༥. སུ་ཀྐཱ་ཐེ་རཱི་ཨ་པ་དཱ་ནཾ
༡༡༡. ‘‘ཨེ་ཀ་ན་ཝུ་ཏི་ཏོ ཀ་པྤེ, ཝི་པ་སྶཱི ནཱ་མ ནཱ་ཡ་ཀོ;
ཨུ་པྤ་ཛྫི ཙཱ་རུ་ད་སྶ་ནོ, ས་བྦ་དྷ་མྨ་ཝི་པ་སྶ་ཀོ.
༡༡༢. ‘‘ཏ་དཱ་ཧཾ བ་ནྡྷུ་མ་ཏི་ཡཾ, ཛཱ་ཏཱ ཨ་ཉྙ་ཏ་རེ ཀུ་ལེ;
དྷ་མྨཾ སུ་ཏྭཱ་ན མུ་ནི་ནོ, པ་བྦ་ཛིཾ ཨ་ན་གཱ་རི་ཡཾ.
༡༡༣. ‘‘བ་ཧུ་སྶུ་ཏཱ དྷ་མྨ་དྷ་རཱ, པ་ཊི་བྷཱ་ན་ཝ་ཏཱི ཏ་ཐཱ;
ཝི་ཙི་ཏྟ་ཀ་ཐི་ཀཱ ཙཱ་པི, ཛི་ན་སཱ་ས་ན་ཀཱ་རི་ཀཱ.
༡༡༤. ‘‘ཏ་དཱ དྷ་མྨ་ཀ་ཐཾ ཀ་ཏྭཱ, ཧི་ཏཱ་ཡ ཛ་ན་ཏཾ བ་ཧུཾ [ཛ་ན་ཏཱ་ཡ ཧི་ཏཾ བ་ཧུཾ (སཱི.) … ས་དཱ (སྱཱ.), ཧི་ཏཱ་ཡ ཛ་ན་སཾ་ས་རིཾ (པཱི.)];
ཏ་ཏོ ཙུ་ཏཱ་ཧཾ ཏུ་སི་ཏཾ, ཨུ་པ་པ་ནྣཱ ཡ་ས་སྶི་ནཱི.
༡༡༥. ‘‘ཨེ་ཀ་ཏིཾ་སེ ཨི་ཏོ ཀ་པྤེ, སི་ཁཱི ཝི་ཡ སི་ཁཱི ཛི་ནོ;
ཏ་པ་ནྟོ ཡ་ས་སཱ ལོ་ཀེ [ལོ་ཀཾ (སྱཱ. པཱི.)], ཨུ་པྤ་ཛྫི ཝ་ད་ཏཾ ཝ་རོ.
༡༡༦. ‘‘ཏ་དཱ་པི པ་བྦ་ཛི་ཏྭཱ་ན, བུ་དྡྷ་སཱ་ས་ན་ཀོ་ཝི་དཱ;
ཛོ་ཏེ་ཏྭཱ ཛི་ན་ཝཱ་ཀྱཱ་ནི, ཏ་ཏོ་པི ཏི་དི་ཝཾ ག་ཏཱ.
༡༡༧. ‘‘ཨེ་ཀ་ཏིཾ་སེ་ཝ ཀ་པྤ་མྷི, ཝེ་སྶ་བྷཱུ ནཱ་མ ནཱ་ཡ་ཀོ;
ཨུ་པྤ་ཛྫི་ཏྠ མ་ཧཱ་ཉཱ་ཎཱི, ཏ་དཱ་པི ཙ ཏ་ཐེ་ཝ་ཧཾ.
༡༡༨. ‘‘པ་བྦ་ཛི་ཏྭཱ དྷ་མྨ་དྷ་རཱ, ཛོ་ཏ་ཡིཾ ཛི་ན་སཱ་ས་ནཾ;
ག་ནྟྭཱ མ་རུ་པུ་རཾ ར་མྨཾ, ཨ་ནུ་བྷོ་སིཾ མ་ཧཱ་སུ་ཁཾ.
