༡༣. ཙཱུ་ལ༹་ར་ཐ་ཝི་མཱ་ན་ཝ་ཏྠུ
༩༨༡. ‘‘ད་ལ༹ྷ་དྷ་མྨཱ ནི་སཱ་ར་སྶ, དྷ་ནུཾ ཨོ་ལུ་བྦྷ ཏི་ཊྛ་སི;
ཁ་ཏྟི་ཡོ ནུ་སི རཱ་ཛ་ཉྙོ, ཨ་དུ ལུ་དྡོ ཝ་ནེ་ཙ་རོ’’ཏི [ཝ་ནཱ་ཙ་རོ་ཏི (སྱཱ. ཀ.)].
༩༨༢. ‘‘ཨ་སྶ་ཀཱ་དྷི་པ་ཏི་སྶཱ་ཧཾ, བྷ་ནྟེ པུ་ཏྟོ ཝ་ནེ་ཙ་རོ;
ནཱ་མཾ མེ བྷི་ཀྑུ ཏེ བྲཱུ་མི, སུ་ཛཱ་ཏོ ཨི་ཏི མཾ ཝི་དཱུ [ཝི་དུཾ (སཱི.)].
༩༨༣. ‘‘མི་གེ ག་ཝེ་ས་མཱ་ནོ་ཧཾ, ཨོ་གཱ་ཧ་ནྟོ བྲ་ཧཱ་ཝ་ནཾ;
མི་གཾ ཏ་ཉྩེ་ཝ [མི་གཾ ག་ནྟྭེ་ཝ (སྱཱ.), མི་ག་ཝ་དྷ་ཉྩ (ཀ.)] ནཱ་དྡ་ཀྑིཾ, ཏ་ཉྩ དི་སྭཱ ཋི་ཏོ ཨ་ཧ’’ནྟི.
༩༨༤. ‘‘སྭཱ་ག་ཏཾ ཏེ མ་ཧཱ་པུ་ཉྙ, ཨ་ཐོ ཏེ ཨ་དུ་རཱ་ག་ཏཾ;
ཨེ་ཏྟོ ཨུ་ད་ཀ་མཱ་དཱ་ཡ, པཱ་དེ པ་ཀྑཱ་ལ་ཡ་སྶུ ཏེ.
༩༨༥. ‘‘ཨི་ད་མྤི པཱ་ནཱི་ཡཾ སཱི་ཏཾ, ཨཱ་བྷ་ཏཾ གི་རི་ག་བྦྷ་རཱ;
རཱ་ཛ་པུ་ཏྟ ཏ་ཏོ པི་ཏྭཱ [པཱི་ཏྭཱ (སཱི. སྱཱ.)], ས་ནྠ་ཏ་སྨིཾ ཨུ་པཱ་ཝི་སཱ’’ཏི.
༩༨༦. ‘‘ཀ་ལྱཱ་ཎཱི ཝ་ཏ ཏེ ཝཱ་ཙཱ, ས་ཝ་ནཱི་ཡཱ མ་ཧཱ་མུ་ནི;
ནེ་ལཱ ཨ་ཏྠ་ཝ་ཏཱི [ཙ་ཏྠ་ཝ་ཏཱི (སཱི.)] ཝ་གྒུ, མ་ནྟྭཱ [མ་ནྟཱ (སྱཱ. པཱི. ཀ.)] ཨ་ཏྠ་ཉྩ བྷཱ་ས་སི [བྷཱ་ས་སེ (སཱི.)].
༩༨༧. ‘‘ཀཱ ཏེ ར་ཏི ཝ་ནེ ཝི་ཧ་ར་ཏོ, ཨི་སི་ནི་ས་བྷ ཝ་དེ་ཧི པུ་ཊྛོ;
ཏ་ཝ ཝ་ཙ་ན་པ་ཐཾ ནི་སཱ་མ་ཡི་ཏྭཱ, ཨ་ཏྠ་དྷ་མྨ་པ་དཾ ས་མཱ་ཙ་རེ་མ་སེ’’ཏི.
༩༨༨. ‘‘ཨ་ཧིཾ་སཱ ས་བྦ་པཱ་ཎཱི་ནཾ, ཀུ་མཱ་ར་མྷཱ་ཀ རུ་ཙྩ་ཏི;
ཐེ་ཡྻཱ ཙ ཨ་ཏི་ཙཱ་རཱ ཙ, མ་ཛྫ་པཱ་ནཱ ཙ ཨཱ་ར་ཏི.
