༢. པུ་རི་ས་ཝི་མཱ་ནཾ
༥. མ་ཧཱ་ར་ཐ་ཝ་གྒོ
༡. མ་ཎྜཱུ་ཀ་དེ་ཝ་པུ་ཏྟ་ཝི་མཱ་ན་ཝ་ཏྠུ
༨༥༧. ‘‘ཀོ མེ ཝ་ནྡ་ཏི པཱ་དཱ་ནི, ཨི་དྡྷི་ཡཱ ཡ་ས་སཱ ཛ་ལཾ;
ཨ་བྷི་ཀྐ་ནྟེ་ན ཝ་ཎྞེ་ན, ས་བྦཱ ཨོ་བྷཱ་ས་ཡཾ དི་སཱ’’ཏི.
༨༥༨. ‘‘མ་ཎྜཱུ་ཀོ་ཧཾ པུ་རེ ཨཱ་སིཾ, ཨུ་ད་ཀེ ཝཱ་རི་གོ་ཙ་རོ;
ཏ་ཝ དྷ་མྨཾ སུ་ཎ་ནྟ་སྶ, ཨ་ཝ་དྷཱི ཝ་ཙྪ་པཱ་ལ་ཀོ.
༨༥༩. ‘‘མུ་ཧུ་ཏྟཾ ཙི་ཏྟ་པ་སཱ་ད་སྶ, ཨི་དྡྷིཾ པ་སྶ ཡ་ས་ཉྩ མེ;
ཨཱ་ནུ་བྷཱ་ཝ་ཉྩ མེ པ་སྶ, ཝ་ཎྞཾ པ་སྶ ཛུ་ཏི་ཉྩ མེ.
༨༦༠. ‘‘ཡེ ཙ ཏེ དཱི་གྷ་མ་དྡྷཱ་ནཾ, དྷ་མྨཾ ཨ་སྶོ་སུཾ གོ་ཏ་མ;
པ་ཏྟཱ ཏེ ཨ་ཙ་ལ་ཊྛཱ་ནཾ, ཡ་ཏྠ ག་ནྟྭཱ ན སོ་ཙ་རེ’’ཏི.
མ་ཎྜཱུ་ཀ་དེ་ཝ་པུ་ཏྟ་ཝི་མཱ་ནཾ པ་ཋ་མཾ.
༢. རེ་ཝ་ཏཱི་ཝི་མཱ་ན་ཝ་ཏྠུ
༨༦༡. [དྷ. པ. ༢༡༩ དྷ་མྨ་པ་དེ] ‘‘ཙི་ར་པྤ་ཝཱ་སིཾ པུ་རི་སཾ, དཱུ་ར་ཏོ སོ་ཏྠི་མཱ་ག་ཏཾ;
ཉཱ་ཏི་མི་ཏྟཱ སུ་ཧ་ཛྫཱ ཙ, ཨ་བྷི་ན་ནྡ་ནྟི ཨཱ་ག་ཏཾ;
༨༦༢. [དྷ. པ. ༢༢༠ དྷ་མྨ་པ་དེ] ‘‘ཏ་ཐེ་ཝ ཀ་ཏ་པུ་ཉྙ་མྤི, ཨ་སྨཱ ལོ་ཀཱ པ་རཾ ག་ཏཾ;
པུ་ཉྙཱ་ནི པ་ཊི་ག་ཎྷ་ནྟི, པི་ཡཾ ཉཱ་ཏཱི་ཝ ཨཱ་ག་ཏཾ.
༨༦༣. [པེ. ཝ. ༧༡༤]‘‘ཨུ་ཊྛེ་ཧི རེ་ཝ་ཏེ སུ་པཱ་པ་དྷ་མྨེ, ཨ་པཱ་རུ་ཏ་དྭཱ་རེ [ཨ་པཱ་རུ་བྷཾ དྭཱ་རཾ (སཱི. སྱཱ.), ཨ་པཱ་རུ་ཏ་དྭཱ་རཾ (པཱི. ཀ.)] ཨ་དཱ་ན་སཱི་ལེ;
ནེ་སྶཱ་མ ཏཾ ཡ་ཏྠ ཐུ་ན་ནྟི དུ་གྒ་ཏཱ, ས་མ་པྤི་ཏཱ ནེ་ར་ཡི་ཀཱ དུ་ཀྑེ་ནཱ’’ཏི.
༨༦༤. ཨི་ཙྩེ་ཝ [ཨི་ཙྩེ་ཝཾ (སྱཱ. ཀ.)] ཝ་ཏྭཱ་ན ཡ་མ་སྶ དཱུ་ཏཱ, ཏེ དྭེ ཡ་ཀྑཱ ལོ་ཧི་ཏ་ཀྑཱ བྲ་ཧ་ནྟཱ;
པ་ཙྩེ་ཀ་བཱ་ཧཱ་སུ ག་ཧེ་ཏྭཱ རེ་ཝ་ཏཾ, པ་ཀྐཱ་མ་ཡུཾ དེ་ཝ་ག་ཎ་སྶ ས་ནྟི་ཀེ.
