ༹་ཡ་ཡཱུ་སཾ, ཡ་དི ཝཱ ཧ་རེ་ཎུ་ཀ་ཡཱུ་སཾ, ཨ་དྷི་མ་ཏྟ་ཀ་སི་མཱ་ནཾ པ་ཏྟོ ཀཱ་ཡོ ཧོ་ཏི. སེ་ཡྻ་ཐཱ་པི ནཱ་མ ཨཱ་སཱི་ཏི་ཀ་པ་བྦཱ་ནི ཝཱ ཀཱ་ལ༹་པ་བྦཱ་ནི ཝཱ, ཨེ་ཝ་མེ་ཝ་སྶུ མེ ཨ་ངྒ་པ་ཙྩ་ངྒཱ་ནི བྷ་ཝ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ. སེ་ཡྻ་ཐཱ་པི ནཱ་མ ཨོ་ཊྛ་པ་དཾ, ཨེ་ཝ་མེ་ཝ་སྶུ མེ ཨཱ་ནི་ས་དཾ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ. སེ་ཡྻ་ཐཱ་པི ནཱ་མ ཝ་ཊྚ་ནཱ་ཝ་ལཱི༹, ཨེ་ཝ་མེ་ཝ་སྶུ མེ པི་ཊྛི་ཀ་ཎྚ་ཀོ ཨུ་ཎྞ་ཏཱ་ཝ་ན་ཏོ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ. སེ་ཡྻ་ཐཱ་པི ནཱ་མ ཛ་ར་སཱ་ལཱ་ཡ གོ་པཱ་ཎ་སི་ཡོ ཨོ་ལུ་གྒ་ཝི་ལུ་གྒཱ བྷ་ཝ་ནྟི, ཨེ་ཝ་མེ་ཝ་སྶུ མེ ཕཱ་སུ་ལི༹་ཡོ ཨོ་ལུ་གྒ་ཝི་ལུ་གྒཱ བྷ་ཝ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ. སེ་ཡྻ་ཐཱ་པི ནཱ་མ ག་མྦྷཱི་རེ ཨུ་ད་པཱ་ནེ ཨུ་ད་ཀ་ཏཱ་ར་ཀཱ ག་མྦྷཱི་ར་ག་ཏཱ ཨོ་ཀྑཱ་ཡི་ཀཱ དི་སྶ་ནྟི, ཨེ་ཝ་མེ་ཝ་སྶུ མེ ཨ་ཀྑི་ཀཱུ་པེ་སུ ཨ་ཀྑི་ཏཱ་ར་ཀཱ ག་མྦྷཱི་ར་ག་ཏཱ ཨོ་ཀྑཱ་ཡི་ཀཱ དི་སྶ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ. སེ་ཡྻ་ཐཱ་པི ནཱ་མ ཏི་ཏྟ་ཀཱ་ལཱ་བུ ཨཱ་མ་ཀ་ཙྪི་ནྣོ ཝཱ་ཏཱ་ཏ་པེ་ན སཾ་ཕུ་ཊི་ཏོ ཧོ་ཏི ས་མྨི་ལཱ་ཏོ, ཨེ་ཝ་མེ་ཝ་སྶུ མེ སཱི་ས་ཙྪ་ཝི སཾ་ཕུ་ཊི་ཏཱ ཧོ་ཏི ས་མྨི་ལཱ་ཏཱ ཏཱ་ཡེ་ཝ་པྤཱ་ཧཱ་ར་ཏཱ་ཡ.

