༡༤. མ་ཧཱ་ར་ཐ་ཝི་མཱ་ན་ཝ་ཏྠུ
༡༠༡༥. ‘‘ས་ཧ་སྶ་ཡུ་ཏྟཾ ཧ་ཡ་ཝཱ་ཧ་ནཾ སུ་བྷཾ, ཨཱ་རུ་ཡ྄ཧི་མཾ ས་ནྡ་ནཾ ནེ་ཀ་ཙི་ཏྟཾ;
ཨུ་ཡྻཱ་ན་བྷཱུ་མིཾ ཨ་བྷི་ཏོ ཨ་ནུ་ཀྐ་མཾ, པུ་རི་ནྡ་དོ བྷཱུ་ཏ་པ་ཏཱི་ཝ ཝཱ་ས་ཝོ.
༡༠༡༦. ‘‘སོ་ཝ་ཎྞ་མ་ཡཱ ཏེ ར་ཐ་ཀུ་བྦ་རཱ ཨུ་བྷོ, ཕ་ལེ་ཧི [ཐ་ལེ་ཧི (སཱི.)] ཨཾ་སེ་ཧི ཨ་ཏཱི་ཝ ས་ངྒ་ཏཱ;
སུ་ཛཱ་ཏ་གུ་མྦཱ ན་ར་ཝཱི་ར་ནི་ཊྛི་ཏཱ, ཝི་རོ་ཙ་ཏཱི པ་ནྣ་ར་སེ་ཝ ཙ་ནྡོ.
༡༠༡༧. ‘‘སུ་ཝ་ཎྞ་ཛཱ་ལཱ་ཝ་ཏ་ཏོ ར་ཐོ ཨ་ཡཾ, བ་ཧཱུ་ཧི ནཱ་ནཱ་ར་ཏ་ནེ་ཧི ཙི་ཏྟི་ཏོ;
སུ་ན་ནྡི་གྷོ་སོ ཙ སུ་བྷ་སྶ་རོ ཙ, ཝི་རོ་ཙ་ཏཱི ཙཱ་མ་ར་ཧ་ཏྠ་བཱ་ཧུ་བྷི.
༡༠༡༨. ‘‘ཨི་མཱ ཙ ནཱ་བྷྱོ མ་ན་སཱ་བྷི་ནི་མྨི་ཏཱ, ར་ཐ་སྶ པཱ་ད་ནྟ་ར་མ་ཛ྄ཛྷ་བྷཱུ་སི་ཏཱ;
ཨི་མཱ ཙ ནཱ་བྷྱོ ས་ཏ་རཱ་ཛི་ཙི་ཏྟི་ཏཱ, ས་ཏེ་ར་ཏཱ ཝི་ཛྫུ་རི་ཝ་པྤ་བྷཱ་ས་རེ.
༡༠༡༩. ‘‘ཨ་ནེ་ཀ་ཙི་ཏྟཱ་ཝ་ཏ་ཏོ ར་ཐོ ཨ་ཡཾ, པུ་ཐཱུ ཙ ནེ་མཱི ཙ ས་ཧ་སྶ་རཾ་སི་ཀོ;
ཏེ་སཾ ས་རོ སུ་ཡྻ་ཏི [སཱུ་ཡ་ཏི (སཱི.)] ཝ་གྒུ་རཱུ་པོ, པ་ཉྩ་ངྒི་ཀཾ ཏུ་རི་ཡ་མི་ཝ་པྤ་ཝཱ་དི་ཏཾ.
༡༠༢༠. ‘‘སི་ར་སྨིཾ ཙི་ཏྟཾ མ་ཎི་ཙ་ནྡ་ཀ་པྤི་ཏཾ, ས་དཱ ཝི་སུ་དྡྷཾ རུ་ཙི་རཾ པ་བྷ་སྶ་རཾ;
སུ་ཝ་ཎྞ་རཱ་ཛཱི་ཧི ཨ་ཏཱི་ཝ ས་ངྒ་ཏཾ, ཝེ་ལུ༹་རི་ཡ་རཱ་ཛཱི་ཝ ཨ་ཏཱི་ཝ སོ་བྷ་ཏི.