༨༦༥. ‘‘ཨཱ་དི་ཙྩ་ཝ་ཎྞཾ རུ་ཙི་རཾ པ་བྷ་སྶ་རཾ, བྱ་མྷཾ སུ་བྷཾ ཀ་ཉྩ་ན་ཛཱ་ལ་ཚ་ནྣཾ;
ཀ་སྶེ་ཏ་མཱ་ཀི་ཎྞ་ཛ་ནཾ ཝི་མཱ་ནཾ, སཱུ་རི་ཡ་སྶ རཾ་སཱི་རི་ཝ ཛོ་ཏ་མཱ་ནཾ.
༨༦༦. ‘‘ནཱ་རཱི་ག་ཎཱ ཙ་ནྡ་ན་སཱ་ར་ལི་ཏྟཱ [ཙ་ནྡ་ན་སཱ་རཱ་ནུ་ལི་ཏྟཱ (སྱཱ.)], ཨུ་བྷ་ཏོ ཝི་མཱ་ནཾ ཨུ་པ་སོ་བྷ་ཡ་ནྟི;
ཏཾ དི་སྶ་ཏི སཱུ་རི་ཡ་ས་མཱ་ན་ཝ་ཎྞཾ, ཀོ མོ་ད་ཏི ས་གྒ་པ་ཏྟོ ཝི་མཱ་ནེ’’ཏི.
༨༦༧. ‘‘བཱ་རཱ་ཎ་སི་ཡཾ ན་ནྡི་ཡོ ནཱ་མཱ་སི, ཨུ་པཱ་ས་ཀོ ཨ་མ་ཙྪ་རཱི དཱ་ན་པ་ཏི ཝ་ད་ཉྙཱུ;
ཏ་སྶེ་ཏ་མཱ་ཀི་ཎྞ་ཛ་ནཾ ཝི་མཱ་ནཾ, སཱུ་རི་ཡ་སྶ རཾ་སཱི་རི་ཝ ཛོ་ཏ་མཱ་ནཾ.
༨༦༨. ‘‘ནཱ་རཱི་ག་ཎཱ ཙ་ནྡ་ན་སཱ་ར་ལི་ཏྟཱ, ཨུ་བྷ་ཏོ ཝི་མཱ་ནཾ ཨུ་པ་སོ་བྷ་ཡ་ནྟི;
ཏཾ དི་སྶ་ཏི སཱུ་རི་ཡ་ས་མཱ་ན་ཝ་ཎྞཾ, སོ མོ་ད་ཏི ས་གྒ་པ་ཏྟོ ཝི་མཱ་ནེ’’ཏི.
༨༦༩. ‘‘ན་ནྡི་ཡ་སྶཱ་ཧཾ བྷ་རི་ཡཱ, ཨ་གཱ་རི་ནཱི ས་བྦ་ཀུ་ལ་སྶ ཨི་སྶ་རཱ;
བྷ་ཏྟུ ཝི་མཱ་ནེ ར་མི་སྶཱ་མི དཱ་ན་ཧཾ, ན པ་ཏྠ་ཡེ ནི་ར་ཡཾ ད་སྶ་ནཱ་ཡཱ’’ཏི.
༨༧༠. ‘‘ཨེ་སོ ཏེ ནི་ར་ཡོ སུ་པཱ་པ་དྷ་མྨེ, པུ་ཉྙཾ ཏ་ཡཱ ཨ་ཀ་ཏཾ ཛཱི་ཝ་ལོ་ཀེ;
ན ཧི མ་ཙྪ་རཱི རོ་ས་ཀོ པཱ་པ་དྷ་མྨོ, ས་གྒཱུ་པ་གཱ་ནཾ ལ་བྷ་ཏི ས་ཧ་བྱ་ཏ’’ནྟི.
༨༧༡. ‘‘ཀིཾ ནུ གཱུ་ཐ་ཉྩ མུ་ཏྟ་ཉྩ, ཨ་སུ་ཙཱི པ་ཊི་དི་སྶ་ཏི;
དུ་གྒ་ནྡྷཾ ཀི་མི་དཾ མཱི་ལ༹ྷཾ, ཀི་མེ་ཏཾ ཨུ་པ་ཝཱ་ཡ་ཏཱི’’ཏི.
༨༧༢. ‘‘ཨེ་ས སཾ་ས་ཝ་ཀོ ནཱ་མ, ག་མྦྷཱི་རོ ས་ཏ་པོ་རི་སོ;
ཡ་ཏྠ ཝ་སྶ་ས་ཧ་སྶཱ་ནི, ཏུ་ཝཾ པ་ཙྩ་སི རེ་ཝ་ཏེ’’ཏི.