‘‘སོ ཁོ ཨ་ཧཾ, ཨ་གྒི་ཝེ་སྶ་ན, ཨུ་ད་ར་ཙྪ་ཝིཾ པ་རི་མ་སི་སྶཱ་མཱི་ཏི པི་ཊྛི་ཀ་ཎྚ་ཀཾ་ཡེ་ཝ པ་རི་གྒ་ཎྷཱ་མི, པི་ཊྛི་ཀ་ཎྚ་ཀཾ པ་རི་མ་སི་སྶཱ་མཱི་ཏི ཨུ་ད་ར་ཙྪ་ཝིཾ་ཡེ་ཝ པ་རི་གྒ་ཎྷཱ་མི, ཡཱ་ཝ་སྶུ མེ, ཨ་གྒི་ཝེ་སྶ་ན, ཨུ་ད་ར་ཙྪ་ཝི པི་ཊྛི་ཀ་ཎྚ་ཀཾ ཨ་ལླཱི་ནཱ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ. སོ ཁོ ཨ་ཧཾ, ཨ་གྒི་ཝེ་སྶ་ན, ཝ་ཙྩཾ ཝཱ མུ་ཏྟཾ ཝཱ ཀ་རི་སྶཱ་མཱི་ཏི ཏ་ཏྠེ་ཝ ཨ་ཝ་ཀུ་ཛྫོ པ་པ་ཏཱ་མི ཏཱ་ཡེ་ཝ་པྤཱ་ཧཱ་ར་ཏཱ་ཡ. སོ ཁོ ཨ་ཧཾ, ཨ་གྒི་ཝེ་སྶ་ན, ཨི་མ་མེ་ཝ ཀཱ་ཡཾ ཨ་སྶཱ་སེ་ནྟོ པཱ་ཎི་ནཱ ག་ཏྟཱ་ནི ཨ་ནུ་མ་ཛྫཱ་མི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, པཱ་ཎི་ནཱ ག་ཏྟཱ་ནི ཨ་ནུ་མ་ཛྫ་ཏོ པཱུ་ཏི་མཱུ་ལཱ་ནི ལོ་མཱ་ནི ཀཱ་ཡ་སྨཱ པ་པ་ཏ་ནྟི ཏཱ་ཡེ་ཝ་པྤཱ་ཧཱ་ར་ཏཱ་ཡ. ཨ་པི་སྶུ མཾ, ཨ་གྒི་ཝེ་སྶ་ན, མ་ནུ་སྶཱ དི་སྭཱ ཨེ་ཝ་མཱ་ཧཾ་སུ – ‘ཀཱ་ལོ༹ ས་མ་ཎོ གོ་ཏ་མོ’ཏི. ཨེ་ཀ་ཙྩེ མ་ནུ་སྶཱ ཨེ་ཝ་མཱ་ཧཾ་སུ – ‘ན ཀཱ་ལོ༹ ས་མ་ཎོ གོ་ཏ་མོ, སཱ་མོ ས་མ་ཎོ གོ་ཏ་མོ’ཏི. ཨེ་ཀ་ཙྩེ མ་ནུ་སྶཱ ཨེ་ཝ་མཱ་ཧཾ་སུ – ‘ན ཀཱ་ལོ༹ ས་མ་ཎོ གོ་ཏ་མོ, ན་པི སཱ་མོ, མ་ངྒུ་ར་ཙྪ་ཝི ས་མ་ཎོ གོ་ཏ་མོ’ཏི. ཡཱ་ཝ་སྶུ མེ, ཨ་གྒི་ཝེ་སྶ་ན, ཏཱ་ཝ པ་རི་སུ་དྡྷོ ཚ་ཝི་ཝ་ཎྞོ པ་རི་ཡོ་དཱ་ཏོ ཨུ་པ་ཧ་ཏོ ཧོ་ཏི ཏཱ་ཡེ་ཝ་པྤཱ་ཧཱ་ར་ཏཱ་ཡ.