༡༠༢༡. ‘‘ཨི་མེ ཙ ཝཱ་ལཱི༹ མ་ཎི་ཙ་ནྡ་ཀ་པྤི་ཏཱ, ཨཱ་རོ་ཧ་ཀ་མྦཱུ སུ་ཛ་ཝཱ བྲ་ཧཱུ་པ་མཱ.
བྲ་ཧཱ མ་ཧ་ནྟཱ བ་ལི་ནོ མ་ཧཱ་ཛ་ཝཱ, མ་ནོ ཏ་ཝ་ཉྙཱ་ཡ ཏ་ཐེ་ཝ སིཾ་ས་རེ [ས་བྦ་རེ (ཀ.), ས་པྤ་རེ (?)].
༡༠༢༢. ‘‘ཨི་མེ ཙ ས་བྦེ ས་ཧི་ཏཱ ཙ་ཏུ་ཀྐ་མཱ, མ་ནོ ཏ་ཝ་ཉྙཱ་ཡ ཏ་ཐེ་ཝ སིཾ་ས་རེ;
ས་མཾ ཝ་ཧ་ནྟཱ མུ་དུ་ཀཱ ཨ་ནུ་དྡྷ་ཏཱ, ཨཱ་མོ་ད་མཱ་ནཱ ཏུ་ར་གཱ་ན [ཏུ་ར་ངྒཱ་ན (ཀ.)] མུ་ཏྟ་མཱ.
༡༠༢༣. ‘‘དྷུ་ན་ནྟི ཝ་གྒ་ནྟི པ་ཏ་ནྟི [པ་ཝ་ཏྟ་ནྟི (པཱི. ཀ.)] ཙ་མྦ་རེ, ཨ་བྦྷུ་དྡྷུ་ན་ནྟཱ སུ་ཀ་ཏེ པི་ལ༹་ནྡྷ་ནེ;
ཏེ་སཾ ས་རོ སུ་ཡྻ་ཏི ཝ་གྒུ་རཱུ་པོ, པ་ཉྩ་ངྒི་ཀཾ ཏུ་རི་ཡ་མི་ཝ་པྤ་ཝཱ་དི་ཏཾ.
༡༠༢༤. ‘‘ར་ཐ་སྶ གྷོ་སོ ཨ་པི་ལ༹་ནྡྷ་ནཱ་ན ཙ, ཁུ་ར་སྶ ནཱ་དོ [ནཱ་དཱི (སྱཱ.), ནཱ་དི (པཱི. ཀ.)] ཨ་བྷི་ཧིཾ་ས་ནཱ་ཡ ཙ;
གྷོ་སོ སུ་ཝ་གྒཱུ ས་མི་ཏ་སྶ སུ་ཡྻ་ཏི, ག་ནྡྷ་བྦ་ཏཱུ་རི་ཡཱ་ནི ཝི་ཙི་ཏྲ་སཾ་ཝ་ནེ.
༡༠༢༥. ‘‘ར་ཐེ ཋི་ཏཱ ཏཱ མི་ག་མ་ནྡ་ལོ་ཙ་ནཱ, ཨཱ་ལཱ༹་ར་པ་མྷཱ ཧ་སི་ཏཱ པི་ཡཾ་ཝ་དཱ;
ཝེ་ལུ༹་རི་ཡ་ཛཱ་ལཱ་ཝ་ཏ་ཏཱ ཏ་ནུ་ཙྪ་ཝཱ, ས་དེ་ཝ ག་ནྡྷ་བྦ་སཱུ་ར་གྒ་པཱུ་ཛི་ཏཱ.
༡༠༢༦. ‘‘ཏཱ ར་ཏྟ་ར་ཏྟ་མྦ་ར་པཱི་ཏ་ཝཱ་ས་སཱ, ཝི་སཱ་ལ་ནེ་ཏྟཱ ཨ་བྷི་ར་ཏྟ་ལོ་ཙ་ནཱ;
ཀུ་ལེ སུ་ཛཱ་ཏཱ སུ་ཏ་ནཱུ སུ་ཙི་མྷི་ཏཱ, ར་ཐེ ཋི་ཏཱ པ་ཉྫ་ལི་ཀཱ ཨུ་པ་ཊྛི་ཏཱ.
༡༠༢༧. ‘‘ཏཱ ཀ་མྦུ་ཀེ་ཡཱུ་ར་དྷ་རཱ སུ་ཝཱ་ས་སཱ, སུ་མ་ཛ྄ཛྷི་མཱ ཨཱུ་རུ་ཐ་ནཱུ་པ་པ་ནྣཱ;
ཝ་ཊྚ་ངྒུ་ལི་ཡོ སུ་མུ་ཁཱ སུ་ད་སྶ་ནཱ, ར་ཐེ ཋི་ཏཱ པ་ཉྫ་ལི་ཀཱ ཨུ་པ་ཊྛི་ཏཱ.
༡༠༢༨. ‘‘ཨ་ཉྙཱ སུ་ཝེ་ཎཱི སུ་སུ མི་སྶ་ཀེ་སི་ཡོ, ས་མཾ ཝི་བྷ་ཏྟཱ་ཧི པ་བྷ་སྶ་རཱ་ཧི ཙ;
ཨ་ནུ་བྦ་ཏཱ ཏཱ ཏ་ཝ མཱ་ན་སེ ར་ཏཱ, ར་ཐེ ཋི་ཏཱ པ་ཉྫ་ལི་ཀཱ ཨུ་པ་ཊྛི་ཏཱ.
༡༠༢༩. ‘‘ཨཱ་ཝེ་ལི༹་ནི་ཡོ པ་དུ་མུ་པྤ་ལ་ཙྪ་དཱ, ཨ་ལ་ངྐ་ཏཱ ཙ་ནྡ་ན་སཱ་ར་ཝཱ་སི་ཏཱ [ཝོ་སི་ཏཱ (སྱཱ.), བྷཱུ་སི་ཏཱ (ཀ.)];
ཨ་ནུ་བྦ་ཏཱ ཏཱ ཏ་ཝ མཱ་ན་སེ ར་ཏཱ, ར་ཐེ ཋི་ཏཱ པ་ཉྫ་ལི་ཀཱ ཨུ་པ་ཊྛི་ཏཱ.
༡༠༣༠. ‘‘ཏཱ མཱ་ལི་ནི་ཡོ པ་དུ་མུ་པྤ་ལ་ཙྪ་དཱ, ཨ་ལ་ངྐ་ཏཱ ཙ་ནྡ་ན་སཱ་ར་ཝཱ་སི་ཏཱ;
ཨ་ནུ་བྦ་ཏཱ ཏཱ ཏ་ཝ མཱ་ན་སེ ར་ཏཱ, ར་ཐེ ཋི་ཏཱ པ་ཉྫ་ལི་ཀཱ ཨུ་པ་ཊྛི་ཏཱ.
༡༠༣༡. ‘‘ཀ་ཎྛེ་སུ ཏེ ཡཱ་ནི པི་ལ༹་ནྡྷ་ནཱ་ནི, ཧ་ཏྠེ་སུ པཱ་དེ་སུ ཏ་ཐེ་ཝ སཱི་སེ;
ཨོ་བྷཱ་ས་ཡ་ནྟཱི ད་ས ས་བྦ་སོ དི་སཱ, ཨ་བྦྷུ་དྡ་ཡཾ སཱ་ར་དི་ཀོ་ཝ བྷཱ་ཎུ་མཱ.