༨༧༣. ‘‘ཀིཾ ནུ ཀཱ་ཡེ་ན ཝཱ་ཙཱ་ཡ, མ་ན་སཱ དུ་ཀྐ་ཊཾ ཀ་ཏཾ;
ཀེ་ན སཾ་ས་ཝ་ཀོ ལ་དྡྷོ, ག་མྦྷཱི་རོ ས་ཏ་པོ་རི་སོ’’ཏི.
༨༧༤. ‘‘ས་མ་ཎེ བྲཱ་ཧྨ་ཎེ ཙཱ་པི, ཨ་ཉྙེ ཝཱ་པི ཝ་ནི་བྦ་ཀེ [ཝ་ཎི་བྦ་ཀེ (སྱཱ. ཀ.)];
མུ་སཱ་ཝཱ་དེ་ན ཝ་ཉྩེ་སི, ཏཾ པཱ་པཾ པ་ཀ་ཏཾ ཏ་ཡཱ.
༨༧༥. ‘‘ཏེ་ན སཾ་ས་ཝ་ཀོ ལ་དྡྷོ, ག་མྦྷཱི་རོ ས་ཏ་པོ་རི་སོ;
ཏ་ཏྠ ཝ་སྶ་ས་ཧ་སྶཱ་ནི, ཏུ་ཝཾ པ་ཙྩ་སི རེ་ཝ་ཏེ.
༨༧༦. ‘‘ཧ་ཏྠེ་པི ཚི་ནྡ་ནྟི ཨ་ཐོ་པི པཱ་དེ, ཀ་ཎྞེ་པི ཚི་ནྡ་ནྟི ཨ་ཐོ་པི ནཱ་སཾ;
ཨ་ཐོ་པི ཀཱ་ཀོ་ལ༹་ག་ཎཱ ས་མེ་ཙྩ, ས་ངྒ་མྨ ཁཱ་ད་ནྟི ཝི་ཕ་ནྡ་མཱ་ན’’ནྟི.
༨༧༧. ‘‘སཱ་དྷུ ཁོ མཾ པ་ཊི་ནེ་ཐ, ཀཱ་ཧཱ་མི ཀུ་ས་ལཾ བ་ཧུཾ;
དཱ་ནེ་ན ས་མ་ཙ་རི་ཡཱ་ཡ, སཾ་ཡ་མེ་ན ད་མེ་ན ཙ;
ཡཾ ཀ་ཏྭཱ སུ་ཁི་ཏཱ ཧོ་ནྟི, ན ཙ པ་ཙྪཱ་ནུ་ཏ་པྤ་རེ’’ཏི.
༨༧༨. ‘‘པུ་རེ ཏུ་ཝཾ པ་མ་ཛྫི་ཏྭཱ, ཨི་དཱ་ནི པ་རི་དེ་ཝ་སི;
ས་ཡཾ ཀ་ཏཱ་ནཾ ཀ་མྨཱ་ནཾ, ཝི་པཱ་ཀཾ ཨ་ནུ་བྷོ་སྶ་སཱི’’ཏི.
༨༧༩. ‘‘ཀོ དེ་ཝ་ལོ་ཀ་ཏོ མ་ནུ་སྶ་ལོ་ཀཾ, ག་ནྟྭཱ་ན པུ་ཊྛོ མེ ཨེ་ཝཾ ཝ་དེ་ཡྻ;
‘ནི་ཀྑི་ཏྟ་ད་ཎྜེ་སུ ད་དཱ་ཐ དཱ་ནཾ, ཨ་ཙྪཱ་ད་ནཾ སེ་ཡྻ [ས་ཡ་ན (སཱི.)] མ་ཐ་ནྣ་པཱ་ནཾ;
ན་ཧི མ་ཙྪ་རཱི རོ་ས་ཀོ པཱ་པ་དྷ་མྨོ, ས་གྒཱུ་པ་གཱ་ནཾ ལ་བྷ་ཏི ས་ཧ་བྱ་ཏཾ’.
༨༨༠. ‘‘སཱ་ཧཾ ནཱུ་ན ཨི་ཏོ ག་ནྟྭཱ, ཡོ་ནིཾ ལ་དྡྷཱ་ན མཱ་ནུ་སིཾ;
ཝ་ད་ཉྙཱུ སཱི་ལ་ས་མྤ་ནྣཱ, ཀཱ་ཧཱ་མི ཀུ་ས་ལཾ བ་ཧུཾ;
དཱ་ནེ་ན ས་མ་ཙ་རི་ཡཱ་ཡ, སཾ་ཡ་མེ་ན ད་མེ་ན ཙ.