༣༨༡. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཡེ ཁོ ཀེ་ཙི ཨ་ཏཱི་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡིཾ་སུ, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ. ཡེ་པི ཧི ཀེ་ཙི ཨ་ནཱ་ག་ཏ་མ་དྡྷཱ་ནཾ ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡི་སྶ་ནྟི, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ. ཡེ་པི ཧི ཀེ་ཙི ཨེ་ཏ་ར་ཧི ས་མ་ཎཱ ཝཱ བྲཱ་ཧྨ་ཎཱ ཝཱ ཨོ་པ་ཀྐ་མི་ཀཱ དུ་ཀྑཱ ཏི་བྦཱ ཁ་རཱ ཀ་ཊུ་ཀཱ ཝེ་ད་ནཱ ཝེ་ད་ཡ་ནྟི, ཨེ་ཏཱ་ཝ་པ་ར་མཾ, ན་ཡི་ཏོ བྷི་ཡྻོ. ན ཁོ པ་ནཱ་ཧཾ ཨི་མཱ་ཡ ཀ་ཊུ་ཀཱ་ཡ དུ་ཀྐ་ར་ཀཱ་རི་ཀཱ་ཡ ཨ་དྷི་ག་ཙྪཱ་མི ཨུ་ཏྟ་རི མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སཾ. སི་ཡཱ ནུ ཁོ ཨ་ཉྙོ མ་གྒོ བོ་དྷཱ་ཡཱ’ཏི? ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཨ་བྷི་ཛཱ་ནཱ་མི ཁོ པ་ནཱ་ཧཾ པི་ཏུ ས་ཀྐ་སྶ ཀ་མྨ་ནྟེ སཱི་ཏཱ་ཡ ཛ་མྦུ་ཙྪཱ་ཡཱ་ཡ ནི་སི་ནྣོ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏཱ. སི་ཡཱ ནུ ཁོ ཨེ་སོ མ་གྒོ བོ་དྷཱ་ཡཱ’ཏི? ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ས་ཏཱ་ནུ་སཱ་རི ཝི་ཉྙཱ་ཎཾ ཨ་ཧོ་སི – ‘ཨེ་སེ་ཝ མ་གྒོ བོ་དྷཱ་ཡཱ’ཏི. ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ཀིཾ ནུ ཁོ ཨ་ཧཾ ཏ་སྶ སུ་ཁ་སྶ བྷཱ་ཡཱ་མི, ཡཾ ཏཾ སུ་ཁཾ ཨ་ཉྙ་ཏྲེ་ཝ ཀཱ་མེ་ཧི ཨ་ཉྙ་ཏྲ ཨ་ཀུ་ས་ལེ་ཧི དྷ་མྨེ་ཧཱི’ཏི? ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ ཨ་ཧཾ ཏ་སྶ སུ་ཁ་སྶ བྷཱ་ཡཱ་མི, ཡཾ ཏཾ སུ་ཁཾ ཨ་ཉྙ་ཏྲེ་ཝ ཀཱ་མེ་ཧི ཨ་ཉྙ་ཏྲ ཨ་ཀུ་ས་ལེ་ཧི དྷ་མྨེ་ཧཱི’ཏི.

༣༨༢. ‘‘ཏ་སྶ མ་ཡ྄ཧཾ, ཨ་གྒི་ཝེ་སྶ་ན, ཨེ་ཏ་ད་ཧོ་སི – ‘ན ཁོ ཏཾ སུ་ཀ་རཾ སུ་ཁཾ ཨ་དྷི་ག་ནྟུཾ ཨེ་ཝཾ ཨ་དྷི་མ་ཏྟ་ཀ་སི་མཱ་ནཾ པ་ཏྟ་ཀཱ་ཡེ་ན, ཡཾ་ནཱུ་ནཱ་ཧཾ ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་ཡྻཾ ཨོ་ད་ན་ཀུ་མྨཱ་ས’ནྟི. སོ ཁོ ཨ་ཧཾ, ཨ་གྒི་ཝེ་སྶ་ན, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་སིཾ ཨོ་ད་ན་ཀུ་མྨཱ་སཾ. ཏེ་ན ཁོ པ་ན མཾ, ཨ་གྒི་ཝེ་སྶ་ན, ས་མ་ཡེ་ན པ་ཉྩ [པ་ཉྩ་ཝ་གྒི་ཡཱ (ཨ་ཉྙ་སུ་ཏྟེ་སུ)] བྷི་ཀྑཱུ པ་ཙྩུ་པ་ཊྛི་ཏཱ ཧོ་ནྟི – ‘ཡཾ ཁོ ས་མ་ཎོ གོ་ཏ་མོ དྷ་མྨཾ ཨ་དྷི་ག་མི་སྶ་ཏི, ཏཾ ནོ ཨཱ་རོ་ཙེ་སྶ་ཏཱི’ཏི. ཡ་ཏོ ཁོ ཨ་ཧཾ, ཨ་གྒི་ཝེ་སྶ་ན, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་སིཾ ཨོ་ད་ན་ཀུ་མྨཱ་སཾ, ཨ་ཐ མེ ཏེ པ་ཉྩ བྷི་ཀྑཱུ ནི་བྦི་ཛྫ པ་ཀྐ་མིཾ་སུ – ‘བཱ་ཧུ་ལླི་ཀོ [བཱ་ཧུ་ལི་ཀོ (སཱི. པཱི.) སཾ་གྷ་བྷེ་ད་སི་ཀྑཱ་པ་ད་ཊཱི་ཀཱ་ཡ ས་མེ་ཏི] ས་མ་ཎོ གོ་ཏ་མོ, པ་དྷཱ་ན་ཝི་བྦྷ་ནྟོ, ཨཱ་ཝ་ཏྟོ བཱ་ཧུ་ལླཱ་ཡཱ’ཏི.

༣༨༣. ‘‘སོ ཁོ ཨ་ཧཾ, ཨ་གྒི་ཝེ་སྶ་ན, ཨོ་ལཱ༹་རི་ཀཾ ཨཱ་ཧཱ་རཾ ཨཱ་ཧཱ་རེ་ཏྭཱ, བ་ལཾ ག་ཧེ་ཏྭཱ, ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི. ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི. པཱི་ཏི་ཡཱ ཙ ཝི་རཱ་གཱ ཨུ་པེ་ཀྑ་ཀོ ཙ ཝི་ཧཱ་སིཾ, ས་ཏོ ཙ ས་མྤ་ཛཱ་ནོ. སུ་ཁ་ཉྩ ཀཱ་ཡེ་ན པ་ཊི་སཾ་ཝེ་དེ་སིཾ ཡཾ ཏཾ ཨ་རི་ཡཱ ཨཱ་ཙི་ཀྑ་ནྟི – ‘ཨུ་པེ་ཀྑ་ཀོ ས་ཏི་མཱ སུ་ཁ་ཝི་ཧཱ་རཱི’ཏི ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི. སུ་ཁ་སྶ ཙ པ་ཧཱ་ནཱ དུ་ཀྑ་སྶ ཙ པ་ཧཱ་ནཱ, པུ་བྦེ་ཝ སོ་མ་ན་སྶ་དོ་མ་ན་སྶཱ་ནཾ ཨ་ཏྠ་ངྒ་མཱ, ཨ་དུ་ཀྑ་མ་སུ་ཁཾ ཨུ་པེ་ཀྑཱ་ས་ཏི་པཱ་རི་སུ་དྡྷིཾ ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

༣༨༤. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི, སེ་ཡྻ་ཐི་དཾ – ཨེ་ཀ་མྤི ཛཱ་ཏིཾ…པེ… ཨི་ཏི སཱ་ཀཱ་རཾ ས་ཨུ་དྡེ་སཾ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི. ཨ་ཡཾ ཁོ མེ, ཨ་གྒི་ཝེ་སྶ་ན, ར་ཏྟི་ཡཱ པ་ཋ་མེ ཡཱ་མེ པ་ཋ་མཱ ཝི་ཛྫཱ ཨ་དྷི་ག་ཏཱ; ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