༡༠༣༢. ‘‘ཝཱ་ཏ་སྶ ཝེ་གེ་ན ཙ ས་མྤ་ཀ་མྤི་ཏཱ, བྷུ་ཛེ་སུ མཱ་ལཱ ཨ་པི་ལ༹་ནྡྷ་ནཱ་ནི ཙ;
མུ་ཉྩ་ནྟི གྷོ་སཾ རཱུ་ཙི་རཾ སུ་ཙིཾ སུ་བྷཾ, ས་བྦེ་ཧི ཝི་ཉྙཱུ་ཧི སུ་ཏ་བྦ་རཱུ་པཾ.
༡༠༣༣. ‘‘ཨུ་ཡྻཱ་ན་བྷཱུ་མྱཱ ཙ དུ་ཝ་དྡྷ་ཏོ ཋི་ཏཱ, ར་ཐཱ ཙ ནཱ་གཱ ཏཱུ་རི་ཡཱ་ནི ཙ ས་རོ;
ཏ་མེ་ཝ དེ་ཝི་ནྡ པ་མོ་ད་ཡ་ནྟི, ཝཱི་ཎཱ ཡ་ཐཱ པོ་ཀྑ་ར་པ་ཏྟ་བཱ་ཧུ་བྷི.
༡༠༣༤. ‘‘ཨི་མཱ་སུ ཝཱི་ཎཱ་སུ བ་ཧཱུ་སུ ཝ་གྒཱུ་སུ, མ་ནུ་ཉྙ་རཱུ་པཱ་སུ ཧ་ད་ཡེ་རི་ཏཾ པཱི་ཏིཾ [ཧ་ད་ཡེ་རི་ཏཾ པ་ཏི (སཱི.), ཧ་ད་ཡེ་རི་ཏ་མྤི ཏཾ (སྱཱ.)];
པ་ཝ་ཛྫ་མཱ་ནཱ་སུ ཨ་ཏཱི་ཝ ཨ་ཙྪ་རཱ, བྷ་མ་ནྟི ཀ་ཉྙཱ པ་དུ་མེ་སུ སི་ཀྑི་ཏཱ.
༡༠༣༥. ‘‘ཡ་དཱ ཙ གཱི་ཏཱ་ནི ཙ ཝཱ་དི་ཏཱ་ནི ཙ, ན་ཙྩཱ་ནི ཙི་མཱ་ནི [ཙེ་མཱ་ནི (སཱི.)] ས་མེ་ནྟི ཨེ་ཀ་ཏོ;
ཨ་ཐེ་ཏྠ ན་ཙྩ་ནྟི ཨ་ཐེ་ཏྠ ཨ་ཙྪ་རཱ, ཨོ་བྷཱ་ས་ཡ་ནྟཱི ཨུ་བྷ་ཏོ ཝ་རི་ཏྠི་ཡོ.
༡༠༣༦. ‘‘སོ མོ་ད་སི ཏུ་རི་ཡ་ག་ཎ་པྤ་བོ་དྷ་ནོ, མ་ཧཱི་ཡ་མཱ་ནོ ཝ་ཛི་རཱ་ཝུ་དྷོ་རི་ཝ;
ཨི་མཱ་སུ ཝཱི་ཎཱ་སུ བ་ཧཱུ་སུ ཝ་གྒཱུ་སུ, མ་ནུ་ཉྙ་རཱུ་པཱ་སུ ཧ་ད་ཡེ་རི་ཏཾ པཱི་ཏིཾ.
༡༠༣༧. ‘‘ཀིཾ ཏྭཾ པུ་རེ ཀ་མྨ་མ་ཀཱ་སི ཨ་ཏྟ་ནཱ, མ་ནུ་སྶ་བྷཱུ་ཏོ པུ་རི་མཱ་ཡ ཛཱ་ཏི་ཡཱ;
ཨུ་པོ་ས་ཐཾ ཀཾ ཝཱ [ཨུ་པོ་ས་ཐཾ ཀིཾ ཝ (སྱཱ.)] ཏུ་ཝཾ ཨུ་པཱ་ཝ་སི, ཀཾ [ཀིཾ (སྱཱ.)] དྷ་མྨ་ཙ་རི་ཡཾ ཝ་ཏ་མཱ་བྷི་རོ་ཙ་ཡི.