༨༨༡. ‘‘ཨཱ་རཱ་མཱ་ནི ཙ རོ་པི་སྶཾ, དུ་གྒེ ས་ངྐ་མ་ནཱ་ནི ཙ;
པ་པ་ཉྩ ཨུ་ད་པཱ་ན་ཉྩ, ཝི་པྤ་ས་ནྣེ་ན ཙེ་ཏ་སཱ.
༨༨༢. ‘‘ཙཱ་ཏུ་དྡ་སིཾ པ་ཉྩ་ད་སིཾ, ཡཱ ཙ པ་ཀྑ་སྶ ཨ་ཊྛ་མཱི;
པཱ་ཊི་ཧཱ་རི་ཡ་པ་ཀྑ་ཉྩ, ཨ་ཊྛ་ངྒ་སུ་ས་མཱ་ག་ཏཾ.
༨༨༣. ‘‘ཨུ་པོ་ས་ཐཾ ཨུ་པ་ཝ་སི་སྶཾ, ས་དཱ སཱི་ལེ་སུ སཾ་ཝུ་ཏཱ;
ན ཙ དཱ་ནེ པ་མ་ཛྫི་སྶཾ, སཱ་མཾ དི་ཊྛ་མི་དཾ མ་ཡཱ’’ཏི;
༨༨༤. ཨི་ཙྩེ་ཝཾ ཝི་པྤ་ལ་པ་ནྟིཾ, ཕ་ནྡ་མཱ་ནཾ ཏ་ཏོ ཏ་ཏོ;
ཁི་པིཾ་སུ ནི་ར་ཡེ གྷོ་རེ, ཨུ་དྡྷ་པཱ་དཾ ཨ་ཝཾ་སི་རཾ.
༨༨༥. ‘‘ཨ་ཧཾ པུ་རེ མ་ཙྪ་རི་ནཱི ཨ་ཧོ་སིཾ, པ་རི་བྷཱ་སི་ཀཱ ས་མ་ཎ་བྲཱ་ཧྨ་ཎཱ་ནཾ;
ཝི་ཏ་ཐེ་ན ཙ སཱ་མི་ཀཾ ཝ་ཉྩ་ཡི་ཏྭཱ, པ་ཙྩཱ་མ་ཧཾ ནི་ར་ཡེ གྷོ་ར་རཱུ་པེ’’ཏི.
རེ་ཝ་ཏཱི་ཝི་མཱ་ནཾ དུ་ཏི་ཡཾ.
༣. ཚ་ཏྟ་མཱ་ཎ་ཝ་ཀ་ཝི་མཱ་ན་ཝ་ཏྠུ
༨༨༦. ‘‘ཡེ ཝ་ད་ཏཾ པ་ཝ་རོ མ་ནུ་ཛེ་སུ, ས་ཀྱ་མུ་ནཱི བྷ་ག་ཝཱ ཀ་ཏ་ཀི་ཙྩོ;
པཱ་ར་ག་ཏོ བ་ལ་ཝཱི་རི་ཡ་ས་མ་ངྒཱི [བ་ལ་ཝཱི་ར་ས་མ་ངྒཱི (ཀ.)], ཏཾ སུ་ག་ཏཾ ས་ར་ཎ་ཏྠ་མུ་པེ་ཧི.
༨༨༧. ‘‘རཱ་ག་ཝི་རཱ་ག་མ་ནེ་ཛ་མ་སོ་ཀཾ, དྷ་མྨ་མ་ས་ངྑ་ཏ་མ་པྤ་ཊི་ཀཱུ་ལཾ;
མ་དྷུ་ར་མི་མཾ པ་གུ་ཎཾ སུ་ཝི་བྷ་ཏྟཾ, དྷ་མྨ་མི་མཾ ས་ར་ཎ་ཏྠ་མུ་པེ་ཧི.
༨༨༨. ‘‘ཡ་ཏྠ ཙ དི་ནྣ མ་ཧ་པྥ་ལ་མཱ་ཧུ, ཙ་ཏཱུ་སུ སུ་ཙཱི་སུ པུ་རི་ས་ཡུ་གེ་སུ;
ཨ་ཊྛ ཙ པུ་གྒ་ལ་དྷ་མྨ་ད་སཱ ཏེ, ས་ངྒྷ་མི་མཾ ས་ར་ཎ་ཏྠ་མུ་པེ་ཧི.
༨༨༩. ‘‘ན ཏ་ཐཱ ཏ་པ་ཏི ན་བྷེ སཱུ་རི་ཡོ, ཙ་ནྡོ ཙ ན བྷཱ་ས་ཏི ན ཕུ་སྶོ;
ཡ་ཐཱ ཨ་ཏུ་ལ་མི་དཾ མ་ཧ་པྤ་བྷཱ་སཾ, ཀོ ནུ ཏྭཾ ཏི་དི་ཝཱ མ་ཧིཾ ཨུ་པཱ་གཱ.