༩༨༩. ‘‘ཨཱ་ར་ཏི ས་མ་ཙ་རི་ཡཱ ཙ, བཱ་ཧུ་ས་ཙྩཾ ཀ་ཏ་ཉྙུ་ཏཱ;
དི་ཊྛེ་ཝ དྷ་མྨེ པཱ་སཾ་སཱ, དྷ་མྨཱ ཨེ་ཏེ པ་སཾ་སི་ཡཱ་ཏི.
༩༩༠. ‘‘ས་ནྟི་ཀེ མ་ར་ཎཾ ཏུ་ཡ྄ཧཾ, ཨོ་རཾ མཱ་སེ་ཧི པ་ཉྩ་ཧི;
རཱ་ཛ་པུ་ཏྟ ཝི་ཛཱ་ནཱ་ཧི, ཨ་ཏྟཱ་ནཾ པ་རི་མོ་ཙ་ཡཱ’’ཏི.
༩༩༡. ‘‘ཀ་ཏ་མཾ སྭཱ་ཧཾ ཛ་ན་པ་དཾ ག་ནྟྭཱ, ཀིཾ ཀ་མྨཾ ཀི་ཉྩ པོ་རི་སཾ;
ཀཱ་ཡ ཝཱ པ་ན ཝི་ཛྫཱ་ཡ, བྷ་ཝེ་ཡྻཾ ཨ་ཛ་རཱ་མ་རོ’’ཏི.
༩༩༢. ‘‘ན ཝི་ཛྫ་ཏེ སོ པ་དེ་སོ, ཀ་མྨཾ ཝི་ཛྫཱ ཙ པོ་རི་སཾ;
ཡ་ཏྠ ག་ནྟྭཱ བྷ་ཝེ མ་ཙྩོ, རཱ་ཛ་པུ་ཏྟཱ་ཛ་རཱ་མ་རོ.
༩༩༣. ‘‘མ་ཧ་དྡྷ་ནཱ མ་ཧཱ་བྷོ་གཱ, ར་ཊྛ་ཝ་ནྟོ་པི ཁ་ཏྟི་ཡཱ;
པ་ཧཱུ་ཏ་དྷ་ན་དྷ་ཉྙཱ་སེ, ཏེ་པི ནོ [ཏེ་པི ན (བ་ཧཱུ་སུ)] ཨ་ཛ་རཱ་མ་རཱ.
༩༩༤. ‘‘ཡ་དི ཏེ སུ་ཏཱ ཨ་ནྡྷ་ཀ་ཝེ་ཎྜུ་པུ་ཏྟཱ [ཨ་ནྡྷ་ཀ་ཝེ་ཎྷུ་པུ་ཏྟཱ (སཱི.), ཨ་ཎྜ་ཀ་ཝེ་ཎྜ་པུ་ཏྟཱ (སྱཱ. ཀ.)], སཱུ་རཱ ཝཱི་རཱ ཝི་ཀྐ་ནྟ་པྤ་ཧཱ་རི་ནོ;
ཏེ་པི ཨཱ་ཡུ་ཀྑ་ཡཾ པ་ཏྟཱ, ཝི་དྡྷ་སྟཱ ས་སྶ་ཏཱི་ས་མཱ.
༩༩༥. ‘‘ཁ་ཏྟི་ཡཱ བྲཱ་ཧྨ་ཎཱ ཝེ་སྶཱ, སུ་དྡཱ ཙ་ཎྜཱ་ལ་པུ་ཀྐུ་སཱ;
ཨེ་ཏེ ཙ་ཉྙེ ཙ ཛཱ་ཏི་ཡཱ, ཏེ་པི ནོ ཨ་ཛ་རཱ་མ་རཱ.
༩༩༦. ‘‘ཡེ མ་ནྟཾ པ་རི་ཝ་ཏྟེ་ནྟི, ཚ་ལ༹་ངྒཾ བྲ་ཧྨ་ཙི་ནྟི་ཏཾ;
ཨེ་ཏེ ཙ་ཉྙེ ཙ ཝི་ཛྫཱ་ཡ, ཏེ་པི ནོ ཨ་ཛ་རཱ་མ་རཱ.
༩༩༧. ‘‘ཨི་ས་ཡོ ཙཱ་པི ཡེ ས་ནྟཱ, ས་ཉྙ་ཏ་ཏྟཱ ཏ་པ་སྶི་ནོ;
ས་རཱི་རཾ ཏེ་པི ཀཱ་ལེ་ན, ཝི་ཛ་ཧ་ནྟི ཏ་པ་སྶི་ནོ.