༣༨༥. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ས་ཏྟཱ་ནཾ ཙུ་ཏཱུ་པ་པཱ་ཏ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶཱ་མི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་མི…པེ… ཨ་ཡཾ ཁོ མེ, ཨ་གྒི་ཝེ་སྶ་ན, ར་ཏྟི་ཡཱ མ་ཛ྄ཛྷི་མེ ཡཱ་མེ དུ་ཏི་ཡཱ ཝི་ཛྫཱ ཨ་དྷི་ག་ཏཱ; ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

༣༨༦. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ཨཱ་ས་ཝཱ་ནཾ ཁ་ཡ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ. ‘ཨི་མེ ཨཱ་ས་ཝཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ. ཏ་སྶ མེ ཨེ་ཝཾ ཛཱ་ན་ཏོ ཨེ་ཝཾ པ་སྶ་ཏོ ཀཱ་མཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ, བྷ་ཝཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ, ཨ་ཝི་ཛྫཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ. ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཨ་ཧོ་སི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི ཨ་བྦྷ་ཉྙཱ་སིཾ. ཨ་ཡཾ ཁོ མེ, ཨ་གྒི་ཝེ་སྶ་ན, ར་ཏྟི་ཡཱ པ་ཙྪི་མེ ཡཱ་མེ ཏ་ཏི་ཡཱ ཝི་ཛྫཱ ཨ་དྷི་ག་ཏཱ; ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ; ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ; ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨེ་ཝ་རཱུ་པཱ་པི ཁོ མེ, ཨ་གྒི་ཝེ་སྶ་ན, ཨུ་པྤ་ནྣཱ སུ་ཁཱ ཝེ་ད་ནཱ ཙི་ཏྟཾ ན པ་རི་ཡཱ་དཱ་ཡ ཏི་ཊྛ་ཏི.

༣༨༧. ‘‘ཨ་བྷི་ཛཱ་ནཱ་མི ཁོ པ་ནཱ་ཧཾ, ཨ་གྒི་ཝེ་སྶ་ན, ཨ་ནེ་ཀ་ས་ཏཱ་ཡ པ་རི་སཱ་ཡ དྷ་མྨཾ དེ་སེ་ཏཱ. ཨ་པི་སྶུ མཾ ཨེ་ཀ་མེ་ཀོ ཨེ་ཝཾ མ་ཉྙ་ཏི – ‘མ་མེ་ཝཱ་ར་བྦྷ ས་མ་ཎོ གོ་ཏ་མོ དྷ་མྨཾ དེ་སེ་ཏཱི’ཏི. ‘ན ཁོ པ་ནེ་ཏཾ, ཨ་གྒི་ཝེ་སྶ་ན, ཨེ་ཝཾ ད་ཊྛ་བྦཾ; ཡཱ་ཝ་དེ་ཝ ཝི་ཉྙཱ་པ་ན་ཏྠཱ་ཡ ཏ་ཐཱ་ག་ཏོ པ་རེ་སཾ དྷ་མྨཾ དེ་སེ་ཏི. སོ ཁོ ཨ་ཧཾ, ཨ་གྒི་ཝེ་སྶ་ན, ཏ་སྶཱ་ཡེ་ཝ ཀ་ཐཱ་ཡ པ་རི་ཡོ་སཱ་ནེ, ཏ་སྨིཾ་ཡེ་ཝ པུ་རི་མ་སྨིཾ ས་མཱ་དྷི་ནི་མི་ཏྟེ ཨ་ཛ྄ཛྷ་ཏྟ་མེ་ཝ ཙི་ཏྟཾ ས་ཎྛ་པེ་མི ས་ནྣི་སཱ་དེ་མི ཨེ་ཀོ་དིཾ ཀ་རོ་མི ས་མཱ་ད་ཧཱ་མི, ཡེ་ན སུ་དཾ ནི་ཙྩ་ཀ་པྤཾ ཝི་ཧ་རཱ་མཱི’’’ཏི.