༨༩༠. ‘‘ཚི་ནྡ་ཏི རཾ་སཱི པ་བྷ་ངྐ་ར་སྶ, སཱ་དྷི་ཀ་ཝཱི་ས་ཏི་ཡོ་ཛ་ནཱ་ནི ཨཱ་བྷཱ;
ར་ཏྟི་མ་པི ཡ་ཐཱ དི་ཝཾ ཀ་རོ་ཏི, པ་རི་སུ་དྡྷཾ ཝི་མ་ལཾ སུ་བྷཾ ཝི་མཱ་ནཾ.
༨༩༡. ‘‘བ་ཧུ་པ་དུ་མ་ཝི་ཙི་ཏྲ་པུ་ཎྜ་རཱི་ཀཾ, ཝོ་ཀི་ཎྞཾ ཀུ་སུ་མེ་ཧི ནེ་ཀ་ཙི་ཏྟཾ;
ཨ་ར་ཛ་ཝི་ར་ཛ་ཧེ་མ་ཛཱ་ལ་ཚ་ནྣཾ, ཨཱ་ཀཱ་སེ ཏ་པ་ཏི ཡ་ཐཱ་པི སཱུ་རི་ཡོ.
༨༩༢. ‘‘ར་ཏྟ་མྦ་ར་པཱི་ཏ་ཝ་ས་སཱ་ཧི, ཨ་ག་རུ་པི་ཡ་ངྒུ་ཙ་ནྡ་ནུ་སྶ་དཱ་ཧི;
ཀ་ཉྩ་ན་ཏ་ནུ་ས་ནྣི་བྷ་ཏྟ་ཙཱ་ཧི, པ་རི་པཱུ་རཾ ག་ག་ནཾ་ཝ ཏཱ་ར་ཀཱ་ཧི.
༨༩༣. ‘‘ན་ར་ནཱ་རི་ཡོ [ན་ར་ནཱ་རཱི (ཀ.), ནཱ་རི་ཡོ (?)] བ་ཧུ་ཀེ་ཏྠ་ནེ་ཀ་ཝ་ཎྞཱ, ཀུ་སུ་མ་ཝི་བྷཱུ་སི་ཏཱ་བྷ་ར་ཎེ་ཏྠ སུ་མ་ནཱ;
ཨ་ནི་ལ་པ་མུ་ཉྩི་ཏཱ པ་ཝ་ནྟི [པ་ཝཱ་ཡ་ནྟི (ཀ.)] སུ་ར་བྷིཾ, ཏ་པ་ནི་ཡ་ཝི་ཏ་ཏཱ སུ་ཝ་ཎྞ་ཚ་ནྣཱ [སུ་ཝ་ཎྞ་ཙྪཱ་ད་ནཱ (སཱི.)].
༨༩༤. ‘‘ཀི་སྶ སཾ་ཡ་མ་སྶ [ས་མ་ད་མ་སྶ (སཱི.)] ཨ་ཡཾ ཝི་པཱ་ཀོ, ཀེ་ནཱ་སི ཀ་མྨ་ཕ་ལེ་ནི་དྷཱུ་པ་པ་ནྣོ;
ཡ་ཐཱ ཙ ཏེ ཨ་དྷི་ག་ཏ་མི་དཾ ཝི་མཱ་ནཾ, ཏ་ད་ནུ་པ་དཾ ཨ་ཝ་ཙཱ་སི ཨི་ངྒྷ པུ་ཊྛོ’’ཏི.
༨༩༥. ‘‘ས་ཡ་མི་དྷ [ཡ་མི་དྷ (སཱི. སྱཱ. པཱི.)] པ་ཐེ ས་མེ་ཙྩ མཱ་ཎ་ཝེ་ན, ས་ཏྠཱ་ནུ་སཱ་སི ཨ་ནུ་ཀ་མྤ་མཱ་ནོ;
ཏ་ཝ ར་ཏ་ན་ཝ་ར་སྶ དྷ་མྨཾ སུ་ཏྭཱ, ཀ་རི་སྶཱ་མཱི་ཏི ཙ བྲ་ཝི་ཏྠ ཚ་ཏྟོ.
༨༩༦. ‘‘ཛི་ན་ཝ་ར་པ་ཝ་རཾ [ཛི་ན་པ་ཝ་རཾ (སྱཱ. ཀ.)] ཨུ་པེ་ཧི [ཨུ་པེ་མི (བ་ཧཱུ་སུ)] ས་ར་ཎཾ, དྷ་མྨ་ཉྩཱ་པི ཏ་ཐེ་ཝ བྷི་ཀྑུ་ས་ངྒྷཾ;
ནོ་ཏི པ་ཋ་མཾ ཨ་ཝོ་ཙ་ཧཾ [ཨ་ཝོ་ཙཱ་ཧཾ (སཱི. སྱཱ. ཀ.)] བྷ་ནྟེ, པ་ཙྪཱ ཏེ ཝ་ཙ་ནཾ ཏ་ཐེ་ཝ་ཀཱ་སིཾ.
