༩. པ་ཋ་མ་ད་བྦ་སུ་ཏྟཾ

༧༩. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཨ་ཐ ཁོ ཨཱ་ཡ་སྨཱ ད་བྦོ མ་ལླ་པུ་ཏྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ད་བྦོ མ་ལླ་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘པ་རི་ནི་བྦཱ་ན་ཀཱ་ལོ མེ དཱ་ནི, སུ་ག་ཏཱ’’ཏི. ‘‘ཡ་སྶ་དཱ་ནི ཏྭཾ, ད་བྦ, ཀཱ་ལཾ མ་ཉྙ་སཱི’’ཏི.

ཨ་ཐ ཁོ ཨཱ་ཡ་སྨཱ ད་བྦོ མ་ལླ་པུ་ཏྟོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ ཝེ་ཧཱ་སཾ ཨ་བྦྷུ་གྒ་ནྟྭཱ ཨཱ་ཀཱ་སེ ཨ་ནྟ་ལི་ཀྑེ པ་ལླ་ངྐེ་ན ནི་སཱི་དི་ཏྭཱ ཏེ་ཛོ་དྷཱ་ཏུཾ ས་མཱ་པ་ཛྫི་ཏྭཱ ཝུ་ཊྛ་ཧི་ཏྭཱ པ་རི་ནི་བྦཱ་ཡི.

ཨ་ཐ ཁོ ཨཱ་ཡ་སྨ་ཏོ ད་བྦ་སྶ མ་ལླ་པུ་ཏྟ་སྶ ཝེ་ཧཱ་སཾ ཨ་བྦྷུ་གྒ་ནྟྭཱ ཨཱ་ཀཱ་སེ ཨ་ནྟ་ལི་ཀྑེ པ་ལླ་ངྐེ་ན ནི་སཱི་དི་ཏྭཱ ཏེ་ཛོ་དྷཱ་ཏུཾ ས་མཱ་པ་ཛྫི་ཏྭཱ ཝུ་ཊྛ་ཧི་ཏྭཱ པ་རི་ནི་བྦུ་ཏ་སྶ ས་རཱི་ར་སྶ ཛྷཱ་ཡ་མཱ་ན་སྶ ཌ་ཡ྄ཧ་མཱ་ན་སྶ ནེ་ཝ ཚཱ་རི་ཀཱ པ་ཉྙཱ་ཡི་ཏྠ ན མ་སི. སེ་ཡྻ་ཐཱ་པི ནཱ་མ ས་པྤི་སྶ ཝཱ ཏེ་ལ་སྶ ཝཱ ཛྷཱ་ཡ་མཱ་ན་སྶ ཌ་ཡ྄ཧ་མཱ་ན་སྶ ནེ་ཝ ཚཱ་རི་ཀཱ པ་ཉྙཱ་ཡ་ཏི ན མ་སི; ཨེ་ཝ་མེ་ཝ ཨཱ་ཡ་སྨ་ཏོ ད་བྦ་སྶ མ་ལླ་པུ་ཏྟ་སྶ ཝེ་ཧཱ་སཾ ཨ་བྦྷུ་གྒ་ནྟྭཱ ཨཱ་ཀཱ་སེ ཨ་ནྟ་ལི་ཀྑེ པ་ལླ་ངྐེ་ན ནི་སཱི་དི་ཏྭཱ ཏེ་ཛོ་དྷཱ་ཏུཾ ས་མཱ་པ་ཛྫི་ཏྭཱ ཝུ་ཊྛ་ཧི་ཏྭཱ པ་རི་ནི་བྦུ་ཏ་སྶ ས་རཱི་ར་སྶ ཛྷཱ་ཡ་མཱ་ན་སྶ ཌ་ཡ྄ཧ་མཱ་ན་སྶ ནེ་ཝ ཚཱ་རི་ཀཱ པ་ཉྙཱ་ཡི་ཏྠ ན མ་སཱི་ཏི.

ཨ་ཐ ཁོ བྷ་ག་ཝཱ ཨེ་ཏ་མ་ཏྠཾ ཝི་དི་ཏྭཱ ཏཱ་ཡཾ ཝེ་ལཱ་ཡཾ ཨི་མཾ ཨུ་དཱ་ནཾ ཨུ་དཱ་ནེ་སི –

‘‘ཨ་བྷེ་དི ཀཱ་ཡོ ནི་རོ་དྷི ས་ཉྙཱ,

ཝེ་ད་ནཱ སཱི་ཏི་བྷ་ཝིཾ་སུ [པཱི་ཏི་ད་ཧཾ་སུ (སཱི. པཱི.), སཱི་ཏི་ད་ཧིཾ་སུ (ཀ.)] ས་བྦཱ;

ཝཱུ་པ་ས་མིཾ་སུ ས་ངྑཱ་རཱ,

ཝི་ཉྙཱ་ཎཾ ཨ་ཏྠ་མཱ་ག་མཱ’’ཏི. ན་ཝ་མཾ;