༩༩༨. ‘‘བྷཱ་ཝི་ཏ་ཏྟཱ་པི ཨ་ར་ཧ་ནྟོ, ཀ་ཏ་ཀི་ཙྩཱ ཨ་ནཱ་ས་ཝཱ;
ནི་ཀྑི་པ་ནྟི ཨི་མཾ དེ་ཧཾ, པུ་ཉྙ་པཱ་པ་པ་རི་ཀྑ་ཡཱ’’ཏི.
༩༩༩. ‘‘སུ་བྷཱ་སི་ཏཱ ཨ་ཏྠ་ཝ་ཏཱི, གཱ་ཐཱ་ཡོ ཏེ མ་ཧཱ་མུ་ནི;
ནི་ཛ྄ཛྷ་ཏྟོ་མྷི སུ་བྷ་ཊྛེ་ན, ཏྭ་ཉྩ མེ ས་ར་ཎཾ བྷ་ཝཱ’’ཏི.
༡༠༠༠. ‘‘མཱ མཾ ཏྭཾ ས་ར་ཎཾ ག་ཙྪ, ཏ་མེ་ཝ ས་ར་ཎཾ ཝ་ཛ [བྷ་ཛ (ཀ.)];
ས་ཀྱ་པུ་ཏྟཾ མ་ཧཱ་ཝཱི་རཾ, ཡ་མ་ཧཾ ས་ར་ཎཾ ག་ཏོ’’ཏི.
༡༠༠༡. ‘‘ཀ་ཏ་ར་སྨིཾ སོ ཛ་ན་པ་དེ, ས་ཏྠཱ ཏུ་མྷཱ་ཀ མཱ་རི་ས;
ཨ་ཧ་མྤི ད་ཊྛུཾ ག་ཙྪི་སྶཾ, ཛི་ནཾ ཨ་པྤ་ཊི་པུ་གྒ་ལ’’ནྟི.
༡༠༠༢. ‘‘པུ་ར་ཏྠི་མ་སྨིཾ ཛ་ན་པ་དེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
ཏ་ཏྠཱ་སི པུ་རི་སཱ་ཛ་ཉྙོ, སོ ཙ ཁོ པ་རི་ནི་བྦུ་ཏོ’’ཏི.
༡༠༠༣. ‘‘ས་ཙེ ཧི བུ་དྡྷོ ཏི་ཊྛེ་ཡྻ, ས་ཏྠཱ ཏུ་མྷཱ་ཀ མཱ་རི་ས;
ཡོ་ཛ་ནཱ་ནི ས་ཧ་སྶཱ་ནི, ག་ཙྪེ་ཡྻཾ [ག་ཙྪེ (སྱཱ. པཱི. ཀ.)] པ་ཡི་རུ་པཱ་སི་ཏུཾ.
༡༠༠༤. ‘‘ཡ་ཏོ ཙ ཁོ [ཡ་ཏཱ ཁོ (པཱི. ཀ.)] པ་རི་ནི་བྦུ་ཏོ, ས་ཏྠཱ ཏུ་མྷཱ་ཀ མཱ་རི་ས;
ནི་བྦུ་ཏ་མྤི [པ་རི་ནི་བྦུ་ཏཾ (སྱཱ. ཀ.)] མ་ཧཱ་ཝཱི་རཾ, ག་ཙྪཱ་མི ས་ར་ཎཾ ཨ་ཧཾ.
༡༠༠༥. ‘‘ཨུ་པེ་མི ས་ར་ཎཾ བུ་དྡྷཾ, དྷ་མྨ་ཉྩཱ་པི ཨ་ནུ་ཏྟ་རཾ;
ས་ངྒྷ་ཉྩ ན་ར་དེ་ཝ་སྶ, ག་ཙྪཱ་མི ས་ར་ཎཾ ཨ་ཧཾ.
༡༠༠༦. ‘‘པཱ་ཎཱ་ཏི་པཱ་ཏཱ ཝི་ར་མཱ་མི ཁི་པྤཾ, ལོ་ཀེ ཨ་དི་ནྣཾ པ་རི་ཝ་ཛྫ་ཡཱ་མི;
ཨ་མ་ཛྫ་པོ ནོ ཙ མུ་སཱ བྷ་ཎཱ་མི, ས་ཀེ་ན དཱ་རེ་ན ཙ ཧོ་མི ཏུ་ཊྛོ’’ཏི.