༨༩༧. ‘‘མཱ ཙ པཱ་ཎ་ཝ་དྷཾ ཝི་ཝི་དྷཾ ཙ་ར་སྶུ ཨ་སུ་ཙིཾ,
ན ཧི པཱ་ཎེ་སུ ཨ་ས་ཉྙ་ཏཾ ཨ་ཝ་ཎྞ་ཡིཾ་སུ ས་པྤ་ཉྙཱ;
ནོ་ཏི པ་ཋ་མཾ ཨ་ཝོ་ཙ་ཧཾ བྷ་ནྟེ,
པ་ཙྪཱ ཏེ ཝ་ཙ་ནཾ ཏ་ཐེ་ཝ་ཀཱ་སིཾ.
༨༩༨. ‘‘མཱ ཙ པ་ར་ཛ་ན་སྶ ར་ཀྑི་ཏ་མྤི, ཨཱ་དཱ་ཏ་བྦ་མ་མ་ཉྙི་ཐོ [མ་མ་ཉྙི་ཏྠ (སཱི. པཱི.)] ཨ་དི་ནྣཾ;
ནོ་ཏི པ་ཋ་མཾ ཨ་ཝོ་ཙ་ཧཾ བྷ་ནྟེ, པ་ཙྪཱ ཝ་ཙ་ནཾ ཏ་ཐེ་ཝ་ཀཱ་སིཾ.
༨༩༩. ‘‘མཱ ཙ པ་ར་ཛ་ན་སྶ ར་ཀྑི་ཏཱ་ཡོ, པ་ར་བྷ་རི་ཡཱ ཨ་ག་མཱ ཨ་ན་རི་ཡ་མེ་ཏཾ;
ནོ་ཏི པ་ཋ་མཾ ཨ་ཝོ་ཙ་ཧཾ བྷ་ནྟེ, པ་ཙྪཱ ཏེ ཝ་ཙ་ནཾ ཏ་ཐེ་ཝ་ཀཱ་སིཾ;
༩༠༠. ‘‘མཱ ཙ ཝི་ཏ་ཐཾ ཨ་ཉྙ་ཐཱ ཨ་བྷཱ་ཎི,
ན ཧི མུ་སཱ་ཝཱ་དཾ ཨ་ཝ་ཎྞ་ཡིཾ་སུ ས་པྤ་ཉྙཱ;
ནོ་ཏི པ་ཋ་མཾ ཨ་ཝོ་ཙ་ཧཾ བྷ་ནྟེ, པ་ཙྪཱ ཏེ ཝ་ཙ་ནཾ ཏ་ཐེ་ཝ་ཀཱ་སིཾ.
༩༠༡. ‘‘ཡེ་ན ཙ པུ་རི་ས་སྶ ཨ་པེ་ཏི ས་ཉྙཱ, ཏཾ མ་ཛྫཾ པ་རི་ཝ་ཛྫ་ཡ་སྶུ ས་བྦཾ;
ནོ་ཏི པ་ཋ་མཾ ཨ་ཝོ་ཙ་ཧཾ བྷ་ནྟེ, པ་ཙྪཱ ཏེ ཝ་ཙ་ནཾ ཏ་ཐེ་ཝ་ཀཱ་སིཾ.
༩༠༢. ‘‘སྭཱ་ཧཾ ཨི་དྷ པ་ཉྩ སི་ཀྑཱ ཀ་རི་ཏྭཱ, པ་ཊི་པ་ཛྫི་ཏྭཱ ཏ་ཐཱ་ག་ཏ་སྶ དྷ་མྨེ;
དྭེ་པ་ཐ་མ་ག་མཱ་སིཾ ཙོ་ར་མ་ཛ྄ཛྷེ, ཏེ མཾ ཏ་ཏྠ ཝ་དྷིཾ་སུ བྷོ་ག་ཧེ་ཏུ.
༩༠༣. ‘‘ཨེ་ཏྟ་ཀ་མི་དཾ ཨ་ནུ་སྶ་རཱ་མི ཀུ་ས་ལཾ, ཏ་ཏོ པ་རཾ ན མེ ཝི་ཛྫ་ཏི ཨ་ཉྙཾ;
ཏེ་ན སུ་ཙ་རི་ཏེ་ན ཀ་མྨུ་ནཱ་ཧཾ [ཀ་མྨ་ནཱ་ཧཾ (སཱི.)], ཨུ་པྤ་ནྣོ [ཨུ་པ་པ་ནྣོ (བ་ཧཱུ་སུ)] ཏི་དི་ཝེ་སུ ཀཱ་མ་ཀཱ་མཱི.
