༨. པི་ཎྜ་པཱ་ཏི་ཀ་སུ་ཏྟཾ

༢༨. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ་ནཾ བྷི་ཀྑཱུ་ནཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ ཀ་རེ་རི་མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི –

‘‘པི་ཎྜ་པཱ་ཏི་ཀོ, ཨཱ་ཝུ་སོ, བྷི་ཀྑུ པི་ཎྜཱ་ཡ ཙ་ར་ནྟོ ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཙ་ཀྑུ་ནཱ རཱུ་པེ པ་སྶི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ སོ་ཏེ་ན ས་དྡེ སོ་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ གྷཱ་ནེ་ན ག་ནྡྷེ གྷཱ་ཡི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཛི་ཝ྄ཧཱ་ཡ ར་སེ སཱ་ཡི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཀཱ་ཡེ་ན ཕོ་ཊྛ་བྦེ ཕུ་སི་ཏུཾ. པི་ཎྜ་པཱ་ཏི་ཀོ, ཨཱ་ཝུ་སོ, བྷི་ཀྑུ ས་ཀྐ་ཏོ ག་རུ་ཀ་ཏོ མཱ་ནི་ཏོ པཱུ་ཛི་ཏོ ཨ་པ་ཙི་ཏོ པི་ཎྜཱ་ཡ ཙ་ར་ཏི. ཧ་ནྡཱ་ཝུ་སོ, མ་ཡ་མྤི པི་ཎྜ་པཱ་ཏི་ཀཱ ཧོ་མ. མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ ཙ་ཀྑུ་ནཱ རཱུ་པེ པ་སྶི་ཏུཾ, མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ སོ་ཏེ་ན ས་དྡེ སོ་ཏུཾ, མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ གྷཱ་ནེ་ན ག་ནྡྷེ གྷཱ་ཡི་ཏུཾ, མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ ཛི་ཝ྄ཧཱ་ཡ ར་སེ སཱ་ཡི་ཏུཾ, མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ ཀཱ་ཡེ་ན ཕོ་ཊྛ་བྦེ ཕུ་སི་ཏུཾ; མ་ཡ་མྤི ས་ཀྐ་ཏཱ ག་རུ་ཀ་ཏཱ མཱ་ནི་ཏཱ པཱུ་ཛི་ཏཱ ཨ་པ་ཙི་ཏཱ པི་ཎྜཱ་ཡ ཙ་རི་སྶཱ་མཱ’’ཏི. ཨ་ཡ་ཉྩ་ར་ཧི ཏེ་སཾ བྷི་ཀྑཱུ་ནཾ ཨ་ནྟ་རཱ་ཀ་ཐཱ ཧོ་ཏི ཝི་པྤ་ཀ་ཏཱ.

ཨ་ཐ ཁོ བྷ་ག་ཝཱ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ན ཀ་རེ་རི་མ་ཎྜ་ལ་མཱ་ལོ༹ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ནི་ས་ཛྫ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཀཱ་ཡ ནུ་ཏྠ, བྷི་ཀྑ་ཝེ, ཨེ་ཏ་ར་ཧི ཀ་ཐཱ་ཡ ས་ནྣི་སི་ནྣཱ, ཀཱ ཙ པ་ན ཝོ ཨ་ནྟ་རཱ་ཀ་ཐཱ ཝི་པྤ་ཀ་ཏཱ’’ཏི?