༡༠༠༧. ‘‘ས་ཧ་སྶ་རཾ་སཱི་ཝ ཡ་ཐཱ མ་ཧ་པྤ་བྷོ, དི་སཾ ཡ་ཐཱ བྷཱ་ཏི ན་བྷེ ཨ་ནུ་ཀྐ་མཾ;
ཏ་ཐཱ་པ་ཀཱ་རོ [ཏ་ཐ་པྤ་ཀཱ་རོ (སཱི. སྱཱ.)] ཏ་ཝཱ་ཡཾ [ཏ་ཝ་ཡཾ (སཱི. པཱི.)] མ་ཧཱ་ར་ཐོ, ས་མ་ནྟ་ཏོ ཡོ་ཛ་ན་ས་ཏྟ་མཱ་ཡ་ཏོ.
༡༠༠༨. ‘‘སུ་ཝ་ཎྞ་པ་ཊྚེ་ཧི ས་མ་ནྟ་མོ་ཏྠ་ཊོ, ཨུ་ར་སྶ མུ་ཏྟཱ་ཧི མ་ཎཱི་ཧི ཙི་ཏྟི་ཏོ;
ལེ་ཁཱ སུ་ཝ་ཎྞ་སྶ ཙ རཱུ་པི་ཡ་སྶ ཙ, སོ་བྷེ་ནྟི ཝེ་ལུ༹་རི་ཡ་མ་ཡཱ སུ་ནི་མྨི་ཏཱ.
༡༠༠༩. ‘‘སཱི་ས་ཉྩི་དཾ ཝེ་ལུ༹་རི་ཡ་སྶ ནི་མྨི་ཏཾ, ཡུ་ག་ཉྩི་དཾ ལོ་ཧི་ཏ་ཀཱ་ཡ ཙི་ཏྟི་ཏཾ;
ཡུ་ཏྟཱ སུ་ཝ་ཎྞ་སྶ ཙ རཱུ་པི་ཡ་སྶ ཙ, སོ་བྷ་ནྟི ཨ་སྶཱ ཙ ཨི་མེ མ་ནོ་ཛ་ཝཱ.
༡༠༡༠. ‘‘སོ ཏི་ཊྛ་སི ཧེ་མ་ར་ཐེ ཨ་དྷི་ཊྛི་ཏོ, དེ་ཝཱ་ན་མི་ནྡོ་ཝ ས་ཧ་སྶ་ཝཱ་ཧ་ནོ;
པུ་ཙྪཱ་མི ཏཱ་ཧཾ ཡ་ས་ཝ་ནྟ ཀོ་ཝི་དཾ [ཀོ་ཝི་ད (ཀ.)], ཀ་ཐཾ ཏ་ཡཱ ལ་དྡྷོ ཨ་ཡཾ ཨུ་ལཱ༹་རོ’’ཏི.
༡༠༡༡. ‘‘སུ་ཛཱ་ཏོ ནཱ་མ་ཧཾ བྷ་ནྟེ, རཱ་ཛ་པུ་ཏྟོ པུ་རེ ཨ་ཧུཾ;
ཏྭ་ཉྩ མཾ ཨ་ནུ་ཀ་མྤཱ་ཡ, ས་ཉྙ་མ་སྨིཾ ནི་ཝེ་ས་ཡི.
༡༠༡༢. ‘‘ཁཱི་ཎཱ་ཡུ་ཀ་ཉྩ མཾ ཉ་ཏྭཱ, ས་རཱི་རཾ པཱ་དཱ་སི ས་ཏྠུ་ནོ;
ཨི་མཾ སུ་ཛཱ་ཏ པཱུ་ཛེ་ཧི, ཏཾ ཏེ ཨ་ཏྠཱ་ཡ ཧེ་ཧི་ཏི.
༡༠༡༣. ‘‘ཏཱ་ཧཾ ག་ནྡྷེ་ཧི མཱ་ལེ་ཧི, པཱུ་ཛ་ཡི་ཏྭཱ ས་མུ་ཡྻུ་ཏོ;
པ་ཧཱ་ཡ མཱ་ནུ་སཾ དེ་ཧཾ, ཨུ་པ་པ་ནྣོ་མྷི ན་ནྡ་ནཾ.
༡༠༡༤. ‘‘ན་ནྡ་ནེ ཙ ཝ་ནེ [ན་ནྡ་ནོ་པ་ཝ་ནེ (སཱི.), ན་ནྡ་ནེ པ་ཝ་ནེ (སྱཱ. ཀ.)] ར་མྨེ, ནཱ་ནཱ་དི་ཛ་ག་ཎཱ་ཡུ་ཏེ;
ར་མཱ་མི ན་ཙྩ་གཱི་ཏེ་ཧི, ཨ་ཙྪ་རཱ་ཧི པུ་ར་ཀྑ་ཏོ’’ཏི.
ཙཱུ་ལ༹་ར་ཐ་ཝི་མཱ་ནཾ ཏེ་ར་ས་མཾ.