༩༠༤. ‘‘པ་སྶ ཁ་ཎ་མུ་ཧུ་ཏྟ་ས་ཉྙ་མ་སྶ, ཨ་ནུ་དྷ་མྨ་པྤ་ཊི་པ་ཏྟི་ཡཱ ཝི་པཱ་ཀཾ;
ཛ་ལ་མི་ཝ ཡ་ས་སཱ ས་མེ་ཀྑ་མཱ་ནཱ, བ་ཧུ་ཀཱ མཾ པི་ཧ་ཡ་ནྟི ཧཱི་ན་ཀ་མྨཱ.
༩༠༥. ‘‘པ་སྶ ཀ་ཏི་པ་ཡཱ་ཡ དེ་ས་ནཱ་ཡ, སུ་ག་ཏི་ཉྩ་མྷི ག་ཏོ སུ་ཁ་ཉྩ པ་ཏྟོ;
ཡེ ཙ ཏེ ས་ཏ་ཏཾ སུ་ཎ་ནྟི དྷ་མྨཾ, མ་ཉྙེ ཏེ ཨ་མ་ཏཾ ཕུ་ས་ནྟི ཁེ་མཾ.
༩༠༦. ‘‘ཨ་པྤ་མྤི ཀ་ཏཾ མ་ཧཱ་ཝི་པཱ་ཀཾ, ཝི་པུ་ལཾ ཧོ་ཏི [ཝི་པུ་ལ་ཕ་ལཾ (ཀ.)] ཏ་ཐཱ་ག་ཏ་སྶ དྷ་མྨེ;
པ་སྶ ཀ་ཏ་པུ་ཉྙ་ཏཱ་ཡ ཚ་ཏྟོ, ཨོ་བྷཱ་སེ་ཏི པ་ཐ་ཝིཾ ཡ་ཐཱ་པི སཱུ་རི་ཡོ.
༩༠༧. ‘‘ཀི་མི་དཾ ཀུ་ས་ལཾ ཀི་མཱ་ཙ་རེ་མ, ཨི་ཙྩེ་ཀེ ཧི ས་མེ་ཙྩ མ་ནྟ་ཡ་ནྟི;
ཏེ མ་ཡཾ པུ་ན་རེ་ཝ [པུ་ན་པི (?)] ལ་དྡྷ མཱ་ནུ་ས་ཏྟཾ, པ་ཊི་པ་ནྣཱ ཝི་ཧ་རེ་མུ སཱི་ལ་ཝ་ནྟོ.
༩༠༨. ‘‘བ་ཧུ་ཀཱ་རོ ཨ་ནུ་ཀ་མྤ་ཀོ ཙ ས་ཏྠཱ, ཨི་ཏི མེ ས་ཏི ཨ་ག་མཱ དི་ཝཱ དི་ཝ་སྶ;
སྭཱ་ཧཾ ཨུ་པ་ག་ཏོ་མྷི ས་ཙྩ་ནཱ་མཾ, ཨ་ནུ་ཀ་མྤ་སྶུ པུ་ན་པི སུ་ཎེ་མུ [སུ་ཎོ་མ (སཱི.), སུ་ཎོ་མི (སྱཱ.)] དྷ་མྨཾ.
༩༠༩. ‘‘ཡེ ཙི་དྷ [ཡེ་དྷ (སཱི. སྱཱ. པཱི.), ཡེ ཨི་དྷ (ཀ.)] པ་ཛ་ཧ་ནྟི ཀཱ་མ་རཱ་གཾ, བྷ་ཝ་རཱ་གཱ་ནུ་ས་ཡ་ཉྩ པ་ཧཱ་ཡ མོ་ཧཾ;
ན ཙ ཏེ པུ་ན་མུ་པེ་ནྟི ག་བྦྷ་སེ་ཡྻཾ, པ་རི་ནི་བྦཱ་ན་ག་ཏཱ ཧི སཱི་ཏི་བྷཱུ་ཏཱ’’ཏི.
ཚ་ཏྟ་མཱ་ཎ་ཝ་ཀ་ཝི་མཱ་ནཾ ཏ་ཏི་ཡཾ.
༤. ཀ་ཀྐ་ཊ་ཀ་ར་ས་དཱ་ཡ་ཀ་ཝི་མཱ་ན་ཝ་ཏྠུ
༩༡༠. ‘‘ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནཾ, ས་མ་ནྟ་ཏོ དྭཱ་ད་ས ཡོ་ཛ་ནཱ་ནི;
ཀཱུ་ཊཱ་གཱ་རཱ ས་ཏྟ་ས་ཏཱ ཨུ་ལཱ༹་རཱ, ཝེ་ལུ༹་རི་ཡ་ཐ་མྦྷཱ རུ་ཙ་ཀ་ཏྠ་ཏཱ [རུ་ཙི་ར་ཏྠ་ཏཱ (སྱཱ. ཀ.) ༦༤༦ གཱ་ཐཱ་ཡཾ ‘‘རུ་ཙ་ཀུ་པ་ཀི་ཎྞཾ’’ཏི པ་ད་སྶ སཾ་ཝ་ཎྞ་ནཱ པ་སྶི་ཏ་བྦཱ] སུ་བྷཱ.