༡༠༣༨. ‘‘ན་ཡཱི་ད་མ་པྤ་སྶ ཀ་ཏ་སྶ [ན་ཡི་དཾ ཨ་པྤ་སྶ ཀ་ཏ་སྶ (སཱི. སྱཱ.), སཱ་སེ་དཾ ཨ་པྤ་ཀ་ཏ་སྶ (ཀ.)] ཀ་མྨུ་ནོ, པུ་བྦེ སུ་ཙི་ཎྞ་སྶ ཨུ་པོ་ས་ཐ་སྶ ཝཱ;
ཨི་དྡྷཱ་ནུ་བྷཱ་ཝོ ཝི་པུ་ལོ ཨ་ཡཾ ཏ་ཝ, ཡཾ དེ་ཝ་ས་ངྒྷཾ ཨ་བྷི་རོ་ཙ་སེ བྷུ་སཾ.
༡༠༣༩. ‘‘དཱ་ན་སྶ ཏེ ཨི་དཾ ཕ་ལཾ, ཨ་ཐོ སཱི་ལ་སྶ ཝཱ པ་ན;
ཨ་ཐོ ཨ་ཉྫ་ལི་ཀ་མྨ་སྶ, ཏཾ མེ ཨ་ཀྑཱ་ཧི པུ་ཙྪི་ཏོ’’ཏི.
༡༠༤༠. སོ དེ་ཝ་པུ་ཏྟོ ཨ་ཏྟ་མ་ནོ, མོ་གྒ་ལླཱ་ནེ་ན པུ་ཙྪི་ཏོ;
པ་ཉྷཾ པུ་ཊྛོ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལ་ནྟི.
༡༠༤༡. ‘‘ཛི་ཏི་ནྡྲི་ཡཾ བུ་དྡྷ་མ་ནོ་མ་ནི་ཀྐ་མཾ, ན་རུ་ཏྟ་མཾ ཀ་སྶ་པ་མ་གྒ་པུ་གྒ་ལཾ;
ཨ་ཝཱ་པུ་ར་ནྟཾ ཨ་མ་ཏ་སྶ དྭཱ་རཾ, དེ་ཝཱ་ཏི་དེ་ཝཾ ས་ཏ་པུ་ཉྙ་ལ་ཀྑ་ཎཾ.
༡༠༤༢. ‘‘ཏ་མ་དྡ་སཾ ཀུ་ཉྫ་ར་མོ་གྷ་ཏི་ཎྞཾ, སུ་ཝ་ཎྞ་སི་ངྒཱི་ན་ད་བི་མྦ་སཱ་དི་སཾ;
དི་སྭཱ་ན ཏཾ ཁི་པྤ་མ་ཧུཾ སུ་ཙཱི་མ་ནོ, ཏ་མེ་ཝ དི་སྭཱ་ན སུ་བྷཱ་སི་ཏ་དྡྷ་ཛཾ.
༡༠༤༣. ‘‘ཏ་མ་ནྣ་པཱ་ནཾ ཨ་ཐ་ཝཱ་པི ཙཱི་ཝ་རཾ, སུ་ཙིཾ པ་ཎཱི་ཏཾ ར་ས་སཱ ཨུ་པེ་ཏཾ;
པུ་པྥཱ་བྷི་ཀྐི་ཎ་མྷི ས་ཀེ ནི་ཝེ་ས་ནེ, པ་ཏི་ཊྛ་པེ་སིཾ ས ཨ་ས་ངྒ་མཱ་ན་སོ.