༡༡༩. ‘‘ཨི་མ་མྷི བྷ་དྡ་ཀེ ཀ་པྤེ, ཀ་ཀུ་ས་ནྡྷོ ཛི་ནུ་ཏྟ་མོ;
ཨུ་པྤ་ཛྫི ན་ར་ས་ར་ཎོ [ན་ར་ས་དྡཱུ་ལོ (སཱི. སྱཱ. པཱི.)], ཏ་དཱ་པི ཙ ཏ་ཐེ་ཝ་ཧཾ.
༡༢༠. ‘‘པ་བྦ་ཛི་ཏྭཱ མུ་ནི་མ་ཏཾ, ཛོ་ཏ་ཡི་ཏྭཱ ཡ་ཐཱ་ཡུ་ཀཾ;
ཏ་ཏོ ཙུ་ཏཱ་ཧཾ ཏི་དི་ཝཾ, ཨ་གཾ ས་བྷ་ཝ་ནཾ ཡ་ཐཱ.
༡༢༡. ‘‘ཨི་མ་སྨིཾ་ཡེ་ཝ ཀ་པྤ་མྷི, ཀོ་ཎཱ་ག་མ་ན་ནཱ་ཡ་ཀོ;
ཨུ་པྤ་ཛྫི ལོ་ཀ་ས་ར་ཎོ, ཨ་ར་ཎོ ཨ་མ་ཏ་ངྒ་ཏོ [ཝ་ད་ཏཾ ཝ་རོ, ས་བྦ་ས་ཏྟཱ་ན་མུ་ཏྟ་མོ (སྱཱ.)].
༡༢༢. ‘‘ཏ་དཱ་པི པ་བྦ་ཛི་ཏྭཱ་ན, སཱ་ས་ནེ ཏ་སྶ ཏཱ་དི་ནོ;
བ་ཧུ་སྶུ་ཏཱ དྷ་མྨ་དྷ་རཱ, ཛོ་ཏ་ཡིཾ ཛི་ན་སཱ་ས་ནཾ.
༡༢༣. ‘‘ཨི་མ་སྨིཾ་ཡེ་ཝ ཀ་པྤ་མྷི, ཀ་སྶ་པོ མུ་ནི་མུ་ཏྟ་མོ;
ཨུ་པྤ་ཛྫི ལོ་ཀ་ས་ར་ཎོ, ཨ་ར་ཎོ མ་ར་ཎ་ནྟ་གཱུ.
༡༢༤. ‘‘ཏ་སྶཱ་པི ན་ར་ཝཱི་ར་སྶ, པ་བྦ་ཛི་ཏྭཱ་ན སཱ་ས་ནེ;
པ་རི་ཡཱ་པུ་ཊ་ས་དྡྷ་མྨཱ, པ་རི་པུ་ཙྪཱ་ཝི་སཱ་ར་དཱ.
༡༢༥. ‘‘སུ་སཱི་ལཱ ལ་ཛྫི་ནཱི ཙེ་ཝ, ཏཱི་སུ སི་ཀྑཱ་སུ ཀོ་ཝི་དཱ;
བ་ཧུཾ དྷ་མྨ་ཀ་ཐཾ ཀ་ཏྭཱ, ཡཱ་ཝ་ཛཱི་ཝཾ མ་ཧཱ་མུ་ནེ.
༡༢༦. ‘‘ཏེ་ན ཀ་མྨ་ཝི་པཱ་ཀེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༢༧. ‘‘པ་ཙྪི་མེ ཙ བྷ་ཝེ དཱ་ནི, གི་རི་བྦ་ཛ་པུ་རུ་ཏྟ་མེ;
ཛཱ་ཏཱ སེ་ཊྛི་ཀུ་ལེ ཕཱི་ཏེ, མ་ཧཱ་ར་ཏ་ན་ས་ཉྩ་ཡེ.
༡༢༨. ‘‘ཡ་དཱ བྷི་ཀྑུ་ས་ཧ་སྶེ་ན, པ་རི་ཝུ་ཏོ ལོ་ཀ་ནཱ་ཡ་ཀོ;
ཨུ་པཱ་ག་མི རཱ་ཛ་ག་ཧཾ, ས་ཧ་སྶ་ཀྑེ་ན ཝ་ཎྞི་ཏོ.