༩༡༡. ‘‘ཏ་ཏྠ་ཙྪ་སི པི་ཝ་སི ཁཱ་ད་སི ཙ, དི་བྦཱ ཙ ཝཱི་ཎཱ པ་ཝ་ད་ནྟི ཝ་གྒུཾ [ཝ་གྒུ (སཱི. ཀ.), ཝ་གྒཱུ (སྱཱ.)];
དི་བྦཱ ར་སཱ ཀཱ་མ་གུ་ཎེ་ཏྠ པ་ཉྩ, ནཱ་རི་ཡོ ཙ ན་ཙྩ་ནྟི སུ་ཝ་ཎྞ་ཚ་ནྣཱ.
༩༡༢. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༩༡༣. ‘‘པུ་ཙྪཱ་མི ཏཾ དེ་ཝ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏོ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༩༡༤. སོ དེ་ཝ་པུ་ཏྟོ ཨ་ཏྟ་མ་ནོ, མོ་གྒ་ལླཱ་ནེ་ན པུ་ཙྪི་ཏོ;
པ་ཉྷཾ པུ་ཊྛོ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༩༡༥. ‘‘ས་ཏི་ས་མུ་པྤཱ་ད་ཀ་རོ, དྭཱ་རེ ཀ་ཀྐ་ཊ་ཀོ ཋི་ཏོ;
ནི་ཊྛི་ཏོ ཛཱ་ཏ་རཱུ་པ་སྶ, སོ་བྷ་ཏི ད་ས་པཱ་ད་ཀོ.
༩༡༦. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.
༩༡༧. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏོ ཡ་མ་ཀཱ་སི པུ་ཉྙཾ;
ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.
ཀ་ཀྐ་ཊ་ཀ་ར་ས་དཱ་ཡ་ཀ་ཝི་མཱ་ནཾ ཙ་ཏུ་ཏྠཾ.
(ཨ་ན་ནྟ་རཾ པ་ཉྩ་ཝི་མཱ་ནཾ ཡ་ཐཱ ཀ་ཀྐ་ཊ་ཀ་ར་ས་དཱ་ཡ་ཀ་ཝི་མཱ་ནཾ ཏ་ཐཱ ཝི་ཏྠཱ་རེ་ཏ་བྦཾ)
༥. དྭཱ་ར་པཱ་ལ་ཝི་མཱ་ན་ཝ་ཏྠུ
༩༡༨. ‘‘ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནཾ, ས་མ་ནྟ་ཏོ དྭཱ་ད་ས ཡོ་ཛ་ནཱ་ནི;
ཀཱུ་ཊཱ་གཱ་རཱ ས་ཏྟ་ས་ཏཱ ཨུ་ལཱ༹་རཱ, ཝེ་ལུ༹་རི་ཡ་ཐ་མྦྷཱ རུ་ཙ་ཀ་ཏྠ་ཏཱ སུ་བྷཱ.
༩༡༩. ‘‘ཏ་ཏྠ་ཙྪ་སི པི་ཝ་སི ཁཱ་ད་སི ཙ, དི་བྦཱ ཙ ཝཱི་ཎཱ པ་ཝ་ད་ནྟི ཝ་གྒུཾ;
དི་བྦཱ ར་སཱ ཀཱ་མ་གུ་ཎེ་ཏྠ པ་ཉྩ, ནཱ་རི་ཡོ ཙ ན་ཙྩ་ནྟི སུ་ཝ་ཎྞ་ཚ་ནྣཱ.
༩༢༠. ‘‘ཀེ་ན ཏེ་ཏཱ་དི་སོ ཝ་ཎྞོ…པེ… ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༩༢༢. སོ དེ་ཝ་པུ་ཏྟོ ཨ་ཏྟ་མ་ནོ, མོ་གྒ་ལླཱ་ནེ་ན པུ་ཙྪི་ཏོ;
པ་ཉྷཾ པུ་ཊྛོ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༩༢༣. ‘‘དི་བྦཾ མ་མཾ ཝ་སྶ་ས་ཧ་སྶ་མཱ་ཡུ, ཝཱ་ཙཱ་བྷི་གཱི་ཏཾ མ་ན་སཱ པ་ཝ་ཏྟི་ཏཾ;
ཨེ་ཏྟཱ་ཝ་ཏཱ ཋ་སྶ་ཏི པུ་ཉྙ་ཀ་མྨོ, དི་བྦེ་ཧི ཀཱ་མེ་ཧི ས་མ་ངྒི་བྷཱུ་ཏོ.
༩༢༤. ‘‘ཏེ་ན མེ་ཏཱ་དི་སོ ཝ་ཎྞོ…པེ…ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.