༡༠༤༤. ‘‘ཏ་མ་ནྣ་པཱ་ནེ་ན ཙ ཙཱི་ཝ་རེ་ན ཙ, ཁ་ཛྫེ་ན བྷོ་ཛྫེ་ན ཙ སཱ་ཡ་ནེ་ན ཙ;
ས་ནྟ་པྤ་ཡི་ཏྭཱ དྭི་པ་དཱ་ན་མུ་ཏྟ་མཾ, སོ ས་གྒ་སོ དེ་ཝ་པུ་རེ ར་མཱ་མ་ཧཾ.
༡༠༤༥.
‘‘ཨེ་ཏེ་ནུ་པཱ་ཡེ་ན ཨི་མཾ ནི་ར་གྒ་ལ༹ཾ, ཡ་ཉྙཾ ཡ་ཛི་ཏྭཱ ཏི་ཝི་དྷཾ ཝི་སུ་དྡྷཾ.
པ་ཧཱ་ཡ་ཧཾ མཱ་ནུ་ས་ཀཾ ས་མུ་སྶ་ཡཾ, ཨི་ནྡཱུ་པ་མོ [ཨི་ནྡ་སྶ་མོ (སྱཱ. ཀ.)] དེ་ཝ་པུ་རེ ར་མཱ་མ་ཧཾ.
༡༠༤༦. ‘‘ཨཱ་ཡུ་ཉྩ ཝ་ཎྞ་ཉྩ སུ་ཁཾ བ་ལ་ཉྩ, པ་ཎཱི་ཏ་རཱུ་པཾ ཨ་བྷི་ཀ་ངྑ་ཏཱ མུ་ནི;
ཨ་ནྣ་ཉྩ པཱ་ན་ཉྩ བ་ཧུཾ སུ་ས་ངྑ་ཏཾ, པ་ཏི་ཊྛ་པེ་ཏ་བྦ་མ་ས་ངྒ་མཱ་ན་སེ.
༡༠༤༧. [ཀ་ཐཱ. ༧༩༩]‘‘ན་ཡི་མ་སྨིཾ ལོ་ཀེ པ་ར་སྨིཾ [ན་ཡི་མ་སྨིཾ ཝཱ ལོ་ཀེ པ་ར་སྨིཾ (ཀ་ཐཱ་ཝ་ཏྠུ ༧༩༩), ན་ཡི་མ་སྨི ལོ་ཀེ ཝ པ་ར་སྨི (?)] ཝཱ པ་ན, བུ་དྡྷེ་ན སེ་ཊྛོ ཝ ས་མོ ཝ ཝི་ཛྫ་ཏི;
ཨཱ་ཧུ་ནེ་ཡྻཱ་ནཾ [ཡ་མཱ་ཧུ་ནེ་ཡྻཱ་ནཾ (ཀ.)] པ་ར་མཱ་ཧུ་ཏིཾ ག་ཏོ, པུ་ཉྙ་ཏྠི་ཀཱ་ནཾ ཝི་པུ་ལ་པྥ་ལེ་སི་ན’’ནྟི.
མ་ཧཱ་ར་ཐ་ཝི་མཱ་ནཾ ཙུ་དྡ་ས་མཾ.
མ་ཧཱ་ར་ཐ་ཝ་གྒོ པ་ཉྩ་མོ ནི་ཊྛི་ཏོ.
ཏ་སྶུ་དྡཱ་ནཾ –
མ་ཎྜཱུ་ཀོ རེ་ཝ་ཏཱི ཚ་ཏྟོ, ཀ་ཀྐ་ཊོ དྭཱ་ར་པཱ་ལ་ཀོ;
དྭེ ཀ་ར་ཎཱི་ཡཱ དྭེ སཱུ་ཙི, ཏ་ཡོ ནཱ་གཱ ཙ དྭེ ར་ཐཱ;
པུ་རི་སཱ་ནཾ པ་ཋ་མོ ཝ་གྒོ པ་ཝུ་ཙྩ་ཏཱི་ཏི.
བྷཱ་ཎ་ཝཱ་རཾ ཏ་ཏི་ཡཾ ནི་ཊྛི་ཏཾ.