‘‘ཨི་དྷ, བྷ་ནྟེ, ཨ་མྷཱ་ཀཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ ཀ་རེ་རི་མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི –

‘པི་ཎྜ་པཱ་ཏི་ཀོ, ཨཱ་ཝུ་སོ, བྷི་ཀྑུ པི་ཎྜཱ་ཡ ཙ་ར་ནྟོ ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཙ་ཀྑུ་ནཱ རཱུ་པེ པ་སྶི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ སོ་ཏེ་ན ས་དྡེ སོ་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ གྷཱ་ནེ་ན ག་ནྡྷེ གྷཱ་ཡི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཛི་ཝ྄ཧཱ་ཡ ར་སེ སཱ་ཡི་ཏུཾ, ལ་བྷ་ཏི ཀཱ་ལེ་ན ཀཱ་ལཾ མ་ནཱ་པི་ཀེ ཀཱ་ཡེ་ན ཕོ་ཊྛ་བྦེ ཕུ་སི་ཏུཾ. པི་ཎྜ་པཱ་ཏི་ཀོ, ཨཱ་ཝུ་སོ, བྷི་ཀྑུ ས་ཀྐ་ཏོ ག་རུ་ཀ་ཏོ མཱ་ནི་ཏོ པཱུ་ཛི་ཏོ ཨ་པ་ཙི་ཏོ པི་ཎྜཱ་ཡ ཙ་ར་ཏི. ཧ་ནྡཱ་ཝུ་སོ, མ་ཡ་མྤི པི་ཎྜ་པཱ་ཏི་ཀཱ ཧོ་མ. མ་ཡ་མྤི ལ་ཙྪཱ་མ ཀཱ་ལེ་ན ཀཱ་ལཾ མ་ནཱ་པི་ཀེ ཙ་ཀྑུ་ནཱ རཱུ་པེ པ་སྶི་ཏུཾ…པེ… ཀཱ་ཡེ་ན ཕོ་ཊྛ་བྦེ ཕུ་སི་ཏུཾ. མ་ཡ་མྤི ས་ཀྐ་ཏཱ ག་རུ་ཀ་ཏཱ མཱ་ནི་ཏཱ པཱུ་ཛི་ཏཱ ཨ་པ་ཙི་ཏཱ པི་ཎྜཱ་ཡ ཙ་རི་སྶཱ་མཱ’ཏི. ཨ་ཡཾ ཁོ ནོ, བྷ་ནྟེ, ཨ་ནྟ་རཱ་ཀ་ཐཱ ཝི་པྤ་ཀ་ཏཱ, ཨ་ཐ བྷ་ག་ཝཱ ཨ་ནུ་པྤ་ཏྟོ’’ཏི.

‘‘ན ཁྭེ་ཏཾ, བྷི་ཀྑ་ཝེ, ཏུ་མྷཱ་ཀཾ པ་ཏི་རཱུ་པཾ ཀུ་ལ་པུ་ཏྟཱ་ནཾ ས་དྡྷཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏཱ་ནཾ ཡཾ ཏུ་མྷེ ཨེ་ཝ་རཱུ་པིཾ ཀ་ཐཾ ཀ་ཐེ་ཡྻཱ་ཐ. ས་ནྣི་པ་ཏི་ཏཱ་ནཾ ཝོ, བྷི་ཀྑ་ཝེ, དྭ་ཡཾ ཀ་ར་ཎཱི་ཡཾ – དྷ་མྨཱི ཝཱ ཀ་ཐཱ ཨ་རི་ཡོ ཝཱ ཏུ་ཎྷཱི་བྷཱ་ཝོ’’ཏི.

ཨ་ཐ ཁོ བྷ་ག་ཝཱ ཨེ་ཏ་མ་ཏྠཾ ཝི་དི་ཏྭཱ ཏཱ་ཡཾ ཝེ་ལཱ་ཡཾ ཨི་མཾ ཨུ་དཱ་ནཾ ཨུ་དཱ་ནེ་སི –

‘‘པི་ཎྜ་པཱ་ཏི་ཀ་སྶ བྷི་ཀྑུ་ནོ,

ཨ་ཏྟ་བྷ་ར་སྶ ཨ་ན་ཉྙ་པོ་སི་ནོ;

དེ་ཝཱ པི་ཧ་ཡ་ནྟི ཏཱ་དི་ནོ,

ནོ ཙེ ས་དྡ་སི་ལོ་ཀ་ནི་སྶི་ཏོ’’ཏི. ཨ་ཊྛ་མཾ;