‘‘ཨོ་ཀ་པྤ་ནི་ཡ་མེ་ཏཾ བྷོ་ཏོ གོ་ཏ་མ་སྶ ཡ་ཐཱ ཏཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཨ་བྷི་ཛཱ་ནཱ་ཏི ཁོ པ་ན བྷ་ཝཾ གོ་ཏ་མོ དི་ཝཱ སུ་པི་ཏཱ’’ཏི? ‘‘ཨ་བྷི་ཛཱ་ནཱ་མ་ཧཾ, ཨ་གྒི་ཝེ་སྶ་ན, གི་མྷཱ་ནཾ པ་ཙྪི་མེ མཱ་སེ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཙ་ཏུ་གྒུ་ཎཾ ས་ངྒྷཱ་ཊིཾ པ་ཉྙ་པེ་ཏྭཱ ད་ཀྑི་ཎེ་ན པ་སྶེ་ན ས་ཏོ ས་མྤ་ཛཱ་ནོ ནི་དྡཾ ཨོ་ཀྐ་མི་ཏཱ’’ཏི. ‘‘ཨེ་ཏཾ ཁོ, བྷོ གོ་ཏ་མ, ཨེ་ཀེ ས་མ་ཎ་བྲཱ་ཧྨ་ཎཱ ས་མྨོ་ཧ་ཝི་ཧཱ་ར་སྨིཾ ཝ་ད་ནྟཱི’’ཏི? ‘‘ན ཁོ, ཨ་གྒི་ཝེ་སྶ་ན, ཨེ་ཏྟཱ་ཝ་ཏཱ ས་མྨཱུ་ལ༹ྷོ ཝཱ ཧོ་ཏི ཨ་ས་མྨཱུ་ལ༹ྷོ ཝཱ. ཨ་པི ཙ, ཨ་གྒི་ཝེ་སྶ་ན, ཡ་ཐཱ ས་མྨཱུ་ལ༹ྷོ ཙ ཧོ་ཏི ཨ་ས་མྨཱུ་ལ༹ྷོ ཙ, ཏཾ སུ་ཎཱ་ཧི, སཱ་དྷུ་ཀཾ མ་ན་སི ཀ་རོ་ཧི, བྷཱ་སི་སྶཱ་མཱི’’ཏི. ‘‘ཨེ་ཝཾ, བྷོ’’ཏི ཁོ ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ཏོ པ་ཙྩ་སྶོ་སི. བྷ་ག་ཝཱ ཨེ་ཏ་ད་ཝོ་ཙ –

༣༨༨. ‘‘ཡ་སྶ ཀ་སྶ་ཙི, ཨ་གྒི་ཝེ་སྶ་ན, ཡེ ཨཱ་ས་ཝཱ སཾ་ཀི་ལེ་སི་ཀཱ པོ་ནོ་བྦྷ་ཝི་ཀཱ ས་ད་རཱ དུ་ཀྑ་ཝི་པཱ་ཀཱ ཨཱ་ཡ་ཏིཾ ཛཱ་ཏི་ཛ་རཱ་མ་ར་ཎི་ཡཱ ཨ་པྤ་ཧཱི་ནཱ, ཏ་མ་ཧཾ ‘ས་མྨཱུ་ལ༹ྷོ’ཏི ཝ་དཱ་མི. ཨཱ་ས་ཝཱ་ན་ཉྷི, ཨ་གྒི་ཝེ་སྶ་ན, ཨ་པྤ་ཧཱ་ནཱ ས་མྨཱུ་ལ༹ྷོ ཧོ་ཏི. ཡ་སྶ ཀ་སྶ་ཙི, ཨ་གྒི་ཝེ་སྶ་ན, ཡེ ཨཱ་ས་ཝཱ སཾ་ཀི་ལེ་སི་ཀཱ པོ་ནོ་བྦྷ་ཝི་ཀཱ ས་ད་རཱ དུ་ཀྑ་ཝི་པཱ་ཀཱ ཨཱ་ཡ་ཏིཾ ཛཱ་ཏི་ཛ་རཱ་མ་ར་ཎི་ཡཱ པ་ཧཱི་ནཱ, ཏ་མ་ཧཾ ‘ཨ་ས་མྨཱུ་ལ༹ྷོ’ཏི ཝ་དཱ་མི. ཨཱ་ས་ཝཱ་ན་ཉྷི, ཨ་གྒི་ཝེ་སྶ་ན, པ་ཧཱ་ནཱ ཨ་ས་མྨཱུ་ལ༹ྷོ ཧོ་ཏི.