༡༢༩. ‘‘‘ད་ནྟོ ད་ནྟེ་ཧི ས་ཧ པུ་རཱ་ཎ་ཛ་ཊི་ལེ་ཧི, ཝི་པྤ་མུ་ཏྟོ ཝི་པྤ་མུ་ཏྟེ་ཧི;
སི་ངྒཱི་ནི་ཀྑ་ས་ཝ་ཎྞོ, རཱ་ཛ་ག་ཧཾ པཱ་ཝི་སི བྷ་ག་ཝཱ’.
༡༣༠. ‘‘དི་སྭཱ བུ་དྡྷཱ་ནུ་བྷཱ་ཝཾ ཏཾ, སུ་ཏྭཱ་ཝ གུ་ཎ་ས་ཉྩ་ཡཾ;
བུ་དྡྷེ ཙི་ཏྟཾ པ་སཱ་དེ་ཏྭཱ, པཱུ་ཛ་ཡིཾ ཏཾ ཡ་ཐཱ་བ་ལཾ.
༡༣༡. ‘‘ཨ་པ་རེ་ན ཙ ཀཱ་ལེ་ན, དྷ་མྨ་དི་ནྣཱ་ཡ ས་ནྟི་ཀེ;
ཨ་གཱ་རཱ ནི་ཀྑ་མི་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.
༡༣༢. ‘‘ཀེ་སེ་སུ ཚི་ཛྫ་མཱ་ནེ་སུ, ཀི་ལེ་སེ ཛྷཱ་པ་ཡིཾ ཨ་ཧཾ;
ཨུ་གྒ་ཧིཾ སཱ་ས་ནཾ ས་བྦཾ, པ་བྦ་ཛི་ཏྭཱ་ཙི་རེ་ན་ཧཾ.
༡༣༣. ‘‘ཏ་ཏོ དྷ་མྨ་མ་དེ་སེ་སིཾ, མ་ཧཱ་ཛ་ན་ས་མཱ་ག་མེ;
དྷ་མྨེ དེ་སི་ཡ་མཱ་ན་མྷི, དྷ་མྨཱ་བྷི་ས་མ་ཡོ ཨ་ཧུ.
༡༣༤. ‘‘ནེ་ཀ་པཱ་ཎ་ས་ཧ་སྶཱ་ནཾ, ཏཾ ཝི་དི་ཏྭཱ་ཏི་ཝི་མྷི་ཏོ;
ཨ་བྷི་པྤ་ས་ནྣོ མེ ཡ་ཀྑོ, བྷ་མི་ཏྭཱ་ན གི་རི་བྦ་ཛཾ.
༡༣༥. ‘‘ཀིཾ མེ ཀ་ཏཱ རཱ་ཛ་ག་ཧེ མ་ནུ་སྶཱ, མ་དྷུཾ པཱི་ཏཱ་ཝ ཨ་ཙྪ་རེ;
ཡེ སུ་ཀྐཾ ན ཨུ་པཱ་ས་ནྟི, དེ་སེ་ནྟིཾ ཨ་མ་ཏཾ པ་དཾ.
༡༣༦. ‘‘ཏ་ཉྩ ཨ་པྤ་ཊི་ཝཱ་ནཱི་ཡཾ, ཨ་སེ་ཙ་ན་ཀ་མོ་ཛ་ཝཾ;
པི་ཝ་ནྟི མ་ཉྙེ ས་པྤ་ཉྙཱ, ཝ་ལཱ་ཧ་ཀ་མི་ཝ་དྡྷ་གཱུ.
༡༣༧. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
ཙེ་ཏོ་པ་རི་ཡ་ཉཱ་ཎ་སྶ, ཝ་སཱི ཧོ་མི མ་ཧཱ་མུ་ནེ.
༡༣༨. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༡༣༩. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མ་མ མ་ཧཱ་ཝཱི་ར, ཨུ་པྤ་ནྣཾ ཏ་ཝ ས་ནྟི་ཀེ.
༡༤༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༡༤༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༤༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ སུ་ཀྐཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སུ་ཀྐཱ་ཐེ་རི་ཡཱ་པ་དཱ་ནཾ པ་ཉྩ་མཾ.
པ་ཉྩ་མཾ བྷཱ་ཎ་ཝཱ་རཾ.