‘‘ཏ་ཐཱ་ག་ཏ་སྶ ཁོ, ཨ་གྒི་ཝེ་སྶ་ན, ཡེ ཨཱ་ས་ཝཱ སཾ་ཀི་ལེ་སི་ཀཱ པོ་ནོ་བྦྷ་ཝི་ཀཱ ས་ད་རཱ དུ་ཀྑ་ཝི་པཱ་ཀཱ ཨཱ་ཡ་ཏིཾ ཛཱ་ཏི་ཛ་རཱ་མ་ར་ཎི་ཡཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. སེ་ཡྻ་ཐཱ་པི, ཨ་གྒི་ཝེ་སྶ་ན, ཏཱ་ལོ མ་ཏྠ་ཀ་ཙྪི་ནྣོ ཨ་བྷ་བྦོ པུ་ན ཝི་རཱུ་ལ༹ྷི་ཡཱ, ཨེ་ཝ་མེ་ཝ ཁོ, ཨ་གྒི་ཝེ་སྶ་ན, ཏ་ཐཱ་ག་ཏ་སྶ ཡེ ཨཱ་ས་ཝཱ སཾ་ཀི་ལེ་སི་ཀཱ པོ་ནོ་བྦྷ་ཝི་ཀཱ ས་ད་རཱ དུ་ཀྑ་ཝི་པཱ་ཀཱ ཨཱ་ཡ་ཏིཾ ཛཱ་ཏི་ཛ་རཱ་མ་ར་ཎི་ཡཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ’’ཏི.

༣༨༩. ཨེ་ཝཾ ཝུ་ཏྟེ, ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཙྪ་རི་ཡཾ, བྷོ གོ་ཏ་མ, ཨ་བྦྷུ་ཏཾ, བྷོ གོ་ཏ་མ! ཡཱ་ཝ་ཉྩི་དཾ བྷོ་ཏོ གོ་ཏ་མ་སྶ ཨེ་ཝཾ ཨཱ་ས་ཛྫ ཨཱ་ས་ཛྫ ཝུ་ཙྩ་མཱ་ན་སྶ, ཨུ་པ་ནཱི་ཏེ་ཧི ཝ་ཙ་ན་པྤ་ཐེ་ཧི ས་མུ་དཱ་ཙ་རི་ཡ་མཱ་ན་སྶ, ཚ་ཝི་ཝ་ཎྞོ ཙེ་ཝ པ་རི་ཡོ་དཱ་ཡ་ཏི, མུ་ཁ་ཝ་ཎྞོ ཙ ཝི་པྤ་སཱི་ད་ཏི, ཡ་ཐཱ ཏཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཨ་བྷི་ཛཱ་ནཱ་མ་ཧཾ, བྷོ གོ་ཏ་མ, པཱུ་ར་ཎཾ ཀ་སྶ་པཾ ཝཱ་དེ་ན ཝཱ་དཾ ས་མཱ་ར་བྷི་ཏཱ. སོ་པི མ་ཡཱ ཝཱ་དེ་ན ཝཱ་དཾ ས་མཱ་ར་དྡྷོ ཨ་ཉྙེ་ན་ཉྙཾ པ་ཊི་ཙ་རི, བ་ཧི་དྡྷཱ ཀ་ཐཾ ཨ་པ་ནཱ་མེ་སི, ཀོ་པ་ཉྩ དོ་ས་ཉྩ ཨ་པྤ་ཙྩ་ཡ་ཉྩ པཱ་ཏྭཱ་ཀཱ་སི. བྷོ་ཏོ པ་ན [བྷོ་ཏོ ཁོ པ་ན (སཱི.)] གོ་ཏ་མ་སྶ ཨེ་ཝཾ ཨཱ་ས་ཛྫ ཨཱ་ས་ཛྫ ཝུ་ཙྩ་མཱ་ན་སྶ, ཨུ་པ་ནཱི་ཏེ་ཧི ཝ་ཙ་ན་པྤ་ཐེ་ཧི ས་མུ་དཱ་ཙ་རི་ཡ་མཱ་ན་སྶ, ཚ་ཝི་ཝ་ཎྞོ ཙེ་ཝ པ་རི་ཡོ་དཱ་ཡ་ཏི, མུ་ཁ་ཝ་ཎྞོ ཙ ཝི་པྤ་སཱི་ད་ཏི, ཡ་ཐཱ ཏཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཨ་བྷི་ཛཱ་ནཱ་མ་ཧཾ, བྷོ གོ་ཏ་མ, མ་ཀྑ་ལིཾ གོ་སཱ་ལཾ…པེ… ཨ་ཛི་ཏཾ ཀེ་ས་ཀ་མྦ་ལཾ… པ་ཀུ་དྷཾ ཀ་ཙྩཱ་ཡ་ནཾ… ས་ཉྫ་ཡཾ བེ་ལ་ཊྛ་པུ་ཏྟཾ… ནི་ག་ཎྛཾ ནཱ་ཊ་པུ་ཏྟཾ ཝཱ་དེ་ན ཝཱ་དཾ ས་མཱ་ར་བྷི་ཏཱ. སོ་པི མ་ཡཱ ཝཱ་དེ་ན ཝཱ་དཾ ས་མཱ་ར་དྡྷོ ཨ་ཉྙེ་ན་ཉྙཾ པ་ཊི་ཙ་རི, བ་ཧི་དྡྷཱ ཀ་ཐཾ ཨ་པ་ནཱ་མེ་སི, ཀོ་པ་ཉྩ དོ་ས་ཉྩ ཨ་པྤ་ཙྩ་ཡ་ཉྩ པཱ་ཏྭཱ་ཀཱ་སི. བྷོ་ཏོ པ་ན གོ་ཏ་མ་སྶ ཨེ་ཝཾ ཨཱ་ས་ཛྫ ཨཱ་ས་ཛྫ ཝུ་ཙྩ་མཱ་ན་སྶ, ཨུ་པ་ནཱི་ཏེ་ཧི ཝ་ཙ་ན་པྤ་ཐེ་ཧི ས་མུ་དཱ་ཙ་རི་ཡ་མཱ་ན་སྶ, ཚ་ཝི་ཝ་ཎྞོ ཙེ་ཝ པ་རི་ཡོ་དཱ་ཡ་ཏི, མུ་ཁ་ཝ་ཎྞོ ཙ ཝི་པྤ་སཱི་ད་ཏི, ཡ་ཐཱ ཏཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཧ་ནྡ ཙ དཱ་ནི མ་ཡཾ, བྷོ གོ་ཏ་མ, ག་ཙྪཱ་མ. བ་ཧུ་ཀི་ཙྩཱ མ་ཡཾ, བ་ཧུ་ཀ་ར་ཎཱི་ཡཱ’’ཏི. ‘‘ཡ་སྶ་དཱ་ནི ཏྭཾ, ཨ་གྒི་ཝེ་སྶ་ན, ཀཱ་ལཾ མ་ཉྙ་སཱི’’ཏི.

ཨ་ཐ ཁོ ས་ཙྩ་ཀོ ནི་ག་ཎྛ་པུ་ཏྟོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མཱི་ཏི.

མ་ཧཱ་ས་ཙྩ་ཀ་སུ་ཏྟཾ ནི་ཊྛི་ཏཾ ཚ་ཊྛཾ.